Chapter
၄
ၼမ်ႉမၼ်းမေႈမၢႆႈ
၁ မေးၵူၼ်းမဵဝ်းပရေႃးၽႅတ်ႈၵေႃႉၼိုင်ႈမႃးၸူးၵႃႈတီႈဢေးလိသေးလႄႈႁွင်ႉသႅၼ်ႇလႄႈဝႃႈ၊-ၶႃႈၸဝ်ႈႁဝ်းဢၼ်ပဵၼ်ၽူဝ်ၵဝ်ၶႃႈၼႆႉၼၼ်ႉတၢႆယဝ်ႉၶႃႈယဝ်ႉ။ၸဝ်ႈႁဝ်းႁူႉလွင်ႈဢၼ်ၶႃႈၸဝ်ႈၼၼ်ႉပဵၼ်ၵေႃႉဢၼ်ရူဝ်ႇသေႇၵူဝ်ယမ်ထႃႇဝရႃႉၽြႃးၼၼ်ႉယူႇၶႃႈဢေႃႈ။မိူဝ်ႈလဵဝ်ၼႆႉၸဝ်ႈၼီႈမႃးႁႂ်ႈလႆႈဢဝ်လုၵ်ႈၸၢႆးၵဝ်ၶႃႈသွင်ၵေႃႉၶၢမ်ႇႁဵတ်းၶႃႈမၼ်းၶႃႈယဝ်ႉ၊ဝႃႈၼင်ႇၼႆဢေႃႈ။
၂ ဢေးလိသေးၵေႃႈထၢမ်လႄႈဝႃႈ၊-ၵဝ်တၵ်းလႆႈႁဵတ်းၸိူဝ်ႉၼင်ႇႁိုဝ်ပုၼ်ႈမႂ်း။လၢတ်ႈလူး။ၵႃႈၼႂ်းႁိူၼ်းမႂ်းၼၼ်ႉမႂ်းယင်းမီးဢုၵ်ႉၸႃႇၵႃႈသင်၊ဝႃႈၼင်ႇၼႆသေယဝ်ႉမၼ်းၼၼ်ႉၶိုၼ်းလၢတ်ႈလႄႈဝႃႈ၊-ၵႃႈၼႂ်းႁိူၼ်းၵဝ်ၶႃႈၼၼ်ႉလိူဝ်သမေေႃႈၼမ်ႉမၼ်းလုၵ်ႈၼိုင်ႈၵဝ်ၶႃႈဢမ်ႇမီးၵႃႈသင်သေၸိူဝ်ႉသေပိူင်ႈၶႃႈ၊မိူဝ်ႈဢၼ်ဝႃႈၼင်ႇၼႆၸိုင်ဢေးလိသေးလၢတ်ႈလႄႈဝႃႈ၊-
၃ မႂ်းၵႂႃႇလႄႈယိမ်ဢဝ်မေႃႈပဝ်ႇတီႈၵူၼ်းႁိူၼ်းၸမ်ၵၼ်တင်းမႂ်းၵႃႈမီးၼၼ်ႉတႃႉ။
၄ ယႃႇပေယိမ်ဢဝ်ၵေႇၼႃႇၽႅဝ်။မႂ်းတၵ်းလႆႈၶဝ်ႈၵႃႈၼႂ်းႁိူၼ်းမႂ်းသေလႄႈဢိုတ်းႁပ်ႉၽၵ်းတူႁႄႉလပ်ႉမႂ်းဢိၵ်ႇတင်းလုၵ်ႈၸၢႆးမႂ်းဝႆႉသေယဝ်ႉဢဝ်ၼမ်ႉမၼ်းထွၵ်ႇသႂ်ႇၵႃႈၼႂ်းမေႃႈၵႃႈမီးၸိူဝ်းၼၼ်ႉလႄႈဢဝ်ဢၼ်တဵမ်ၸိူဝ်းၼၼ်ႉဝႆႉတီႈၽၢႆႇၼိုင်ႈတႃႉ၊ဝႃႈၼင်ႇၼႆလႄႈ
၅ မၼ်းၵေႃႈဢွၵ်ႇသေၵႃႈတီႈဢေးလိသေးၵႂႃႇသေယဝ်ႉဢိုတ်းႁပ်းၽၵ်းတူႁႄႉလပ်ႉမၼ်းတင်းလုၵ်ႈၸၢႆးမၼ်းၸိူဝ်းၼၼ်ႉဝႆႉသေလႄႈၶဝ်ဢွၼ်ၵၼ်ဢဝ်မေႃႈမႃးၵႃႈတီႈမၼ်းလႄႈမၼ်းၵေႃႈဢဝ်ၼမ်ႉမၼ်းထွၵ်ႇသႂ်ႇမေႃႈၼိုင်ႈယဝ်ႉမေႃႈၼိုင်ႈဢေႃႈ။
၆ မိူဝ်ႈဢၼ်မေႃႈၸိူဝ်းၼၼ်ႉတဵမ်ယဝ်ႉၼၼ်ႉၸိုင်မၼ်းလၢတ်ႈတီႈလုၵ်ႈၸၢႆးမၼ်းၵေႃႉၼိုင်ႈလႄႈဝႃႈ၊-ဢဝ်မေႃႈမႃးထႅင်ႈလုၵ်ႉၼိုင်ႈလူးၵွၼ်ႇတႃႉ၊ဝႃႈၼင်ႇၼႆဢေႃႈ။လုၵ်ႈၸၢႆးမၼ်းၵေႃႈၶိုၼ်းလၢတ်ႈလႄႈဝႃႈ၊-မေႃႈဢမ်ႇမီးထႅင်ႈသေလုၵ်ႉၶႃႈယဝ်ႉ၊မိူဝ်ႈဢၼ်ဝႃႈၼင်ႇၼႆၸိုင်ၼမ်ႉမၼ်းၼၼ်ႉၵေႃႈၵိုတ်းသဝ်းၵႂႃႇဢေႃႈ။
၇ မၼ်းမႃးလႄႈမွၵ်ႇလၢတ်ႈတီႈၵူၼ်းၽြႃးပဵၼ်ၸဝ်ႈလႄႈၵူၼ်းၽြႃးပဵၼ်ၸဝ်ႈၵေႃႈလၢတ်ႈဝႃႈ၊-ၵႂႃႇၶၢႆၼမ်ႉမၼ်းၼၼ်ႉသေလႄႈတႅၼ်းၼီႈမႂ်းတႃႉ။ဢဝ်ၼမ်ႉမၼ်းဢၼ်ၵိုတ်းဢၼ်ၵျၢၼ်ႇၼၼ်ႉလဵင်ႉဢသၢၵ်ႈမႂ်းဢိၵ်ႇတင်းလုၵ်ႈၸၢႆးမႂ်းၸိူဝ်းၼၼ်ႉတႃႉ၊ဝႃႈၼင်ႇၼႆဢေႃႈ။
လုၵ်ႈၸၢႆးၵေႇႁႃႇၸိၶိုၼ်းမီးဢသၢၵ်ႈမႃး
၈ ဝၼ်းၼိုင်ႈဢေးလိသေးၵႂႃႇၵႃႈတီႈဝဵင်းသုၼိမ်ႇတီႈဢၼ်မေႈယိင်းဢၼ်ဢွၵ်ႇၸိုဝ်ဢွၵ်ႇသဵင်ၵေႃႉၼိုင်ႈယူႇၼၼ်ႉလႄႈမေႈယိင်းၼၼ်ႉႁွင်ႉပၢင်းမၼ်းႁႂ်ႈမၼ်းၵိၼ်တၢင်းၵိၼ်တၢင်းၶူပ်းလူၺ်ႈၵၼ်တင်းမၼ်းဢေႃႈ။လိုၼ်းသေၼၼ်ႉမိူဝ်ႈလႂ်သေဢမ်ႇဝႃႈမိူဝ်ႈဢၼ်မၼ်းၸွမ်းသဵၼ်ႈတၢင်းလႄႈႁွတ်ႈထိုင်မႃးၵႃႈတီႈဝဵင်းၼၼ်ႉၸိုင်မၼ်းယၢမ်ႈဝႄႉၶဝ်ႈၵႃႈတီႈႁိူၼ်းၼၼ်ႉႁႂ်ႈလႆႈၵိၼ်တၢင်းၵိၼ်တၢင်းၶူပ်းဢေႃႈ။
၉ မေႈယိင်းၼၼ်ႉလၢတ်ႈတီႈၽူဝ်မၼ်းလႄႈဝႃႈ၊-တူၺ်းလူး။ၵဝ်ၶႃႈႁူႉသၢႆငၢႆလွင်ႈဢၼ်ဝႃႈၵေႃႉဢၼ်ယၢမ်ႈမႃးယူႇၵႃႈတီႈႁိမ်းႁဝ်းတႃႇသေႇၼၼ်ႉပဵၼ်ၵူၼ်းဢၼ်မူတ်းၸၢင်ႇၽြႃးပဵၼ်ၸဝ်ႈၼၼ်ႉၶႃႈဢေႃႈ။
၁၀ ပိူဝ်ႈၼႆလႄႈတႃႉႁဝ်းႁဵတ်းလုၵ်းႁၢၼ်ႉၼိူဝ်ဢၼ်လဵၵ်ႉဢၼ်ဢွၼ်ႇဢၼ်ၼိုင်ႈၵႃႈၼိူဝ်သၢၼ်ၽႃဝၢင်းၼႆႉပုၼ်ႈမၼ်းတႃႉႁဝ်း။ဢဝ်ၵူႇတီႈၼွၼ်း၊ၶူင်ႇတီႈၵိၼ်ၶူင်ႇတီႈၼင်ႈၶူင်ႇတီႈတႆႈၽႆးဝႆႉပုၼ်ႈမၼ်းတႃႉႁဝ်း။မိူဝ်ႈဢၼ်မၼ်းႁွတ်ႈမႃးၵႃႈတီႈႁဝ်းၼၼ်ႉၸိုင်မၼ်းတၵ်းလႆႈလိုဝ်ႈၼွၼ်းၵႃႈတီႈၼၼ်ႉဢေႃႈ၊ဝႃႈၼင်ႇၼႆဢေႃႈ။
၁၁ ဝၼ်းၼိုင်ႈမၼ်းႁွတ်ႈထိုင်ၵႃႈတီႈၼၼ်ႉသေယဝ်ႉၶဝ်ႈၵႃႈၼႂ်းလုၵ်းႁၢၼ်ႉၼိူဝ်ၼၼ်ႉလႄႈၼွၼ်းၵႃႈတီႈၼၼ်ႉဢေႃႈ။
၁၂ မၼ်းလၢတ်ႈတီႈၵေႇႁႃႇၸိၵူၼ်းဢွၼ်ႇမၼ်းလႄႈဝႃႈ၊-ႁွင်ႉဢဝ်မေႈယိင်းၵူၼ်းဝဵင်းသုၼိမ်ႇၼၼ်ႉမႃးတႃႉ၊ဝႃႈၼင်ႇၼႆလႄႈမၼ်းႁွင်ႉမႃးသေယဝ်ႉမေႈယိင်းၼၼ်ႉမႃးၸုၵ်းယူႇၵႃႈတီႈၽၢႆႇၼႃႈမၼ်းဢေႃႈ။
၁၃ မၼ်းလၢတ်ႈတီႈၵူၼ်းဢွၼ်ႇမၼ်းႁႂ်ႈထၢမ်တီႈမၼ်းၼၼ်ႉလႄႈဝႃႈ၊-ၵွပ်ႈပိူဝ်ႈဢၼ်မႂ်းလဵင်ႉလူလုမ်းလႃးတီႈႁဝ်းထၢၼ်ႇၼႆႉၼၼ်ႉလႄႈႁဝ်းတၵ်းလႆႈႁဵတ်းၸိူဝ်ႉၼင်ႇႁိုဝ်ပုၼ်ႈမႂ်း။ၵဝ်တၵ်းလႆႈလၢတ်ႈတီႈၶုၼ်ႁေႃၶမ်း၊ဢမ်ႇၼၼ်တီႈၶုၼ်ႁူဝ်သိုၵ်းပုၼ်ႈမႂ်းႁိုဝ်၊ဝႃႈၼင်ႇၼႆလႄႈမေႈယိင်းၼၼ်ႉၶိုၼ်းလၢတ်ႈလႄႈဝႃႈ၊-ၵဝ်ၶႃႈမီးႁိူၼ်းယူႇၼႂ်းပီႈၼႂ်းၼွင်ႉၵဝ်ၶႃႈယူႇၶႃႈဢေႃႈ၊ဝႃႈၼင်ႇၼႆဢေႃႈ။
၁၄ မၼ်းၵေႃႈသမ်ႉထၢမ်လႄႈဝႃႈ၊-ၵဝ်ထုၵ်ႇလီႁဵတ်းပုၼ်ႈမၼ်းၼၼ်ႉၸိူဝ်ႉၼင်ႇႁိုဝ်ဝႃႈၼင်ႇၼႆလႄႈၵေႇႁႃႇၸိၶိုၼ်းလၢတ်ႈလႄႈဝႃႈ၊-မၼ်းၼၼ်ႉဢမ်ႇမီးလုၵ်ႈမီးလၢင်းၶႃႈ။ၽူဝ်မၼ်းၵေႃႈထဝ်ႈၼႃႇယဝ်ႉၶႃႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်ဢေးလိသေးလၢတ်ႈလႄႈဝႃႈ၊-
၁၅ ႁွင်ႉမေႈယိင်းၼၼ်ႉမႃးတႃႉ၊ဝႃႈၼင်ႇၼႆလႄႈမေႈယိင်းၼၼ်ႉႁွတ်ႈသေယဝ်ႉၸုၵ်းယူႇၵႃႈတီႈႁူးၽၵ်းတူဢေႃႈ။
၁၆ ဢေးလိသေးလၢတ်ႈတီႈမေႈယိင်းၼၼ်ႉလႄႈဝႃႈ၊-ပီႊတမေႃးၶိင်ႇၼႆႉမႂ်းတၵ်းလႆႈႁွပ်ႇဢုမ်ႈၼၢဝ်ႉၵွတ်ႇလုၵ်ႈၸၢႆးမႂ်းဢေႃႈ၊ဝႃႈၼင်ႇၼႆလႄႈမေႈယိင်းၼၼ်ႉၶိုၼ်းလၢတ်ႈလႄႈဝႃႈ၊-ဢမ်ႇၸႂ်ႈၶႃႈၵူၺ်း၊ၵူၼ်းၽြႃးပဵၼ်ၸဝ်ႈၶႃႈဢိူၺ်း။ၸဝ်ႈႁဝ်းယႃႇပလေၢတ်ႈမူႉသႃႇတီႈၶႃႈၸဝ်ႈႁဝ်းသေၵမ်းၶႃႈ၊ဝႃႈၼင်ႇၼႆဢေႃႈ။
၁၇ လိုၼ်းသေၼၼ်ႉမေႈယိင်းၼၼ်ႉပႃးပတိၵ်ႈသၼ်ႇထေႇလႄႈၵိူတ်ႇလဵင်ႉလုၵ်ႈၸၢႆးမႃးၼႂ်းၶိင်ႇမိူဝ်ႈဢၼ်ဢေးလိသေးမၵ်းၶိၼ်းဝႆႉၼၼ်ႉဢေႃႈ။
၁၈ လုၵ်ႈၸၢႆးၼၼ်ႉယႂ်ႇမႃးလႄႈဝၼ်းၼိုင်ႈမၼ်းၵႂႃႇၸူးၵႃႈတီႈပေႃႈမၼ်းတီႈဢၼ်ၵူၼ်းပၢတ်ႇၶဝ်ႈတင်းလၢႆမီးၼၼ်ႉလႄႈဝႃႈ၊-ဢလူဝ်ႉ၊ႁူဝ်ၵဝ်ၼႆႉ၊ႁူဝ်ၵဝ်ၼႆႉ၊ဝႃႈၼင်ႇၼႆယူႇလႄႈ
၁၉ ပေႃႈမၼ်းၵေႃႈလၢတ်ႈတီႈၵူၼ်းၸႂ်ႉၵူၼ်းသွႆၵေႃႉၼိုင်ႈႁႂ်ႈဢဝ်မၼ်းၵႂႃႇၵႃႈတီႈမေႈမၼ်းသေဢေႃႈ။ၵူၼ်းၸႂ်ႉၵေႃႉၼၼ်ႉၵေႃႈဢဝ်မၼ်းၵႂႃႇႁွတ်ႈထိုင်ၵႃႈတီႈမေႈမၼ်းဢေႃႈ။
၂၀ လုၵ်ႈၸၢႆးၼၼ်ႉၼင်ႈယူႇၵႃႈၼိူဝ်တၵ်းမေႈမၼ်းတေႃႇထိုင်ႁွတ်ႈၶိင်ႇၵၢင်ဝၼ်းတဵင်ႈလႄႈတၢႆသေဢေႃႈ။
၂၁ မေႈယိင်းၼၼ်ႉၵေႃႈဢဝ်တူဝ်တၢႆမၼ်းၶိုၼ်ႈၵႃႈၼိူဝ်လႄႈဢဝ်ဝႆႉၵႃႈၼိူဝ်ၵူႇတီႈၼွၼ်းၵူၼ်းၽြႃးပဵၼ်ၸဝ်ႈၼၼ်ႉသေယဝ်ႉဢိုတ်းႁပ်းၽၵ်းတူသေလႄႈဢွၵ်ႇၵွႃႇဢေႃႈ။
၂၂ မၼ်းႁွင်ႉၽူဝ်မၼ်းလႄႈဝႃႈ၊-ပၼ်ၵူၼ်းၸႂ်ႉၵေႃႉၼိုင်ႈတင်းမႃႉလီႈတူဝ်ၼိုင်ႈမႃးတီႈၵဝ်ၶႃႈသေၵမ်း။ၵဝ်ၶႃႈတေၵႂႃႇၵႃႈတီႈၵူၼ်းၽြႃးပဵၼ်ၸဝ်ႈၼၼ်ႉၶၼ်ၶၼ်ၽႂ်းၽႂ်းလႄႈသမ်ႉတေၶိုၼ်းမႃးၶႃႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်ၽူဝ်မၼ်းၼၼ်ႉလၢတ်ႈလႄႈဝႃႈ၊-
၂၃ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၶႂ်ႈၵႂႃႇတီႈၸဝ်ႈၼၼ်ႉဝၼ်းမိူဝ်ႈၼႆႉ။ဢမ်ႇၸႂ်ႈဝၼ်းလိူၼ်ႈမ်ႂႇ၊ဢမ်ႇၸႂ်ႈဝၼ်းၵမ်သိၼ်၊မိူဝ်ႈဢၼ်ဝႃႈၼင်ႇၼႆၸိုင်မႄးမၼ်းၶိုၼ်းလၢတ်ႈလႄႈဝႃႈ၊-တၵ်းပဵၼ်ဢၼ်လီၶႃႈဢေႃႈ၊ဝႃႈၼင်ႇၼႆဢေႃႈ။
၂၄ ၵမ်းၼၼ်ႉမၼ်းႁၢင်ႈၵွပ်းမႃႉလီႈသေလႄႈလၢတ်ႈတီႈၵူၼ်းၸႂ်ႉၵူၼ်းသွႆမၼ်းလႄႈဝႃႈ၊-မႂ်းႁေႃႈၵႂႃႇတိၵ်းတိၵ်းတႃႉ။ပေႃးၵဝ်ဢမ်ႇလၢတ်ႈတီႈမႂ်းၸိုင်မႂ်းယႃႇပေၵႂႃႇၵွႆႈၵႂႃႇထိူင်းၵွပ်ႈပိူဝ်ႈၵဝ်၊ဝႃႈၼင်ႇၼႆသေယဝ်ႉၸွမ်းတၢင်းၵႂႃႇလႄႈႁွတ်ႈထိုင်တီႈၵူၼ်းၽြႃးပဵၼ်ၸဝ်ႈယူႇၵႃႈတီႈလွႆၵရမေႇလၼၼ်ႉဢေႃႈ။
၂၅ ၵူၼ်းၽြႃးပဵၼ်ၸဝ်ႈၼၼ်ႉႁၼ်မၼ်းမိူဝ်ႈဢၼ်မၼ်းယင်းမီးတီႈဢၼ်ၵႆၼၼ်ႉလႄႈလၢတ်ႈတီႈၵေႇႁႃႇၸိၵူၼ်းဢွၼ်မၼ်းၼၼ်ႉလႄႈဝႃႈ၊-တူၺ်းလူး။ဢၼ်ၼၼ်ႉပဵၼ်မေႈယိင်းၵူၼ်းဝဵင်းသုၼိမ်ႇဢိူဝ်ႈ။
၂၆ မႂ်းၶုၼ်လႅၼ်ႈၵႂႃႇလႄႈႁပ်ႉႁူဝ်တၢင်းမၼ်းသေလႄႈထၢမ်ဝႃႈ၊-တူဝ်မႂ်းယူႇလီယူႇႁိုဝ်။ၽူဝ်မႂ်းယူႇလီႁိုဝ်။လုၵ်ႈဢွၼ်ႇမႂ်းယူႇလီယူႇႁိုဝ်၊ဝႃႈၼင်ႇၼႆတႃႉ၊ဝႃႈၼင်ႇၼႆလႄႈမေႈယိင်းၼၼ်ႉၶိုၼ်းလၢတ်ႈလႄႈဝႃႈ၊-ယူႇလီယူႇဢေႃႈ၊ဝႃႈၼင်ႇၼႆဢေႃႈ။မိူဝ်ႈဢၼ်မၼ်းႁွတ်ႈထိုင်ၵႃႈတီႈဢၼ်ၵူၼ်းၽြႃးပဵၼ်ၸဝ်ႈၵႃႈၼိူဝ်လွႆၼၼ််ႉၸိုင်မၼ်းၵွတ်ႇတိၼ်ၵူၼ်းၽြႃးပဵၼ်ၸဝ်ႈၼၼ်ႉဢေႃႈ။
၂၇ ၵေႇႁႃႇၸိသုတ်ႉၸပ်းသုတ်ႉၸူးႁႂ်ႈလႆႈႁႄႉၶႅၼ်မၼ်းလႄႈၵူၼ်းၽြႃးပဵၼ်ၸဝ်ႈလၢတ်ႈလႄႈဝႃႈ၊-ယႃႇမၼ်းတႃႉ။မၼ်းမီးတၢင်းဢၼ်ၶီၸႂ်ၶူမ်ၸႂ်ဢေႃႈ။လွင်ႈၼႆႉၸိုင်ထႃႇဝရႃႉၽြႃးသိူင်ႇမႅပ်းဝႆႉယဝ်ႉ။မၼ်းၸဝ်ႈယင်းဢမ်ႇပႆႇၼႄပျႃးတီႈၵဝ်ဝႃႈၼင်ႇၼႆဢေႃႈ။
၂၈ မေႈယိင်းၼၼ်ႉလၢတ်ႈလႄႈဝႃႈ၊-ၸွင်ႇၵဝ်ၶႃႈလႆႈယွၼ်းဢဝ်သူးလုၵ်ႈၸၢႆးတီႈၸဝ်ႈႁဝ်းၶႃႈႁိုဝ်။ၵဝ်ၶႃႈဝႃႈယႃႇပပေႅတ်ႉလႅၼ်ၵဝ်ၶႃႈသေၵမ်း၊ဝႃႈၼင်ႇၼႆဢမ်ႇၸႂ်ႈၶႃႈႁိုဝ်၊ဝႃႈၼင်ႇၼႆဢေႃႈ။
၂၉ မိူဝ်ႈၼၼ်ႉဢေးလိသေးလၢတ်ႈတီႈၵေႇႁႃႇၸိလႄႈဝႃႈ၊-ႁတ်ႉဢႅဝ်မႂ်းလႄႈယိပ်းၵမ်ဢဝ်ၶွၼ်ႉတဝ်ႉၵဝ်သေလႄႈၶုၼ်ႇလႅၼ်ႈၵႂႃႇတႃႉ။ပေႃးမႂ်းထူပ်းသေၵေႃႉသေၵူၼ်းၵႃႈတီႈၵၢင်တၢင်းၸိုင်ယႃႇပတေၵ်ႉပလေၢတ်ႈမၼ်း။ပေႃးသေၵေႃႉသေၵူၼ်းတၵ်ႉလၢတ်ႈမႂ်းၵေႃႈယႃႇပေၶိုၼ်းတၵ်ႉၶိုၼ်းလၢတ်ႈ။ဢဝ်ၶွၼ်ႉတဝ်ႉၵဝ်ၼႆႉတၢင်ႇသႂ်ႇၵႃႈၼိူဝ်ၼႃႈလုၵ်ႈဢွၼ်ႇၼၼ်ႉတႃႉ၊ဝႃႈၼင်ႇၼႆဢေႃႈ။
၃၀ မေႈလုၵ်ႈဢွၼ်ႇၵေႃႈလၢတ်ႈလႄႈဝႃႈ၊-ၵႃႈၼင်ႇဢၼ်ထႃႇဝရႃႉၽြႃးဢသၢၵ်ႈယင်းလိပ်းယူႇၵႃႈၼင်ႇဢၼ်ၸဝ်ႈႁဝ်းဢသၢၵ်ႈယင်းလိပ်းယူႇၼၼ်ႉၵဝ်ၶႃႈတၵ်းဢမ်ႇၽၢတ်ႇၵၼ်တင်းၸဝ်ႈႁဝ်းၶႃႈၵူၺ်း၊ဝႃႈၼင်ႇၼႆလႄႈဢေးလိသေးၵေႃႈလုၵ်ႉလႄႈၸွမ်းမၼ်းၵႂႃႇဢေႃႈ။
၃၁ ၵေႇႁႃႇၸိၼၼ်ႉၵႂႃႇဢွၼ်တၢင်းလႄႈဢဝ်ၶွၼ်ႉတဝ်ႉတၢင်ႇသႂ်ႇၵႃႈၼိူဝ်ၼႃႈလုၵ်ႈဢွၼ်ႇၼၼ်ႉသေၵေႃႈလုၵ်ႈဢွၼ်ႇၼၼ်ႉဢမ်ႇတူင်ႉၼိုင်၊ဢမ်ႇႁူႉတူဝ်။ၵွပ်ႈပိူဝ်ႈၼၼ်လႄႈမၼ်းၶိုၼ်းမိူဝ်းၵႂႃႇႁႂ်ႈလႆႈႁပ်ႉႁူဝ်တၢင်းဢေးလိသေးလႄႈလၢတ်ႈဝႃႈ၊-လုၵ်ႈဢွၼ်ႇၼၼ်ႉဢမ်ႇတိုၼ်ႇမႃးၶႃႈ၊ဝႃႈၼင်ႇၼႆဢေႃႈ။
၃၂ မိူဝ်ႈဢၼ်ဢေးလိသေးႁွတ်ႈထိုင်ၵႃႈၼႂ်းႁိူၼ်းၼၼ်ႉၸိုင်လုၵ်ႈဢွၼ်ႇၼၼ်ႉတၢႆယဝ်ႉလႄႈတၢင်ႇဝႆႉမီးယူႇၵႃႈၼိူဝ်ၵူႇတီႈၼွၼ်းမၼ်းၼၼ်ႉဢေႃႈ။
၃၃ မၼ်းၶဝ်ႈၵႃႈၼႂ်းလႄႈဢိုတ်းႁပ်းၽၵ်းတူႁႄႉလပ်ႉသွင်ၶႃဝႆႉသေယဝ်ႉသူးတွင်းတီႈထႃႇဝရႃႉၽြႃးဢေႃႈ။
၃၄ မၼ်းသုတ်ႉၸပ်းသုတ်ႉၸူးလႄႈၼွၼ်းသႂ်ႇၵႃႈၼိူဝ်လုၵ်ႈဢွၼ်ႇယူႇ၊ဢဝ်သူပ်းၼင်ႇၵၼ်မၢၵ်ႇတႃၼင်ႇၵၼ်မိုဝ်းၼင်ႇၵၼ်သွၼ်ႉၸပ်းၵၼ်ယူႇသေလႄႈဢဝ်တူဝ်မၼ်းဢူပ်ႇပူပ်ႇသႂ်ႇၵႃႈၼိူဝ်လုၵ်ႈဢွၼ်ႇၼၼ်ႉလႄႈၼိူဝ်ႉလုၵ်ႈဢွၼ်ႇၼၼ်ႉမီးတၢင်းဢၼ်ဢုၼ်ႇမႃးယူႇဢေႃႈ။
၃၅ လၢႆးသမ်ႉမၼ်းလူင်းလႄႈပႆသၢင်းၵျၢၼ်ႇယူႇၵႃႈၼႂ်းႁိူၼ်းၼၼ်ႉသေယဝ်ႉၶိုၼ်းမႃးၸူးထႅင်ႈပွၵ်ႈၼိုင်ႈလႄႈဢဝ်တူဝ်မၼ်းဢူပ်ႇပူပ်ႇသႂ်ႇၵႃႈၼိူဝ်လုၵ်ႈဢွၼ်ႇၼၼ်ႉဢေႃႈ။လုၵ်ႈဢွၼ်ႇၼၼ်ႉၶီၸၢမ်မႃးၸဵတ်းပွၵ်ႈလႄႈမိုၼ်းတႃမႃးဢေႃႈ။
၃၆ မၼ်းႁွင်ႉဢဝ်ၵေႇႁႃႇၸိလႄႈဝႃႈ၊-ႁွင်ႉဢဝ်မေႈယိင်းၵူၼ်းဝဵင်းသုၼိမ်ႇၼၼ်ႉမႃးတႃႉ၊ဝႃႈၼင်ၼႆလႄႈမၼ်းၵေႃႈႁွင်ႉမေႈယိင်းၼၼ်ႉမႃးဢေႃႈ။
၃၇ ဢုမ်ႈဢဝ်လုၵ်ႈၸၢႆးမႂ်းတႃႉ၊ဝႃႈၼင်ႇၼႆလႄႈမေႈယိင်းၼၼ်ႉၵေႃႈၶဝ်ႈၵႃႈၼႂ်းသေယဝ်ႉၶုပ်ႉမူပ်ႇဝၢင်းႁူဝ်ၵႃႈၼိူဝ်လိၼ်သေယဝ်ႉဢုမ်ႈဢဝ်လုၵ်ႈၸၢႆးမၼ်းလႄႈဢွၵ်ႇၵႂႃႇဢေႃႈ။
၃၈ မီးၽဝ်ႇၼိုင်ႈဢေးလိသေးၵႂႃႇၵႃႈတီႈဝဵင်းၵိလၵႃႇလဢေႃႈ။ၵႃႈတီႈမိူင်းၼၼ်ႉပဵၼ်တၢင်းဢၼ်ၶဝ်ႈၵႃႈမၢၵ်ႇပႅင်းၼႃႇဢေႃႈ။ၼႂ်းမိူဝ်ႈဢၼ်ၵူၼ်းမဵဝ်းပရေႃးၽႅတ်ႈတင်းလၢႆယင်းတိုၵ်ႉၼင်ႈၵႃႈတီႈၽၢႆႇၼႃႈမၼ်းယူႇၼၼ်ႉမၼ်းလၢတ်ႈတီႈၵူၼ်းဢွၼ်ႇမၼ်းလႄႈဝႃႈ၊-ဢဝ်မေႃႈလူင်တင်ႈလႄႈႁုင်ၽၵ်းပုၼ်ႈၵူၼ်းမဵဝ်းပရေႃးၽႅတ်ႈတင်းလၢႆၸိူဝ်းၼႆႉတႃႉ၊ဝႃႈၼင်ၼႆဢေႃႈ။
၃၉ ၵေႃႉၼိုင်ႈဢွၵ်ႇၸူးၵႃႈတီႈၼွၵ်ႈတီႈပၢင်ႇႁႂ်ႈၵဵပ်းၽၵ်းယိူဝ်ႈၼၢင်းၶဵဝ်လႄႈထူပ်းႁၼ်ၶိူဝ်းတူၼ်ႈထိူၼ်ႇဢေႃႈ။မၼ်းၵဵပ်းဢဝ်မၢၵ်ႇၼမ်ႉတဝ်ႈထိူၼ်ႇၵႃႈဢၼ်ႁွပ်ႇလႆႈၼၼ်ႉသေလႄႈယင်းဢမ်ႇႁူႉမဵဝ်းၼမ်ႉတဝ်ႈၼၼ်ႉလႄႈမၼ်းဢဝ်မႃးမိတ်းသႂ်ႇၵႃႈၼႂ်းမေႃႈၽၵ်းဢေႃႈ။
၄၀ ၶဝ်ၵွၼ်ႉဢဝ်တၵ်းဢဝ်ပုၼ်ႈဢၼ်တၵ်းၵိၼ်လႄႈၼႂ်းမိူဝ်ႈဢၼ်ၶဝ်ယင်းတိုၵ်ႉၽွမ်ႉၵၼ်ၵိၼ်ၽၵ်းၼၼ်ႉယူႇၼၼ်ႉၸိုင်ၶဝ်ဢွၼ်ၵၼ်ႁွင်ႉသႅၼ်ႇလႄႈဝႃႈ၊-ၵူၼ်းၽြႃးပဵၼ်ၸဝ်ႈဢိူၺ်း။ၵႃႈၼႂ်းမေႃႈၼႆႉမီးၽေးတၢႆၶႃႈဢေႃႈ၊ဝႃႈၼင်ၼႆသေလႄႈယင်းဢမ်ႇၵိၼ်လႆႈဢေႃႈ။
၄၁ ဢေးလိသေးလၢတ်ႈလႄႈဝႃႈ၊-ဢဝ်ၽွင်ၶဝ်ႈမုၼ်းမႃးတႃႉ၊ဝႃႈၼင်ၼႆလႄႈမၼ်းဢဝ်ၽွင်ၶဝ်ႈမုၼ်းသႂ်ႇၵႃႈၼႂ်းမေႃႈၼၼ်ႉသေယဝ်ႉလၢတ်ႈလႄႈဝႃႈ၊-သမ်ႉၶိုၼ်းၵွၼ်ႉဢဝ်လႄႈသႂ်ႇပၼ်ပုၼ်ႈဢၼ်ၵူၼ်းတင်းလၢႆတၵ်းၵိၼ်တႃႉ၊မိူဝ်ႈဢၼ်ဝႃႈၼင်ၼႆယဝ်ႉၼၼ်ႉၸိုင်ၵႃႈၼႂ်းမေႃႈၼၼ်ႉဢမ်ႇမီးၽေးယဝ်ႉဢေႃႈ။
လဵင်ႉလူၵူၼ်းပၢၵ်ႇၼိုင်ႈ
၄၂ မီးၽဝ်ႇၼိုင်ႈၵူၼ်းၵေႃႉၼိုင်ႈလုၵ်ႉသေၵႃႈတီႈဝဵင်းပႃႇလသလိသၼၼ်ႉမႃးလႄႈဢဝ်ၶဝ်ႈမုၼ်းဢၼ်ဢဝ်ၶဝ်ႈမုယေႃးဢၼ်မၢၵ်ႇဢွၼ်တၢင်းၼၼ်ႉႁဵတ်းၼၼ်ႉသၢဝ်းလုၵ်ႈဢိၵ်ႇတင်းမၢၵ်ႇႁူင်းၵႃႈၼႂ်းထူင်ၼၼ်ႉမႃးၸူးတီႈၵူၼ်းၽြႃးပဵၼ်ၸဝ်ႈဢေႃႈ။
၄၃ ဢေးလိသေးလၢတ်ႈလႄႈဝႃႈ၊-ဢဝ်ပၼ်တီႈၵူၼ်းတင်းလၢႆႁႂ်ႈၶဝ်ၵိၼ်တႃႉ၊ဝႃႈၼင်ၼႆလႄႈၵူၼ်းဢွၼ်ႇမၼ်းလၢတ်ႈလႄႈဝႃႈ၊-တေႁဵတ်းႁိဝ်လဵင်ႉၵူၼ်းပၢၵ်ႇၼိုင်ႈလႆႈၶႃႈ၊မိူဝ်ႈဢၼ်ဝႃႈၼင်ႇၼႆၸိုင်ဢေးလိသေးလၢတ်ႈလႄႈဝႃႈ၊-ဢဝ်ပၼ်တီႈၵူၼ်းတင်းလၢႆႁႂ်ႈၶဝ်ၵိၼ်တႃႉ။ထႃႇဝရႃႉၽြႃးမီးဢမိင်ႉလႄႈဝႃႈၸမ်း၊-ၶဝ်တၵ်းၵိၼ်ဢိမ်ႇၵိၼ်တဵမ်လႄႈႁႂ်ႈၵိုတ်းၵျၢၼ်ႇဝႆႉယူႇလူးၵွၼ်ႇဢေႃႈ၊ဝႃႈၼင်ၼႆဝႆႉယဝ်ႉ၊
၄၄ ဝႃႈၼင်ၼႆလႄႈမၼ်းဢဝ်သႂ်ႇတမ်းပၼ်ၵႃႈတီႈၽၢႆႇၼႃႈၶဝ်ၼၼ်ႉလႄႈၶဝ်ဢွၼ်ၵၼ်ၵိၼ်သေယဝ်ႉႁႂ်ႈၵိုတ်းၵျၢၼ်ႇဝႆႉယူႇမႅၼ်ႈၸွမ်းၵႂၢမ်းထႃႇဝရႃႉၽြႃးၼၼ်ႉဢေႃႈ။