Chapter
၁
တၢင်းၸီႇယၢင်ၽြႃးပဵၼ်ၸဝ်ႈၼိူဝ်ဢႃႇၶၸိ
၁ လိုၼ်းသေဢႃႇႁပ်ႉတၢႆယဝ်ႉၼၼ်ႉမိူင်းမေႃႇၽလုၵ်ႉၽိုၼ်ႉၶုၼ်ႁေႃၶမ်းဢိသရေႇလဢေႃႈ။
၂ ဢႃႇၶၸိတူၵ်းႁူးလႅင်းႁေႃၸဝ်ႈႁၢၼ်ႉၼိူဝ်ၵႃႈတီးဝဵင်းသမႃႇရိလႄႈတိူဝ်ႉမၢတ်ႇဢေႃႈ။မၼ်းပွႆႇၸႂ်ႉၵူၼ်းၸႂ်ႉၵူၼ်းသွႆမၼ်းၵႂႃႇၸူးၵႃႈတီႈၽြႃးပႃႇလၸေႇပုပ်ႉဢၼ်မီးတီႈဝဵင်းဢေးၵုၼ်ႇႁႂ်ႈလႆႈတွင်ႉထၢမ်လွင်ႈဢၼ်တၢင်းတိူဝ်ႉမၢတ်ႇမၼ်းတၵ်းၸိုၼ်ႈၶႅၼ်းႁိုဝ်၊ဢမ်ၸိုၼ်ႈၶႅၼ်းႁိုဝ်၊ၼၼ်ႉဢေႃႈ။
၃ တမၢၼ်ႇၵၢင်ႁၢဝ်ထႃႇဝရႃႉၽြႃးသင်ႇလၢတ်ႈတီႈဢေးလိယၵူၼ်းဝဵင်းတိသၽိၼၼ်ႉလႄႈဝႃႈ၊-မႂ်းၵႂႃႇႁႂ်ႈလႆႈႁူပ်ႉထူပ်းၵၼ်တင်းၵူၼ်းၸႂ်ႉၵူၼ်းသွႆႇၶုၼ်ႁေႃၶမ်းသမႃႇရိၸိူဝ်းၼၼ်ႉသေလႄႈလၢတ်ႈတီႈၶဝ်ၼၼ်ႉလႄႈဝႃႈ၊-ၵွပ်ႈပိူဝ်ႈဢၼ်ၵႃႈတီႈမိူင်းဢိသရေႇလၼႆႉဢမ်ႇမီးၽြႃးပဵၼ်ၸဝ်ႈလႄႈသူလႆႈၵႂႃႇတွင်ႉထၢမ်တီႈၽြႃးပႃႇလၸေႇပုပ်ႉဝဵင်းဢေးၵုၼ်ႇၼၼ်ႉႁိုဝ်။
၄ ၵွပ်ႈပိူဝ်ႈၼင်ႇၼၼ်လႄႈထႃႇဝရႃႉၽြႃးမီးဢမိင်ႉလႄႈဝႃႈၸမ်း၊-မႂ်းတၵ်းဢမ်ႇလႆႈၶိုၼ်းလုၵ်ႉလႄႈလူင်းသေၵႃႈတီႈၵူႇတီႈၼွၼ်းမႂ်းဢၼ်မႂ်းၼွၼ်းယူႇၼၼ်ႉ။မႂ်းတၵ်းလႆႈတၢႆဢမၢၼ်ႇၶၢၼ်ပဵၼ်ဢေႃႈ၊ဝႃႈၼင်ႇၼႆတႃႉ၊ဝႃႈၼင်ႇၼႆသေယဝ်ႉဢေးလိယၵေႃႈၵႂႃႇဢေႃႈ။
၅ မိူဝ်ႈဢၼ်ၵူၼ်းၸႂ်ႉၵူၼ်းသွႆၸိူဝ်းၼၼ်ႉၶိုၼ်းမႃးၼၼ်ႉၸိုင်မၼ်းထၢမ်ဝႃႈ၊-ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈသူၶိုၼ်းမႃးဝႃႈၼင်ႇၼႆဢေႃႈ။ၶဝ်ၵေႃႈဢွၼ်ၵၼ်လဝ်ႈလၢတ်ႈလႄႈဝႃႈ၊-ၵူၼ်းၵေႃႉၼိုင်ႈမႃးႁူပ်ႉထူပ်းၵၼ်တင်းႁဝ်းၶႃႈလႄႈလၢတ်ႈတီႈႁဝ်းၶႃႈၶဝ်ႈလႄႈဝႃႈ၊-
၆ ဢွၼ်ၵၼ်ဝၢႆႇၶိုၼ်းမိူဝ်းၸူးၵႃႈတီႈၶုၼ်ႁေႃၶမ်းဢၼ်ပွႆႇၸႂ်ႉသူမႃးၼၼ်ႉလႄႈလဝ်ႈလၢတ်ႈလွင်ႈဢၼ်ထႃႇဝရႃႉၽြႃးမီးဢမိင်ႉဝႃႈ၊-ၵွပ်ႈပိူဝ်ႈဢၼ်ၵႃႈတီႈမိူင်းဢိသရေႇလၼႆႉဢမ်ႇမီးၽြႃးပဵၼ်ၸဝ်ႈလႄႈသူတၵ်းၵႂႃႇတွင်ႉထၢမ်တီႈၽြႃးပႃႇလၸေႇပုပ်ႉဝဵင်းဢေးၵုၼ်ႇၼၼ်ႉႁိုဝ်။ၵွပ်ႈပိူဝ်ႈၼၼ်လႄႈမႂ်းဢမ်ႇလႆႈသမ်ႉၶိုၼ်းလုၵ်ႉသေၵႃႈတီႈၵူႈတီႈၼွၼ်းဢၼ်မႂ်းၼွၼ်းယူႇၼၼ်ႉ။မႂ်းတၵ်းလႆႈတၢႆဢမၢၼ်ႇၶၢၼ်ပဵၼ်ဢေႃႈ၊ဝႃႈၼင်ႇၼႆဢေႃႈ။
၇ မၼ်းၵေႃႈထၢမ်လႄႈဝႃႈ၊-ၵေႃႉဢၼ်မႃးႁူပ်ႉထူပ်းၵၼ်တင်းသူလႄႈလၢတ်ႈဝႃႈၵႂၢမ်းၸိူဝ်ႉၼင်ႇၼႆၼၼ်ႉပဵၼ်ၵူၼ်းၸိူဝ်ႉၼင်ႇႁိုဝ်၊ဝႃႈၼင်ႇၼႆလႄႈၶဝ်ၵေႃႈလဝ်ႈလၢတ်ႈလႄႈဝႃႈ၊-
၈ ၵေႃႉၼၼ်ႉပဵၼ်ၵေႃႉဢၼ်မီးၶူၼ်ၼမ်ၼႃႇတီႈတူဝ်ၶိင်းမၼ်းလႄႈႁတ်ႉတင်းသၢႆဢႅဝ်ၼင်ယူႇၶႃႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်၊ၶုၼ်ႁေႃၶမ်းဝႃႈ၊-မၼ်းပဵၼ်ဢေးလိယၵူၼ်းဝဵင်းတိသၽိၼၼ်ႉယဝ်ႉ၊ဝႃႈၼင်ႇၼႆသေယဝ်ႉမၼ်းပွႆႇၸႂ်ႉတပ်ႉမူးဢၼ်ဢုပ်ႉၵႃႈၼိူဝ်ၵူၼ်းႁႃႈသိပ်းၼၼ်ႉၵႂႃႇဢေႃႈ။
၉ တပ်ႉမူးၼၼ်ႉႁွတ်ႈထိုင်ၵႃႈတီႈဢေးလိယဢၼ်ၼင်ႈယူႇၵႃႈၼိူဝ်လွႆၼၼ်ႉလႄႈလၢတ်ႈဝႃႈ၊-ၵူၼ်းၽြႃးပဵၼ်ၸဝ်ႈဢိူၺ်း။ၶုၼ်ႁေႃၶမ်းမီးဢမိင်ႉႁႂ်ႈမႂ်းလူင်းမႃးဢေႃႈ၊ဝႃႈၼင်ႇၼႆဢေႃႈ။
၁၀ ဢေးလိယၵေႃႈၶိုၼ်းလၢတ်ႈတီႈတပ်ႉမူးဢၼ်ဢုပ်ႉၵႃႈၼိူဝ်ၵူၼ်းႁႃႈသိပ်းၼၼ်ႉလႄႈဝႃႈ၊-ပေႃးၵဝ်ၸႂ်ၵူၼ်းၽြႃးပဵၼ်ၸဝ်ႈၸိုင်ႁႂ်ႈၽႆးၵ်းသေၵႃႈၼိူဝ်ၽႃႉၵၢင်ႁၢဝ်လူင်းမႃးမႆႈမႂ်းဢိၵ်ႇတင်းၵူၼ်းမႂ်းႁႃႈသိပ်းၼႆႉသေၵမ်းလူၺ်ႈ၊ဝႃႈၼင်ႇၼႆဢေႃႈ။မိူဝ်ႈၼၼ်ႉၽႆးတူၵ်းသေၵႃႈၼိူဝ်ၽႃႉၵၢင်ႁၢဝ်မႃးလႄႈမႆႈမၼ်းဢိၵ်ႇတင်းၵူၼ်းႁႃႈသိပ်းဢၼ်ပႃးလူၺ်ႈၵၼ်တင်းမၼ်းမႃးၸိူဝ်းၼၼ်ႉဢေႃႈ။
၁၁ လၢႆးသမ်ႉၶုၼ်ႁေႃၶမ်းပွႆႇၸႂ်ႉတပ်ႉမူးဢၼ်ဢုပ်ႉၵႃႈၼိူဝ်ၵူၼ်းႁႃႈသိပ်းၼၼ်ႉၵႂႃႇထႅင်ႈလႄႈလၢတ်ႈဝႃႈ၊-ၵူၼ်းၽြႃးပဵၼ်ၸဝ်ႈဢိူၺ်း။ၶုၼ်ႁေႃၶမ်းမီးဢမိင်ႉႁႂ်ႈမႂ်းလူင်းမႃးၶၼ်ၶၼ်ၽႂ်းၽႂ်းဢေႃႈ၊ဝႃႈၼင်ႇၼႆလႄႈဢေးလိယၵေႃႈၶိုၼ်းလၢတ်ႈတီႈၶဝ်ၼၼ်ႉလႄႈဝႃႈ၊-
၁၂ ပေႃးၵဝ်ၸႂ်ၵူၼ်းၽြႃးပဵၼ်ၸဝ်ႈၸိုင်ႁႂ်ႈၽႆးၵ်းသေၵႃႈၼိူဝ်ၽႃႉၵၢင်ႁၢဝ်လူင်းမႃးလႄႈမႆႈမႂ်းဢိၵ်ႇတင်းၵူၼ်းႁႃႈသိပ်းမႂ်းၼၼ်ႉသေၵမ်းလူၺ်ႈ၊ဝႃႈၼင်ႇၼႆလႄႈၽႆးၽြႃးပဵၼ်ၸဝ်ႈတူၵ်းသေၵႃႈၼိူဝ်ၽႃႉၵၢင်ႁၢဝ်လူင်းမႃးလႄႈမႆႈမၼ်းၼၼ်ႉဢိၵ်ႇတင်းၵူၼ်းႁႃႈသိပ်းဢၼ်ပႃးလူၺ်ႈၵၼ်တင်းမၼ်းမႃးၸိူဝ်းၼၼ်ႉဢေႃႈ။
၁၃ လၢႆးသမ်ႉၶုၼ်ႁေႃၶမ်းပွႆႇၸႂ်ႉတပ်ႉမူးတတိယဢၼ်ဢုပ်ႉၵႃႈၼိူဝ်ၵူၼ်းႁႃႈသိပ်းၼၼ်ႉၵႂႃႇထႅင်ႈသေယဝ်ႉ၊တပ်ႉမူးတတိယၼၼ်ႉၵေႃႈၶိုၼ်ႈၸူးၵႃႈႁိမ်းဢေးလိယသေယဝ်ႉၶုပ်ႉၶဝ်ႇၵႃႈတီႈၽၢႆႇၼႃႈဢေးလိယလႄႈတွင်းပၢၼ်ႇလႄႈဝႃႈ၊-ၵူၼ်းၽြႃးပဵၼ်ၸဝ်ႈၶႃႈဢိူၺ်း။သေလၢႆဢသၢၵ်ႈၶႃႈၸဝ်ႈဢိၵ်ႇတင်းဢသၢၵ်ႈၵူၼ်းႁႃႈသိပ်းၸိူဝ်းၼႆႉသေၵမ်းၶႃႈ။
၁၄ ၽႆးတူၵ်းသေၵႃႈၼိူဝ်ၽႃႉၵၢင်ႁၢဝ်မႃးလႄႈမႆႈတပ်ႉမူးသွင်ၵေႃႉဢိၵ်ႇတင်းၵူၼ်းသွင်ႁႃႈသိပ်းဢၼ်ပႃးတီႈၶဝ်ၼၼ်ႉၶႃႈယဝ်ႉ။ၵူၺ်းၵႃႈမိူဝ်ႈလဵဝ်ၼႆႉသလေၢႆဢသၢၵ်ႈၶႃႈၸဝ်ႈသေၵမ်းၶႃႈ၊ဝႃႈၼင်ႇၼႆဢေႃႈ။
၁၅ တမၢၼ်ႇၵၢင်ႁၢဝ်ထႃႇဝရႃႉၽြႃးလၢတ်ႈတီႈဢေးလိယလႄႈဝႃႈ၊-လူင်းၵႂႃႇလူၺ်ႈၵၼ်တင်းမၼ်းတႃႉ။ယႃႇပေၵူဝ်ႁႄမၼ်း၊ဝႃႈၼင်ႇၼႆလႄႈမၼ်းၵေႃႈလူင်းၵႂႃႇလူၺ်ႈၵၼ်တင်းတပ်ႉမူးၼၼ်ႉသေယဝ်ႉၵႂႃႇၸူးၵႃႈတီႈၶုၼ်ႁေႃၶမ်းသေလႄႈလဝ်ႈလၢတ်ႈလႄႈဝႃႈ၊-
၁၆ ထႃႇဝရႃႉၽြႃးမီးဢမိင်ႉလႄႈဝႃႈၸမ်း၊-လွင်ႈဢၼ်မႂ်းပွႆႇၸႂ်ႉၵူၼ်းၸႂ်ႉၵူၼ်းသွႆတင်းလၢႆၵႂႃႇႁႂ်ႈလႆႈတွင်ႉထၢမ်တီႈၽြႃးပႃႇလၸေႇပုပ်ႉဝဵင်းဢေးၵုၼ်ႇၼၼ်ႉၵွပ်ႈပိူဝ်ႈဢၼ်ၵႃႈတီႈမိူင်းဢိသရေႇလၼႆႉဢမ်ႇမီးၽြႃးပုၼ်ႈဢၼ်တၵ်းတွင်ႉထၢမ်ႁိုဝ်။ပိူဝ်ႈဢၼ်ပဵၼ်ၼင်ႇၼၼ်လႄႈမႂ်းတၵ်းဢမ်ႇလႆႈသမ်ႉၶိုၼ်းလုၵ်ႉသေၵႃႈၼိူဝ်ၵူႇတီႈၼွၼ်းဢၼ်မႂ်းၼွၼ်းယူႇၼၼ်ႉလႄႈလူင်း။မႂ်းတၵ်းလႆႈတၢႆဢမၢၼ်ႇၶၢၼ်ပဵၼ်ဢေႃႈ၊ဝႃႈၼင်ႇၼႆတီႈၶႃႈယဝ်ႉ၊ဝႃႈၼင်ႇၼႆဢေႃႈ။
၁၇ ၼင်ႇၼႆလႄႈမၼ်းၼၼ်ႉတၢႆမႅၼ်ႈၸွမ်းၵႃႈၼင်ႇၵႂၢမ်းၽြႃးပဵၼ်ၸဝ်ႈဢၼ်ဢေးလိယသင်ႇလၢတ်ႈၼၼ်ႉဢေႃႈ။ၵွပ်ႈပိူဝ်ႈဢၼ်မၼ်းဢမ်ႇမီးလုၵ်ႈၸၢႆးလႄႈယုဝ်ႇရမ်ႇၸႃႉၼင်ႈႁၢင်ႈၼင်ႈႁေႃၼႂ်းပီႊဢၼ်ယႁေႃႇရမ်ႇလုၵ်ႈၸၢႆးယုဝ်ႇသၽၸၢမ်ႇႁၢင်ႈၸၢမ်ႇႁေႃသွင်ပီႊၼၼ်ႉဢေႃႈ။လွင်ႈတၢင်းဢၼ်ဢႃႇၶၸိႁဵတ်းၵႃႈဢၼ်ယင်းၵိုတ်းယင်းၵျၢၼ်ႇၸိူဝ်းၼၼ်ႉၸိုင်တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇဢိသရေႇလဢေႃႈ။