Chapter
၂၀
သေႇၽလုၵ်ႉၽိုၼ်ႉတေႃႇတႃႇဝိတ်ႉ
၁ မိူဝ်ႈၼၼ်ႉမီးၵူၼ်းဢႃႉထမ်ႇမႃႉၵေႃႉၼိုင်ႈဢၼ်လႆႈၸိုဝ်သေႇၽ၊လုၵ်ႈၸၢႆးပိၶရိမဵဝ်းပိၼ်ႇယႃႇမိၼ်ႇ၊ၼၼ်ႉဢေႃႈ။ၵေႃႉၼၼ်ႉပဝ်ႇတိုင်ႈၼႄးၶရႃႇသေလႄႈလၢတ်ႈဝႃႈ၊-မဵဝ်းဢိသရေႇလၶဝ်ဢိူၺ်း။ႁဝ်းဢမ်ႇၸၢပ်ႈသႅင်ႇၵၼ်တင်းတႃႇဝိတ်ႉ။ႁဝ်းဢမ်ႇၶဝ်ႈပႃးၼႂ်းလုၵ်ႈၸၢႆးယေႇသေႇ။
၂ ၵူၼ်းတင်းလၢႆၶဝ်ဢိူၺ်း။ဢွၼ်ၵၼ်ၶိုၼ်းမိူဝ်းၵႂႃႇၵႃႈတီႈသုမ်ႉထဵင်တီႈယူႇသူႁင်းၽႂ်ႁင်းမၼ်းတႃႉ၊ဝႃႈၼင်ႇၼႆလႄႈၵူၼ်းမဵဝ်းဢိသရေႇလၸိူဝ်းၼၼ်ႉၵေႃႈဢွၼ်ၵၼ်ဢွၵ်ႇသေၵႃႈတီႈဢၼ်ၸွမ်းတႃႇဝိတ်ႉၼၼ်ႉသေယဝ်ႉၸွမ်းလင်သေႇၽလုၵ်ႈၸၢႆးပိၶရိၼၼ်ႉဢေႃႈ။ၵူၼ်းမဵဝ်းယုတတင်းလၢႆၸမ်းၸပ်းၸွမ်းၶုၼ်ႁေႃၶမ်းၶဝ်ယူႇဢဝ်ၵႃႈတီႈၼမ်ႉႁွင်ႊယေႃႇတၼ်ႇတေႃႇထိုင်ႁွတ်ႈဝဵင်းယေႇရုသလႅမ်ႇဢေႃႈ။
၃ ၶုၼ်လူင်တႃႇဝိတ်ႉၼၼ်ႉႁွတ်ႈထိုင်ၵႃႈတီႈႁေႃၸဝ်ႈၼႂ်းဝဵင်းယေႇရုသလႅမ်ႇၼၼ်ႉသေယဝ်ႉ၊ဢဝ်ၸိူင်ႉၼၢင်းသိပ်းၼိုင်ႈဢၼ်မၼ်းဝႆႉႁႂ်ႈလႆႈပႂ်ႉႁေႃၸိူဝ်းၼၼ်ႉလႄႈဝႆႉၵႃႈၼႂ်းႁိူၼ်းၶင်ဝႆႉဢေႃႈ။ပိၵ်ႉသမ်ႉလဵင်ႉလူၶဝ်ၼၼ်ႉယူႇသေၵေႃႈဢမ်ႇၶဝ်ႈဢမ်ႇၸူးတီႈၶဝ်။ၶဝ်ၼၼ်ႉလႆႈၶၢမ်ႇတၢင်းဢၼ်ၶျုၵ်ႈဝႆႉတေႃႇပေႃးတၢႆဢေႃႈ။ၶဝ်လႆႈယူႇမိူၼ်ၸိူဝ်ႉၼင်ႇမေႈမုၵ်ႈမေႈမၢႆႈၼၼ်ႉဢေႃႈ။
၄ မိူဝ်ႈၼၼ်ႉၶုၼ်ႁေႃၶမ်းမီးဢမိင်ႉတီႈဢႃႇမသလႄႈဝႃႈ၊-ၼႂ်းသၢမ်ဝၼ်းမႂ်းတၵ်းလႆႈႁႂ်ႈၵူၼ်းယုတတင်းလၢႆၸူႉၵၼ်တုမ်ၵၼ်ၵႃႈတီႈၵဝ်ဢေႃႈ။တူဝ်မႂ်းၵေႃႈတၵ်းလႆႈမီးၵႃႈတီႈၼႆႉဢေႃႈ၊ဝႃႈၼင်ႇၼႆဢေႃႈ။
၅ ဢႃႇမသၵေႃႈၵႂႃႇလႄႈႁႂ်ႈၵူၼ်းယုတတင်းလၢႆၸူႉၵၼ်တုမ်ၵၼ်ဢေႃႈ။ၵူၺ်းၵႃႈမၼ်းႁိုင်ပူၼ်ႉသၢမ်ဝၼ်းဢေႃႈ။
၆ တႃႇဝိတ်ႉၵေႃႈမီးဢမိင်ႉတီႈဢၽိသေႇလႄႈဝႃႈ၊-မိူဝ်ႈလဵဝ်ၼႆႉသေႇၽ၊လုၵ်ႈၸၢႆးပိၶရိၼၼ်ႉယိင်ႈၶႅၼ်းတၵ်းႁဵတ်းလွင်ႈတၢင်းဢၼ်ဢမ်ႇလီတီႈႁဝ်းလိူဝ်တွၼ်းၼႃႇသေဢပသလုမ်ႇၼၼ်ႉဢေႃႈ။ႁွင်ႉဢဝ်ၶႃႈၵူၼ်းၸဝ်ႈမႂ်းတင်းလၢႆလႄႈလိုပ်ႈၸွမ်းလမ်းၸွမ်းမၼ်းၼၼ်ႉၵႂႃႇတႃႉ။ပေႃးဢမ်ႇၼၼ်ၵူဝ်မၼ်းတၵ်းၶဝ်ႈၵႃႈၼႂ်းဝဵင်းဢၼ်မၼ်ႈၶိူင်ႇသတေီႈတီႈသေလႄႈလပ်ႉႁၢႆတႃႇႁဝ်းၵႂႃႇသေဢေႃႈ၊ဝႃႈၼင်ႇၼႆလႄႈ
၇ ၵူၼ်းယႂႃႇၽတင်းလၢႆဢိၵ်ႇတင်းၵူၼ်းၶေႇရသိလႂ်၊ၵူၼ်းပေႇလသိလႂ်တင်းၵူၼ်းဢၼ်ႁႅင်းယႂ်ႇၼႃႇတင်းသဵင်ႈတင်းလူင်ၸိူဝ်းၼၼ်ႉဢွၼ်ၵၼ်ၸွမ်းလင်ဢၽိသေႇလႄႈဢွၵ်ႇသေၵႃႈၼႂ်းဝဵင်းယေႇရုသလႅမ်ႇၵႂႃႇႁႂ်ႈလႆႈလိုပ်ႈၸွမ်းလမ်းၸွမ်းသေႇၽလုၵ်ႈၸၢႆးပိၶရိၼၼ်ႉဢေႃႈ။
၈ မိူဝ်ႈဢၼ်ၶဝ်ႁွတ်ႈထိုင်ၵႃႈတီႈမၢၵ်ႇႁိုၼ်လူင်ဢၼ်မီးၵႃႈတီႈဝဵင်းၵိပွင်ႇၼၼ်ႉၸိုင်ဢႃႇမသၼၼ်ႉၶီႇသိုၵ်းမႃးႁပ်ႉႁူဝ်တၢင်းၶဝ်ဢေႃႈ။ယႂႃႇၽၼၼ်ႉၼုင်ႈမႆႊၶူဝ်းၼုင်ႈတိုၵ်းသိုၵ်းဢၼ်ႁတ်ႉဢႅဝ်ယူႇ၊ၵႃႈၼိူဝ်ၶူဝ်းၼၼ်ႉမီးသၢႆဢႅဝ်ဢၼ်ဢဝ်လၢပ်ႇမတ်ႉတင်းၵပ်းမၼ်းမတ်ႉဝႆႉလႄႈႁတ်ႉဝႆႉၵႃႈတီႈဢႅဝ်မၼ်းယူႇဢေႃႈ။ၼႂ်းမိူဝ်ႈဢၼ်ယင်းတိုၵ်ႉၵႂႃႇယူႇၼၼ်ႉၸိုင်၊လၢပ်ႇၼၼ်ႉသုတ်ႈတူၵ်းၵႂႃႇဢေႃႈ။
၉ ယႂႃႇၽထၢမ်တီႈဢႃႇမသလႄႈဝႃႈ၊-ၼွင်ႉၸၢႆးၵဝ်ဢိူၺ်း။ယူႇလီၵိၼ်ဝၢၼ်ယူႇႁိုဝ်၊ဝႃႈၼင်ႇၼႆလႄႈယႂႃႇၽဢဝ်မိုဝ်းၶွၼ်ၶႂႃယိပ်းၵမ်ၼူတ်ႇၵၢင်းဢႃႇမသႁႂ်ႈလႆႈၼူမ်မၼ်းဢေႃႈ။
၁၀ ၵွပ်ႈပိူဝ်ႈဢၼ်ဢႃႇမသဢမ်ႇႁဵတ်းသတိတီႈလၢပ်ႇဢၼ်ယႂႃႇၽယိပ်းၵမ်ယူႇၵႃႈၼႂ်းမိုဝ်းၶွၼ်သၢႆႉမၼ်းၼၼ်ႉလႄႈယႂႃႇၽဢဝ်လၢပ်ႇတႅင်းသႂ်ႇတီႈပုမ်မၼ်းလႄႈသႆႈမၼ်းဢွၵ်ႇတူၵ်းၵႃႈၼိူဝ်လိၼ်ဢေႃႈ။ယင်းဢမ်ႇလူဝ်ႇတႅင်းထႅင်ႈလႄႈဢႃႇမသတၢႆဢေႃႈ။
၁၁ ယႂႃႇၽတင်းၼွင်ႉၸၢႆးမၼ်းဢၽိသေႇၶဝ်လိုပ်ႈၸွမ်းလမ်းၸွမ်းသေႇၽ၊လုၵ်ႈၸၢႆးပိၶရိၼၼ်ႉဢေႃႈ။ၵူၼ်းယႂႃႇၽၵေႃႉၼိုင်ႈၸုၵ်းယူႇၵႃႈႁိမ်းမၼ်းၼၼ်ႉသေလႄႈလၢတ်ႈဝႃႈ၊-ၵေႃႉဢၼ်ပဵၼ်ၸႂ်ယႂႃႇၽ၊ဢၼ်ၸုၵ်းယူႇၽၢႆႇတႃႇဝိတ်ႉၼၼ်ႉၸွမ်းလင်ယႂႃႇၽၵႂႃႇတႃႉ၊ဝႃႈၼင်ႇၼႆဢေႃႈ။
၁၁ ဢႃႇမသၼၼ်ႉၵိင်ႈၵိူၵ်ႇယူႇၵႃႈၼႂ်းလိူတ်ႈမၼ်းၵႃႈၼႂ်းၵၢင်တၢင်းၼၼ်ႉဢေႃႈ။မိူဝ်ႈဢၼ်ၵေႃႉၼၼ်ႉႁၼ်ၵူၼ်းတင်းသဵင်ႈတင်းလူင်ၸုၵ်းၵိုတ်းယူႇၼၼ်ႉၸိုင်မၼ်းဢဝ်ဢႃႇမသဢွၵ်ႇသေၵႃႈၼႂ်းသဵၼ်ႈတၢင်းလူင်လႄႈၶၢႆႉၵႂႃႇဝႆႉၵႃႈတီႈပၢင်ႇတူင်ႈၼႃးသေယဝ်ႉ၊ဢဝ်ၶူဝ်းၼုင်ႈႁူမ်ႇသုမ်ႇမၼ်းဝႆႉဢေႃႈ။
၁၃ ဝၢႆးသေၶၢႆႉဢႃႇမသဢွၵ်ႇသေၵႃႈတီႈသဵၼ်ႈတၢင်းလူင်ယဝ်ႉၵူၼ်းတင်းသဵင်ႈတင်းလူင်ဢွၼ်ၵၼ်ၸွမ်းလင်ယႂႃႇၽလႄႈလိုပ်ႈၸွမ်းလမ်းၸွမ်းသေႇၽ၊လုၵ်ႈၸၢႆးပိၶရိ၊ၼၼ်ႉဢေႃႈ။
၁၄ သေႇၽတႆႇလတ်းၼႂ်းလိၼ်မဵဝ်းဢိသရေႇလၵႃႈမီးၵႂႃႇတေႃႇထိုင်ႁွတ်ႈဝဵင်းဢႃႇပေႇလဝဵင်းပိတ်ႉမႃႇၶတင်းတီႈဢၼ်ၵူၼ်းပေႇရိၵႃႈမီးၶဝ်ယူႇၼၼ်ႉဢေႃႈ။ၶဝ်ၼၼ်ႉၸူႉၵၼ်တုမ်ၵၼ်လႄႈၸွမ်းလင်မၼ်းဢေႃႈ။
၁၅ ယႂႃႇၽတင်းၵူၼ်းမၼ်းဢွၼ်ၵၼ်ၵႂႃႇလႄႈလွမ်ႉႁွပ်ႈသေႇၽဝႆႉၵႃႈၼႂ်းဝဵင်းဢႃႇပေႇလပိတ်ႉမႃႇၶၼၼ်ႉလႄႈၵူၼ်ႇတႅၼ်းလိၼ်ယူႇၽၢႆႇၼိုင်ႈတင်းၶူးဝဵင်းၼၼ်ႉလႄႈၸုၵ်းတင်ႈယူႇၽၢႆႇၼိုင်ႈတင်းၶူးဝဵင်းၼၼ်ႉဢေႃႈ။ၶဝ်ၵႃႈဢၼ်ပႃးတီႈယႂႃႇၽၸိူဝ်းၼၼ်ႉဢွၼ်ၵၼ်ၶုတ်းမူင်ႇလမ်းဝဵင်းႁႂ်ႈၵိူၼ်ႇပင်းတူၵ်းဢေႃႈ။
၁၆ မိူဝ်ႈၼၼ်ႉမေႈယိင်းဢၼ်မီးၺၢၼ်ႇၵေႃႉၼိုင်ႈယူႇၵႃႈၼႂ်းဝဵင်းသေလႄႈသႅၼ်ႇႁွင်ႉလႄႈဝႃႈ၊-ထွမ်ႇတႃႉ၊ထွမ်ႇတႃႉ။ႁွင်ႉယႂႃႇၽမႃးၵႃႈတီႈၼႆႉတႃႉ။
၁၇ ၵဝ်ၶႃႈတၵ်းလၢတ်ႈၵႂၢမ်းတေႃႇမၼ်းဢေႃႈ၊ဝႃႈၼင်ႇၼႆလႄႈ၊မိူဝ်ႈဢၼ်မၼ်းသုတ်ႉမႃးၼၼ်ႉၸိုင်မေႈယိင်းၼၼ်ႉထၢမ်ႇလႄႈဝႃႈ၊-ၸဝ်ႈႁဝ်းၼႆႉၸႂ်ႈယႂႃႇၽႁိုဝ်၊ဝႃႈၼင်ႇၼႆၸိုင်မၼ်းၵေႃႈၶိုၼ်းလၢတ်ႈလႄႈဝႃႈ၊-
၁၈ ပဵၼ်ၵဝ်ၼႆႉယဝ်ႉ၊မိူဝ်ႈဢၼ်ဝႃႈၼင်ႇၼႆၸိုင်မေႈယိင်းၼၼ်ႉၵေႃႈလဝ်ႈလၢတ်ႈလႄႈဝႃႈ၊-ထွမ်ႇငိၼ်းၵႂၢမ်းၶႃႈၸဝ်ႈႁဝ်းသေၵမ်းၶႃႈ၊ဝႃႈၼင်ႇၼႆဢေႃႈ။မၼ်းၵေႃႈၶိုၼ်းလၢတ်ႈလႄႈဝႃႈ၊-
၁၉ ၵဝ်ထွမ်ႇငိၼ်းယူဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်၊မေႈယိင်းၼၼ်ႉလဝ်ႈလၢတ်ႈလႄႈဝႃႈ၊-ၵႂၢမ်းထုင်းဢၼ်ၸၢင်ႈလၢတ်ႈမိူဝ်ႈၵွၼ်ႇဢွၼ်ၼႆႉၼၼ်ႉလႄႈဝႃႈၸမ်းႁႂ်ႈတိူင်ႇပၢင်ႇၵၼ်ၵႃႈတီႈဝဵင်းဢႃႇပေႇလသေႇလႄႈတႅပ်းတတ်းဢမူႉသေၵမ်း၊ဝႃႈၼင်ႇၼႆဢမၢၼ်ႇၶၢၼ်ပဵၼ်ၶႃႈဢေႃႈ။
၂၀ ၶႃႈၸဝ်ႈပဵၼ်ၵေႃႉဢၼ်ႁဵတ်းၼိမ်ၼိမ်လီလီၵႃႈၼႂ်းမဵဝ်းဢိသရေႇလလႄႈပဵၼ်ၵေႃႉဢၼ်ပႂ်ႉသႅတ်ႉၸႃႇယူႇၶႃႈဢေႃႈ။ၸဝ်ႈႁဝ်းႁႃႁႂ်ႈလႆႈယႃႉၽဵဝ်ႈဝဵင်းဝဵင်းၼိုင်ႈဢၼ်ဝႃႈမေးၵေႃႉၼိုင်ႈၵႃႈၼႂ်းမဵဝ်းဢိသရေႇလၶႃႈဢေႃႈ။
၂၁ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းမီးဢလူဝ်ႇႁႂ်ႈလႆႈဢိုၼ်ဢမူၺ်ႇထႃႇဝရႃႉၽြႃးၼင်ႇႁိုဝ်ၶႃႈ၊ဝႃႈၼင်ႇၼႆလႄႈယႂႃႇၽလၢတ်ႈလႄႈဝႃႈ၊-ႁႂ်ႈဢမူႉတၢင်းဢၼ်ဢိုၼ်ပႅတ်ႈဢမူႉတၢင်းဢၼ်ယႃႉပႅတ်ႈၼၼ်ႉၵႆၵၼ်တင်းၵဝ်သေၵမ်းလူၺ်ႈ။
၂၂ ႁႂ်ႈၵႆၵၼ်သေၵမ်းလူၺ်ႈ။ဢမ်ႇၸႂ်ႈၸိူဝ်ႉၼင်ႇၼၼ်ၵေႃႉဢၼ်ပဵၼ်ၵူၼ်းႁၢၼ်ႉလွႆဢေႇၽရိမ်ႇဢၼ်လႆႈၸိုဝ်သေႇၽ၊လုၵ်ႈၸၢႆးပိၶရိၼၼ်ႉယုၵ်ႉၶႅၼ်ယုၵ်ႉမိုဝ်းမၼ်းယူႇၽၢႆႇၼိုင်ႈတင်းၶုၼ်ႁေႃၶမ်းတႃႇဝိတ်ႉယဝ်ႉ။ၵူၺ်းၵွမ်ႉဢဝ်ၵေႃႉၼၼ်ႉၵူၺ်းဢၢပ်ႈပၼ်တႃႉ။ပေႃးဢၢပ်ႈပၼ်ၸိုင်ၵဝ်တၵ်းဢွၵ်ႇသေၵႃႈတီႈဝဵင်းၼႆႉၵႂႃႇဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်မေႈယိင်းၼၼ်ႉလၢတ်ႈတီႈယႂႃႇၽလႄႈဝႃႈ၊-တၵ်းဢဝ်ၵွၵ်းႁူဝ်မၼ်းထိမ်ႈတူၵ်းလၢမ်ႇဝဵင်းပၼ်တီႈၸဝ်ႈႁဝ်းၶႃႈဢေႃႈ၊ဝႃႈၼင်ႇၼႆသေယဝ်ႉ၊မေႈယိင်းၼၼ်ႉၸွမ်းၵႃႈၼင်ႇဢၼ်မၼ်းမီးၺၢၼ်ႇၼၼ်ႉမၼ်းၵႂႃႇၸူးၵႃႈတီႈၵူၼ်းဝဵင်းတင်းသဵင်ႈတင်းလူင်သေယဝ်ႉၶဝ်ဢွၼ်ၵၼ်တႅပ်းဢဝ်ၵွၵ်းႁူဝ်သေႇၽ၊လုၵ်ႈၸၢႆးပိၶရိသေလႄႈထိမ်ႈတူၵ်းပၼ်တီႈယႂႃႇၽဢေႃႈ။မၼ်းၵေႃႈပဝ်ႇတိုင်ႈၼႄးၶရႃႇသေလႄႈၵူၼ်းတင်းလၢႆဢွၼ်ၵၼ်လုၵ်ႉသေၵႃႈတီႈဝဵင်းၼၼ်ႉၶိုၼ်းမိူဝ်းၵႂႃႇၵႃႈတီႈသုမ်ႉထဵင်တီႈယူႇၶဝ်ႁင်းၽႂ်ႁင်းမၼ်းသေဢေႃႈ။ယႂႃႇၽၵေႃႈၶိုၼ်းမိူဝ်းၵႂႃႇၵႃႈတီႈဝဵင်းယေႇရုသလႅမ်ႇၸူးၵႃႈတီႈၶုၼ်ႁေႃၶမ်းသေဢေႃႈ။
၂၃ ယႂႃႇၽၼၼ်ႉပဵၼ်ၶုၼ်ႁူဝ်သိုၵ်းဢၼ်ဢုပ်ႉၵႃႈၼိူဝ်ၵူၼ်းတပ်ႉဢိသရေႇလတင်းသဵင်ႈတင်းလူင်ၼၼ်ႉဢေႃႈ။ပေႇၼႃႇယလုၵ်ႈၸၢႆးယေႃႇယတၼၼ်ႉလႆႈဢုပ်ႉၵႃႈၼိူဝ်ၵူၼ်းၶေႇရသိလႂ်တင်းၵူၼ်းပေႇလသိလႂ်ဢေႃႈ။
၂၄ ဢတေႃႇရမ်ႇၼၼ်ႉပဵၼ်ဝုၼ်ႇၵဵပ်းၶွၼ်ႇၸဝ်ႈဢေႃႈ။ယေႃႇသၽတ်ႉလုၵ်ႈၸၢႆးဢႁိလုတ်ႉၼၼ်ႉပဵၼ်ဢတႂၢင်းဝုၼ်ႇဢေႃႈ။
၂၅ သေႇဝၼၼ်ႉပဵၼ်ၸရေးလူင်ၸဝ်ႈဢေႃႈ။ၸႃႇတုၵ်ႉတင်းဢႃႇပျႃႇထႃႇၸိူဝ်းၼၼ်ႉပဵၼ်ယိတ်ႉပရေႃးႁိၵ်ႈဢေႃႈ။
၂၆ ဢိရလုၵ်ႈၸၢႆးယႃႇဢိ၇ ၼၼ်ႉပဵၼ်ၵေႃႉဢၼ်ဢုပ်ႉၵႃႈၼိူဝ်ႁေႃၸဝ်ႈဢေႃႈ။