Chapter
၁၄
ဢပသလုမ်ႇၶိုၼ်းမိူဝ်းဝဵင်းယေႇရုသလႅမ်ႇ
၁ မိူဝ်ႈဢၼ်ယႂႃႇၽ၊လုၵ်ႈၸၢႆးၸေႇရုယႃႇ၊ႁူႉသၢႆငၢႆလွင်ႈဢၼ်ႁူဝ်ၸႂ်ၶုၼ်ႁေႃၶမ်းၸပ်းၸွႆးဢပသလုမ်ႇယူႇၼၼ်ႉၸိုင်
၂ ယႂႃႇၽပွႆႇၸႂ်ႉၵူၼ်းၵႂႃႇၸူးၵႃႈတီႈဝဵင်းတေႇၵေႃႇလႄႈႁွင်ႉဢဝ်မေႈယိင်းဢၼ်မီးၺႅၼ်ႇၼၼ်ႉမႃးသေယဝ်ႉသင်ႇလၢတ်ႈလႄႈဝႃႈ၊-မႂ်းႁဵတ်းၸိူဝ်ႉၼင်ႇႁၢင်ႊႁူဝ်ၸႂ်ဢမ်ႇသႃႇၶၢင်းၶီၶၢင်းၽၢၼ်သေလႄႈၼုင်ႈၶူဝ်းမႃႇသႃႇယူႇတႃႉ။ယႃႇပတေႃးၼမ်ႉမၼ်း။
၃ ႁဵတ်းၸိူဝ်ႉၼင်ႇႁၢင်ႊမေႈယိင်းဢၼ်ႁႆႈႁွင်ႉၶၢင်းၶီၶၢင်းၽၢၼ်ႁိုင်ၼႃႇၵွပ်ႈပိူဝ်ႈၵူၼ်းတၢႆၼၼ်ႉသေလႄႈၶဝ်ႈၸူးၵႃႈတီႈၶုၼ်ႁေႃၶမ်းလႄႈလဝ်ႈလၢတ်ႈတီႈမၼ်းၸဝ်ႈၸိူဝ်ႉၼင်ႇၼႆတႃႉ၊ဝႃႈၼင်ႇၼႆဢေႃႈ။ၼင်ႇၼၼ်လႄႈယႂႃႇၽဢဝ်ၵႂၢမ်းသႂ်ႇသူပ်းမေႈယိင်းၼၼ်ႉဝႆႉဢေႃႈ။
၄ မိူဝ်ႈဢၼ်မေႈယိင်းၵူၼ်းဝဵင်းတေႇၵေႃႇၼၼ်ႉၶဝ်ႈၸူးၵႃႈတီႈၶုၼ်ႁေႃၶမ်းၼၼ်ႉၸိုင်မၼ်းၶုပ်ႉမူပ်ႇၵႃႈၼိူဝ်လိၼ်သေလႄႈႁဵတ်းတၢင်းဢၼ်ႁူဝ်ႇသေႇသေယဝ်ႉလဝ်ႈလၢတ်ႈလႄႈဝႃႈ၊-ၸဝ်ႈၶုၼ်လူင်တီႈၶႃႈ၊ဢိတ်းလူၵႄႇသႄႇၸွႆႈထႅမ်သေၵမ်းတီႈၶႃႈ၊ဝႃႈၼင်ႇၼႆဢေႃႈ။
၅ ၶုၼ်ႁေႃၶမ်းၵေႃႈထၢမ်လႄႈဝႃႈ၊-မႂ်းမီးဢမူႉၵႃႈသင်၊ဝႃႈၼင်ႇၼႆလႄႈမၼ်းၵေႃႈလဝ်ႈလၢတ်ႈလႄႈဝႃႈ၊-ၶႃႈၸဝ်ႈပဵၼ်မေႈမၢႆႈလႄႈၽူဝ်ၶႃႈၸဝ်ႈတၢႆၶႃႈယဝ်ႉ။
၆ ၶႃၸဝ်ႈမီးလုၵ်ႈၸၢႆးသွင်ၵေႃႉၶႃႈဢေႃႈ။သွင်ၶႃၽိတ်းၵၼ်ၶႃႈဢေႃႈ။ၵွပ်ႈပိူဝ်ႈဢမ်ႇမီးၵေႃႉဢၼ်ၶႄသွင်ၶႃၼၼ်ႉလႄႈၵေႃႉၼိုင်ႈႁဵတ်းတီႈၵေႃႉၼိုင်ႈတေႃႇထိုင်ႁွတ်ႈထၢၼ်ႈပေႃးတၢႆၶႃႈဢေႃႈ။
၇ မိူဝ်ႈလဵဝ်ၼႆႉပီႈၼွင်ႉၸိူဝ်ႉၶိူဝ်းၶႃႈၸဝ်ႈၸိူဝ်းၼၼ်ႉဢွၼ်ၵၼ်လုၵ်ႉယူႇၽၢႆႇၼိုင်ႈတင်းၶႃႈၸဝ်ႈလႄႈယွၼ်းႁႂ်ႈလႆႈဢဝ်ၵေႃႉဢၼ်ဢဝ်ပီႈၸၢႆးမၼ်းတၢႆၼၼ်ႉဢၢပ်ႈပၼ်တီႈၶဝ်ႁႂ်ႈလႆႈဢဝ်မၼ်းတၢႆတၢင်တူဝ်ဢသၢၵ်ႈပီႈၸၢႆးမၼ်းဢၼ်မၼ်းဢဝ်တၢႆၼၼ်ႉၶႃႈဢေႃႈ။တၵ်းပႄႇၽဵဝ်ႈၵေႃႉဢၼ်တၵ်းၶၢမ်ႇဢမူၺ်ႇၼၼ်ႉပႅတ်ႈဢေႃႈ။
၈ ပေႃးႁဵတ်းၸိူဝ်ႉၼင်ႇၼၼ်ၸိုင်ၶဝ်တၵ်းဢွၼ်ၵၼ်လပ်ႉမွတ်ႇပႅတ်ႈထၢၼ်ႇၽႆးဢၼ်ၵိုတ်းဢၼ်ၵျၢၼ်ႇဝႆႉတီႈၶႃႈၸဝ်ႈတင်းတီႈၽူဝ်ၶႃႈၸဝ်ႈၼၼ်ႉလႄႈဢမ်ႇႁႂ်ႈၸိုဝ်ႈသဵင်မၼ်းဢမ်ႇၵိုတ်းဢမ်ႇၵျၢၼ်ႇဝႆႉတီႈမၼ်းၵႃႈၼိူဝ်လိၼ်မိူင်းၼႆႉတီႈၶႃႈယဝ်ႉ၊မိူဝ်ႈဢၼ်ဝႃႈၼင်ႇၼႆၸိုင်၊ၶုၼ်ႁေႃၶမ်းမီးဢမိင်ႉတီႈမေႈယိင်းၼၼ်ႉလႄႈဝႃႈ၊-ၶိုၼ်းမိူဝ်းၵႂႃႇၵႃႈတီႈႁိူၼ်းမႂ်းလူးၵွၼ်ႇတႃႉ။ၵဝ်တၵ်းၸီႇယၢင်ႇဢမူႉမႂ်းဢေႃႈ၊ဝႃႈၼင်ႇၼႆဢေႃႈ။
၉ မေႈယိင်းၵူၼ်းဝဵင်းတေႇၵေႃႇၼၼ်ႉၵေႃႈလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊-ၸဝ်ႈႁဝ်းၶႃႈ၊ၸဝ်ႈၶုၼ်လူင်တီႈၶႃႈ၊ႁႂ်ႈဢပျႅတ်ႈႁွတ်ႈထိုင်ၵႃႈၼိူဝ်ၶႃႈၸဝ်ႈဢိၵ်ႇတင်းပီႈၼွင်ႉၸိူဝ်ႉၶိူဝ်းၶႃႈသေၵမ်းလူၺ်ႈ။ႁႂ်ႈၶုၼ်ႁေႃၶမ်းတင်းရႃႇၸႃႉပလၢင်ႇၸဝ်ႈၼၼ်ႉၵၢင်းလွတ်ႈတင်းဢပျႅတ်ႈသေၵမ်းလူၺ်ႈ၊ဝႃႈၼင်ႇၼႆဢေႃႈ။
၁၀ ၶုၼ်ႁေႃၶမ်းၵေႃႈမီးဢမိင်ႉလႄႈဝႃႈ၊-ၵေႃႉဢၼ်တၢင်ႇဢပျႅတ်ႈတီႈမႂ်းၼၼ်ႉႁွင်ႉမၼ်းမႃးတီႈၵဝ်တႃႉ။ၵမ်းလိုၼ်းမၼ်းဢမ်ႇလႆႈယႃႉယူၵ်ႉမႂ်းထႅင်ႈ၊မိူဝ်ႈဢၼ်ဝႃႈၼင်ႇၼႆၸိုင်၊မၼ်းၶိုၼ်းလဝ်ႈလၢတ်ႈလႄႈဝႃႈ၊-
၁၁ လွင်ႈၼင်ႇႁိုဝ်ၵေႃႉဢၼ်ဢဝ်တၢႆၼၼ်ႉတၵ်းဢမ်ႇလႆႈၶၢမ်ႇတၢင်းဢၼ်ယႃႉၽဵဝ်ႈပႅတ်ႈၼၼ်ႉၸိုင်ၸဝ်ႈၶုၼ်လူင်ၶုၵ်းၸႂ်လႆႈၶႆႈၸႂ်ထူပ်းထႃႇဝရႃႉၽြႃးၽြႃးပဵၼ်ၸဝ်ႈသေလႄႈၵႃႈၼင်ႇဢၼ်ထႃႇဝရႃႉၽြႃးဢသၢၵ်ႈလိပ်းယူႇၼၼ်ႉယႃႇပေႁႂ်ႈၶူၼ်ႁူဝ်လုၵ်ႈၸၢႆးၶႃႈၸဝ်ႈလႆႈတူၵ်းၵႃႈၼိူဝ်လိၼ်သသေဵၼ်ႈၶႃႈ၊ဝႃႈၼင်ႇၼႆဢေႃႈ။လၢႆးသမ်ႉမေႈယိင်းၼၼ်ႉတွင်းပၢၼ်ႇလဝ်ႈလၢတ်ႈလႄႈဝႃႈ၊-ၶႅၼ်းတေႃႈပၼ်ဢၶႂၢင်ႉႁႂ်ႈၶႃႈၸဝ်ႈလႆႈလဝ်ႈလၢတ်ႈၵႂၢမ်းသေၶေႃႈသေၵမ်းတီႈၸဝ်ႈၶုၼ်လူင်သေၵမ်းၶႃႈ၊ဝႃႈၼင်ႇၼႆလႄႈၶုၼ်ႁေႃၶမ်းၵေႃႈမီးဢမိင်ႉဝႃႈ၊-လၢတ်ႈတႃႉ၊ဝႃႈၼင်ႇၼႆဢေႃႈ။
၁၃ မေႈယိင်းၼၼ်ႉၵေႃႈလဝ်ႈလၢတ်ႈလႄႈဝႃႈ၊-ပေႃးပဵၼ်ၸိူဝ်ႉၼင်ႇၼၼ်ၸိုင်ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းၵျၢမ်ႇပွင်ၸိူဝ်ႉၼင်ႇၼၼ်ယူႇၽၢႆႇၼိုင်ႈတင်းၵူၼ်းၽြႃးပဵၼ်ၸဝ်ႈတင်းလၢႆယူႇတီႈၶႃႈ။ၼႂ်းလွင်ႈဢၼ်ၸဝ်ႈၶုၼ်လူင်မီးဢမိင်ႉၼၼ်ႉၸဝ်ႈၶုၼ်လူင်ပဵၼ်ၸိူဝ်ႉၼင်ႇၵေႃႉဢၼ်မီးဢပျႅတ်ႈယဝ်ႉ။ၵွပ်ႈပိူဝ်ႈၸဝ်ႈၶုၼ်လူင်ဢမ်ႇၶိုၼ်းႁွင်ႉဢဝ်ၵေႃႉဢၼ်ၸဝ်ႈၶုၼ်လူင်ႁေႃႈပႅတ်ႈၼၼ်ႉဢေႃႈ။
၁၄ ၵူၼ်းႁဝ်းၼႆႉတၵ်းလႆႈတၢႆလႄႈပဵၼ်မိူၼ်ၸိူဝ်ႉၼင်ႇၼမ်ႉဢၼ်ထွၵ်ႇပႅတ်ႈၵႃႈၼိူဝ်လိၼ်ၼၼ်ႉလႄႈဢမ်ႇၶိုၼ်းၵွပ်ႇဢဝ်လႆႈၼၼ်ႉတီႈၶႃႈဢေႃႈ။ၽြႃးပဵၼ်ႈၸဝ်ႈဢမ်ႇဢဝ်ဢသၢၵ်ႈၵူၼ်းတၢႆ။မၼ်းၸဝ်ႈၵျၢမ်ႇပွင်ႁႂ်ႈၵေႃႉဢၼ်လႆႈၶၢမ်ႇတၢင်းဢၼ်ႁေႃႈဢွၵ်ႇၼၼ်ႉဢမ်ႇလႆႈပဵၼ်ၵေႃႉဢၼ်လႆႈၶၢမ်ႇတၢင်းဢၼ်ႁေႃႈဢွၵ်ႇယူႇသေႇသေႇၼၼ်ႉတီႈၶႃႈ။
၁၅ ပိူဝ်ႈဢၼ်ပဵၼ်ၼင်ႇၼႆလႄႈလွင်ႈဢၼ်ၶႃႈၸဝ်ႈမႃးလႄႈလဝ်ႈလၢတ်ႈဢမူႉၼႆႉတီႈၸဝ်ႈႁဝ်းၶႃႈၸဝ်ႈၶုၼ်လူင်ၼႆႉၸမ်း၊ၵူၼ်းတင်းလၢႆႁဵတ်းႁႂ်ႈၶႃႈၸဝ်ႈလႆႈၵုဝ်ႁႄတီႈၶႃႈဢေႃႈ။ၶႃႈၸဝ်ႈႁဝ်းၼႆႉၵေႃႈဝႃႈၵဝ်တၵ်းလဝ်ႈလၢတ်ႈတီႈၶုၼ်ႁေႃၶမ်းဢေႃႈ။ၶုၼ်ႁေႃၶမ်းၸၢင်ႊၶေးတၵ်းႁဵတ်းၸွမ်းၵႃႈၼင်ႇဢၼ်ၶႃႈၸဝ်ႈတွင်းပၢၼ်ႇၼၼ်ႉဢေႃႈ။
၁၆ လွင်ႈမၼ်းၸမ်းၶုၼ်ႁေႃၶမ်းတၵ်းထွမ်ႇဢဝ်ႁႂ်ႈလႆႈၼုၵ်ႈဢဝ်ၶႃႈမၼ်းၸဝ်ႈလွတ်ႈသေၵႃႈၼႂ်းမိုဝ်းၵေႃႉဢၼ်တၵ်းပႄႇၽဵဝ်ႈၵဝ်ၶႃႈဢိၵ်ႇတင်းလုၵ်ႈၸၢႆးၵဝ်ၶႃႈပႅတ်ႈသေၵႃႈၼိူဝ်လိၼ်ဢမူၺ်ႇၽြႃးပဵၼ်ၸဝ်ႈၼႆႉဢေႃႈ။
၁၇ ၶႃႈၸဝ်ႈႁဝ်းၵေႃႈဝႃႈႁႂ်ႈဢမိင်ႉၸဝ်ႈၵဝ်ၸဝ်ႈၶုၼ်လူင်ၼၼ်ႉပၼ်ၵတ်းယဵၼ်ၶျၢမ်းသႃႇသေၵမ်းလူၺ်ႈ။ၸဝ်ႈၵဝ်ၸဝ်ႈၶုၼ်လူင်ၸၵ်းၽႄလႄႈႁူႉလွင်ႈတၢင်းဢၼ်လီဢၼ်ဢမ်ႇလီၼၼ်ႉလႆႈမိူၼ်ၸိူဝ်ႉၼင်ႇတမၢၼ်ႇၵၢင်ႁၢဝ်ၽြႃးပဵၼ်ၸဝ်ႈၼၼ်ႉဢေႃႈ၊ဝႃႈၼင်ႇၼႆယူႇတီႈၶႃႈဢေႃႈ။ထႃႇဝရႃႉၽြႃးၽြႃးပဵၼ်ၸဝ်ႈၸဝ်ႈႁဝ်းၼၼ်ႉတၵ်းမီးယူႇလူၺ်ႈၵၼ်တင်းၸဝ်ႈႁဝ်းတီႈၶႃႈဢေႃႈ၊ဝႃႈၼင်ႇၼႆဢေႃႈ။
၁၈ မိူဝ်ႈၼၼ်ႉၶုၼ်ႁေႃၶမ်းမီးဢမိင်ႉတီႈမေႈယိင်းၼၼ်ႉလႄႈဝႃႈ၊-မႂ်းယႃႇပသေိူင်ႇပေဢမ်ဝႆႉလွင်ႈတၢင်းဢၼ်ၵဝ်တွင်ႉထၢမ်တီႈမႂ်းၼၼ်ႉသေၵမ်း၊မိူဝ်ႈဢၼ်ဝႃႈၼင်ႇၼႆၸိုင်မေႈယိင်းၵေႃႈလဝ်ႈလၢတ်ႈလႄႈဝႃႈ၊-ၸဝ်ႈႁဝ်းၶႃႈၸဝ်ႈၶုၼ်လူင်တီႈၶႃႈ။
၁၉ မီးဢမိင်ႉသေၵမ်းတီႈၶႃႈ၊ဝႃႈၼင်ႇၼႆဢေႃႈ။ၶုၼ်ႁေႃၶမ်းၵေႃႈထၢမ်လႄႈဝႃႈ၊-ၼႂ်းလွင်ႈတၢင်းၸိူဝ်းၼႆႉပဵၼ်ယႂႃႇၽပၼ်တၢင်းၵျၢမ်ႇတၢင်းပွင်တီႈမႂ်းဢမ်ႇၸႂ်ႈႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်မေႈယိင်းၼၼ်ႉၵေႃႈၶိုၼ်းလဝ်ႈလၢတ်ႈလႄႈဝႃႈ၊-ၸဝ်ႈႁဝ်းၶႃႈၸဝ်ႈၶုၼ်လူင်တီႈၶႃႈ။ၵႃႈၼင်ႇဢၼ်ၸဝ်ႈႁဝ်းဢသၢၵ်ႈလိပ်းယူႇၼၼ်ႉၽူႈလႂ်ဢမ်ႇဝေႈပိူင်ႈသေၵႃႈတီႈသဵၼ်ႈတၢင်းဢၼ်ၸဝ်ႈႁဝ်းၶႃႈၸဝ်ႈၶုၼ်လူင်မီးဢမိင်ႉၼၼ်ႉၵႂႃႇၽၢႆႇၶႂႃၽၢႆႇသၢႆႉလႆႈတီႈၶႃႈ။ၶႃႈၸဝ်ႈႁဝ်းယႂႃႇၽၼၼ်ႉသင်ႇလၢတ်ႈဝႆႉတီႈၶႃႈၸဝ်ႈလႄႈဢဝ်ၵႂၢမ်းတင်းသဵင်ႈတင်းလူင်ၼႆႉသႂ်ႇဝႆႉၵႃႈၼႂ်းသူပ်းၶႃႈၸဝ်ႈၶႃႈဢေႃႈ။
၂၀ ၶႃႈၸဝ်ႈႁဝ်းယႂႃႇၽၼၼ်ႉၸီႇယၢင်ႇႁဵတ်းၸွမ်းပုင်ႇႁၢင်ႊၸိူဝ်ႉၼင်ႇၼၼ်လႄႈၸဝ်ႈႁဝ်းၵေႃႈမီးပိင်ႇၺႃႇၸိူဝ်ႉၼင်ႇဢၼ်တမၢၼ်ႇၵၢင်ႁၢဝ်ၽြႃးပဵၼ်ၸဝ်ႈမီးပိင်ႇၺႃႇၼၼ်ႉတေႃႇထိုင်ႁွတ်ႈထၢၼ်ႈပေႃးႁူႉၵႃႈဢၼ်မီးၵႃႈၼိူဝ်လိၼ်မိူင်းၼႆႉလႆႈတီႈၶႃႈဢေႃႈ၊ဝႃႈၼင်ႇၼႆဢေႃႈ။
၂၁ မိူဝ်ႈၼၼ်ႉၶုၼ်ႁေႃၶမ်းမီးဢမိင်ႉတီႈယႂႃႇၽလႄႈဝႃႈ၊-ဢမူႉၼႆႉၸိုင်ၵဝ်လႆႈၸီႇယၢင်ႇယဝ်ႉ။ပိူဝ်ႈၼႆလႄႈမႂ်းၵႂႃႇလႄႈႁွင်ႉဢဝ်ဢပသလုမ်ႇၼၼ်ႉမႃးတႃႉ၊ဝႃႈၼင်ႇၼႆဢေႃႈ။
၂၂ ယႂႃႇၽၵေႃႈၶုပ်ႉမူပ်ႇၵႃႈၼိူဝ်လိၼ်ယူႇသေလႄႈႁဵတ်းတၢင်းဢၼ်ရူဝ်ႇသေႇလႄႈယွင်ႈယေႃးၵျေးၸူးၶုၼ်ႁေႃၶမ်းလႄႈဝႃႈ၊-ၸဝ်ႈႁဝ်းၶႃႈၸဝ်ႈၶုၼ်လူင်တီႈၶႃႈ။ဝၼ်းမိူဝ်ႈၼႆႉၶႃႈၸဝ်ႈႁဝ်းႁူႉလွင်ႈဢၼ်ၶႃႈၸဝ်ႈထူပ်းၵျေးၸူးသိုဝ်ႈၼႃႈတႂ်ႈတႃႇၸဝ်ႈႁဝ်းၵွပ်ႈပိူဝ်ႈဢၼ်ၸဝ်ႈႁဝ်းႁဵတ်းၸွမ်းၵႃႈၼင်ႇဢၼ်ၶႃႈၸဝ်ႈလဝ်ႈယွၼ်းၼၼ်ႉတီႈၶႃႈယဝ်ႉ၊ဝႃႈၼင်ႇၼႆဢေႃႈ။
၂၃ လိုၼ်းၼၼ်ႉယႂႃႉၽလုၵ်ႉလႄႈၵႂႃႇၵႃႈတီႈဝဵင်းၵေႇသုရသေယဝ်ႉ၊ဢဝ်ဢပသလုမ်ႇမႃးၵႃႈတီႈဝဵင်းယေႇရုသလႅမ်ႇဢေႃႈ။
၂၄ ၶုၼ်ႁေႃၶမ်းၵေႃႈမီးဢမိင်ႉလႄႈဝႃႈ၊-ႁႂ်ႈမၼ်းဝေႈၵႂႃႇၸူးၵႃႈတီႈႁိူၼ်းမၼ်းသေ။ယႃႇပေႁႂ်ႈမၼ်းႁၼ်ၼႃႈၵဝ်၊ဝႃႈၼင်ႇၼႆလႄႈဢပသလုမ်ႇၵေႃႈဝေႈၵႂႃႇၸူးၵႃႈတီႈႁိူၼ်းမၼ်းလႄႈမၼ်းဢမ်ႇလႆႈႁၼ်ၼႃႈၶုၼ်ႁေႃၶမ်း။
၂၅ ၼႂ်းမဵဝ်းဢိသရေႇလတင်းသဵင်ႈတင်းမူတ်းၼၼ်ႉၵေႃႉဢၼ်ႁၢင်ႈလီမိူၼ်ၸိူဝ်ႉၼင်ႇဢပသလုမ်ႇလႄႈလႆႈၶၢမ်ႇတၢင်းဢၼ်ယွင်ႈယေႃးၼၼ်ႉဢမ်ႇမီးသေၵေႃႉသေၵူၼ်း။ၸႃႉၸဵမ်ၽႃႇတိၼ်မၼ်းတေႃႇႁွတ်ႈၸိၵ်းႁူဝ်မၼ်းဢမ်ႇမီးတီႈၸီႉၼႄးသေၸိူဝ်ႉသေဢၼ်။
၂၆ ဢမ်ႇႁိုင်ဢမ်ႇၼၢၼ်းမၼ်းယၢမ်ႈၵႅတ်းၶူၼ်ႁူဝ်မၼ်းဢေႃႈ။မိူဝ်ႈဢၼ်မၼ်းၵႅတ်းၶူၼ်ႁူဝ်မၼ်းၼၼ်ႉၸိုင်မၼ်းၸင်ႁိဝ်ႈၶူၼ်ႁူဝ်မၼ်းလႄႈတၢင်းၼၵ်းမၼ်းမီးသွင်ပၢၵ်ႇၵျၢပ်ႈသၶလေၸွမ်းလူၺ်ႈၵျၢပ်ႈၶုၼ်ႁေႃၶမ်းၼၼ်ႉဢေႃႈ။
၂၇ ဢပသလုမ်ႇမီးလုၵ်ႈၸၢႆးသၢမ်ၵေႃႉဢိၵ်ႇတင်းလုၵ်ႈယိင်းဢၼ်လႆႈၸိုဝ်တႃႇမႃႇၼၼ်ႉၵေႃႉၼိုင်ႈဢေႃႈ။လုၵ်ႈယိင်းၼၼ်ႉပဵၼ်ၵေႃႉဢၼ်ႁၢင်ႈလီၼႃႇလူင်လၢင်ဢေႃႈ။
၂၈ ဢပသလုမ်ႇၼၼ်ႉယင်းဢမ်ႇလႆႈႁၼ်ၼႃႈၶုၼ်ႁေႃၶမ်းလႄႈယူႇၵႃႈၼႂ်းဝဵင်းယေႇရုသလႅမ်ႇသွင်ပီႊသေယဝ်ႉ၊ဢပသလုမ်ႇပွႆႇၸႂ်ႉၵူၼ်းၵႂႃႇႁွင်ႉယႂႃႇၽမႃးဢေႃႈ။
၂၉ မၼ်းၶႂ်ႈၸႂ်ႉယႂႃႇၽတၢင်တူဝ်မၼ်းၵႂႃႇၸူးတီႈၶုၼ်ႁေႃၶမ်းဢေႃႈ။ၵူၺ်းၵႃႈယႂႃႇၽဢမ်ႇမႃး။ၵႂႃႇႁွင်ႉထႅင်ပွၵ်ႈၼိုင်ႈၵေႃႈဢမ်ႇမႃး။
၃၀ ၵွပ်ႈၼၼ်လႄႈမၼ်းလၢတ်ႈတီႈၶႃႈၵူၼ်းမၼ်းတင်းလၢႆလႄႈဝႃႈ၊-တူၺ်းလူး။တူင်ႈၼႃးယႂႃႇၽၼၼ်ႉၸမ်ၵၼ်တင်းတီႈယူႇႁဝ်းလႄႈမီးၶဝ်ႈမူႉယေႃးဢေႃႈ။ၵႂႃႇလႄႈဢဝ်ၽႆးတုတ်ႇပႅတ်ႈတႃႉ၊ဝႃႈၼင်ႇၼႆလႄႈၶႃႈၵူၼ်းဢပသလုမ်ႇၸိူဝ်းၼၼ်ႉၵေႃႈဢွၼ်ၵၼ်ဢဝ်ၽႆးၵႂႃႇတုတ်ႇဢေႃႈ။
၃၁ ဝၢႆးၼၼ်ႉယႂႃႇၽၵႂႃႇၸူးၵႃႈတီႈႁိူၼ်းဢပသလုမ်ႇသေလႄႈထၢမ်ဝႃႈ၊-ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၶႃႈၵူၼ်းၸဝ်ႈႁဝ်းၸိူဝ်းၼၼ်ႉဢဝ်ၽႆးတုတ်ႇတူင်ႈၼႃးၶႃႈၸဝ်ႈပႅတ်ႈ၊မိူဝ်ႈဢၼ်ဝႃႈၼင်ႇၼႆၸိုင်၊
၃၂ ဢပသလုမ်ႇၶိုၼ်းလၢတ်ႈတီႈယႂႃႇၽလႄႈဝႃႈ၊-တူၺ်းလူး။ၵဝ်ပွႆႇၸႂ်ႉၵႂႃႇႁွင်ႉဢဝ်မႂ်းႁႂ်ႈလႆႈမႃးတီႈၵဝ်ႁႂ်ႈမႂ်းလႆႈၵႂႃႇၸူးၵႃႈတီႈၶုၼ်ႁေႃၶမ်းလႄႈလဝ်ႈလၢတ်ႈဝႃႈ၊-ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၶႃႈၸဝ်ႈၼႆႉလႆႈလုၵ်ႉသေၵႃႈတီႈဝဵင်းၵေႇသုရမႃးၵႃႈတီႈၼႆႉ။ၶႃႈၸဝ်ႈထုၵ်ႇလီယူႇၵႃႈတီႈဝဵင်းၼၼ်ႉတေႃႇထိုင်ႁွတ်ႈမိူဝ်ႈလဵဝ်ၼႆႉတီႈၶႃႈဢေႃႈ။မိူဝ်ႈလဵဝ်ၼႆႉႁႂ်ႈၵဝ်ၶႃႈလႆႈႁၼ်ၼႃႈၶုၼ်ႁေႃၶမ်းသေၵမ်း။
၃၃ ပေႃးၵဝ်ၶႃႈမီးဢပျႅတ်ႈၵေႃႈႁႂ်ႈမၼ်းၸဝ်ႈဢဝ်ၵဝ်ၶႃႈတၢႆသေၵမ်း၊ဝႃႈၼင်ႇၼႆလႄႈယႂႃႇၽၵေႃႈၵႂႃႇတီႈၶုၼ်ႁေႃၶမ်းလႄႈလဝ်ႈလၢတ်ႈဢေႃႈ။ၶုၼ်ႁေႃၶမ်းၵေႃႈႁွင်ႉဢဝ်ဢပသလုမ်ႇမႃးဢေႃႈ။မၼ်းၵေႃႈမႃးလႄႈဝၢင်းႁူဝ်ၶုပ်ႉမူပ်ႇၵႃႈၼိူဝ်လိၼ်ၵႃႈတီႈၽၢႆႇၼႃႈၶုၼ်ႁေႃၶမ်းသေယဝ်ႉၶုၼ်ႁေႃၶမ်းၵေႃႈၸုပ်ႇၼူမ်ဢပသလုမ်ႇဢေႃႈ။