Chapter
၁၂
ၼႃႇသၼ်သုင်းမႃႉတႃႇဝိတ်ႉ
၁ လိုၼ်းၼၼ်ႉထႃႇဝရႃႉၽြႃးပွႆႇၸႂ်ႉပရေႃးၽႅတ်ႈၼႃႇသၼ်ႇၵႂႃႇၸူးၵႃႈတီႈတႃႇဝိတ်ႉလႄႈၼႃႇသၼ်ႇၵေႃႈၵႂႃႇႁွတ်ႈထိုင်တီႈမၼ်းသေယဝ်ႉလၢတ်ႈလႄႈဝႃႈ၊-ၵႃႈတီႈဝဵင်းဝဵင်းၼိုင်ႈမီးသထေးၵေႃႉၼိုင်ႈတင်းၵူၼ်းၽၢၼ်ၵေႃႉၼိုင်ႈဢေႃႈ။
၂ သထေးၼၼ်ႉမၢၵ်ႈမီးလီပဵၼ်လႄႈမီးသူဝ်းမီးဝူဝ်းၼမ်ၼႃႇလူင်လၢင်ၶႃႈဢေႃႈ။
၃ ၵူၼ်းၽၢၼ်ၵေႃႉၼၼ်ႉၸမ်းၼွၵ်ႈသသေူဝ်းမေႈဢွၼ်ႇတူဝ်ၼိုင်ႈဢၼ်မၼ်းသိုဝ်ႉဢဝ်ဝႆႉၼၼ်ႉမၼ်းဢမ်ႇမီးၵႃႈသင်သေၸိူဝ်ႉသေပိူင်လႃးလႃးတီႈၶႃႈ။မၼ်းလဵင်ႉလူသူဝ်းမေႈဢွၼ်ႇၼၼ်ႉယႂ်ႇမႃးလူၺ်ႈၵၼ်တင်းလုၵ်ႈလၢင်းမၼ်းတင်းလၢႆဢေႃႈ။မၼ်းယၢမ်ႈၵိၼ်ၶူပ်းၸွမ်းၸဝ်ႈမၼ်းၸၢင်ႊၵိၼ်ၼႂ်းၵွၵ်းၼမ်ႉၸွမ်းၸဝ်ႈမၼ်း၊ၸၢင်ႊၼွၼ်းၵႃႈၼႂ်းတၵ်းၸဝ်ႈမၼ်းလႄႈမၼ်းပဵၼ်မိူၼ်ၸိူဝ်ႉၼင်ႇလုၵ်ႈယိင်းတီႈၸဝ်ႈ
မၼ်းၶႃႈဢေႃႈ။
၄ မိူဝ်ႈၼၼ်ႉၶႅၵ်ႇၵေႃႉၼိုင်ႈႁွတ်ႈထိုင်ၵႃႈတီႈသထေးၼၼ်ႉလႄႈသထေးၼၼ်ႉသလေၢႆသူဝ်းဝူဝ်းမၼ်းလႄႈဢမ်ႇဢဝ်သူဝ်းဝူဝ်းမၼ်းႁဵတ်းလဵင်ႉႁဵတ်းလူၶႅၵ်ႇဢၼ်ႁွတ်ႈထိုင်မႃးၵႃႈတီႈမၼ်းၼၼ်ႉ။မၼ်းၵႂႃႇဢဝ်သူဝ်းမေႈဢွၼ်ႇၵူၼ်းၽၢၼ်ၼၼ်ႉသေလႄႈႁဵတ်းၽၵ်းတူမ်ႈႁုင်ပုၼ်ႈဢၼ်တၵ်းလဵင်ႉတၵ်းလူၶႅၵ်ႇဢၼ်ႁွတ်ႈထိုင်ႈတီႈမၼ်းၼၼ်ႉၶႃႈဢေႃႈ၊ဝႃႈၼင်ႇၼႆလႄႈ၊
၅ တႃႇဝိတ်ႉၸႂ်မႆႈၶႆႈၸႃႉၼႃႇလူင်လၢင်တီႈၵေႃႉၼၼ်ႉလႄႈလၢတ်ႈတီႈၼႃႇသၼ်ႇလႄႈဝႃႈ၊-ၵႃႈၼင်ႇဢၼ်ထႃႇဝရႃႉၽြႃးဢသၢၵ်ႈလိပ်းယူႇၼၼ်ႉၵေႃႉဢၼ်ႁၢႆႉမိူၵ်ႈႁဵတ်းၸိူဝ်ႉၼင်ႇၼၼ်ၼၼ်ႉထိူၵ်ႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၢၼ်ပဵၼ်ဢိူဝ်ႈ။
၆ ၵွပ်ႈပိူဝ်ႈဢၼ်မၼ်းဢမ်ႇမီးၸႂ်ၵရူႉၼႃႇလႄႈႁဵတ်းလွင်ႈတၢင်းဢၼ်ႁၢႆႉမိူၵ်ႈၼၼ်ႉမၼ်းတၵ်းလႆႈၶိုၼ်းတႅၼ်းပၼ်ပုၼ်ႈသူဝ်းမေႈဢွၼ်ႇၼၼ်ႉသီႇပုၼ်ႊဢေႃႈ၊ဝႃႈၼင်ႇၼႆဢေႃႈ။
၇ ၼႃႇသၼ်ႇၵေႃႈလဝ်ႈလၢတ်ႈတီႈတႃႇဝိတ်ႉလႄႈဝႃႈ၊-ၵေႃႉၼၼ်ႉပဵၼ်ၸဝ်ႈႁဝ်းၶႃႈဢေႃႈ။ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလမီးဢမိင်ႉလႄႈဝႃႈၸမ်း၊-ၵဝ်ပၼ်ၽိၵ်ႈသိၵ်ႈလႄႈၶၢၼ်းမႂ်းဝႆႉၼႂ်းဢရႃႇၶုၼ်ႁေႃၶမ်းဢိသရေႇလယဝ်ႉ။ၵဝ်ၵႄႇသႄႇဢဝ်မႂ်းလွတ်ႈသေၵႃႈၼႂ်းမိုဝ်းသေႃးလုယဝ်ႉ။
၈ ၵဝ်ဢဝ်ပီႈၼွင်ႉၸိူဝ်ႉၶိူဝ်းၸဝ်ႈမႂ်းဢိၵ်ႇတင်းမေးၸဝ်ႈမႂ်းၸိူဝ်းၼၼ်ႉဢၢပ်ႈပၼ်ၵႃႈၼႂ်းဝၢင်ႈႁူဝ်ဢူၵ်းမႂ်းယဝ်ႉ။ၵဝ်ဢဝ်မဵဝ်းဢိသရေႇလတင်းမဵဝ်းယုတပၼ်တီႈမႂ်းယဝ်ႉ။ပေႃးယင်းဢမ်ႇၵုမ်ႇဢမ်ႇပေႃးတီႈမႂ်းၸိုင်ၵဝ်တၵ်းပၼ်တီႈမႂ်းထႅင်ႈလူးၵွၼ်ႇဢေႃႈ။
၉ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းႁဵတ်းဢမ်ႇပေႃးၼင်ႇႁိုဝ်တီႈပိင်းၺၢပ်ႈထႃႇဝရႃႉၽြႃးလႄႈႁဵတ်းဢၼ်ႁၢႆႉဢၼ်ယုတ်ႈၵႃႈတီႈၽၢႆႇၼႃႈမၼ်းၸဝ်ႈၸိူဝ်ႉၼႆ။မႂ်းဢဝ်ဢသၢၵ်ႈဢုရိယၵူၼ်းႁိတ်ႉတိၼၼ်ႉတၢႆၸွမ်းလၢပ်ႇၸွမ်းလႅဝ်းလႄႈသိမ်းဢဝ်မေးမၼ်းႁႂ်ႈပဵၼ်မေးမႂ်းယဝ်ႉလူင်ပေႇ။မႂ်းဢဝ်လၢပ်ႇၵူၼ်းဢမ်ႇမုၼ်ႇၸိူဝ်းၼၼ်ႉသေလႄႈဢဝ်မၼ်းတၢႆယဝ်ႉလူင်ပေႇ။
၁၀ မိူဝ်ႈလဵဝ်ၼႆႉၵွပ်ႈပိူဝ်ႈဢၼ်မႂ်းႁဵတ်းဢမ်ႇပေႃးၼင်ႇႁိုဝ်တီႈၵဝ်လႄႈသိမ်းဢဝ်မေးဢုရိယၵူၼ်းႁိတ်ႉတိႁႂ်ႈပဵၼ်မေးမႂ်းၼၼ်ႉလႄႈၽေးလၢပ်ႇတၵ်းဢမ်ႇလႆႈၽၢတ်ႇလႆႈယၢၼ်သေၵႃႈတီႈပီႈၼွင်ႉၸိူဝ်ႉၶိူဝ်းမႂ်းသပွေၵ်ႈ။
၁၁ ထႃႇဝရႃႉၽြႃးမီးဢမိင်ႉလႄႈဝႃႈၸမ်း၊-ၵဝ်တၵ်းႁႂ်ႈၽေးရၢၼ်ႇပေႃႇဢွၵ်ႇမႃးၵႃႈၼႂ်းၵူၼ်းမဵဝ်းၸိူဝ်ႉၶိူဝ်းမႂ်းဢေႃႈ။ၵဝ်တၵ်းဢဝ်မေးမႂ်းတင်းလၢႆဢၢပ်ႈပၼ်တီႈၵူၼ်းႁိူၼ်းဢၼ်ၸမ်ၵၼ်တင်းမႂ်းၼၼ်ႉဢေႃႈ။မၼ်းတၵ်းၼွၼ်းၸွမ်းမေးမႂ်းၸိူဝ်းၼၼ်ႉသိုဝ်ႈၼႃႈတႂ်ႈတႃမႂ်းလႄႈၶိင်ႇၵၢင်ဝၼ်းၼၼ်ႉဢေႃႈ။
၁၁ မႂ်းႁဵတ်းဢမူႉၼၼ်ႉတဵတ်ႇတဵတ်ႇသေၵေႃႈၵဝ်တၵ်းႁဵတ်းဢမူႉၼႆႉၵႃႈတီႈၽၢႆႇၼႃႈမဵဝ်းဢိသရေႇလတင်းသဵင်ႈတင်းလူင်မိူဝ်ႈၶိင်ႇၵၢင်ဝၼ်းဢေႃႈ၊ဝႃႈၼင်ႇၼႆတီႈၶႃႈယဝ်ႉ၊ဝႃႈၼင်ႇၼႆဢေႃႈ။
၁၃ တႃႇဝိတ်ႉၵေႃႈတွင်းပၢၼ်ႇတီႈၼႃႇသၼ်ႇလႄႈဝႃႈ၊-ၵဝ်ၶႃႈလႆႈၽိတ်းပိူင်ႈထႃႇဝရႃႉၽြႃးယဝ်ႉ၊ဝႃႈၼင်ႇၼႆဢေႃႈ။ၼႃႇသၼ်ႇၵေႃႈလၢတ်ႈတီႈတႃႇဝိတ်ႉလႄႈဝႃႈ၊-ၼင်ႇႁိုဝ်ဢသၢၵ်ႈၸဝ်ႈႁဝ်းတၵ်းၵတ်းယဵၼ်ၶျၢမ်းသႃႇၸိုင်ထႃႇဝရႃႉၽြႃးပႄႇပႅတ်ႈဢပျႅတ်ႈၸဝ်ႈႁဝ်းယဝ်ႉလႄႈၸဝ်ႈႁဝ်းတၵ်းဢမ်ႇလႆႈတၢႆတီႈၶႃႈယဝ်ႉ။
၁၄ ၼႂ်းဝႃႈၼၼ်သေၵေႃႈၵွပ်ႈပိူဝ်ႈဢၼ်ၸဝ်ႈႁဝ်းဢဝ်တၢင်းဢၼ်ၽိတ်းပိူင်ႈၸိူဝ်ႉၼင်ႇၼၼ်လႄႈပၼ်ဢၶႂၢင်ႉတီႈရၢၼ်ႇသူထႃႇဝရႃႉၽြႃးႁႂ်ႈလႆႈသေႉသွမ်းမၼ်းၸဝ်ႈယဝ်ႉလႄႈလုၵ်ႈၸၢႆးဢၼ်ၵိူတ်ႇလဵင်ႉမႃးတီႈမႂ်းၼၼ်ႉတၵ်းလႆႈတၢႆဢမၢၼ်ႇၶၢၼ်ပဵၼ်ဢေႃႈ၊ဝႃႈၼင်ႇၼႆဢေႃႈ။
၁၅ ဝၢႆးသေၼႃႇသၼ်ႇၶိုၼ်းၵႂႃႇမိူဝ်းႁိူၼ်းယဝ်ႉၼၼ်ႉၸိုင်ထႃႇဝရႃႉၽြႃးပၼ်တၢမ်ႇတီႈလုၵ်ႈၸၢႆးတႃႇဝိတ်ႉဢၼ်မေးဢုရိယၵိူတ်ႇလဵင်ႉမႃးၼၼ်ႉဢေႃႈ။လုၵ်ႈဢွၼ်ႇၼၼ်ႉမီးတၢင်းၶႆႈတၢင်းပဵၼ်ၵိၼ်းၼႃႇလူင်လၢင်ဢေႃႈ။
၁၆ တႃႇဝိတ်ႉၵမ်တၢင်းၵိၼ်ယူႇသေယဝ်ႉၶဝ်ႈၵႃႈၼႂ်းႁိူၼ်းမၼ်းၼွၼ်းၵႃႈၼိူဝ်လိၼ်တင်းၶိုၼ်းလႄႈတွင်းပၢၼ်ႇထႃႇဝရႃႉၽြႃးပုၼ်ႈလုၵ်ႈဢွၼ်ႇမၼ်းဢေႃႈ။
၁၇ ၵူၼ်းထဝ်ႈၵူၼ်းၵေႇၵႃႈၼႂ်းၵူၼ်းႁေႃၸဝ်ႈၼၼ်ႉၵေႃႈဢွၼ်ၵၼ်လုၵ်ႉယူႇႁိမ်းမၼ်းလႄႈႁႂ်ႈလႆႈဢုမ်ႈယွင်ႊဢဝ်မၼ်းလုၵ်ႉသေၵႃႈၼိူဝ်လိၼ်သေၵေႃႈမၼ်းထဵင်ပႅတ်ႈသေယဝ်ႉယင်းဢမ်ႇၵိၼ်တၢင်းၵိၼ်တၢင်းၶူပ်းလူၺ်ႈၵၼ်တင်းၶဝ်လႄႈယူႇဢေႃႈ။
၁၈ မိူဝ်ႈဢၼ်လႆႈၸဵတ်းဝၼ််းၼၼ်ႉလုၵ်ႈဢွၼ်ႇၼၼ်ႉတၢႆဢေႃႈ။ၶႃႈတႃႇဝိတ်ႉၸိူဝ်းၼၼ်ႉၵေႃႈဢမ်ႇႁတ်းလၢတ်ႈၼႄလွင်ႈလုၵ်ႈဢွၼ်ႇတၢႆၼၼ်ႉ။လွင်ႈမၼ်းၸမ်းၶဝ်ထၢင်ႇလႄႈဝႃႈ၊-တေႃႈၵႃႈမိူဝ်ႈဢၼ်လုၵ်ႈဢွၼ်ႇယင်းတိုၵ်ႉဢသၢၵ်ႈလိပ်းယူႇၼၼ်ႉႁဝ်းလၢတ်ႈတီႈမၼ်းၵေႃႈမၼ်းယင်းဢမ်ႇႁပ်ႉဢဝ်ၵႂၢမ်းႁဝ်း။ပေႃးႁဝ်းဢဝ်လွင်ႈဢၼ်လုၵ်ႈဢွၼ်ႇတၢႆယဝ်ႉၼၼ်ႉလဝ်ႈလၢတ်ႈတီႈမၼ်းၸိုင်မၼ်းယိင်ႈၶႅၼ်းတၵ်းႁဵတ်းႁႂ်ႈတူဝ်ၸဝ်ႈၵဝ်ႇယၢပ်ႇၸႂ်ၶၢၼ်ၸႂ်ၼႃႇလူင်လၢင်ဢေႃႈ၊ဝႃႈၼင်ႇၼႆဢေႃႈ။
၁၉ ၵူၺ်းၵႃႈမိူဝ်ႈဢၼ်တႃႇဝိတ်ႉႁၼ်ၶႃႈၵူၼ်းမၼ်းၸိူဝ်းၼၼ်ႉသွပ်ႉသႅပ်ႉလၢတ်ႈၵၼ်ယူႇၼၼ်ႉၸိုင်တႃႇဝိတ်ႉႁူႉသၢႆငၢႆလွင်ႈဢၼ်လုၵ်ႈဢွၼ်ႇၼၼ်ႉတၢႆယဝ်ႉၼၼ်ႉလႄႈမၼ်းထၢမ်ႇတီႈၶႃႈၵူၼ်းမၼ်းၸိူဝ်းၼၼ်ႉလႄႈဝႃႈ၊-လုၵ်ႈဢွၼ်ႇတၢႆယဝ်ႉႁိုဝ်၊ဝႃႈၼင်ႇၼႆဢေႃႈ။ၶဝ်ၵေႃႈဢွၼ်ၵၼ်လဝ်ႈလၢတ်ႈလႄႈဝႃႈ၊-တၢႆၶႃႈယဝ်ႉ၊ဝႃႈၼင်ႇၼႆဢေႃႈ။
၂၀ မိူဝ်ႈၼၼ်ႉတႃႇဝိတ်ႉလုၵ်ႉသေၵႃႈၼိူဝ်လိၼ်လႄႈဢၢပ်ႇၼမ်ႉသေယဝ်ႉဢဝ်ၼမ်ႉမၼ်းတႃးလႄႈပုတ်ႈၶူဝ်းထႆႇၶူဝ်းမၼ်းသေယဝ်ႉၵႂႃႇၵႃႈတီႈႁိူၼ်းထႃႇဝရႃႉၽြႃးလႄႈၵူဝ်းၵႂၢႆႇဢေႃႈ။လိုၼ်းၼၼ်ႉမၼ်းၶိုၼ်းမႃးၵႃႈတီႈႁေႃၸဝ်ႈလႄႈၶဝ်ဢဝ်တၢင်းၵိၼ်တၢင်းၶူပ်းတမ်းပၼ်မၼ်းၵႃႈၼင်ႇဢၼ်မၼ်းယွၼ်းၼၼ်ႉဢေႃႈ။မၼ်းၵေႃႈၵိၼ်ဢေႃႈ။
၂၁ ၶႃႈၵူၼ်းမၼ်းၸိူဝ်းၼၼ်ႉၵေႃႈလဝ်ႈလၢတ်ႈလႄႈဝႃႈ၊-ၸဝ်ႈႁဝ်းႁဵတ်းၸိူဝ်ႉၼင်ႇႁိုဝ်တီႈၶႃႈ။တေႃႈၵႃႈမိူဝ်ႈဢၼ်လုၵ်ႈဢွၼ်ႇယင်းတိုၵ်ႉဢသၢၵ်ႈလိပ်းယူႇၼၼ်ႉၸဝ်ႈႁဝ်းဢမ်ႇၵိၼ်တၢင်းၵိၼ်တၢင်းၶူပ်းလႄႈႁႆႈႁွင်ႉပုၼ်ႈလုၵ်ႈဢွၼ်ႇယူႇၶႃႈဢေႃႈ။မိူဝ်ႈဢၼ်လုၵ်ႈဢွၼ်ႇတၢႆယဝ်ႉၼၼ်ႉၸဝ်ႈႁဝ်းသမ်ႉလုၵ်ႉလႄႈၵိၼ်တၢင်းၵိၼ်တၢင်းၶူပ်းလူင်ပေႇ၊ဝႃႈၼင်ႇၼႆသေယဝ်ႉ၊တႃႇဝိတ်ႉၵေႃႈလၢတ်ႈလႄႈဝႃႈ၊-
၂၂ ၼႂ်းမိူဝ်ႈဢၼ်လုၵ်ႈဢွၼ်ႇယင်းတိုၵ်ႉဢသၢၵ်ႈလိပ်းယူႇၼၼ်ႉၵဝ်ၵမ်တၢင်းၵိၼ်လႄႈႁႆႈႁွင်ႉယူႇၵွပ်ႈပိူဝ်ႈၵဝ်ၶႆႈၸႂ်ဝႃႈၽူႈလႂ်တၵ်းႁူႉလွင်ႈဢၼ်ၽြႃးပဵၼ်ၸဝ်ႈၸၢင်ႊၶႄးဢိတ်းလူၵဝ်လႄႈတၵ်းပၼ်ဢသၢၵ်ႈလုၵ်ႈဢွၼ်ႇၵတ်းယဵၼ်ၶျၢမ်းသႃႇႁိုဝ်၊ဢမ်ႇပၼ်ႁိုဝ်ဢၼ်ဝႃႈၼၼ်ႉဝႃႈၼင်ႇၼႆဢေႃႈ။
၂၃ မိူဝ်ႈလဵဝ်ၼႆႉလုၵ်ႈဢွၼ်ႇတၢႆယဝ်ႉ။ၵွပ်ႈပိူဝ်ႈၸိူဝ်ႉၼင်ႇႁိုဝ်တၵ်းလႆႈၵမ်တၢင်းၵိၼ်။တၵ်းၶိုၼ်းဢဝ်လုၵ်ႈဢွၼ်ႇၶိုၼ်းမႃးလႆႈႁိုဝ်။ၵဝ်တၵ်းလႆႈၵႂႃႇၵႃႈတီႈဢၼ်မၼ်းမီးၼၼ်ႉဢေႃႈ။မၼ်းဢမ်ႇၶိုၼ်းမႃးၵႃႈတီႈဢၼ်ၵဝ်မီးၼႆႉယဝ်ႉ၊ဝႃႈၼင်ႇၼႆဢေႃႈ။
၂၄ လၢႆးသမ်ႉတႃႇဝိတ်ႉႁဵတ်းႁႂ်ႈမေးမၼ်းပႃႇသသေႇၽပျေႇၸႂ်သေယဝ်ႉၶဝ်ႈၼွၼ်းၸူးၵႃႈတီႈမၼ်းဢေႃႈ။မၼ်းၵေႃႈၵိူတ်ႇလဵင်ႉလုၵ်ႈၸၢႆးမႃးလႄႈႁွင်ႉႁိၵ်ႈၸိုဝ်ႈမၼ်းဝႃႈသေႃးလမုၼ်ႇဢေႃႈ။
၂၅ ထႃႇဝရႃႉၽြႃးႁၵ်ႉလုၵ်ႈဢွၼ်ႇၼၼ်ႉလႄႈမၼ်းၸဝ်ႈပွႆႇၸႂ်ႉပရေႃးၽႅတ်ႈၼႃႇသၼ်ႇၵႂႃႇလတ်ႈထိုင်ဝႃႈႁႂ်ႈမၼ်းလႆႈၸိုဝ်ယေႇတိတိဢေႃႈ။
၂၆ ယႂႃႇၽတိုၵ်းတေႃးဝဵင်းရပ်ႉပႃႇမိူင်းဢမ်ႇမုၼ်ႇလႄႈလႆႈဝဵင်းၼၼ်ႉသေယဝ်ႉယႂႃႇၽပွႆႇၸႂ်ႉၵူၼ်းၸႂ်ႉၵူၼ်းသွႆမႃးၵႃႈတီႈတႃႇဝိတ်ႉလႄႈလဝ်ႈလၢတ်ႈလႄႈဝႃႈ၊-
၂၇ ၶႃႈၸဝ်ႈတိုၵ်းတေႃးဝဵင်းရပ်ႉပႃႇလႄႈလႆႈဝဵင်းဢၼ်မီးၼမ်ႉလိူင်ႇၼႃႇၼၼ်ႉတီႈၶႃႈယဝ်ႉ။
၂၈ မိူဝ်ႈလဵဝ်ၼႆႉႁႂ်ႈၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇယူႇၵႃႈၼႂ်းၵူၼ်းတင်းလၢႆၼၼ်ႉၸူႉၵၼ်တုမ်ၵၼ်သေယဝ်ႉၶျႃးတပ်ႉယူႇၽၢႆႇၼိုင်ႈတင်းဝဵင်းၼၼ်ႉသေလႄႈတိုၵ်းဢဝ်သေၵမ်းၶႃႈ။ပေႃးဢမ်ႇၼၼ်ၶႃႈၸဝ်ႈတၵ်းတိုၵ်းဢဝ်ဝဵင်းၼၼ်ႉလႄႈႁွင်ႉႁိၵ်ႈၸိုဝ်ဝဵင်းၼၼ်ႉၸွမ်းၸိုဝ်သဵင်ၶႃႈၸဝ်ႈတီႈၶႃႈဢေႃႈ၊ဝႃႈၼင်ႇၼႆဢေေႃႈ။
၂၉ တႃႇဝိတ်ႉၵေႃႈႁႂ်ႈၵူၼ်းတင်းသဵင်ႈတင်းလူင်ၸူႉၵၼ်တုမ်ၵၼ်သေလႄႈၶီႇသိုၵ်းၵႂႃႇၵႃႈတီႈဝဵင်းပႃႇရပ်ႉသေယဝ်ႉတိုၵ်းတေႃးလႄႈသိမ်းဢဝ်ဢေႃႈ။
၃၀ တႃႇဝိတ်ႉထွတ်ႇဢဝ်သရၽူႇၶမ်းၶုၼ်လူင်ဢၼ်တၢင်းၼၵ်းမၼ်းမီးတလၢၼ်ႇတၢၼ်ႇဢၼ်ၼိုင်ႈဢၼ်ပႃးသႅင်လီၼၼ်ႉသေယဝ်ႉဢဝ်တိုဝ်းၵႃႈၼိူဝ်ႁူဝ်မၼ်းဢေႃႈ။ၶွင်ၶူဝ်းဢၼ်ႁိမ်ႁုင်ႇဢဝ်လႆႈမႃးၵႃႈတီႈဝဵင်းၼၼ်ႉၵေႃႈမၼ်းဢဝ်ၼမ်ၼႃႇဢေႃႈ။
၃၁ ၵူၼ်းဢၼ်မီးၵႃႈၼႂ်းဝဵင်းၸိူဝ်းၼၼ်ႉၵေႃႈမၼ်းဢဝ်မႃးလႄႈႁႂ်ႈၶဝ်လႆႈဢဝ်တင်းလဵၵ်းလိူဝ်ႈလႂ်လဵၵ်းထႆလႂ်လဵၵ်းတႃႈမၢတ်ႇလႂ်သေယဝ်ႉႁဵတ်းၵၢၼ်တီႈၶဝ်ဢေႃႈ။ၸႂ်ႉၶဝ်ႁဵတ်းၵၢၼ်ၽဝ်မၢၵ်ႇဢုတ်ႈဢေႃႈ။မၼ်းႁဵတ်းၸိူဝ်ႉၼင်ႇၼၼ်ၵႃႈတီႈဝဵင်းၵူၼ်းမဵဝ်းဢမ်ႇမုၼ်ႇၸိူဝ်းၼၼ်ႉၵူႈဝဵင်းသေယဝ်ႉၶိုၼ်းမိူဝ်းၵႂႃႇၵႃႈတီႈဝဵင်းယေႇရုသလႅမ်ႇသေဢေႃႈ။