Chapter
၁၁
တႃႇဝိတ်ႉလႄႈပိတ်ႉသေႇတ
၁ မိူဝ်ႈဢၼ်ၶွပ်ႈၶူပ်ႇၶွပ်ႈပီႊလႄႈႁွတ်ႈထိုင်ၶိင်ႇဢၼ်ၶုၼ်ႁေႃၶမ်းတင်းလၢႆယၢမ်ႈတိုၵ်းသိုၵ်းၵၼ်ၼၼ်ႉၸိုင်တႃႇဝိတ်ႉပွႆႇၸႂ်ႉယႂႃႇၽဢိၵ်ႇတင်းၶႃႈၵူၼ်းမၼ်းတင်းၵူၼ်းသိုၵ်းမဵဝ်းဢိသရေႇလၶဝ်ၵႂႃႇတိုၵ်းတေႃးယႃႉပႅတ်ႈၵူၼ်းမဵဝ်းဢမ်ႇမုၼ်ႇၶဝ်လႄႈလွမ်ႉႁွပ်ႈဝဵင်းရပ်ႉပႃႇဝႆႉဢေႃႈ။တူဝ်တႃႇဝိတ်ႉၸမ်းယူႇၵႃႈတီႈဝဵင်းယေႇရုသလႅမ်ႇဝႆႉဢေႃႈ။
၂ မီးဝၼ်းၼိုင်ႈမိူဝ်ႈၶိင်ႇႁူဝ်ၶမ်ႈတႃႇဝိတ်ႉလုၵ်ႉသေၵႃႈတီႈၵူႇတီႈၼွၼ်းမၼ်းသေယဝ်ႉပႆၵႂႃႇပႆမႃးယူႇၵႃႈၼိူဝ်မုင်းႁိူၼ်းယူႇၼၼ်ႉၸိုင်မၼ်းမုင်ႈတူၺ်းလႄႈလႆႈႁၼ်မေႈယိင်းၵေႃႉၼိုင်ႈဢၢပ်ႇၼမ်ႉယူႇဢေႃႈ။မေႈယိင်းၼၼ်ႉပဵၼ်ဢၼ်ႁၢင်ႊလီၼႃႇလူင်လၢင်ဢေႃႈ။
၃ တႃႇဝိတ်ႉပွႆႇၸႂ်ႉၵူၼ်းၵေႃႉၼိုင်ႈၵႂႃႇထၢမ်လွင်ႈမေႈယိင်းၼၼ်ႉဢေႃႈ။ၵူၼ်းၵေႃႉၼၼ်ႉလၢတ်ႈလႄႈဝႃႈမေႈယိင်းၼၼ်ႉပဵၼ်ပႃႇသသေႇၽမေးဢုရိယဢၼ်ပဵၼ်ၵူၼ်းႁိတ်ႉတိ၊လုၵ်ႈယိင်းဢေႇလျၢမ်ႇၼၼ်ႉဢေႃႈ။
၄ လၢႆးသမ်ႉတႃႇဝိတ်ႉပွႆႇၸႂ်ႉၵူၼ်းၵႂႃႇႁွင်ႉဢဝ်မေႈယိင်းၼၼ်ႉမႃးတီႈမၼ်းသေယဝ်ႉၼွၼ်းၸွမ်းမၼ်းဢေႃႈ။ဝၢႆးသေၼၼ်ႉမေႈယိင်းၼၼ်ႉႁဵတ်းႁႂ်ႈဢၼ်ဝူၺ်ႇဢၼ်ႁင်ႈမၼ်းမူတ်းသႂ်ယဝ်ႉၸင်ႇၶိုၼ်းမိူဝ်းၵႂႃႇၵႃႈတီႈႁိူၼ်းမၼ်းဢေႃႈ။
၅ ဢမ်ႇႁိုင်ဢမ်ႇၼၢၼ်းမေႈယိင်းၼၼ်ႉပႃးပတိၵ်ႉသၼ်ႇထေႇလႄႈမၼ်းပွႆႇၸႂ်ႉၵူၼ်းမႃးလဝ်ႈလၢတ်ႈတီႈတႃႇဝိတ်ႉလႄႈဝႃႈ၊-
၆ ၵဝ်ၶႃႈၸပ်းပတိၵ်ႉသၼ်ႇထေႇယဝ်ႉ၊မိူဝ်ႈဢၼ်ဝႃႈၼင်ႇၼႆၸိုင်တႃႇဝိတ်ႉပွႆႇၸႂ်ႉၵူၼ်းၵႂႃႇၵႃႈတီႈယႂႃႇၽသေလႄႈသင်ႇလၢတ်ႈလႄႈဝႃႈ၊-ပွႆႇၸႂ်ႉဢုရိယၵူၼ်းႁိတ်ႉတိၼၼ်ႉမႃးတီႈၵဝ်တႃႉ၊ဝႃႈၼင်ႇၼႆလႄႈယႂႃႇၽၵေႃႈပွႆႇၸႂ်ႉဢုရိယၵႂႃႇၸူးၵႃႈတီႈတႃႇဝိတ်ႉဢေႃႈ။
၇ မိူဝ်ႈဢၼ်ဢုရိယႁွတ်ႈထိုင်မႃးၼၼ်ႉၸိုင်တႃႇဝိတ်ႉတွင်ႉထၢမ်လွင်ႈယႂႃႇၽတင်းလွင်ႈၵူၼ်းသိုၵ်းဢၼ်မီးၵႃႈတီႈပၢင်သိုၵ်းၸိူဝ်းၼၼ်ႉသေယဝ်ႉလၢတ်ႈဝႃႈ၊-
၈ ၵႂႃႇမိူဝ်းၸူးၵႃႈတီႈႁိူၼ်းမႂ်းလႄႈသုၵ်ႈတိၼ်မႂ်းတႃႉ၊ဝႃႈၼင်ႇၼႆလႄႈဢုရိယၵေႃႈဢွၵ်ႇသေၵႃႈၼႂ်းႁေႃၸဝ်ႈၵႂႃႇဢေႃႈ။ၶုၼ်ႁေႃၶမ်းသူင်ႇလၢၵ်ႈသွင်ႇၸွမ်းလင်မၼ်းၵႂႃႇဢေႃႈ။
၉ ၵူၺ်းၵႃႈၶိုၼ်းၼၼ်ႉဢုရိယယင်းဢမ်ႇၵႂႃႇၵႃႈတီႈႁိူၼ်းမၼ်းလႄႈၼွၼ်းယူႇၵႃႈတီႈႁိမ်းႁူးၽၵ်းတူႁေႃၸဝ်ႈလူၺ်ႈၵၼ်တင်းၶႃႈၵူၼ်းၸဝ်ႈၸိူဝ်းၼၼ်ႉဢေႃႈ။
၁၀ မိူဝ်ႈဢၼ်ပိူၼ်ႈလဝ်ႈလၢတ်ႈတႃႇဝိတ်ႉလွင်ႈဢၼ်ဢုရိယဢမ်ႇမိူဝ်းၸူးၵႃႈတီႈႁိူၼ်းမၼ်းၼၼ်ႉၸိုင်တႃႇဝိတ်ႉတွင်ႈထၢမ်တီႈဢုရိယလႄႈဝႃႈ၊-မႂ်းလုၵ်ႉသေၵႃႈတီႈဢၼ်ၶၢဝ်းတၢင်းၵႆၼၼ်ႉႁွတ်ႈမႃးဢမ်ႇၸႂ်ႈႁိုဝ်။
၁၁ ၵွပ်ႈပိူဝ်ႈၸိူဝ်ႉၼင်ႇႁိုဝ်မႂ်းဢမ်ႇမိူဝ်းႁိူၼ်းဝႃႈၼင်ႇၼႆၸိုင်ဢုရိယၶိုၼ်းလဝ်ႈလၢတ်ႈတီႈတႃႇဝိတ်ႉလႄႈဝႃႈ၊-မိူဝ်ႈဢၼ်တိူၵ်ႈပတိၺိၼ်ႇၸဝ်ႈဢိၵ်ႇတင်းၵူၼ်းမဵဝ်းဢိသရေႇလတင်းၵူၼ်းမဵဝ်းယုတတင်းလၢႆလႆႈယူႇၵႃႈၼႂ်းသူမ်ႉထဵင်ယူႇ၊ၸဝ်ႈယႂႃႇၽတင်းၶႃႈမၼ်းၸိူဝ်းၼၼ်ႉၵေႃႈလႆႈယူႇၵႃႈတီႈၼွၵ်ႈၵႃႈတီႈပၢင်ႇယူႇၼၼ်ႉၶႃႈၸဝ်ႈတေႁဵတ်းႁိုဝ်လႄႈမိူဝ်းၵႂႃႇၸူးၵႃႈတီႈႁိူၼ်းၶႃႈၸဝ်ႈလႄႈၵိၼ်ၶူပ်းယူႇ၊မူၼ်ႈပျေႃႇယူႇလႄႈၼွၼ်းၸွမ်းၵၼ်တင်းမေးၶႃႈၸဝ်ႈတီႈၶႃႈ။ၵႃႈၼင်ႇဢၼ်ၸဝ်ႈႁဝ်းဢသၢၵ်ႈလိပ်းယူႇၼၼ်ႉ၊ၵႃႈၼင်ႇဢၼ်ႁူဝ်ၸႂ်ၸဝ်ႈႁဝ်းဢသၢၵ်ႈလိပ်းယူႇၼၼ်ႉ၊ၶႃႈၸဝ်ႈဢမ်ႇႁဵတ်းၸိူဝ်ႉၼင်ႇၼၼ်တီႈၶႃႈ၊ဝႃႈၼင်ႇၼႆဢေႃႈ။
၁၁ တႃႇဝိတ်ႉၵေႃႈမီးဢမိင်ႉတီႈဢုရိယလႄႈဝႃႈ၊-ၶမ်ႈၼႆႉယူႇၵႃႈတီႈဝဵင်းၼႆႉလူးၵွၼ်ႇတႃႉ။ဝၼ်းမိူဝ်ႈၽုၵ်ႈၵဝ်တၵ်းႁႂ်ႈမႂ်းၶိုၼ်းမိူဝ်းဢေႃႈ၊ဝႃႈၼင်ႇၼႆလႄႈဢုရိယယူႇၵႃႈတီႈဝဵင်းယေႇရုသလႅမ်ႇၶိုၼ်းၼၼ်ႉဢေႃႈ။
၁၃ တႃႇဝိတ်ႉၵေႃႈႁွင်ႉဢဝ်မၼ်းမႃးၵိၼ်ၶူပ်းလူၺ်ႈၵၼ်တင်းမၼ်းလႄႈႁဵတ်းႁႂ်ႈမၼ်းပေႃးမဝ်းလဝ်ႈမဝ်းၵမ်ဢေႃႈ။ၵူၺ်းၵႃႈၶမ်ႈၼၼ်ႉၵေႃႈမၼ်းယင်းဢမ်ႇၶိုၼ်းၵႂႃႇၸူးၵႃႈတီႈႁိူၼ်းမၼ်းလႄႈဢွၵ်ႇၵႂႃႇၼွၼ်းၵႃႈတီႈၵူႇတီႈၼွၼ်းလူၺ်ႈၵၼ်တင်းၶႃႈၵူၼ်းၸဝ်ႈမၼ်းၸိူဝ်းၼၼ်ႉဢေႃႈ။
၁၄ ၶိင်ႇၵၢင်ၼႂ်တႃႇဝိတ်ႉတႅမ်ႈလိၵ်ႈသေလႄႈဢၢပ်ႈၵႃႈၼႂ်းမိူဝ်ႈဢုရိယပၼ်ၵႂႃႇၵႃႈတီႈယႂႃႇၽဢေႃႈ။ၵႂၢမ်းဢၼ်ပႃးၵႃႈၼႂ်းလိၵ်ႈၼၼ်ႉဝႃႈၸမ်း၊-
၁၅ ၶၢၼ်းဢုရိယဝႆႉၵႃႈၼႂ်းတပ်ႉၽၢႆႇၼႃႈဢွၼ်တၢင်းသုတ်းပူၼ်ႈၼႂ်းပၢင်သိုၵ်းဢၼ်ပဵၼ်သိုၵ်းႁႅင်းၼႃႇၼၼ်ႉတႃႉ။မိူဝ်ႈဢၼ်ပဵၼ်သိုၵ်းၼၼ်ႉသူၶိုၼ်းႁူၼ်ၶိုၼ်းလႄႈပွႆႇမၼ်းၵိုတ်းဝႆႉၽၢႆႇၼႃႈလႄႈႁႂ်ႈရၢၼ်ႇသူႇၶဝ်ဢဝ်မၼ်းတၢႆတႃႉ၊ဝႃႈၼင်ႇၼႆဢေႃႈ။
၁၆ ၼင်ႇၼၼ်လႄႈယႂႃႇၽလွမ်ႉႁွပ်ႈဝဵင်းၼၼ်ႉသေယဝ်ႉၶၢၼ်းဢုရိယဝႆႉၵႃႈတီႈဢၼ်သိုၵ်းႁႅင်းယႂ်ႇၼႃႇတၵ်းမီးၼၼ်ႉဢေႃႈ။
၁၇ မိူဝ်ႈဢၼ်ၵူၼ်းဝဵင်းၸိူဝ်းၼၼ်ႉဢွၵ်ႇမႃးၶႄႉၶဵင်ႇတိုၵ်းၵၼ်တင်းယႂႃႇၽၼၼ်ႉၸိုင်၊ၶႃႈၵူၼ်းတႃႇဝိတ်ႉၵမ်ႈၽွင်ႈတၢႆဢေႃႈ။ဢုရိယၵူၼ်းႁိတ်ႉတိၼၼ်ႉၵေႃႈတၢႆဢေႃႈ။
၁၈ လိုၼ်းၼၼ်ႉယႂႃႇၽပွႆႇၸႂ်ႉၵူၼ်းၵႂႃႇလဝ်ႈလၢတ်ႈလွင်ႈသိုၵ်းၼၼ်ႉၵႃႈတီႈတႃႇဝိတ်ႉလႄႈသင်ႇလၢတ်ႈတီႈၵူၼ်းၸႂ်ႉၵူၼ်းသွႆၼၼ်ႉလႄႈဝႃႈ၊-
၁၉ မိူဝ်ႈဢၼ်မႂ်းလဝ်ႈလၢတ်ႈလွင်ႈၼႃႈသိုၵ်းၼၼ်ႉၵႃႈတီႈၶုၼ်ႁေႃၶမ်းၸိုင်ပေႃးၶုၼ်ႁေႃၶမ်းၸႂ်မႆႈၶႆႈၸႃႉလႄႈထၢမ်ဝႃႈ၊-မိူဝ်ႈဢၼ်သူတိုၵ်းတေႃးၼၼ်ႉၵွပ်ႈသင်လႄႈသူသုတ်ႉၸပ်းသုတ်ႉၸူးၵႃႈတီႈႁိမ်းဝဵင်းၸမ်ႈၼႃႇထၢၼ်ႇၼၼ်ႉ။
၂၀ သူဢမ်ႇႁူႉလွင်ႈဢၼ်ဝႃႈၶဝ်တၵ်းဢဝ်လႅမ်ႈၵၢင်ႇယိုဝ်းဢွၵ်ႇႁူးၽႃမႃးၼၼ်ႉႁိုဝ်။ၽူႈလႂ်ဢဝ်ဢၽိမလိၵ်ႉလုၵ်ႈၸၢႆးယေႇရူပ်ႉပေႇသိတ်ႉၼၼ်ႉတၢႆ။
၂၁ မေႈယိင်းၵေႃႉၼိုင်ႈဢဝ်မၢၵ်ႇႁိၼ်လူၺ်ႈၽၢၵ်ႇၼိုင်ႈထႅမ်ႈတူၵ်းသေၵႃႈၼိူဝ်လမ်းဝဵင်းလႄႈတူၵ်းသႂ်ႇမၼ်းတၢႆၵႃႈတီႈဝဵင်းသပေိတ်ႉၼၼ်ႉဢမ်ႇၸႂ်ႈႁိုဝ်။ႁဵတ်းသင်လႄႈသူသုတ်ႉၸပ်းသုတ်ႉၸူးၵႃႈတီႈႁိမ်းလၢမ်ႇဝဵင်းၸမ်ႊထၢၼ်ႇၼၼ်ႉ၊ဝႃႈၼင်ႇၼႆၸိုင်မႂ်းတၵ်းလႆႈလဝ်ႈလၢတ်ႈလႄႈဝႃႈ၊-ၶႃႈၸဝ်ႈႁဝ်းဢုရိယၵူၼ်းႁိတ်ႉတိၼၼ်ႉၵေႃႈတၢႆၶႃႈယဝ်ႉ၊ဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။
၂၂ ၼင်ႇၼၼ်လႄႈၵူၼ်းၸႂ်ႉမၼ်းၼၼ်ႉၵေႃႈၵႂႃႇလႄႈႁွတ်ႈထိုင်သေယဝ်ႉလဝ်ႈလၢတ်ႈတီႈတႃႇဝိတ်ႉၸွမ်းၵႃႈၼင်ႇဢၼ်ယႂႃႇၽသင်ႇလၢတ်ႈဝႆႉၼၼ်ႉတင်းသဵင်ႈတင်းလူင်ဢေႃႈ။
၂၃ ၵူၼ်းၸႂ်ႉၼၼ်ႉလဝ်ႈလၢတ်ႈတီႈတႃႇဝိတ်ႉလႄႈဝႃႈ၊-ရၢၼ်ႇသူႇၸိူဝ်းၼၼ်ႉပႄႉၶႃႈၸဝ်ႈႁဝ်းၶဝ်သေလႄႈယဵပ်ႇၸွမ်းၶႃႈၸဝ်ႈႁဝ်းၶဝ်တေႃႇထိုင်ႁွတ်ႈတီႈပၢင်ႇပဵင်းၶႃႈဢေႃႈ။ၶႃႈၸဝ်ႈႁဝ်းၶဝ်သမ်ႉၶိုၼ်းတိုၵ်းတေႃးၶဝ်လႄႈယဵပ်ႇၸွမ်းၶဝ်တေႃႇထိုင်ႁွတ်ႈႁူးၽၵ်းတူဝဵင်းတီႈၶႃႈဢေႃႈ။
၂၄ ၸဝ်ႈၵၢင်ႇၸဝ်ႈၵူင်ဢၼ်ယူႇၵႃႈၼိူဝ်လမ်းဝဵင်းၸိူဝ်းၼၼ်ႉယိုဝ်းလႅမ်ႈၵၢင်ႇမႃးလႄႈၶႃႈၸဝ်ႈႁဝ်းၶဝ်ၵမ်ႈၽွင်ႈတၢႆတီႈၶႃႈဢေႃႈ။ၶႃႈၸဝ်ႈႁဝ်းဢုရိယၵူၼ်းႁိတ်ႉတိၼၼ်ႉၵေႃႈတၢႆၶႃႈယဝ်ႉ၊ဝႃႈၼင်ႇလႄႈတႃႇဝိတ်ႉၵေႃႈသင်ႇလၢတ်ႈတီႈၵူၼ်းၸႂ်ႉၼၼ်ႉလႄႈဝႃႈ၊-
၂၅ မႂ်းၵႂႃႇလၢတ်ႈတီႈယႂႃႇၽယႃႇပေႁႂ်ႈမၼ်းၸႂ်လူႉၵွပ်ႈပိူဝ်ႈလွင်ႈတၢင်းၼႆႉ။လၢပ်ႇလႅဝ်းၸၢင်ႊၵိၼ်ၸၢင်ႊၶူပ်းပဵၼ်လႄႉပဵၼ်ၵမ်းဢေႃႈ။ဢဝ်ႁႅင်းလႄႈတိုၵ်းတေႃးဝဵင်းၼၼ်ႉမႆႈမႆႈႁွၼ်ႉႁွၼ်ႉသေယဝ်ႉယႃႉပႅတ်ႈဝဵင်းၼၼ်ႉတႃႉ၊ဝႃႈၼင်ႇၼႆလႄႈပၼ်ႁႅင်းတီႈမၼ်းတႃႉ၊ဝႃႈၼင်ႇၼႆဢေႃႈ။
၂၆ မိူဝ်ႈဢၼ်မေးဢုရိယလႆႈငိၼ်းလွင်ႈဢၼ်ၽူဝ်မၼ်းဢုရိယတၢႆယဝ်ႉၼၼ်ႉၸိုင်၊မၼ်းႁႆႈႁွင်ႉပွင်ႉၶၢင်းၵွပ်ႈပိူဝ်ႈၽူဝ်မၼ်းၼၼ်ႉဢေႃႈ။
၂၇ မိူဝ်ႈဢၼ်ပူၼ်ႉသေၶိင်ႇဢၼ်ႁႆႈႁွင်ႉပွင်ႉၶၢင်းယဝ်ႉၼၼ်ႉ၊တႃႇဝိတ်ႉပွႆႇၸႂ်ႉၵူၼ်းၵႂႃႇႁွင်ႉဢဝ်မေႈယိင်းၼၼ်ႉမႃးၵႃႈတီႈႁၢင်ႈႁေႃၶမ်းလႄႈဢဝ်ႁဵတ်းမေးမၼ်းသေယဝ်ႉၵိူတ်ႇလဵင်ႉလုၵ်ႈၸၢႆးမႃးဢေႃႈ။ၵူၺ်းၵႃႈလွင်ႈတၢင်းဢၼ်တႃႇဝိတ်ႉႁဵတ်းၼၼ်ႉပဵၼ်လွင်ႈတၢင်းဢၼ်ဢမ်ႇထုၵ်ႇၸႂ်ထႃႇဝရႃႉၽြႃးဢေႃႈ။