Chapter
၁၀
တႃႇဝိတ်ႉပႄႉၼႅင်ႇၵူၼ်းဢႃႇမေႃးရိ
၁ လိုၼ်းၼၼ်ႉၶုၼ်ႁေႃၶမ်းၵူၼ်းမဵဝ်းဢႃႇမေႃးရိတၢႆလႄႈလုၵ်ႈၸၢႆးမၼ်းႁႃႇၼုၼ်ႇၼင်ႈႁၢင်ႈၼင်ႈႁေႃဢေႃႈ။
၂ တႃႇဝိတ်ႉၵေႃႈလၢတ်ႈလႄႈဝႃႈ၊-ၵဝ်တၵ်းႁဵတ်းၵျေးၸူးတီႈႁႃႇၼုၼ်ႇလုၵ်ႈၸၢႆးၼႃႇႁတ်ႉၵႃႈၼင်ႇဢၼ်ပေႃႈမၼ်းလႆႈႁဵတ်းၵျေးၸူးဝႆႉၵႃႈတီႈၵဝ်ၼၼ်ႉဢေႃႈ၊ဝႃႈၼင်ႇၼႆသေယဝ်ႉတႃႇဝိတ်ႉပွႆႇၸႂ်ႉၶႃႈမၼ်းတင်းလၢႆၵႂႃႇႁႂ်ႈလႆႈၵႂႃႇတူင်ႉတၵ်ႉလႄႈႁႂ်ႈမၼ်းလႆႈဢုၼ်ႇၸႂ်လူၺ်ႈလွင်ႈပေႃႈမၼ်းတၢႆၼၼ်ႉဢေႃႈ။မိူဝ်ႈဢၼ်ၵူၼ်းတႃႇဝိတ်ႉတင်းလၢႆႁွတ်ႈထိုင်မႃးတီႈဢမ်ႇမုၼ်ႇၼၼ်ႉၸိုင်မူးမၢတ်းၽွင်းမိူင်းၶဝ်လဝ်ႈလၢတ်ႈတီႈၸဝ်ႈၶဝ်ၶုၼ်ႁႃႇၼုၼ်ႇၼၼ်ႉလႄႈဝႃႈ၊-
၃ ၸွင်ႇၸဝ်ႈႁဝ်းၶႃႈထၢင်ႇလွင်ႈဢၼ်ဝႃႈတႃႇဝိတ်ႉပွႆႇၸႂ်ႉၵူၼ်းမၼ်းမႃးတီႈၸဝ်ႈႁဝ်းၼၼ်ႉပဵၼ်တၢင်းဢၼ်မၼ်းၼႄလွင်ႈဢၼ်ဝႃႈမၼ်းႁဵတ်းတၢင်းဢၼ်ရူဝ်ႇသေႇၵူဝ်ယမ်ပေႃႈၸဝ်ႈႁဝ်းၶႃႈၼၼ်ႉၶႃႈႁိုဝ်။တႃႇဝိတ်ႉပွႆႇၸႂ်ႉၶဝ်မႃးႁႂ်ႈၸႂ်ၸဝ်ႈႁဝ်းပျေႇၼၼ်ႉၶႃႈႁိုဝ်။တႃႇဝိတ်ႉပွႆႇၸႂ်ႉၶႃႈမၼ်းၸိူဝ်းၼၼ်ႉမႃးတီႈၸဝ်ႈႁဝ်းႁႂ်ႈလႆႈၸွပ်ႇတူၺ်းလွမ်တူၺ်းမိူင်းၸဝ်ႈႁဝ်းတႃႇတလေႆႈတိုၵ်းတေႃးယႃႉပႅတ်ႈမိူင်းၸဝ်ႈႁဝ်းၵူၺ်းဢမ်ႇၸႂ်ႈၶႃႈႁိုဝ်၊ဝႃႈၼင်ႇၼႆလႄႈႁႃႇၼုၼ်ႇၵေႃႈတီႉမတ်ႉဢဝ်ၶႃႈတႃႇဝိတ်ႉၸိူဝ်းၼၼ်ႉသေယဝ်ႉ
၄ ထႃၼူတ်ႇၵၢင်းၶဝ်ၽၢၵ်ႇၼိုင်ႈတႅပ်းၶိုင်ႈၵၢင်ၶူဝ်းၼုင်ႈၶဝ်ပႅတ်ႈထၢၼ်ႈပေႃးႁႂ်ႈထိုင်ၵုမ်ႇၵူၼ်ႈၶဝ်သေယဝ်ႉပွႆႇၶဝ်ၵႂႃႇသေဢေႃႈ။
၅ မိူဝ်ႈဢၼ်ပိူၼ်ႈလဝ်ႈလၢတ်ႈလွင်ႈတၢင်းၼၼ်ႉတီႈတႃႇဝိတ်ႉၼၼ်ႉၸိုင်ၶုၼ်ႁေႃၶမ်းပွႆႇၸႂ်ႉၵူၼ်းၵႂႃႇႁႂ်ႈလႆႈႁပ်ႉႁူဝ်တၢင်းၶဝ်ၵွပ်ႈပိူဝ်ႈဢၼ်ၶဝ်ဢူၵ်းဢၢႆၼႃႇလူင်လၢင်ၼၼ်ႉဢေႃႈ။မၼ်းသင်ႇလၢတ်ႈလႄႈဝႃႈ၊-သူဢွၼ်ၵၼ်ၵိုတ်းသဝ်းယူႇၵႃႈတီႈဝဵင်းယေႇရိၶုဝ်းတေႃႇထိုင်ႁွတ်ႈႁႂ်ႈၼူတ်ႇၵၢင်းသူထၢၼ်ႈပေႃးယၢဝ်းမႃးလူးၵွၼ်ႇတႃႉ။လိုၼ်းၼၼ်ႉၸင်ႇဢွၼ်ၵၼ်ၶိုၼ်းမႃးတႃႉ၊ဝႃႈၼင်ႇၼႆဢေႃႈ။
၆ မိူဝ်ႈဢၼ်ၵူၼ်းမဵဝ်းဢမ်ႇမုၼ်ႇၸိူဝ်းၼၼ်ႉႁူႉႁၼ်လွင်ႈဢၼ်ဝႃႈၶဝ်ပဵၼ်တီႈဢၼ်လီႁင်ႈဢဵတ်ႇသဵတ်ႇၵႃႈတီႈတႃႇဝိတ်ႉယဝ်ႉၼၼ်ႉၸိုင်၊ၵူၼ်းမဵဝ်းဢမ်ႇမုၼ်ႇၸိူဝ်းၼၼ်ႉၸၢင်ႈဢဝ်ႁူဝ်ႁၢၼ်ၵူၼ်းသိုၵ်းသုရိဢၼ်ယူႇၵႃႈတီႈဝဵင်းပိတ်ႉရႁေႃႇၽဢိၵ်ႇတင်းၵူၼ်းသုရိဢၼ်ယူႇၵႃႈတီႈဝဵင်းၸေႃႇၽၸိူဝ်းၼၼ်ႉသွင်မိုၼ်ႇဢိၵ်ႇပႃးၵူၼ်းၶုၼ်လူင်မႃႇၶႁဵင်ၼိုင်ႈၵူၼ်းဝဵင်းတေႃႇၽမိုၼ်ႇပၢႆသွင်ႁဵင်ၼၼ်ႉဢေႃႈ။
၇ မိူဝ်ႈဢၼ်တႃႇဝိတ်ႉႁူႉငိၼ်းလွင်ႈၼၼ်ႉၸိုင်မၼ်းပွႆႇၸႂ်ႉယႂႃႇၽတင်းမုၵ်ႉၸိူဝ်းႁူဝ်ႁၢၼ်ၵူၼ်းသိုၵ်းဢၼ်ႁႅင်းယႂ်ႇၵႃႈမီးၸိူဝ်းၼၼ်ႉၵႂႃႇဢေႃႈ။ၵူၼ်းမဵဝ်းဢမ်ႇမုၼ်ႇၸိူဝ်းၼၼ်ႉဢွၼ်ၵၼ်ဢွၵ်ႇလႄႈယၼ်ႇတပ်ႉၶၢင်းတပ်ႉၶဝ်ၵႃႈတီႈၽၢႆႇၼႃႈၽၵ်းတူဝဵင်းဢေႃႈ။
၈ ၵူၼ်းသုရိဢၼ်လုၵ်ႉသေၵႃႈတီႈဝဵင်းၸေႃႇၽ၊ဝဵင်:ရႁေႃႇၽ၊ဝဵင်းတေႃႇၽဢိၵ်ႇတင်းၵူၼ်းၶုၼ်လူင်မႃႇၶၸိူဝ်းၼၼ်ႉဢွၼ်ၵၼ်ယူႇၵႃႈတီႈပၢင်ႇပဵင်းႁင်းၽႂ်ႇႁင်းမၼ်းဢေႃႈ။
၉ ယႂႃႇၽႁၼ်လွင်ႈဢၼ်ၼႃႈသိုၵ်းၶဝ်မီးသွင်ၼႃႈၵႃႈတီႈၽၢႆႇၼႃႈဢိၵ်ႇတင်းၵႃႈတီႈၽၢႆႇလင်ၼၼ်ႉသေယဝ်ႉ၊လိူၵ်ႈၵဵပ်းဢဝ်ၵူၼ်းၵႃႈဢၼ်ၵႅၼ်ႇၶႅင်ၶၼ်ၽႂ်းၵႃႈၼႂ်းၵူၼ်းမဵဝ်းဢိသရေႇလတင်းလၢႆၼၼ်ႉသေလႄႈယၼ်ႇတပ်ႉၶၢင်းတပ်ႉယူႇၽၢႆႇၼိုင်ႈတင်းၵူၼ်းသုရိၸိူဝ်းၼၼ်ႉဢေႃႈ။
၁၀ မၼ်းဢဝ်ၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇၼၼ်ႉဢၢပ်ႈပၼ်ၵႃႈၼႂ်းမိုဝ်းၼွင်ႉၸၢႆးမၼ်းဢၽိသေႇၼၼ်ႉသေယဝ်ႉႁႂ်ႈၶဝ်ယၼ်ႇတပ်ႉၶၢင်းတပ်ႉၶဝ်ယူႇၽၢႆႇၼိုင်ႈတင်းၵူၼ်းမဵဝ်းဢမ်ႇမုၼ်ႇၸိူဝ်းၼၼ်ႉလႄႈလၢတ်ႈလႄႈဝႃႈ၊-ပေႃးၵူၼ်းသုရိၸိူဝ်းၼၼ်ႉပေႉၵဝ်ၸိုင်မႂ်းတၵ်းလႆႈၸွႆႈထႅမ်ၵဝ်ဢေႃႈ။
၁၁ ပေႃးၵူၼ်းမဵဝ်းဢမ်ႇမုၼ်ႇၸိူဝ်းၼၼ်ႉပေႉမႂ်းၸိုင်ၵဝ်တၵ်းမႃးလႄႈၸွႆႈထႅမ်မႂ်းဢေႃႈ။
၁၁ ဢွၼ်ၵၼ်မီးၸႂ်ဢၼ်ႁတ်းႁၢၼ်လႄႈဢဝ်ႁႅင်းဢွၵ်ႇပုၼ်ႈၵူၼ်းမဵဝ်းႁဝ်းဢိၵ်ႇတင်းပုၼ်ႈဝၢၼ်ႈဝဵင်းၽြႃးပဵၼ်ႈၸဝ်ႈႁဝ်းလႄႈတိုၵ်းတႃႉႁဝ်း။ႁႂ်ႈထႃႇဝရႃႉၽြႃးၸီႇယၢင်ႇႁဵတ်းၸွမ်းၵႃႈၼင်ႇဢၼ်လီသိုဝ်ႈၼႃႈတႂ်ႈတႃမၼ်းၸဝ်ႈၼၼ်ႉသေၵမ်းလူၺ်ႈ၊ဝႃႈၼင်ႇၼႆသေယဝ်ႉ၊
၁၃ မိူဝ်ႈဢၼ်ယႂႃႇၽဢိၵ်ႇတင်းၵူၼ်းတင်းလၢႆဢၼ်ပႃးတီႈမၼ်းၸိူဝ်းၼၼ်ႉဢွၼ်ၵၼ်သုတ်ႉၸပ်းသုတ်ႉၸူးတီႈၵူၼ်းသုရိၸိူဝ်းၼၼ်ႉႁႂ်ႈလႆႈတိုၵ်းတေႃးၼၼ်ႉၸိုင်ၵူၼ်းသုရိၸိူဝ်းၼၼ်ႉဢွၼ်ၵၼ်ဢွၵ်ႇပၢႆၵႃႈတီႈၽၢႆႇၼႃႈမၼ်းဢေႃႈ။
၁၄ မိူဝ်ႈဢၼ်ၵူၼ်းဢမ်ႇမုၼ်ႇၸိူဝ်းၼၼ်ႉႁၼ်ၵူၼ်းသုရိၸိူဝ်းၼၼ်ႉဢွၵ်ႇပၢႆၼၼ်ႉၸိုင်ၶဝ်ၵေႃႈဢွၼ်ၵၼ်ဢွၵ်ႇပၢႆၵႃႈတီႈၽၢႆႇၼႃႈဢၽိသေႇလႄႈၶဝ်ႈၵႃႈၼႂ်းဝဵင်းဢေႃႈ။ယႂႃႇၽၵေႃႈဢွၵ်ႇသေၵႃႈတီႈၵူၼ်းဢမ်ႇမုၼ်ႇၸိူဝ်းၼၼ်ႉလႄႈၶိုၼ်းမိူဝ်းၵႂႃႇၵႃႈတီႈဝဵင်းယေႇရုသလႅမ်ႇဢေႃႈ။
၁၅ ၵူၼ်းသုရိၸိူဝ်းၼၼ်ႉႁူႉႁၼ်လွင်ႈဢၼ်ၶဝ်တူၵ်းသုမ်းၵႃႈတီႈၽၢႆႇၼႃႈၵူၼ်းမဵဝ်းဢိသရေႇလၼၼ်ႉသေယဝ်ႉ၊ဢွၼ်ၵၼ်ၶိုၼ်းၸူႉၵၼ်တုမ်ၵၼ်ထႅင်ႈဢေႃႈ။
၁၆ ၶုၼ်ႁႃႇတတေႇၸႃႇၵေႃႈပွႆႇၸႂ်ႉလႄႈႁွင်ႉဢဝ်ၵူၼ်းသုရိဢၼ်ယူႇၵႃႈတီႈၽၢႆႇပုၼ်ႉၼမ်ႉႁွင်ႊၼၼ်ႉၸိူဝ်းၼၼ်ႉလႄႈၶဝ်ဢွၼ်ၵၼ်မႃးၵႃႈတီႈဝဵင်းႁေႇလမ်ႇဢေႃႈ။ၶုၼ်ပူဝ်ႇၶျုၵ်ႈသေႃႇပၵ်ႉဢၼ်ႁႃႇတတေႇၸႃႇၶၢၼ်းဝႆႉၼၼ်ႉလႆႈဢုပ်ႉၵႃႈၼိူဝ်ၶဝ်ဢေႃႈ။
၁၇ တႃႇဝိတ်ႉငိၼ်းလွင်ႈၼၼ်ႉသေယဝ်ႉႁႂ်ႈၵူၼ်းမဵဝ်းဢိသရေႇလၵႃႈမီးၸူႉၵၼ်တုမ်ၵၼ်လႄႈၶၢမ်ႈၼမ်ႉႁွင်ႊယေႃႇတၼ်ႇသေလႄႈႁွတ်ႈထိုင်ၵႃႈတီႈဝဵင်းႁေႇလမ်ႇဢေႃႈ။ၵူၼ်းသုရိၸိူဝ်းၼၼ်ႉၵေႃႈဢွၼ်ၵၼ်ယၼ်ႇတပ်ႉၶၢင်းတပ်ႉၶဝ်ယူႇၽၢႆႇၼိုင်ႈတင်းတႃႇဝိတ်ႉသေလႄႈတိုၵ်းၵၼ်တင်းမၼ်းဢေႃႈ။
၁၈ ၵူၼ်းသုရိၸိူဝ်းၼၼ်ႉဢွၼ်ၵၼ်ဢွၵ်ႇပၢႆၵႃႈတီႈၽၢႆႇၼႃႈၵူၼ်းမဵဝ်းဢိသရေႇလတင်းလၢႆဢေႃႈ။တႃႇဝိတ်ႉၵေႃႈဢဝ်ႁူဝ်ႁၢၼ်ၵူၼ်းသိုၵ်းၶီႇလေႃႉရထႃးသုရိၸဵတ်းပၢၵ်ႇဢိၵ်ႇတင်းႁူဝ်ႁၢၼ်ၵူၼ်းသိုၵ်းၶီႇမႃႉသီႇမိုၼ်ႇတၢႆလႄႈတိူဝ်ႉထုၵ်ႇသႂ်ႇၶုၼ်ပူဝ်ႇၶျုၵ်ႈသေႃႇပၵ်ႉၼၼ်ႉထၢၼ်ႈပေႃးတၢႆၵႃႈတီႈၼၼ်ႉဢေႃႈ။
၁၉ ၶုၼ်ဢၼ်ၶၢမ်ႇႁဵတ်းၶႃႈတီႈႁႃႇတတေႇၸႃႇၸိူဝ်းၼၼ်ႉႁူႉႁၼ်လွင်ႈဢၼ်ၶဝ်တူၵ်းသုမ်းၵႃႈတီႈၽၢႆႇၼႃႈမဵဝ်းဢိသရေႇလၼၼ်ႉလႄႈၶဝ်ဢွၼ်ၵၼ်ႁဵတ်းမိၵ်ႉသႁႃႇယႃႉလူၺ်ႈၵၼ်တင်းၵူၼ်းမဵဝ်းဢိသရေႇလလႄႈၶၢမ်ႇႁဵတ်းၶႃႈၶဝ်ဢေႃႈ။ၼင်ႇၼၼ်လႄႈလိုၼ်းၼၼ်ႉၵူၼ်းသုရိတင်းလၢႆယင်းဢမ်ႇႁတ်းၸွႆႈသိုၵ်းထႅမ်သိုၵ်းတီႈၵူၼ်းမဵဝ်းဢမ်ႇမုၼ်ႇၶဝ်ယဝ်ႉဢေႃႈ။