Chapter
၅
၁ မိူဝ်ႈၼၼ်ႉမဵဝ်းဢိသရေႇလတင်းသဵင်ႈတင်းလူင်ဢွၼ်ၵၼ်မႃးၸူးၵႃႈတီႈတႃႇဝိတ်ႉၵႃႈတီႈဝဵင်းႁေႇပုၼ်ႇသေလႄႈလဝ်ႈလၢတ်ႈလႄႈဝႃႈ၊-ၶႃႈၸဝ်ႈၸိူဝ်းၼႆႉပဵၼ်လုပ်ႇၸဝ်ႈႁဝ်းၼိူဝ်ႉၸဝ်ႈႁဝ်းတီႈၶႃႈဢေႃႈ။မိူဝ်ႈဢွၼ်ႈၼၼ်ႉမိူဝ်ႈဢၼ်သေႃးလုပဵၼ်ၶုၼ်ႁေႃၶမ်းၼၼ်ႉၸဝ်ႈႁဝ်းဢွၼ်ႁူဝ်မဵဝ်းဢိသရေႇလၵႃႈၼႂ်းသိုၵ်းၶႃႈဢေႃႈ။
၂ ထႃႇဝရႃႉၽြႃးၵေႃႈမီးဢမိင်ႉၸဝ်ႈတီႈၸဝ်ႈႁဝ်းလႄႈဝႃႈ၊-မႂ်းတၵ်းလႆႈႁဵတ်းလဵင်ႉႁဵတ်းလူၵူၼ်းမဵဝ်းဢိသရေႇလလႄႈပဵၼ်ငဝ်ႈပဵၼ်ႁူဝ်မဵဝ်းဢိသရေႇလဢေႃႈ၊ဝႃႈၼင်ႇၼႆတီႈၶႃႈယဝ်ႉဝႃႈၼင်ႇၼႆဢေႃႈ။
၃ ၼင်ႇဢၼ်လႄႈၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းမဵဝ်းဢိသရေႇလတင်းလၢႆဢွၼ်ၵၼ်မႃးၸူးတီႈၶုၼ်ႁေႃၶမ်းၵႃႈတီႈဝဵင်းႁေႇပုၼ်ႇၼၼ်ႉသေယဝ်ႉၶုၼ်လူင်တႃႇဝိတ်ႉႁဵတ်းမိၵ်ႈသႁႃႇယႃႉလူၺ်ႈၵၼ်တင်းၶဝ်ၵႃႈတီႈၽၢႆႇၼႃႈထႃႇဝရႃႉၽြႃးၵႃႈၼႂ်းဝဵင်းႁေႇပုၼ်ႇလႄႈၶဝ်ဢွၼ်ၵၼ်ပၼ်ၽိၵ်ႉသိၵ်ႈတီႈတႃႇဝိတ်ႉလႄႈႁႂ်ႈမၼ်းပဵၼ်ၶုၼ်ႁေႃၶမ်းဢိသရေႇလဢေႃႈ။
၄ မိူဝ်ႈဢၼ်တႃႇဝိတ်ႉၸႃႉၼင်ႈႁၢင်ႈၼင်ႈႁေႃၼၼ်ႉဢသၢၵ်ႈမၼ်းလႆႈသၢမ်သိပ်းပီႊလႄႈမၼ်းဢုပ်ႉပိူင်ႇၸၢမ်ႇၸႃးသီႇသိပ်းပီႊဢေႃႈ။မၼ်းယူႇၵႃႈတီႈဝဵင်းႁေႇပုၼ်ႇသေလႄႈဢုပ်ႉပိူင်ႇၸၢမ်ႇၸႃးမိူင်းယုတၸဵတ်းပီႊပၢႆႁူၵ်းလိူၼ်ဢေႃႈ။
၅ မၼ်းယူႇၵႃႈတီႈဝဵင်းယေႇရုသလႅမ်ႇသေလႄႈဢုပ်ႉပိူင်ႇၸၢမ်ႇၸႃးမိူင်းယုတတင်းမိူင်းဢိသရေႇလတင်းသဵင်ႈတင်းမူတ်းၼၼ်ႉသၢမ်သိပ်းပၢႆသၢမ်ပီႊဢေႃႈ။
တႃႇဝိတ်ႉပႄႉၼႅင်ႇဝဵင်းယေႇရုသလႅမ်ႇ
၆ လၢႆးသမ်ႉၶုၼ်ႁေႃၶမ်းပႃးဢဝ်ၵူၼ်းမၼ်းတင်းလၢႆသေလႄႈၶီႇသိုၵ်းၵႂႃႇၸူးၵႃႈတီႈဝဵင်းယေႇရုသလႅမ်ႇႁႂ်ႈလႆႈတိုၵ်းၵူၼ်းယေႇပုသိဢၼ်ယူႇၵႃႈတီႈၼၼ်ႉဢေႃႈ။ၵူၼ်းယေႇပုသိၸိူဝ်းၼၼ်ႉလၢတ်ႈတီႈတႃႇဝိတ်ႉလႄႈဝႃႈ၊-မႂ်းဢမ်ႇလႆႈၶဝ်ႈမႃးၵႃႈၼႂ်းၼႆႉ။ၶဝ်ၸိူဝ်းဢၼ်တႃႈမွတ်ႇဢိၵ်ႇတင်းၶဝ်ၸိူဝ်းဢၼ်တိၼ်ၵႅင်ႉၼၼ်ႉၵူၺ်းတၵ်းႁေႃႈမႂ်းဢွၵ်ႇပႅတ်ႈလႆႈယူႇဢေႃႈ၊ဝႃႈၼင်ႇၼႆဢေႃႈ။ၶဝ်ထၢင်ႇဝႃႈတႃႇဝိတ်ႉဢမ်ႇၶဝ်ႈလႆႈၵႃႈၼႂ်းဝဵင်းၼၼ်ႉ။
၇ ၼႂ်းဝႃႈၼၼ်သေၵေႃႈတႃႇဝိတ်ႉတိုၵ်းဢဝ်လမ်းမိူင်းၸိဢုၼ်ႇဢၼ်လႆႈႁွင်ႉၸိုဝ်ဝႃႈဝဵင်းတႃႇဝိတ်ႉၼၼ်ႉဢေႃႈ။
၈ တႃႇဝိတ်ႉလၢတ်ႈလႄႈဝႃႈ၊-ႁႂ်ႈၶဝ်ၸိူဝ်းဢၼ်တိုၵ်းတေႃးယႃႉပႅတ်ႈၵူၼ်းယေႇပုသိၸိူဝ်းၼၼ်ႉၵူႈၵေႃႉၵူႈၵူၼ်းဢဝ်ၶဝ်ၸိူဝ်းဢၼ်တိၼ်ၵႅင်ႉတင်းၸိူဝ်းဢၼ်တႃႇမွတ်ႇဢၼ်တႃႇဝိတ်ႉၶၢၼ်ႉႁၼ်ၸိူဝ်းၼၼ်ႉထႅမ်ႈတူၵ်းၵႃႈၼႂ်းႁွင်ႈၼႂ်းၶူးသေ၊ဝႃႈၼင်ႇၼႆဢေႃႈ။ပိူဝ်ႈၼႆလႄႈမီးၵႂၢမ်းဢႃႈပုမ်ႇဢၼ်ဝႃႈ၊-ၶဝ်ၸိူဝ်းဢၼ်တႃမွတ်ႇၶဝ်ၸိူဝ်းဢၼ်တိၼ်ၵႅင်ႉၸိူဝ်းၼၼ်ႉဢမ်ႇလႆႈၶဝ်ႈၵႃႈၼႂ်းႁိူၼ်းၼႂ်းယေး၊ဝႃႈၼင်ႇၼႆဢေႃႈ။
၉ လိုၼ်းၼၼ်ႉတႃႇဝိတ်ႉယူႇၵႃႈၼႂ်းလမ်းမိူင်းၼၼ်ႉသေယဝ်ႉႁွင်ႉႁိၵ်ႈၸိုဝ်ႈဝဵင်းၼၼ်ႉဝႃႈဝဵင်းတႃႇဝိတ်ႉဝႃႈၼႆဢေႃႈ။တႃႇဝိတ်ႉတႄႇႁဵတ်းၵုမ်းႁဵတ်းၵႃႈတီႈႁိမ်းႁွမ်းၵႃႈတီႈတၢင်းၼႂ်းဝဵင်းၸိူဝ်းၼၼ်ႉဢေႃႈ။
၁၀ ၵွပ်ႈပိူဝ်ႈၽြႃးပဵၼ်ၸဝ်ႈထႃႇဝရႃႉၽြႃးမီးယူႇလူၺ်ႈၵၼ်တင်းမၼ်းလႄႈတႃႇဝိတ်ႉယိင်ၶႅၼ်းႁႅင်းယႂ်ႇမႃးတိၵ်းတိၵ်းဢေႃႈ။
၁၁ မိူဝ်ႈၼၼ်ႉႁိရမ်ႇ၊ဢၼ်ပဵၼ်ၶုၼ်လူင်မိူင်းတုရုၼၼ်ႉပွႆႇၸႂ်ႉၽူႈတၢင်တူဝ်မၼ်းၵႂႃႇပႃးဢဝ်တင်းမႆႉဢႃႇရိတ်ႉတင်းလၢၵ်ႈသမႃး၊ၵူၼ်းမေႃတႄႇတင်ႈႁဵတ်းတိူၵ်ႈတင်းလၢႆမႃးၸူးၵႃႈတီႈတႃႇဝိတ်ႉသေလႄႈႁႂ်ႈလႆႈတႄႇႁဵတ်းႁၢင်ႈႁေႃၶမ်းပုၼ်ႈတႃႇဝိတ်ႉဢေႃႈ။
၁၁ တႃႇဝိတ်ႉႁူႉႁၼ်လွင်ႈဢၼ်ထႃႇဝရႃႉၽြႃးႁႂ်ႈမၼ်းပဵၼ်ဢၼ်မၼ်ႈၶိူင်ႇယူႇၵႃႈၼႂ်းဢရႃႇၶုၼ်ႁေႃၶမ်းဢိသရေႇလလႄႈမၼ်းၸဝ်ႈယုၵ်ႉယွင်ႈသိုင်ႇၸိုင်ႈဝၢၼ်ႈမိူင်းမၼ်းၸဝ်ႈႁႂ်ႈပဵၼ်ပုၼ်ႈၵူၼ်းမၼ်းၸဝ်ႈမဵဝ်းဢိသရေႇလၼၼ်ႉဢေႃႈ။
၁၃ တႃႇဝိတ်ႉၸမ်းဝၢႆးသမေၼ်းၶၢႆႉသေၵႃႈတီႈဝဵင်းႁေႇပုၼ်ႇၵႂႃႇယဝ်ႉၼၼ်ႉမၼ်းသမ်ႉဢဝ်မေးလူင်မေးဢွၼ်ႇၼႂ်းဝဵင်းယေႇရုသလႅမ်ႇထႅင်ႈလႄႈလႆႈလုၵ်ႈၸၢႆးလုၵ်ႈယိင်းထႅင်ႈဢေႃႈ။
၁၄ ၸိုဝ်ႈသဵင်လုၵ်ႈၸၢႆးဢၼ်တႃႇဝိတ်ႉလႆႈၵႃႈတီႈဝဵင်းယေႇရုသလႅမ်ႇၼၼ်ႉၸမ်းပဵၼ်သမႂႃႇ၊သေႃႇပပ်ႉ၊ၼႃႇသၼ်ႇ၊
၁၅ သေႃးလမုၼ်ႇ၊ဢိပႁႃႇ၊ဢေႇလိသႂႃႉ၊ၼေၽတ်ႉ၊ယႂႃႇၽျႃႇ၊
၁၆ ဢေႇလိသမႃႇ၊ဢေႇလျႃႇတ၊ဢေႇလိၽလိတ်ႉ၊ဢေႃႈ။
တႃႇဝိတ်ႉပႄႉၼႅင်ႇၵူၼ်းၽိလိတ်ႉတိ
၁၇ မိူဝ်ႈဢၼ်ၵူၼ်းၽိလိတ်ႉတိတင်းလၢႆငိၼ်းလွင်ႈဢၼ်ပၼ်ၽိၵ်ႉသိၵ်ႈတီႈတႃႇဝိတ်ႉႁႂ်ႈပဵၼ်ၶုၼ်ႁေႃၶမ်းဢိသရေႇလၼၼ်ႉၸိုင်ၵူၼ်းၽိလိတ်ႉတိတင်းသဵင်ႈတင်းလူင်ဢွၼ်ၵၼ်ၶီႇသိုၵ်းမႃးႁႂ်ႈလႆႈႁႃတႃႇဝိတ်ႉဢေႃႈ။တႃႇဝိတ်ႉငိၼ်းလွင်ႈၼၼ်ႉလႄႈလူင်းၸူးၵႃႈတီႈပၢင်ႈသိုၵ်းဢေႃႈ။
၁၈ ၵူၼ်းၽိလိတ်ႉတိၸိူဝ်းၼၼ်ႉမႃးလႄႈယူႇၸွတ်ႇတူဝ်ႈၵႃႈတီႈပၢင်ႇႁူၺ်ႈရေႇၽိမ်ႇဢေႃႈ။
၁၉ တႃႇဝိတ်ႉၵေႃႈလဝ်ႈထၢမ်တီႈထႃႇဝရႃႉၽြႃးလႄႈဝႃႈ၊-ၶႃႈၸဝ်ႈတၵ်းလႆႈၶိုၼ်ႈၸူးၵႃႈတီႈၵူၼ်းၽိလိတ်ႉတိၸိူဝ်းၼၼ်ႉၶႃႈႁိုဝ်။ၸဝ်ႈႁဝ်းတၵ်းဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းၶႃႈၸဝ်ႈတီႈၶႃႈႁိုဝ်၊ဝႃႈၼင်ႇၼႆသေယဝ်ႉထႃႇဝရႃႉၽြႃးမီးဢမိင်ႉတီႈတႃႇဝိတ်ႉလႄႈဝႃႈ၊-ၶိုၼ်ႈၸူးတႃႉ။
၂၀ ၵဝ်တၵ်းဢဝ်ၵူၼ်းၽိလိတ်ႉတိၸိူဝ်းၼၼ်ႉဢၢပ်ႈပၼ်ၵႃႈၼႂ်းမိုဝ်းမႂ်းဢမၢၼ်ႇၶၢၼ်ပဵၼ်ဢေႃႈ၊ဝႃႈၼင်ႇၼႆလႄႈ၊တႃႇဝိတ်ႉၵႂႃႇၸူးၵႃႈတီႈဝဵင်းပႃႇလပေႇရၸိမ်ႇလႄႈတိုၵ်းတေႃးယႃႉပႅတ်ႈၶဝ်ၵႃႈတီႈၼၼ်ႉသေယဝ်ႉလၢတ်ႈလႄႈဝႃႈ၊-ထႃႇဝရႃႉၽြႃးၵိူၼ်ႇယႃႉပႅတ်ႈရၢၼ်ႇသူႇၵဝ်ၵႃႈတီႈၽၢႆႇၼႃႈၵဝ်မိူၼ်ၸိူဝ်ႉၼင်ႇဢၼ်ၼမ်ႉလွင်းလႄႈၵိူၼ်ႇယႃႉပႅတ်ႈၼၼ်ႉယဝ်ႉ၊ဝႃႈၼင်ႇၼႆသေလႄႈႁွင်ႉႁိၵ်ႈၸိုဝ်တီႈၼၼ်ႉဝႃႈပႃႇလပရေၸိမ်ႇဢေႃႈ။
၂၁ ၵူၼ်းၽိလိတ်ႉတိၶဝ်ပႅတ်ႈဝႆႉရူၵ်ႉထူႉၶဝ်ႈၵႃႈတီႈၼၼ်ႉလႄႈတႃႇဝိတ်ႉဢိၵ်ႇတင်းၵူၼ်းမၼ်းၸိူဝ်းၼၼ်ႉဢွၼ်ၵၼ်ဢဝ်ၸိူဝ်းၼၼ်ႉၵႂႃႇဢေႃႈ။
၂၂ လၢႆးသမ်ႉပွၵ်ႈၼိုင်ႈၵူၼ်းၽိလိတ်ႉတိတင်းလၢႆဢွၼ်ၵၼ်မႃးထႅင်ႈလႄႈယူႇၸွတ်ႇတူဝ်ႈၵႂႃႇၵႃႈတီႈႁူၺ်ႈရေႇၽိမ်ႇဢေႃႈ။
၂၃ တႃႇဝိတ်ႉၵေႃႈလဝ်ႈထၢမ်တီႈထႃႇဝရႃႉၽြႃးသေယဝ်ႉ၊မၼ်းၸဝ်ႈမီးဢမိင်ႉလႄႈဝႃႈ၊-မႂ်းဢမ်ႇလႆႈၶိုၼ်ႈၸူး၊တၵ်းလႆႈလဵပ်ႈႁွပ်ႈၽၢႆႇလင်ၶဝ်လႄႈၶီႇသိုၵ်းၵႂႃႇၽၢႆႇၼိုင်ႈပႃႇမႆႉမွၼ်းၸူးၶဝ်ဢေႃႈ။
၂၄ မိူဝ်ႈဢၼ်မႂ်းငိၼ်းသဵင်ၶီႇသိုၵ်းၵႃႈၼိူဝ်ပၢႆမႆႉမွၼ်းၸိူဝ်းၼၼ်ႉၸိုင်မႂ်းၵႂႃႇၶၼ်ၶၼ်ၽႂ်းၽႂ်းတႃႉ။ပဵၼ်ထႃႇဝရႃႉၽြႃးဢွၼ်ႁူဝ်မႂ်းၵႂႃႇႁႂ်ႈလႆႈတိုၵ်းတေႃးယႃႉပႅတ်ႈတပ်ႉၽိလိတ်ႉတိၼၼ်ႉယဝ်ႉ၊ဝႃႈၼင်ႇၼႆလႄႈ၊
၂၅ တႃႇဝိတ်ႉႁဵတ်းၸွမ်းၵႃႈၼင်ႇဢၼ်မၼ်းၸဝ်ႈမီးဢမိင်ႉၼၼ်ႉလႄႈတိုၵ်းတေႃးယႃႉပႅတ်ႈၵူၼ်းၽိလိတ်ႉတိၸိူဝ်းၼၼ်ႉဢဝ်ၵႃႈတီႈဝဵင်းၵေႇပတေႃႇထိုင်ႁွတ်ႈဝဵင်းၵႃႇၸေႇရဢေႃႈ။