Chapter
၃
၁ မိူဝ်ႈၼၼ်ႉပဵၼ်သိုၵ်းပဵၼ်သိူဝ်ႁိုင်ၼႃႇလူင်လၢင်ၵႃႈတီႈၵႄႈဝူင်ႈၵၢင်ၸိူဝ်ႉၶိူဝ်းသေႃးလုတင်းၸိူဝ်ႉၶိူဝ်းတႃႇဝိတ်ႉၼၼ်ႉဢေႃႈ။ၸိူဝ်ႉၶိူဝ်းတႃႇဝိတ်ႉၸိုင်မီးတၢင်းဢၼ်ႁႅင်းယႂ်ႇမႃးလႄႈၸိူဝ်ႉၶိူဝ်းသေႃးလုၸမ်းမီးတၢင်းဢၼ်ႁႅင်းလဵၵ်ႉႁႅင်းၵေႇၵႂႃႇယူႇဢေႃႈ။
၂ လုၵ်ႈၸၢႆးဢၼ်တႃႇဝိတ်ႉလႆႈၵႃႈတီႈဝဵင်းႁေႇပုၼ်ႇၼၼ်ႉၸမ်း၊လုၵ်ႈၸၢႆးတူၼ်ႈမၼ်းပဵၼ်ဢႃႇမၼုၵ်ႉ၊ဢၼ်မၼ်းလႆႈၵႃႈတီႈဢၽိၼွင်ႇ၊မေႈယိင်းဝဵင်းယေႇၸရေႇလ၊
၃ လုၵ်ႈၸၢႆးၵေႃႉသွင်ပဵၼ်ၶိလတ်ႉ၊ဢၼ်မၼ်းလႆႈၵႃႈတီႈဢၽိၵေႇလ၊မေႈယိင်းဝဵင်းၵရမေႇလဢၼ်ပဵၼ်မေးၵဝ်ႇၼႃႇပလ၊လုၵ်ႈၸၢႆးၵေႃႉသၢမ်ပဵၼ်ဢပသလုမ်ႇ၊လုၵ်ႈၸၢႆးမႃႇၶႃႇ၊ဢၼ်ပဵၼ်လုၵ်ႈယိင်းတႃႇလမေႇၶုၼ်ႁေႃၶမ်းမိူင်းၵေႇသုရ၊
၄ လုၵ်ႈၸၢႆးၵေႃႉသီႇၸမ်းပဵၼ်ဢတေႃႇၼိယလုၵ်ႈၸၢႆးႁၵ်ႉၵိတ်ႉဢေႃႈ။လုၵ်ႈၸၢႆးၵေႃႉႁႃႈပဵၼ်သေႇၽတိလုၵ်ႈၸၢႆးဢႁိတလဢေႃႈ။
၅ လုၵ်ႈၸၢႆးၵေႃႉႁူၵ်းပဵၼ်ဢိသရမ်ႇ၊ဢၼ်မၼ်းလႆႈၵႃႈတီႈဢေႇၵလႃႇ၊ဢၼ်ပဵၼ်မေးတႃႇဝိတ်ႉၼၼ်ႉဢေႃႈ။ၸိူဝ်းၼႆႉၸမ်းၵိူူတ်ႇလဵင်ႉမႃးတီႈတႃႇဝိတ်ႉၵႃႈၼႂ်းဝဵင်းႁေႇပုၼ်ႇၼၼ်ႉဢေႃႈ။
ဢႃႇပၼႃႇၵႂႃႇၸူးတႃႇဝိတ်ႉ
၆ ၼႂ်းမိူဝ်ႈဢၼ်ယင်းတိုၵ်ႉပဵၼ်သိုၵ်းပဵၼ်သိူဝ်ၵႃႈတီႈၵႄႈဝူင်ႈၵၢင်ၸိူဝ်ႉၶိူဝ်းသေႃးလုတင်းၸိူဝ်ႉၶိူဝ်းတႃႇဝိတ်ႉယူႇၼၼ်ႉၸိုင်ဢႃႇပၼႃႇၼၼ်ႉၶတ်းၸႂ်ဢဝ်ႁႅင်းယူႇၽၢႆႇၸိူဝ်ႉၶိူဝ်းသေႃးလုဢေႃႈ။
၇ သေႃးလုၼၼ်ႉမီးမေးၼွႆႉၵေႃႉၼိုင်ႈဢၼ်လႆႈၸိုဝ်ႈဝႃႈရိၸပ၊ဢၼ်ပဵၼ်လုၵ်ႈယိင်းဢေႇဢႃႇ၊ၼၼ်ႉဢေႃႈ။ဢိသပေႃႇသိတ်ႉထၢမ်တီႈဢႃႇပၼႃႇလႄႈဝႃႈ၊-ၵွပ်ႈပိူဝ်ႈၸိူဝ်ႉၼင်ႇႁိုဝ်ႇလႄႈမႂ်းၶဝ်ႈၸူးၵႃႈတီႈမေးၼွႆႉၸဝ်ႈပေႃႈၵဝ်၊ဝႃႈၼင်ႇၼႆလႄႈ
၈ ဢႃႇပၼႃႇၼၼ်ႉၸႂ်မႆႈၶႆႈၸႃႉၼႃႇလူင်လၢင်ၵွပ်ႈပိူဝ်ႈၵႂၢမ်းဢိသပေႃႇသိတ်ႉၼၼ်ႉလႄႈဝႃႈ၊-ၵဝ်ၼႆႉပဵၼ်ၵွၵ်းႁူဝ်မႃႇဢၼ်ၸၢပ်ႈသႅင်ႇၵၼ်တင်းမဵဝ်းယုတၼၼ်ႉႁိုဝ်။တေႃႇႁွတ်ႈဝၼ်းမိူဝ်ႈၼႆႉၵဝ်လႆႈႁဵတ်းၵျေးၸူးတီႈပေႃႈမႂ်းသေႃးလုဢိၵ်ႇတင်းပီႈၼွင်ႉမၼ်းတင်းၵေႃႉသေႈမၼ်းၸိူဝ်းၼၼ်ႉယူႇဢေႃႈ။ၵဝ်ယင်းဢမ်ႇဢဝ်သူဢၢပ်ႈပၼ်ၵႃႈၼႂ်းမိုဝ်းတႃႇဝိတ်ႉ။ယၢမ်းၼႆႉသမ်ႉတၢင်ႇဢပျႅတ်ႈတီႈၵဝ်ၵွပ်ႈပိူဝ်ႈမေႈယိင်းၼၼ်ႉလူင်ပေႇ။
၉ ပေႃးၵဝ်ယင်းဢမ်ႇႁဵတ်းပုၼ်ႈတႃႇဝိတ်ႉၸွမ်းၵႃႈၼင်ႇဢၼ်ထႃႇဝရႃႉၽြႃးဝႃႈဝႆႉတီႈမၼ်းဝႃႈတၵ်းၼုၵ်ႉဢဝ်သိုင်ႇၸိုင်ႈဝၢၼ်ႈမိူင်းသေၵႃႈတီႈၸိူဝ်ႉၶိူဝ်းသေႃးလုသေလႄႈႁႂ်ႈရႃႇၸႃႉပလၢင်ႇတႃႇဝိတ်ႉတႄႇယူႇၵႃႈတီႈမိူင်းဢိသရေႇလ၊
၁၀ မိူင်းယုတ၊ဢဝ်ၵႃႈတီႈၸႃႉၸဵမ်ဝဵင်းတၼ်ႇတေႃႇထိုင်ႁွတ်ႈဝဵင်းပေႇရသေႇၽၼၼ်ႉၸိုင်၊ႁႂ်ႈထႃႇဝရႃႉၽြႃးႁဵတ်းတေႃႇဢႃႇပၼႃႇၼၵ်းၼၵ်းၼႃၼႃသေၵမ်းလူၺ်ႈ၊ဝႃႈၼင်ႇၼႆဢေႃႈ။
၁၁ ဢိသပေႃႇသိတ်ႉၼၼ်ႉၵူဝ်ႁႄဢႃႇပၼႃႇလႄႈမၼ်းဢမ်ႇႁတ်းၶိုၼ်းလၢတ်ႈၵႂၢမ်းသေၶေႃႈသေၵမ်း။
၁၁ လိုၼ်းၼၼ်ႉဢႃႇပၼႃႇပွႆႇၸႂ်ႉၽူႈတၢင်တူဝ်ၵႂႃႇၸူးၵႃႈတီႈတႃႇဝိတ်ႉလႄႈလဝ်ႈလၢတ်ႈလႄႈဝႃႈ၊-လႅၼ်လိၼ်မိူင်းၼႆႉပဵၼ်လႅၼ်လိၼ်မိူင်းၽူႈလႂ်။ၶႅၼ်းတေႃႈႁဵတ်းသႅတ်ႈၸႃႇလူၺ်ႈၵၼ်တင်းၶႃႈၸဝ်ႈသေၵမ်းၶႃႈ။ၶႃႈၸဝ်ႈတၵ်းၸွႆႈထႅမ်လႄႈဢဝ်ၵူၼ်းမဵဝ်းဢိသရေႇလတင်းသဵင်ႈတင်းလူင်ၶၢႆႉပုတ်ႈမႃးၽၢႆႇၸဝ်ႈႁဝ်းတီႈၶႃႈဢေႃႈ၊ဝႃႈၼင်ႇၼႆဢေႃႈ။
၁၃ တႃႇဝိတ်ႉၵေႃႈၶိုၼ်းလၢတ်ႈလႄႈဝႃႈ၊-လီယဝ်ႉ။ၵဝ်တၵ်းႁဵတ်းသႅတ်ႈၸႃႇလူၺ်ႈၵၼ်တင်းမႂ်းယူႇဢေႃႈ။ၼႂ်းဝႃႈၼၼ်သေၵေႃႈၵဝ်မီးတီႈဢၼ်တၵ်းလႆႈယွၼ်းဢဝ်တီႈမႂ်းမဵဝ်းၼိုင်ႈလူးၵွၼ်ႇဢေႃႈ။ဝၢႆးလိုၼ်းမိူဝ်ႈဢၼ်မႂ်းမႃးႁႂ်ႈလႆႈႁၼ်ၼႃႈၵဝ်ၼၼ်ႉပေႃးမႂ်းဢမ်ႇဢဝ်မိၶႃႇလ၊လုၵ်ႈယိင်းသေႃးလု၊မႃးၸိုင်မႂ်းတၵ်းဢမ်ႇလႆႈႁၼ်ၼႃႈၵဝ်ၵူၺ်း၊ဝႃႈၼင်ႇၼႆဢေႃႈ။
၁၄ တႃႇဝိတ်ႉၶိုၼ်းပွႆႇၸႂ်ႉၽူႈတၢင်တူဝ်ၼၼ်ႉၵႂႃႇၵႃႈတီႈဢိသပေႃႇသိတ်ႉလုၵ်ႈၸၢႆးသေႃးလု၊ၼၼ်ႉလႄႈဝႃႈ၊-ဢဝ်မိၶႃႇလ၊ဢၼ်ၵဝ်ဢဝ်ပၢႆၼင်ၵူၼ်းၽိလိတ်ႉတိပၢၵ်ႇၼိုင်ႈၼၼ်ႉသေလႄႈဢဝ်လႆႈမႃးၼၼ်ႉၶိုၼ်းဢၢပ်ႈပၼ်မႃးသေၵမ်း၊ဝႃႈၼင်ႇၼႆဢေႃႈ။
၁၅ ဢိသပေႃႇၵေႃႈပၼ်ဢမိင်ႉႁွႈဢဝ်မေႈယိင်းၼၼ်ႉသေၵႃႈၼႂ်းမိုဝ်းၽူဝ်မၼ်းၽႃႇလတိ၊ဢၼ်ပဵၼ်လုၵ်ႈၸၢႆးလေႇသ၊ၼၼ်ႉဢေႃႈ။
၁၆ ၽူဝ်မၼ်းၼၼ်ႉၵေႃႈၵႂႃႇၸွမ်းၵၼ်တင်းမေးမၼ်းလႄႈႁႆႈႁွင်ႉယူႇတေႃႇထိုင်ႁွတ်ႈဝဵင်းပႃႇႁုရိမ်ႇဢေႃႈ။မိူဝ်ႈၼၼ်ႉဢႃႇပၼႃႇလၢတ်ႈတီႈမၼ်းလႄႈဝႃႈ၊-ၶိုၼ်းမိူဝ်းၵႂႃႇသတေႃႉ၊ဝႃႈၼင်ႇၼႆလႄႈမၼ်းၵေႃႈၶိုၼ်းမိူဝ်းၵႂႃႇသေဢေႃႈ။
၁၇ ဢႃႇပၼႃႇၵေႃႈတိူင်ႇပၢင်ႇလၢတ်ႈၸႃၵၼ်တင်းၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းမဵဝ်းဢိသရေႇလၸိူဝ်းၼၼ်ႉလႄႈဝႃႈ၊-မိူဝ်ႈဢွၼ်တၢင်းၼၼ်ႉသူမီးၸႂ်ဢၼ်ၶႂ်ႈယုၵ်ႉယွင်ႈတႃႇဝတ်ႉၵႃႈၼႂ်းဢရႃႇၶုၼ်ႁေႃၶမ်းဢေႃႈ။
၁၈ ပိူဝ်ႈၼႆလႄႈမိူဝ်ႈလဵဝ်ၼႆႉၸိုင်ယုၵ်ႉယွင်ႈတႃႉ။ထႃႇဝရႃႉၽြႃးဢဝ်လွင်ႈတႃႇဝိတ်ႉမီးဢမိင်ႉဝႆႉလႄႈဝႃႈ၊-ၵဝ်တၵ်းဢဝ်တင်းၶႃႈၵဝ်တႃႇဝိတ်ႉသေလႄႈၵႄႇသႄႇၼုၵ်ႈဢဝ်ၵူၼ်းမဵဝ်းဢိသရေႇလလွတ်ႈဢွၵ်ႇသေၵႃႈၼႂ်းမိုဝ်းၵူၼ်းၽိလိတ်ႉတိဢိၵ်ႇတင်းၵႃႈၼႂ်းမိုဝ်းရၢၼ်ႇသူႇၶဝ်တင်းသဵင်ႈတင်းလူင်ၼၼ်ႉဢေႃႈ၊ဝႃႈၼင်ႇၼႆယဝ်ႉ၊ဝႃႈၼင်ႇၼႆဢေႃႈ။
၁၉ ဢႃႇပၼႃႇၵေႃႈၵႂႃႇလၢတ်ႈထိုင်ၵူၼ်းမဵဝ်းပိၼ်ႇယႃႇမိၼ်ႇတင်းလၢႆဢေႃႈ။လိုၼ်းၼၼ်ႉဢႃႇပၼႃႇဢဝ်လွင်ႈတၢင်းၵႃႈဢၼ်ၵူၼ်းမဵဝ်းဢိသရေႇလတင်းၵူၼ်းမဵဝ်းပိၼ်ႇယႃႇမိၼ်ႇၶဝ်လၢတ်ႈၼၼ်ႉၵႂႃႇလဝ်ႈလၢတ်ႈထိုင်တႃႇဝိတ်ႉၵႃႈတီႈဝဵင်းႁေႇပုၼ်ႇဢေႃႈ။
၂၀ ၼင်ႇၼၼ်လႄႈဢႃႇပၼႃႇပႃးဢဝ်ၵူၼ်းသၢဝ်းၼိုင်ႈသေလႄႈႁွတ်ႈထိုင်တီႈတႃႇဝိတ်ႉၵႃႈတီႈဝဵင်းႁေႇပုၼ်ႇၼၼ်ႉသေယဝ်ႉတႃႇဝိတ်ႉႁဵတ်းပွႆးလႄႈလဵင်ႉလူဢႃႇပၼႃႇဢိၵ်ႇတင်းၵူၼ်းမၼ်းၸိူဝ်းၼၼ်ႉဢေႃႈ။
၂၁ ဢႃႇပၼႃႇၵေႃႈလဝ်ႈလၢတ်ႈတီႈတႃႇဝိတ်ႉလႄႈဝႃႈ၊-ႁႂ်ႈၶႃႈၸဝ်ႈၵႂႃႇလႄႈၸူႉတုမ်ၵူၼ်းမဵဝ်းဢိသရေႇလတင်းသဵင်ႈတင်းလူင်ၵႃႈတီႈၸဝ်ႈၶုၼ်ႁေႃၶမ်းႁႂ်ႈလႆႈႁူႉၸၵ်းၸဝ်ႈႁဝ်းလႄႈၶၢမ်ႇဢဝ်တၢင်းဢၼ်ၸဝ်ႈႁဝ်းဢုပ်ႉပိူင်ႇၸၢမ်ႇၸႃးၵႃႈဢၼ်ၸဝ်ႈႁဝ်းမီးဢလူဝ်ႇၼၼ်ႉသေၵမ်းတီႈၶႃႈ၊ဝႃႈၼင်ႇၼႆလႄႈတႃႇဝိတ်ႉၵေႃႈပွႆႇၸႂ်ႉမၼ်းလႄႈမၼ်းၵႂႃႇၼိမ်ၼိမ်လီလီဢေႃႈ။
ယႂႃႇၽဢဝ်ဢႃႇပၼႃႇတၢႆ
၂၂ မိူဝ်ႈၼၼ်ႉယႂႃႇၽတင်းၶႃႈၵူၼ်းတႃႇဝိတ်ႉတင်းလၢႆလုၵ်ႉသေၵႃႈတီႈဢၼ်လိုပ်ႈၸွမ်းလမ်းၸွမ်းမုၵ်ႉၸိူဝ်းရၢၼ်ႇသူႇၼၼ်ႉသေယဝ်ႉၶိုၼ်းမႃးလႄႈပႃးဢဝ်ၶူဝ်းလဵင်းဢၼ်ႁိမ်လႆႈမႃးၼမ်ၼႃႇမႃးဢေႃႈ။ဢႃႇပၼႃႇၼၼ်ႉဢမ်ႇမီးယူႇလူၺ်ႈၵၼ်တင်းတႃႇဝိတ်ႉၵႃႈတီႈဝဵင်းႁေႇပုၼ်ႇၼၼ်ႉယဝ်ႉ။လွင်ႈမၼ်းၸမ်း၊တႃႇဝိတ်ႉယင်းပေႃးပွႆႇမၼ်းၵႂႃႇၼိမ်ၼိမ်လီလီယဝ်ႉ။
၂၃ မိူဝ်ႈဢၼ်ယႂႃႇၽဢိၵ်ႇတင်းႁူဝ်ႁၢၼ်ၵူၼ်းသိုၵ်းမၼ်းၸိူဝ်းၼၼ်ႉၶိုၼ်းႁွတ်ႈထိုင်မႃးၼၼ်ႉၸိုင်ပိူၼ်ႈမွၵ်ႇလၢတ်ႈတီႈယႂႃႇၽလွင်ႈဢႃႇပၼႃႇလုၵ်ႈၸၢႆးၼေႇရမႃးၵႃႈတီႈၶုၼ်ႁေႃၶမ်းယဝ်ႉလႄႈတႃႇဝိတ်ႉၵေႃႈပွႆႇမၼ်းၶိုၼ်းၵႂႃႇၼိမ်ၼိမ်လီလီယဝ်ႉၼၼ်ႉၸိုင်ယႂႃႇၽၶဝ်ႈၸူးၵႃႈတီႈၶုၼ်ႁေႃၶမ်းလႄႈဝႃႈ၊-ၸဝ်ႈႁဝ်းႁဵတ်းၸိူဝ်ႉၼင်ႇႁိုဝ်တီႈၶႃႈ။တူၺ်းတီႈၶႃႈလူး။
၂၄ ဢႃႇပၼႃႇၼၼ်ႉမႃးၸူးၵႃႈတီႈၸဝ်ႈႁဝ်းယဝ်ႉ။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းပွႆႇႁႂ်ႈမၼ်းလႆႈလွတ်ႈဢွၵ်ႇၵႂႃႇၶႃႈ။
၂၅ ၸဝ်ႈႁဝ်းႁူႉလွင်ႈဢၼ်ဢႃႇပၼႃႇ၊လုၵ်ႈၸၢႆးၼေႇရ၊ၼၼ်ႉမႃးႁႂ်ႈလႆႈပႅတ်ႉလႅၼ်ၸဝ်ႈႁဝ်းလႄႈႁႂ်ႈလႆႈႁူႉႁၼ်တၢင်းဢၼ်ၸဝ်ႈႁဝ်းၶဝ်ႈဢွၵ်ႇ၊တၢင်းဢၼ်ၸဝ်ႈႁဝ်းၸီႇယၢင်ႇႁဵတ်းၵူႈၸိူဝ်ႉၵူႈပိူင်ၼၼ်ႉၵူၺ်းၶႃႈဢေႃႈ၊ဝႃႈၼင်ႇၼႆသေယဝ်ႉ၊
၂၆ ယႂႃႇၽဢွၵ်ႇသေၵႃႈတီႈတႃႇဝိတ်ႉၵႂႃႇလႄႈပွႆႇၵူၼ်းၸႂ်ႉၵႂႃႇၸွမ်းလင်ဢႃႇပၼႃႇသေယဝ်ႉႁွင်ႉဢဝ်မၼ်းလူင်းၵႃႈတီႈၼမ်ႉမေႃႇသိရဢေႃႈ။
၂၇ တႃႇဝိတ်ႉဢမ်ႇႁူႉလွင်ႈတၢင်းၼၼ်ႉ။မိူဝ်ႈဢၼ်ဢႃႇပၼႃႇၶိုၼ်းႁွတ်ႈထိုင်မႃးၵႃႈတီႈဝဵင်းႁေႇပုၼ်ႇၼၼ်ႉၸိုင်ယႂႃႇၽႁွင်ႉဢဝ်မၼ်းမႃးၵႃႈတီႈၽၵ်းတူဝဵင်းမိူၼ်ၼင်ႇႁၢင်ႊႁႂ်ႈလႆႈလၢတ်ႈတေႃႇမၼ်းသိတ်ႉသိတ်ႉယဵၼ်ယဵၼ်ၼၼ်ႉသေယဝ်ႉ၊ယႂႃႇၽဢၼ်မိတ်ႉတႅင်းသႂ်ႇပုမ်မၼ်းလႄႈဢဝ်မၼ်းတၢႆႁႂ်ႈလႆႈတွပ်ႇသူၺ်ႈပုၼ်ႈၼွင်ႉၸၢႆးမၼ်းဢႃႇသႁေႇလၼၼ်ႉဢေႃႈ။
၂၈ လိုၼ်းၼၼ်ႉမိူဝ်ႈဢၼ်တႃႇဝိတ်ႉငိၼ်းလွင်ႈတၢင်းၼၼ်ႉၸိုင်မၼ်းဢွၵ်ႇသူပ်းဝႃႈ၊-ႁႂ်ႈၵဝ်ဢိၵ်ႇတင်းသိုင်ႇၸိုင်ႈဝၢၼ်ႈမိူင်းၵဝ်တင်းသဵင်ႈၵၢင်းလွတ်ႈတင်းလိူတ်ႈဢႃႇပၼႃႇ၊လုၵ်ႈၸၢႆးၼေႇရ၊ၼၼ်ႉၵႃႈတီႈၽၢႆႇၼႃႈထႃႇဝရႃႉၽြႃးသေၵမ်းလူၺ်ႈ။
၂၉ ႁႂ်ႈႁွတ်ႈထိုင်ၵႃႈၼိူဝ်ႁူဝ်ယႂႃႇၽဢိၵ်ႇတင်းၵႃႈၼိူဝ်ႁူဝ်ပီႈၼွင်ႉၸိူဝ်ႉၶိူဝ်းပေႃႈမၼ်းတင်းသဵင်ႈတင်းလူင်ၼၼ်ႉသေၵမ်းလူၺ်ႈ။ၵႃႈတီႈပီႈၼွင်ႉၸိူဝ်ႉၶိူဝ်းယႂႃႇၽၼၼ်ႉယႃႇပေႁႂ်ႈမီးၵေႃႉဢၼ်လွတ်ႈသေၵေႃႉဢၼ်ႁူဝ်ႈၸိုမ်းဢွၵ်ႇ၊ၵေႃႉဢၼ်ပဵၼ်တုတ်ႈ၊ၵေႃႉဢၼ်ဢိင်ၶွၼ်ႉတဝ်ႉ၊ၵေႃႉဢၼ်တၢႆလူၺ်ႈလၢပ်ႇလူၺ်ႈလႅဝ်း၊ၵေႃႉဢၼ်ဢိုပ်းဢၼ်ယၢၵ်ႈ၊ၼၼ်ႉသေၵမ်းလူၺ်ႈ၊ဝႃႈၼင်ႇၼႆဢေႃႈ။
၃၀ ၵွပ်ႈပိူဝ်ႈဢႃႇပၼႃႇဢဝ်ၼွင်ႉၸၢႆးၶဝ်ဢႃႇသႁေႇလတၢႆၼႂ်းပၢင်သိုၵ်းၵိပွင်ႇၼၼ်ႉလႄႈယႂႃႇၽတင်းၼွင်ႉၸၢႆးမၼ်းဢၽိသေႇၸင်ႇဢဝ်ဢႃႇပၼႃႇတၢႆဢေႃႈ။
၃၁ တႃႇဝိတ်ႉၵေႃႈမီးဢမိင်ႉတီႈယႂႃႇၽဢိၵ်ႇတင်းၵူၼ်းၵႃႈဢၼ်မီးတီႈမၼ်းၸိူဝ်းၼၼ်ႉလႄႈဝႃႈ၊-ဢွၼ်ၵၼ်သိၵ်ႇၶူဝ်းၼုင်ႈသူလႄႈၼုင်ႈၶူဝ်းၼုင်ႈၼင်ပေႃယူႇသေလႄႈႁဵတ်းတၢင်းဢၼ်ႁႆႈဢၼ်ႁွင်ပွင်ႉၶၢင်းၵႂႃႇၽၢႆႇၼႃႈဢႃႇပၼႃႇတႃႉ၊ဝႃႈၼင်ႇၼႆလႄႈတူဝ်တႃႇဝိတ်ႉၵေႃႈၸွမ်းၽၢႆႇၼင်ၵွမ်ႇမၼ်းၸုမ်ႇမၼ်းဢေႃႈ။ၶဝ်ဢွၼ်ၵၼ်ဢဝ်ဢႃႇပၼႃႇသၢင်းၵျူဝ်ႇၵႃႈတီႈဝဵင်းႁေႇပုၼ်ႇဢေႃႈ။ၶုၼ်ႁေႃၶမ်းၵိဝ်သဵင်လႄႈႁႆႈႁွင်ႉၵႃႈတီႈသၢင်းၶျႅင်းဢႃႇပၼႃႇၼၼ်ႉဢေႃႈ။ၵူၼ်းတင်းသဵင်ႈတင်းလူင်ၵေႃႈဢွၼ်ၵၼ်ႁႆႈႁွင်ႉဢေႃႈ။
၃၂ ၶုၼ်ႁေႃၶမ်းၶၢင်းၶီၶၢင်းၽၢၼ်ၵွပ်ႈပိူဝ်ႈဢႃႇပၼႃႇၼၼ်ႉလႄႈဝႃႈ၊-ဢႃႇပၼႃႇၼႆႉလႆႈတၢႆၵႂႃႇမိူၼ်ၸိူဝ်ႉၼင်ႇၵူၼ်းမိူၵ်ႈၵူၼ်းယုတ်ႈၼၼ်ႉယဝ်ႉလူင်ပေႇ။
၃၃ မိုဝ်းမႂ်းယင်းဢမ်ႇလႆႈၶၢမ်ႇတၢင်းဢၼ်မတ်ႉဢၼ်ၽုၵ်ႇ၊တိၼ်မႂ်းယင်းဢမ်ႇလႆႈၶၢမ်ႇတၢင်းဢၼ်သႂ်ႇဝႅၼ်လဵၵ်းဝႅၼ်တွင်းလႄႈမႂ်းလႆႈတၢႆၵႂႃႇမိူၼ်ၸိူဝ်ႉၼင်ႇဢၼ်လႆႈတၢႆၼႂ်းမိူဝ်ႈၵူၼ်းႁၢႆႉၵူၼ်းမိူၵ်ႈၼၼ်ႉယဝ်ႉလူင်ပေႇ၊ဝႃႈၼင်ႇၼႆဢေႃႈ။
၃၄ လၢႆးသမ်ႉၵူၼ်းတင်းသဵင်ႈတင်းလူင်ဢွၼ်ၵၼ်ႁႆႈႁွင်ႉၵွပ်ႈပိူဝ်ႈမၼ်းထႅင်ႈဢေႃႈ။
၃၅ ပိၵ်ႉသမ်ႉၵူၼ်းတင်းသဵင်ႈတင်းလူင်သုတ်ႉၸပ်းသုတ်းၸူးတီႈတႃႇဝိတ်ႉလႄႈတိုၵ်းယူင်းႁႂ်ႈမၼ်းၵိၼ်တၢင်းၵိၼ်တၢင်းၶူပ်းၸူဝ်ႈဢၼ်ဝၼ်းဢမ်ႇပႆႇတူၵ်းၼၼ်ႉသေၵေႃႈတႃႇဝိတ်ႉၵိၼ်ႇဝႃႈလႄႈဝႃႈ၊-ပေႃးၵဝ်ၸိမ်းတူၺ်းၸႃႉၸဵမ်ၶဝ်ႈမုၼ်းလႄႈတၢင်းၵိၼ်တၢင်းၶူပ်းသေၸိူဝ်ႉသေပိူင်ၸူဝ်ႈဢၼ်ဝၼ်းဢမ်ႇပႆႇတူၵ်းၼၼ်ႉၸိုင်ႁႂ်ႈၽြႃးပဵၼ်ၸဝ်ႈႁဵတ်းလိူဝ်တွၼ်းၼႃႇသေၼၼ်ႉတီႈၵဝ်သေၵမ်းလူၺ်ႈ၊ဝႃႈၼင်ႇၼႆဢေႃႈ။
၃၆ ၵူၼ်းတင်းသဵင်ႈတင်းလူင်ႁၼ်လွင်ႈတၢင်းၼၼ်ႉလႄႈပဵၼ်ဢၼ်ထုၵ်ႇၸႂ်ၵျိူၵ်ႈၸႂ်ၶဝ်ၼႃႇဢေႃႈ။ၸိူဝ်ႉၼင်ႇၵႃႈဢၼ်ၶုၼ်ႁေႃၶမ်းႁဵတ်းၼၼ်ႉထုၵ်ႇၸႂ်ၵျိူၵ်ႈၸႂ်ၵူၼ်းတင်းသဵင်ႈတင်းလူင်ဢေႃႈ။
၃၇ ၼင်ႇၼၼ်လႄႈၵူၼ်းတင်းလၢႆဢိၵ်ႇတင်းၵူၼ်းမဵဝ်းဢိသရေႇလတင်းသဵင်ႈတင်းလူင်ဢွၼ်ၵၼ်ႁူႉၸႅင်ႈလွင်ႈဢၼ်ဝႃႈၶုၼ်ႁေႃၶမ်းဢမ်ႇမီးဢလူဝ်ႇၶႂ်ႈဢဝ်ဢႃႇပၼႃႇ၊လုၵ်ႈၸၢႆးၼေႇရ၊ၼၼ်ႉတၢႆ၊ဢၼ်ဝႃႈၼၼ်ႉဢေႃႈ။
၃၈ ၶုၼ်ႁေႃၶမ်းၵေႃႈမီးဢမိင်ႉတီႈၶႃႈမၼ်းၵူၼ်းမၼ်းတင်းလၢႆလႄႈဝႃႈ၊-ၸွင်ႇသူဢမ်ႇႁူႉလွင်ႈဢၼ်ဝႃႈၵေႃႉဢၼ်ပဵၼ်ၶုၼ်ၵေႃႉဢၼ်ယႂ်ႇမျၢတ်ႈၼၼ်ႉၵေႃႉၼိုင်ႈလႆႈသုမ်းၵႂႃႇၵႃႈၼႂ်းမဵဝ်းဢိသရေႇလၼႂ်းဝၼ်းမိူဝ်ႈၼႆႉယဝ်ႉၼၼ်ႉႁိုဝ်။
၃၉ ပိၵ်ႉသမ်ႉၵဝ်လႆႈၶၢမ်ႇၽိၵ်ႈသိၵ်ႈလႄႈပဵၼ်ၶုၼ်ႁေႃၶမ်းသေၵေႃႈဝၼ်းမိူဝ်ႈၼႆႉပဵၼ်ဢၼ်ႁႅင်းလဵၵ်ႉႁႅင်းဢူၼ်ႈဢေႃႈ။ၶဝ်ၸိူဝ်းဢၼ်ပဵၼ်လုၵ်ႈၸၢႆးၸေႇရုယႃႇၸိူဝ်းၼၼ်ႉယိင်ႈၶႅၼ်းႁႅင်းယႂ်ႇၼႃႇသေၵဝ်ဢေႃႈ။ႁႂ်ႈထႃႇဝရႃႉၽြႃးတွပ်ႇတႅၼ်းပၼ်တီႈၵေႃႉဢၼ်ႁဵတ်းဢၼ်ဢမ်ႇတြႃးၼၼ်ႉၸွမ်းၼင်ႇဢၼ်ဢပျႅတ်ႈမၼ်းမီးၼၼ်ႉသေၵမ်းလူၺ်ႈ၊ဝႃႈၼင်ႇၼႆဢေႃႈ။