Chapter
၁
တႃႇဝိတ်ႉလႆႈငိၼ်းလွင်ႈသေႃးလုတၢႆ
၁ လိုၼ်းသေသေႃးလုတၢႆယဝ်ႉ၊တႃႇဝိတ်ႉလုၵ်ႉသေၵႃႈတီႈဢၼ်မၼ်းပႄႉၼႅင်ႇၵူၼ်းဢႃႇမလိၵ်ႉၸိူဝ်းၼၼ်ႉသေယဝ်ႉၶိုၼ်းမႃးလႄႈလိုဝ်ႈသဝ်းယူႇၵႃႈတီႈဝဵင်းၸိၵလတ်ႉသွင်ဝၼ်းဢေႃႈ။
၂ ၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉမီးၵူၼ်းၵေႃႉၼိုင်ႈသိၵ်ၶၢတ်ႇၶူဝ်းၼုင်ႈမၼ်းသေလႄႈဢဝ်မုၼ်ႈလိၼ်တၢင်ႇသႂ်ႇၵႃႈၼိူဝ်ႁူဝ်မၼ်းသေယဝ်ႉႁွတ်ႈထိုင်မႃးၵႃႈတီႈတႃႇဝိတ်ႉဢေႃႈ။
၃ တႃႇဝိတ်ႉၵေႃႈထၢမ်တီႈမၼ်းလႄႈဝႃႈ၊-မႂ်းလုၵ်ႉၵႃႈတီႈလႂ်မႃး၊ဝႃႈၼင်ႇၼႆလႄႈၵေႃႉၼၼ်ႉၵေႃႈလဝ်ႈလၢတ်ႈလႄႈဝႃႈ၊-ၶႃႈၸဝ်ႈဢွၵ်ႇပၢႆသေၵႃႈတီႈတပ်ႉဢိသရေႇလၼၼ်ႉမႃးၶႃႈဢေႃႈ၊ဝႃႈၼင်ႇၼႆလႄႈတႃႇဝိတ်ႉၵေႃႈထၢမ်လႄႈဝႃႈ၊-
၄ လွင်ႈတၢင်းမၼ်းမီးၸိူဝ်ႉၼင်ႇႁိုဝ်၊မွၵ်ႇလၢတ်ႈတီႈၵဝ်လူး၊မိူဝ်ႈဢၼ်ဝႃႈၼင်ႇၼႆၸိုင်ၵေႃႉၼၼ်ႉၵေႃႈလဝ်ႈလၢတ်ႈလႄႈဝႃႈ၊-ၵူၼ်းတင်းလၢႆဢွၼ်ၵၼ်ဢွၵ်ႇပၢႆသိုၵ်းလႄႈၵူၼ်းၼမ်ၼႃႇလူမ်ႉတၢႆတီႈၶႃႈယဝ်ႉ။သေႃးလုတင်းလုၵ်ႈၸၢႆးမၼ်းၸဝ်ႈယေႃးၼသၼ်ႇၵေႃႈတၢႆၶႃႈယဝ်ႉ၊ဝႃႈၼင်ႇၼႆဢေႃႈ။
၅ တႃႇဝိတ်ႉၵေႃႈထၢမ်တီႈၵေႃႉၼၼ်ႉလႄႈဝႃႈ၊-မႂ်းႁဵတ်းၸိူဝ်ႉၼင်ႇႁိုဝ်လႄႈႁူႉလွင်ႈဢၼ်ဝႃႈသေႃးလုဢိၵ်ႇတင်းလုၵ်ႈၸၢႆးၸဝ်ႈယေႃးၼသၼ်ႇတၢႆယဝ်ႉၼၼ်ႉ၊ဝႃႈၼင်ႇၼႆလႄႈ
၆ ၵူၼ်းဢွၼ်ႇၵေႃႉၼၼ်ႉၵေႃႈလဝ်ႈလၢတ်ႈလႄႈဝႃႈ၊-မိူဝ်ႈဢၼ်ၶႃႈၸဝ်ႈမီးယူႇၵႃႈၼိူဝ်လွႆၵိလပေႃႇၼၼ်ႉၶႃႈၸဝ်ႈလႆႈႁၼ်သေႃးလုဢိင်ႊၵၼ်းႁွၵ်ႇမၼ်းယူႇလႄႈႁူဝ်ႁၢၼ်ၵူၼ်းသိုၵ်းဢၼ်ၶီႇလရထေႃးဢိၵ်ႇတင်းႁူဝ်ႁၢၼ်ၵူၼ်းသိုၵ်းဢၼ်ၶီႇမႃႉၸိူဝ်းၼၼ်ႉလိုပ်ႇၸွမ်းလမ်းၸွမ်းမၼ်းၸဝ်ႈယူႇလႄႈၸမ်ႈတၵ်းၶိုတ်းမၼ်းၸဝ်ႈယဝ်ႉဢေႃႈ။
၇ မၼ်းၸဝ်ႈဝၢႆႇတူၺ်းတၢင်းလင်လႄႈႁၼ်ၶႃႈၸဝ်ႈသေယဝ်ႉမၼ်းၸဝ်ႈႁွင်ႉဢဝ်ၶႃႈၸဝ်ႈၶႃႈဢေႃႈ။ၶႃႈၸဝ်ႈၵေႃႈၽၢမ်ဝႃႈ၊-ၶႃႈၸဝ်ႈတၵ်းလႆႈႁဵတ်းၵႃႈသင်ၶႃႈ၊မိူဝ်ႈဢၼ်ဝႃႈၼင်ႇၼႆၸိုင်မၼ်းၸဝ်ႈထၢမ်ၶႃႈၸဝ်ႈလႄႈဝႃႈ၊-မႂ်းပဵၼ်ၽူႈလႂ်၊ဝႃႈၼင်ႇဢေႃႈ။
၈ ၶႃႈၸဝ်ႈလဝ်ႈလၢတ်ႈလႄႈဝႃႈ၊-ၶႃႈၸဝ်ႈပဵၼ်ၵူၼ်းဢႃႇမလိၵ်ႉၶႃႈဢေႃႈ၊ဝႃႈၼင်ႇၼႆလႄႈမၼ်းၸဝ်ႈၵေႃႈလၢတ်ႈတီႈၶႃႈၸဝ်ႈလႄႈဝႃႈ၊-မႃးၵႃႈၼိူဝ်ၵဝ်သေလႄႈဢဝ်ၵဝ်တၢႆတႃႉ။
၉ ၵဝ်လႆႈၶၢမ်ႈဝူၺ်ႇတၼႃႇၵိၼ်းၼႃႇလူင်လၢင်ၵွပ်ႈပိူဝ်ႈဢၼ်ၸႂ်ၵဝ်ယင်းဢမ်ႇၶၢတ်ႇၼၼ်ႉဢေႃႈ၊ဝႃႈၼင်ႇၼႆလႄႈၶႃႈၸဝ်ႈၵေႃႈၵႂႃႇၵႃႈၼိူဝ်မၼ်းၸဝ်ႈသေယဝ်ႉဢဝ်မၼ်းၸဝ်ႈတၢႆၵွပ်ႈပိူဝ်ႈဢၼ်ၶႃႈၸဝ်ႈႁူႉလွင်ႈဢၼ်ဝႃႈမၼ်းၸဝ်ႈဢမ်ႇဢသၢၵ်ႈလိပ်းလႆႈယဝ်ႉၼၼ်ႉတီႈၶႃႈဢေႃႈ။
၁၀ ၶႃႈၸဝ်ႈထွတ်ႇဢဝ်မွၵ်ႇႁူဝ်သရၽူႇဢၼ်တိုဝ်းၵႃႈတီႈႁူဝ်ၸဝ်ႈဢိၵ်ႇတင်းဝႅၼ်ဢၼ်တိုဝ်းၵႃႈတီႈၶႅၼ်မိုဝ်းမၼ်းၸဝ်ႈၼၼ်ႉဢဝ်မႃးၸူးၵႃႈတီႈၸဝ်ႈႁဝ်းတီႈၶႃႈဢေႃႈ၊ဝႃႈၼင်ႇၼႆဢေႃႈ။
၁၁ မိူဝ်ႈၼၼ်ႉတႃႇဝိတ်ႉတိုတ်ႉသိၵ်ႇၶူဝ်းၼုင်ႈမၼ်းဢေႃႈ။ၵူၼ်းၵႃႈဢၼ်မီးယူႇလူၺ်ႈၵၼ်တင်းမၼ်းၸိူဝ်းၼၼ်ႉၵေႃႈဢွၼ်ၵၼ်ႁဵတ်းၸိူဝ်ႉၼင်ႇၼၼ်ဢေႃႈ။
၁၁ ၵွပ်ႈပိူဝ်ႈသေႃးလုဢိၵ်ႇတင်းလုၵ်ႈၸၢႆးမၼ်းယေႃးၼသၼ်ႇတင်းၵူၼ်းထႃႇဝရႃႉၽြႃးမဵဝ်းဢိသရေႇလတင်းလႆႈလူႉသုမ်းတၢႆပႅတ်ႈယဝ်ႉလႄႈၶဝ်ဢွၼ်ၵၼ်ႁႆႈႁွင်ႉပွင်ႉၶၢင်းလႄႈၵမ်တၢင်းၵိၼ်တေႃႇထိုင်ႁွတ်ႈႁူဝ်ၶမ်ႈဢေႃႈ။
၁၃ တႃႇဝိတ်ႉထၢမ်တီႈၵူၼ်းဢွၼ်ႇဢၼ်မွၵ်ႇလၢတ်ႈလႄႈဝႃႈ၊-မႂ်းလုၵ်ႉၵႃႈတီႈလႂ်မႃး၊ဝႃႈၼင်ႇၼႆလႄႈၵေႃႉၼၼ်ႉၶိုၼ်းလဝ်ႈလၢတ်ႈလႄႈဝႃႈ၊-ၶႃႈၸဝ်ႈပဵၼ်ၵူၼ်းတၢင်ႇၸိူဝ်ႉတၢင်ႇၶိူဝ်းၵူၼ်းမဵဝ်းဢႃႇမလိၵ်ႉၶႃႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်
၁၄ တႃႇဝိတ်ႉလၢတ်ႈလႄႈဝႃႈ၊-ႁဵတ်းႁိုဝ်လႄႈမႂ်းႁတ်းယဵတ်ႇမိုဝ်းဢဝ်တၢႆၵေႃႉဢၼ်လႆႈၶၢမ်ႇၽိၵ်ႈသိၵ်ႈထႃႇဝရႃႉၽြႃးၼၼ်ႉ၊ဝႃႈၼင်ႇသေယဝ်ႉ၊တႃႇဝိတ်ႉႁွင်ႉဢဝ်ၵူၼ်းဢွၼ်ႇမၼ်းၵေႃႉၼိုင်ႈလႄႈဝႃႈ၊-
၁၅ ၵႂႃႇဢဝ်မၼ်းတၢႆပႅတ်ႈတႃႉ၊ဝႃႈၼင်ႇၼႆလႄႈမၼ်းၵေႃႈၵႂႃႇဢဝ်ၵူၼ်းၵေႃႉၼၼ်ႉတၢႆပႅတ်ႈသေဢေႃႈ။
၁၆ တႃႇဝိတ်ႉၵေႃႈဝႃႈ၊-ႁႂ်ႈလိူတ်ႈမႂ်းတူၵ်းၵႃႈၼိူဝ်ႁူဝ်မႂ်းတႃႉ။လွင်ႈမၼ်းၸမ်းသူပ်းမႂ်းၶၢမ်ႇသၢၵ်ႈသေႇဝႃႈမႂ်းဢဝ်ၵေႃႉဢၼ်ၶၢမ်ႇၽိၵ်ႈသိၵ်ႈထႃႇဝရႃႉၽြႃးၼၼ်ႉတၢႆယဝ်ႉၼၼ်ႉဢေႃႈ၊ဝႃႈၼင်ႇၼႆဢေႃႈ။
၁၇ တႃႇဝိတ်ႉဢဝ်ၵႂၢမ်းဢၼ်ႁႆႈႁွင်ႉပွင်ႉၶင်းၼၼ်ႉႁႆႈႁွင်ႉပွင်ႉၶင်းၵွပ်ႈပိူဝ်ႈသေႃးလုဢိၵ်ႇတင်းလုၵ်ႈၸၢႆးၸဝ်ႈယေႃးၼသၼ်ႇၼၼ်ႉသေယဝ်ႉ
၁၈ မၼ်းမီးဢမိင်ႉႁႂ်ႈဢဝ်တၢင်းဢၼ်ႁဵတ်းၵႂၢမ်းလူၺ်ႈလွင်ႈပိုၼ်ၵၢင်ႇဢၼ်ပႃးၵႃႈၼႂ်းလိၵ်ႈယႃႇသႃႇၼၼ်ႉသွၼ်ပၼ်တီႈၵူၼ်းမဵဝ်းယုတတင်းလၢႆဢေႃႈ။လိၵ်ႈၵႂၢမ်းၼၼ်ႉၸမ်း၊-မဵဝ်းဢိသရေႇလဢိူၺ်း။
၁၉ မူၼ်ႈၽုင်းသရေႇမႂ်းလႆႈၶၢမ်ႇတၢင်းတၢႆၵႃႈၼိူဝ်ထႃႇၼႃႉတီႈသုင်မႂ်းၸိူဝ်းၼၼ်ႉလႄႈႁူဝ်ႁၢၼ်ၵူၼ်းသိုၵ်းဢၼ်ႁႅင်းယႂ်ႇၼႃႇၸိူဝ်းၼၼ်ႉဢွၼ်ၵၼ်လူမ်ႉတၢႆယဝ်ႉလူင်ပေႇ။
၂၀ ယႃႇပေဢဝ်လွင်ႈမၼ်းမွၵ်ႇလၢတ်ႈတီႈဝဵင်းၵႃႇသလႄႈယႃႇပေဢဝ်လွင်ႈမၼ်းၵျေႇၺႃႇၵႃႈၼႂ်းသဵၼ်ႈတၢင်းဝဵင်းဢႃႇသၵေႇလုၼ်ၸိူဝ်းၼၼ်ႉ။ၵူဝ်လုၵ်ႈယိင်းၵူၼ်းမဵဝ်းၽိလိတ်ႉတိတင်းလၢႆတၵ်းၸူမ်းသိူဝ်းမူၼ်ႈပျေႃႇလႄႈၵူဝ်လုၵ်ႈယိင်းၶဝ်ၸိူဝ်းဢၼ်ဢမ်ႇၶၢမ်ႇမၢင်ႇၵလႃႇတၢင်းဢၼ်ထိူဝ်ႁိမ်းၼၼ်ႉတၵ်းသႂၢင်ႇၸႂ်သိူဝ်းၸႂ်ဢေႃႈ။
၂၁ လွႆၵိလပေႃႇၶဝ်ဢိူၺ်း။ၵႃႈၼိူဝ်သူၼၼ်ႉယႃႇပေႁႂ်ႈၼမ်ႉၼၢႆးဢိၵ်ႇတင်းၽူၼ်တူၵ်းသႂ်ႇလႄႈယႃႇပေႁႂ်ႈမီးႁႆႊမီးၼႃးဢၼ်မၢၵ်ႇမၢၵ်ႇဢၼ်တၵ်းလီပုၵ်ႉၸေႃႇၼၼ်ႉ။လွင်ႈမၼ်းၸမ်းၶိူင်ႈႁႄႉလၢၵ်ႈၼၢၵ်ႈဢၼ်ႁူဝ်ႁၢၼ်ၵူၼ်းသိုၵ်းဢၼ်ႁႅင်းယႂ်ႇၼႃႇတိုဝ်းၼၼ်ႉပဵၼ်ဢၼ်ၵူဝ်ႈၵိူၵ်ႇယဝ်ႉ။ၶိူင်ႈႁႄႉလၢၵ်ႈၼၢၵ်ႈသေႃးလုၼၼ်ႉဢမ်ႇလႆႈမီးတၢင်းဢၼ်ဢဝ်ၼမ်ႉမၼ်းတႃးလုပ်ႉယဝ်ႉ။
၂၂ ၵႃႈတီႈလိူတ်ႈႁူဝ်ႁၢၼ်ၵူၼ်းသိုၵ်း၊ၵႃႈတီႈၵွၼ်ႈၶႆၵွၼ်ႈမၼ်းၶဝ်ၸိူဝ်းဢၼ်ႁႅင်းယႂ်ႇၼၼ်ႉပိုၼ်ႈၵၢင်ႇယေႃးၼသၼ်ႇဢမ်ႇၶိုၼ်းမႃးယဝ်ႉ။လၢပ်ႇသေႃးလုဢမ်ႇၶိုၼ်းမႃးတႄႉတႄႉဝႃႈဝႃႈယဝ်ႉ။
၂၃ သေႃးလုဢိၵ်ႇတင်းယေႃးၼသၼ်ႇမိူဝ်ႈဢၼ်ဢသၢၵ်ႈယင်းလိပ်းၼၼ်ႉပဵၼ်ဢၼ်လီႁၵ်ႉလီပႅင်းလႄႈမိူဝ်ႈဢၼ်သွင်ၶႃတၢႆၼၼ်ႉၸိုင်ၵေႃႉၼိုင်ႈလႄႈၵေႃႉၼိုင်ႈယင်းဢမ်ႇၽၢတ်ႇဢမ်ႇယၢၼ်ၵၼ်။သွင်ၶႃၶၼ််ၽႂ််းမိူၼ်ၼင်ႇႁူင်ႉလႄႈႁႅင်းယႂ်ႇမိူၼ်သၢင်ႇသီႈဢေႃႈ။
၂၄ သူၵႃႈပဵၼ်လုၵ်ႈယိင်းမဵဝ်းဢိသရေႇလၶဝ်ဢိူၺ်း။ဢွၼ်ၵၼ်ႁႆႈႁွင်ႉၵွပ်ႈပိူဝ်ႈသေႃးလု၊ဢၼ်ဢဝ်ၶူဝ်းၼုင်ႈဢၼ်လႅင်ႊၵမ်ႇၼၼ်ႉၼုင်ႈပၼ်သူႁၢင်ႊလီႁၢင်ႊငၢမ်းလႄႈဢဝ်ၶိူင်ႈၶမ်းႁၢင်ႈၶိူင်ႈသႂ်ႇပၼ်တီႈၶူဝ်းၼုင်ႈသူ၊ၼၼ်ႉတႃႉ။
၂၅ ႁူဝ်ႁၢၼ်ၵူၼ်းသိုၵ်းဢၼ်ႁႅင်းယႂ်ႇၼႃႇၸိူဝ်းၼၼ်ႉလူမ်ႉတၢႆၵႃႈတီႈပၢင်ပွႆးသိုၵ်းၼၼ်ႉယဝ်ႉလူင်ပေႇ။ယေႃးၼသၼ်ႇၼၼ်ႉလႆႈၶၢမ်ႇတၢင်းတၢႆၵႃႈၼိူဝ်ထႃႇၼႃႉတီႈသုင်မၼ်းၸိူဝ်းၼၼ်ႉယဝ်ႉလူင်ပေႇ။
၂၆ ပီႈၸၢႆးၵဝ်ယေႃးၼသၼ်ႇဢိူၺ်း။ၵဝ်မီးတၢင်းဢၼ်ၸႂ်ႁဵဝ်ႇၸွပ်ႈၵွပ်ႈပိူဝ်ႈမႂ်းဢေႃႈ။မႂ်းပဵၼ်ၵေႃႉဢၼ်ထုၵ်ႇၸႂ်ၵျိူၵ်ႈၸႂ်ၵဝ်ၼႃႇလူင်လၢင်လႄႈမႅတ်ႈတႃႇဢၼ်မႂ်းႁၵ်ႉပႅင်းၵဝ်ၼၼ်ႉပဵၼ်ဢၼ်လီဢၢမ်းၼႃႇလိူဝ်တွၼ်းၼႃႇသမေႅတ်ႈတႃႇဢၼ်ၸၢင်ႊႁၵ်ႉပႅင်းမေႈယိင်းၼၼ်ႉဢေႃႈ။
၂၇ ႁူဝ်ႁၢၼ်ၵူၼ်းသိုၵ်းဢၼ်ႁႅင်းယႂ်ႇၼႃႇၸိူဝ်းၼၼ်ႉလူမ်ႉတၢႆယဝ်ႉလူင်ပေႇ။လၢၵ်ႈၼၢၵ်ႈတိုၵ်းသိုၵ်းၸိူဝ်းၼၼ်ႉသုမ်းၸွမ်းပႅတ်ႈယဝ်ႉလူင်ပေႇ၊ဝႃႈၼင်ႇၼႆဢေႃႈ။