Chapter
၂၉
လၢၵ်ႈသွင်ႇပုၼ်ႈတၵ်းတႄႇတင်ႈပိၵ်ႉမၢၼ်ႇၸဝ်ႈ
၁ လၢႆးသမ်ႉၶုၼ်လူင်တႃႇဝိတ်ႉမီးဢမိင်ႉတီႈပရိၵ်ႈသၢတ်ႈတင်းသဵင်ႈတင်းလူင်လႄႈဝႃႈ၊-လုၵ်ႈၸၢႆးၵဝ်သေႃးလမုၼ်ႇဢၼ်ၽြႃးပဵၼ်ၸဝ်ႈလိူၵ်ႈၵဵပ်းဢဝ်ၼၼ်ႉဢသၢၵ်ႈလဵၵ်ႉလႄႈယင်းၼုမ်ႇဢေႃႈ။ဢမူႉတၢင်းႁဵတ်းၸမ်းယႂ်ႇၼႃႇဢေႃႈ။ပိၵ်ႉမၢၼ်ႇဢၼ်တၵ်းလႆႈတႄႇႁဵတ်းၼၼ်ႉပဵၼ်ပုၼ်ႈၵူၼ်းဢမ်ႇၸႂ်ႈ။
၂ ပဵၼ်ပုၼ်ႈထႃႇဝရႃႉၽြႃးၽြႃးပဵၼ်ၸဝ်ႈဢေႃႈ။ပိူဝ်ႈၼႆလႄႈၵႃႈၼင်ႇဢၼ်ၵဝ်တတ်ႈၼိုင်ႇလႆႈၼၼ်ႉၵဝ်ပွင်ႁဵတ်းပွင်ႁႅၼ်းၶမ်းပုၼ်ႈဢၼ်တၵ်းႁဵတ်းၶိူင်ႈၶမ်း၊ငိုၼ်းပုၼ်ႈဢၼ်တၵ်းႁဵတ်းၶိူင်ႈငိုၼ်း၊တွင်းလိူင်ပုၼ်ႈဢၼ်တၵ်းႁဵတ်းၶိူင်ႈတွင်းလိူင်၊လဵၵ်းပုၼ်ႈဢၼ်တၵ်းႁဵတ်းၶိူင်ႈလဵၵ်း၊မႆႉၸိင်ပုၼ်ႈဢၼ်တၵ်းႁဵတ်းၶိူင်ႈမႆႉၸိင်၊သႅင်ၸၢႆးၶႃးယွတ်ႇဢိၵ်ႇတင်းသႅင်ဢၼ်လီပုၼ်ႈဢၼ်တၵ်းၸီႇ၊သႅင်ဢၼ်ဢရွင်ႇလုၵ်ႉႁိူဝ်ႈ၊သႅင်ဢၼ်ပဵၼ်လဵၼ်းပဵၼ်လၢႆး၊သႅင်ဢၼ်ထိူၵ်ႈၵႃႈထိူၵ်ႈၶၼ်၊ႁိၼ်ၽိူၵ်ႇႁိၼ်ၶၢဝ်ဢၼ်ၼမ်ၼႃႇၸိူဝ်းၼၼ်ႉဝႆႉပုၼ်ႈႁိူၼ်းၽြႃးပဵၼ်ၸဝ်ႈၵဝ်ယဝ်ႉ။
၃ ၵွပ်ႈပိူဝ်ႈဢၼ်ႁူဝ်ၸႂ်ၵဝ်ၸပ်းၸွႆးႁိူၼ်းၽြႃးပဵၼ်ၸဝ်ႈၵဝ်လႄႈၼွၵ်ႈသေဢုၵ်ႉၸႃႇဢၼ်ၵဝ်ပွင်ႁဵတ်းပွင်ႁႅၼ်းပုၼ်ႈႁိူၼ်းဢၼ်မူတ်းၸၢင်ႇၼၼ်ႉ
၄ ၵဝ်ဢဝ်ၵႃႈၼႂ်းၶွင်ၶူဝ်းငိုၼ်းၶမ်းဢၼ်ၵဝ်ပိူင်ႇဢၼ်ပဵၼ်ၶမ်းဢေႃႇၽိရသၢမ်ႁဵင်တလၢၼ်ႇတၢၼ်ႇဢိၵ်ႇတင်းငိုၼ်းလီပုၼ်ႈဢၼ်တၵ်းဢုမ်ႇႁေႃႇၽႃႁိူၼ်းၸဵတ်းႁဵင်တလၢၼ်ႇတၢၼ်ႇ၊ၶမ်းပုၼ်ႈၶိူင်ႈၶမ်း၊
၅ ငိုၼ်းပုၼ်ႈၶိူင်ႈငိုၼ်းဢိၵ်ႇတင်းပုၼ်ႈၵႃႈဢၼ်သြႃႇသမႃးၶဝ်တၵ်းႁဵတ်းၵူႈၸိူဝ်ႉၵူႈပိူင်ၼၼ်ႉပၼ်ပုၼ်ႈႁိူၼ်းၽြႃးပဵၼ်ၸဝ်ႈၵဝ်ဢေႃႈ။ပိူဝ်ႈဢၼ်ပဵၼ်ၼင်ႇၼႆလႄႈဝၼ်းမိူဝ်ႈၼႆႉၽူႈလႂ်ၶႂ်ႈဢဝ်တဵမ်ၵမ်တဵမ်မိုဝ်းတူဝ်ၸဝ်ႈၵဝ်ႇသေလႄႈလူႇတၢၼ်းတီႈထႃႇဝရႃႉၽြႃး၊ဝႃႈၼင်ႇၼႆလႄႈ
၆ ၶဝ်ၸိူဝ်းဢၼ်ပဵၼ်ငဝ်ႈပဵၼ်ႁူဝ်ပီႈၼွင်ႉၸိူဝ်ႉၶိူဝ်းပေႃႈၶဝ်ၶုၼ်မဵဝ်းဢိသရေႇလတင်းလၢႆ၊ၶဝ်ၸိူဝ်းဢၼ်ဢုပ်ႉၵႃႈၼိူဝ်ၵူၼ်းယေႈႁဵင်၊ၶဝ်ၸိူဝ်းဢၼ်ဢုပ်ႉၵႃႈၼိူဝ်ၵူၼ်းယေႈပၢၵ်ႇ၊ၶဝ်ၸိူဝ်းဢၼ်ၸီႇယၢင်ႇဢမူႉၸဝ်ႈၶုၼ်ႁေႃၶမ်းတင်းလၢႆၸိူဝ်းၼၼ်ႉမီးၸႂ်ၸေႇတၼႃႇလႄႈ
၇ ဢွၼ်ၵၼ်လူႇၶမ်းႁႃႈႁဵင်တလၢၼ်ႇတၢၼ်ႇတင်းတႅင်းၵႃးၶမ်းတရိၵ်ႉမိုၼ်ႇၼိုင်ႈ၊ငိုၼ်းမိုၼ်ႇတလၢၼ်ႇတၢၼ်ႇ၊တွင်းလိူင်မိုၼ်ႇပၢႆပႅတ်ႇႁဵင်တလၢၼ်ႇတၢၼ်ႇ၊လဵၵ်းသႅၼ်တလၢၼ်ႇတၢၼ်ႇပုၼ်ႈဢၼ်တၵ်းၵိုတ်ႈႁၢပ်ႇဢမူႉႁိူၼ်းၽြႃးပဵၼ်ၸဝ်ႈဢေႃႈ။
၈ ၶဝ်ၸိူဝ်းဢၼ်မီးသႅင်မျၢတ်ႈၵေႃႈဢွၼ်ၵၼ်ဢဝ်ဢၢပ်ႈပၼ်ၵႃႈၼႂ်းမိုဝ်းယေႇႁေႇလၵူၼ်းမဵဝ်းၵေႇရသုၼ်ႇသေယဝ်ႉသႂၢင်းၶဝ်ႈၵႃႈၼႂ်းႁိူၼ်းထႃႇဝရႃႉၽြႃးဢေႃႈ။
၉ မိူဝ်ႈၼၼ်ႉၵူၼ်းတင်းလၢႆဢွၼ်ၵၼ်ၸူမ်းသိူဝ်းလူၺ်ႈလွင်ႈဢၼ်ၶဝ်ပႃးႁူဝ်ၸႂ်ၸေးၸုမ်ႇတင်းၸႂ်ၸေႇတၼႃႇသေလႄႈလူႇတၢၼ်းၼၼ်ႉဢေႃႈ။ၶုၼ်လူင်တႃႇဝိတ်ႉၵေႃႈမီးတၢင်းဢၼ်ၸူမ်းသိူဝ်းၼႃႇလူင်လၢင်ဢေႃႈ။
တၢင်းသူးတွင်းတႃႇဝိတ်ႉ
၁၀ မိူဝ်ႈၼၼ်ႉတႃႇဝိတ်ႉယွင်ႈယေႃးထႃႇဝရႃႉၽြႃးၵႃႈတီႈၽၢႆႇၼႃႈပရိၵ်ႈသၢတ်ႈတင်းလၢႆလႄႈတႃႇဝိတ်ႉလဝ်ႈလၢတ်ႈလႄႈဝႃႈ၊-ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလ၊ပေႃႈၶႃႈၸဝ်ႈႁဝ်းၶဝ်ၼၼ်ႉတီႈၶႃႈ။ႁႂ်ႈၸဝ်ႈႁဝ်းမီးမၢင်ႇၵလႃႇၵူႈၵမႃ်ႇႇသိုပ်ႇသိုပ်ႇတၢမ်းတၢမ်းသေၵမ်းလူၺ်ႈတီႈၶႃႈ။ထႃႇဝရႃႉၽြႃးတီႈၶႃႈၸဝ်ႈႁဝ်းတဵမ်ဝႆႉတင်းမူၼ်တၼ်းၶူဝ်းဢႃႇၼူႉၽေႃႇ၊ဢၶႂၢင်ႉတၢင်းဢၼ်ပေႉၼႅင်ႇဢႃႇၼႃႇၸၢၵ်ႈတီႈၶႃႈဢေႃႈ။
၁၁ ၸဝ်ႈႁဝ်းဢုပ်ႉပိူင်ႇၵႃႈဢၼ်မီးၵႃႈတီႃႈႉၵၢင်ႁၢဝ်ဢိၵ်ႇတင်းၵႃႈတီႈလိၼ်မိူင်းတီႈၶႃႈဢေႃႈ။ထႃႇဝရႃႉၽြႃးတီႈၶႃႈ။ၸဝ်ႈႁဝ်းပိူင်ႇသိုင်ႇၸိုင်ႈဝၢၼ်ႈမိူင်းတီႈၶႃႈဢေႃႈ။ထႃႇဝရႃႉၽြႃးတီႈၶႃႈ။ၸဝ်ႈႁဝ်းယႂ်ႇသုင်မျၢတ်ႈလီၼႃႇလႄႈပဵၼ်ၸိၵ်းပဵၼ်ၸွမ်ပိူၼ်ႈတင်းသဵင်ႈတင်းလူင်တီႈၶႃႈဢေႃႈ။
၁၂ မူၼ်ၵုင်ႇသရေႇဢိၵ်ႇတင်းၸေးၸိမ်ႇၶွင်ၶူဝ်းဢွၵ်ႇပဵၼ်တီႈၸဝ်ႈႁဝ်းမႃးတီႈၶႃႈဢေႃႈ။ၸဝ်ႈႁဝ်းဢုပ်ႉပိူင်ႇၵူၼ်းတင်းသဵင်ႈတင်းလူင်တီႈၶႃႈဢေႃႈ။ႁႅင်းတၼ်းၶူဝ်းဢိၵ်ႇတင်းတၢင်းၵတ်ႉတၢင်းၶၼ်မီးၵႃႈၼႂ်းမိုဝ်းၸဝ်ႈႁဝ်းတီႈၶႃႈဢေႃႈ။ၵႃႈၼႂ်းမိုဝ်းၸဝ်ႈႁဝ်းၼၼ်ႉမီးဢၶႂၢင်ႉဢၼ်ႁႂ်ႈယႂ်ႇမျၢတ်ႈဢိၵ်ႇတင်းဢၶႂၢင်ႉဢၼ်ဢၢပ်ႈပၼ်တၢင်းဢၼ်မၼ်ႈၶိူင်ႇတီႈၵူၼ်းတင်းသဵင်ႈတင်းလူင်တီႈၶႃႈဢေႃႈ။
၁၃ ပိူဝ်ႈဢၼ်ပဵၼ်ၼင်ႇၼႆလႄႈၽြႃးပဵၼ်ၸဝ်ႈႁဝ်းၶႃႈတီႈၶႃႈ။ၶႃႈၸဝ်ႈႁဝ်းၼႆႉဢွၼ်ၵၼ်ႁပ်ႉတုင်းဢဝ်လွင်ႈဢၼ်ၵျေးၸူးၸဝ်ႈႁဝ်းယႂ်ႇၼႃႇလူင်လၢင်ၼၼ်ႉလႄႈယွင်ႈယေႃးၼႃႉမႃႉၸိုဝ်သဵင်ၸဝ်ႈႁဝ်းဢၼ်မုၼ်ယႂ်ႇၼႃႇၼၼ်ႉတီႈၶႃႈဢေႃႈ။
၁၄ ၵူၺ်းၵႃႈၶႃႈၸဝ်ႈႁဝ်းဢိၵ်ႇတင်းၵူၼ်းၶႃႈၸဝ်ႈႁဝ်းၸိူဝ်းၼႆႉပဵၼ်ၵူၼ်းၸိူဝ်ႉၼင်ႇႁိုဝ်လႄႈႁႂ်ႈထၼ်ႈပေႃးလႆႈပႃးတင်းၸႂ်ၸေႇတၼႃႇလႄႈပုၵ်ႉၸေႃႇထၢၼ်ႇၼႆႉတီႈၶႃႈ။လွင်ႈတၢင်းၵႃႈမီးတင်းသဵင်ႈတင်းလူင်ဢွၵ်ႇပဵၼ်မႃးတီႈၸဝ်ႈႁဝ်းတီႈၶႃႈဢေႃႈ။ၶႃႈၸဝ်ႈႁဝ်းၸိူဝ်းၼႆႉဢဝ်ၼႂ်းဢုၵ်ႉၸႃႇၸဝ်ႈႁဝ်းၼၼ်ႉၵူၺ်းပုၵ်ႉၸေႃႇတီႈၸဝ်ႈႁဝ်းတီႈၶႃႈဢေႃႈ။
၁၅ ၶႃႈၸဝ်ႈႁဝ်းၸိူဝ်းၼႆႉပဵၼ်ၶႅၵ်ႇဢႃႇၵၼ်ႇတူႉၵႃႈတီႈၽၢႆႇၼႃႈၸဝ်ႈႁဝ်းမိူၼ်ၸိူဝ်ႉၼင်ႇပူႇမွၼ်ႇၶႃႈၸဝ်ႈႁဝ်းၶဝ်ၸိူဝ်းၼၼ်ႉတီႈၶႃႈဢေႃႈ။မိုဝ်ႉဝၼ်းဢၼ်ၶႃႈၸဝ်ႈႁဝ်းၶဝ်ယူႇၵႃႈၼိူဝ်လိၼ်မိူင်းၼႆႉၸိူဝ်းၼၼ်ႉပဵၼ်မိူၼ်ၸိူဝ်ႉၼင်ႇႁူမ်ႈၵွင်ႉငဝ်းတီႈၶႃႈဢေႃႈ။
၁၆ ဢမ်ႇမီးတီႈဢၼ်သွၼ်ႈဢၼ်ပိုင်ႈတီႈၶႃႈ။ထႃႇဝရႃႉၽြႃးၽြႃးပဵၼ်ၸဝ်ႈႁဝ်းၶႃႈတီႈၶႃႈ။ၶွင်ၶူဝ်းၵႃႈဢၼ်မီးဢၼ်ၶႃႈၸဝ်ႈႁဝ်းၶဝ်ပွင်ႁဵတ်းပွင်ႁႅၼ်းႁႂ်ႈလႆႈတႄႇႁဵတ်းႁိူၼ်းၸဝ်ႈပုၼ်ႈၼႃႇမႃႉၸိုဝ်သဵင်ၸဝ်ႈႁဝ်းၸိူဝ်းၼႆႉဢွၵ်ႇပဵၼ်တီႈၸဝ်ႈႁဝ်းၶႃႈလႄႈၸဝ်ႈႁဝ်းပိူင်ႇၵႃႈမီးတင်းသဵင်ႈတင်းလူင်တီႈၶႃႈဢေႃႈ။
၁၇ ၽြႃးပဵၼ်ၸဝ်ႈၵဝ်ၶႃႈတီႈၶႃႈ။ၸဝ်ႈႁဝ်းၶႃႈႁူႉႁၼ်လွင်ႈဢၼ်ၸဝ်ႈႁဝ်းၸႅတ်ႈထၢမ်ၸႅတ်ႈတူၺ်းႁူဝ်ၸႂ်လႄႈထုၵ်ႇၸႂ်ၵျိူၵ်ႈၸႂ်သၽေႃးဢၼ်သိုဝ်ႈတေႃႇၼၼ်ႉတီႈၶႃႈဢေႃႈ။ၶႃႈၸဝ်ႈၸမ်းပႃးတင်းသၽေႃးတၢင်းဢၼ်သိုဝ်ႈတေႃႇ၊သၽေႃးဢၼ်မီးၸေႇတၼႃႇသေလႄႈဢဝ်ၽၼ်ႇတႃႇၵႃႈမီးၼႆႉပုၵ်ႉၸေႃႇတီႈၶႃႈဢေႃႈ။တေႃႈလဵဝ်ၼႆႉၶႃႈၸဝ်ႈႁၼ်ၵူၼ်းၸဝ်ႈႁဝ်းတင်းလၢႆဢၼ်မီးၵႃႈတီႈၼႆႉၸိူဝ်းၼႆႉပႃးတင်းၸႂ်ၸေႇတၼႃႇသေလႄႈပုၵ်ႉၸေႃႇတီႈၸဝ်ႈႁဝ်းၼၼ်ႉလႄႈၸူမ်းသိူဝ်းတီႈၶႃႈဢေႃႈ။
၁၈ ထႃႇဝရႃႉၽြႃးၽြႃးပဵၼ်ၸဝ်ႈဢႃႇပႁမ်ႇ၊ဢိၸၢၵ်ႉ၊ဢိသရေႇလပူႇမွၼ်ႇၶႃႈၸဝ်ႈႁဝ်းၶဝ်ၸိူဝ်းၼၼ်ႉတီႈၶႃႈ။ၶႅၼ်းတေႃႈႁႂ်ႈလွင်ႈတၢင်းၼႆႉပဵၼ်ယူႇတႃႇသေႇၼႂ်းသၽေႃးတင်းဢၼ်ႁူဝ်ၸႂ်ၵူၼ်းၸဝ်ႈႁဝ်းတင်းလၢႆၵျၢမ်ႇပွင်ယူႇၼၼ်ႉလႄႈႁႂ်ႈႁူဝ်ၸႂ်ၶဝ်တႄႇယူႇၵႃႈတီႈၸဝ်ႈႁဝ်းသေၵမ်းတီႈၶႃႈ။
၁၉ ၶႅၼ်းတေႃႈဢိတ်းလူပၼ်ႁူဝ်ၸႂ်ဢၼ်ၸေးၸုမ်ႇၵႃႈတီႈလုၵ်ႈၸၢႆးၶႃႈၸဝ်ႈသေႃးလမုၼ်ႇၼၼ်ႉလႄႈႁႂ်ႈမၼ်းၵမ်ၵျၢင်ႉပႂ်ႉၸွမ်းပိင်းၺၢပ်ႈၸဝ်ႈႁဝ်းထုင်းၽိင်ႈတြႃးၸဝ်ႈႁဝ်းၸိူဝ်းၼၼ်ႉသေလႄႈႁဵတ်းလွင်ႈတင်းသဵင်ႈတင်းလူင်ၸိူဝ်းၼႆႉသေယဝ်ႉတႄႇႁဵတ်းပိၵ်ႉမၢၼ်ႇၸဝ်ႈႁဝ်းဢၼ်ၶႃႈၸဝ်ႈပွင်ႁဵတ်းမႄးႁႅၼ်းဝႆႉပုၼ်ႈမၼ်းၼၼ်ႉသေၵမ်းတီႈၶႃႈ၊ဝႃႈၼင်ႇၼႆဢေႃႈ။
၂၀ တီႈပရိၵ်ႈသၢတ်ႈတင်းသဵင်ႈတင်းလူင်ၵေႃႈတႃႇဝိတ်ႉမီးဢမိင်ႉလႄႈဝႃႈ၊-ဢွၼ်ၵၼ်ယွင်ႈယေႃးထႃႇဝရႃႉၽြႃးၽြႃးပဵၼ်ၸဝ်ႈတႃႉ၊ဝႃႈၼင်ႇၼႆလႄႈပရိၵ်ႈသၢတ်ႈတင်းသဵင်ႈတင်းလူင်ၼၼ်ႉဢွၼ်ၵၼ်ယွင်ႈယေႃးထႃႇဝရႃႉၽြႃးၽြႃးပဵၼ်ၸဝ်ႈပူႇမွၼ်ႇၶဝ်ယူႇသေလႄႈၶုပ်ႉမူပ်ႇဝၢင်းႁူဝ်ၽၢႆႇၼႃႈထႃႇဝရႃႉၽြႃးဢိၵ်ႇတင်းၶုၼ်ႁေႃၶမ်းဢေႃႈ။
၂၁ ဝၼ်းမိူဝ်ႈၽုၵ်ႈၼၼ်ႉၶဝ်ဢွၼ်ၵၼ်ႁဵတ်းတၢင်းဢၼ်ပုၵ်ႉၸေႃႇယိၸ်ႉလႄႈပုၵ်ႉၸေႃႇယိၸ်ႉဢၼ်တုတ်ႇၽႆးဝူဝ်းႁဵင်ၼိုင်ႈ၊သူဝ်းပေႃႈႁဵင်ၼိုင်ႈ၊သူဝ်းဢွၼ်ႇႁဵင်ၼိုင်ႈဢိၵ်ႇတင်းၶိူင်ႈပုၵ်ႉၸေႃႇဢၼ်သွၼ်းလေႃႇတင်းယိၸ်ႉဢၼ်ၼမ်ၼႃႇလူင်လၢင်ၼၼ်ႉတီႈထႃႇဝရႃႉၽြႃးပုၼ်ႈမဵဝ်းဢိသရေႇလတင်းသဵင်ႈတင်းလူင်ဢေႃႈ။
၂၂ ၼႂ်းဝၼ်းၼၼ်ႉၵမ်းလဵဝ်ၶဝ်ႁဵတ်းတၢင်းဢၼ်မူၼ်ႈပျေႃႇယူႇသေလႄႈဢွၼ်ၵၼ်ၵိၼ်ၶူပ်းၵႃႈတီႈၽၢႆႇၼႃႈထႃႇဝရႃႉၽြႃးလႄႈဢဝ်သေႃးလမုၼ်ႇလုၵ်ႈၸၢႆးတႃႇဝိတ်ႉယုၵ်ႉယွင်ႈဝႆႉၵႃႈၼႂ်းဢရႃႇၶုၼ်ႁေႃၶမ်းၵမ်းတုတိယလႄႈပၼ်ၽိၵ်ႈသိၵ်ႈမၼ်းၽၢႆႇၼႃႈထႃႇဝရႃႉၽြႃးႁႂ်ႈမၼ်းပဵၼ်ၶုၼ်ဢေႃႈ။
၂၃ ၸႃႇတုၵ်ႉၵေႃႈႁႂ်ႈလႆႈပဵၼ်ယိတ်ႉပရေႃးႁိၵ်ႈဢေႃႈ။မိူဝ်ႈၼၼ်ႉသေႃးလမုၼ်ႇၼင်ႈယူႇၵႃႈၼိူဝ်ရႃႇၸႃႉပလၢင်ႇထႃႇဝရႃႉၽြႃးလႄႈႁဵတ်းၶုၼ်ႁေႃၶမ်းတၢင်တူဝ်ၸဝ်ႈပေႃႈမၼ်းတႃႇဝိတ်ႉသေလႄႈႁဵတ်းလႆႈပဵၼ်လႆႈဢေႃႈ။ၵူၼ်းမဵဝ်းဢိသရေႇလတင်းသဵင်ႈတင်းလူင်ဢွၼ်ၵၼ်ထွမ်ႇဢဝ်ႁဵတ်းၸွမ်းၵႂၢမ်းမၼ်းဢေႃႈ။
၂၄ မူးမၢတ်ႈၽွင်းမိူင်းၵႃႈမီးၶဝ်ၸိူဝ်းဢၼ်ပဵၼ်ၶုၼ်ပူဝ်ႇတင်းလၢႆဢိၵ်ႇတင်းလုၵ်ႈၸၢႆးၸဝ်ႈတႃႇဝိတ်ႉတင်းသဵင်ႈတင်းလူင်ၸိူဝ်းၼၼ်ႉဢွၼ်ၵၼ်ႁပ်ႉတုင်းဢဝ်တၢင်းဢၼ်ၶုၼ်ႁေႃၶမ်းသေႃးလမုၼ်ႇဢုပ်ႉပိူင်ႇၼၼ်ႉဢေႃႈ။
၂၅ ထႃႇဝရႃႉၽြႃးယုၵ်ႉယွင်ႈသေႃးလမုၼ်ႇၼႃႇလူင်လၢင်သိုဝ်ႈၼႃႈတႂ်ႈတႃၵူၼ်းမဵဝ်းဢိသရေႇလတင်းသဵင်ႈတင်းလူင်လႄႈဢိတ်းလူပၼ်မူၼ်ၽုင်းဢႃႇၼူႉၽေႃႇဢၼ်ၶုၼ်ႁေႃၶမ်းဢိသရေႇလသေၵေႃႉသေၵူၼ်းဢမ်ႇတွၼ်ႉလႆႈၶၢမ်ႇၼၼ်ႉဢေႃႈ။
၂၆ တႃႇဝိတ်ႉလုၵ်ႈၸၢႆးယေႇသေႇၼၼ်ႉဢုပ်ႉပိူင်ႇၸၢမ်ႇၸႃးမိူင်းဢိသရေႇလတင်းမိူင်းဢေႃႈ။
၂၇ မၼ်းလႆႈဢုပ်ႉပိူင်ႇၸၢမ်ႇၸႃးမိူင်းဢိသရေႇလသီႇသိပ်းပီႊဢေႃႈ။မၼ်းဢုပ်ႉပိူင်ႇၸၢမ်ႇၸႃးၵႃႈတီႈဝဵင်းႁေႇပုၼ်ႇၸဵတ်းပီႊဢုပ်ႉပိူင်ႇၸၢမ်ႇၸႃးၵႃႈတီႈဝဵင်းယေႇရုသလႅမ်ႇသၢမ်သိပ်းပၢႆသၢမ်ပီႊဢေႃႈ။
၂၈ မၼ်းမီးတၢင်းဢၼ်ဢသၢၵ်ႈၵႄႇထူၼ်ႈယဝ်ႉလႄႈၶိင်ႇၵႃႇလႃႉမိုဝ်ႉဝၼ်းတဵမ်ယဝ်ႉၸေးယဝ်ႉတၢင်းဢၼ်မူၼ်ႈၸေးၸိမ်ႇလိူင်ၼမ်ၼၼ်ႉလႄႈႁွတ်ႈထိုင်ဢၼိၵ်ႉၸႃႉဢေႃႈ။လုၵ်ႈၸၢႆးမၼ်းသေႃးလမုၼ်ႇၼၼ်ႉၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။လွင်ႈတၢင်းဢၼ်ၶုုၼ်လူင်တႃႇဝိတ်ႉႁဵတ်းၸႃႉၸဵမ်ငဝ်ႈတေႃႇပၢႆၵႃႈမီး၊တၢင်းဢၼ်မၼ်းလႆႈဢုပ်ႉပိူင်ႇၸၢမ်ႇၸႃး၊တၢင်းဢၼ်ၸိုဝ်သဵင်မၼ်းယႂ်ႇဢိၵ်ႇတင်းလွင်ႈတၢင်းၵႃႈဢၼ်ပဵၼ်တီႈတူဝ်မၼ်းလႄႈမိူင်းဢိသရေႇလသိုင်ႇၸိုင်ႈဝၢၼ်ႈမိူင်းတၢင်ႇတီႈတၢင်ႇလႅၼ်တင်းသဵင်ႈတင်းလူင်ၸိူဝ်းၼၼ်ႉတႅမ်ႈမၢႆဝႆႉမီးယူႇၵႃႈၼႂ်းလိၵ်ႈသမုၺ်ႇလၵေႃႉဢၼ်ႁူပွင်ႇတႃႇလႅင်းၵႃႈၼႂ်းလိၵ်ႈပရေႃးၽိတ်ႈၼႃႇသၼ်ႇ၊ၵႃႈၼႂ်းလိၵ်ႈၵတ်ႉၵေႃႉဢၼ်ႁူပွင်ႇတႃႇလႅင်းၸိူဝ်းၼၼ်ႉယူႇဢေႃႈ။