Chapter
၁၉
တၢင်းဢၼ်တိုၵ်းတေႃးၵၼ်တင်းဢႃႇမေႃးရိ
၁ လိုၼ်းၼၼ်ႉၼႃႇႁတ်ႉၶုၼ်ႁေႃၶမ်းဢမ်ႇမုၼ်ႇတၢႆလႄႈလုၵ်ႈၸၢႆးၸဝ်ႈၼင်ႈႁၢင်ႈၼင်ႈႁေႃၵႃႈတီႈဢရႃႇမၼ်းဢေႃႈ။
၂ တႃႇဝိတ်ႉၵေႃႈလၢတ်ႈလႄႈဝႃႈ၊-ၵဝ်တၵ်းႁဵတ်းၵျေးၸူးတီႈႁႃႇၼုၼ်ႇလုၵ်ႈၸၢႆးၼႃႇႁတ်ႉၵွပ်ႈပိူဝ်ႈဢၼ်ၸဝ်ႈပေႃႈမၼ်းႁဵတ်းၵျေးၸူးတီႈၵဝ်ၼၼ်ႉဢေႃႈ၊ဝႃႈၼင်ႇၼႆသေလႄႈတႃႇဝိတ်ႉပွႆႇၸႂ်ႉၽူႈတၢင်တူဝ်တင်းလၢႆၵႂႃႇႁႂ်ႈမၼ်းၼၼ်ႉပျေႇၸႂ်လူၺ်ႈလွင်ႈပေႃႈမၼ်းတၢႆၼၼ်ႉလႄႈၶႃႈတႃႇဝိတ်ႉၸိူဝ်းၼၼ်ႉဢွၼ်ၵၼ်ႁွတ်ႈထိုင်ၵႃႈတီႈမိူင်းဢမ်ႇမုၼ်ႇၸူးၵႃႈတီႈႁႃႇၼုၼ်ႇလႄႈႁႂ်ႈမၼ်းလႆႈပျေႇၸႂ်ဢေႃႈ။
၃ မူးမၢတ်ႈၽွင်းမိူင်းမဵဝ်းဢမ်ႇမုၼ်ႇၸိူဝ်းၼၼ်ႉလဝ်ႈလၢတ်ႈတီႈၶုၼ်ႁႃႇၼုၼ်ႇၼၼ်ႉလႄႈဝႃႈ၊-ၼႂ်းလွင်ႈဢၼ်တႃႇဝိတ်ႉပွႆႇၸႂ်ႉၽူႈတၢင်တူဝ်မႃးႁႂ်ႈၸႂ်ၸဝ်ႈႁဝ်းပျေႇၸႂ်ၼၼ်ႉၸဝ်ႈႁဝ်းထၢင်ႇမၢတ်ႈပဵၼ်ဢၼ်ရူဝ်ႇသေႇၵူဝ်ယမ်ပေႃႈၸဝ်ႈႁဝ်းတီႈၶႃႈႁိုဝ်။ၶႃႈမၼ်းၸိူဝ်းၼၼ်ႉမႃးတီႈၸဝ်ႈႁဝ်းႁႂ်ႈလႆႈႁႃလွင်ႈႁႃတၢင်းလွမ်တူၺ်းမိူင်းၸဝ်ႈႁဝ်းသေလႄႈႁႂ်ႈလႆႈယႃႉပႅတ်ႈၵူၺ်းဢေႃႈ၊
၄ မိူဝ်ႈဢၼ်ဝႃႈၼင်ႇၼႆၸိုင်၊ႁႃႇၼုၼ်ႇဢဝ်ၶႃႈတႃႇဝိတ်ႉၸိူဝ်းၼၼ်ႉသေလႄႈထႃၼူတ်ႇၵၢင်းၶဝ်သေယဝ်ႉတႅပ်းၶိူင်ႈၵၢင်ၶူဝ်းၼုင်ႈၶဝ်ပႅတ်ႈထၼ်ႈပေႃးႁႂ်ႈထိုင်ၵုမ်ႇၶဝ်သေယဝ်ႉပွႆႇၶဝ်ၵႂႃႇဢေႃႈ။
၅ မိူဝ်ႈဢၼ်ၵူၼ်းၵမ်ႈၽွင်ႈၵႂႃႇလဝ်ႈလၢတ်ႈလွင်ႈၼၼ်ႉတီႈတႃႇဝိတ်ႉၼၼ်ႉၸိုင်တႃႇဝိတ်ႉပွႆႇၸႂ်ႉၵူၼ်းၵႂႃႇႁႂ်ႈလႆႈႁပ်ႉႁူဝ်တၢင်းၶဝ်ၵွပ်ႈပိူဝ်ႈဢၼ်ၶဝ်ဢူၵ်းဢၢႆၼႃႇလူင်လၢင်ၼၼ်ႉဢေႃႈ။ၶုၼ်ႁေႃၶမ်းသင်ႇလၢတ်ႈလႄႈဝႃႈ၊-သူဢွၼ်ၵၼ်ၵိုတ်းသဝ်းယူႇၵႃႈတီႈဝဵင်းယေႇရိၶုဝ်းတေႃႇထိုင်ႁွတ်ႈႁႂ်ႈၼူတ်ႇၵၢင်းသူထၼ်ႈပေႃးယၢဝ်းမႃးလူးၵွၼ်ႇတႃႉ၊လိုၼ်းၼၼ်ႉၸင်ႇဢွၼ်ၵၼ်မႃးတႃႉ၊ဝႃႈၼင်ႇၼႆဢေႃႈ။
၆ မိူဝ်ႈဢၼ်ၵူၼ်းမဵဝ်းဢမ်ႇမုၼ်ႇၸိူဝ်းၼၼ်ႉႁူႉႁၼ်လွင်ႈဢၼ်ၶဝ်ပဵၼ်တီႈဢၼ်လီႈႁင်ႈဢဵတ်ႇသဵတ်ႇတီႈတႃႇဝိတ်ႉၼၼ်ႉၸိုင်ၶုၼ်ႁႃႇၼုၼ်ႇဢိၵ်ႇတင်းၵူၼ်းမဵဝ်းဢမ်ႇမုၼ်ႇၸိူဝ်းၼၼ်ႉဢဝ်ငိုၼ်းႁဵင်တလၢၼ်ႇတၢၼ်ႇဢွၵ်ႇႁႂ်ႈလႆႈၸၢင်ႈငႃးဢဝ်လေႃႉရထႃးဢိၵ်ႇတင်းႁူဝ်ႁၢၼ်ၵူၼ်းသိုၵ်းၶီႇမႃႉၵႃႈတီႈမိူင်းမေႇသေႃးပေႃးတႃႇမိ၊
၇ မိူင်းသုရိမႃႇၶႃႇ၊မိူင်းၸေႃႇၽၸိူဝ်းၼၼ်ႉလႄႈ၊ၸၢင်ႈငႃးဢဝ်လေႃႉရထႃးသၢမ်မိုၼ်ႇပၢႆသွင်ႁဵင်ဢိၵ်ႇတင်းၶုၼ်လူင်မႃႇၶႃႇတင်းၵူၼ်းမၼ်းတင်းလၢႆသေယဝ်ႉၶဝ်ၼၼ်ႉဢွၼ်ၵၼ်မႃးလႄႈၶျႃးတပ်ႉၶဝ်ၵႃႈတီႈၽၢႆႇၼႃႈဝဵင်းမေႇတၽဢေႃႈ။ၵူၼ်းမဵဝ်းဢမ်ႇမုၼ်ႇတင်းလၢႆၵေႃႈၸူႉၵၼ်တုမ်ၵၼ်လႄႈၶီႇသိုၵ်းဢွၵ်ႇၵူႈဝၢၼ်ႈၵူႈဝဵင်းဢေႃႈ။
၈ မိူဝ်ႈဢၼ်တႃႇဝိတ်ႉငိၼ်းလွင်ႈၼၼ်ႉၸိုင်မၼ်းပွႆႇၸႂ်ႉယႂႃႇၽတင်းမုၵ်ႉၸိူဝ်းႁူဝ်ႁၢၼ်ၵူၼ်းသိုၵ်ဢၼ်ႁႅင်းယႂ်ႇၵႃႈမီးၸိူဝ်းၼၼ်ႉၵႂႃႇဢေႃႈ။
၉ ၵူၼ်းမဵဝ်းဢမ်ႇမုၼ်ႇၸိူဝ်းၼၼ်ႉဢွၼ်ၵၼ်ဢွၵ်ႇလႄႈယၼ်ႇတပ်ႉၶၢင်းတပ်ႉၵႃႈတီႈၽၢႆႇၼႃႈၽၵ်းတူဝဵင်းဢေႃႈ။ၶုၼ်လူင်ဢၼ်ၸွႆႈသိုၵ်းထႅမ်သိုၵ်းၸိူဝ်းၼၼ်ႉဢွၼ်ၵၼ်ယူႇၵႃႈတီႈပၢင်ႇပဵင်းႁင်းၽႂ်ႁင်းမၼ်းဢေႃႈ။
၁၀ ယႂႃႇၽႁၼ်လွင်ႈဢၼ်ၼႃႈသိုၵ်းၶဝ်မီးသွင်ၼႃႈၵႃႈတီႈၽၢႆႇၼႃႈဢိၵ်ႇတင်းၵႃႈတီႈၽၢႆႇလင်ၼၼ်ႉသေယဝ်ႉလိူၵ်ႈၵဵပ်းဢဝ်ၵူၼ်းၵႃႈဢၼ်ၵႅၼ်ႇၶႅင်ၶၼ်ၽႂ်းၵႃႈၼႂ်းမဵဝ်းဢိသရေႇလတင်းလၢႆၼၼ်ႉသေလႄႈယၼ်ႇတပ်ႉၶၢင်းတပ်ႉယူႇၽၢႆႇၼိုင်ႈတင်းၵူၼ်းသုရိၸိူဝ်းၼၼ်ႉဢေႃႈ။
၁၁ မၼ်းဢဝ်ၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇၼၼ်ႉဢၢပ်ႈပၼ်ၵႃႈၼႂ်းမိုဝ်းၼွင်ႉၸၢႆးဢၽိသေႇၼၼ်ႉသေယဝ်ႉၶဝ်ယၼ်ႇတပ်ႉၶၢင်းတပ်ႉၶဝ်ယူႇၽၢႆႇၼိုင်ႈတင်းၵူၼ်းဢမ်ႇမုၼ်ႇၸိူဝ်းၼၼ်ႉလႄႈလၢတ်ႈဝႃႈ၊-ပေႃးၵူၼ်းသုရိၸိူဝ်းၼၼ်ႉပႄႉၼႅင်ႇၵဝ်ၸိုင်မႂ်းတၵ်းလႆႈၸွႆႈထႅမ်ၵဝ်ဢေႃႈ။
၁၂ ပေႃးၵူၼ်းမဵဝ်းဢမ်ႇမုၼ်ႇၸိူဝ်းၼၼ်ႉပႄႉၼႅင်ႇမႂ်းၸိုင်ၵဝ်တၵ်းၸွႆႈထႅမ်မႂ်းဢေႃႈ။
၁၃ ဢွၼ်ၵၼ်မီးၸႂ်ဢၼ်ႁတ်းလႄႈဢဝ်ႁႅင်းဢွၵ်ႇပုၼ်ႈၵူၼ်းမဵဝ်းႁဝ်းဢိၵ်ႇတင်းပုၼ်ႈဝၢၼ်ႈဝဵင်းၽြႃးပဵၼ်ၸဝ်ႈႁဝ်းလႄႈတိုၵ်းတႃႉႁဝ်း။ႁႂ်ႈထႃႇဝရႃႉၽြႃးၸီႇယၢင်ႇႁဵတ်းၸွမ်းၵႃႈၼင်ႇဢၼ်လီသိုဝ်ႈၼႃႈတႂ်ႈတႃႇမၼ်းၸဝ်ႈၼၼ်ႉသေၵမ်းလူၺ်ႈ၊ဝႃႈၼင်ႇၼႆသေယဝ်ႉ၊
၁၄ မိူဝ်ႈဢၼ်ယႂႃႇၽဢိၵ်ႇတင်းၵူၼ်းတင်းလၢႆဢၼ်ပႃးတီႈမၼ်းၸိူဝ်းၼၼ်ႉဢွၼ်ၵၼ်သုတ်ႉၸပ်ႉသုတ်ႉၸူးတီႈၵူၼ်းသုရိၸိူဝ်းၼၼ်ႉႁႂ်ႈလႆႈတိုၵ်းတေႃးၼၼ်ႉၸိုင်ၵူၼ်းသုရိၸိူဝ်းၼၼ်ႉဢွၼ်ၵၼ်ဢွၵ်ႇပၢႆႈၵႃႈတီႈၽၢႆႇၼႃႈမၼ်းဢေႃႈ။
၁၅ မိူဝ်ႈဢၼ်ၵူၼ်းဢမ်ႇမုၼ်ႇတင်းလၢႆႁၼ်ၵူၼ်းသုရိၸိူဝ်းၼၼ်ႉဢွၵ်ႇပၢႆႈၼၼ်ႉၸိုင်ၶဝ်ၵေႃႈဢွၼ်ၵၼ်ဢွၵ်ႇပၢႆႈသေၵႃႈတီႈၽၢႆႇၼႃႈၼွင်ႉၸၢႆးမၼ်းဢၽိသေႇလႄႈၶဝ်ႈၵႃႈၼႂ်းဝဵင်းဢေႃႈ။ယႂႃႇၽၵေႃႈၶိုၼ်းမိူဝ်းၵႂႃႇၵႃႈတီႈဝဵင်းယေႇရုသလႅမ်ႇသေဢေႃႈ။
၁၆ ၵူၼ်းသုရိၸိူဝ်းၼၼ်ႉႁူႉႁၼ်လွင်ႈဢၼ်ၶဝ်တူၵ်းသုမ်းၵႃႈတီႈၽၢႆႇၼႃႈၵူၼ်းမဵဝ်းဢိသရေႇလၼၼ်ႉသေယဝ်ႉပွႆႇၸႂ်ႉၽူႈတၢင်တူဝ်ၵႂႃႇလႄႈႁွင်ႉဢဝ်ၵူၼ်းသုရိဢၼ်ယူႇၵႃႈတီႈၽၢႆႇပုၼ်ႉၼမ်ႉမေႈၼၼ်ႉၸိူဝ်းၼၼ်ႉသေယဝ်ႉၶုၼ်ၸွမ်ႈသိုၵ်းသေႃႇပၵ်ႉဢၼ်ႁႃႇတရေႇၶၢၼ်းဝႆႉၼၼ်ႉၵေႃႈလႆႈဢုပ်ႉၵႃႈၼိူဝ်ၶဝ်ဢေႃႈ။
၁၇ တႃႇဝိတ်ႉငိၼ်းလွင်ႈၼၼ်ႉသေယဝ်ႉႁႂ်ႈၵူၼ်းမဵဝ်းဢိသရေႇလၵႃႈမီးၸူႉၵၼ်တုမ်ၵၼ်လႄႈၶၢမ်ႈၼမ်ႉႁွင်ႊယေႃႇတၼ်သေလႄႈႁွတ်ႈထိုင်ၵႃႈတီႈတပ်ႉရၢၼ်ႇသူႇလႄႈယၼ်ႇတပ်ႉၶၢင်းတပ်ႉယူႇၽၢႆႇၼိုင်ႈတင်းၶဝ်ဢေႃႈ။မိူဝ်ႈဢၼ်တႃႇဝိတ်ႉယၼ်ႇတပ်ႉၶၢင်းတပ်ႉၸိူဝ်ႉၼင်ႇၼၼ်ယူႇၽၢႆႇၼိုင်ႈတင်းၵူၼ်းသုရိၸိူဝ်းၼၼ်ႉလႄႈၶဝ်ႈတိုၵ်းၵၼ်တင်းမၼ်းၼၼ်ႉၸိုင်ၵူၼ်းသုရိၸိူဝ်းၼၼ်ႉဢွၼ်ၵၼ်ဢွၵ်ႇပၢႆႈၵႃႈတီႈၽၢႆႇၼႃႈၵူၼ်းမဵဝ်းဢိသရေႇလတင်းလၢႆဢေႃႈ။
၁၈ တႃႇဝိတ်ႉၵေႃႈဢဝ်ႁူဝ်ႁၢၼ်ၵူၼ်းသိုၵ်းၶီႇလေႃႉရထႃးသုရိၸဵတ်းႁဵင်ဢိၵ်ႇတင်းႁူဝ်ႁၢၼ်ၵူၼ်းသိုၵ်းဢၼ်ပႆတိၼ်သီႇမိုၼ်ႇတၢႆလႄႈၶုၼ်ၸွမ်သိုၵ်းသေႃႇပၵ်ႉၼၼ်ႉၵေႃႈဢဝ်တၢႆဢေႃႈ။
၁၉ ၶႃႈၵူၼ်းၶုၼ်ႁႃႇတရေႇၸႃႇၸိူဝ်းၼၼ်ႉႁူႉႁၼ်လွင်ႈဢၼ်ၶဝ်တူၵ်းသုမ်းၵႃႈတီႈၽၢႆႇၼႃႈမဵဝ်းဢိသရေႇလၼၼ်ႉသေယဝ်ႉဢွၼ်ၵၼ်ႁဵတ်းမိၵ်ႉသႁႃႇယႃႉလူၺ်ႈၵၼ်တင်းတႃႇဝိတ်ႉလႄႈၶၢမ်ႇႁဵတ်းၶႃႈဢေႃႈ။လိုၼ်းၼၼ်ႉၵူၼ်းသုရိၸိူဝ်းၼၼ်ႉဢမ်ႇၸွႆႈသိုၵ်းထႅမ်သိုၵ်းတီႈၵူၼ်းဢမ်ႇမုၼ်ႇ။