Chapter
၂၃
လေႇဝိ
၁ မိူဝ်ႈဢၼ်တႃႇဝိတ်ႉဢသၢၵ်ႈယႂ်ႇလႄႈႁွတ်ႈထိုင်ၶိင်ႇဢၼ်ၸူဝ်ႈထူၼ်ႈပၢၼ်ထူၼ်ႈယဝ်ႉၼၼ်ႉၸိုင်
၂ မၼ်းၶၢၼ်းလုၵ်ႈၸၢႆးမၼ်းသေႃးလမုၼ်ႇဝႆႉၵႃႈၼႂ်းဢရႃႇၶုၼ်ႁေႃၶမ်းဢိသရေႇလလႄႈ၊ႁႂ်ႈၶုၼ်ဢိသရေႇလတင်းသဵင်ႈတင်းလူင်ဢိၵ်ႇတင်းယိတ်ႉပရေႃးႁိၵ်ႈတင်းၵူၼ်းမဵဝ်းလေႇဝိတင်းလၢႆၸူႉၵၼ်တုမ်ၵၼ်ဢေႃႈ။
၃ ၼႂ်းၵူၼ်းမဵဝ်းလေႇဝိတင်းလၢႆၼၼ်ႉၵူၼ်းၸၢႆးဢၼ်ၸႃႉၸဵမ်ဢသၢၵ်ႈလႆႈသၢမ်သိပ်းလႄႈဢသၢၵ်ႈလိူဝ်သၢမ်သိပ်းၵႂႃႇဢၼ်ၶၢမ်ႇတၢင်းဢၼ်ၼပ်ႉဢၢၼ်ႇပဵၼ်ၵေႃႉပဵၼ်ၵေႃႉလႄႈၶဝ်ႈၼႂ်းၸရၢင်းၼၼ်ႉပွင်းၵၼ်ၸမ်းမီးသၢမ်မိုၼ်ႇပႅတ်ႇႁဵင်ဢေႃႈ။ၼႂ်းၶဝ်ၸိူဝ်းၼၼ်ႉသွင်မိုၼ်ႇပၢႆသီႇႁဵင်လႆႈဢွၼ်ၵၼ်ၵိုဝ်ႈႁၢပ်ႇဢမူႉႁိူၼ်းထႃႇဝရႃႉၽြႃးဢေႃႈ။
၄ ႁူၵ်းႁဵင်လႆႈဢွၼ်ၵၼ်ႁဵတ်းၵူၼ်းဢၼ်မီးဢရႃႇဢိၵ်ႇတင်းၵူၼ်းလူင်ဢၼ်ၸီႇယၢင်ႇတြႃးဢေႃႈ။
၅ သီႇႁဵင်လႆႈဢွၼ်ၵၼ်ပႂ်ႉထိင်းၽၵ်းတူဢေႃႈ။သီႇႁဵင်လႆႈဢွၼ်ၵၼ်ဢဝ်တူႇရီႉယႃႇဢၼ်ႁဵတ်းပုၼ်ႈဢၼ်တၵ်းယွင်ႈယေႃးၸိူဝ်းၼၼ်ႉယွင်ႈယေႃးမူၼ်ၽုင်းထႃႇဝရႃႉၽြႃးဢေႃႈ။
၆ တႃႇဝိတ်ႉၸွမ်းလူၺ်ႈၵူၼ်းမဵဝ်းလေႇဝိဢၼ်ဝႃႈၵေႇရသုၼ်ႇ၊ၵေႃႇႁတ်ႉ၊မေႇရႃႇရိမဵဝ်းႁင်းၽႂ်ႁင်းမၼ်းၼၼ်ႉသေလႄႈၽႄဝႆႉႁႂ်ႈပဵၼ်မုၵ်ႉပဵၼ်ၸိူဝ်းႁင်းၽႂ်ႁင်းမၼ်းဢေႃႈ။
ၵေႇရသုၼ်ႇ
၇ ၵူၼ်းမဵဝ်းၵေႇရသုၼ်ႇၸမ်းပဵၼ်လႃႇတၼ်ႇတင်းသိမိဢေႃႈ။လုၵ်ႈၸၢႆးလႃႇတၼ်ႇၸမ်းယေႇႁေႇလပဵၼ်ၵေႃႉယႂ်ႇ၊
၈ ၼွင်ႉၸၢႆးမၼ်းၸေႇသမ်ႇတင်းယုဝ်းဢေႇလပွင်းၵၼ်မီးသၢမ်ၵေႃႉဢေႃႈ။
၉ လုၵ်ႈၸၢႆးသိမိၸမ်းပဵၼ်သေႇလေႃႇမိတ်ႉ၊ႁႃႇၸေႇလတင်းႁႃႇရၼ်ႇပွင်းၵၼ်မီးသၢမ်ၵေႃႉဢေႃႈ။
၁၀ ၶဝ်းၸိူဝ်းၼႆႉပဵၼ်တူၼ်ႈပဵၼ်ငဝ်ႈမဵဝ်းၸိူဝ်ႉၶိူဝ်းလႃႇတၼ်ႇဢေႃႈ။လုၵ်ႈၸၢႆးသိမိၸမ်းပဵၼ်ယႃႇႁတ်ႉ၊ၸိၼ၊ယုသတင်းပေႇရိပွင်းၵၼ်မီးသီႇၵေႃႉဢေႃႈ။
၁၁ ယႃႇႁတ်ႉၸမ်းပဵၼ်ၵေႃႉယႂ်ႇဢေႃႈ။ၸိၼၸမ်းလႆႈဢရႃႇတုတိယဢေႃႈ။တီႈယုသတင်းပေႇရိၸမ်းဢမ်ႇမီးလုၵ်ႈၸၢႆးၼမ်ၼႃႇ။ပိူဝ်ႈဢၼ်ပဵၼ်ၼင်ႇၼႆလႄႈၸွမ်းလူၺ်ႈမဵဝ်းၸိူဝ်ႉၶိူဝ်းသွင်ၶႃၼၼ်ႉပွင်းၵၼ်သေလႄႈပဵၼ်ၸရၢင်းဢၼ်လဵဝ်ၵူၺ်းဢေႃႈ။
ၵေႃႇႁတ်ႉ
၁၂ လုၵ်ႈၸၢႆးၵေႃႇႁတ်ႉၸမ်းပဵၼ်ဢႃႇမရမ်ႇ၊ဢိၸႁႃႇ၊ႁေႇပုၼ်ႇတင်းဢေႃႇၸေႇလပွင်းၵၼ်မီးသီႇၵေႃႉဢေႃႈ။
၁၃ လုၵ်ႈၸၢႆးဢႃႇမရမ်ႇၸမ်းပဵၼ်ဢႃႇရုၼ်ႇတင်းမုဝ်းသေႇဢေႃႈ။ဢႃႇရုၼ်ႇဢိၵ်ႇတင်းၸူဝ်ႈလုၵ်ႈပၢၼ်လၢၼ်ၼၼ်ႉလႆႈၶၢမ်ႇတၢင်းဢၼ်ၽေဢွၵ်ႇယၢၼ်ၵၼ်တင်းပိူၼ်ႈတၢင်ႇၵေႃႉလွင်ႈၼင်ႇႁိုဝ်တၵ်းလႆႈႁႂ်ႈၶိူင်ႈပိူင်ဢၼ်မူတ်းၸၢင်ႇၼႃႇလူင်လၢင်ၸိူဝ်းၼၼ်ႉမူတ်းၸၢင်ႇႁႂ်ႈလႆႈႁဵတ်းဢမူႉတၢင်းဢၼ်ဢဝ်ၼၢမ်ႇသႃႇတုတ်ႇၽႆးတၢင်းဢၼ်ၵိုတ်ႈႁၢပ်ႇဢမူႉၸဝ်ႈတၢင်းဢၼ်ဢဝ်ၼႃႇမႃႉၸိုဝ်သဵင်ၸဝ်ႈဢွၵ်ႇသူပ်းဝႃႈလႄႈပၼ်တၢင်းလီသေႇသေႇၼၼ်ႉဢေႃႈ။
၁၄ လုၵ်ႈၸၢႆးမုဝ်းသေႇၵူၼ်းၽြႃးပဵၼ်ၸဝ်ႈၸမ်းလႆႈသႂ်ႇပႃးၵႃႈၼႂ်းၸရၢင်းၵူၼ်းမဵဝ်းလေႇဝိဢေႃႈ။
၁၅ လုၵ်ႈၸၢႆးမုဝ်းသေႇၸမ်းပဵၼ်ၵေႇရသုၼ်ႇတင်းဢေႇလျေႇၸႃႇဢေႃႈ။ၼႂ်းလုၵ်ႈၸၢႆးၵေႇရသုၼ်ႇၸိူဝ်းၼၼ်ႉၸမ်းသေႇပုၺ်ႇလပဵၼ်ၵေႃႉယႂ်ႇဢေႃႈ။
၁၆ လုၵ်ႈၸၢႆးဢေႇလျေႇၸမ်းပဵၼ်ရေႇႁၽိၵေႃႉယႂ်ႇဢေႃႈ။
၁၇ လိူဝ်သလေုၵ်ႈၸၢႆးၼၼ်ႉဢေႇလျေႇၸႃႇဢမ်ႇမီးလုၵ်ႈၸၢႆး။ရေႇႁၽိၸမ်းမီးလုၵ်ႈၸၢႆးၼမ်ၼႃႇဢေႃႈ။
၁၈ လုၵ်ႈၸၢႆးဢိသႁႃႇၸမ်းသေႇလေႃႇမိတ်ႉပဵၼ်ၵေႃႉယႂ်ႇဢေႃႈ။
၁၉ လုၵ်ႈၸၢႆးႁေႇပုၼ်ႇၸမ်းလုၵ်ႈၸၢႆးၵေႃႉယႂ်ႇပဵၼ်ယေႇရိ၊လုၵ်ႈၸၢႆးတုတိယပဵၼ်ဢႃႇမရိ၊လုၵ်ႈၸၢႆးၵေႃႉတတိယပဵၼ်ယႁႃႇၸေႇလ၊လုၵ်ႈၸၢႆးၸတုၵ်ႉထပဵၼ်ယေႇၵမမ်ႇဢေႃႈ။
၂၀ လုၵ်ႈၸၢႆးဢေႃႇၸေႇလၸမ်းလုၵ်ႈၸၢႆးၵေႃႉယႂ်ႇပဵၼ်မိၵ်ႉၶႃႇ၊လုၵ်ႈၸၢႆးတုတိယပဵၼ်ယေႇသိဢေႃႈ။
မေႇရႃႇရိ
၂၁ လုၵ်ႈၸၢႆးမေႇရႃႇရိၸမ်းပဵၼ်မႁႃႇလိတင်းမုသိဢေႃႈ။လုၵ်ႈၸၢႆးမႁႃႇလိၸမ်းပဵၼ်ဢေႇလျႃႇၸႃႇတင်းၵိသဢေႃႈ။
၂၂ ဢေႇလျႃႇၸႃႇၼၼ်ႉယင်းဢမ်ႇမီးလုၵ်ႈၸၢႆး၊မီးလုၵ်ႈယိင်းလွၼ်ႉလွၼ်ႉလႄႈတၢႆသေဢေႃႈ။ၶဝ်ၸိူဝ်းၼၼ်ႉၸိုင်ပီႈၼွင်ႉၶဝ်ဢၼ်ဝႃႈလုၵ်ႈၸၢႆးၵိသတင်းလၢႆႁူမ်ႈပွင်းပဵၼ်ၵူပ်ႉပဵၼ်ၵူႈၵၼ်တင်းၶဝ်ဢေႃႈ။
၂၃ လုၵ်ႈၸၢႆးမုသိၸမ်းပဵၼ်မႁႃႇလိ၊ဢေႇတႃႇ၊ယေႇရိမုၼ်ႇပွင်းၵၼ်ပဵၼ်သၢမ်ၵေႃႉဢေႃႈ။
၂၄ ၶဝ်ၸိူဝ်းၼႆႉၸမ်းပဵၼ်ၵူၼ်းမဵဝ်းလေႇဝိၸွမ်းလူၺ်ႈပီႈၼွင်ႉၸိူဝ်ႉၶိူဝ်းပေႃႈၶဝ်ဢၼ်ဝႃႈၶဝ်းၸိူဝ်းဢၼ်ပဵၼ်တူၼ်ႈပဵၼ်ငဝ်ႈပီႈၼွင်ႉၸိူဝ်ႉၶိူဝ်းပေႃႈၶဝ်လႄႈၶၢမ်ႇတၢင်းဢၼ်ၼပ်ႉဢၢၼ်ႇၶဝ်ႈပႃးၼႂ်းၸရၢင်းပဵၼ်ၵေႃႉပဵၼ်ၵေႃႉဢၼ်ၸႃႉၸဵမ်ဢသၢၵ်ႈလႆႈသၢဝ်းၼိုင်ႈလႄႈဢသၢၵ်ႈလိူဝ်သၢဝ်းၵႂႃႇဢၼ်ၵိုတ်ႈႁၢပ်ႇဢမူႉႁိူၼ်းထႃႇဝရႃႉၽြႃးၼၼ်ႉဢေႃႈ။
၂၅ လွင်ႈမၼ်းၸမ်းတႃႇဝိတ်ႉမီးဢမိင်ႉလႄႈဝႃႈ၊-ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလပၼ်ဢၶႂၢင်ႉဢၼ်တဵတ်ႇလီၼိမ်လီတီႈမဵဝ်းၵူၼ်းမၼ်းၸဝ်ႈလႄႈတၵ်းယူႇၵႃႈတီႈဝဵင်းယေႇရုသလႅမ်ႇယူႇတႃႇသေႇၼၼ်ႉလႄႈ၊
၂၆ ၵူၼ်းမဵဝ်းလေႇဝိတင်းလၢႆၵမ်းလိုၼ်းဢမ်ႇလႆႈႁၢပ်ႇသုမ်ႉထဵင်ၸဝ်ႈဢိၵ်ႇတင်းၶိူင်ႈပိူင်ဢၼ်ၵိုတ်ႈႁၢပ်ႇဢမူႉသုမ်ႉထဵင်ၸဝ်ႈၸိူဝ်းၼၼ်ႉယဝ်ႉ၊ဝႃႈၼင်ႇၼႆဢေႃႈ။
၂၇ ၸွမ်းၵႃႈၼင်ႇဢမိင်ႉတႃႇဝိတ်ႉဢၼ်ပဵၼ်လိုၼ်းသုတ်းၼၼ်ႉလႄႈၵူၼ်းမဵဝ်းလေႇဝိဢၼ်ၸႃႉၸဵမ်ဢသၢၵ်ႈလႆႈသၢဝ်းၼိုင်ႈလႄႈဢသၢၵ်ႈလိူဝ်သၢဝ်းၵႂႃႇၸိူဝ်းၼၼ်ႉလႆႈၶၢမ်ႇတၢင်းဢၼ်ၼပ်ႉဢၢၼ်ႇဢဝ်သႂ်ႇၼႂ်းၸရၢင်းဢေႃႈ။
၂၈ လွင်ႈမၼ်းၸမ်းၵူၼ်းမဵဝ်းလေႇဝိၸိူဝ်းၼၼ်ႉၸွမ်းၵႃႈၼင်ႇဢၼ်ၶဝ်ပဵၼ်ၵေႃႉဢၼ်တၵ်းလႆႈၸွႆႈထႅမ်မႃႉၸႃႉၵူၼ်းမဵဝ်းဢႃႇရုၼ်ႇတင်းလၢႆလႄႈတၵ်းလႆႈဢွၼ်ၵၼ်ၵိုတ်ႈႁၢပ်ႇဢမူႉႁိူၼ်းထႃႇဝရႃႉၽြႃးၵႃႈတီႈတမ်ႇတိူင်းလႂ်၊လုၵ်းလႂ်၊ႁႂ်ႈၶိူင်ႈပိူင်ဢၼ်မူတ်းၸၢင်ႇၵႃႈမီးလႆႈမူတ်းသႂ်
၂၉ ပုၼ်ႈတၢင်းႁဵတ်းတင်းဢၼ်ၵိုတ်ႈႁၢပ်ႇဢမူႉႁိူၼ်းၽြႃးပဵၼ်ၸဝ်ႈယူႇ၊ႁဵတ်းၶဝ်ႈမုၼ်းၵႃႈတီႈၽၢႆႇၼႃႈၸဝ်ႈ၊ၽွင်ၶဝ်ႈမုၼ်းၶိူင်ႈပုၵ်ႉၸေႃႇၽေႃးၸဵၼ်ႇ၊ၶႅပ်းၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈၶဝ်ႈမုၼ်းဢၼ်ဢဝ်တင်းၶႅပ်းလဵၵ်းၽဝ်ႁဵတ်း၊ၶဝ်ႈမုၼ်းဢၼ်ဢဝ်တင်းၼမ်ႉမၼ်းၶူဝ်ႈႁဵတ်း၊လွင်ႈတၢင်းဢၼ်တူင်ဢၼ်တႅၵ်ႈဢၼ်ၸင်ဢၼ်ႁိဝ်ႈဢၼ်ၼပ်ႉဢၼ်ဢၢၼ်ႇၵူႈၸိူဝ်ႉၵူႈမဵဝ်းယူႇ။
၃၀ ၸုၵ်းယူႇၵူႈၼႂ်ဢိၵ်ႇတင်းၵူႈႁူဝ်ၶမ်ႈႁႂ်ႈလႆႈႁပ်ႉတုင်းဢဝ်လႄႈဝႃႈၵျေးၸူးထႃႇဝရႃႉၽြႃးယႂ်ႇၼႃႇတီႈၶႃႈဢေႃႈ၊ဝႃႈၼင်ႇၼႆလႄႈယွင်ႈယေႃး၃၁ မူၼ်ၵုင်ႇမၼ်းၸဝ်ႈယူႇ၊
၃၁ ပုၵ်ႉၸေႃႇမဵဝ်းယိၸ်ႉတုတ်ႇၽႆးၵႃႈမီးတီႈထႃႇဝရႃႉၽြႃးၼႂ်းဝၼ်းၵမ်သိၼ်၊ဝၼ်းလိုၼ်းမႂ်း၊ဝၼ်းပွႆးထမ်ႇမႃႉမႅၼ်ႈၵႃႈၼင်ႇဢၼ်မီးတၢင်းဢၼ်ၼပ်ႉဢၼ်ဢၢၼ်ႇၸွမ်းၵႃႈၼင်ႇပိင်းၺၢပ်ႈတြႃးၸဝ်ႈၼၼ်ႉယူႇတႃႇသေႇၵႃႈတီႈၽၢႆႇၼႃႈထႃႇဝရႃႉၽြႃးယူႇ၊
၃၂ ပႂ်ႉသုမ်ႉထဵင်တီႈၸူႉတီႈတုမ်ပရိၵ်ႈသၢတ်ႈထႃႇၼႃႉတီႈမူတ်းၸၢင်ႇၸဝ်ႈဢိၵ်ႇတင်းၵူၼ်းမဵဝ်းဢႃႇရုၼ်ႇဢၼ်ပဵၼ်ပီႈၼွင်ႉၶဝ်ၼၼ်ႉပုၼ်ႈဢၼ်တၵ်းၵိုတ်ႈႁၢပ်ႇဢမူႉၸဝ်ႈၵႃႈတီႈႁိူၼ်းထႃႇဝရႃႉၽြႃးၼၼ်ႉယူႇဢေႃႈ။