Chapter
၂၂
မႄးႁႅၼ်းပုၼ်ႈပိၵ်ႉမၢၼ်ႇၽြႃး
၁ ပိူဝ်ႈဢၼ်ပဵၼ်ၼင်ႇၼႆလႄႈတႃႇဝိတ်ႉလၢတ်ႈလႄႈဝႃႈ၊-ၵႃႈတီႈၼႆႉၸမ်းပဵၼ်ႁိူၼ်းထႃႇဝရႃႉၽြႃးၽြႃးပဵၼ်ၸဝ်ႈဢေႃႈ။ယိတ်ႉပလၢင်ႇၼႆႉပဵၼ်ယိတ်ႉပလၢင်ႇတီႈဢၼ်တုတ်ႇၽႆးပုၼ်ႈမဵဝ်းဢိသရေႇလဢေႃႈ၊ဝႃႈၼင်ႇၼႆသေလႄႈ၊
၂ တႃႇဝိတ်ႉမီးဢမိင်ႉႁႂ်ႈၵူၼ်းတၢင်ႇၸိူဝ်ႉတၢင်ႇမဵဝ်းဢၼ်မီးၵႃႈၼႂ်းမိူင်းဢိသရေႇလၸိူဝ်းၼၼ်ႉၸူႉၵၼ်တုမ်ၵၼ်သေလႄႈၸႂ်ႉသွႆၶဝ်ၸိူဝ်းဢၼ်ၸၢင်ႊတႄႇတိူၵ်ႈႁဵတ်းတိူၵ်ႈၼၼ်ႉထၢၵ်ႇမၢၵ်ႇႁိၼ်ပုၼ်ႈဢၼ်တၵ်းတႄႇႁဵတ်းႁိူၼ်းၽြႃးပဵၼ်ၸဝ်ႈဢေႃႈ။
၃ မၼ်းပွင်ႁဵတ်းပွင်ႁႅၼ်းလဵၵ်းၼမ်ၼႃႇပုၼ်ႈလဵၵ်းလႅမ်ဢၼ်တၵ်းပဵၼ်ပုၼ်ႈဢၼ်တၵ်းႁဵတ်းမႂ်ႊၽၵ်းတူဢိၵ်ႇတင်းပုၼ်ႈဢၼ်တၵ်းသိုပ်ႇမႆႉၸိင်တင်းလၢႆတွင်းလိူင်ၼမ်ၼႃႇထၼ်ႈပေႃးဢမ်ႇမၢတ်ႈၸၢင်ႊၸင်ႁိဝ်ႈလႆႈ၊မႆႉဢႃႇရိတ်ႉဢၼ်ဢမ်ႇၼပ်ႉဢမ်ႇဢၢၼ်ႇလႆႈၸိူဝ်းၼၼ်ႉဢေႃႈ။
၄ ၵူၼ်းဝဵင်းၸိတုၼ်ႇတင်းၵူၼ်းဝဵင်းတုရုၸိူဝ်းၼၼ်ႉဢွၼ်ၵၼ်ဢဝ်မႆႉဢႃႇရိတ်ႉၼမ်ၼႃႇမႃးတီႈတႃႇဝိတ်ႉဢေႃႈ။တႃႇဝိတ်ႉၵေႃႈမီးတၢင်းၵျၢမ်ႇတၢင်းပွင်လႄႈဝႃႈ၊-လုၵ်ႈၸၢႆးၵဝ်သေႃးလမုၼ်ႇၼၼ်ႉဢသၢၵ်ႈယင်းလဵၵ်ႉယင်းၼုမ်ႇဢေႃႈ။
၅ ႁိူၼ်းဢၼ်လႆႈတႄႇႁဵတ်းပုၼ်ႈထႃႇဝရႃႉၽြႃးၸမ်းတၵ်းလႆႈပဵၼ်ႁိူၼ်းဢၼ်လၢၵ်ႇလၢႆး၊ႁိူၼ်းဢၼ်ႁူင်ႁၢင်းလႄႈမီးမူၼ်သရေႇၸွတ်ႇတူဝ်ႈၵူႈသိုင်ႇၵူႈမိူင်းဢေႃႈ။ပိူဝ်ႈၼႆလႄႈၵဝ်တၵ်းပွင်ႁဵတ်းပွင်ႁႅၼ်းပုၼ်ႈႁိူၼ်းၸဝ်ႈဝႆႉဢေႃႈ၊ဝႃႈၼင်ႇၼႆဢေႃႈ။ၸူဝ်ႈဢၼ်မၼ်းဢမ်ႇပႆႇႁွတ်ႈဢၼိၵ်ႈၸႃႉၼၼ်ႉၸိုင်တႃႇဝိတ်ႉၼၼ်ႉပွင်ႁဵတ်းပွင်ႁႅၼ်းဝႆႉၼမ်ၼႃႇဢေႃႈ။
၆ မိူဝ်ႈၼၼ်ႉမၼ်းႁွင်ႉဢဝ်လုၵ်ႈၸၢႆးမၼ်းသေႃးလမုၼ်ႇသေလႄႈသင်ႇလၢတ်ႈလွင်ႈဢၼ်မၼ်းတၵ်းလႆႈတႄႇႁဵတ်းႁိူၼ်းပုၼ်ႈထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလၼၼ်ႉဢေႃႈ။
၇ တႃႇဝိတ်ႉလၢတ်ႈတီႈသေႃးလမုၼ်ႇလႄႈဝႃႈ၊-လုၵ်ႈၸၢႆးၵဝ်ဢိူၺ်း။ၵဝ်မီးတၢင်းၵျၢမ်ႇတၢင်းပွင်ဢၼ်တၵ်းတႄႇႁဵတ်းႁိူၼ်းပုၼ်ႈၼႃႇမႃႉၸိုဝ်သဵင်ထႃႇဝရႃႉၽြႃးၽြႃးပဵၼ်ၸဝ်ႈဢေႃႈ၊ဝႃႈၼင်ႇၼႆယဝ်ႉ။
၈ ၵူၺ်းၵႃႈၼုၵ်ႉၵပၢတ်ႈထႃႇဝရႃႉၽြႃးႁွတ်ႈထိုင်တီႈၵဝ်လႄႈဝႃႈၸမ်း၊-မႂ်းၼႆႉလႆႈထွၵ်ႇပႅတ်ႈလိူတ်ႈၵူၼ်းၼမ်ၼႃႇလႄႈလႆႈတိုၵ်းသိုၵ်းတိုၵ်းသိူဝ်ၼမ်ၼႃႇယဝ်ႉ။မႂ်းဢမ်ႇလႆႈတႄႇလႆႈႁဵတ်းႁိူၼ်းပုၼ်ႈၼႃႇမႃႉၸိုဝ်သဵင်ၵဝ်ၵွပ်ႈပိူဝ်ႈဢၼ်မႂ်းလႆႈထွၵ်ႇပႅတ်ႈလိူတ်ႈဢၼ်ၼမ်ၼႃႇၵႃႈၼိူဝ်လိၼ်မိူင်းသိုဝ်ႈၼႃႈတႂ်ႈတႃၵဝ်ၼၼ်ႉဢေႃႈ။
၉ တူၺ်းလူ။မႂ်းတၵ်းလႆႈလုၵ်ႈၸၢႆးဢၼ်တၵ်းပဵၼ်ၵေႃႉဢၼ်ယူႇၼိမ်ၼိမ်လီလီၼၼ်ႉၵေႃႉၼိုင်ႈဢေႃႈ။ၸိုဝ်သဵင်မၼ်းၸမ်းတၵ်းလႆႈပဵၼ်သေႃးလမုၼ်ႇလႄႈၵဝ်တၵ်းပၼ်ဢၶႂၢင်ႉဢၼ်မၼ်းလႆႈယူႇၼိမ်ၼိမ်လီလီၵၢင်းလွတ်ႈတင်းရၢၼ်ႇသူႇမၼ်းၵႃႈဢၼ်လဵပ်ႈႁွပ်ႈမၼ်းၼၼ်ႉဢိၵ်ႇတင်းဢၶႂၢင်ႉဢၼ်မဵဝ်းဢိသရေႇလလႆႈထၢတ်ႇသိုၵ်းယဵၼ်သိုၵ်းလႄႈယူႇၼိမ်ၼိမ်လီလီၼႂ်းၸူဝ်ႈပၢၼ်မၼ်းၼၼ်ႉဢေႃႈ။
၁၀ မၼ်းၼၼ်ႉတၵ်းလႆႈတႄႇႁဵတ်းႁိူၼ်းပုၼ်ႈၼႃႇမႃႉၸိုဝ်သဵင်ၵဝ်ဢေႃႈ။မၼ်းတၵ်းပဵၼ်လုၵ်ႈၸၢႆးၵဝ်လႄႈၵဝ်တၵ်းပဵၼ်ပေႃႈမၼ်းဢေႃႈ။ၵဝ်တၵ်းႁႂ်ႈရႃႇၸႃႉပလၢင်ႇမၼ်းၼၼ်ႉတႄႇယူႇၵႃႈၼိူဝ်ဢိသရေႇလတႃႇသေႇမၼ်ႈၶိူင်ႇဢေႃႈ၊ဝႃႈၼင်ႇၼႆယဝ်ႉ။
၁၁ ပိူဝ်ႈဢၼ်ပဵၼ်ၼင်ႇၼႆလႄႈလုၵ်ႈၸၢႆးၵဝ်ဢိူၺ်း။ႁႂ်ႈထႃႇဝရႃႉၽြႃးမီးယူႇလူၺ်ႈၵၼ်တင်းမႂ်းသေၵမ်းလူၺ်ႈ။ႁႂ်ႈတၢင်းၵျၢမ်ႇတၢင်းပွင်မႂ်းပဵၼ်လႄႈတႄႇႁဵတ်းႁိူၼ်းထႃႇဝရႃႉၽြႃးၽြႃးပဵၼ်ၸဝ်ႈမႂ်းၸွမ်းၵႃႈၼင်ႇမၼ်းၸဝ်ႈမီးဢမိင်ႉဝႆႉၼၼ်ႉလႆႈသေၵမ်းလူၺ်ႈ။
၁၂ ၵူၺ်းၵႃႈႁႂ်ႈထႃႇဝရႃႉၽြႃးပၼ်ၺၢၼ်ႇဢိၵ်ႇတင်းပိင်ႇၺႃႇတီႈမႂ်းမိူဝ်ႈဢၼ်မၼ်းၸဝ်ႈၶၢၼ်းမႂ်းႁႂ်ႈလႆႈပဵၼ်ၽူႈဢွၼ်ႁူဝ်မဵဝ်းဢိသရေႇလၼၼ်ႉႁႂ်ႈမႂ်းထၼ်ႈပေႃးပႂ်ႉၵမ်ပႂ်ႉၸွမ်းတြႃးထႃႇဝရႃႉၽြႃးၽြႃးပဵၼ်ၸဝ်ႈမႂ်းသေၵမ်းလူၺ်ႈ။
၁၃ ပေႃးမႂ်းႁဵတ်းသတိႁႂ်ႈလႆႈပႂ်ႉၵမ်ပႂ်ႉၸွမ်းထုင်းၽိင်ႈတြႃးဢိၵ်ႇတင်းလွင်ႈတၢင်းဢၼ်ၸီႇယၢင်ႇဝႆႉဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈမုဝ်းသေႇလူၺ်ႈလွင်ႈမဵဝ်းဢိသရေႇလၼၼ်ႉၸိုင်တၢင်းၵျၢမ်ႇတၢင်းပွင်မႂ်းတၵ်းလႆႈပဵၼ်ဢေႃႈ။ဢဝ်ႁႅင်းလႄႈမီးတၢင်းဢၼ်ႁတ်းႁၢၼ်တႃႉ။
၁၄ ယႃႇပေၵူဝ်ႁႄ။ယႃႇပေၸႂ်လူႉ။တူၺ်းလူ။ၼႂ်းမိူဝ်ႈဢၼ်ၵဝ်ယင်းၶၢမ်ႇတုၵ်ႉၶႃႉတၢင်းၽၢၼ်ယူႇၼၼ်ႉၵဝ်ပွင်ႁဵတ်းပွင်ႁႅၼ်းၶမ်းသႅၼ်တလၢၼ်ႇတၢၼ်ႇ၊ငိုၼ်းလၢၼ်ႉတလၢၼ်ႇတၢၼ်ႇ၊တွင်းလိူင်ဢိၵ်ႇတင်းလဵၵ်းဢၼ်ၼမ်ၼႃႇထၼ်ႈပေႃးဢမ်ႇမၢတ်ႈဢမ်ႇတွင်းဢၼ်ၸင်ဢၼ်ႁိဝ်ႈလႆႈၼၼ်ႉမီးဝႆႉပုၼ်ႈႁိူၼ်းထႃႇဝရႃႉၽြႃးယဝ်ႉ။မႆႉၸိင်ၼမ်ၼႃႇဢိၵ်ႇတင်းမၢၵ်ႇႁိၼ်ၼမ်ၼႃၵေႃႈၵဝ်မႄးႁဵတ်းမႄးႁႅၼ်းဝႆႉယဝ်ႉ။မႂ်းၵေႃႈတၵ်းလႆႈထၢပ်ႈလႆႈထႅင်ႈဢေႃႈ။
၁၅ ၼွၵ်ႈသေၼၼ်ႉမႂ်းမီးလၢၵ်ႈသမႃးၼမ်ၼႃႇ၊ၵူၼ်းဢၼ်မေႃတႄႇႁဵတ်းတိူၵ်ႈလႂ်၊ၵူၼ်းဢၼ်မေႃထၢၵ်ႇၽၼ်းမၢၵ်ႇႁိၼ်လႂ်ဢိၵ်ႇတင်းသြႃႇဢၼ်ၸၢင်ႊဢၼ်မေႃဢၼ်မီးဢတၢတ်ႈၵူႈၸိူဝ်ႉၵူႈမဵဝ်းၼၼ်ႉယူႇဢေႃႈ။
၁၆ ငိုၼ်းၶမ်း၊တွင်းလိူင်၊လဵၵ်းမီးၼမ်ၼႃႇဢမ်ႇႁူႉၼမ်လႂ်ယဝ်ႉ။လုၵ်ႉလႄႈၶတ်းၸႂ်ႁဵတ်းတႃႉ။ႁႂ်ႈထႃႇဝရႃႉၽြႃးမီးယူႇလူၺ်ႈၵၼ်တင်းမႂ်းသေၵမ်းလူၺ်ႈ၊ဝႃႈၼင်ႇၼႆဢေႃႈ။
၁၇ တႃႇဝိတ်ႉသင်ႇလၢတ်ႈတီႈၶုၼ်ဢိသရေႇလတင်းသဵင်ႈတင်းလူင်ႁႂ်ႈၶဝ်ၽွမ်ႉၵၼ်ၸွႆႈထႅမ်လူၺ်ႈၵၼ်တင်းလုၵ်ႈၸၢႆးၸဝ်ႈသေႃးလမုၼ်ႇလႄႈဝႃႈၸမ်း၊-
၁၈ ထႃႇဝရႃႉၽြႃးၽြႃးပဵၼ်ၸဝ်ႈသူမီးယူႇလူၺ်ႈၵၼ်တင်းသူဢမ်ႇၸႂ်ႈႁိုဝ်။မၼ်းၸဝ်ႈပၼ်ဢၶႂၢင်ႉဢၼ်တဵတ်ႇၼိမ်လီၵႃႈတီႈႁိမ်းႁွမ်းသူၵူႈတီႈၵူႈလႅၼ်ယဝ်ႉဢမ်ႇၸႂ်ႈႁိုဝ်။မၼ်းၸဝ်ႈဢဝ်ၵူၼ်းဝၢၼ်ႈၵူၼ်းမိူင်းဢၢပ်ႈပၼ်ၵႃႈၼႂ်းမိုဝ်းၵဝ်ယဝ်ႉ။မိူင်းတင်းမိူင်းမီးတၢင်းဢၼ်ၶျႃးတူၵ်းတီႈတႅမ်ႇၵႃႈတီႈၽၢႆႇၼႃႈထႃႇဝရႃႉၽြႃးဢိၵ်ႇတင်းၵႃႈတီႈၽၢႆႇၼႃႈၵူၼ်းမၼ်းၸဝ်ႈတင်းလၢႆယဝ်ႉ။
၁၉ ပိူဝ်ႈၼႆလႄႈမိူဝ်ႈလဵဝ်ၼႆႉဢွၼ်ၵၼ်တိုၵ်းယူင်းႁူဝ်ၸႂ်သူႁႂ်ႈလႆႈႁႃဢဝ်ထႃႇဝရႃႉၽြႃးၽြႃးပဵၼ်ၸဝ်ႈသူတႃႉ။ဢွၼ်ၵၼ်လုၵ်ႉလႄႈတႄႇႁဵတ်းထႃႇၼႃႉတီႈမူတ်းၸၢင်ႇထႃႇဝရႃႉၽြႃးၽြႃးပဵၼ်ၸဝ်ႈႁႂ်ႈလႆႈဢဝ်တိူၵ်ႈတႃႇပတိၺိၼ်ႇထႃႇဝရႃႉၽြႃးဢိၵ်ႇတင်းၶိူင်ႈပိူင်ဢၼ်မူတ်းၸၢင်ႇၽြႃးပဵၼ်ၸဝ်ႈသႂၢင်းၶဝ်ႈၵႃႈၼႂ်းႁိူၼ်းဢၼ်တၵ်းလႆႈတႄႇႁဵတ်းပုၼ်ႈၼႃႇမႃႉၸိုဝ်သဵင်ထႃႇဝရႃႉၽြႃးၼၼ်ႉတႃႉ၊ဝႃႈၼင်ႇၼႆဢေႃႈ။