Chapter
၁၇
ၽြႃးပဵၼ်ၸဝ်ႈႁဵတ်းၵတိတေႃႇတႃႇဝိတ်ႉ
၁ မိူဝ်ႈဢၼ်တႃႇဝိတ်ႉလႆႈယူႇၼိမ်ၼိမ်လီလီၵႃႈၼႂ်းႁေႃၸဝ်ႈၼၼ်ႉၸိုင်မၼ်းလၢတ်ႈတီႈပရေႃးၽႅတ်ႈၼႃႇသၼ်ႇလႄႈဝႃႈ၊-တူၺ်းလူ။ၵဝ်ၸိုင်လႆႈယူႇၵႃႈၼႂ်းႁေႃမႆႉဢႃႇရိတ်ႉဢေႃႈ။
၂ တိူၵ်ႈတႃႇပတိၺိၼ်ႇထႃႇဝရႃႉၽြႃးၸမ်းလႆႈမီးတၢင်းဢၼ်ဢဝ်ၽႃႈၵင်ႈမုင်းႁူမ်ႇဝႆႉၵူၺ်းဢေႃႈ၊ဝႃႈၼင်ႇၼႆသေယဝ်ႉ၊ၼႃႇသၼ်ႇၶိုၼ်းလၢတ်ႈတီႈတႃႇဝိတ်ႉလႄႈဝႃႈ၊-ႁဵတ်းၸွမ်းၵႃႈၼင်ႇဢၼ်မီးၼႂ်းႁူဝ်ၸႂ်ၸဝ်ႈႁဝ်းၼၼ်ႉသေၵမ်းတီႈၶႃႈ။ၽြႃးပဵၼ်ၸဝ်ႈမီးယူႇလူၺ်ႈၵၼ်တင်း၃ၸဝ်ႈႁဝ်းတီႈၶႃႈဢေႃႈ၊ဝႃႈၼင်ႇၼႆဢေႃႈ။
၃ ၼႂ်းၶိုၼ်းၼၼ်ႉၼုၵ်ႈၵပၢတ်ႈထႃႇဝရႃႉၽြႃးႁွတ်ႈမႃးတီႈၼႃႇသၼ်ႇလႄႈဝႃႈ၊-ၵႂႃႇလႄႈမွၵ်ႇလၢတ်ႈတီႈၶႃႈၵဝ်တႃႇဝိတ်ႉၼၼ်ႉလႄႈဝႃႈ
၄ ထႃႇဝရႃႉၽြႃးမီးဢမိင်ႉလႄႈဝႃႈၸမ်းမႂ်းဢမ်ႇလႆႈႁဵတ်းႁိူၼ်းပုၼ်ႈဢၼ်ၵဝ်တၵ်းယူႇ။
၅ ၵဝ်ဢမ်ႇယူႇၵႃႈၼႂ်းႁိူၼ်းၸႃႉၸဵမ်မိူဝ်ႈဢၼ်ၵဝ်ၼုၵ်ႈဢဝ်မဵဝ်းဢိသရေႇလဢွၵ်ႇမႃးၼၼ်ႉတေႃႇထိုင်ႁွတ်ႈဝၼ်းမိူဝ်ႈၼႆႉလႄႈလုၵ်ႉသေၵႃႈတီႈသုမ်ႉထဵင်ၸဝ်ႈလင်ၼိုင်ႈၶၢႆႉၸူးၵႃႈတီႈသုမ်ႉထဵင်မူဝ်းၵႃႇလင်ၼိုင်ႈမႃးယဝ်ႉ။
၆ ၵႃႈတီႈဢၼ်ၵဝ်လႄႇလဵပ်ႈလူၺ်ႈၵၼ်တင်းမဵဝ်းဢိသရေႇလတင်းသဵင်ႈတင်းမူတ်းၵူႈတီႈၵူႈလႅၼ်ၼၼ်ႉၵဝ်ယၢမ်ႈထၢမ်တီႈၵူၼ်းလူင်ဢၼ်ၸီႇယၢင်ႇတြႃးမဵဝ်းဢိသရေႇလဢၼ်ၵဝ်ၸႂ်ႉသွႆႁႂ်ႈလႆႈလဵင်ႉလႆႈထိင်းမဵဝ်းၵူၼ်းၵဝ်ၸိူဝ်းၼၼ်ႉသေၵေႃႉသေၵူၼ်းလႄႈဝႃႈ၊-ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းဢမ်ႇႁဵတ်းႁိူၼ်းမႆႉဢႃႇရိတ်ႉပုၼ်ႈၵဝ်၊ဝႃႈၼင်ႇၼႆႁိုဝ်။
၇ မိူဝ်ႈလဵဝ်ၼႆႉၸိုင်မႂ်းလၢတ်ႈတီႈၶႃႈၵဝ်တႃႇဝိတ်ႉၼၼ်ႉလႄႈဝႃႈ၊-ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးမီးဢမိင်ႉလႄႈဝႃႈၸမ်း၊-ၵဝ်ၼုၵ်ႈဢဝ်မႂ်းသေၵႃႈၼႂ်းၶွၵ်ႈသူဝ်းတီႈဢၼ်လဵင်ႉထိင်းသူဝ်းၼၼ်ႉမႃးလႄႈၶၢၼ်းမႂ်းဝႆႉၼႂ်းဢရႃႇၶုၼ်ဢၼ်ဢုပ်ႉပိူင်ႇၵူၼ်းၵဝ်ၵူၼ်းမဵဝ်းဢိသရေႇလတင်းလၢႆၼႆႉယဝ်ႉ။
၈ ၵဝ်ၸွမ်းလူၺ်ႈၵၼ်တင်းမႂ်းၵႂႃႇၵႃႈတီႈၵႃႈဢၼ်မႂ်းၵႂႃႇၼၼ်ႉလႄႈပႄႇၽဵဝ်ႈရၢၼ်ႇသူႇမႂ်းၵႃႈမီးပႅတ်ႈသေၵႃႈတီႈၽၢႆႇၼႃႈမႂ်းသေယဝ်ႉ။ၵဝ်ပၼ်ၼႃႇမႃႉၸိုဝ်သဵင်တီႈမႂ်းမိူၼ်ၸိူဝ်ႉၼင်ႇၼႃႇမႃႉၸိုဝ်သဵင်ၵူၼ်းယႂ်ႇၵူၼ်းလူင်ၼႂ်းၵူၼ်းလိၼ်မိူင်းတင်းလၢႆယဝ်ႉ။
၉ လိုၼ်းသေၼၼ်ႉၵဝ်တၵ်းပၼ်တီႈဢၼ်ၵူၼ်းမဵဝ်းဢိသရေႇလတၵ်းယူႇၼၼ်ႉလႄႈႁႂ်ႈၶဝ်မၼ်ႈၶိူင်ႁႂ်ႈၶဝ်ဢမ်ႇလႆႈၶၢႆႉလႆႈပုတ်ႈၵမ်းလိုၼ်းလႄႈယူႇၵႃႈၼႂ်းတီႈဢၼ်ၶဝ်ယူႇၼၼ်ႉဢေႃႈ။ၵမ်းလိုၼ်းၶဝ်ၸိူဝ်းဢၼ်ဢမ်ႇတြႃးၼၼ်ႉဢမ်ႇလႆႈပႄႇၽဵဝ်ႈၶဝ်ပႅတ်ႈမိူၼ်ၸိူဝ်ႉၼင်ႇမိူဝ်ႈဢွၼ်တၢင်းၼၼ်ႉ။
၁၀ ၶိင်ႇမိူဝ်ႈဢၼ်ၵဝ်ၶၢၼ်းၵူၼ်းလူင်ဢၼ်ၸီႇယၢင်ႇတြႃးၸိူဝ်းၼၼ်ႉဝႆႉၵႃႈၼိူဝ်ၵူၼ်းၵဝ်မဵဝ်းဢိသရေႇလတင်းလၢႆၼၼ်ႉၵဝ်တၵ်းဢဝ်ရၢၼ်ႇသူႇမႂ်းတင်းလၢႆၶျႃးတူၵ်းတီႈတႅမ်ႇဢေႃႈ။လိူဝ်သေၼၼ်ႉဢမ်ႇၵႃးၵဝ်မီးဢမိင်ႉတီႈမႂ်းလႄႈဝႃႈထႃႇဝရႃႉၽြႃးတၵ်းႁႂ်ႈမဵဝ်းၸိူဝ်ႉၶိူဝ်းမႂ်းတႄႇပဵၼ်ဢေႃႈ၊ဝႃႈၼၼင်ႇၼႆယဝ်ႉ။
၁၁ မိူဝ်ႈဢၼ်မိုဝ်ႉဝၼ်းဢသၢၵ်ႈမႂ်းတၵ်းတဵမ်လႄႈမႂ်းတၵ်းၵႂႃႇႁႂ်ႈလႆႈယူႇလူၺ်ႈၵၼ်တင်းပူႇမွၼ်ႇမႂ်းၼၼ်ႉၸိုင်ၵဝ်တၵ်းယုၵ်ႉယွင်ႈၸိူဝ်ႉၶိူဝ်းမႂ်းဢၼ်ပဵၼ်ၵႃႈၼႂ်းလုၵ်ႈၸၢႆးမႂ်းၸိူဝ်းၼၼ်ႉလိုၼ်းမႂ်းလႄႈႁႂ်ႈသိုင်ႇၸိုင်ႈဝၢၼ်ႈမိူင်းမၼ်ႈတႄႇယူႇဢေႃႈ။
၁၂ မၼ်းၼၼ်ႉတၵ်းလႆႈႁဵတ်းႁိူၼ်းပုၼ်ႈၵဝ်လႄႈၵဝ်တၵ်းႁႂ်ႈရႃႇၸႃႉပလၢင်ႇမၼ်းၼၼ်ႉတႄႇယူႇတႃႇသေႇဢေႃႈ။
၁၃ ၵဝ်တၵ်းပဵၼ်ပေႃႈမၼ်းလႄႈမၼ်းၵေႃႈတၵ်းပဵၼ်လုၵ်ႈၸၢႆးၵဝ်ဢေႃႈ။ၵဝ်တၵ်းဢမ်ႇၼုၵ်ႈဢမ်ႇထွၼ်ၵရူႉၼႃႇၵဝ်တီႈမၼ်းၼၼ်ႉမိူၼ်ၸိူဝ်ႉၼင်ႇဢၼ်ၵဝ်ၼုၵ်ႈထွၼ်တီႈၵေႃႉဢၼ်မီးဢွၼ်တၢင်းမႂ်းၼၼ်ႉ။
၁၄ ၵဝ်တၵ်းဢဝ်မၼ်းၼၼ်ႉၶျႃးတီႈယူႇတီႈသဝ်းပၼ်ၵႃႈတီႈႁိူၼ်းၵဝ်ၵႃႈတီႈသိုင်ႇၸိုင်ႈဝၢၼ်ႈမိူင်းၵဝ်တႃႇသေႇဢေႃႈ။ရႃႇၸႃႉပလၢင်ႇမၼ်းၵေႃႈတၵ်းလႆႈတႄႇယူႇတႃႇသေႇဢေႃႈ၊ဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။
၁၅ ၼင်ႇၼၼ်လႄႈၼႃႇသၼ်ႇဢဝ်ပျႃႇတိၵ်ႈၸဝ်ႈၵႃႈမီးၼႆႉဢိၵ်ႇတင်းရူႇပႃႇရူင်ႇတင်းသဵင်ႈတင်းမူတ်းၶိုၼ်းမွၵ်ႇလၢတ်ႈတီႈတႃႇဝိတ်ႉဢေႃႈ။
ၵႂၢမ်းသူးတွင်းတႃႇဝိတ်ႉ
၁၆ မိူဝ်ႈၼၼ်ႉၶုၼ်လူင်တႃႇဝိတ်ႉၶဝ်ႈၵႂႃႇၵႃႈၼႂ်းလႄႈၼင်ႈယူႇၵႃႈတီႈၽၢႆႇၼႃႈထႃႇဝရႃႉၽြႃးသေလႄႈသူးတွင်းလႄႈဝႃႈ၊-ထႃႇဝရႃႉၽြႃးၽြႃးပဵၼ်ၸဝ်ႈတီႈၶႃႈ။ၶႃႈၸဝ်ႈၼႆႉပဵၼ်ၵူၼ်းၸိူဝ်ႉၼင်ႇႁိုဝ်လႄႈၸဝ်ႈႁဝ်းတၵ်းယုၵ်ႉယွင်ႈၶႃႈၸဝ်ႈၼႃႇလူင်လၢင်ထၢၼ်ႇၼႆႉတီႈၶႃႈ။
၁၇ မဵဝ်းၸိူဝ်ႉၶိူဝ်းၶႃႈၸဝ်ႈၼႆႉပဵၼ်မဵဝ်းၸိူဝ်ႉၶိူဝ်းၸိူဝ်ႉၼင်ႇႁိုဝ်တီႈၶႃႈ။ၵူၺ်းၵႃႈၽြႃးပဵၼ်ၸဝ်ႈတီႈၶႃႈ။ၵျေးၸူးၸဝ်ႈၼၼ်ႉပဵၼ်ၵျေးၸူးဢၼ်လဵၵ်ႉဢၼ်ၵေႇသိုဝ်ႈၼႃႈတႂ်ႈတႃၸဝ်ႈႁဝ်းလႄႈၸဝ်ႈႁဝ်းဢဝ်မဵဝ်းၸိူဝ်ႉၶိူဝ်းၶႃႈၸဝ်ႈသဵၼ်ႈၽႃႁွမ်းလူၺ်ႈၵၼ်တင်းၶိင်ႇၵႃႇလႃႉဢၼ်ႁိုင်မိူဝ်းၼႃႈလူင်လၢင်ယူႇသေလႄႈသမ်ႉမီးဢမိင်ႉယဝ်ႉတီႈၶႃႈလူင်ပေႇ။ထႃႇဝရႃႉၽြႃးၽြႃးပဵၼ်ၸဝ်ႈတီႈၶႃႈ။
၁၈ ၸဝ်ႈႁဝ်းမၢတ်ႈၶႃႈၸဝ်ႈၸွမ်းၵႃႈၼင်ႇဢၼ်ပဵၼ်ၵေႃႉဢၼ်မူၼ်ၽုင်းယႂ်ႇၼႃႇၼၼ်ႉတီႈၶႃႈလူင်ပေႇ။တႃႇဝိတ်ႉတၵ်းလႆႈထၢပ်ႈထႅင်ႈလႄႈလဝ်ႈလၢတ်ႈလူၺ်ႈလွင်ႈမူၼ်ၽုင်းဢၼ်မီးတီႈၶႃႈၸဝ်ႈႁဝ်းၼႆႉၼၼ်ႉၸိူဝ်ႉၼင်ႇႁိုဝ်လူးၵွၼ်ႇတီႈၶႃႈ။ၸဝ်ႈႁဝ်းႁူႉၶႃႈၸဝ်ႈႁဝ်းယူႇတီႈၶႃႈဢေႃႈ။
၁၉ ထႃႇဝရႃႉၽြႃးတီႈၶႃႈ။ၵွပ်ႈပိူဝ်ႈဢၼ်ၸဝ်ႈႁဝ်းထွၵ်ႈလူၺ်ႈဢၵျူဝ်းၶႃႈၸဝ်ႈလႄႈၸွမ်းၵႃႈၼင်ႇဢၼ်ဢလူဝ်ႇႁူဝ်ၸႂ်ၸဝ်ႈႁဝ်းမီးၼၼ်ႉလႄႈၸဝ်ႈႁဝ်းႁဵတ်းလွင်ႈတၢင်းၵူႈၸိူဝ်ႉၵူႈပိူင်ဢၼ်ယႂ်ႇၼႃႇလူင်လၢင်ၼႆႉထၢင်ႇသႃးတီႈၶႃႈယဝ်ႉ။
၂၀ ပိူဝ်ႈဢၼ်ပဵၼ်ၼင်ႇၼႆလႄႈထႃႇဝရႃႉၽြႃးတီႈၶႃႈ။ၵႃႈၼင်ႇဢၼ်ႁူၶႃႈၸဝ်ႈႁဝ်းလႆႈငိၼ်းၼၼ်ႉဢမ်ႇမီးၽြႃးဢၼ်မိူၼ်ၵၼ်တင်းၸဝ်ႈႁဝ်းတီႈၶႃႈ။
၂၁ ၼွၵ်ႈသေၸဝ်ႈႁဝ်းဢမ်ႇမီးၽြႃးတၢင်ႇသူႇတၢင်ႇပႃးတီႈၶႃႈ။ၵႃႈၼိူဝ်လိၼ်မိူင်းၼႆႉမီးမဵဝ်းၵူၼ်းသေႇၸိူဝ်ႉသမေဵဝ်းဢၼ်မိူၼ်ၵၼ်တင်းၵူၼ်းၸဝ်ႈႁဝ်းမဵဝ်းဢိသရေႇလဢၼ်ၽြႃးပဵၼ်ၸဝ်ႈၵႂႃႇလႄႈထုတ်ႇၼုၵ်ႈဢဝ်ပုၼ်ႈမၼ်းၸဝ်ႈလွင်ႈၼင်ႇႁိုဝ်တၵ်းဢဝ်လွင်ႈတၢင်းဢၼ်ယႂ်ႇဢၼ်လူင်လႄႈလီၵူဝ်လီႁႄၸိူဝ်းၼၼ်ႉႁႂ်ႈၼႃႇမႃႉၸိုဝ်သဵင်ၸဝ်ႈထၢင်ႇသႃးပုၼ်ႈၸဝ်ႈႁဝ်းၼႂ်းလွင်ႈမိူဝ်ႈဢၼ်ၸဝ်ႈႁဝ်းႁေႃႈၵူၼ်းၵူႈၸိူဝ်ႉၵူႈမဵဝ်းဢွၵ်ႇသေၵႃႈတီႈၽၢႆႇၼႃႈၵူၼ်းၸဝ်ႈႁဝ်းဢၼ်ၸဝ်ႈႁဝ်းၼုၵ်ႈဢဝ်ဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၼၼ်ႉလူးၵွၼ်ႇတီႈၶႃႈႁိုဝ်။
၂၂ လွင်ႈမၼ်းၸမ်း၊ၸဝ်ႈႁဝ်းႁဵတ်းႁႂ်ႈၵူၼ်းမဵဝ်းဢိသရေႇလလႆႈပဵၼ်ၵူၼ်းၸဝ်ႈႁဝ်းယူႇတႃႇသေႇမၼ်ႈၶိူင်ႇလႄႈၸဝ်ႈႁဝ်းထႃႇဝရႃႉၽြႃးၼႆႉပဵၼ်ၽြႃးပဵၼ်ၸဝ်ႈၶဝ်တီႈၶႃႈဢေႃႈ။
၂၃ မိူဝ်ႈလဵဝ်ၼႆႉၸိုင်ထႃႇဝရႃႉၽြႃးတီႈၶႃႈ။ႁႂ်ႈၵႂၢမ်းဢၼ်ၸဝ်ႈႁဝ်းမီးဢမိင်ႉဝႆႉတီႈၶႃႈၸဝ်ႈႁဝ်းဢိၵ်ႇတင်းမဵဝ်းၸိူဝ်ႉၶိူဝ်းၶႃႈၸဝ်ႈႁဝ်းၸိူဝ်းၼၼ်ႉတႄႇယူႇတႃႇသေႇမၼ်ႈၶိူင်ႇလႄႈႁဵတ်းၸွမ်းၵႃႈၼင်ႇဢၼ်ၸဝ်ႈႁဝ်းမီးဢမိင်ႉဝႆႉၼၼ်ႉသေၵမ်းတီႈၶႃႈ။
၂၄ ႁႂ်ႈၼႃႇမႃႉၸိုဝ်သဵင်ၸဝ်ႈႁဝ်းတႄႇယူႇလႄႈမီးတၢင်းဢၼ်ယုၵ်ႉယွင်ႈယူႇတႃႇသေႇလႄႈဝႃႈၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးၼၼ်ႉပဵၼ်ၽြႃးပဵၼ်ၸဝ်ႈမဵဝ်းဢိသရေႇလဢၼ်ဝႃႈၽြႃးပဵၼ်ၸဝ်ႈဢၼ်သႅင်ႇတင်းမဵဝ်းဢိသရေႇလဢေႃႈ၊ဝႃႈၼင်ႇၼႆယူႇၼၼ်ႉသေၵမ်းလူၺ်ႈတီႈၶႃႈ။
၂၅ ႁႂ်ႈမဵဝ်းၸိူဝ်ႉၶိူဝ်းၶႃႈၸဝ်ႈႁဝ်းၼႆႉတႄႇယူႇၵႃႈတီႈၽၢႆႇၼႃႈၸဝ်ႈႁဝ်းသေၵမ်းလူၺ်ႈတီႈၶႃႈ။လွင်ႈမၼ်းၸမ်းၽြႃးပဵၼ်ၸဝ်ႈတီႈၶႃႈ၊ၵွပ်ႈပိူဝ်ႈဢၼ်ၸဝ်ႈႁဝ်းပၼ်ပျႃႇတိၵ်ႈတီႈၶႃႈၸဝ်ႈႁဝ်းၼႆႉလူၺ်ႈလွင်ႈဢၼ်တၵ်းႁႂ်ႈမဵဝ်းၸိူဝ်ႉၶိူဝ်းၶႃႈၸဝ်ႈႁဝ်းတႄႇပဵၼ်ၼၼ်ႉလႄႈၶႃႈၸဝ်ႈႁဝ်းၼႆႉမီးၸႂ်ဢၼ်ၶႂ်ႈႁဵတ်းသူးတွင်းပထၼႃႇၵႃႈတီႈၽၢႆႇၼႃႈၸဝ်ႈႁဝ်းတီႈၶႃႈဢေႃႈ။
၂၆ မိူဝ်ႈလဵဝ်ၼႆႉၵေႃႈထႃႇဝရႃႉၽြႃးတီႈၶႃႈ၊ၸဝ်ႈႁဝ်းၸႂ်ႈၽြႃးပဵၼ်ၸဝ်ႈတီႈၶႃႈဢေႃႈ။ၵျေးၸူးၼႆႉၸိုင်ၸဝ်ႈႁဝ်းဝႆႉၵတိတီႈၶႃႈၸဝ်ႈႁဝ်းၼႆႉတီႈၶႃႈယဝ်ႉ။
၂၇ ပိူဝ်ႈဢၼ်ပဵၼ်ၼင်ႇၼႆလႄႈၶႅၼ်းတေႃႈမီးၸႂ်ဢၼ်ဢူၼ်ႈၼူပ်ႈၵွမ်းၸူးႁႂ်ႈလႆႈပၼ်တၢင်းလီတီႈမဵဝ်းၸိူဝ်ႉၶိူဝ်းၶႃႈၸဝ်ႈႁႂ်ႈလႆႈတႄႇယူႇၵႃႈတီႈၽၢႆႇၼႃႈၸဝ်ႈႁဝ်းတႃႇသေႇမၼ်ႈၶိူင်ႇသေၵမ်းတီႈၶႃႈ၊ထႃႇဝရႃႉၽြႃးတီႈၶႃႈ။ပေႃးၸဝ်ႈႁဝ်းပၼ်တၢင်းလီၸိုင်တၵ်းလႆႈၶၢမ်ႇတၢင်းလီမၢင်ႇၵလႃႇယူႇတႃႇသေႇမၼ်ႈၶိူင်ႇတီႈၶႃႈဢေႃႈ၊ဝႃႈၼင်ႇၼႆဢေႃႈ။