Chapter
၆
သေႃးလမုၼ်ႇတႄႇတင်ႈပိၵ်ႉမၢၼ်ႇၽြႃး
၁ လိုၼ်းသေၵူၼ်းမဵဝ်းဢိသရေႇလတင်းလၢႆဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးယဝ်ႉသီႇပၢၵ်ႇပၢႆပႅတ်ႈသိပ်းပီႊသေႃးလမုၼ်ႇၸၢမ်ႇႁၢင်ႈၸၢမ်ႇႁေႃသီႇပီႊ၊လိူၼ်ၸိၽဢၼ်ပဵၼ်လိူၼ်တုတိယၼၼ်ႉမၼ်းၸႃႉတႄႇႁဵတ်းႁိူၼ်းထႃႇဝရႃႉၽြႃးဢေႃႈ။
၂ ႁိူၼ်းဢၼ်ၶုၼ်လူင်သေႃးလမုၼ်ႇတႄႇႁဵတ်းပုၼ်ႈထႃႇဝရႃႉၽြႃးၸမ်းၼႃႈယၢဝ်းမၼ်းမီးႁူၵ်းသိပ်းသွၵ်ႇ၊ၼႃႈပွတ်းမၼ်းသၢဝ်းသွၵ်ႇ၊ဢၼ်သုင်မၼ်းသၢမ်သိပ်းသွၵ်ႇဢေႃႈ။
၃ ၼႃႈႁိူၼ်းၸဝ်ႈၵေႃႈၼႃႈယၢဝ်းမၼ်းမီးသၢဝ်းသွၵ်ႇၼႃႈပွတ်းမၼ်းမီးသိပ်းသွၵ်ႇၵႃႈတီႈၽၢႆႇၼႃႈပိၵ်ႉမၢၼ်ႇၸဝ်ႈဢေႃႈ။
၄ ႁူးလၢင်းတႅၼ်ဢၼ်ပဵၼ်ၽႃပဵၼ်ႁၢၼ်ႉပဵၼ်ထၢပ်ႈတင်းလၢႆၵေႃႈမၼ်းႁဵတ်းသႂ်ႇတီႈႁိူၼ်းၸဝ်ႈဢေႃႈ။
၅ မၼ်းႁဵတ်းႁၢၼ်ႉလုၵ်းတင်းလၢႆၸွမ်းၽႃႁိူၼ်းၸဝ်ႈၵႃႈတီႈလဵပ်ႈႁွပ်ႈမၼ်းဢၼ်ဝႃႈၵႃႈတီႈလဵပ်ႈႁွပ်ႈၽႃႁိူၼ်းၸဝ်ႈဢၼ်ဝႃႈပိၵ်ႉမၢၼ်ႇၸဝ်ႈဢိၵ်ႇတင်းထႃႇၼႃႉတီႈပျႃႇတိၵ်ႈၸဝ်ႈၼၼ်ႉဢေႃႈ။ၼင်ႇၼၼ်လႄႈမၼ်းႁဵတ်းလုၵ်းၸိူဝ်းၼၼ်ႉၵႃႈတီႈႁိမ်းမၼ်းဢေႃႈ။
၆ ႁၢၼ်ႉလုၵ်းၵႃႈတႂ်ႈၼၼ်ႉၵႂၢင်ႈႁႃႈသွၵ်ႇႁၢၼ်ႉလုၵ်းၶိုင်ႈၵၢင်ၼၼ်ႉၵႂၢင်ႈႁူၵ်းသွၵ်ႇႁၢၼ်ႉလုၵ်းတတိယၼၼ်ႉၵႂၢင်ႈၸဵတ်းသွၵ်ႇဢေႃႈ။လွင်ႈမၼ်းၸမ်းၵႃႈတီႈၽၢႆႇၼွၵ်ႈၼၼ်ႉမၼ်းႁႂ်ႈၽႃမၼ်းယိုတ်ႈယွၼ်ႇၵၼ်ယူႇသေလႄႈၶိုၼ်းႁႂ်ႈတူဝ်မၼ်းတင်းလၢႆဢမ်ႇလႆႈၶဝ်ႈၵႃႈၼႂ်းတူဝ်ၽႃႁိူၼ်းၸဝ်ႈၼၼ်ႉဢေႃႈ။
၇ မိူဝ်ႈဢၼ်တႄႇႁဵတ်းႁိူၼ်းၸဝ်ႈၼၼ်ႉႉၸိုင်ၵွပ်ႈပိူဝ်ႈဢဝ်မၢၵ်ႇႁိၼ်ဢၼ်ထၢၵ်ႇသပ်းယဝ်ႉၸဵမ်မိူဝ်ႈၸူဝ်းဢၼ်ဢမ်ႇပႆႇဢဝ်မႃးၵႃႈတီႈၼၼ်ႉၸိူဝ်းၼၼ်ႉတႄႇႁဵတ်းၼၼ်ႉလႄႈဢမ်ႇလႆႈငိၼ်းသဵင်ၶွၼ်ႉလဵၵ်းတႃမၢတ်ႇၶိူင်ႈလဵၵ်းလႆႈလင်ႊလႆႈမေႃးၼႂ်းမိူဝ်ႈဢၼ်ႁဵတ်းယူႇၼၼ်ႉ။
၈ ႁူးၽၵ်းတူဢၼ်ၶဝ်ႈၵႃႈၼႂ်းႁၢၼ်ႉလုၵ်းၵႃႈတႂ်ႈၼၼ်ႉၸိုင်မီးၵႃႈတီႈၽၢႆႇတၢင်းၶႂႃႁိူၼ်းၸဝ်ႈဢေႃႈ။မီးၶူဝ်လႆဢၼ်ၶိုၼ်ႈၸူးႁၢၼ်ႉၶိုင်ႈၵၢင်တင်းႁၢၼ်ႉၼိူဝ်ဢေႃႈ။ၼင်ႇၼၼ်လႄႈမၼ်းတႄႇႁဵတ်းႁိူၼ်းၸဝ်ႈလႄႈႁႂ်ႈယဝ်ႉႁႂ်ႈတူဝ်သေလႄႈဢဝ်ၶိူဝ်းလႂ်ဢိၵ်ႇတင်းၽႅၼ်ႇပႅၼ်ႈမႆႉဢႃႇရိတ်ႉလႂ်မုင်းႁိူၼ်းၸဝ်ႈဢေႃႈ။
၉ ႁၢၼ်ႉလုၵ်းၸိူဝ်းၼၼ်ႉၵေႃႈမၼ်းႁဵတ်းၸပ်းႁိူၼ်းၸဝ်ႈတင်းသဵင်ႈတင်းမူတ်းလႄႈဢၼ်သုင်ယေႈႁၢၼ်ႉမီးႁႃႈသွၵ်ႇၼင်ႇၵၼ်ဢေႃႈ။
၁၀ ၶဝ်ဢဝ်တူင်မႆႉဢႃႇရိတ်ႉသေလႄႈၵၢႆႇသႂ်ႇၵႃႈတီႈႁိူၼ်းၸဝ်ႈၼၼ်ႉဢေႃႈ။
၁၁ ၼုၵ်ႉၵပၢတ်ႈထႃႇဝရႃႉၽြႃးႁွတ်ႈမႃးတီႈသေႃးလမုၼ်ႇလႄႈဝႃႈ၊-လွင်ႈႁိူၼ်းၸဝ်ႈဢၼ်မႂ်းတႄႇႁဵတ်းမိူဝ်ႈလဵဝ်ၼႆႉၸမ်းပေႃးမႂ်းၸွမ်းသဵၼ်ႈတၢင်းထုင်းၽိင်ႈတြႃးၵဝ်တင်းလၢႆၼၼ်ႉသေလႄႈ
၁၂ ၸီႇယၢင်ႇၸွမ်းလွင်ႈတၢင်းဢၼ်ၵဝ်ၸီႇယၢင်ႇဝႆႉၼၼ်ႉလႄႈပႂ်ႉၵမ်ပႂ်ႉၵျၢင်ႉပိင်းၺၢပ်ႈၵဝ်ၵႃႈမီးၼၼ်ႉၸိုင်ၵဝ်တၵ်းႁႂ်ႈၵႂၢမ်းဢၼ်ၵဝ်ဝႆႉၵတိတီႈပေႃႈမႂ်းတႃႇဝိတ်ႉၼၼ်ႉတႄႇပဵၼ်တီႈမႂ်းဢေႃႈ။
၁၃ ၵဝ်တၵ်းယူႇၵႃႈၼႂ်းၶိုင်ႈၵၢင်ၵူၼ်းမဵဝ်းဢိသရေႇလတင်းလၢႆလႄႈဢမ်ႇၸုၼ်ႉပႅတ်ႈၵူၼ်းၵဝ်မဵဝ်းဢိသရေႇလၼၼ်ႉလႃးလႃး၊ဝႃႈၼင်ႇၼႆဢေႃႈ။
၁၄ ၼင်ႇၼၼ်လႄႈသေႃးလမုၼ်ႇၼၼ်ႉတႄႇႁဵတ်းႁိူၼ်းၸဝ်ႈလႄႈယဝ်ႉတူဝ်ႈဢေႃႈ။
၁၅ မၼ်းႁႂ်ႈၽႃႁိူၼ်းၸဝ်ႈတၢင်းၼႂ်းၼၼ်ႉယဝ်ႉတူဝ်ႈလူၺ်ႈပႅၼ်ႈမႆႉဢႃႇရတ်ႉလႄႈဢဝ်ၵႃႈတီႈဢၼ်သိူဝ်ႇႁိူၼ်းၸဝ်ႈတေႃႇထိုင်ႁွတ်ႈဢၼ်မုင်းမၼ်းၼၼ်ႉမၼ်းဢဝ်မႆႉၵၢင်ႊၵႃႈၼႂ်းမၼ်းသေလႄႈဢဝ်မႆႉပႅၵ်ႇသိူဝ်ႇႁိူၼ်းၸဝ်ႈယဝ်ႉတူဝ်ႈဢေႃႈ။
၁၆ မၼ်းဢဝ်မႆႉပႅၼ်ႈဢႃႇရိတ်ႉၵင်ႈႁိူၼ်းၸဝ်ႈပွတ်းၽၢႆႇတၢင်းလင်ဢၼ်ၼႃႈယၢဝ်းမၼ်းၼႃႈပွတ်းမၼ်းမီးသၢဝ်းသွၵ်ႇၼင်ႇၵၼ်ၼၼ်ႉလႄႈဢဝ်ၵႃႈတီႈဢၼ်သိူဝ်ႇမၼ်းတေႃႇထိုင်ႁွတ်ႈၽႃႇမၼ်းတင်းလၢႆၼၼ်ႉႁႂ်ႈယဝ်ႉတူဝ်ႈၸိူဝ်ႉၼင်ႇၼၼ်ၵႃႈတီႈတၢင်းၼႂ်းမၼ်းပုၼ်ႈထႃႇၼႃႉတီႈပျႃႇတိၵ်ႈၸဝ်ႈဢၼ်ဝႃႈထႃႇၼႃႉတီႈမူတ်းၸၢင်ႇၼႃႇသေပိူၼ်ႈၼၼ်ႉဢေႃႈ။
၁၇ ဢၼ်ယၢဝ်းပိၵ်ႉမၢၼ်ႇၸဝ်ႈဢၼ်မီးၵႃႈတီႈၽၢႆႇၼႃႈလုၵ်းၼၼ်ႉမီးသီႇသိပ်းသွၵ်ႇဢေႃႈ။
၁၈ မႆႉဢႃႇရိတ်ႉၵႃႈၼႂ်းႁိူၼ်းၸဝ်ႈၼၼ်ႉလႆႈၶၢမ်ႇတၢင်းဢၼ်တွင်ႈဢၼ်ၶႅၵ်းလႄႈပဵၼ်လၢႆးမၢၵ်ႇၼမ်ႉႉတဝ်ႈ၊လၢႆးတုမ်ႇမူဝ်၊လၢႆးမွၵ်ႇ၊ဝႆႉဢေႃႈ။
၁၉ တင်းသဵင်ႈတင်းလူင်ပဵၼ်မႆႉဢႃႇရိတ်ႉလႄႈဢမ်ႇလႆႈႁၼ်မၢၵ်ႇႁိၼ်လႃးလႃး။ၼင်ႇၼၼ်လႄႈမၼ်းပွင်ႁဵတ်းပွင်မႄးထႃႇၼႃႉတီႈပျႃႇတိၵ်ႈၸဝ်ႈၵႃႈၼႂ်းႁိူၼ်းၸဝ်ႈပုၼ်ႈဢၼ်တၵ်းဢဝ်တိူၵ်ႈတႃႇပတိၺိၼ်ႇထႃႇဝရႃႉၽြႃးတၢင်ႇဝႆႉၼၼ်ႉဢေႃႈ။
၂၀ လုၵ်းထႃႇၼႃႉတီႈပျႃႇတိၵ်ႈၸဝ်ႈၸမ်းၼႃႈယၢဝ်းမၼ်းမီးသၢဝ်းသွၵ်ႇၼႃႈပွတ်းမၼ်းမီးသၢဝ်းသွၵ်ႇ၊ဢၼ်သုင်မၼ်းမီးသၢဝ်းသွၵ်ႇဢေႃႈ။လုၵ်းၼၼ်ႉၸိုင်မၼ်းဢဝ်ၶမ်းလွတ်ႈငၢၼ်ႇဢုမ်ႇႁေႃႇသေလႄႈယိတ်ႉပလၢင်ႇၵေႃႈမၼ်းဢဝ်မႆႉဢႃႇရိတ်ႉမူမ်းႁေႃႇသေဢေႃႈ။
၂၁ ၼင်ႇၼၼ်လႄႈသေႃးလမုၼ်ႇဢဝ်ၶမ်းလွတ်ႈငၢၼ်ႇဢုမ်ႇႁေႃႇၽၢႆႇၼႂ်းႁိူၼ်းၸဝ်ႈသေယဝ်ႉဢဝ်ၸိူၵ်ႈၶမ်းမတ်ႉၼူင်ႇဝႆႉၵႃႈတီႈၽၢႆႇၼႃႈထႃႇၼႃႉတီႈပျႃႇတိၵ်ႈၸဝ်ႈၼၼ်ႉလႄႈဢဝ်ၶမ်းဢုမ်ႇႁေႃႇဢေႃႈ။
၂၂ မၼ်းဢဝ်ၶမ်းဢုမ်ႇႁေႃႇႁိူၼ်းၸဝ်ႈတင်းႁိူၼ်းၸွတ်ႇတူဝ်ႈၵူႈတီႈၵူႈလႅၼ်ဢေႃႈ။ယိတ်ႉပလၢင်ႇဢၼ်မီးၵႃႈတီႈႁိမ်းထႃႇၼႃႉတီႈပျႃႇတိၵ်ႈၸဝ်ႈၼၼ်ႉၵေႃႈမၼ်းဢဝ်ၶမ်းဢုမ်ႇႁေႃႇဝႆႉတင်းသဵင်ႈတင်းမူတ်းဢေႃႈ။
၂၃ ၵႃႈၼႂ်းထႃႇၼႃႉတီႈပျႃႇတိၵ်ႈၸဝ်ႈၼၼ်ႉမၼ်းဢဝ်မႆႉသၢၼ်ႇလုၼ်ႇႁဵတ်းၶေႇရုၽိမ်ႇသွင်ပႃးဢၼ်သုင်မၼ်းမီးသိပ်းသွၵ်ႇၼၼ်ႉဝႆႉဢေႃႈ။
၂၄ ပိၵ်ႇၶေႇရုၽိမ်ႇၼၼ်ႉၽၢႆႇၼိုင်ႈယၢဝ်းႁႃႈသွၵ်ႇၽၢႆႇၼိုင်ႈယၢဝ်းႁႃႈသွၵ်ႇၼင်ႇၵၼ်လႄႈဢဝ်ၵႃႈတီႈပၢႆပိၵ်ႇၽၢႆႇၼိုင်ႈတေႃႇထိုင်ႁွတ်ႈပၢႆပိၵ်ႇၽၢႆႇၼိုင်ႈမီးသိပ်းသွၵ်ႇဢေႃႈ။
၂၅ ၶေႇရုၽိမ်ႇတၢင်ႇပႃးၼၼ်ႉၵေႃႈဢၼ်ယၢဝ်းမၼ်းမီးသိပ်းသွၵ်ႇလႄႈၶေႇရုၽိမ်ႇသွင်ပႃးၼၼ်ႉတၢင်းဢၼ်ယႂ်ႇဢၼ်သုင်ပၼႃႇမႃႉမိူၼ်ၵၼ်ဢေႃႈ။
၂၆ ဢၼ်သုင်ၶေႇရုၽိမ်ႇပႃးၼိုင်ႈမီးသိပ်းသွၵ်ႇလႄႈၶေႇရုၽိမ်ႇတၢင်ႇပႃးၵေႃႈမိူၼ်ၵၼ်ဢေႃႈ။
၂၇ မၼ်းဢဝ်ၶေႇရုၽိမ်ႇၸိူဝ်းၼၼ်ႉတၢင်ႇဝႆႉၵႃႈၼႂ်းႁိူၼ်းၸဝ်ႈတီႈၵႃႈၼႂ်းလႄႈပိၵ်ႇၶေႇရုၽိမ်ႇၸိူဝ်းၼၼ်ႉၵီႈလႄႈပၢႆပိၵ်ႇၶေႇရုၽိမ်ႇပႃးၼိုင်ႈတိူဝ်ႉၸပ်းၽႃၽၢႆႇၼိုင်ႈယူႇပၢႆပိၵ်ႇၶေႇရုၽိမ်ႇတၢင်ႇပႃးတိူဝ်ႉၸပ်းၽႃၽၢႆႇၼိုင်ႈယူႇလႄႈပိၵ်ႇၼိုင်ႈလႄႈပိၵ်ႇၼိုင်ႈတိူဝ်ႉၸပ်းၵၼ်ယူႇၵႃႈတီႈၶိုင်ႈၵၢင်ႁိူၼ်းၸဝ်ႈဢေႃႈ။
၂၈ ၶေႇရုၽိမ်ႇၸိူဝ်းၼၼ်ႉၵေႃႈမၼ်းဢဝ်တင်းၶမ်းဢုမ်ႇႁေႃႇဝႆႉဢေႃႈ။
၂၉ ၵႃႈတီႈၽၢႆႇတၢင်းၼႂ်းတင်းၽၢႆႇတၢင်းၼွၵ်ႈၽႃႁိူၼ်းၸဝ်ႈၸိူဝ်းၼၼ်ႉမၼ်းတွင်ႈႁဵတ်းႁၢင်ႊၶေႇရုၽိမ်ႇလႂ်ႁၢင်ႊတူၼ်ႈထၢၼ်းလႂ်ပုင်ႇမွၵ်ႇလႂ်ဢေႃႈ။
၃၀ ဢၼ်သိူဝ်ႇၼႂ်းႁိူၼ်းၸဝ်ႈၵႃႈၼႂ်းၵႃႈၼွၵ်ႈၸိူဝ်းၼၼ်ႉၵေႃႈမၼ်းဢဝ်ၶမ်းဢုမ်ႇႁေႃႇသေဢေႃႈ။
၃၁ ပုၼ်ႈႁူးၽၵ်းတူထႃႇၼႃႉတီႈပျႃႇတိၵ်ႈၸဝ်ႈၼၼ်ႉၸိုင်မၼ်းႁဵတ်းမႂ်ႊၽၵ်းတူမႆႉသၢၼ်ႇလုၼ်ႇသွင်မႂ်ႊလႄႈၶိုဝ်ႇၽၵ်းတူတင်းသဝ်ၽၵ်းတူၸိူဝ်းၼၼ်ႉၶဝ်ႈပႃးၼႂ်းၽႃၼၼ်ႉႁႃႈပုၼ်ႈပုၼ်ႈၼိုင်ႈဢေႃႈ။
၃၂ ၼင်ႇၼၼ်လႄႈမၼ်းႁဵတ်းမႂ်ႊၽၵ်းတူမႆႉသၢၼ်ႇလုၼ်ႇသွင်မႂ်ႊလႄႈတွင်ႈႁဵတ်းၶႅၵ်းႁဵတ်းႁၢင်ႊၶေႇရုၽိမ်ႇလႂ်ႁၢင်ႊတူၼ်ႈထၢၼ်းလႂ်ႁၢင်ႊမွၵ်ႇလႂ်သႂ်ႇလႄႈဢဝ်ၶမ်းဢုမ်ႇႁေႃႇသေယဝ်ႉဢဝ်ၶမ်းမူမ်းႁၢင်ႊၶေႇရုၽိမ်ႇလႂ်ႁၢင်ႈတူၼ်ႈထၢၼ်းလႂ်ၸိူဝ်းၼၼ်ႉသေဢေႃႈ။
၃၃ မိူၼ်ၼင်ႇၼၼ်ပုၼ်ႈႁူးၽၵ်းတူပိၵ်ႉမၢၼ်ႇၸဝ်ႈၵေႃႈႁဵတ်းသဝ်ၽၵ်းတူမႆႉသၢၼ်ႇလုၼ်ႇဢၼ်ၶဝ်ႈပႃးၼႂ်းၽႃသီႇပုၼ်ႈၼိုင်ႈပုၼ်ႈ၊ဢိၵ်ႇတင်းမႂ်ႊၽၵ်းတူမႆႉပႅၵ်ႇသွင်မႂ်ႊဢေႃႈ။
၃၄ ၵႃႈတီႈမႂ်ႊၽၵ်းတူမႂ်ႊၼိုင်ႈမီးသွင်ၽႅၼ်ႇဢၼ်တူပ်ႉလႆႈႁၵ်းလႆႈလႄႈၵႃႈတီႈမႂ်ႊၽၵ်းတူတၢင်ႇမႂ်ႊၵေႃႈမီးသွင်ၽႅၼ်ႇဢၼ်တူပ်ႉလႆႈႁၵ်းလႆႈဢေႃႈ။
၃၅ တီႈမႂ်ႊၽၵ်းတူၸိူဝ်းၼၼ်ႉမၼ်းတွင်ႈႁဵတ်းၶႅၵ်းႁဵတ်းႁၢင်ႊၶေႇရုၽိမ်ႇလႂ်ႁၢင်ႈတူၼ်ႈထၢၼ်းလႂ်ႁၢင်ႊမွၵ်ႇလႂ်သႂ်ႇလႄႈဢဝ်ၶမ်းဢုမ်ႇႁေႃႇၸွမ်းလၢႆးမၼ်းဝႆႉလီလီငၢမ်းငၢမ်းဢေႃႈ။
၃ ၆ တမ်ႇတိူင်းဢၼ်သၢမ်ထၢပ်ႈၵႃႈၼႂ်းမၼ်းၼၼ်ႉၵေႃႈမၼ်းဢဝ်မၢၵ်ႇႁိၼ်ဢၼ်ထၢၵ်ႇဢၼ်သပ်းၼၼ်ႉတႄႇႁဵတ်းလႄႈထၢပ်ႈၼိုင်ႈၸမ်းဢဝ်မႆႉဢႃႇရိတ်ႉႁဵတ်းဢေႃႈ။
၃ ၇ ၼႂ်းပီႊဢၼ်မၼ်းၸၢမ်ႇႁၢင်ႈၸၢမ်ႇႁေႃဢၼ်ထူၼ်ႈထိုင်သီႇပီႊလိူၼ်ႈၸိၽၼၼ်ႉၶဝ်ဢွၼ်ၵၼ်ၶျႃးငဝ်ႈႁၢၵ်ႈတိူၵ်ႈႁိူၼ်းထႃႇဝရႃႉၽြႃးလႄႈ
၃ ၈ ၼႂ်းပီႊဢၼ်မၼ်းၸၢမ်ႇႁၢင်ႈၸၢမ်ႇႁေႃဢၼ်ထၼ်ႈထိုင်သိပ်းဢဵတ်းပီႊလိူၼ်ဢထမဢၼ်ဝႃႈလိူၼ်ပုလၼၼ်ႉႁိူၼ်းၸဝ်ႈယဝ်ႉတူဝ်ႈလီငၢမ်းဢိၵ်ႇလူၺ်ႈၵၼ်တင်းၵႃႈဢၼ်ၸၢပ်ႈသႅင်ႇၵၼ်တင်းမၼ်းၸိူဝ်းၼၼ်ႉၸွမ်းၵႃႈၼင်ႇဢၼ်ပုင်ႇႁၢင်ႊမၼ်းမီးၼၼ်ႉလႄႈလႆႈႁဵတ်းႁိူၼ်းၸဝ်ႈၼၼ်ႉၸဵတ်းပီႊတဵမ်တဵမ်ဢေႃႈ။