Chapter
၁၇
ၵႃႈလမ်မႃးလဵင်ႉလူဢေးလိယ
၁ ဢေးလိယၵူၼ်းဝဵင်းတိသၽိမိူင်းၵိလတ်ႉၼၼ်ႉဢွၵ်ႇသူပ်းလၢတ်ႈတီႈဢႃႇႁပ်ႉလႄႈဝႃႈ၊-ၵႃႈၼင်ႇဢၼ်ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလဢၼ်ၵဝ်ၵူဝ်းၵႂၢႆႇၼၼ်ႉဢသၢၵ်ႈလိပ်းယူႇၼၼ်ႉပေႃးၵဝ်ယင်းဢမ်ႇမီးဢၶႂၢင်ႉၸိုင်ၼႂ်းပီႊၸိူဝ်းၼႆႉၽူၼ်တၵ်းဢမ်ႇလႆႈတူၵ်းၼမ်ႉၼၢႆးဢမ်ႇလႆႈတူၵ်း၊ဝႃႈၼင်ႇၼႆဢေႃႈ။
၂ လိုၼ်းၼၼ်ႉၼုၵ်ႉၵပၢတ်ႈထႃႇဝရႃႉၽြႃးႁွတ်ႈမႃးတီႈမၼ်းၼၼ်ႉလႄႈဝႃႈၸမ်း၊-မႂ်းဢွၵ်ႇသေၵႃႈတီႈၼႆႉလႄႈ
၃ ဝၢႆႇၼႃႈတေႃႇၽၢႆႇဝၼ်းဢွၵ်ႇၵႂႃႇသေလႄႈတဵတ်ႇမႅပ်းယူႇၵႃႈတီႈႁိမ်းၼမ်ႉႁွင်ႊၶေႇရိတ်ႉဢၼ်မီးသိုဝ်ႈၵၼ်တင်းၼမ်ႉႁွင်ႊယေႃႇတၼ်ႇၼၼ်ႉတႃႉ။မႂ်းတၵ်းလႆႈၵိၼ်ၼမ်ႉတီႈၼမ်ႉႁွင်ႊၼၼ်ႉဢေႃႈ။
၄ ၵဝ်သင်ႇလၢတ်ႈဝႆႉတီႈၵႃလမ်တင်းလၢႆႁႂ်ႈၶဝ်လႆႈလဵင်ႉလူမႂ်းယဝ်ႉ၊ဝႃႈၼင်ႇၼႆလႄႈမၼ်းၵေႃႈၵႂႃႇလႄႈႁဵတ်းၸွမ်းၵႃႈၼင်ႇဢၼ်ဢမိင်ႉထႃႇဝရႃႉၽြႃးမီးၼၼ်ႉဢေႃႈ။
၅ မၼ်းၵႂႃႇလႄႈယူႇၵႃႈတီႈႁိမ်းၼမ်ႉႁွင်ႊၶေႇရိတ်ႉဢၼ်မီးသိုဝ်ႈၵၼ်တင်းၼမ်ႉႁွင်ႊယေႃႇတၼ်ႇၼၼ်ႉဢေႃႈ။
၆ ၵႃလမ်တင်းလၢႆဢွၼ်ၵၼ်ဢဝ်ၶဝ်ႈမုၼ်းတၢင်းၼိူဝ်ႉၶိင်ႇၵၢင်ၼႂ်ပွၵ်ႈၼိုင်ႈၶိင်ႇၵၢင်ၶမ်ႈပွၵ်ႈၼိုင်ႈမႃးလဵင်ႉလူမၼ်းဢေႃႈ။ၼမ်ႉတီႈၼမ်ႉႁွင်ႊၵေႃႈလႆႈၵိၼ်ဢေႃႈ။
မေႈမၢႆႈဝဵင်းၸရပ်ႉတ
၇ လိုၼ်းၼၼ်ႉၵွပ်ႈပိူဝ်ႈဢၼ်ၽူၼ်ဢမ်ႇတူၵ်းၵႃႈတီႈမိူင်းၼၼ်ႉလႄႈၼမ်ႉႁွင်ႊၼၼ်ႉယူတ်းႁႅင်ႈၵႂႃႇ၈ ဢေႃႈ။
၈ မိူဝ်ႈၼၼ်ႉၼုၵ်ႉၵပၢတ်ႈထႃႇဝရႃႉၽြႃးႁွတ်ႈမႃးတီႈမၼ်းလႄႈဝႃႈၸမ်း၊-မႂ်းလုၵ်ႉလႄႈၵႂႃႇၵႃႈတီႈဝဵင်းၸရပ်ႉတမိူင်းၸိတုၼ်ႇပုၼ်ႉသေလႄႈယူႇၵႃႈတီႈၼၼ်ႉတႃႉ။
၉ ၵဝ်သင်ႇလၢတ်ႈဝႆႉတီႈမေႈမုၵ်ႉမေႈမၢႆႈဢၼ်ယူႇၵႃႈတီႈဝဵင်းၼၼ်ႉၵေႃႉၼိုင်ႈႁႂ်ႈမၼ်းလဵင်ႉလူမႂ်းယဝ်ႉဝႃႈၼင်ႇၼႆလႄႈမၼ်းၵေႃႈလုၵ်ႉလႄႈၵႂႃႇၸူးၵႃႈတီႈဝဵင်းၸရပ်ႉတဢေႃႈ။
၁၀ မိူဝ်ႈဢၼ်မၼ်းႁွတ်ႈထိုင်ၵႃႈတီႈၽၵ်းတူဝဵင်းၼၼ်ႉၸိုင်မေႈမုၵ်ႉမေႈမၢႆႈၵေႃႉၼိုင်ႈဢဝ်ၽိုၼ်းယူႇဢေႃႈ။မၼ်းႁွင်ႉၸူးတီႈမၼ်းလႄႈလၢတ်ႈဝႃႈ၊-ဢဝ်ၵွၵ်းသႂ်ႇၼမ်ႉမႃးပုၼ်ႈဢၼ်ၵဝ်တၵ်းၵိၼ်ဢိတ်းၼိုင်ႈသေၵမ်း၊ဝႃႈၼင်ႇၼႆဢေႃႈ။
၁၁ ၼႂ်းမိူဝ်ႈဢၼ်မၼ်းၼၼ်ႉယင်းတိုၵ်ႉၵႂႃႇႁႂ်ႈလႆႈဢဝ်ၼမ်ႉမႃးယူႇၼၼ်ႉမၼ်းသမ်ႉႁွင်ႉၸူးတီႈမၼ်းၼၼ်ႉထႅင်ႈလႄႈဝႃႈ၊-ဢဝ်မိုဝ်းမႂ်းယိပ်းပႃးဢဝ်မႃးၶဝ်ႈမုၼ်းၽၢၵ်ႇၼိုင်ႈသေၵမ်းဝႃႈၼင်ႇၼႆဢေႃႈ။
၁၂ မေႈယိင်းၼၼ်ႉၶိုၼ်းလၢတ်ႈတီႈမၼ်းလႄႈဝႃႈ၊-ၵႃႈၼင်ႇဢၼ်ထႃႇဝရႃႉၽြႃးၽြႃးပဵၼ်ၸဝ်ႈမႂ်းၸဝ်ႈဢသၢၵ်ႈလိပ်းယူႇၼၼ်ႉၵဝ်ၶႃႈဢမ်ႇမီးၶဝ်ႈမုၼ်းၶႅပ်းသေၶႅပ်း။မီးၽွင်ၶဝ်ႈမုၼ်းၵႃႈၼႂ်းမေႃႈဝၵ်ႉမိုဝ်းၼိုင်ႈဢိၵ်ႇတင်းၼမ်ႉမၼ်းၵႃႈၼႂ်းတဝ်ႈဢိတ်းဢွၼ်ႇၼိုင်ႈၵူၺ်းၶႃႈဢေႃႈ။ၵဝ်ၶႃႈဢဝ်ၽိုၼ်းလႄႈတၵ်းၵႂႃႇႁႂ်ႈလႆႈၽဝ်ၶဝ်ႈမုၼ်းပုၼ်ႈၵဝ်ၶႃႈဢိၵ်ႇတင်းလုၵ်ႈၸၢႆးဢွၼ်ႇၵဝ်ၶႃႈလႄႈႁဝ်းၶႃႈတၵ်းၵိၼ်သေယဝ်ႉႁႂ်ႈလႆႈတၢႆဢေႃႈ၊ဝႃႈၼင်ႇၼႆဢေႃႈ။
၁၃ ဢေးလိယၵေႃႈလၢတ်ႈလႄႈဝႃႈ၊-မႂ်းယႃႇပမေႆႈၸႂ်။ၵႂႃႇႁဵတ်းၸွမ်းၵႃႈၼင်ႇဢၼ်မႂ်းဝႃႈၼၼ်ႉတႃႉ။ၵူၺ်းၵႃႈႁဵတ်းၶဝ်ႈမုၼ်းၶႅပ်းဢွၼ်ႇၶႅပ်းၼိုင်ႈပုၼ်ႈၵဝ်ဢွၼ်တၢင်းလႄႈဢဝ်မႃးတႃႉ။
၁၄ လိုၼ်းၼၼ်ႉၸင်ႇႁဵတ်းပုၼ်ႈမႂ်းတင်းလုၵ်ႈၸၢႆးဢွၼ်ႇမႂ်းတႃႉ။ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလၼၼ်ႉမီးဢမိင်ႉဝႆႉဝႃႈ၊-ၽွင်ႈၶဝ်ႈမုၼ်းဢၼ်မီးၵႃႈၼႂ်းမေႃႈၼၼ်ႉဢမ်ႇလႆႈသဵင်ႈလႆႈမူတ်း။ၼမ်ႉမၼ်းဢၼ်မီးၵႃႈၼႂ်းတဝ်ႈၼၼ်ႉၵေႃႈဢမ်ႇလႆႈယွမ်းတေႃႇထိုင်ႁွတ်ႈဝၼ်းဢၼ်ထႃႇဝရႃႉၽြႃးႁႂ်ႈၽူၼ်တူၵ်းၵႃႈၼိူဝ်လိၼ်မိူင်းၼႆႉၼၼ်ႉဝႃႈၼင်ႇၼႆဝႆႉယဝ်ႉ၊ဝႃႈၼင်ႇၼႆလႄႈမေႈယိင်းၼၼ်ႉၵေႃႈၵႂႃႇလႄႈႁဵတ်းၸွမ်းၵႃႈၼင်ႇဢၼ်ဢေးလိယလၢတ်ႈၼၼ်ႉဢေႃႈ။
၁၅ မၼ်းဢိၵ်ႇတင်းၵူၼ်းႁိူၼ်းၵူၼ်းယေးမၼ်းတင်းဢေးလိယလႆႈၵိၼ်ၶဝ်ႈမုၼ်းၵူႈမိူဝ်ႉၵူႈဝၼ်းဢေႃႈ။ၽွင်ၶဝ်ႈမုၼ်းဢၼ်မီးၵႃႈၼႂ်းမေႃႈၼၼ်ႉၵေႃႈဢမ်ႇသဵင်ႈဢမ်ႇမူတ်း။
၁၆ ၼမ်ႉမၼ်းဢၼ်မီးၵႃႈၼႂ်းတဝ်ႈၼၼ်ႉၵေႃႈဢမ်ႇယူတ်းဢမ်ႇယွမ်းမႅၼ်ႈၸွမ်းၵႃႈၼင်ႇၵႂၢမ်းဢၼ်ထႃႇဝရႃႉၽြႃးဢဝ်ဢေးလိယလႄႈမီးဢမိင်ႉၸဝ်ႈဝႆႉၼၼ်ႉဢေႃႈ။
၁၇ လိုၼ်းၼၼ်ႉလုၵ်ႈၸၢႆးမေႈယိင်းၸဝ်ႈႁိူၼ်းၼၼ်ႉၸပ်းတၢင်းၶႆႈတၢင်းပဵၼ်ဢေႃႈ။ၵွပ်ႈပိူဝ်ႈတၢင်းၶႆႈတၢင်းပဵၼ်မၼ်းႁႅင်းယႂ်ႇၼႃႇလႄႈၶျုၵ်ႈဢသၢၵ်ႈမၼ်းသေဢေႃႈ။
၁၈ မေႈယိင်းၼၼ်ႉထၢမ်တီႈဢေးလိယလႄႈဝႃႈ၊-ၵူၼ်းၽြႃးပဵၼ်ၸဝ်ႈဢိူၺ်း။ၸဝ်ႈႁဝ်းၸၢပ်ႈသႅင်ႇၵၼ်တင်းၵဝ်ၶႃႈၸိူဝ်ႉၼင်ႇႁိုဝ်။ၸဝ်ႈႁဝ်းမႃးတီႈၵဝ်ၶႃႈႁႂ်ႈၵဝ်ၶႃႈၶုၵ်းၸႂ်လႆႈၶႆႈၸႂ်ထူပ်းဢပျႅတ်ႈၵဝ်ၶႃႈလႄႈဢဝ်လုၵ်ႈၸၢႆးၵဝ်ၶႃႈတၢႆလူင်ပေႇ၊မိူဝ်ႈဢၼ်ဝႃႈၼင်ႇၼႆၸိုင်၊
၁၉ ဢေးလိယလၢတ်ႈတီႈမၼ်းၼၼ်ႉလႄႈဝႃႈ၊-ပၼ်လုၵ်ႈၸၢႆးမႂ်းၼၼ်ႉတီႈၵဝ်တႃႉ၊ဝႃႈၼင်ႇၼႆသေလႄႈမၼ်းဢဝ်လုၵ်ႈဢွၼ်ႇၼၼ်ႉသေၵႃႈၼႂ်းတၵ်းမေႈယိင်းၼၼ်ႉသေယဝ်ႉၶိုၼ်ႈၵႂႃႇၵႃႈတီႈလုၵ်းႁၢၼ်ႉၼိူဝ်တီႈဢၼ်မၼ်းယူႇၼၼ်ႉသေလႄႈဝႆႉၵႃႈၼိူဝ်ၵူႇတီႈၼွၼ်းသေယဝ်ႉႁွင်ႉထႃႇဝရႃႉၽြႃးလႄႈဝႃႈ၊-
၂၀ ထႃႇဝရႃႉၽြႃးၽြႃးပဵၼ်ၸဝ်ႈၵဝ်ၶႃႈတီႈၶႃႈ။ၸဝ်ႈႁဝ်းႁဵတ်းၽေးဢူးပၢတ်ႈသႂ်ႇၵႃႈတီႈႁိူၼ်းမေႈမုၵ်ႉမေႈမၢႆႈဢၼ်ၶႃႈၸဝ်ႈသွၼ်ႈပိူင်ယူၼႆႉလႄႈႁႂ်ႈလုၵ်ႈၸၢႆးမၼ်းတၢႆၶႃႈႁိုဝ်၊ဝႃႈၼင်ႇၼႆဢေႃႈ။
၂၁ လၢႆးသမ်ႉမၼ်းဢဝ်တူဝ်မၼ်းဢူပ်ႇပူပ်ႇသႂ်ႇၵႃႈၼိူဝ်လုၵ်ႈဢွၼ်ႇၼၼ်ႉသၢမ်ပွၵ်ႈသေလႄႈသမ်ႉၶိုၼ်းႁွင်ႉႁႃထႃႇဝရႃႉၽြႃးလႄႈဝႃႈ၊-ထႃႇဝရႃႉၽြႃးၽြႃးပဵၼ်ၸဝ်ႈၵဝ်ၶႃႈတီႈၶႃႈ။ၶႅၼ်းတေႃႈႁဵတ်းႁႂ်ႈဝိၺိၺ်ႇလုၵ်ႈဢွၼ်ႇၼႆႉသမ်ႉၶိုၼ်းၶဝ်ႈၵႃႈၼႂ်းမၼ်းသေၵမ်းတီႈၶႃႈ၊ဝႃႈၼင်ႇၼႆဢေႃႈ။
၂၂ ထႃႇဝရႃႉၽြႃးငိၼ်းၵႂၢမ်းဢေးလိယလႄႈဝိၺိၺ်ႇလုၵ်ႈဢွၼ်ႇၼၼ်ႉၶိုၼ်းၶဝ်ႈမႃးၵႃႈၼႂ်းမၼ်းသေယဝ်ႉဢသၢၵ်ႈမၼ်းသမ်ႉၶိုၼ်းလိပ်းမႃးဢေႃႈ။
၂၃ ဢေးလိယဢဝ်လုၵ်ႈဢွၼ်ႇၼၼ်ႉလူင်းသေၵႃႈတီႈလုၵ်းႁၢၼ်ႉၼိူဝ်ၵႂႃႇၵႃႈတီႈလုၵ်းႁၢၼ်ႉတႂ်ႈလႄႈဢဝ်ပၼ်တီႈမေႈမၼ်းလႄႈဝႃႈ၊-တူၺ်းလူး။လုၵ်ႈၸၢႆးမႂ်းဢသၢၵ်ႈၶိုၼ်းလိပ်းယဝ်ႉ၊ဝႃႈၼင်ႇၼႆဢေႃႈ။
၂၄ မေႈယိင်းၼၼ်ႉၵေႃႈလၢတ်ႈတီႈဢေးလိယလႄႈဝႃႈ၊-တေႃႈလဵဝ်ၼႆႉၵဝ်ၶႃႈလႆႈႁူႉလွင်ႈဢၼ်ၵႂၢမ်းထႃႇဝရႃႉၽြႃးဢွၵ်ႇသူပ်းၸဝ်ႈႁဝ်းၼၼ်ႉမၢၼ်ႇမႅၼ်ႈၸိုဝ်ႈၸႂ်ႈၼၼ်ႉယဝ်ႉ၊ဝႃႈၼင်ႇၼႆဢေႃႈ။