Chapter
၁၀
ၼၢင်းႁေႃၶမ်းမိူင်းသေႇၽမႃးၸႂ်းၶုၼ်ႁေႃၶမ်းသေႃးလမုၼ်ႇ
၁ ၼၢင်းႁေႃၶမ်းဢၼ်ဢုပ်ႉမိူင်းသေႇၽၼၼ်ႉငိၼ်းသတၢင်းသဵင်ၶၢဝ်ႇသေႃးလမုၼ်ႇဢၼ်ၸၢပ်ႈသႅင်ၵၼ်တင်းၼႃႇမႃႉၸိုဝ်သဵင်ထႃႇဝရႃႉၽြႃးၼၼ်ႉသေယဝ်ႉမႃးႁႂ်ႈလႆႈဢဝ်ပျၢတ်ႈသၼႃႇဢၼ်လိုၵ်ႉလမ်ႇယၢပ်ႇၽိုတ်ႇၼႃႇၼၼ်ႉၸၢမ်းတူၺ်းသေႃးလမုၼ်ႇဢေႃႈ။
၂ မၼ်းၼၼ်ႉပႃးဢဝ်တင်းၵူၼ်းဢၼ်ၸွမ်းၼမ်ၼႃႇဢိၵ်ႇတင်းၵလႃႈဢုၵ်ႉဢၼ်ပႃးတင်းမဵဝ်းၼၢမ်ႇသႃႇတင်းၶမ်းၼမ်ၼႃႇတင်းသဵင်ႈဢၼ်ထိူၵ်ႈၵႃႈယႂ်ႇၶၼ်ယႂ်ႇၸိူဝ်းၼၼ်ႉမႃးၵႃႈတီႈဝဵင်းယေႇရုသလႅမ်ႇလႄႈႁွတ်ႈထိုင်တီႈသေႃးလမုၼ်ႇသေယဝ်ႉတိူင်ႇပၢင်ႇတွင်ႉထၢမ်လူၺ်ႈလွင်ႈၵႃႈဢၼ်မီးၵႃႈၼႂ်းႁူဝ်ၸႂ်မၼ်းၼၼ်ႉဢေႃႈ။
၃ သေႃးလမုၼ်ႇၵေႃႈၵေႈလိတ်ႉပျၢတ်ႈၼႃႇၵႃႈဢၼ်မၼ်းတွင်ႈထၢမ်ၼၼ်ႉဢေႃႈ။လွင်ႈတၢင်းဢၼ်သေႃးလမုၼ်ႇဢမ်ႇႁူႉလႄႈဢမ်ႇၵေႈလိတ်ႉလႆႈၼၼ်ႉဢမ်ႇမီးသေၸိူဝ်ႉသေပိူင်။
၄ မိူဝ်ႈဢၼ်ၼၢင်းႁေႃၶမ်းမိူင်းသေႇၽႁၼ်ၺၢၼ်ႇပိင်ႇၺႃႇသေႃးလမုၼ်ႇတင်းသဵင်ႈတင်းလူင်ဢိၵ်ႇတင်းႁိူၼ်းၸဝ်ႈဢၼ်မၼ်းတႄႇႁဵတ်းၶိူင်ႈပိူင်ႇၶူင်ႇတီႈၵိၼ်ၸဝ်ႈ
၅ တီႈယူႇတီႈၼင်ႈဢၼ်ၵူၼ်းဢၼ်ပႂ်ႉဢမူႉၸဝ်ႈတင်းလၢႆၼင်ႈၼၼ်ႉ၊တီႈဢၼ်ၽူႈပႂ်ႉဢသၢၵ်ႈၸဝ်ႈတင်းလၢႆၸုၵ်းၶႃးၸႃးယူႇၼၼ်ႉၶူဝ်းၼုင်ႈတၢင်းမႆႊဢၼ်ၶဝ်ၼုင်ႈမႆႊၸိူဝ်းၼၼ်ႉၵူၼ်းယိပ်းၵွၵ်းၸဝ်ႈတင်းလၢႆဢိၵ်ႇတင်းယိၸ်ႉတုတ်ႇၽႆးဢၼ်ပုၵ်ႇၸေႃႇၵႃႈတီႈႁိူၼ်းထႃႇဝရႃႉၽြႃးၼၼ်ႉၸိူဝ်းၼၼ်ႉမၼ်းမီးတၢင်းဢၼ်လိုမ်းတူဝ်လိုမ်းႁၢင်ႊယူႇသေလႄႈလၢတ်ႈတီႈၶုၼ်ႁေႃၶမ်းလႄႈဝႃႈ၊-
၆ ၵႂၢမ်းသတၢင်းသဵင်ၶၢဝ်ႇဢၼ်ၵဝ်ၶႃႈယူႇၵႃႈတီႈမိူင်းၵဝ်ၶႃႈလႄႈလႆႈငိၼ်းလွင်ႈတၢင်းဢၼ်ၸဝ်ႈႁဝ်းႁဵတ်းတင်းလၢႆဢိၵ်ႇတင်းၺၢၼ်ႇပိင်ႇၺႃႇၸဝ်ႈႁဝ်းၼၼ်ႉပဵၼ်ဢၼ်မၢၼ်ႇဢၼ်မႅၼ်ႈတီႈၶႃႈဢေႃႈ။
၇ ၼႂ်းဝႃႈၼၼ်သေၵေႃႈၸူဝ်ႈဢၼ်ၵဝ်ၶႃႈဢမ်ႇပႆႇႁွတ်ႈထိုင်လႄႈထူပ်းႁၼ်ၼၼ်ႉ၊ၵဝ်ၶႃႈဢမ်ႇယုမ်ႇၵႂၢမ်းၼၼ်ႉ။မိူဝ်ႈလဵဝ်ၼႆႉၸမ်း၊ၵႂၢမ်းဢၼ်ၵဝ်ၶႃႈလႆႈငိၼ်းဢွၼ်တၢင်းၼၼ်ႉဢမ်ႇၶိုတ်းသေၶိုင်ႈၼိုင်ႈလႄႈၺၢၼ်ႇပိင်ႇၺႃႇၸဝ်ႈႁဝ်းတင်းၸေးၸိမ်ႇၸဝ်ႈႁဝ်းၼႆႉပဵၼ်ဢၼ်ပူၼ်ႉလိူဝ်သတၢင်းသဵင်ၶၢဝ်ႇဢၼ်ၵဝ်ၶႃႈလႆႈငိၼ်းၼၼ်ႉၶႃႈဢေႃႈ။
၈ ၵူၼ်းၸဝ်ႈႁဝ်းတင်းၶႃႈၸဝ်ႈႁဝ်းဢၼ်ယူႇၵႃႈတီႈၽၢႆႇၼႃႈၸဝ်ႈႁဝ်းယူႇသေလႄႈလႆႈငိၼ်းၺၢၼ်ႇပိင်ႇၺႃႇၸဝ်ႈႁဝ်းၸိူဝ်းၼႆႉမီးမၢင်ႇၵလႃႇၶႃႈဢေႃႈ။
၉ ႁႂ်ႈထႃႇဝရႃႉၽြႃးၽြႃးပဵၼ်ၸဝ်ႈၸဝ်ႈႁဝ်းဢၼ်ထုၵ်ႇၸႂ်တီႈၸဝ်ႈႁဝ်းလႄႈဢဝ်ၸဝ်ႈႁဝ်းတၢင်ႇၵႃႈၼိူဝ်ရႃႇၸႃႉပလၢင်ႇဢိသရေႇလၼႆႉၼၼ်ႉမီးမၢင်ႇၵလႃႇသေၵမ်းလူၺ်ႈ။ၵွပ်ႈပိူဝ်ႈဢၼ်ထႃႇဝရႃႉၽြႃးႁၵ်ႉမဵဝ်းဢိသရေႇလယူႇတႃႇသေႇလႄႈမၼ်းၸဝ်ႈၶၢၼ်းၸဝ်ႈႁဝ်းဝႆႉၵႃႈၼႂ်းဢရႃႇၶုၼ်ႁေႃၶမ်းႁႂ်ႈလႆႈႁဵတ်းတၢင်းဢၼ်ၸီႇယၢင်ႇတြႃးဢိၵ်ႇတင်းတၢင်းဢၼ်တႅပ်းတတ်းသိုဝ်ႈသိုဝ်ႈတေႃႇတေႃႇၼၼ်ႉၶႃႈယဝ်ႉ၊ဝႃႈၼင်ႇၼႆလႄႈ
၁၀ ဢဝ်ၶမ်းပၢၵ်ႇပၢႆသၢဝ်းတလၢၼ်ႇတၢၼ်ႇမဵဝ်းၼၢမ်ႇသႃႇၼမ်ၼႃႇလူင်လၢင်၊သႅင်လီသႅင်မျၢတ်ႈတင်းလၢႆသၢၵ်ႈပၼ်တီႈၶုၼ်ႁေႃၶမ်းဢေႃႈ။မဵဝ်းၼၢမ်ႇသႃႇဢၼ်ၼမ်ၼႃႇပဵင်းတၢၼ်ႇမဵဝ်းၼၢမ်ႇသႃႇဢၼ်ၼၢင်းႁေႃၶမ်းမိူင်းသေႇၽသၢၵ်ႈပၼ်တီႈၶုၼ်လူင်သေႃးလမုၼ်ႇၼၼ်ႉၵမ်းလိုၼ်းဢမ်ႇႁွတ်ႈဢမ်ႇၽႅဝ်ထႅင်ႈသေပွၵ်ႈ။
၁၁ ႁိူဝ်းသၢင်းၽေႃးႁိရမ်ႇဢၼ်ဢဝ်ၶမ်းၵႃႈတီႈမိူင်းဢေႃႇၽိရမႃးၸိူဝ်းၼၼ်ႉၵေႃႈဢွၼ်ၵၼ်ပႃးဢဝ်မႆႉၼၢမ်ႇသႃႇဢိၵ်ႇတင်းသႅင်လီသႅင်မျၢတ်ႈသေၵႃႈတီႈမိူင်းဢေႃႇၽိရႃႉၼၼ်ႉမႃးဢေႃႈ။
၁၂ ၶုၼ်ႁေႃၶမ်းဢဝ်မႆႉၼၢမ်ႇသႃႇၼၼ်ႉႁဵတ်းသဝ်ၵမ်ႉႁိူၼ်းထႃႇဝရႃႉၽြႃးတင်းႁေႃၸဝ်ႈႁဵတ်းတိင်ႇတရေႃးပုၼ်ႈၶဝ်ၸိူဝ်းဢၼ်ႁဵတ်းၵႂၢမ်းၼၼ်ႉဢေႃႈ။မႆႉၼၢမ်ႇသႃႇၼမ်ၼႃႇၸိူဝ်ႉၼင်ႇၼၼ်ၼၼ်ႉၵမ်းလိုၼ်း
၁၃ ဢမ်ႇႁွတ်ႈဢမ်ႇၽႅဝ်လႄႈမႃးထႅင်သေပွၵ်ႈယဝ်ႉ။ၶုၼ်လူင်သေႃးလမုၼ်ႇၼၼ်ႉၼွၵ်ႈသေလၢၵ်ႈသွင်ႇဢၼ်မၼ်းပၼ်တီႈၼၢင်းႁေႃၶမ်းသေႇၽၼၼ်ႉဢမ်ႇၵႃးမၼ်းပၼ်ၵႃႈၼင်ႇဢၼ်ၼၢင်းႁေႃၶမ်းမီးဢလူဝ်ႇသၼ်ႇတႃႉၶႂ်ႈလႆႈလႄႈယွၼ်းဢဝ်ၼၼ်ႉဢေႃႈ။လိုၼ်းၼၼ်ႉၼၢင်းႁေႃၶမ်းတင်းၶႃႈမၼ်းၵူၼ်းမၼ်းၶိုၼ်းမိူဝ်းၵႂႃႇမိူင်းၶဝ်သေဢေႃႈ။
တၢင်းႁူင်ႁၢင်းသေႃးလမုၼ်ႇ
၁၄ ၶမ်းဢၼ်ႁွတ်ႈမႃးၽႅဝ်မႃးတီႈသေႃးလမုၼ်ႇၼႂ်းယေႈပီႊယေႈပီႊၸမ်းမီးတၢင်းၼၵ်းႁူၵ်းပၢၵ်ႇႁူၵ်းသိပ်းပၢႆႁူၵ်းတလၢၼ်ႇတၢၼ်ႇဢေႃႈ။
၁၅ ၼွၵ်ႈသေၼၼ်ႉယင်းမီးၶမ်းဢၼ်ၵူၼ်းၵႃႉၵူၼ်းၶၢႆလႂ်ၸဝ်ႈၵုၼ်ႇၸဝ်ႈသႅၼ်းလႂ်ၶုၼ်လူင်တၢင်ႇၸိူဝ်ႉတၢင်ႇမဵဝ်းၵႃႈမီးလႂ်မဵဝ်ႉဝုၼ်ႇလႂ်တင်းလၢႆသၢၵ်ႈၼၼ်ႉလူးၵွၼ်ႇဢေႃႈ။
၁၆ ၶုၼ်လူင်သေႃးလမုၼ်ႇတွင်ႈႁဵတ်းၶိူင်ႈႁႄႉလၢၵ်ႈၼၢၵ်ႈဢၼ်ယေႈဢၼ်ပႃးၶမ်းႁူၵ်းပၢၵ်ႇၵျၢပ်ႈသၶေႇလႃႉၼၼ်ႉ
၁၇ သွင်ပၢၵ်ႇဢၼ်ၶိူင်ႈႁႄႉလၢၵ်ႈၼၢၵ်ႈဢွၼ်ႇဢၼ်ယေႈဢၼ်ပႃးၶမ်းသၢမ်ၸွႆႉၼၼ်ႉသၢမ်ပၢၵ်ႇဢၼ်လႄႈၶုၼ်ႁေႃၶမ်းဢဝ်ဝႆႉၵႃႈၼႂ်းႁေႃၸဝ်ႈထိူၼ်ႇလေႇပၼုၼ်ႇၼၼ်ႉဢေႃႈ။
၁၈ ၶုၼ်ႁေႃၶမ်းႁဵတ်းရႃႇၸႃႉပလၢင်ႇငႃးၸၢင်ႉလူင်ဢၼ်ဢဝ်တင်းၶမ်းလွတ်ႈငၢၼ်ႇဢုမ်ႇႁေႃႇၼၼ်ႉဢေႃႈ။
၁၉ ရႃႇၸႃႉပလၢင်ႇၸဝ်ႈၼၼ်ႉမီးၶၼ်ႈႁူၵ်းသိၵ်ႈလႄႈႁူဝ်ၽၢႆႇလင်မၼ်းမူၼ်းဝႆႉဢေႃႈ။ၵႃႈတီႈသွင်ၽၢႆႇတီႈၼင်ႈၼၼ်ႉမီးတီႈတၢင်ႇမိုဝ်းသွင်ဢၼ်လႄႈ
၂၀ မီးသၢင်ႇသီႈသွင်တူဝ်ၸုၵ်းယူႇသွင်ၽၢႆႇဢေႃႈ။ၵႃႈတီႈသွင်ၽၢႆႇၶၼ်ႈႁူၵ်းသိၵ်ႈၼၼ်ႉၵေႃႈမီးသၢင်ႇသီႈသိပ်းပၢႆသွင်တူဝ်ၸုၵ်းယူႇဢေႃႈ။ၵႃႈတီႈသိုင်ႇၸိုင်ႈဝၢၼ်ႈမိူင်းတီႈလႂ်တၢၼ်းလႂ်သေသိုင်ႇသေမိူင်းၵေႃႈဢမ်ႇမီးမိူၼ်ၸိူဝ်ႉၼင်ႇၼၼ်ၼၼ်ႉလႃးလႃး။
၂၁ ဝၢၼ်ႇၵွၵ်းၸဝ်ႈဢၼ််ၶုၼ်သေႃးလမုၼ်ႇၵိၼ်ၵႃႈမီးဢိၵ်ႇတင်းဝၢၼ်ႇၵွၵ်းၸဝ်ႈဢၼ်သုင်းသွင်ႇၵႃႈတီႈႁေႃၸဝ်ႈထိူၼ်ႇလေႇပၼုၼ်ႇၵႃႈမီးၼၼ်ႉ၊ဢမ်ႇၸႂ်ႈၵွၵ်းငိုၼ်း၊ပဵၼ်ၵွၵ်းၶမ်းလွၼ်ႉလွၼ်ႉဢေႃႈ။
၂၂ ၼႂ်းၸူဝ်ႈပၢၼ်သေႃးလမုၼ်ႇၼၼ်ႉၶဝ်ဢမ်ႇတိုဝ်းငိုၼ်း။ငိုၼ်းဢမ်ႇမီးၵႃႈၶၼ်လႃးလႃး။ၶုၼ်ႁေႃၶမ်းမီးႁိူဝ်းသၢင်းၽေႃးတင်းလၢႆလူၺ်ႈၵၼ်တင်းႁိူဝ်းသၢင်းၽေႃးႁိရမ်ႇၸိူဝ်းၼၼ်ႉလႄႈသၢမ်ပီႊယေႈပွၵ်ႈႁိူဝ်းသၢင်းၽေႃးၸိူဝ်းၼၼ်ႉၸၢင်ႊပႃးဢဝ်ငိုၼ်း၊ၶမ်း၊ငႃးၸၢင်ႉလိင်းလႂ်ၼူၵ်ႉယုင်းလႂ်သေလႄႈၶိုၼ်းမႃးဢေႃႈ။
၂၃ ၼင်ႇၼၼ်လႄႈၶုၼ်လူင်သေႃးလမုၼ်ႇမီးၸေးၸိမ်ႇတင်းၺၢၼ်ႇပိင်ႇၺႃႇယိင်ႈၶႅၼ်းလိူဝ်တွၼ်းၼႃႇသေၶုၼ်ႁေႃၶမ်းၵႃႈဢၼ်မီးၵႃႈၼိူဝ်လိၼ်မိူင်းၼၼ်ႉဢေႃႈ။
၂၄ ၵူၼ်းလိၼ်မိူင်းတင်းသဵင်ႈတင်းလူင်ဢွၼ်ၵၼ်မႃးၸူးၵႃႈတီႈသေႃးလမုၼ်ႇႁႂ်ႈလႆႈထွမ်ႇလႆႈငိၼ်းၵႂၢမ်းၺၢၼ်ႇပိင်ႇၺႃႇဢၼ်ၽြႃးပဵၼ်ၸဝ်ႈသႂၢင်းသႂ်ႇပၼ်ၵႃႈၼႂ်းႁူဝ်ၸႂ်မၼ်းၼၼ်ႉဢေႃႈ။
၂၅ ပီႊၼိုင်ႈယဝ်ႉပီႊၼိုင်ႈၶဝ်ၸိူဝ်းဢၼ်မႃးႁင်းၽႂ်ႁင်းမၼ်းၼၼ်ႉပႃးဢဝ်တင်းၵွၵ်းၶမ်းၵွၵ်းငိုၼ်းၶိူင်ႈၼုင်ႈတၢင်းမႆႊလၢၵ်ႈၼၢၵ်ႈတိုၵ်းသိုၵ်း၊မဵဝ်းၼၢမ်ႇသႃႇ၊မႃႉလီႈလႂ်လႄႈသၢၵ်ႈဢေႃႈ။
၂၆ သေႃးလမုၼ်ႇၸူႉႁွမ်လေႃႉရထႃးလႂ်၊ႁူဝ်ႁၢၼ်ၵူၼ်းသိုၵ်းၶီႇမႃႉလႂ်လႄႈမီးလေႃႉရထႃးႁဵင်ပၢႆသီႇပၢၵ်ႇႁူဝ်ႁၢၼ်ၵူၼ်းသိုၵ်းၶီႇမႃႉမိုၼ်ႇပၢႆသွင်ႁဵၼ်ၵႃႈတီႈဝဵင်းဢၼ်ထိင်းလေႃႉရထႃႇၸဝ်ႈ
၂၇ ဢိၵ်ႇတင်းၵႃႈတီႈမၼ်းၼႂ်းဝဵင်းယေႇရုသလႅမ်ႇၼၼ်ႉဢေႃႈ။ၶုၼ်ႁေႃၶမ်းႁႂ်ႈငိုၼ်းလိူင်ႇၼမ်ၼႃႇၵႃႈၼႂ်းဝဵင်းယေႇရုသလႅမ်ႇမိူၼ်ၸိူဝ်ႉၼင်ႇမၢၵ်ႇႁိၼ်မၢၵ်ႇသၢႆးလႄႈႁႂ်ႈတူၼ်ႈဢႃႇရိတ်ႉလိူင်ႇၼမ်ႇၼႃႇမိူၼ်ၸိူဝ်ႉၼင်ႇတူၼ်ႈမၢၵ်ႇလိူဝ်ႇသၢင်းၽေႃးဢၼ်ဢွၵ်ႇၵႃႈတီႈပၢင်ႇပဵင်းၼၼ်ႉဢေႃႈ။
၂၈ မႃႉၼမ်ၼႃႇဢၼ်လႆႈဢဝ်ၵႃႈတီႈမိူင်းဢေႇၵႅပ်ႉတုမႃးၵႃႈတီႈသေႃးလမုၼ်ႇၸိူဝ်းၼၼ်ႉၵေႃႈၸဝ်ႈၵုၼ်ႇၸဝ်ႈသႅၼ်းၶုၼ်ႁေႃၶမ်းတင်းလၢႆဢွၼ်ၵၼ်ပၼ်ၵႃႈမၼ်းၶၼ်မၼ်းလႄႈသိုဝ်ႉဢဝ်ဢေႃႈ။
၂၉ ၶဝ်သိုဝ်ႉဢဝ်လေႃႉရထႃးၵေႃႈၵႃႈၼႂ်းမိူင်းဢေႇၵႅပ်ႉတုမႃးယေႈလင်ငိုၼ်းႁူၵ်းပၢၵ်ႇၵျၢပ်ႈသၶေႇလႃႉ၊မႃႉယေႈတူဝ်ပၢၵ်ႇပၢႆႁႃႈသိပ်းၵျၢပ်ႈသၶေႇလႃႉဢေႃႈ။ၶဝ်သမ်ႉၶိုၼ်းၶၢႆပၼ်ၶုၼ်လူင်ႁိတ်ႉတိတင်းၶုၼ်လူင်သုရိၸိူဝ်းၼၼ်ႉဢေႃႈ။