Chapter
၁၃
ၵူၼ်းၽြႃးပဵၼ်ၸဝ်ႈၼႂ်းမဵဝ်းယုတ
၁ မိူဝ်ႈၼၼ်ႉၼႂ်းမိူဝ်ႈဢၼ်ယေႇရူဝ်းပုမ်ႇယင်းတိုၵ်ႉၸုၵ်းယူႇၵႃႈတီႈႁိမ်းယိတ်ႉပလၢင်ႇသေလႄႈႁႂ်ႈလႆႈႁဵတ်းတၢင်းဢၼ်ပုၵ်ႉၸေႃႇယိၸ်ႉၼၼ်ႉၸိုင်ၵူၼ်းၽြႃးပဵၼ်ၸဝ်ႈၵေႃႉၼိုင်ႈၸွမ်းၵႃႈၼင်ႇဢၼ်ၼုၵ်ႉၵပၢတ်ႈထႃႇဝရႃႉၽြႃးမီးၼၼ်ႉ၊
၂ မၼ်းလုၵ်ႉသေၵႃႈတီႈမိူင်းယုတႁွတ်ႈထိုင်မႃးၵႃႈတီႈဝဵင်းပေႇသလလႄႈႁွင်ႉပၢဝ်ႇၽၢႆႇၼိုင်ႈတင်းယိတ်ႉပလၢင်ႇၼၼ်ႉၸွမ်းၵႃႈၼင်ႇဢၼ်ၼုၵ်ႉၵပၢတ်ႈထႃႇဝရႃႉၽြႃးမီးၼၼ်ႉလႄႈဝႃႈ၊-ယိတ်ႉပလၢင်ႇဢိူၺ်း။ယိတ်ႉပလၢင်ႇဢိူၺ်း။ထႃႇဝရႃႉၽြႃးမီးဢမိင်ႉလႄႈဝႃႈၸမ်း၊-တူၺ်းလူး။လုၵ်ႈဢွၼ်ႇၵေႃႉၼိုင်ႈတၵ်းၵိူတ်ႇလဵင်ႉမႃးၼႂ်းၸိူဝ်ႉၶိူဝ်းတႃႇဝိတ်ႉလႄႈၵေႃႉၼၼ်ႉတၵ်းလႆႈၸိုဝ်ယုဝ်ႇသိယဢေႃႈ။ၵေႃႉၼၼ်ႉတၵ်းဢဝ်ၶဝ်ၸိူဝ်းဢၼ်ႁဵတ်းယိတ်ႉပရေႃးႁိၵ်ႈၵႃႈၼိူဝ်ထႃႇၼႃႉတီႈသုင်ၼၼ်ႉႁဵတ်းတၢင်းဢၼ်ပုၵ်ႉၸေႃႇလႄႈဢဝ်လုပ်ႇၵူၼ်းတၢႆမႆႈၵႃႈၼိူဝ်မႂ်းဢေႃႈ၊ဝႃႈၼင်ႇၼႆဢေႃႈ။
၃ ၼႂ်းဝၼ်းၼၼ်ႉၵမ်းလဵဝ်ၵေႃႉၼၼ်ႉပၼ်ပုၵ်ႉပႃႉၼီႉမိၵ်ႈလႄႈဝႃႈ၊-ပုၵ်ႉပႃႉၼီႉမိၵ်ႈဢၼ်ထႃႇဝရႃႉၽြႃးမီးဢမိင်ႉလႄႈဝႃႈၸမ်း၊တူၺ်းလူး။ယိတ်ႉပလၢင်ႇၼႆႉတၵ်းတႅၵ်ႇပဵၼ်သွင်ၽၢႆႇလႄႈတဝ်ႊဢၼ်မီးၵႃႈၼိူဝ်မၼ်းတၵ်းႁူဝ်ႈတူၵ်းဢေႃႈ၊ဝႃႈၼင်ႇၼႆဢေႃႈ။
၄ ၶုၼ်ႁေႃၶမ်းငိၼ်းၵႂၢမ်းဢၼ်ၵူၼ်းၽြႃးပဵၼ်ၸဝ်ႈယူႇၽၢႆႇၼိုင်ႈတင်းယိတ်းပလၢင်ႇၵႃႈတီႈဝဵင်းပေႇသလလႄႈႁွင်ႉပၢဝ်ၼၼ်ႉၸိုင်ယေႇရူဝ်းပုမ်ႇယဵတ်ႇမိုဝ်းမၼ်းသေၵႃႈၼိူဝ်ယိတ်ႉပလၢင်ႇလႄႈဝႃႈ၊-ဢွၼ်ၵၼ်တီႉၵမ်ဢဝ်မၼ်းတႃႉ၊ဝႃႈၼင်ႇၼႆဢေႃႈ။မိုဝ်းမၼ်းဢၼ်ယဵတ်ႇမိုဝ်းမၼ်းယူႇၽၢႆႇၼိုင်ႈတင်းၵေႃႉၼၼ်ႉၼၼ်ႉၸိုင်မိုဝ်းမၼ်းႁဵဝ်ႇႁူတ်းၵႂႃႇထၼ်ႈပေႃးဢမ်ႇၶိုၼ်းယိုတ်းဢဝ်ၶိုၼ်းလႆႈယဝ်ႉ။
၅ ယိတ်ႉပလၢင်ႇၵေႃႈတႅၵ်ႇပဵၼ်သွင်ပႃႈလႄႈတဝ်ႊႁူဝ်ႈတူၵ်းသေၵႃႈၼိူဝ်ယိတ်ႉပလၢင်ႇၼၼ်ႉမႅၼ်ႈၸွမ်းၵႃႈၼင်ႇပုၵ်ႉပႃႉၼီႉမိၵ်ႈဢၼ်ၵူၼ်းၽြႃးပဵၼ်ၸဝ်ႈဢဝ်တင်းၼုၵ်ႉၵပၢတ်ႈထႃႇဝရႃႉၽြႃးလႄႈမီးဢမိင်ႉၼၼ်ႉဢေႃႈ။ၶုၼ်ႁေႃၶမ်းၵေႃႈၶိုၼ်းလၢတ်ႈတီႈၵူၼ်းၽြႃးပဵၼ်ၸဝ်ႈၵေႃႉၼၼ်ႉလႄႈဝႃႈ၊-
၆ တွင်းပၢၼ်ႇၵႃႈတီႈၽၢႆႇၼႃႈထႃႇဝရႃႉၽြႃးၽြႃးပဵၼ်ၸဝ်ႈမႂ်းလႄႈႁဵတ်းပထၼႃႇပုၼ်ႈၵဝ်ႁႂ်ႈမိုဝ်းၵဝ်ၶိုၼ်းလီမႃးသေၵမ်း၊ဝႃႈၼင်ႇၼႆဢေႃႈ။ၵူၼ်းၽြႃးပဵၼ်ၸဝ်ႈၼၼ်ႉတွင်းပၢၼ်ႇထႃႇဝရႃႉၽြႃးလႄႈမိုဝ်းၶုၼ်ႁေႃၶမ်းၼၼ်ႉၶိုၼ်းလီမႃးလႄႈပဵၼ်ၸိူဝ်ႉၼင်ႇပၵ်းၵဝ်ႇပိူင်ၵဝ်ႇဢေႃႈ။
၇ ၶုၼ်ႁေႃၶမ်းၵေႃႈလၢတ်ႈတီႈၵူၼ်းၽြႃးပဵၼ်ၸဝ်ႈၼၼ်ႉလႄႈဝႃႈ၊-ၸွမ်းလူၺ်ႈၵၼ်တင်းၵဝ်လႄႈၵိၼ်တၢင်းၵိၼ်တၢင်းၶူပ်းတႃႉ။ၵဝ်တၵ်းပၼ်လၢၵ်ႈသွင်ႇတီႈမႂ်းဢေႃႈ၊ဝႃႈၼင်ႇၼႆဢေႃႈ။
၈ ၵူၼ်းၽြႃးပဵၼ်ၸဝ်ႈၼၼ်ႉလၢတ်ႈတီႈၶုၼ်ႁေႃၶမ်းလႄႈဝႃႈ၊-ပိၵ်ႉသမ်ႉၸဝ်ႈႁဝ်းပၼ်ႁၢင်ႈႁေႃၸဝ်ႈႁဝ်းၶိုင်ႈၼိုင်ႈသေၵေႃႈၵဝ်ၶႃႈဢမ်ႇၸွမ်းၸဝ်ႈႁဝ်း။ဢမ်ႇၵိၼ်တၢင်းၵိၼ်ၶဝ်ႈမုၼ်းၵႃႈတီႈၼႆႉ။
၉ ၼမ်ႉၵေႃႈၵဝ်ၶႃႈတၵ်းဢမ်ႇၵိၼ်။ၼုၵ်ႉၵပၢတ်ႈထႃႇဝရႃႉၽြႃးသင်ႇလၢတ်ႈတီႈၶႃႈၸဝ်ႈဝႆႉလႄႈဝႃႈ၊-ယႃႇပေၵိၼ်ၶဝ်ႈမုၼ်း။ယႃႇပေၵိၼ်ၼမ်ႉ။ယႃႇပေၶိုၼ်းမိူဝ်းၸွမ်းသဵၼ်ႈတၢင်းဢၼ်မႃးၼၼ်ႉ၊ဝႃႈၼင်ႇၼႆတီႈၶႃႈယဝ်ႉ၊ဝႃႈၼင်ႇၼႆဢေႃႈ။
၁၀ လိုၼ်းၼၼ်ႉမၼ်းၸွမ်းတၢင်းတၢင်ႇသဵၼ်ႈလႄႈယင်းဢမ်ႇၶိုၼ်းၸွမ်းသဵၼ်ႈတၢင်းဢၼ်မၼ်းမႃးၸူးၵႃႈတီႈဝဵင်းပေႇသလၼၼ်ႉလႄႈၶိုၼ်းမိူဝ်းၵႂႃႇဢေႃႈ။
၁၁ မိူဝ်ႈၼၼ်ႉမီးပရေႃးၽႅတ်ႈဢၼ်ဢသၢၵ်ႈယႂ်ႇၵေႃႉၼိုင်ႈၵႃႈၼႂ်းဝဵင်းပေႇသလၼၼ်ႉဢေႃႈ။လုၵ်ႈၸၢႆးမၼ်းၵေႃႉၼိုင်ႈမႃးလႄႈမွၵ်ႇလၢတ်ႈလွင်ႈတၢင်းၵႃႈဢၼ်ၵူၼ်းၽြႃးပဵၼ်ၸဝ်ႈႁဵတ်းၵႃႈၼႂ်းဝဵင်းပေႇသလၸိူဝ်းၼၼ်ႉတီႈပေႃႈမၼ်းဢေႃႈ။ၵႂၢမ်းၵေႃႉဢၼ်လၢတ်ႈတီႈၶုၼ်ႁေႃၶမ်းၸိူဝ်းၼၼ်ႉၵေႃႈမၼ်းမွၵ်ႇလၢတ်ႈတီႈပေႃႈမၼ်းဢေႃႈ။
၁၂ ပေႃႈမၼ်းထၢမ်ၶဝ်လွင်ႈသဵၼ်ႈတၢင်းဢၼ်ၵူၼ်းၽြႃးပဵၼ်ၸဝ်ႈၶိုၼ်းမိူဝ်းၵႂႃႇၼၼ်ႉလႄႈလုၵ်ႈၸၢႆးမၼ်းတင်းလၢႆၵေႃႈဢွၼ်ၵၼ်လၢတ်ႈလႄႈပေႃႈၶဝ်ဢေႃႈ။
၁၃ ပေႃႈၶဝ်သမ်ႉ၁၃ လၢတ်ႈတီႈလုၵ်ႈၸၢႆးမၼ်းတင်းလၢႆလႄႈဝႃႈ၊-ႁၢင်ႈၵွပ်းမႃႉလီႈတႃႉ၊ဝႃႈၼင်ႇၼႆလႄႈၶဝ်ၵေႃႈဢွၼ်ၵၼ်ႁၢင်ႈၵွပ်းမႃႉလီႈလႄႈပေႃႈၶဝ်ၶီႇသေယဝ်ႉလိုပ်ႈၸွမ်းၵူၼ်းၽြႃးပဵၼ်ၸဝ်ႈၼၼ်ႉဢေႃႈ။
၁၄ မၼ်းထူပ်းႁၼ်ၵေႃႉၼၼ်ႉၼင်ႈယူႇၵႃႈတႂ်ႈတူၼ်ႈမႆႉၼိမ်လႄႈမၼ်းထၢမ်ဝႃႈ၊-မႂ်းၼႆႉပဵၼ်ၵူၼ်းၽြႃးပဵၼ်ၸဝ်ႈဢၼ်လုၵ်ႉသေၵႃႈတီႈမိူင်းယုတမႃးၼၼ်ႉႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်၊ၵေႃႉၼၼ်ႉၵေႃႈၶိုၼ်းလၢတ်ႈလႄႈဝႃႈ၊-
၁၅ ၸႂ်ႈၶႃႈဢေႃႈ၊ဝႃႈၼင်ႇၼႆဢေႃႈ။မၼ်းၵေႃႈႁွင်ႉပၢင်းဢဝ်ၵေႃႉၼၼ်ႉလႄႈဝႃႈ၊-ၸွမ်းၵဝ်မိူဝ်းၵႃႈတီႈႁိူၼ်းၵဝ်လႄႈၵိၼ်ၶဝ်ႈမုၼ်းလူၺ်ႈၵၼ်တင်းၵဝ်သေၵမ်း၊
၁၆ မိူဝ်ႈဢၼ်ဝႃႈၼင်ႇၼႆၸိုင်၊ၵေႃႉၼၼ်ႉလၢတ်ႈလႄႈဝႃႈ၊-ၵဝ်ဢမ်ႇလႆႈၸွမ်းလူၺ်ႈၵၼ်တင်းမႂ်း၊ၵဝ်ဢမ်ႇလႆႈၶဝ်ႈၵႃႈၼႂ်းႁိူၼ်းမႂ်းၵဝ်ဢမ်ႇလႆႈၵိၼ်ၶဝ်ႈမုၼ်းၵႃႈတီႈၼႆႉ၊ၼမ်ႉၵေႃႈဢမ်ႇလႆႈၵိၼ်။
၁၇ ထႃႇဝရႃႉၽြႃးမီးဢမိင်ႉဝႆႉတီႈၵဝ်လႄႈဝႃႈ၊-မႂ်းဢမ်ႇလႆႈၵိၼ်ၶဝ်ႈမုၼ်းၵႃႈတီႈၼၼ်ႉ၊ၼမ်ႉၵေႃႈဢမ်ႇလႆႈၵိၼ်မႂ်းဢမ်ႇလႆႈဝၢႆႇၶိုၼ်းၸွမ်းသဵၼ်ႈတၢင်းဢၼ်မႂ်းမႃးၼၼ်ႉလႄႈမိူဝ်း၊ဝႃႈၼင်ႇၼႆဝႆႉယဝ်ႉ၊ဝႃႈၼင်ႇၼႆဢေႃႈ။
၁၈ မၼ်းၵေႃႈလၢတ်ႈတီႈၵေႃႉၼၼ်ႉလႄႈဝႃႈ၊-ၵဝ်ပဵၼ်ပရေႃးၽႅတ်ႈမိူၼ်ၸိူဝ်ႉၼင်ႇမႂ်းဢေႃႈ။တမၢၼ်ႇၵၢင်ႁၢဝ်ဢဝ်တင်းၼုၵ်ႉၵပၢတ်ႈထႃႇဝရႃႉၽြႃးသင်ႇလၢတ်ႈဝႆႉတီႈၵဝ်လႄႈဝႃႈ၊-မႂ်းၵႂႃႇႁွင်ႉဢဝ်မၼ်းမႃးၵႃႈတီႈႁိူၼ်းမႂ်းလႄႈႁႂ်ႈမၼ်းၵိၼ်ၶဝ်ႈမုၼ်းၵိၼ်ၼမ်ႉတႃႉ၊ဝႃႈၼင်ႇၼႆယဝ်ႉ၊ဝႃႈၼင်ႇၼႆလႄႈသုင်းမူႉသႃႇလႄႈလၢတ်ႈဢေႃႈ။
၁၉ ပိူဝ်ႈၼႆလႄႈၵေႃႉၼၼ်ႉၶိုၼ်းၸွမ်းလူၺ်ႈၵၼ်တင်းမၼ်းလႄႈၵိၼ်ၶဝ်ႈမုၼ်းၵႃႈတီႈႁိူၼ်းမၼ်းဢေႃႈ။ၼမ်ႉၵေႃႈၵိၼ်ဢေႃႈ။
၂၀ ၼႂ်းမိူဝ်ႈဢၼ်သွင်ၶႃယင်းတိုၵ်ႉၼင်ႈယူႇၵႃႈတီႈၽိူၼ်တီႈၵိၼ်ယူႇၼၼ်ႉၼုုၵ်ႉၵပၢတ်ႈထႃႇဝရႃႉၽြႃးႁွတ်ႈမႃးတီႈပရေႃးၽႅတ်ႈဢၼ်ႁွင်ႉဢဝ်ၶိုၼ်းမႃးၼၼ်ႉလႄႈ
၂၁ မၼ်းၵေႃႈသႅၼ်ႇႁွင်ႉတီႈၵူၼ်းၽြႃးပဵၼ်ၸဝ်ႈဢၼ်လုၵ်ႉသေၵႃႈတီႈမိူင်းယုတမႃးၼၼ်ႉလႄႈဝႃႈ၊-ထႃႇဝရႃႉၽြႃးမီးဢမိင်ႉလႄႈဝႃႈၸမ်း၊-ၵွပ်ႈပိူဝ်ႈဢၼ်မႂ်းယင်းဢမ်ႇထွမ်ႇဢမ်ႇဢဝ်ၼုၵ်ႉၵပၢတ်ႈဢၼ်ဢွၵ်ႇသေၵႃႈတီႈသူပ်းထႃႇဝရႃႉၽြႃးၼၼ်ႉယင်းဢမ်ႇပႂ်ႉပိင်းၺၢပ်ႈၸဝ်ႈဢၼ်ထႃႇဝရႃႉၽြႃးၽြႃးပဵၼ်ၸဝ်ႈမႂ်းပၼ်ဝႆႉၼၼ်ႉလႄႈ
၂၂ ၶိုၼ်းမႃးၵိၼ်ၶဝ်ႈမုၼ်းတင်းၼမ်ႉၵႃႈၼႂ်းတီႈဢၼ်မၼ်းၸဝ်ႈပိင်းၺၢပ်ႈဝႆႉဝႃႈယႃႇပေၵိၼ်ၶဝ်ႈမုၼ်းယႃႇပေၵိၼ်ၼမ်ႉ၊ဢၼ်ဝႃႈၼၼ်ႉလႄႈတူဝ်တၢႆမႂ်းတၵ်းဢမ်ႇလႆႈႁွတ်ႈထိုင်ၵႃႈတီႈပႃႇႁဵဝ်ႈပူႇမွၼ်ႇမႂ်းၸိူဝ်းၼၼ်ႉ၊ဝႃႈၼင်ႇၼႆဝႆႉယဝ်ႉ၊ဝႃႈၼင်ႇၼႆဢေႃႈ။
၂၃ ၵေႃႉၼၼ်ႉၵေႃႈၵိၼ်ၶဝ်မုၼ်းတင်းၼမ်ႉသေယဝ်ႉမၼ်းႁၢင်ႈၵွပ်းမႃႉလီႈမၼ်းပၼ်တီႈၵေႃႉၼၼ်ႉဢၼ်ဝႃႈပရေႃးၽႅတ်ႈဢၼ်မၼ်းႁွင်ႉဢဝ်ၶိုၼ်းမႃးၼၼ်ႉဢေႃႈ။
၂၄ မိူဝ်ႈဢၼ်ၵေႃႉၼၼ်ႉၵႂႃႇယဝ်ႉၼၼ်ႉၸိုင်သၢင်ႇသီႈႁူပ်ႉထူပ်းမၼ်းၵႃႈတီႈၵၢင်တၢင်းလႄႈဢဝ်မၼ်းတၢႆဢေႃႈ။တူဝ်တၢႆမၼ်းၼၼ်ႉလူမ်ႉတူၵ်းယူႇၵႃႈတီႈသဵၼ်ႈတၢင်းလႄႈမႃႉလီႈၼၼ်ႉၸုၵ်းယူႇၵႃႈႁိမ်းမၼ်းယူႇသေလႄႈသၢင်ႇသီႈၵေႃႈၸုၵ်းယူႇၵႃႈတီႈႁိမ်းတူဝ်တၢႆၼၼ်ႉဢေႃႈ။
၂၅ ၵူၼ်းၵႂႃႇတၢင်းပႆတၢင်းလႄႈႁၼ်တူဝ်တၢႆၼၼ်ႉလူမ်ႉတူၵ်းယူႇၵႃႈတီႈသဵၼ်ႈတၢင်းလႄႈသၢင်ႇသီႈၸုၵ်းယူႇၵႃႈတီႈႁိမ်းတူဝ်တၢႆၼၼ်ႉသေယဝ်ႉ၊ဢွၼ်ၵၼ်မႃးလႄႈမွၵ်ႇလၢတ်ႈလွင်ႈမၼ်းၵႃႈၼႂ်းဝဵင်းဢၼ်ပရေႃးၽႅတ်ႈဢၼ်ဢသၢၵ်ႈယႂ်ႇၼၼ်ႉယူႇၼၼ်ႉဢေႃႈ။
၂၆ ပရေႃးၽႅတ်ႈဢၼ်ႁွင်ႉဢဝ်မၼ်းၶိုၼ်းမႃးၼၼ်ႉငိၼ်းလွင်ႈၼၼ်ႉသေယဝ်ႉ၊လၢတ်ႈလႄႈဝႃႈ၊-မၼ်းပဵၼ်ၵူၼ်းၽြႃးပဵၼ်ၸဝ်ႈဢၼ်ဢမ်ႇထွမ်ႇဢမ်ႇဢဝ်ၼုၵ်ႉၵပၢတ်ႈဢၼ်ဢွၵ်ႇသေၵႃႈတီႈသူပ်းထႃႇဝရႃႉၽြႃးၼၼ်ႉဢေႃႈ။
၂၇ ပိူဝ်ႈၼႆလႄႈထႃႇဝရႃႉၽြႃးဢဝ်မၼ်းဢၢပ်ႈပၼ်တီႈသၢင်ႇသီႈဢၼ်ၶူပ်းမၼ်းတၢႆၼၼ်ႉၸွမ်းၵႃႈၼင်ႇဢၼ်ၵႂၢမ်းထႃႇဝရႃႉၽြႃးမီးဢမိင်ႉဝႆႉၼၼ်ႉယဝ်ႉ၊ဝႃႈၼင်ႇၼႆသေလႄႈ၊လၢတ်ႈတီႈလုၵ်ႈၸၢႆးမၼ်းတင်းလၢႆလႄႈဝႃႈ၊-ႁၢင်ႈၵွပ်းမႃႉလီႈတႃႉ၊ဝႃႈၼင်ႇၼႆလႄႈၶဝ်ၵေႃႈႁၢင်ႈၵွပ်းမႃႉလီႈဢေႃႈ။
၂၈ မၼ်းၵႂႃႇလႄႈထူပ်းႁၼ်တူဝ်တၢႆၵေႃႉၼၼ်ႉလူမ်ႉတူၵ်းၵႃႈတီႈသဵၼ်တၢင်းယူႇ၊မႃႉလီႈတင်းသၢင်ႇသီႈၼၼ်ႉၸုၵ်းၵႃႈတီႈႁိမ်းတူဝ်တၢႆၼၼ်ႉယူႇၼၼ်ႉဢေႃႈ။သၢင်ႇသီႈၼၼ်ႉဢမ်ႇၵိၼ်တူဝ်တၢႆ။
၂၉ မႃႉလီႈၵေႃႈမၼ်းဢမ်ႇၶူပ်း။ပရေႃးၽႅတ်ႈၼၼ်ႉဢုမ်ႈဢဝ်တူဝ်တၢႆၵူၼ်းၽြႃးပဵၼ်ၸဝ်ႈၼၼ်ႉလႄႈတၢင်ႇၵႃႈၼိူဝ်မႃႉလီႈသေယဝ်ႉလွင်ႈၼင်ႇႁိုဝ်တၵ်းလႆႈႁႆႈႁွင်ႉပွင်ႉၶင်းပုၼ်ႈမၼ်းလႄႈဢဝ်မၼ်းသၢင်းၵျူဝ်ႇၸိုင်ဢဝ်တူဝ်တၢႆမၼ်းၶိုၼ်းမိူဝ်းလႄႈႁွတ်ႈထိုင်ၵႃႈတီႈဝဵင်းပရေႃးၽႅတ်ႈဢၼ်ဢသၢၵ်ႈယႂ်ႇၼၼ်ႉဢေႃႈ။
၃၀ မၼ်းဢဝ်တူဝ်တၢႆၵေႃႉၼၼ်ႉဝႆႉၵႃႈၼႂ်းၶုမ်သၢင်းၶျႅင်းမၼ်းသေလႄႈႁႆႈႁွင်ႉပွင်ႉၶၢင်းလႄႈဝႃႈ၊-ဢလူဝ်ႉ၊ၼွင်ႉၸၢႆးၵဝ်ဢိူၺ်း။ဝႃႈၼင်ႇၼႆဢေႃႈ။
၃၁ မၼ်းသၢင်းၵျူဝ်ႇၵေႃႉၼၼ်ႉသေယဝ်ႉ၊သင်ႇလၢတ်ႈဝႆႉတီႈလုၵ်ႈၸၢႆးမၼ်းတင်းလၢႆလႄႈဝႃႈ၊-မိူဝ်ႈဢၼ်ၵဝ်တၢႆၼၼ်ႉၸိုင်၊သူဢွၼ်ၵၼ်ဢဝ်ၵဝ်သၢင်းၵျူဝ်ႇၵႃႈၼႂ်းၶုမ်သၢင်းၶျႅင်းတီႈဢၼ်ၵူၼ်းၽြႃးပဵၼ်ၸဝ်ႈလႆႈၶၢမ်ႇတၢင်းဢၼ်သၢင်းၵျူဝ်ၼၼ်ႉတႃႉ။ဢဝ်လုပ်ႇၵဝ်ဝႆႉၵႃႈတီႈႁိမ်းလုပ်ႇမၼ်းတႃႉ။
၃၂ ၵႂၢမ်းဢၼ်ၵေႃႉၼၼ်ႉၸွမ်းၵႃႈၼင်ႇဢၼ်ၼုၵ်ႉၵပၢတ်ႈထႃႇဝရႃႉၽြႃးမီးၼၼ်ႉသေလႄႈႁွင်ႉပၢဝ်ႇယူႇၽၢႆႇၼိုင်ႈတင်းယိတ်ႉပလၢင်ႇဝဵင်းပေႇသလဢိၵ်ႇတင်းၽၢႆႇၼိုင်ႈတင်းႁိူၼ်းၸဝ်ႈၵႃႈဢၼ်ႁဵတ်းၵႃႈၼိူဝ်ထႃႇၼႃႉတီႈသုင်တင်းလၢႆၵႃႈၼႂ်းဝၢၼ်ႈၼႂ်းဝဵင်းသမႃႇရိၸိူဝ်းၼၼ်ႉတၵ်းတဵမ်ထူၼ်ႈဢမၢၼ်ၶၢၼ်ပဵၼ်ဢေႃႈ၊ဝႃႈၼင်ႇၼႆဢေႃႈ။
၃၃ လိုၼ်းၼၼ်ႉယေႇရူဝ်းပုမ်ႇၼၼ်ႉယင်းဢမ်ႇၸုၼ်ႉသဵၼ်ႈတၢင်းဢႃႉထမ်ႇမႃႉမၼ်းလႄႈမၼ်းယင်းဢဝ်ၵူၼ်းၵူႈၸိူဝ်ႉၵူႈၶိူဝ်းထၢပ်ႈလႄႈၶၢၼ်းဝႆႉၵႃႈၼႂ်းဢရႃႇယိတ်ႉပရေႃးႁိၵ်ႈထႅင်ႈဢေႃႈ။ၶဝ်ၸိူဝ်းဢၼ်မီးဢလူဝ်ႇၶႂ်ႈပဵၼ်ယိတ်ႉပရေႃးႁိၵ်ႈၵႃႈမီးၼၼ်ႉၸိုင်မၼ်းယုၵ်ႉယွင်ႈႁႂ်ႈပဵၼ်ယိတ်ႉပရေႃးႁိၵ်ႈၵႃႈတီႈထႃႇၼႃႉတီႈသုင်တင်းလၢႆဢေႃႈ။
၃၄ ၵွပ်ႈပိူဝ်ႈလွင်ႈတၢင်းၼၼ်ႉလႄႈဢပျႅတ်ႈႁွတ်ႈထိုင်ၵႃႈတီႈၸိူဝ်ႉၶိူဝ်းယေႇရူဝ်းပုမ်ႇသေယဝ်ႉလႆႈၶၢမ်ႇတၢင်းဢၼ်ပေႇပႅတ်ႈၽဵဝ်ႈပႅတ်ႈသေၵႃႈၼိူဝ်ၼႃႈလိၼ်မိူင်းဢေႃႈ။