Chapter
၁
ဢတေႃႇၼိယႁဵတ်းၶုၼ်ႁေႃၶမ်း
၁ ၶုၼ်လူင်တႃႇဝိတ်ႉၼၼ်ႉမိူဝ်ႈဢၼ်ဢသၢၵ်ႈၵႄႇထူၼ်ႈလႄႈထဝ်ႈယဝ်ႉၼၼ်ႉၸိုင်မႆႊၽႃႈမႆႊၵေႃႈဢမ်ႇဢူၼ်ႇလႆႈ။
၂ ပိူဝ်ႈဢၼ်ပဵၼ်ၼင်ႇၼႆလႄႈၶႃႈၵူၼ်းၸဝ်ႈတင်းလၢႆလဝ်ႈလၢတ်ႈလႄႈဝႃႈ၊-ႁႂ်ႈလႆႈႁႃဢဝ်သၢဝ်ၵၼ်ႇၺႃႇဢၼ်ဢသၢၵ်ႈယင်းၼုမ်ႇၼၼ်ႉပုၼ်ႈၸဝ်ႈၶုၼ်လူင်ႁဝ်းသေၵမ်းၶႃႈ။ႁႂ်ႈမၼ်းၶႃးၸႃးၵႃႈတီႈၽၢႆႇၼႃႈၶုၼ်လူင်လႄႈလူတူၺ်းလုမ်းလႃးၸဝ်ႈႁဝ်းသေၵမ်းၶႃႈ။ႁႂ်ႈမၼ်းၼွၼ်းၵႃႈၼႂ်းဝၢင်ႈႁူဝ်ဢူၵ်းၸဝ်ႈၶုၼ်လူင်ႁဝ်းလႄႈႁႂ်ႈၸဝ်ႈႁဝ်းဢုၼ်ႇလီသေၵမ်းၶႃႈ၊ဝႃႈၼင်ႇၼႆဢေႃႈ။
၃ ၵႃႈၼင်ႇဢၼ်ဝႃႈၼၼ်ႉၶဝ်ဢွၼ်ၵၼ်ႁႃဢဝ်သၢဝ်ၵၼ်ႇၺႃႇဢၼ်ႁၢင်ႊလီၼၼ်ႉၵႃႈၼႂ်းမိူင်းဢိသရေႇလၵူႈတီႈၵူႈလႅၼ်လႄႈထူပ်းႁၼ်ဢၽသၵ်ႉၵူၼ်းယိင်းဝဵင်းသုၼိမ်ႇသေယဝ်ႉဢဝ်မၼ်းမႃးၸူးၵႃႈတီႈၶုၼ်ႁေႃၶမ်းဢေႃႈ။
၄ မေႈယိင်းၼၼ်ႉႁၢင်ႈလီၼႃႇလူင်လၢင်လႄႈလႆႈလူတူၺ်းလုမ်းလႃးၶုၼ်ႁေႃၶမ်းဢေႃႈ။ၼႂ်းဝႃႈၼၼ်သေၵေႃႈၶုၼ်ႁေႃၶမ်းဢမ်ႇတိူဝ်ႉဢမ်ႇထုၵ်ႇမၼ်း။
၅ လိုၼ်းၼၼ်ႉဢတေႃႇၼိယလုၵ်ႈၸၢႆးႁၵ်ႉၵိတ်ႉၼၼ်ႇၼၼ်ႉယုၵ်ႉယွင်ႈတူဝ်ၸဝ်ႈၵဝ်ႇလႄႈဝႃႈ၊-ၵဝ်တၵ်းႁဵတ်းၶုၼ်ႁေႃၶမ်းဢေႃႈ၊ဝႃႈၼင်ႇၼႆလႄႈမႄးႁႅၼ်းလေႃႉရထႃးလႂ်၊မႃႉလႂ်၊ဢိၵ်ႇတင်းၵူၼ်းႁႃႈသိပ်းဢၼ်လႆႈၶုၼ်ႇလႅၼ်ႈၵႂႃႇဢွၼ်တၢင်းမၼ်းလႂ်ၼၼ်ႉဢေႃႈ။
၆ ၸဝ်ႈပေႃႈမၼ်းဢမ်ႇတွၼ်ႉႁဵတ်းႁႂ်ႈမၼ်းၽိတ်းၸႂ်ၸဵပ်းၸႂ်သေပွၵ်ႈၼၼ်ႉလၢတ်ႈဝႃႈ၊-ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းႁဵတ်းၸိူဝ်ႉၼင်ႇၼႆ၊ဝႃႈၼင်ႇၼႆဢေႃႈ။မၼ်းၼၼ်ႉပဵၼ်ၵေႃႉဢၼ်ႁၢင်ႊလီၽၢင်လီလႄႈၵိူတ်ႇလဵင်ႉမႃးလိုၼ်းလင်ဢပသလုမ်ႇၼၼ်ႉဢေႃႈ။
၇ မၼ်းၼၼ်ႉတိူင်ႇပၢင်ႇၵၼ်တင်းယႂႃႇၽလုၵ်ႈၸၢႆးၸေႇရုယႃႇဢိၵ်ႇတင်းယိတ်ႉပရေႃးႁိၵ်ႈဢႃႇပျႃႇထႃႇလႄႈၶဝ်ၼၼ်ႉၵေႃႈယူႇၽၢႆႇဢတေႃႇၼိယၼၼ်ႉသေလႄႈၸွႆႈထႅမ်မၼ်းဢေႃႈ။
၈ ယိတ်ႉပရေႃးႁိၵ်ႈၸႃႇတုၵ်ႉ၊ပေႇၼႃႇယ၊လုၵ်ႈၸၢႆးယေႃႇယတ၊ပရေႃးၽႅတ်ႈၼႃႇသၼ်ႇ၊သိမိ၊ရေႇဢိဢိၵ်ႇတင်းႁူဝ်ႁၢၼ်ၵူၼ်းသိုၵ်းဢၼ်ႁႅင်းယႂ်ႇၼႃႇဢၼ်မီးလူၺ်ႈၵၼ်တင်းတႃႇဝိတ်ႉၸိူဝ်းၼၼ်ႉၸမ်းဢမ်ႇၶဝ်ႈဢမ်ႇပႃးၽၢႆႇဢတေႃႇၼိယ။
၉ ဢတေႃႇၼိယၼၼ်ႉဢဝ်သူဝ်းဝူဝ်း၊တူဝ်ဢၼ်ပီးလီမၼ်းလီၼၼ်ႉတၢႆၵႃႈတီႈႁိမ်းမၢၵ်ႇႁိၼ်ၸေႃႇႁေႇလိတ်ႉၼႂ်းလိၼ်ဢိၼ်ႇရေႃႇၵေႇလၼၼ်ႉသေယဝ်ႉႁွင်ႉပၢင်းဢဝ်ၼွင်ႉၸၢႆးမၼ်းလုၵ်ႈၸၢႆးၶုၼ်ႁေႃၶမ်းတင်းသဵင်ႈတင်းလူင်ဢိၵ်ႇတင်းၵူၼ်းမဵဝ်းယုတၶႃႈၵူၼ်းၶုၼ်ႁေႃၶမ်းတင်းလၢႆၼၼ်ႉဢေႃႈ။
၁၀ ပရေႃးၽႅတ်ႈၼႃႇသၼ်ႇတင်းပေႇၼႃႇယ၊ဢိၵ်ႇတင်းႁူဝ်ႁၢၼ်ၵူၼ်းသိုၵ်းဢၼ်ႁႅင်းယႂ်ႇၼႃႇတင်းလၢႆတင်းၼွင်ႉၸၢႆးမၼ်းသေႃးလမုၼ်ႇၼၼ်ႉၸမ်းမၼ်းဢမ်ႇႁွင်ႉဢမ်ႇပၢင်း။
၁၁ မိူဝ်ႈၼၼ်ႉၼႃႇသၼ်ႇလဝ်ႈလၢတ်ႈတီႈပႃႇသသေႇၽမေႈသေႃးလမုၼ်ႇၼၼ်ႉလႄႈဝႃႈ၊-ၸဝ်ႈၼၢင်းႁဝ်းလႆႈငိၼ်းလွင်ႈဢၼ်ဢတေႃႇၼိယလုၵ်ႈၸၢႆးႁၵ်ႉၵိတ်ႉၼၼ်ႇၼၼ်ႉႁဵတ်းၶုၼ်ႁေႃၶမ်းၼၼ်ႉယဝ်ႉတီႈၶႃႈႁိုဝ်။
၁၂ ၸဝ်ႈႁဝ်းတႃႇဝိတ်ႉၼၼ်ႉဢမ်ႇႁူႉတီႈၶႃႈလူင်ပေႇ။ပိူဝ်ႈၼႆလႄႈမိူဝ်ႈလဵဝ်ၼႆႉၼင်ႇႁိုဝ်တၵ်းႁႂ်ႈဢသၢၵ်ႈၸဝ်ႈၼၢင်းႁဝ်းဢိၵ်ႇတင်းဢသၢၵ်ႈလုၵ်ႈၸၢႆးၸဝ်ႈၼၢင်းႁဝ်းသေႃးလမုၼ်ႇတၵ်းၵတ်းယဵၼ်ၶျၢမ်းသႃႇၸိုင်ႁႂ်ႈၶႃႈၸဝ်ႈလႆႈပၼ်တၢင်းၵျၢမ်ႇတၢင်းပွင်တီႈၸဝ်ႈၼၢင်းႁဝ်းသေၵမ်းတီႈၶႃႈ။ၶႅၼ်းတေႃႈၶဝ်ႈၸူးၵႃႈတီႈၶုၼ်လူင်တႃႇဝိတ်ႉသေလႄႈထၢမ်ဝႃႈ၊-ၸဝ်ႈၶုၼ်လူင်တီႈၶႃႈဢိူၺ်း။
၁၃ ၸဝ်ႈႁဝ်းၵိၼ်ႇဝႃႈတီႈၶႃႈၸဝ်ႈလႄႈဝႃႈလုၵ်ႈၸၢႆးမႂ်းသေႃးလမုၼ်ႇၼၼ်ႉတၵ်းလႆႈဢုပ်ႉပိူင်ႇၸၢမ်ႇၸႃးလိုၼ်းၵဝ်လႄႈၼင်ႈၵႃႈၼိူဝ်ရႃႇၸႃႉပလၢင်ႇၵဝ်ဢေႃႈ၊ဝႃႈၼင်ႇၼႆဝႆႉယဝ်ႉ၊ဢမ်ႇၸႂ်ႈတီႈၶႃႈႁိုဝ်။ပေႃးပဵၼ်ၼင်ႇၼၼ်ၸိုင်ၵွပ်ႈပိူဝ်ႈၸိူဝ်ႈၼင်ႇႁိုဝ်လႄႈဢတေႃႇၼိယၼၼ်ႉလႆႈဢုပ်ႉႉပိူင်ႇၸၢမ်ႇၸႃးၼင်ႇႁိုဝ်တီႈၶႃႈ၊ဝႃႈၼင်ႇၼႆသေၵမ်းတီႈၶႃႈ။
၁၄ မိူဝ်ႈဢၼ်ၸဝ်ႈၼၢင်းႁဝ်းယင်းတိုၵ်ႉလဝ်ႈလၢတ်ႈတီႈၶုၼ်ႁေႃၶမ်းၸိူဝ်ႉၼင်ႇၼၼ်ယူႇၼၼ်ႉၸိုင်ၶႃႈၸဝ်ႈတၵ်းၶဝ်ႈၸွမ်းလႄႈၵမ်ႉထွၵ်ႈၸွႆႈထႅမ်ၵႂၢမ်းၸဝ်ႈၼၢင်းႁဝ်းယူႇတီႈၶႃႈဢေႃႈ၊ဝႃႈၼင်ႇၼႆလႄႈ၊
၁၅ ပႃႇသသေႇၽၵေႃႈၶဝ်ႈၸူးၵႃႈၼႂ်းလုၵ်းတီႈဢၼ်ၶုၼ်ႁေႃၶမ်းမီးၼၼ်ႉဢေႃႈ။ၶုၼ်ႁေႃၶမ်းထဝ်ႈၼႃႇလူင်လၢင်လႄႈဢၽိသၵ်ႉၵူၼ်းယိင်းဝဵင်းသုၼိမ်ႇၼၼ်ႉလူတူၺ်းလုမ်းလႃးဝႆႉယူႇဢေႃႈ။
၁၆ ပႃႇသသေႇၽၼၼ်ႉဝၢင်းႁူဝ်လႄႈဝႆႈၶုၼ်ႁေႃၶမ်းသေယဝ်ႉ၊ၶုၼ်ႁေႃၶမ်းၵေႃႈထၢမ်ဝႃႈ၊-မႂ်းမီးဢလူဝ်ႇၵႃႈသင်၊ဝႃႈၼင်ႇၼႆဢေႃႈ။မၼ်းၵေႃႈလဝ်ႈလၢတ်ႈလႄႈဝႃႈ၊-ၸဝ်ႈႁဝ်းတီႈၶႃႈ။
၁၇ ၸဝ်ႈႁဝ်းဢဝ်ထႃႇဝရႃႉၽြႃးၽြႃးပဵၼ်ၸဝ်ႈၸဝ်ႈႁဝ်းလႄႈတိူင်ႇဝႃႈၵိၼ်ႇဝႃႈတီႈၶႃႈၸဝ်ႈႁဝ်းဝႆႉလႄႈဝႃႈ၊-လုၵ်ႈၸၢႆးမႂ်းသေႃးလမုၼ်ႇတၵ်းလႆႈဢုပ်ႉပိူင်ႇၸၢမ်ႇၸႃးလိုၼ်းၵဝ်လႄႈၼင်ႈၵႃႈၼိူဝ်ရႃႇၸႃႉပလၢင်ႇၵဝ်ဢေႃႈ၊ဝႃႈၼင်ႇၼႆဝႆႉတီႈၶႃႈယဝ်ႉ။
၁၈ တူၺ်းတီႈၶႃႈလူး။မိူဝ်ႈလဵဝ်ၼႆႉၸိုင်ဢတေႃႇၼိယၼၼ်ႉဢုပ်ႉပိူင်ႇၸၢမ်ႇၸႃးဝႆႉတီႈၶႃႈဢေႃႈ။
၁၉ ၸဝ်ႈၵဝ်ၶႃႈၸဝ်ႈၶုၼ်လူင်ၵေႃႈဢမ်ႇႁူႉတီႈၶႃႈ။မၼ်းၼၼ်ႉဢဝ်သူဝ်းဝူဝ်း၊တူဝ်ဢၼ်ပီးလီမၼ်းလီၼၼ်ႉတၢႆသေယဝ်ႉႁွင်ႉပၢင်းဢဝ်လုၵ်ႈၸၢႆးၸဝ်ႈၶုၼ်လူင်တင်းသဵင်ႈတင်းလူင်ဢိၵ်ႇတင်းယိတ်ႉပရေႃးႁိၵ်ႈဢႃႇပျႃႇထႃႇ၊ၶုၼ်ႁူဝ်သိုၵ်းယႂႃႇၽၸိူဝ်းၼၼ်ႉတီႈၶႃႈဢေႃႈ။
၂၀ ၶႃႈၸဝ်ႈႁဝ်းသေႃးလမုၼ်ႇၸမ်းမၼ်းဢမ်ႇႁွင်ႉဢမ်ႇပၢင်းတီႈၶႃႈ။ဢူဝ်းၸဝ်ႈၵဝ်ၶႃႈၸဝ်ႈၶုၼ်လူင်တီႈၶႃႈ။မၢၵ်ႇတႃၵူၼ်းမဵဝ်းဢိသရေႇလတင်းသဵင်ႈတင်းလူင်ဢွၼ်ၵၼ်မုင်ႈတူၺ်းမွင်းတူၺ်းၸဝ်ႈႁဝ်းလူၺ်ႈလွင်ႈဢၼ်ၸဝ်ႈႁဝ်းတၵ်းမီးဢမိင်ႉႁႂ်ႈၽူႈလႂ်ၼင်ႈၵႃႈၼိူဝ်ရႃႇၸႃႉပလၢင်ႇၸဝ်ႈႁဝ်းၸဝ်ႈၶုၼ်လူင်လိုၼ်းၸဝ်ႈႁဝ်းၼၼ်ႉယူႇတီႈၶႃႈဢေႃႈ။
၂၁ ပေႃးဢမ်ႇၼၼ်မိူဝ်ႈဢၼ်ၸဝ်ႈၵဝ်ၶႃႈၸဝ်ႈၶုၼ်လူင်ၼွၼ်းလပ်းလူၺ်ႈၵၼ်တင်းပူႇမွၼ်ႇၸဝ်ႈၸိူဝ်းၼၼ်ႉယဝ်ႉၼၼ်ႉၸိုင်၊ၶႃႈၸဝ်ႈႁဝ်းဢိၵ်ႇတင်းလုၵ်ႈၸၢႆးသေႃးလမုၼ်ႇၼၼ်ႉတၵ်းပဵၼ်ၵေႃႉဢၼ်လႆႈၶၢမ်ႇမိူၼ်ၼင်ႇၵူၼ်းထူပ်းဢပျႅတ်ႈၼၼ်ႉတီႈၶႃႈဢေႃႈ၊ဝႃႈၼင်ႇၼႆဢေႃႈ။
၂၂ ၼႂ်းမိူဝ်ႈဢၼ်မၼ်းယင်းတိုၵ်ႉလဝ်ႈလၢတ်ႈတီႈၶုၼ်ႁေႃၶမ်းၸိူဝ်ႉၼင်ႇၼၼ်ယူႇၼၼ်ႉၸိုင်၊ပရေႃးၽႅတ်ႈၼႃႇသၼ်ႇၶဝ်ႈမႃးဢေႃႈ။
၂၃ ၶဝ်ဢွၼ်ၵၼ်လဝ်ႈလၢတ်ႈတီႈၶုၼ်ၶမ်းလႄႈဝႃႈ၊-ပရေႃးၽႅတ်ႈၼႃႇသၼ်ႇၶဝ်ႈမႃးတီႈၶႃႈဢေႃႈ၊ဝႃႈၼင်ႇၼႆဢေႃႈ။ၼႃႇသၼ်ႇၵေႃႈႁွတ်ႈထိုင်ၵႃႈတီႈၽၢႆႇၼႃႈၶုၼ်ႁေႃၶမ်းသေယဝ်ႉၶုပ်ႉမူပ်ႇဝၢင်းႁူဝ်တႅတ်ႈႁူဝ်သေလႄႈလဝ်ႈလၢတ်ႈလႄႈဝႃႈ၊-ဢူဝ်းၸဝ်ႈၵဝ်ၶႃႈၸဝ်ႈၶုၼ်လူင်တီႈၶႃႈ။
၂၄ ၸွင်ႇၸဝ်ႈႁဝ်းမီးဢမိင်ႉဝႃႈဢတေႃႇၼိယတၵ်းလႆႈဢုပ်ႉပိူင်ႇၸၢမ်ႇၸႃးလိုၼ်းၵဝ်လႄႈၼင်ႈၵႃႈၼိူဝ်ရႃႇၸႃႉပလၢင်ႇၵဝ်ဢေႃႈ၊ဝႃႈၼင်ႇၼႆတီႈၶႃႈႁိုဝ်။
၂၅ ဝၼ်းမိူဝ်ႈၼႆႉမၼ်းလူင်းၵႂႃႇလႄႈဢဝ်သူဝ်း၊ဝူဝ်း၊တူဝ်ဢၼ်ပီးလီမၼ်းလီၼၼ်ႉတၢႆသေယဝ်ႉႁွင်ႉပၢင်းဢဝ်လုၵ်ႈၸၢႆးၸဝ်ႈတင်းသဵင်ႈတင်းလူင်ဢိၵ်ႇတင်းၶုၼ်ပူဝ်ႇတင်းလၢႆတင်းယိတ်ႉပရေႃးႁိၵ်ႈဢႃႇပျႃႇထႃႇတီႈၶႃႈယဝ်ႉ။တူၺ်းတီႈၶႃႈလူး။ၶဝ်ၼၼ်ႉဢွၼ်ၵၼ်ၵိၼ်ၶူပ်းယူႇၵႃႈတီႈၽၢႆႇၼႃႈမၼ်းလႄႈႁွင်ႉဝႃႈႁႂ်ႈဢသၢၵ်ႈၶုၼ်လူင်ဢတေႃႇၼိယယိုၼ်းယၢဝ်းသေၵမ်းလူၺ်ႈ၊ဝႃႈၼင်ႇၼႆယူႇတီႈၶႃႈဢေႃႈ။
၂၆ ၶႃႈၸဝ်ႈဢိၵ်ႇတင်းယိတ်ႉပရေႃးႁိၵ်ႈၸႃႇတုၵ်ႉ၊ပေႇၼႃႇလုၵ်ႈၸၢႆးယေႃႇယတ၊ၶႃႈၸဝ်ႈႁဝ်းသေႃးလမုၼ်ႇၸိူဝ်းၼႆႉၸမ်း၊မၼ်းဢမ်ႇႁွင်ႉဢမ်ႇပၢင်းတီႈၶႃႈ။
၂၇ လွင်ႈၼႆႉၸဝ်ႈၶုၼ်လူင်ႁဝ်းယင်းဢမ်ႇမွၵ်ႇဢမ်ႇလၢတ်ႈတီႈႁဝ်းၶႃႈလွင်ႈဢၼ်ၽူႈလႂ်တၵ်းလႆႈၼင်ႈၵႃႈၼိူဝ်ရႃႇၸႃႉပလၢင်ႇၸဝ်ႈၶုၼ်လူင်ႁဝ်းလိုၼ်းသေၸဝ်ႈႁဝ်းၼၼ်ႉတီႈၶႃႈ၊ဝႃႈၼင်ႇၼႆဢေႃႈ။
၂၈ တႃႇဝိတ်ႉႁႂ်ႈသေႃးလမုၼ်ႇႁဵတ်းၶုၼ်ႁေႃၶမ်းမိူဝ်ႈၼၼ်ႉၶုၼ်လူင်တႃႇဝိတ်ႉမီးဢမိင်ႉလႄႈဝႃႈ၊-ႁွင်ႉပႃႇသသေႇၽမႃးတႃႉ၊ဝႃႈၼင်ႇၼႆလႄႈမၼ်းၵေႃႈမႃးၸူးၵႃႈတီႈၶုၼ်ႁေႃၶမ်းလႄႈၸုၵ်းယူႇၵႃႈတီႈၽၢႆႇၼႃႈၶုၼ်ႁေႃၶမ်းဢေႃႈ။
၂၉ ၶုၼ်ႁေႃၶမ်းၵေႃႈသမ်ႉတိူင်ႇဝႃႈၵိၼ်ႇဝႃႈထႅင်ႈလႄႈဝႃႈ၊-ၵႃႈၼင်ႇဢၼ်ထႃႇဝရႃႉၽြႃးဢၼ်ၵႄႇသႄႇၼုၵ်ႈဢဝ်ဢသၢၵ်ႈဝိၺိၺ်ႇၵဝ်လွတ်ႈသေၵႃႈၼႂ်းတုၵ်ႉၶႃႉၵူႈၸိူဝ်ႉၵူႈပိူင်ၼၼ်ႉဢသၢၵ်ႈလိပ်းယူႇၼၼ်ႉ၊
၃၀ ၵဝ်ဢဝ်ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလလႄႈတိူင်ႇဝႃႈၵိၼ်ႇဝႃႈလႄႈဝႃႈ၊-လုၵ်ႈၸၢႆးမႂ်းသေႃးလမုၼ်ႇတၵ်းလႆႈဢုပ်ႉပိူင်ႇၸၢမ်ႇၸႃးလိုၼ်းၵဝ်လႄႈၼင်ႈၵႃႈၼိူဝ်ရႃႇၸႃႉပလၢင်ႇၵဝ်တၢင်ႈတူဝ်ၵဝ်ဢမၢၼ်ႇၶၢၼ်ပဵၼ်ဢေႃႈ၊
၃၁ ၵဝ်တၵ်းႁဵတ်းဝၼ်းမိူဝ်ႈၼႆႉဢေႃႈ၊ဝႃႈၼင်ႇၼႆဢေႃႈ။ပႃႇသသေႇၽၼၼ်ႉၶုပ်ႉမူပ်ႇဝၢင်းႁူဝ်တႅတ်ႈႁူဝ်ယူႇဝႆႈၶုၼ်ႁေႃၶမ်းသေလႄႈဢွၵ်ႇသူပ်းဝႃႈ၊-ႁႂ်ႈၸဝ်ႈၵဝ်ၶႃႈၸဝ်ႈၶုၼ်လူင်တႃႇဝိတ်ႉဢသၢၵ်ႈလိပ်းယူႇတႃႇသေႇသေၵမ်းလူၺ်ႈတီႈၶႃႈ၊ဝႃႈၼင်ႇၼႆဢေႃႈ။
၃၂ ၶုၼ်လူင်တႃႇဝိတ်ႉၵေႃႈမီးဢမိင်ႉလႄႈဝႃႈ၊-ႁွင်ႉဢဝ်ယိတ်ႉပရေႃးႁိၵ်ႈၸႃႇတုၵ်ႉဢိၵ်ႇတင်းပရေႃးၽႅတ်ႈၼႃႇသၼ်ႇတင်းပေႇၼႃႇယလုၵ်ႈၸၢႆးယေႃႇယတၸိူဝ်းၼၼ်ႉမႃးတႃႉ၊ဝႃႈၼင်ႇၼႆလႄႈ၊ၶဝ်ၼၼ်ႉဢွၼ်ၵၼ်ၶဝ်ႈမႃးၸူးၵႃႈတီႈၽၢႆႇၼႃႈၶုၼ်ႁေႃၶမ်းဢေႃႈ။
၃၃ ၶုၼ်ႁေႃၶမ်းၵေႃႈမီးဢမိင်ႉတီႈၶဝ်ၼၼ်ႉလႄႈဝႃႈ၊-ႁွင်ႉဢဝ်ၶႃႈၵူၼ်းၸဝ်ႈသူတင်းလၢႆလႄႈႁႂ်ႈလုၵ်ႈၸၢႆးၵဝ်သေႃးလမုၼ်ႇၶီႇမႃႉလီႈၵဝ်သေလႄႈဢဝ်မၼ်းလူင်းၵႂႃႇၵႃႈတီႈၵိႁုၼ်ႇတႃႉ။
၃၄ ႁႂ်ႈယိတ်ႉပရေႃးႁိၵ်ႈၸႃႇတုၵ်ႉဢိၵ်ႇတင်းပရေႃးၽႅတ်ႈၼႃႇသၼ်ႇပၼ်ၽိၵ်ႈသိၵ်ႈတီႈမၼ်းၵႃႈတီႈၼၼ်ႉႁႂ်ႈမၼ်းပဵၼ်ၶုၼ်ႁေႃၶမ်းဢိသရေႇလလႄႈပဝ်ႈတိုင်ႈၼႄးၶရႃႇသေလႄႈႁွင်ႉပၢဝ်ႇႁွင်ႉသေႃႇလႄႈဝႃႈ၊-ႁႂ်ႈၶုၼ်ႁေႃၶမ်းသေႃးလမုၼ်ႇၼႆႉဢသၢၵ်ႈယိုၼ်းယၢဝ်းသေၵမ်းလူၺ်ႈ၊ဝႃႈၼင်ႇၼႆတႃႉ။
၃၅ လိုၼ်းၼၼ်ႉသူဢွၼ်ၵၼ်ၸွမ်းလူၺ်ႈၵၼ်တင်းမၼ်းၶိုၼ်းမႃးလႄႈမၼ်းတၵ်းလႆႈမႃးၼင်ႈၵႃႈၼိူဝ်ရႃႇၸႃႉပလၢင်ႇၵဝ်လႄႈပဵၼ်ၶုၼ်ႁေႃၶမ်းတၢင်တူဝ်ၵဝ်ဢေႃႈ။ၵဝ်ၶၢၼ်းမၼ်းဝႆႉႁႂ်ႈပဵၼ်ၶုၼ်ဢိသရေႇလ၊ၶုၼ်ယုတယဝ်ႉ၊ဝႃႈၼင်ႇၼႆဢေႃႈ။
၃ ၆ ပေႇၼႃႇယလုၵ်ႈၸၢႆးယေႃႇယတၶိုၼ်းလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊-ဢႃႇမိၼ်ႇ။ႁႂ်ႈထႃႇဝရႃႉၽြႃးၽြႃးပဵၼ်ၸဝ်ႈၸဝ်ႈႁဝ်းၸဝ်ႈၶုၼ်လူင်ၼၼ်ႉမီးဢမိင်ႉၸိူဝ်ႉၼင်ႇၼၼ်သေၵမ်းလူၺ်ႈတီႈၶႃႈ။
၃ ၇ ၸိူဝ်ႉၼင်ႇဢၼ်ထႃႇဝရႃႉၽြႃးမီးယူႇလူၺ်ႈၵၼ်တင်းၸဝ်ႈၵဝ်ၶႃႈၸဝ်ႈၶုၼ်လူင်ၼၼ်ႉႁႂ်ႈမၼ်းၸဝ်ႈမီးယူႇလူၺ်ႈၵၼ်တင်းသေႃးလမုၼ်ႇလႄႈၸီႇယၢင်ႇႁႂ်ႈရႃႇၸႃႉပလၢင်ႇမၼ်းယိင်ႈၶႅၼ်းမုၼ်ၽုင်းယႂ်ႇလိူဝ်တွၼ်းၼႃႇသရေႃႇၸႃႉပလၢင်ႇၸဝ်ႈၵဝ်ၶႃႈၸဝ်ႈၶုၼ်လူင်တႃႇဝိတ်ႉသေၵမ်းလူၺ်ႈတီႈၶႃႈ၊ဝႃႈၼင်ႇၼႆဢေႃႈ။
၃ ၈ မိူဝ်ႈၼၼ်ႉယိတ်ႉပရေႃးႁိၵ်ႈၸႃႇတုၵ်ႉဢိၵ်ႇတင်းပရေႃးၽႅတ်ႈၼႃႇသၼ်ႇ၊ပေၼႃႇယ၊လုၵ်ႈၸၢႆးယေႃႇယတ၊ၵူၼ်းၶေႇရသိတင်းလၢႆ၊ၵူၼ်းပေႇလသိတင်းလၢႆၸိူဝ်းၼၼ်ႉဢွၼ်ၵၼ်လူင်းၵႂႃႇလႄႈႁႂ်ႈသေႃးလမုၼ်ႇၶီႇမႃႉလီႈၶုၼ်လူင်တႃႇဝိတ်ႉသေလႄႈဢဝ်ၵႂႃႇၵႃႈတီႈၵိႁုၼ်ႇဢေႃႈ။
၃ ၉ ယိတ်ႉပရေႃးႁိၵ်ႈၸႃႇတုၵ်ႉၼၼ်ႉဢဝ်တဝ်ႈၼမ်ႉမၼ်းဢွၵ်ႇသေၵႃႈၼႂ်းသုမ်ႉထဵင်ၸဝ်ႈလႄႈပၼ်ၽိၵ်ႈသိၵ်ႈတီႈသေႃးလမုၼ်ႇသေယဝ်ႉ၊ၶဝ်ဢွၼ်ၵၼ်ပဝ်ႇတိုင်ႈၼႄးၶရႃႇလႄႈၵူၼ်းတင်းသဵင်ႈတင်းလူင်ဢွၼ်ၵၼ်ႁွင်ႉပၢဝ်ႇလႄႈဝႃႈ၊-ႁႂ်ႈၶုၼ်လူင်သေႃးလမုၼ်ႇဢသၢၵ်ႈယိုၼ်းယၢဝ်းသေၵမ်းလူၺ်ႈ၊ဝႃႈၼင်ႇၼႆဢေႃႈ။
၄၀ ၵူၼ်းတင်းသဵင်ႈတင်းလူင်ဢွၼ်ၵၼ်ၸွမ်းလူၺ်ႈၵၼ်တင်းမၼ်းၶိုၼ်းမႃးလႄႈၵူၼ်းတင်းသဵင်ႈတင်းလူင်ဢွၼ်ၵၼ်ပႃးဢဝ်တင်းၼႄးၶရႃႇသေလႄႈပဝ်ႇတိုင်ႈယူႇ၊ႁဵတ်းတင်းဢၼ်ၸူမ်းသိူဝ်းဢၼ်ယႂ်ႇၼႃႇၸူမ်းသိူဝ်းယူႇတေႃႇထိုင်ႁွတ်ႈလိၼ်မိူင်းထၼ်ႈပေႃးႁၢမ်ႉတၵ်းတႅၵ်ႇလူၺ်ႈသဵင်ၼၼ်ႉဢေႃႈ။
၄၁ ဢတေႃႇၼိယဢိၵ်ႇတင်းၶဝ်ၸိူဝ်းဢၼ်ႁူမ်ႈပွင်းၵၼ်တင်းမၼ်းၸိူဝ်းၼၼ်ႉလႆႈငိၼ်းသဵင်ၼၼ်ႉၼႂ်းမိူဝ်ႈဢၼ်ၶဝ်ႁဵတ်းပွႆးၵိၼ်ပွႆးၶူပ်းၶဝ်ယဝ်ႉတူဝ်ယူႇၼၼ်ႉဢေႃႈ။ယႂႃႇၽလႆႈငိၼ်းသဵင်ဢၼ်ပဝ်ႇတိုင်ႈၼႄးၶရႃႇၼၼ်ႉသေယဝ်ႉမၼ်းထၢမ်ဝႃႈ၊-သဵင်ဢၼ်ႁဵတ်းႁူၼ်ႈႁၢၼ်ဢူၼ်ဢဵၼ်မေႃးမေးယူႇၵႃႈၼႂ်းဝဵင်းတင်းဝဵင်းၼၼ်ႉပဵၼ်ၵွပ်ႈပိူဝ်ႈၸိူဝ်ႉၼင်ႇႁိုဝ်ဝႃႈၼင်ႇၼႆၼၼ်ႉၸိုင်၊ယေႃးၼသၼ်ႇလုၵ်ႈၸၢႆးယိတ်ႉပရေႃးႁိၵ်ႈဢပျႃႇထႃႇၼၼ်ႉႁွတ်ႈထိုင်မႃးဢေႃႈ။
၄၂ ဢတေႃႇၼိယလၢတ်ႈလႄႈဝႃႈ၊-ၶဝ်ႈမႃးသေၵမ်း၊မႂ်းၼႆႉပဵၼ်ၵူၼ်းဢၼ်လီလႄႈတၵ်းမွၵ်ႇလၢတ်ႈသတၢင်းသဵင်ၶၢဝ်ႇဢၼ်လီဢေႃႈ၊ဝႃႈၼင်ႇၼႆဢေႃႈ။
၄၃ ယေႃႇၼသၼ်ႇၶိုၼ်းလဝ်ႈလၢတ်ႈတီႈဢတေႃႇၼိယလႄႈဝႃႈ၊-ၸဝ်ႈႁဝ်းၶႃႈၸဝ်ႈၶုၼ်လူင်တႃႇဝိတ်ႉၼၼ်ႉၶၢၼ်းသေႃးလမုၼ်ႇဝႆႉႁႂ်ႈပဵၼ်ၶုၼ်ႁေႃၶမ်းတီႈၶႃႈယဝ်ႉ။
၄၄ ၶုၼ်ႁေႃၶမ်းၵေႃႈပွႆႇၸႂ်ႉယိတ်ႉပရေႃးႁိၵ်ႈၸႃႇတုၵ်ႉဢိၵ်ႇတင်းပရေႃးၽႅတ်ႈၼႃႇသၼ်ႇ၊ပေႇၼႃႇယ၊လုၵ်ႈၸၢႆးယေႃႇယတၵူၼ်းၶေႇရသိတင်းလၢႆၵူၼ်းပေႇလသိတင်းလၢႆၸိူဝ်းၼၼ်ႉၵႂႃႇလူၺ်ႈၵၼ်တင်းမၼ်းလႄႈႁႂ်ႈမၼ်းၶီႇမႃႉႉလီႈၶုၼ်ႁေႃၶမ်းတီႈၶႃႈယဝ်ႉ။
၄၅ ယိတ်ႉပရေႃးႁိၵ်ႈၸႃႇတုၵ်ႉဢိၵ်ႇတင်းပရေႃးၽႅတ်ႈၼႃႇသၼ်ႇပၼ်ရႃႇၸႃႉၽိၵ်ႈသိၵ်ႈတီႈမၼ်းၵႃႈတီႈၵိႁုၼ်ႇတီႈၶႃႈယဝ်ႉ။ၶဝ်ၼၼ်ႉဢွၼ်ၵၼ်လုၵ်ႉသေၵႃႈတီႈၼၼ်ႉၶိုၼ်းမႃးလႄႈၸူမ်းသိူဝ်းၼႃႇလူင်လၢင်ထၼ်ႈပေႃးႁူၼ်ႈႁၢၼ်ဢူၼ်ဢဵၼ်မေႃးမေးၵႂႃႇတင်းဝဵင်းတီႈၶႃႈဢေႃႈ။သဵင်ၼၼ်ႉပဵၼ်သဵင်ဢၼ်ၸဝ်ႈႁဝ်းငိၼ်းယဝ်ႉၼၼ်ႉတီႈၶႃႈဢေႃႈ။
၄၆ သေႃးလမုၼ်ႇၵေႃႈၼင်ႈၵႃႈၼိူဝ်ရႃႇၸႃႉပလၢင်ႇသိုင်ႇၸိုင်ႈဝၢၼ်ႈမိူင်းတီႈၶႃႈယဝ်ႉ။ၶႃႈၵူၼ်းၶုၼ်ႁေႃၶမ်းတင်းလၢႆၵေႃႈဢွၼ်ၵၼ်ၵႂႃႇႁႂ်ႈလႆႈပၼ်တၢင်းလီတီႈၸဝ်ႈၶုၼ်လူင်တႃႇဝိတ်ႉလႄႈလဝ်ႈလၢတ်ႈလႄႈဝႃႈ၊-
၄၇ ႁႂ်ႈၽြႃးပဵၼ်ၸဝ်ႈယုၵ်ႉယွင်ႈၼႃႇမႃႉၸိုဝ်ႈသဵင်သေႃးလမုၼ်ႇလိူဝ်တွၼ်းၼႃႇသေၼႃႉမႃႉၸိုဝ်သဵင်ၸဝ်ႈႁဝ်းလႄႈႁဵတ်းႁႂ်ႈရႃႇၸႃႉပလၢင်ႇမၼ်းမူၼ်ႈၽုင်းယႂ်ႇလိူဝ်တွၼ်းၼႃႇသရေႃႇၸႃႉပလၢင်ႇၸဝ်ႈႁဝ်းသေၵမ်းလူၺ်ႈ၊ဝႃႈၼင်ႇၼႆဢေႃႈ။
၄၈ ၶုၼ်ႁေႃၶမ်းၵေႃႈၵူမ်ႈၵွမ်းႁူဝ်ၵႃႈၼိူဝ်ၵူႇတီႈၼွၼ်းၸဝ်ႈသေလႄႈဝႃႈ၊-ႁႂ်ႈထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလဢၼ်ဢိတ်းလူပၼ်ၵေႃႉဢၼ်လႆႈၼင်ႈၵႃႈၼိူဝ်ရႃႇၸႃႉပလၢင်ႇၵဝ်ဝၼ်းမိူဝ်ႈၼႆႉလႄႈႁႂ်ႈမၢၵ်ႇတႃၵဝ်လႆႈႁၼ်ၼၼ်ႉမီးမၢင်ႇၵလႃႇသေၵမ်းလူၺ်ႈ၊ဝႃႈၼင်ႇၼႆဢေႃႈ။
၄၉ မိူဝ်ႈၼၼ်ႉၶဝ်ၸိူဝ်းဢၼ်ႁူမ်ႈၵမ်ပွင်းၵၼ်တင်းဢတေႃႇၼိယၸိူဝ်းၼၼ်ႉၵူဝ်ႁႄယူႇသေလႄႈဢွၼ်ၵၼ်လုၵ်ႉလႄႈၵႂႃႇယေႈၵေႃႉယေႈတီႈယေႈၵေႃႉယေႈတၢင်းႁင်းၽႂ်ႁင်းမၼ်းသေဢေႃႈ။
၅၀ ဢတေႃႇၼိယၵေႃႈၵူဝ်ႁႄသေႃးလမုၼ်ႇယူႇသေလႄႈၵႂႃႇယိပ်းၵမ်ၶဝ်လႅမ်ယိတ်ႉပလၢင်ႇယူႇဢေႃႈ။
၅၁ ပိူၼ်ႈဢွၼ်ၵၼ်လဝ်ႈလၢတ်ႈတီႈသေႃးလမုၼ်ႇလွင်ႈဢၼ်ဝႃႈဢတေႃႇၼိယၼၼ်ႉၵူဝ်ႁႄၶုၼ်လူင်သေႃးလမုၼ်ႇလႄႈယိပ်းၵမ်ၶဝ်လႅမ်ယိတ်ႉပလၢင်ႇယူႇသေလႄႈဝႃႈ၊-ႁႂ်ႈၶုၼ်လူင်သေႃးလမုၼ်ႇၵိၼ်ႇဝႃႈတီႈၵဝ်ဝၼ်းမိူဝ်ႈၼႆႉလွင်ႈဢၼ်မၼ်းၸဝ်ႈတၵ်းဢမ်ႇဢဝ်ၵဝ်တၢႆလူၺ်ႈလၢပ်ႇၼၼ်ႉသေၵမ်းလူၺ်ႈ၊ဝႃႈၼင်ႇၼႆယူႇတီႈၶႃႈဢေႃႈ။
၅၂ မိူဝ်ႈဢၼ်ဝႃႈၼင်ႇၼႆၸိုင်၊သေႃးလမုၼ်ႇမီးဢမိင်ႉလႄႈဝႃႈ၊-ပေႃးမၼ်းတၵ်းပဵၼ်ၵူၼ်းလီၸိုင်ၶူၼ်ႁူဝ်မၼ်းသဵၼ်ႈၼိုင်ႈၵေႃႈတၵ်းဢမ်ႇလႆႈတူၵ်းၵႃႈတီႈလိၼ်။ၵူၺ်းၵႃႈပေႃးထူပ်းႁၼ်ဢပျႅတ်ႈၵႃႈၼႂ်းမၼ်းၸိုင်မၼ်းတၵ်းလႆႈတၢႆဢေႃႈ၊
၅၃ ဝႃႈၼင်ႇၼႆသေယဝ်ႉ၊ၶုၼ်လူင်သေႃးလမုၼ်ႇပွႆႇၸႂ်ႉၵူၼ်းၵႂႃႇလႄႈၶဝ်ၼၼ်ႉဢွၼ်ၵၼ်ဢဝ်မၼ်းလူင်းသေၵႃႈတီႈယိတ်ႉပလၢင်ႇမႃးလႄႈဝၢင်းႁူဝ်ၵႃႈတီႈၽၢႆႇၼႃႈၶုၼ်လူင်သေႃးလမုၼ်ႇဢေႃႈ။သေႃးလမုၼ်ႇၵေႃႈမီးဢမိင်ႉတီႈမၼ်းလႄႈဝႃႈ၊-ၵႂႃႇၵႃႈတီႈႁိူၼ်းမႂ်းတႃႉ၊ဝႃႈၼင်ႇၼႆဢေႃႈ။