Chapter
၁၅
ဢပိၸၶုၼ်ႁေႃၶမ်းယုတ
၁ ၼႂ်းပီႊဢၼ်ၶုၼ်လူင်ယေႇရူဝ်းပုမ်ႇလုၵ်ႈၸၢႆးၼေႇပတ်ႉၼင်ႈႁၢင်ႈၼင်ႈႁေႃသိပ်းပၢႆပႅတ်ႇပီႊၼၼ်ႉဢၽိယလဢုပ်ႉပိူင်ႇၸၢမ်ႇၸႃးမိူင်းယုတလႄႈဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်းယေႇရုသလႅမ်ႇသၢမ်ပီႊဢေႃႈ။
၂ ၸိုဝ်မေႈမၼ်းၸမ်းပဵၼ်မႃႇၶႃႇလုၵ်ႈယိင်းဢပသလုမ်ႇဢေႃႈ။
၃ မၼ်းၼၼ်ႉႁဵတ်းတူႉၸရိူၵ်ႈၵႃႈဢၼ်ၸဝ်ႈပေႃႈမၼ်းႁဵတ်းၵႂႃႇယဝ်ႉၼၼ်ႉလႄႈႁူဝ်ၸႂ်မၼ်းဢမ်ႇၸေးၸုမ်ႇၵႃႈတီႈၽၢႆႇၼႃႈထႃႇဝရႃႉၽြႃးၽြႃးပဵၼ်ၸဝ်ႈမၼ်းမိူၼ်ၸိူဝ်ႉၼင်ႇႁူဝ်ၸႂ်မွၼ်ႇမၼ်းတႃႇဝိတ်ႉၼၼ်ႉ။
၄ ၼႂ်းဝႃႈၼၼ်သေၵေႃႈထႃႇဝရႃႉၽြႃးၽြႃးပဵၼ်ၸဝ်ႈမၼ်းထွၵ်ႈလူၺ်ႈၼႃႈတႃႇဝိတ်ႉလႄႈယုၵ်ႉယွင်ႈလုၵ်ႈလၢင်းမၼ်းဝႆႉလိုၼ်းမၼ်းလႄႈႁႂ်ႈဝဵင်းယေႇရုသလႅမ်ႇတႄႇယူႇသေယဝ်ႉ၊ႁႂ်ႈဝၢၼ်ႇၽႆးတဵၼ်းမၼ်းလႆႈႁိူဝ်ႈလႅင်းယူႇၵႃႈၼႂ်းဝဵင်းယေႇရုသလႅမ်ႇၼၼ်ႉဢေႃႈ။
၅ လွင်ႈမၼ်းၸမ်းၼွၵ်ႈသေဢမူႉဢုရိယၵူၼ်းမဵဝ်းႁိတ်ႉတိၼၼ်ႉတႃႇဝိတ်ႉၼၼ်ႉႁဵတ်းဢၼ်လီဢၼ်ငၢမ်းသိုဝ်ႈၼႃႈတႂ်ႈတႃထႃႇဝရႃႉၽြႃးလႄႈဢမ်ႇဝႄႈပိူင်ႈသေလွင်ႈတၢင်းဢၼ်မၼ်းၸဝ်ႈသင်ႇလၢတ်ႈဝႆႉတီႈမၼ်းၼၼ်ႉသေၸိူဝ်ႉသေပိူင်။
၆ ဢၽိယလုၵ်ႈၸၢႆးရူဝ်ႇပုမ်ႇၼၼ်ႉပဵၼ်သိုၵ်းပဵၼ်သိူဝ်လူၺ်ႈၵၼ်တင်းယေႇရူဝ်းပုမ်ႇယူႇၼႂ်းၸူဝ်ႈပၢၼ်မၼ်းၼၼ်ႉဢေႃႈ။
၇ လွင်ႈတၢင်းဢၽိယဢၼ်ယင်းၵိုတ်းယင်းၵျၢၼ်ႇၸိူဝ်းၼၼ်ႉဢိၵ်ႇတင်းၵႃႈဢၼ်မၼ်းႁဵတ်းၼၼ်ႉတႅမ်ႈဝႆႉမီးယူႇၵႃႈတီႈရႃႇၸဝၢင်ႇယုတဢေႃႈ။ဢၽိယတင်းယေႇရူဝ်းပုမ်ႇၼၼ်ႉပဵၼ်သိုၵ်းပဵၼ်သိူဝ်ၵၼ်ယူႇဢေႃႈ။
၈ ဢၽိယၼၼ်ႉၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းၸိူဝ်းၼၼ်ႉလႄႈၶဝ်ဢွၼ်ၵၼ်ဢဝ်မၼ်းသၢင်းၵျူဝ်ႇၵႃႈၼႂ်းဝဵင်းတႃႇဝိတ်ႉဢေႃႈ။ဢႃႇသလုၵ်ႈၸၢႆးၸဝ်ႈၼၼ်ႉၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။
ဢႃႇသၶုၼ်ႁေႃၶမ်းယုတ
၉ ၼႂ်းပီႊဢၼ်ယေႇရူဝ်းပုမ်ႇပဵၼ်ၶုၼ်ႁေႃၶမ်းဢိသရေႇလၼင်ႈႁၢင်ႈၼင်ႈႁေႃသၢဝ်းပီႊၼၼ်ႉဢႃႇသၸဢုပ်ႉပိူင်ႇၸၢမ်ႇၸႃးမိူင်းယုတလႄႈဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်းယေႇရုသလႅမ်ႇသီႇသိပ်းပၢႆဢဵတ်းပီႊဢေႃႈ။
၁၀ ၸိုဝ်ၼၢႆးၸဝ်ႈၸမ်း၊မႃႇၶႃႇဢၼ်ပဵၼ်လုၵ်ႈယိင်းဢပႃႉသလုမ်ႇၼၼ်ႉဢေႃႈ။
၁၁ ဢႃႇသၼၼ်ႉႁဵတ်းဢၼ်လီဢၼ်ငၢမ်းသိုဝ်ႈၼႃႈတႂ်ႈတႃထႃႇဝရႃႉၽြႃးမိူၼ်ၸိူဝ်ႉၼင်ႇမွၼ်ႇၸဝ်ႈတႃႇဝိတ်ႉၼၼ်ႉဢေႃႈ။
၁၂ မၼ်းပႄႇၽဵဝ်ႈပႅတ်ႈၵူၼ်းဢၼ်ၵူၼ်းၸၢႆးၼင်ႇၵၼ်ႁဵတ်းၵႅင်ႈၵၼ်ၼၼ်ႉသေၵႃႈၼႂ်းမိူင်းၸဝ်ႈလႄႈယႃႉပႅတ်ႈရုၵ်ႈထူႉဢၼ်ပူႇမွၼ်ႇမၼ်းႁဵတ်းၵႃႈမီးၸိူဝ်းၼၼ်ႉဢေႃႈ။
၁၃ မၼ်းၼုၵ်ႉဢဝ်မႃႇၶႃႇဢၼ်ပဵၼ်ၼၢႆးၸဝ်ႈၼၼ်ႉဢွၵ်ႇပႅတ်ႈသေၵႃႈၼႂ်းဢရႃႇၼၢင်းႁေႃၶမ်းၵွပ်ႈပိူဝ်ႈဢၼ်မၼ်းႁဵတ်းရုၵ်ႉထူႉဢၼ်လီႁင်ႈဢဵတ်ႇသဵတ်ႇပုၵ်းသဝ်ဢႃႇသရၼၼ်ႉဢေႃႈ။ဢႃႇသဢဝ်သဝ်ၼၼ်ႉလူမ်ႉလႄႈဢဝ်တုတ်ႇၽႆးပႅတ်ႈၵႃႈတီႈႁိမ်းၼမ်ႉႁွင်ႊၵေႇတြုၼ်ႇၼၼ်ႉဢေႃႈ။
၁၄ ပိၵ်ႉသမ်ႉမၼ်းဢမ်ႇၵိုၼ်းယႃႉပႅတ်ႈထႃႇၼႃႉတီႈသုင်တင်းလၢႆသေၵေႃႈႁူဝ်ၸႂ်ဢႃႇသၼၼ်ႉမီးတၢင်းဢၼ်ၸေးၸုမ်ႇယူႇတဵမ်တဵမ်ၵႃႈတီႈၽၢႆႇၼႃႈထႃႇဝရႃႉၽြႃးယူႇၼႂ်းၸူဝ်ႈၼႂ်းပၢၼ်မၼ်းၼၼ်ႉဢေႃႈ။
၁၅ မၼ်းဢဝ်ဢုၵ်ႉၸႃႇဢၼ်ၸဝ်ႈပေႃႈမၼ်းလူႇတၢၼ်းဢုၵ်ႉၸႃႇဢၼ်မၼ်းလူႇတၢၼ်း၊ငိုၼ်း၊ၶမ်း၊ၶိူင်ႈပိူင်ၸိူဝ်းၼၼ်ႉသႂၢင်းသႂ်ႇဝႆႉၵႃႈၼႂ်းႁိူၼ်းထႃႇဝရႃႉၽြႃးဢေႃႈ။
၁၆ ဢႃႇသတင်းပႃႇသႃႇၶုၼ်ႁေႃၶမ်းဢိသရေႇလၼၼ်ႉပဵၼ်သိုၵ်းပဵၼ်သိူဝ်တေႃႇၵၼ်ယူႇၼႂ်းၸူဝ်ႈပၢၼ်ၶဝ်ၼၼ်ႉဢေႃႈ။
၁၇ မီးၽဝ်ႇၼိုင်ႈပႃႇသႃႇ၊ၶုၼ်ႁေႃၶမ်းဢိသရေႇလ၊ၼၼ်ႉၶီႇသိုၵ်းၸူးၵႃႈတီႈမိူင်းယုတလႄႈတႄႇႁဵတ်းဝဵင်းရႃႇမသေယဝ်ႉဢမ်ႇႁႂ်ႈၽူႈလႂ်သေၵေႃႉသေၵူၼ်းၶဝ်ႈလႆႈဢွၵ်ႇလႆႈသေၵႃႈတီႈဢႃႇသ၊ၶုၼ်ႁေႃၶမ်းယုတ၊ၼၼ်ႉဢေႃႈ။၁၈ မိူဝ်ႈၼၼ်ႉဢႃႇသဢဝ်ငိုၼ်းၶမ်းၵႃႈဢၼ်ယင်းၵိုတ်းယင်းၵျၢၼ်ႇဝႆႉၵႃႈၼႂ်းၽၼ်ႇတႃႇႁိူၼ်းထႃႇဝရႃႉၽြႃးဢိၵ်ႇတင်းၽၼ်ႇတႃႇႁေႃၸဝ်ႈၸိူဝ်းၼၼ်ႉဢၢပ်ႈပၼ်ၵႃႈၼႂ်းမိုဝ်းၶႃႈၵူၼ်းမၼ်းတင်းလၢႆသေလႄႈပၼ်ၵႂႃႇၵႃႈတီႈပိၼ်ႇႁႃႇတတ်ႉလုၵ်ႈၸၢႆးတႃႇပီႉမုၼ်ႇလုၵ်ႈၸၢႆးရေႇၸုၼ်ႇၶုၼ်ႁေႃၶမ်းသုရိဢၼ်ယူႇၵႃႈတီႈဝဵင်းထမ်ႇမသႅတ်ႉၼၼ်ႉလႄႈ၊သင်ႇလၢတ်ႈၵႂႃႇလႄႈဝႃႈ၊-
၁၉ ၵွပ်ႈပိူဝ်ႈဢၼ်ၵဝ်ၶႃႈဢိၵ်ႇတင်းၸဝ်ႈမီးတၢင်းဢၼ်ႁဵတ်းမိၵ်ႈသႁႃႇယႃႉၵေႃႉသေႈၵၼ်မိူၼ်ၸိူဝ်ႉၼင်ႇဢၼ်လႆႈပဵၼ်မႃးယဝ်ႉတီႈၸဝ်ႈပေႃႈၵဝ်ၶႃႈဢိၵ်ႇတင်းၸဝ်ႈပေႃႈၸဝ်ႈႁဝ်းၼၼ်ႉလႄႈၵဝ်ၶႃႈဢဝ်ငိုၼ်းၶမ်းႁဵတ်းလၢၵ်ႈသွင်ႇပၼ်မႃးတီႈၸဝ်ႈႁဝ်းဢေႃႈ။ၶႅၼ်းတေႃႈယႃႉပႅတ်ႈမိၵ်ႈသႁႃႇယႃႉဢၼ်ၸဝ်ႈႁဝ်းႁဵတ်းလူၺ်ႈၵၼ်တင်းပႃႇသႃႇ၊ၶုၼ်ႁေႃၶမ်းဢိသရေႇလၼၼ်ႉသေၵမ်း။ပေႃးႁဵတ်းၼၼ်ၸိုင်မၼ်းတေဢွၵ်ႇသေၵႃႈတီႈၵဝ်ၶႃႈၼႆႉၵႂႃႇၶႃႈဢေႃႈ၊ဝႃႈၼင်ႇၼႆဢေႃႈ။
၂၀ ပိၼ်ႇႁႃႇတတ်ႉၼၼ်ႉထွမ်ႇဢဝ်ၵႂၢမ်းၶုၼ်လူင်ဢႃႇသလႄႈပွႆႇႁူဝ်သိုၵ်းမၼ်းတင်းလၢႆႁႂ်ႈၶီႇသိုၵ်းၵႂႃႇၵႃႈတီႈဝၢၼ်ႈဝဵင်းဢိသရေႇလဢေႃႈ။
၂၁ ၶဝ်ၼၼ်ႉယႃႉၽဵဝ်ႈပႅတ်ႈဝဵင်းဢိယုၼ်ႇ၊ဝဵင်းတၼ်ႇ၊ဝဵင်းဢႃႇပေႇလပိတ်ႉမႃႇၶႃႇဢိၵ်ႇတင်းမိူင်းၵိၼ်ႇၼေႇသရိတ်ႉတင်းမိူင်းဢိၵ်ႇတင်းမိူင်းၼပ်ႉထလိတင်းမိူင်းဢေႃႈ။ပႃႇသႃႇငိၼ်းလွင်ႈၼၼ်ႉသေယဝ်ႉယင်းဢမ်ႇတႄႇႁဵတ်းႁႂ်ႈဝဵင်းရႃႇမယဝ်ႉတူဝ်ႈလႄႈပၢႆၵႂၢႇယူႇၵႃႈတီႈဝဵင်းတိရလဢေႃႈ။
၂၂ မိူဝ်ႈၼၼ်ႉၶုၼ်လူင်ဢႃႇသၼၼ်ႉပူင်ဢမိင်ႉႁွင်ႉသေႃႇၵႃႈၼႂ်းမိူင်းယုတတင်းသဵင်ႈတင်းမူတ်းလႄႈဢမ်ႇလွတ်ႈသေၵေႃႉသေၵူၼ်းႁႂ်ႈၶဝ်ဢွၼ်ၵၼ်ဢဝ်မၢၵ်ႇႁိၼ်ဢိၵ်ႇတင်းမႆႉၵႃႈတီႈဝဵင်းရႃႇမဢၼ်ပႃႇသႃႇဢဝ်တႄႇႁဵတ်းဝဵင်းၼၼ်ႉမႃးလႄႈၶုၼ်လူင်ဢႃႇသၼၼ်ႉဢဝ်တႄႇႁဵတ်းဝဵင်းၵေႇပၵႃႇၼႂ်းလိၼ်ပိၼ်ႇယႃႇမိၼ်ႇဢိၵ်ႇတင်းဝဵင်းမိလပႃႇဢေႃႈ။
၂၃ လွင်ႈတၢင်းဢႃႇသဢၼ်ယင်းၵိုတ်းယင်းၵျၢၼ်ႇလွင်ႈတၢင်းဢၼ်တၼ်းၶူဝ်းမၼ်းယႂ်ႇလွင်ႈတၢင်းၵႃႈဢၼ်မၼ်းႁဵတ်း၊လွင်ႈတၢင်းဢၼ်တႄႇႁဵတ်းဝဵင်းတင်းလၢႆၸိူဝ်းၼၼ်ႉၸိုင်တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇယုတဢေႃႈ။မိူဝ်ႈဢၼ်မၼ်းဢသၢၵ်ႈယႂ်ႇၼၼ်ႉၸိုင်၊တၢင်းၶႆႈတၢင်းပဵၼ်ၸပ်းတီႈတိၼ်မၼ်းဢေႃႈ။
၂၄ ဢႃႇသၼၼ်ႉၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈၶၢမ်ႇတၢင်းဢၼ််သၢင်းၵျူဝ်ႇလူၺ်ႈၵၼ်တင်းပူႇမွၼ်ႇမၼ်းၸိူဝ်းၼၼ်ႉၵႃႈၼႂ်းဝဵင်းၸဝ်ႈပေႃႈမၼ်းတႃႇဝိတ်ႉၼၼ်ႉဢေႃႈ။ယေႃးသၽတ်ႉလုၵ်ႈၸၢႆးမၼ်းၼၼ်ႉၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။
ၼႃႇတပ်ႉၶုၼ်ႁေႃၶမ်းဢိသရေႇလ
၂၅ ၼႂ်းပီႊဢၼ်ဢႃႇသၶုၼ်ႁေႃၶမ်းယုတၸၢမ်ႇႁၢင်ႈၸၢမ်ႇႁေႃသွင်ပီႊၼၼ်ႉ၊ၼႃႇတပ်ႉလုၵ်ႈၸၢႆးၸဝ်ႈယေႇရူဝ်းပုမ်ႇၼၼ်ႉၸႃႉၼင်ႈႁၢင်ႈၼင်ႈႁေႃၵႃႈၼႂ်းမိူင်းဢိသရေႇလလႄႈဢုပ်ႉပိူင်ႇၸၢမ်ႇၸႃးမိူင်းဢိသရေႇလသွင်ပီႊဢေႃႈ။
၂၆ မၼ်းၼၼ်ႉႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးလႄႈၸွမ်းသဵၼ်ႈတၢင်းဢၼ်ၸဝ်ႈပေႃႈမၼ်းၸွမ်းၼၼ်ႉဢိၵ်ႇတင်းဢပျႅတ်ႈတၢင်းဢၼ်မၼ်းႁႂ်ႈမဵဝ်းဢိသရေႇလၽိတ်းပိူင်ႈၼၼ်ႉဢေႃႈ။
၂၇ ပႃႇသႃႇလုၵ်ႈၸႆးဢႁိယမဵဝ်းဢိသၶႃႇၼၼ်ႉၸွမ်းႁဵတ်းမုၵ်ႉႁဵတ်းၸိူဝ်းလႄႈၼႂ်းမိူဝ်ႈဢၼ်ၼႃႇတပ်ႉဢိၵ်ႇတင်းမဵဝ်းဢိသရေႇလတင်းသဵင်ႈတင်းလူင်ယင်းတိုၵ်ႉလွမ်ႉဝဵင်းၵိပေႇသုၼ်ႇမိူင်းၽိလိတ်ႉတိယူႇၼၼ်ႉၸိုင်ပႃႇသႃႇၼၼ်ႉယႃႉမၼ်းပႅတ်ႈၵႃႈတီႈဝဵင်းၵိပေႇသုၼ်ႇၼၼ်ႉဢေႃႈ။
၂၈ ၼႂ်းပီႊဢၼ်ဢႃႇသၶုၼ်ႁေႃၶမ်းယုတၼင်ႈႁၢင်ႈၼင်ႈႁေႃသၢမ်ပီႊၼၼ်ႉ၊ပႃႇသႃႇယႃႉမၼ်းပႅတ်ႈသေလႄႈၼင်ႈႁၢင်ႈၼင်ႈႁေႃတၢင်တူဝ်မၼ်းဢေႃႈ။
၂၉ မိူဝ်ႈဢၼ်မၼ်းၼင်ႈႁၢင်ႈၼင်ႈႁေႃႇၼၼ်ႉမၼ်းယႃႉပႅတ်ႈမဵဝ်းယေႇရူဝ်းပုမ်ႇၵႃႈမီးဢေႃႈ။မၼ်းဢမ်ႇဝႆႉၵိုတ်းဝႆႉၵျၢၼ်ႇၵေႃႉဢၼ်လႆႈထူၺ်ႈၸႂ်ယူႇၼႂ်းမဵဝ်းယေႇရူဝ်းပုမ်ႇၼၼ်ႉသေၵေႃႉသေၵူၼ်းတေႃႇထိုင်ႁွတ်ႈထၼ်ႈပေႃးႁႂ်ႈလူႉလႅဝ်ပႅတ်ႈၸွမ်းၵႃႈၼင်ႇဢၼ်ထႃႇဝရႃႉၽြႃးမီးဢမိင်ႉဝႆႉတီႈဢႁိယၵူၼ်းဝဵင်းသိလေႃႇၼၼ်ႉဢေႃႈ။
၃၀ လွင်ႈမၼ်းၸမ်း၊ပဵၼ်ၵွပ်ႈပိူဝ်ႈဢပျႅတ်ႈဢၼ်တူဝ်ယေႇရူဝ်းပုမ်ႇၽိတ်းပိူင်ႈဢိၵ်ႇတင်းမၼ်းႁႂ်ႈမဵဝ်းဢိသရေႇလၽိတ်းပိူင်ႈဢၼ်ဝႃႈတၢင်းဢၼ်တိုၵ်းယူင်းဢၼ်မၼ်းတိုၵ်းယူင်းတၢင်းၸႂ်မႆႈၶႆႈၸႃႉထႃႇဝရႃႉၽြႃးၽြႃးပဵၼ်ၸဝ်ႈဢိသရေႇလၼၼ်ႉဢေႃႈ။
၃၁ လွင်ႈတၢင်းၼႃႇတပ်ႉၵႃႈဢၼ်ယင်းၵိုတ်းယင်းၵျၢၼ်ႇလွင်ႈတၢင်းၵႃႈဢၼ်မၼ်းႁဵတ်းၼၼ်ႉတႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇဢိသရေႇလဢေႃႈ။
၃၂ ဢႃႇသတင်းပႃႇသႃႇၶုၼ်ႁေႃၶမ်းဢိသရေႇလၼၼ်ႉပဵၼ်သိုၵ်းပဵၼ်သိူဝ်တေႃႇၵၼ်ယူႇၼႂ်းၸူဝ်ႈပၢၼ်သွင်ၶႃၼၼ်ႉတဵမ်တဵမ်ဢေႃႈ။
ပႃႇသၶုၼ်ႁေႃၶမ်းဢိသရေႇလ
၃၃ ၼႂ်းပီႊဢၼ်ဢႃႇသၶုၼ်ႁေႃၶမ်းယုတၸၢမ်ႇႁၢင်ႈၸၢမ်ႇႁေႃသၢမ်ပီႊၼၼ်ႉ၊ပႃႇသႃႇလုၵ်ႈၸၢႆးဢႁိယၼၼ်ႉၸႃႉၼင်ႈႁၢင်ႈၼင်ႈႁေႃမိူင်းဢိသရေႇလၵႃႈတီႈဝဵင်းတိရၸလႄႈဢုပ်ႉပိူင်ႇၸၢမ်ႇၸႃးသၢဝ်းသီႇပီႊဢေႃႈ။
၃၄ မၼ်းၼၼ်ႉႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃႇထႃႇဝရႃႉၽြႃးလႄႈၸွမ်းသဵၼ်ႈတၢင်းဢၼ်ယေႇရူဝ်းပုမ်ႇၸွမ်းဢိၵ်ႇတင်းဢပျႅတ်ႈတၢင်းဢၼ်မၼ်းႁႂ်ႈမဵဝ်းဢိသရေႇလၽိတ်းပိူင်ႈၼၼ်ႉဢေႃႈ။