Chapter
၂
တႃႇဝိတ်ႉပၼ်ပုၼ်ႈၽွၼ်းတီႈသေႃးလမုၼ်ႇ
၁ တႃႇဝိတ်ႉၼၼ်ႉမိူဝ်ႈဢၼ်ၸမ်ၶိင်ႇဢၼ်တၵ်းႁွတ်ႈထိုင်ဢၼိၵ်ႉၸႃႉၼၼ်ႉၸိုင်ဝႆႉပိင်းၺၢပ်ႈတီႈလုၵ်ႈၸၢႆးၸဝ်ႈသေႃးလမုၼ်ႇလႄႈဝႃႈၸမ်း၊-
၂ ၵဝ်တၵ်းလႆႈၵႂႃႇၸွမ်းသဵၼ်ႈတၢင်းဢၼ်ၵူၼ်းလိၼ်မိူင်းတင်းသဵင်ႈတင်းလူင်ၵႂႃႇၼၼ်ႉဢေႃႈ။ပိူဝ်ႈဢၼ်ပဵၼ်ၼင်ႇၼႆလႄႈဢဝ်ႁႅင်းဢွၵ်ႇလႄႈႁဵတ်းၵေႃႉၸၢႆးတႃႉ။
၃ ထွမ်ႇဢဝ်ၵႂၢမ်းဢၼ်ထႃႇဝရႃႉၽြႃးၽြႃးပဵၼ်ၸဝ်ႈမႂ်းသင်ႇလၢတ်ႈဝႆႉႁႂ်ႈၵႂႃႇမႃးၼႂ်းသဵၼ်ႈတၢင်းမၼ်းၸဝ်ႈလႄႈပႂ်ႉၵမ်ပႂ်ႉၸွမ်းထုင်းၽိင်ႈတြႃးပိင်းၺၢပ်ႈၸဝ်ႈတၢင်းဢၼ်မၼ်းၸဝ်ႈၸီႇယၢင်ႇဝႆႉတၢင်းဢၼ်မၼ်းၸဝ်ႈၶၢမ်ႇသၢၵ်ႈသေႇဝႆႉတင်းလၢႆၸွမ်းၵႃႈၼင်ႇဢၼ်မႃးၼႂ်းၵျၢမ်းလိၵ်ႈပိင်းၺၢပ်ႈတိမုဝ်းသေႇၼၼ်ႉတႃႉ။
၄ ၼင်ႇႁိုဝ်မႂ်းတၵ်းလႆႈလီလႆႈပဵၼ်ၵႃႈၼႂ်းဢၼ်မႂ်းၵႂႃႇၼၼ်ႉၸိုင်ၵႃႈၼင်ႇဢၼ်ထႃႇဝရႃႉၽြႃးမီးဢမိင်ႉတီႈၵဝ်ဝႆႉဝႃႈ၊-ပေႃးလုၵ်ႈလၢင်းမႂ်းၸိူဝ်းၼၼ်ႉႁဵတ်းသတိတီႈသဵၼ်ႈတၢင်းဢၼ်ၶဝ်တၵ်းၵႂႃႇၼၼ်ႉပႃးဢဝ်တင်းၸႂ်သဵင်ႈသဵင်ႈတင်းႁူဝ်ၸႂ်သဵင်ႈသဵင်ႈၵႂႃႇမႃးၼႂ်းသမ်ႇမႃႇတြႃးၵႃႈတီႈၽၢႆႇၼႃႈၵဝ်ၸိုင်၊ၸိူဝ်ႉၶိူဝ်းမႂ်းတၵ်းလႆႈၼင်ႈၵႃႈၼိူဝ်ရႃႇၸႃႉပလၢင်ႇမိူင်းဢိသရေႇလဢမ်ႇလႆႈထၢတ်ႇဝႃႈၼင်ႇၼႆၼၼ်ႉလႆႈတႄႇယူႇတႃႉ။
၅ တေႃႈမိူဝ်ႈလဵဝ်ၼႆႉမႂ်းႁူႉလွင်ႈဢၼ်ယႂႃႇၽ၊လုၵ်ႈၸၢႆးၸေႇရုယႃႇ၊ႁဵတ်းတီႈၵဝ်၊တင်းတီႈဢႃႇပၼႃႇ၊လုၵ်ႈၸၢႆးၼေႇရ၊တင်းဢႃႇမသ၊လုၵ်ႈၸၢႆးယေႇသႃႇ၊ႁူဝ်သိုၵ်းဢိသရေႇလသွင်ပႃး၊ဢၼ်မၼ်းဢဝ်တၢႆယင်းဢမ်ႇၸႂ်ႈၵႃႈၼႂ်းပၢင်ႈသိုၵ်းၼၼ်ႉဢေႃႈ။မၼ်းႁဵတ်းႁႂ်ႈသၢႆဢႅဝ်ဢၼ်မၼ်းႁတ်ႉဢိၵ်ႇတင်းသွၵ်းတိၼ်ဢၼ်မၼ်းတိုဝ်းၼၼ်ႉၵူဝ်ႈၵိူၵ်ႇဝႆႉတင်းလိူတ်ႈၼၼ်ႉယဝ်ႉ။ၸီႇယၢင်ႇႁဵတ်းတေႃႇမၼ်းၸွမ်းၵႃႈၼင်ႇၺၢၼ်ႇမႂ်းမီးၼၼ်ႉတႃႉ။
၆ ယႃႇပေႁႂ်ႈႁူဝ်ႁွၵ်ႇမၼ်းလႆႈလူင်းၵႂႃႇၵႃႈတီႈမိူင်းမရၼႃႉၼိမ်ၼိမ်လီလီ။ၼပျေႃႉမႅတ်ႈတႃႇၵႃႈတီႈလုၵ်ႈၸၢႆးပႃႇၸိ၊ၵူၼ်းမိူင်းၵိလတ်ႉၸိူဝ်းၼၼ်ႉတႃႉ။ႁႂ်ႈၶဝ်လႆႈၶဝ်ႈပႃးၵႃႈၼႂ်းမုၵ်ႉၼႂ်းၸိူဝ်းဢၼ်လႆႈၵိၼ်တီႈၶူင်ႇတီႈၵိၼ်မႂ်းတႃႉ။
၇ မိူဝ်ႈဢၼ်ၵဝ်လႆႈဢွၵ်ႇပၢႆႈသေၵႃႈတီႈပီႈၸၢႆးမႂ်းဢပသလုမ်ႇၼၼ်ႉၶဝ်ႁဵတ်းၵျေးၸူးမႃးၸိူဝ်ႉၼင်ႇၼၼ်တီႈၵဝ်ဢေႃႈ။
၈ သိမိလုၵ်ႈၸၢႆးၵေႇရၵူၼ်းဝၢၼ်ႈပႃႇႁုရိမ်ႇမဵဝ်းပိၼ်ႇယႃႇမိၼ်ႇ၊ၵေႃႉဢၼ်ႁဵတ်းတၢင်းဢၼ်ၵိၼ်ႇလႃႇဢၼ်ၵျၢမ်းထၢမ်းၼႃႇလူင်လၢင်ၵိၼ်ႇလႃႇၵဝ်ၼႂ်းမိူဝ်ႈဝၼ်းဢၼ်ၵဝ်ၵႂႃႇၵႃႈတီႈဝဵင်းမႁႃႇၼိမ်ႇၼၼ်ႉမီးယူႇၵႃႈတီႈမႂ်းဢေႃႈ။မိူဝ်ႈဢၼ်မၼ်းမႃးႁႂ်ႈလႆႈႁပ်ႉႁူဝ်တၢင်းၵဝ်ၵႃႈတီႈၼမ်ႉႁွင်ႊယေႃႇတၼ်ႇၼၼ်ႉပိၵ်ႉသမ်ႉၵဝ်ဢဝ်ထႃႇဝရႃႉၽြႃးတိူင်ႇဝႃႈၵိၼ်ႇဝႃႈတီႈမၼ်းဝႃႈ၊-ၵဝ်ဢမ်ႇဢဝ်မႂ်းတၢႆလူၺ်ႈလၢပ်ႇလူၺ်ႈလႅဝ်းၵူၺ်း၊ဝႃႈၼင်ၼႆယဝ်ႉ။
၉ ၵူၺ်းၵႃႈမႂ်းဢမ်ႇလႆႈမတ်ႉမၼ်းပဵၼ်ၸိူဝ်ႉၼင်ႇၵေႃႉဢၼ်ဢမ်ႇမီးဢပျႅတ်ႈ။ၸိူဝ်ႉၼင်ႇဢၼ်မႂ်းပဵၼ်ၵေႃႉဢၼ်မီးၺၢၼ်ႇၼၼ်ႉမႂ်းႁူႉလွင်ႈဢၼ်ထုၵ်ႇလီၸီႇယၢင်ႇႁဵတ်းတီႈမၼ်းၸိူဝ်ႉၼင်ႇႁိုဝ်ၼၼ်ႉယူႇဢေႃႈ။
၁၀ ႁႂ်ႈၵွၵ်းႁူဝ်ႁွၵ်ႇမၼ်းတူၵ်းလူင်းၵႂႃႇၵႃႈတီႈမိူင်းမရၼလူၺ်ႈယၢင်လိူတ်ႈတႃႉ၊ဝႃႈၼင်ႇၼႆသေယဝ်ႉ၊တႃႇဝိတ်ႉၼွၼ်းလပ်းလူၺ်ႈၵၼ်တင်းပူႇၸဝ်ႈမွၼ်ႇၸဝ်ႈသေလႄႈၶၢမ်ႇတၢင်းဢၼ်သၢင်းၵျူဝ်ႇၵႃႈၼႂ်းဝဵင်းတႃႇဝိတ်ႉၼၼ်ႉဢေႃႈ။
၁၁ တႃႇဝိတ်ႉၼၼ်ႉဢုပ်ႉပိူင်ႇၸၢမ်ႇၸႃးမိူင်းဢိသရေႇလသီႇသိပ်းပီႊတဵမ်တဵမ်ဢေႃႈ။ဢုပ်ႉပိူင်ႇၸၢမ်ႇၸႃးၵႃႈတီႈဝဵင်းႁေႇပုၼ်ႇၸဵတ်းပီႊဢုပ်ႉပိူင်ႇၸၢမ်ႇၸႃးၵႃႈတီႈဝဵင်းယေႇရုသလႅမ်ႇသၢမ်သိပ်းသၢမ်ပီႊဢေႃႈ။
၁၂ သေႃးလမုၼ်ႇၼင်ႈၵႃႈၼိူဝ်ရႃႇၸႃႉပလၢင်ႇၸဝ်ႈပေႃႈမၼ်းတႃႇဝိတ်ႉၼၼ်ႉလႄႈဢႃႇၼႃႇၸဝ်ႈတႄႇယူႇမၼ်ႈမၼ်ႈၶိူင်ႇၶိူင်ႇဢေႃႈ။
သေႃးလမုၼ်ႇၼင်ႈႁၢင်ႈၼင်ႈႁေႃ
၁၃ လိုၼ်းၼၼ်ႉဢတေႃႇၼိယ၊လုၵ်ႈၸၢႆးႁၵ်ႉၵိတ်ႉ၊မႃးၸူးၵႃႈတီႈပႃႇသသေႇၽ၊ဢၼ်ပဵၼ်မေႈၸဝ်ႈသေႃးလမုၼ်ႇၼၼ်ႉလႄႈမေႈၸဝ်ႈထၢမ်မၼ်းလႄႈဝႃႈ၊-မႂ်းမႃးပုၼ်ႈၵတ်းယဵၼ်ႁိုဝ်၊ဝႃႈၼင်ႇၼႆလႄႈမၼ်းၼၼ်ႉၵေႃႈၶိုၼ်းလၢတ်ႈလႄႈဝႃႈ၊-မႃးပုၼ်ႈၵတ်းယဵၼ်ၶႃႈဢေႃႈ။
၁၄ ၵဝ်ၶႃႈမီးတီႈလၢတ်ႈပိူင်ၼိုင်ႈၶႃႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်၊မေႈၸဝ်ႈၵေႃႈၶိုၼ်းလၢတ်ႈလႄႈဝႃႈ၊-လၢတ်ႈသေၵမ်း၊ဝႃႈၼင်ႇၼႆဢေႃႈ။
၁၅ မၼ်းၵေႃႈလၢတ်ႈလႄႈဝႃႈ၊-မေႈၸဝ်ႈႁူႉလွင်ႈဢၼ်သိုင်ႇၸိုင်ႈဝၢၼ်ႈမိူင်းၼႆႉပဵၼ်မိူင်းၵဝ်ၶႃႈလႄႈၵူၼ်းမဵဝ်းဢိသရေႇလတင်းသဵင်ႈတင်းလူင်ၵေႃႈၽွမ်ႉၵၼ်ဝၢႆႇၼႃႈၸူးၵဝ်ၶႃႈႁႂ်ႈၵဝ်ၶႃႈလႆႈဢုပ်ႉပိူင်ႇၸၢမ်ႇၸႃးယူႇၶႃႈဢေႃႈ။ၵူၺ်းၵႃႈသိုင်ႇၸိုင်ႈဝၢၼ်ႈမိူင်းငိၵ်းပိူင်ႈၵႂႃႇလႄႈႁွတ်ႈထိုင်ၵႃႈၼႂ်းမိုဝ်းၼွင်ႉၵဝ်ၶႃႈယဝ်ႉ။လွင်ႈမၼ်းၸမ်း၊ထႃႇဝရႃႉၽြႃးမီးဢလူဝ်ႇၸိူဝ်ႉၼင်ႇၼၼ်ၶႃႈဢေႃႈ။
၁၆ မိူဝ်ႈလဵဝ်ၼႆႉၸိုင်ၵဝ်ၶႃႈၶႂ်ႈယွၼ်းဢဝ်သူးဢၼ်ၼိုင်ႈတီႈမေႈၸဝ်ႈၶႃႈဢေႃႈ။ယႃႇပေထဵင်ပႅတ်ႈသေၵမ်းၶႃႈ၊ဝႃႈၼင်ႇၼႆလႄႈမေႈၸဝ်ႈၵေႃႈၶိုၼ်းလၢတ်ႈလႄႈဝႃႈ၊-လၢတ်ႈသေၵမ်း၊ဝႃႈၼင်ႇၼႆဢေႃႈ။
၁၇ မၼ်းၵေႃႈလၢတ်ႈလႄႈဝႃႈ၊-ၶႅၼ်းတေႃႈလဝ်ႈလၢတ်ႈႁႂ်ႈၶုၼ်လူင်သေႃးလမုၼ်ႇဢဝ်ဢၽိသၵ်ႉ၊ၵူၼ်းယိင်းဝဵင်းသုၼိမ်ႇ၊ၼၼ်ႉပၼ်ၵဝ်ၶႃႈသေၵမ်း။ၶုၼ်လူင်ၼၼ်ႉတၵ်းဢမ်ႇထဵင်မေႈၸဝ်ႈလႆႈၶႃႈမိူဝ်ႈဢၼ်ဝႃႈၼင်ႇၼႆၸိုင်ပႃႇသသေႇၽၵေႃႈၶိုၼ်းလၢတ်ႈလႄႈဝႃႈ၊-လီယဝ်ႉ။
၁၈ ၵဝ်တၵ်းလဝ်ႈလၢတ်ႈထိုင်ႁူၶုၼ်ႁေႃၶမ်းပုၼ်ႈမႂ်းဢေႃႈ၊ဝႃႈၼင်ႇၼႆသေယဝ်ႉပႃႇသသေႇၽၵႂႃႇၸူးၵႃႈတီႈၶုၼ်လူင်သေႃးလမုၼ်ႇႁႂ်ႈလႆႈလဝ်ႈလၢတ်ႈထိုင်ႁူၶုၼ်ႁေႃၶမ်းပုၼ်ႈဢတေႃႇၼိယၼၼ်ႉဢေႃႈ။
၁၉ ၶုၼ်ႁေႃၶမ်းလုၵ်ႉႁႂ်ႈလႆႈႁႄႉႁပ်ႉႁူဝ်တၢင်းလႄႈၵူမ်ႈၵွမ်းႁူဝ်သေယဝ်ႉၼင်ႈယူႇၵႃႈၼိူဝ်ရႃႇၸႃႉပလၢင်ႇၸဝ်ႈသေလႄႈၸီႇယၢင်ႇႁႂ်ႈဢဝ်ပလၢင်ႇဝႆႉပုၼ်ႈဢၼ်မေႈၸဝ်ႈတၵ်းၼင်ႈလႄႈမေႈၸဝ်ႈၵေႃႈၼင်ႈယူႇၵႃႈတီႈၽၢႆႇၶႂႃၸဝ်ႈဢေႃႈ။
၂၀ မိူဝ်ႈၼၼ်ႉမေႈၸဝ်ႈလၢတ်ႈလႄႈဝႃႈ၊-ၶႂ်ႈယွၼ်းဢဝ်သူးဢၼ်လဵၵ်ႉဢၼ်ဢွၼ်ႇဢၼ်ၼိုင်ႈလႄႈယႃႇပေထဵင်ပႅတ်ႈသေၵမ်း၊ဝႃႈၼင်ႇၼႆလႄႈၶုၼ်ႁေႃၶမ်းမီးဢမိင်ႉလႄႈဝႃႈ၊-ၸဝ်ႈမေႈ။ယွၼ်းသေၵမ်း။ၵဝ်ၶႃႈတၵ်းဢမ်ႇထဵင်ပႅတ်ႈၶႃႈၵူၺ်း၊ဝႃႈၼင်ႇၼႆဢေႃႈ။
၂၁ မၼ်းၵေႃႈလဝ်ႈယွၼ်းလႄႈဝႃႈ၊-ၶႅၼ်းတေႃႈဢဝ်ဢၽိသၵ်ႉၵူၼ်းယိင်းဝဵင်းသုၼိမ်ႇၼၼ်ႉပၼ်ပီႈဢၢႆႈၸဝ်ႈဢတေႃႇၼိယသေၵမ်း၊မိူဝ်ႈဢၼ်ဝႃႈၼင်ႇၼႆၸိုင်ၶုၼ်လူင်သေႃးလမုၼ်ႇၶိုၼ်းလၢတ်ႈတီႈမေႈၸဝ်ႈလႄႈဝႃႈ၊-ႁဵတ်းသင်လႄႈယွၼ်းဢဝ်ဢၽိသၵ်ႉၵူၼ်းယိင်းဝဵင်းသုၼိမ်ႇၼၼ်ႉၵူၺ်းပုၼ်ႈဢတေႃႇၼိယ၊သိုင်ႇၸိုင်ႈဝၢၼ်ႈမိူင်းၵေႃႈထုၵ်ႇလီယွၼ်းဢဝ်ပုၼ်ႈမၼ်းဢေႃႈ။
၂၂ မၼ်းပဵၼ်ပီႈၸၢႆးၵဝ်ၶႃႈဢေႃႈ။ထုၵ်ႇလီယွၼ်းဢဝ်ပုၼ်ႈမၼ်းဢိၵ်ႇတင်းယိတ်ႉပရေႃးႁိၵ်ႈဢႃႇပျႃႇထႃႇတင်းယႂႃႇၽလုၵ်ႈၸၢႆးၸေႇရုယႃႇၸိူဝ်းၼၼ်ႉယူႇဢေႃႈ၊ဝႃႈၼင်ႇၼႆသေယဝ်ႉ
၂၃ ၶုၼ်လူင်သေႃးလမုၼ်ႇဢဝ်ထႃႇဝရႃႉၽြႃးတိူင်ႇဝႃႈၵိၼ်ႇဝႃႈလႄႈဝႃႈ၊-ပေႃးဢတေႃႇၼိယယင်းဢမ်ႇလႆႈဢဝ်ဢသၢၵ်ႈမၼ်းပၼ်ပုၼ်ႈဢၼ်မၼ်းယွၼ်းၼၼ်ႉၸိုင်ႁႂ်ႈၽြႃးပဵၼ်ၸဝ်ႈႁဵတ်းၵႃႈၼိူဝ်ၵဝ်လိူဝ်တွၼ်းႁႅင်းယႂ်ႇၼႃႇသေၵမ်း။
၂၄ ပိူဝ်ႈၼႆလႄႈမိူဝ်ႈလဵဝ်ၼႆႉ၊ၵႃႈၼင်ႇဢၼ်ထႃႇဝရႃႉၽြႃးဢၼ်ႁႂ်ႈၵဝ်မၼ်ႈၶိူင်ႇလႄႈဢဝ်ၵဝ်တၢင်ႇဝႆႉၵႃႈၼိူဝ်ရႃႇၸႃႉပလၢင်ႇၸဝ်ႈပေႃႈတႃႇဝိတ်ႉသေလႄႈပၼ်ႁေႃတီႈယူႇၵဝ်မႅၼ်ႈၸွမ်းၼင်ႇၵတိၸဝ်ႈၼၼ်ႉယင်းဢသၢၵ်ႈလိပ်းယူႇၼၼ်ႉဢတေႃႇၼိယတၵ်းလႆႈတၢႆဝၼ်းမိူဝ်ႈၼႆႉဢေႃႈ၊ဝႃႈၼင်ႇၼႆသေယဝ်ႉ၊
၂၅ ၶုၼ်လူင်သေႃးလမုၼ်ႇပွႆႇၸႂ်ႉပေႇၼႃႇယလုၵ်ႈၸၢႆးယေႃႇယတၵႂႃႇဢဝ်ဢတေႃႇၼိယတၢႆပႅတ်ႈသေဢေႃႈ။
၂၆ တီႈယိတ်ႉပရေႃးႁိၵ်ႈဢပျႃႇထႃႇၵေႃႈၶုၼ်ႁေႃၶမ်းမီးဢမိင်ႉလႄႈဝႃႈ၊-မႂ်းၵႂႃႇၸူးၵႃႈတီႈဝဵင်းဢႃႇၼသုတ်းတီႈတူင်ႈၼႃးဢၼ်မႂ်းပိူင်ႇၼၼ်ႉတႃႉ။ပိၵ်ႉသမ်ႉမႂ်းထုၵ်ႇတၢႆသေၵေႃႈပွၵ်ႈၼႆႉၵဝ်ဢမ်ႇၸီႇယၢင်ႇႁႂ်ႈမႂ်းလႆႈတၢႆ။လွင်ႈမၼ်းၸမ်း၊မႂ်းလႆႈႁၢပ်ႇတိူၵ်ႈတႃႇထႃႇဝရႃႉၽြႃးၽြႃးပဵၼ်ၸဝ်ႈဢွၼ်ၼႃႈဢွွၼ်ႁူဝ်ၸဝ်ႈပေႃႈတႃႇဝိတ်ႉၼၼ်ႉမႃးယဝ်ႉ။
၂၇ မႂ်းလႆႈၶၢမ်ႇတုၵ်ႉၶႃႉတၢင်းၽၢၼ်ၵႃႈၼႂ်းလွင်ႈတၢင်းၵႃႈဢၼ်ၸဝ်ႈပေႃႈၵဝ်ၶၢမ်ႇတုၵ်ႉၶႃႉတၢင်းၽၢၼ်ၵူႈၸိူဝ်ႉၵူႈပိူင်ၼၼ်ႉမႃးယဝ်ႉ၊ဝႃႈၼင်ႇၼႆဢေႃႈ။သေႃးလမုၼ်ႇႁေႃႈဢႃႇပျႃႇထႃႇဢွၵ်ႇသေၵႃႈၼႂ်းဢရႃႇယိတ်ႉပရေႃးႁိၵ်ႈလႄႈႁဵတ်းႁႂ်ႈၵႂၢမ်းဢၼ်ထႃႇဝရႃႉၽြႃးဢဝ်လွင်ႈၸိူဝ်ႉၶိူဝ်းဢေႇလိႁေႃးလၢတ်ႈဝႆႉၵႃႈတီႈဝဵင်းသိလေႃႇၼၼ်ႉလႆႈတဵမ်ထူၼ်ႈဢေႃႈ။
၂၈ ယႂႃႇၽလႆႈငိၼ်းသတၢင်းသဵင်ၶၢဝ်ႇၼၼ်ႉသေယဝ်ႉ၊ပိၵ်ႉသမ်ႉမၼ်းဢမ်ႇၸွမ်းလင်ဢပသလုမ်ႇသေၵေႃႈၵွွပ်ႈပိူဝ်ႈဢၼ်မၼ်းလႆႈၸွမ်းလင်ဢတေႃႇၼိယယဝ်ႉလႄႈယႂႃႇၽၼၼ်ႉပၢႆႈၵႂႃႇၸူးၵႃႈတီႈသုမ်ႉထဵင်ထႃႇဝရႃႉၽြႃးလႄႈယိပ်းၵဝ်ၶဝ်လႅမ်ယိတ်ႉပလၢင်ႇယူႇဢေႃႈ။
၂၉ ပိူၼ်ႈလဝ်ႈလၢတ်ႈၶုၼ်လူင်သေႃးလမုၼ်ႇလွင်ႈဢၼ်ယႂႃႇၽပၢႆၵႂႃႇၸူးၵႃႈတီႈထႃႇဝရႃႉၽြႃးလႄႈမီးယူႇၵႃႈတီႈယိတ်ႉပလၢင်ႇၼၼ်ႉလႄႈသေႃးလမုၼ်ႇပွႆႇၸႂ်ႉပေႇၼႃႇယလုၵ်ႈၸၢႆးယေႃႇတၵႂႃႇႁႂ်ႈလႆႈဢဝ်မၼ်းတၢႆဢေႃႈ။
၃၀ ပေႇၼႃႇယၼၼ်ႉႁွတ်ႈထိုင်ၵႃႈတီႈသုမ်ႉထဵင်ထႃႇဝရႃႉၽြႃးလႄႈလၢတ်ႈဝႃႈ၊-ၶုၼ်ႁေႃၶမ်းမီးဢမိင်ႉလႄႈဝႃႈ၊-ဢွၵ်ႇမႃးတႃႉ၊ဝႃႈၼင်ႇၼႆယဝ်ႉ၊မိူဝ်ႈဢၼ်ဝႃႈၼင်ႇၼႆၸိုင်ယႂႃႇၽၵေႃႈလၢတ်ႈလႄႈဝႃႈ၊-ၵဝ်ဢမ်ႇဢွၵ်ႇၵဝ်တၵ်းၶၢမ်ႇတၢႆၵႃႈတီႈၼႆႉဢေႃႈ၊ဝႃႈၼင်ႇၼႆဢေႃႈ။ပေႇၼႃႇယၵေႃႈၶိုၼ်းလဝ်ႈလၢတ်ႈတီႈၶုၼ်ႁေႃၶမ်းၵႃႈၼင်ႇဢၼ်ယႂႃႇၽၶိုၼ်းလၢတ်ႈၼၼ်ႉဢေႃႈ။
၃၁ ၶုၼ်ႁေႃၶမ်းၵေႃႈလၢတ်ႈလႄႈဝႃႈ၊-ႁဵတ်းၸွမ်းၵႃႈၼင်ႇဢၼ်မၼ်းဝႃႈၼၼ်ႉသေလႄႈဢဝ်မၼ်းသၢင်းၵျူဝ်ႇပႅတ်ႈတႃႉ။ႁဵတ်းႁႂ်ႈတၢင်းဢၼ်ယင်းဢမ်ႇမီးလွင်ႈမၼ်းလႄႈယႂႃႇၽထွၵ်ႇပႅတ်ႈလိူတ်ႈၵႃႈၼိူဝ်ၵဝ်ဢိၵ်ႇတင်းပီႈၼွင်ႉၸိူဝ်ႉၶိူဝ်းၵဝ်ၼၼ်ႉမူတ်းၵဵင်ႈတႃႉ။
၃၂ ထႃႇဝရႃႉၽြႃးတၵ်းႁႂ်ႈလိူတ်ႈမၼ်းႁွတ်ႈထိုင်ၵႃႈၼိူဝ်ႁူဝ်မၼ်းၵွပ်ႈပိူဝ်ႈၸဝ်ႈပေႃႈၵဝ်တႃႇဝိတ်ႉယင်းဢမ်ႇလႆႈႁူႉလႄႈမၼ်းဢဝ်ၵူၼ်းသွင်ၵေႃႉဢၼ်ယိင်ႈၶႅၼ်းသိုဝ်ႈတေႃႇမျၢတ်ႈလီၼႃႇသမေၼ်းဢၼ်ပဵၼ်ဢႃႇပၼႃႇလုၵ်ႈၸႆးၼေႇရႁူဝ်သိုၵ်းဢိသရေႇလတင်းဢႃႇမသလုၵ်ႈၸၢႆးယေႇသႁူဝ်သိုၵ်းယုတတၢႆၼၼ်ႉဢေႃႈ။
၃၃ လိူတ်ႈသွင်ၶႃၼၼ်ႉတၵ်းႁွတ်ႈထိုင်ၵႃႈၼိူဝ်ႁူဝ်ယႂႃႇၽႁူဝ်လုၵ်ႈႁူဝ်လၢၼ်မၼ်းတင်းလၢႆယူႇတႃႇသေႇဢေႃႈ။တၢင်းဢၼ်ၼိမ်ဢၼ်လီဢၼ်ထႃႇဝရႃႉၽြႃးပၼ်ၼၼ်ႉတၵ်းႁွတ်ႈထိုင်ၵႃႈၼိူဝ်တႃႇဝိတ်ႉဢိၵ်ႇတင်းလုၵ်ႈၸဝ်ႈလၢၼ်ၸဝ်ႈတင်းႁၢင်ႈႁေႃၸဝ်ႈရႃႇၸႃႉပလၢင်ႇၸဝ်ႈယူႇတႃႇသေႇဢေႃႈ၊ဝႃႈၼင်ႇၼႆလႄႈ၊
၃၄ ပေႇၼႃႇယလုၵ်ႈၸၢႆးယေႃႇယတၼၼ်ႉၶိုၼ်းၵႂႃႇလႄႈဢဝ်ယႂႃႇၽတၢႆသေယဝ်ႉသၢင်းၵျူဝ်ႇၵႃႈတီႈႁိူၼ်းမၼ်းၵႃႈၼႂ်းထိူၼ်ႇၼၼ်ႉဢေႃႈ။
၃၅ ၶုၼ်ႁေႃၶမ်းၶၢၼ်းပေႇၼႃႇယလုၵ်ႈၸၢႆးယေႃႇတႁႂ်ႈတၢင်တူဝ်မၼ်းၼႂ်းဢရႃႇႁူဝ်သိုၵ်းလႄႈယိတ်ႉပရေႃးႁိၵ်ႈၸႃႇတုၵ်ႉၵေႃႈၶုၼ်ႁေႃၶမ်းဢဝ်ၶၢၼ်းဝႆႉတၢင်တူဝ်ဢႃႇပျႃႇထႃႇဢေႃႈ။
၃ ၆ လၢႆးသမ်ႉၶုၼ်ႁေႃၶမ်းပွႆႇၸႂ်ႉလႄႈႁွင်ႉဢဝ်သိမိသေယဝ်ႉမီးဢမိင်ႉတီႈမၼ်းလႄႈဝႃႈ၊-မႂ်းတၵ်းလႆႈႁဵတ်းႁိူၼ်းၵႃႈၼႂ်းဝဵင်းယေႇရုသလႅမ်ႇလႄႈယူႇၵႃႈတီႈၼၼ်ႉဢေႃႈ။
၃ ၇ ယႃႇပေဢွၵ်ႇၵႃႈၼွၵ်ႈလႄႈၵႂႃႇၵႃႈတီႈလႂ်။ႁဵတ်းသတိလႄႈမၢတ်ႈတွင်းဝႆႉလွင်ႈဢၼ်ဝႃႈမႂ်းတၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၢၼ်ပဵၼ်ၼႂ်းဝၼ်းဢၼ်မႂ်းဢွၵ်ႇၵႃႈၼွၵ်ႈလႄႈၶၢမ်ႈၼမ်ႉႁွင်ႊၵေႇတြႃၼ်ႇၼၼ်ႉတႃႉ။
၃ ၈ လိူတ်ႈမႂ်းတၵ်းႁွတ်ႈထိုင်ၵႃႈၼိူဝ်ႁူဝ်မႂ်းဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်၊သိမိၶိုၼ်းလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊-ဢမိင်ႉၸဝ်ႈလီတီႈၶႃႈဢေႃႈ။ၵႃႈၼင်ႇဢၼ်ၸဝ်ႈၵဝ်ၶႃႈၸဝ်ႈၶုၼ်လူင်မီးဢမိင်ႉၼၼ်ႉၶႃႈၸဝ်ႈႁဝ်းတၵ်းႁဵတ်းၸွမ်းတီႈၶႃႈဢေႃႈ၊ဝႃႈၼင်ႇၼႆလႄႈသိမိယူႇၵႃႈၼႂ်းဝဵင်းယေႇရုသလႅမ်ႇမိူဝ်ႉဝၼ်းႁိုင်ၼႃႇဢေႃႈ။
၃ ၉ ၵူၺ်းၵႃႈမိူဝ်ႈဢၼ်ပူၼ်ႉသသေၢမ်ပီႊယဝ်ႉၼၼ်ႉၶႃႈသိမိသွင်ၵေႃႉဢွၵ်ႇပၢႆႈၵႂႃႇၸူးၵႃႈတီႈဢႃႇၶိတ်ႉလုၵ်ႈၸၢႆးမႃႇၶႃႇၶုၼ်လူင်ၵႃႇသလႄႈပိူၼ်ႈမွၵ်ႇလၢတ်ႈတီႈသိမိၼၼ်ႉလႄႈဝႃႈ၊-တူၺ်းၶႃႈလူး။
၄၀ ၶႃႈၸဝ်ႈႁဝ်းၸိူဝ်းၼၼ်ႉမီးယူႇၵႃႈတီႈဝဵင်းၵႃႇသၶႃႈဢေႃႈ၊ဝႃႈၼင်ႇၼႆသေယဝ်ႉသိမိလုၵ်ႉလႄႈႁၢင်ႈၵွပ်းမႃႉလီႈမၼ်းသေလႄႈၵႂႃႇၵႃႈတီႈဝဵင်းၵႃႇသၸူးၵႃႈတီႈဢႃႇၶိတ်ႉႁႂ်ႈလႆႈႁႃၶႃႈမၼ်းၸိူဝ်းၼၼ်ႉလႄႈႁွင်ႉဢဝ်ၶဝ်ၶုၼ်းမိူဝ်းဢေႃႈ။
၄၁ မိူဝ်ႈဢၼ်သေႃးလမုၼ်ႇငိၼ်းလွင်ႈဢၼ်သိမိဢွၵ်ႇသေၵႃႈၼႂ်းဝဵင်းယေႇရုသလႅမ်ႇၵႂႃႇၵႃႈတီႈဝဵင်းၵႃႇသလႄႈၶိုၼ်းမႃးၼၼ်ႉၸိုင်၊-
၄၂ ၶုၼ်လူင်ၼၼ်ႉပွႆႇၸႂ်ႉၵႂႃႇႁွင်ႉဢဝ်သိမိသေလႄႈမီးဢမိင်ႉလႄႈဝႃႈ၊-ၵဝ်ႁႂ်ႈမႂ်းဢဝ်ထႃႇဝရႃႉၽြႃးတိူင်ႇဝႃႈၵိၼ်ႇဝႃႈလႄႈပၼ်သတိဝႆႉတီႈမႂ်းလႄႈဝႃႈႁဵတ်းသတိလႄႈမၢတ်ႈတွင်းလွင်ႈဢၼ်မႂ်းတၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၼ်ပဵၼ်ၼႂ်းဝၼ်းဢၼ်မႂ်းဢွၵ်ႇၵႃႈၼွၵ်ႈလႄႈၵႂႃႇတၢင်ႇတီႈတၢင်ႇလႅၼ်ၼၼ်ႉဝႆႉတႃႉ၊ဝႃႈၼင်ႇၼႆဝႆႉယဝ်ႉဢမ်ႇၸႂ်ႈႁိုဝ်။မႂ်းၵေႃႈႁပ်ႉတုင်းဢဝ်လႄႈဝႃႈဢမိင်ႉၸဝ်ႈဢၼ်ၶႃႈၸဝ်ႈလႆႈငိၼ်းၼၼ်ႉလီတီႈၶႃႈဢေႃႈ၊ဝႃႈၼင်ႇၼႆဝႆႉယဝ်ႉဢမ်ႇၸႂ်ႈႁိုဝ်။
၄၃ ပိူဝ်ႈဢၼ်ပဵၼ်ၼင်ႇၼႆလႄႈၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းဢမ်ႇပႂ်ႉသႅတ်ႉၸႃႇထႃႇဝရႃႉၽြႃးဢိၵ်ႇတင်းပိင်းၺၢပ်ႈဢၼ်ၵဝ်သင်ႇလၢတ်ႈဝႆႉတီႈမႂ်းၼၼ်ႉ၊ဝႃႈၼင်ႇၼႆသေယဝ်ႉ၊-ၶုၼ်ႁေႃၶမ်းသမ်ႉမီးဢမိင်ႉတီႈသိမိလႄႈဝႃႈ၊-မႂ်းႁူႉတူႉၸရိူၵ်ႈၵႃႈမီးဢၼ်မႂ်းယၢမ်ႈလႆႈႁဵတ်းတီႈၸဝ်ႈပေႃႈၵဝ်တႃႇဝိတ်ႉၸွမ်းၵႃႈၼင်ႇဢၼ်ထုၵ်ႇၸႂ်ၵျိူၵ်ႈၸႂ်မႂ်းၼၼ်ႉယူႇဢေႃႈ။
၄၄ ပိူဝ်ႈၼႆလႄႈထႃႇဝရႃႉၽြႃးတၵ်းႁႂ်ႈတူႉၸရိူၵ်ႈဢပျႅတ်ႈမႂ်းႁွတ်ႈထိုင်ၵႃႈၼိူဝ်ႁူဝ်မႂ်းဢေႃႈ။
၄၅ ၶုၼ်လူင်သေႃးလမုၼ်ႇၸမ်းတၵ်းမီးမၢင်ႇၵလႃႇလႄႈရႃႉၸႃႉပလၢင်ႇတႃႇဝိတ်ႉၼၼ်ႉတၵ်းလႆႈတႄႇယူႇၵႃႈတီႈၽၢႆႇၼႃႈထႃႇဝရႃႉၽြႃးတႃႇသေႇဢမ်ႇထၢတ်ႇဢေႃႈ၊ဝႃႈၼင်ႇၼႆသေယဝ်ႉ၊ၶုၼ်ႁေႃၶမ်းမီးဢမိင်ႉတီႈပေႇၼႃႇယလုၵ်ႈၸၢႆးယေႃႇယတ၊ႁႂ်ႈဢဝ်မၼ်းဢွၵ်ႇၵႂႃႇၵႃႈတီႈၼွၵ်ႈလႄႈဢဝ်တၢႆပႅတ်ႈသေဢေႃႈ။ၼင်ႇၼၼ်လႄႈသိုင်ႇၸိုင်ႈဝၢၼ်ႈမိူင်းၸဝ်ႈၼၼ်ႉတႄႇယူႇၵႃႈၼႂ်းမိုဝ်းသေႃးလမုၼ်ႇဢေႃႈ။