Chapter
၃
သေႃးလမုၼ်ႇယွၼ်းႁႂ်ႈလႆႈၺၢၼ်ႇ
၁ သေႃးလမုၼ်ႇၼၼ်ႉႁဵတ်းၵေႃႉႁဵတ်းသေႈလူၺ်ႈၵၼ်တင်းၶုၼ်ႁေႃၶမ်းၽႃႇရေႃးမိူင်းဢေႇၵႅပ်ႉတုၼၼ်ႉသေလႄႈၵူပ်ႉၵူႈပဵၼ်ႁိူၼ်းလူၺ်ႈၵၼ်တင်းလုၵ်ႈယိင်းၶုၼ်ႁေႃၶမ်းၽႃႇရေႃးသေယဝ်ႉႁွင်ႉဢဝ်မၼ်းၼၢင်းမႃးယူႇတီႈၼႂ်းဝဵင်းတႃႇဝိတ်ႉတေႃႇထိုင်ႁွတ်ႈမၼ်းတေႁဵတ်းႁေႃၸဝ်ႈ
၂ ဢိၵ်ႇတင်းႁိူၼ်းထႃႇဝရႃႉၽြႃးတင်းလမ်းဝဵင်းယေႇရုသလႅမ်ႇလဵပ်ႈႁိမ်းႁွမ်းယဝ်ႉတူဝ်ႈလီငၢမ်းၼၼ်ႉဢေႃႈ။မိူဝ်ႈၼၼ်ႉၵွပ်ႈပိူဝ်ႈဢၼ်ဢမ်ႇပႆႇတႄႇပႆႇႁဵတ်းႁိူၼ်းၸဝ်ႈပုၼ်ႈၼႃႇမႃႉၸိုဝ်သဵင်ထႃႇဝရႃႉၽြႃးၼၼ်ႉလႄႈၵူၼ်းတင်းလၢႆပုၵ်ႉၸေႃႇယိၸ်ႉၵႃႈၼိူဝ်ထႃႇၼႃႉတီႈသုင်တင်းလၢႆဢေႃႈ။
၃ သေႃးလမုၼ်ႇၼၼ်ႉႁၵ်ႉထႃႇဝရႃႉၽြႃးလႄႈပႂ်ႉၵမ်ပႂ်ႉၸွမ်းထုင်းၽိင်ႈဢၼ်ၸဝ်ႈပေႃႈမၼ်းတႃႇဝိတ်ႉႁဵတ်းဝႆႉၸိူဝ်းၼၼ်ႉဢေႃႈ။ၵူၺ်းၵႃႈမၼ်းပုၵ်ႉၸေႃႇယိၸ်ႉလႄႈဢဝ်ၽႆးတုတ်ႇၼၢမ်ႇသႃႇၵႃႈၼိူဝ်ထႃႇၼႃႉတီႈသုင်ၸိူဝ်းၼၼ်ႉဢေႃႈ။
၄ မီးၽဝ်ႇၼိုင်ႈၶုၼ်ႁေႃၶမ်းၵႂႃႇၵႃႈတီႈဝဵင်းၵိပွင်ႇႁႂ်ႈလႆႈပုၵ်ႉၸေႃႇယိၸ်ႉၵႃႈတီႈၼၼ်ႉၵွပ်ႈပိူဝ်ႈဢၼ်ထႃႇၼႃႉတီႈသုင်ဢၼ်မျၢတ်ႈၼႃႇလူင်လၢင်ၼၼ်ႉမီးၵႃႈတီႈၼၼ်ႉလႄႈသေႃးလမုၼ်ႇဢဝ်ယိၸ်ႉဢၼ်တုတ်ႇၽႆးႁဵင်ၼိုင်ႈပုၵ်ႉၸေႃႇၵႃႈၼိူဝ်ယိၸ်ႉပလၢင်ႇၼၼ်ႉဢေႃႈ။
၅ ထႃႇဝရႃႉၽြႃးပေႃႇမႃးတီႈသေႃးလမုၼ်ႇၵႃႈၼႂ်းတၢင်းဢၼ်မၼ်းၼွၼ်းၽၼ်ႁၼ်ၶိင်ႇၵၢင်ၶိုၼ်းၵႃႈၼႂ်းဝဵင်းၵိပွင်ႇၼၼ်ႉလႄႈၽြႃးပဵၼ်ၸဝ်ႈမီးဢမိင်ႉဝႃႈ၊-ယွၼ်းဢဝ်သူးဢၼ်ၵဝ်တၵ်းလႆႈပၼ်တီႈမႂ်းၼၼ်ႉတႃႉ၊ဝႃႈၼင်ႇၼႆဢေႃႈ။
၆ သေႃးလမုၼ်ႇၵေႃႈလဝ်ႈယွၼ်းလႄႈဝႃႈ၊-ၸဝ်ႈႁဝ်းႁဵတ်းၵျေးၸူးၼမ်ၼႃႇလူင်လၢင်တီႈၶႃႈၸဝ်ႈႁဝ်းတႃႇဝိတ်ႉဢၼ်ပဵၼ်ပေႃႈၶႃႈၸဝ်ႈႁဝ်းၼၼ်ႉၸွမ်းၵႃႈၼင်ႇဢၼ်မၼ်းၵႂႃႇမႃးၵႃႈတီႈၽၢႆႇၼႃႈၸဝ်ႈႁဝ်းမႅၼ်ႈၸွမ်းၼင်ႇသမ်ႇမႃႇတြႃးတြႃးတၢင်းဢၼ်သိုဝ်ႈတေႃႇတြႃးတၢင်းဢၼ်ပႃးႁူဝ်ၸႂ်သေလႄႈၵမ်ၵျၢင်ႉသိုဝ်ႈသိုဝ်ႈရူဝ်းရူဝ်းၼၼ်ႉတီႈၶႃႈယဝ်ႉ။ၸဝ်ႈႁဝ်းပႂ်ႉၸွမ်းၵျေးၸူးတြႃးပုၼ်ႈမၼ်းၼႂ်းလွင်ႈဢၼ်ၸဝ်ႈႁဝ်းဢိတ်းလူပၼ်လုၵ်ႈၸၢႆးမၼ်းႁႂ်ႈလႆႈၼင်ႈၵႃႈၼိူဝ်ရႃႇၸႃႉပလၢင်ႇမၼ်းဝၼ်းမိူဝ်ႈၼႆႉၼၼ်ႉတီႈၶႃႈယဝ်ႉ။
၇ မိူဝ်ႈလဵဝ်ၼႆႉၸိုင်ထႃႇဝရႃႉၽြႃးၽြႃးပဵၼ်ၸဝ်ႈၵဝ်ၶႃႈတီႈၶႃႈ။ၸဝ်ႈႁဝ်းၶၢၼ်းၶႃႈၸဝ်ႈႁဝ်းဝႆႉႁႂ်ႈပဵၼ်ၶုၼ်ႁေႃၶမ်းတၢင်တူဝ်ပေႃႈၶႃႈၸဝ်ႈတႃႇဝိတ်ႉၼၼ်ႉတီႈၶႃႈယဝ်ႉ။ၵူၺ်းၵႃႈၶႃႈၸဝ်ႈႁဝ်းၼႆႉယင်းပဵၼ်လုၵ်ႈဢွၼ်ႇယူႇၵူၺ်းလႄႈယင်းဢမ်ႇႁူႉတေလႆႈၸီႇယၢင်ႇတႅပ်းတတ်းၸိူဝ်ႉႁိုဝ်ၼၼ်ႉၶႃႈ။
၈ ၶႃႈၸဝ်ႈႁဝ်းၼႆႉမီးယူႇၵႃႈၼႂ်းၵႄႈဝူင်ႈၵၢင်ၵူၼ်းၸဝ်ႈႁဝ်းဢၼ်ၸဝ်ႈႁဝ်းလိူၵ်ႈၵဵပ်းဝႆႉဢၼ်ပဵၼ်ၵူၼ်းလူင်ဢၼ်ဢမ်ႇၼပ်ႉဢမ်ႇဢၢၼ်ႇလႆႈၼမ်ၼႃႇလူင်လၢင်ၸိူဝ်းၼၼ်ႉတီႈၶႃႈဢေႃႈ။
၉ ပိူဝ်ႈဢၼ်ပဵၼ်ၼင်ႇၼႆလႄႈၶႅၼ်းတေႃႈဢိတ်းလူပၼ်ႁူဝ်ၸႂ်ဢၼ်မီးၺၢၼ်ႇပုၼ်ႈဢၼ်ၶႃႈၸဝ်ႈႁႂ်ႈၶႃႈၸဝ်ႈမေႃၸီႇယၢင်ႇတြႃးတီႈၵူၼ်းၸဝ်ႈႁဝ်းတင်းလၢႆႁႂ်ႈၶႃႈၸဝ်ႈႁဝ်းမေႃၸၵ်းၽႄလႄႈႁူႉလွင်ႈဢၼ်လီဢၼ်ဢမ်ႇလီၼၼ်ႉသေၵမ်းတီႈၶႃႈ။ၽူႈလႂ်တၵ်းတတ်ႈၼိုင်ႇလႆႈႁႂ်ႈလႆႈၸီႇယၢင်ႇတြႃးတီႈၵူၼ်းၸဝ်ႈႁဝ်းဢၼ်ၼမ်ၼႃႇလူင်လၢင်ထၢၼ်ႇၼႆႉၸိူဝ်းၼၼ်ႉတီႈၶႃႈ၊ဝႃႈၼင်ႇၼႆဢေႃႈ။
၁၀ ၵႂၢမ်းဢၼ်သေႃးလမုၼ်ႇလဝ်ႈယွၼ်းၸိူဝ်ႉၼင်ႇၼၼ်ၼၼ်ႉထုၵ်ႇၸႂ်ၵျိူၵ်ႈၸႂ်ထႃႇဝရႃႉၽြႃးလႄႈၽြႃးပဵၼ်ၸဝ်ႈမီးဢမိင်ႉတီႈမၼ်းလႄႈဝႃႈ၊-
၁၁ ၵွပ်ႈပိူဝ်ႈဢၼ်မႂ်းယွၼ်းဢဝ်ဢၼ်ၼႆႉၵူၺ်းယင်းဢမ်ႇယွၼ်းဢဝ်ႁႂ်ႈၸူဝ်ႈဢသၢၵ်ႈဢၼ်ယၢဝ်းဢၼ်ယိုၼ်းဢမ်ႇယွၼ်းဢဝ်ၸေးၸိမ်ႇဢမ်ႇယွၼ်းဢဝ်ဢသၢၵ်ႈရၢၼ်ႇသူႇမႂ်းလႄႈလဝ်ႈယွၼ်းဢဝ်ၺၢၼ်ႇဢၼ်တတ်ႈၼိုင်ႇလႆႈႁႂ်ႈလႆႈၸီႇယၢင်ႇတြႃးလႆႈၼၼ်ႉၵူၺ်းပုၼ်ႈတူဝ်ၸဝ်ႈၵဝ်ႇၼၼ်ႉလႄႈၵဝ်ပၼ်ၸွမ်းၵႃႈၼင်ႇဢၼ်မႂ်းလဝ်ႈယွၼ်းဢဝ်ၼၼ်ႉဢေႃႈ။
၁၂ ၵဝ်ပၼ်ၸႂ်ဝိၺိၺ်ႇဢၼ်တဵမ်ဝႆႉတင်းတၢင်းလၵ်းလႅမ်ၺၢၼ်ႇထၼ်ႈပေႃးၵေႃႉဢၼ်မိူၼ်ၵၼ်တင်းမႂ်းၼၼ်ႉဢမ်ႇမီးမိူဝ်ႈဢွၼ်ႇတၢင်းမႂ်းလႄႈမိူဝ်ႈၵမ်းလိုၼ်းမႂ်းၼၼ်ႉၵေႃႈတေဢမ်ႇမီးသေၵေႃႉၼၼ်ႉဢေႃႈ။
၁၃ ၼွၵ်ႈသေၼၼ်ႉၵဝ်ပၼ်သူးတီႈမႂ်းဢၼ်မႂ်းဢမ်ႇယွၼ်းဢၼ်ဝႃးၸေးၸိမ်ႇဢုၵ်ႉၸႃႇမူၼ်ၵုင်ႇသရေႇထၼ်ႈပေႃးၶုၼ်ႁေႃၶမ်းဢၼ်မိူၼ်ၵၼ်တင်းမႂ်းတၵ်းဢမ်ႇပေႃႇဢမ်ႇမီးၼႂ်းၸူဝ်ပၢၼ်မႂ်းၼၼ်ႉဢေႃႈ။
၁၄ ပေႃးမႂ်းၸွမ်းသဵၼ်ႈတၢင်းၵဝ်ယူႇလႄႈပႂ်ႉၵမ်ပႂ်ႉၸွမ်းထုင်းၽိင်းတြႃးၵဝ်ဢိၵ်ႇတၢင်းလွင်ႈတၢင်းဢၼ်ၵဝ်ၸီႇယၢင်ႇဝႆႉတင်းလၢႆၼၼ်ႉယူႇမိူၼ်ၸိူဝ်ႉၼင်ႇဢၼ်ပေႃႈမႂ်းတႃႇဝိတ်ႉၵမ်ၵျင်ႉၼၼ်ႉၸိုင်ၵဝ်တၵ်းႁႂ်ႈၸူဝ်ဢသၢၵ်ႈမႂ်းယိုၼ်းယၢဝ်းဢေႃႈ၊ဝႃႈၼင်ႇၼႆဢေႃႈ။
၁၅ သေႃးလမုၼ်ႇတိုၼ်ႇမႃးလႄႈႁူႉပဵၼ်တၢင်းဢၼ်ၼွၼ်းၽၼ်ႁၼ်ၼၼ်ႉ
ဢေႃး။လၢႆးသမ်ႉမၼ်းၵႂႃႇၵႃႈတီႈဝဵင်းယေႇရုသလႅမ်ႇလႄႈၸုၵ်းယူႇၵႃႈတီႈၽၢႆႇၼႃႈတိူၵ်ႈပတိၺိၼ်ႇထႃႇဝရႃႉၽြႃးသေယဝ်ႉပုၵ်ႉၸေႃႇယိၸ်ႉဢၼ်တုတ်ႇၽႆးလႂ်၊ယိၸ်ႉမိၵ်ႈသႁႃႇယႃႉလႂ်လႄႈႁဵတ်းပွႆးပုၼ်ႈၶႃႈမၼ်းၵူၼ်းမၼ်းတင်းသဵင်ႈတင်းလူင်ဢေႃႈ။
ၺၢၼ်ႇဢၼ်ဢုပ်ႉပိူင်ႇဝၢၼ်ႈမိူင်း
၁၆ မီးၽဝ်ႇၼိုင်ႈမေႈမွၵ်ႇယႃႈသွင်ၵေႃႉဢွၼ်ၵၼ်မႃးၸူးတီႈၶုၼ်ႁေႃၶမ်းလႄႈၸုၵ်းယူႇၵႃႈတီႈၽၢႆႇၼႃႈမၼ်းသေယဝ်ႉမေႈယိင်းၵေႃႉၼိုင်ႈလဝ်ႈလၢတ်ႈလႄႈဝႃႈ၊-ၸဝ်ႈတီႈၶႃႈ။
၁၇ ၶႃႈၸဝ်ႈတင်းမေႈယိင်းၵေႃႉၼႆႉယူႇႁိူၼ်းလဵဝ်ၵၼ်ၶႃႈဢေႃႈ။ယူႇႁိူၼ်းလဵဝ်ၵၼ်ယူႇသေလႄႈၶႃႈၸဝ်ႈၵိူတ်ႇလဵင်ႉလုၵ်ႈမႃးၵေႃႉၼိုင်ႈၶႃႈဢေႃႈ။
၁၈ လိုၼ်းသေၶႃႈၸဝ်ႈၵိူတ်ႇလဵင်ႉလုၵ်ႉယဝ်ႉပူၼ်ႉသၢမ်ဝၼ်းမေႈယိင်းၵေႃႉၼႆႉၵေႃႈၵိူတ်ႇလဵင်ႉလုၵ်ႈမႃးလႄႈႁဝ်းၶႃႈယူႇလူၺ်းၵၼ်ၶႃႈဢေႃႈ။ၵႃႈတီႈႁိူၼ်းၼၼ်ႉဢမ်ႇမီးၶႅၵ်ႇသေၵေႃႉသေၵူၼ်းၶႃႈ။
၁၉ မီးႁဝ်းၶႃႈသွင်ၵေႃႉၵူၺ်းၶႃႈဢေႃႈ။လုၵ်ႈဢွၼ်ႇမေႈယိင်းၼႆႉတၢႆမိူဝ်ႈၶိင်ႇၵၢင်ၶိုၼ်းၵွပ်ႈပိူဝ်ႈမေႈမၼ်းၼွၼ်းတဵင်သႂ်ႇမႅၼ်ႈလုၵ်ႈဢွၼ်ႇမၼ်းၼၼ်ႉၶႃႈဢေႃႈ။
၂၀ ၶိင်ႇတဵင်ႈၶိုၼ်းၼၼ်ႉမၼ်းလုၵ်ႉမႃးလႄႈဢဝ်လုၵ်ႈဢွၼ်ႇၵဝ်ၶႃႈၵႂႃႇဝႆႉၵႃႈၼႂ်းဝၢင်ႈႁူဝ်ဢူၵ်းမၼ်းသေလႄႈဢဝ်တူဝ်တၢႆလုၵ်ႈဢွၼ်ႇမၼ်းၼၼ်ႉသမ်ႉမႃးဝႆႉၵႃႈၼႂ်းဝၢင်ႈႁူဝ်ဢူၵ်းၵဝ်ၶႃႈၶိင်ႇတဵင်ၶိုၼ်းၼၼ်ႉၶႃႈဢေႃႈ။
၂၁ မိူဝ်ႈၶိင်ႇၵၢင်ၼႂ်မိူဝ်ႈဢၼ်ၵဝ်ၶႃႈလုၵ်ႉမႃးႁႂ်ႈလႆႈပၼ်ၼူမ်းလုၵ်ႈဢွၼ်ႇၵၼ်ၼၼ်ႉၸိုင်လႆႈႁၼ်လုၵ်ႈဢွၼ်ႇပဵၼ်ဢၼ်တၢႆဝႆႉတီႈၶႃႈဢေႃႈ။ၵူၺ်းၵႃႈမိူဝ်ႈဢၼ်ၵဝ်ၶႃႈလူတူၺ်းလုၵ်ႉဢွၼ်ႇၼၼ်ႉလီလီငၢမ်းငၢမ်းၼၼ်ႉၸိုင်လႆႈႁၼ်ဝႃႈၵေႃႉတၢႆၼၼ်ႉဢမ်ႇၸႂ်ႈလုၵ်ႉဢွၼ်ႇဢၼ်ၵဝ်ၶႃႈၵိူတ်ႇလဵင်ႉမႃးၼၼ်ႉၶႃႈ၊ဝႃႈၼင်ႇၼႆဢေႃႈ။
၂၂ မေႈယိင်းတၢင်ႇၵေႃႉၼၼ်ႉၵေႃႈၶိုၼ်းလၢတ်ႈလႄႈဝႃႈ၊-ဢမ်ႇၸႂ်ႈၵူၺ်း။လုၵ်ႈဢွၼ်ႇဢၼ်ဢသၢၵ်ႈလိပ်းၼၼ်ႉပဵၼ်လုၵ်ႉၸၢႆးၵဝ်ဢိူဝ်ႈ။လုၵ်ႈဢွၼ်ႇဢၼ်တၢႆၼၼ်ႉပဵၼ်လုၵ်ႈၸၢႆးမႂ်းဢိူဝ်ႈ၊ဝႃႈၼင်ႇၼႆဢေႃႈ။မေႈယိင်းၵေႃႉဢွၼ်တၢင်းၼၼ်ႉၵေႃႈလၢတ်ႈဝႃႈ၊-ဢမ်ႇၸႂ်ႈၵူၺ်း။လုၵ်ႈဢွၼ်ႇဢၼ်တၢႆၼၼ်ႉပဵၼ်လုၵ်ႈၸၢႆးမႂ်းဢိူဝ်ႈ။လုၵ်ႈဢွၼ်ႇဢၼ်ဢသၢၵ်ႈလိပ်းၼၼ်ႉပဵၼ်လုၵ်ႈၸၢႆးၵဝ်ဢိူဝ်ႈ၊ဝႃႈၼင်ႇၼႆဢေႃႈ။
၂၃ ၼင်ႇၼၼ်လႄႈသွင်ၶႃလဝ်ႈလၢတ်ႈၵႃႈတီႈၶုၼ်ႁေႃၶမ်းဢေႃႈ။ၶုၼ်ႁေႃၶမ်းၵေႃႈမီးဢမိင်ႉလႄႈဝႃႈ၊-မေႈယိင်းၵေႃႉၼိုင်ႈဝႃႈလုၵ်ႈဢွၼ်ႇမၼ်းတၢႆယဝ်ႉ။ဢၼ်ဢသၢၵ်ႈလိပ်းၼၼ်ႉပဵၼ်လုၵ်ႈဢွၼ်ႇၵဝ်၊ဝႃႈၼႆဢိူဝ်ႈ။ၵေႃႉၼိုင်ႈၵေႃႈဝႃႈ၊-လုၵ်ႈဢွၼ်ႇဢၼ်တၢႆၼၼ်ႉပဵၼ်လုၵ်ႈၸၢႆးမၼ်းဢိူဝ်ႈ။ၵေႃႉဢၼ်ဢသၢၵ်ႈလိပ်းၼၼ်ႉပဵၼ်လုၵ်ႈၵဝ်ဢိူဝ်ႈ၊ဝႃႈၼႆတင်းသွင်ၵေႃႉယဝ်ႉ။
၂၄ ၶုၼ်ႁေႃၶမ်းသမ်ႉမီးဢမိင်ႉလႄႈဝႃႈ၊-ဢဝ်လၢပ်ႇမႃးတီႈၵဝ်တႃႉ၊ဝႃႈၼင်ႇၼႆလႄႈၶဝ်ၵေႃႈဢဝ်လၢပ်ႇမႃးၵႃႈတီႈၽၢႆႇၼႃႈၶုၼ်ႁေႃၶမ်းဢေႃႈ။
၂၅ ၶုၼ်ႁေႃၶမ်းၵေႃႈမီးဢမိင်ႉလႄႈဝႃႈ၊-တႅပ်းလုၵ်ႈဢွၼ်ႇဢၼ်ဢသၢၵ်ႈလိပ်းၼၼ်ႉႁဵတ်းပဵၼ်သွင်ႇၽၢၵ်ႇသေလႄႈပၼ်တီႈမေႈယိင်းသွင်ၵေႃႉၼႆႉယေႈၵေႃႉယေႈၽၢၵ်ႇတႃႉ၊
၂၆ မိူဝ်ႈဢၼ်ဝႃႈၼင်ႇၼႆၸိုင်မေႈယိင်းၵေႃႉၼိုင်ႈမီးၸႂ်ဢၼ်ဢိတ်းလူလုၵ်ႈဢွၼ်ႇၼၼ်ႉၼႃႇလူင်လၢင်လႄႈတွင်းပၢၼ်ႇလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊-ၸဝ်ႈတီႈၶႃႈ။ဢဝ်လုၵ်ႈဢွၼ်ႇဢၼ်ဢသၢၵ်ႈလိပ်းၼႆႉပၼ်တီႈမေႈယိင်းၼႆႉၵႂႃႇသေၵမ်းၶႃႈ။ယႃႇပေဢဝ်လုၵ်ႈဢွၼ်ႇၼၼ်ႉတၢႆသေၵမ်းတီႈၶႃႈ၊ဝႃႈၼင်ႇၼႆဢေႃႈ။မေႈယိင်းတၢင်ႇၵေႃႉၼၼ်ႉသမ်ႉလၢတ်ႈလႄႈဝႃႈ၊-ယႃႇပေႁႂ်ႈမၼ်းပဵၼ်ပုၼ်ႈၵဝ်ၵူၺ်းယႃႇပေႁႂ်ႈမၼ်းပဵၼ်ပုၼ်ႈမႂ်းၵူၺ်း။ႁႂ်ႈတႅပ်းတႃႉ၊ဝႃႈၼင်ႇၼႆဢေႃႈ။
၂၇ မိူဝ်ႈၼၼ်ႉၶုၼ်ႁေႃၶမ်းမီးဢမိင်ႉလႄႈဝႃႈ၊-ဢဝ်လုၵ်ႈဢွၼ်ႇဢၼ်ဢသၢၵ်ႈလိပ်းၼၼ်ႉပၼ်တီႈမေႈယိင်းၵေႃႉဢွၼ်ႇတၢင်းၼၼ်ႉတႃႉ။ယႃႇပေဢဝ်လုၵ်ႈဢွၼ်ႇတၢႆ။မၼ်းပဵၼ်မေႈလုၵ်ႈဢွၼ်ႇဢၼ်ဢသၢၵ်ႈလိပ်းၼၼ်ႉၸႅတ်ႈမၢၼ်ႇဢေႃႈ၊ဝႃႈၼင်ႇၼႆဢေႃႈ။
၂၈ ၵူၼ်းမဵဝ်းဢိသရေႇလတင်းသဵင်ႈတင်းလူင်လႆႈႁူႉလႆႈငိၼ်းလွင်ႈတၢင်းဢၼ်ၶုၼ်ႁေႃၶမ်းၸီႇယၢင်ႇၸိူဝ်ႉၼင်ႇၼၼ်သေယဝ်ႉရူဝ်ႇသေၵူဝ်ယမ်ၶုၼ်ႁေႃၶမ်းၵွပ်ႈပိူဝ်ႈဢၼ်ၶဝ်ႁူႉႁၼ်လွင်ႈဢၼ်ၶုၼ်ႁေႃၶမ်းမီးတဵမ်ဝႆႉတင်းၺၢၼ်ႇဢၼ်ၽြႃးပဵၼ်ၸဝ်ႈပၼ်ႁႂ်ႈလႆႈၸီႇယၢင်ႇတြႃးၼၼ်ႉဢေႃႈ။