Chapter
၂၁
သူၼ်မၢၵ်ႇၸပိတ်ႉၼႃႇပုတ်ႉ
၁ လိုၼ်းၼၼ်ႉၵွပ်ႈပိူဝ်ႈဢၼ်ၼႃႇပုတ်ႉၵူၼ်းဝဵင်းယေႇၸရေႇလမီးသူၼ်ဢူးယဵၼ်ႇမၢၵ်ႇၸပိတ်ႉၵႃႈၼႂ်းဝဵင်းယေႇၸရေႇလၵႃႈတီႈႁိမ်းႁေႃၸဝ်ႈဢႃႇႁပ်ႉၶုၼ်လူင်သမႃႇရိၼၼ်ႉဢေႃႈ။
၂ ဢႃႇႁပ်ႉလၢတ်ႈတီႈၼႃႇပုတ်ႉလႄႈဝႃႈ၊-ၵွပ်ႈပိူဝ်ႈသူၼ်ဢူးယဵၼ်ႇၸပိတ်ႉမႂ်းမီးၵႃႈတီႈႁိမ်းႁေႃၸဝ်ႈလႄႈပၼ်ႁႂ်ႈၵဝ်ႁဵတ်းႁႆႊႁဵတ်းသူၼ်သေၵမ်း။ၵဝ်တၵ်းဢဝ်သူၼ်ဢူးယဵၼ်ႇဢၼ်ယိင်ႈၶႅၼ်းလီၼႃႇသေၼၼ်ႉပၼ်တီႈမႂ်းဢေႃႈ။ဢမ်ႇၼၼ်ၵေႃႈပေႃးမႂ်းမီးဢလူဝ်ႇၸိုင်ၵဝ်တၵ်းပၼ်ၵႃႈမၼ်းၶၼ်မၼ်းလႄႈသိုဝ်ႉဢဝ်ဢေႃႈ၊ဝႃႈၼင်ႇၼႆလႄႈၼႃႇပုတ်ႉၵေႃႈၶိုၼ်းလဝ်ႈလၢတ်ႈတီႈဢႃႇႁပ်ႉလႄႈဝႃႈ၊-
၃ ႁႂ်ႈထႃႇဝရႃႉၽြႃးႁၢမ်ႈတပ်ႉႁႄႉၶႅၼ်ဢမူႉတၢင်းဢၼ်ၶႃႈၸဝ်ႈလႆႈဢဝ်လိၼ်ဢမူၺ်ႇဢၼ်ၵဝ်လႆႈၶၢမ်ႇဢဝ်သေၵႃႈတီႈၸူဝ်ႈပူႇပၢၼ်မွၼ်ႇၸိူဝ်းၼၼ်ႉပၼ်တီႈၸဝ်ႈႁဝ်းသေၵမ်းလူၺ်ႈ၊မိူဝ်ႈဢၼ်ဝႃႈၼင်ႇၼႆၸိုင်ၵွပ်ႈပိူဝ်ႈၵႂၢမ်းဢၼ်ၼႃႇပုတ်ႉၵူၼ်းဝဵင်းယေႇၸရေႇလလဝ်ႈလၢတ်ႈဝႃႈ၊-
၄ ဢမ်ႇလႆႈဢဝ်လိၼ်ဢမူၺ်ႇဢၼ်လႆႈၶၢမ်ႇဢဝ်သေၵႃႈတီႈၸူဝ်ႈပူႇပၢၼ်မွၼ်ႇၸိူဝ်းၼၼ်ႉပၼ်၊ဝႃႈၼင်ႇၼႆၼၼ်ႉလႄႈၶုၼ်ဢႃႇႁပ်ႉၼၼ်ႉမီးတၢင်းၸႂ်ဢၼ်တမ်ႇၼွႆႉမွင်ၸႂ်ႁဵဝ်ႇၸွပ်ႈယူႇသေလႄႈၶဝ်ႈၵႃႈၼႂ်းႁေႃၸဝ်ႈလႄႈၼွၼ်းၵႃႈၼိူဝ်ၵူႈတီႈၼွၼ်းၸဝ်ႈယူႇဝၢႆႇၼႃႈပႅတ်ႈယူႇသေလႄႈဢမ်ႇၵိၼ်တၢင်းၵိၼ်တၢင်းၶူပ်းလႄႈယူႇဢေႃႈ။
၅ မေးမၼ်းယေႇၸပေႇလၼၼ်ႉမႃးတီႈမၼ်းလႄႈထၢမ်ဝႃႈ၊-ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸႂ်ၸဝ်ႈႁဝ်းႁဵဝ်ႇၸွပ်ႈယူႇထၼ်ႈပေႃးဢမ်ႇၵိၼ်ဢမ်ႇၶူပ်းလႆႈၼင်ႇႁိုဝ်တီႈၶႃႈ၊ဝႃႈၼင်ႇၼႆလႄႈမၼ်းၶိုၼ်းလၢတ်ႈလႄႈဝႃႈ၊-
၆ ၵွပ်ႈပိူဝ်ႈဢၼ်ၵဝ်လၢတ်ႈတီႈၼႃႇပုတ်ႉၵူၼ်းဝဵင်းယေႇၸရေႇလၼၼ်ႉႁႂ်ႈမၼ်းၶၢႆသူၼ်ဢူးယဵၼ်ႇၸပိတ်ႉမႂ်းပၼ်တီႈၵဝ်လႄႈဢဝ်ငိုၼ်းသေၵမ်း။ဢမ်ႇၼၼ်ၵေႃႈပေႃးမီးဢလူဝ်ႇၸိုင်ၵဝ်တၵ်းပၼ်သူၼ်ဢူးယဵၼ်ႇတၢင်ႇတီႈတၢင်ႇဢၼ်တီႈမႂ်းဢေႃႈ၊ဝႃႈၼင်ႇၼႆၵေႃႈမၼ်းၶိုၼ်းဝႃႈ၊-ၶႃႈၸဝ်ႈဢမ်ႇပၼ်သူၼ်ဢူးယဵၼ်ႇမၢၵ်ႇၸပိတ်ႉၼၼ်ႉတီႈၸဝ်ႈႁဝ်းတီႈၶႃႈ၊ဝႃႈၼင်ႇၼႆလႄႈႁႂ်ႈၸႂ်ၵဝ်ႁဵဝ်ႇၸွပ်ႈဢေႃႈ၊ဝႃႈၼင်ႇၼႆဢေႃႈ။
၇ မေးမၼ်းယေႇၸပေႇလၼၼ်ႉလၢတ်ႈလႄႈဝႃႈ၊-ၸဝ်ႈႁဝ်းလႆႈဢုပ်ႉပိူင်ႇသိုင်ႇၸိုင်ႈဝၢၼ်ႈမိူင်းဢိသရေႇလၼႆႉဢမ်ႇၸႂ်ႈႁိုဝ်။လုၵ်ႉလႄႈမီးတၢင်းၸႂ်ဢၼ်သႂၢင်ႇသိူဝ်းသေလႄႈၵိၼ်တၢင်းၵိၼ်တၢင်းၶူပ်းသေၵမ်းၶႃႈ။
၈ ၵဝ်ၶႃႈတၵ်းဢဝ်သူၼ်ဢူးယဵၼ်ႇမၢၵ်ႇၸပိတ်ႉၼႃႇပုတ်ႉၵူၼ်းဝဵင်းယေႇၸရေႇလၼၼ်ႉသၢၵ်ႈပၼ်တီႈၸဝ်ႈႁဝ်းယူႇတီႈၶႃႈဢေႃႈ၊ဝႃႈၼင်ႇၼႆလႄႈမၼ်းဢဝ်ၼႃႇမႃႉၸိုဝ်သဵင်ဢႃႇႁပ်ႉသေလႄႈတႅမ်ႈလိၵ်ႈသေယဝ်ႉဢဝ်တၼ်းသိၵ်ႈၸဝ်ႈတဵၵ်းသေလႄႈပၼ်ၵႂႃႇၵႃႈတီႈၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ်ဢိၵ်ႇတင်းမူးမၢတ်ႈၽွင်းမိူင်းဢၼ်မီးၵႃႈၼႂ်းဝဵင်းဢၼ်မၼ်းယူႇၼၼ်ႉဢေႃႈ။
၉ ၶေႃႈၵႂၢမ်းဢၼ်ပႃးၼႂ်းလိၵ်ႈၼၼ်ႉလႄႈဝႃႈၸမ်း၊-ႁွင်ႉပၢဝ်ႇႁွင်ႉသေႃႇၶိင်ႇဢၼ်တၵ်းလႆႈၵမ်တၢင်းၵိၼ်ၼၼ်ႉလႄႈယုၵ်ႉယွင်ႈၼႃႇပုတ်ႉဝႆႉၵႃႈၼိူဝ်ၵူၼ်းတင်းလၢႆသေယဝ်ႉဢဝ်ၵူၼ်းဢႃႉထမ်ႇမႃႉသွင်ၵေႃႉဝႆႉၵႃႈတီႈၽၢႆႇၼႃႈမၼ်းသေလႄႈႁႂ်ႈသွင်ၶႃၼၼ်ႉၶၢမ်ႇသၢၵ်ႈသေႇလႄႈဝႃႈ၊-မႂ်းၼႆႉလႆႈၵိၼ်ႇလႃႇၽြႃးပဵၼ်ၸဝ်ႈဢိၵ်ႇတင်းၶုၼ်ႁေႃၶမ်းယဝ်ႉ၊ဝႃႈၼင်ႇၼႆသေ။
၁၀ ႁဵတ်းၸိူဝ်ႉၼင်ႇၼၼ်ယဝ်ႉၸင်ႇဢွၼ်ၵၼ်ဢဝ်မၼ်းဢွၵ်ႇလႄႈဢဝ်မၢၵ်ႇႁိၼ်ထိမ်ႈႁႂ်ႈမၼ်းတၢႆတႃႉ၊ဝႃႈၼင်ႇၼႆဢေႃႈ။
၁၁ ၵူၼ်းဝဵင်းဢၼ်မၼ်းယူႇၸိူဝ်းၼၼ်ႉဢၼ်ပဵၼ်ၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ်ဢိၵ်ႇတင်းမူးမၢတ်ႈၽွင်းမိူင်းဢၼ်ယူႇၵႃႈတီႈဝဵင်းဢၼ်မၼ်းယူႇၸိူဝ်းၼၼ်ႉႁဵတ်းၵႃႈဢၼ်ယေႇၸပေႇလလၢတ်ႈၼၼ်ႉၸွမ်းၵႃႈၼင်ႇဢၼ်တႅမ်ႈပႃးၵႃႈၼႂ်းလိၵ်ႈဢၼ်မၼ်းပၼ်မႃးၼၼ်ႉလႄႈ
၁၂ ၶဝ်ဢွၼ်ၵၼ်ပၢဝ်ႇသေႃႇၶိင်ႇဢၼ်တၵ်းလႆႈၵမ်တၢင်းၵိၼ်ၼၼ်ႉလႄႈယုၵ်ႉယွင်ႈၼႃႇပုတ်ႉဝႆႉၵႃႈၼိူဝ်ၵူၼ်းတင်းလၢႆဢေႃႈ။
၁၃ ၵူၼ်းဢႃႉထမ်ႇမႃႉသွင်ၵေႃႉမႃးလႄႈၼင်ႈၵႃႈတီႈၽၢႆႇၼႃႈမၼ်းသေလႄႈၶၢမ်ႇသၢၵ်ႈသေႇယူႇၽၢႆႇၼိုင်ႈတင်းၼႃႇပုတ်ႉၵႃႈတီႈၽၢႆႇၼႃႈၵူၼ်းတင်းလၢႆလႄႈဝႃႈ၊-ၼႃႇပုတ်ႉၼႆႉလႆႈၵိၼ်ႇလႃႇၽြႃးပဵၼ်ၸဝ်ႈဢိၵ်ႇတင်းၶုၼ်ႁေႃၶမ်းယဝ်ႉ၊ဝႃႈၼင်ႇၼႆသေယဝ်ႉၶဝ်ဢွၼ်ၵၼ်ဢဝ်မၼ်းဢွၵ်ႇၵႂႃႇၵႃႈတီႈၼွၵ်ႈဝဵင်းလႄႈဢဝ်မၢၵ်ႇႁိၼ်ထိမ်ႈႁႂ်ႈထၼ်ႈပေႃးတၢႆဢေႃႈ။
၁၄ မိူဝ်ႈၼၼ်ႉၶဝ်ဢွၼ်ၵၼ်ပွႆႇၸႂ်ႉၵူၼ်းၵႂႃႇၸူးၵႃႈတီႈယေႇၸပေႇလလႄႈလဝ်ႈလၢတ်ႈလႄႈဝႃႈ၊-ၼႃႇပုတ်ႉလႆႈၶၢမ်ႇတၢင်းဢၼ်ဢဝ်မၢၵ်ႇႁိၼ်ထိမ်ႈလႄႈတၢႆယဝ်ႉ၊ဝႃႈၼင်ႇၼႆဢေႃႈ။
၁၅ ယေႇၸပေႇလငိၼ်းလွင်ႈဢၼ်ၼႃႇပုတ်ႉလႆႈၶၢမ်ႇတၢင်းဢၼ်ဢဝ်မၢၵ်ႇႁိၼ်ထႅမ်ႈလႄႈတၢႆယဝ်ႉၼၼ်ႉလႄႈမၼ်းလၢတ်ႈတီႈဢႃႇႁပ်ႉလႄႈဝႃႈ၊-လုၵ်ႉလႄႈသိမ်းဢဝ်သူၼ်ဢူးယဵၼ်ႇမၢၵ်ႇၸပိတ်ႉဢၼ်ၼႃႇပုတ်ႉၵူၼ်းဝဵင်းယေႇၸရေႇလပိူင်ႇၼၼ်ႉဢၼ်မၼ်းဢမ်ႇၶႂ်ႈၶၢႆပၼ်တီႈၸဝ်ႈႁဝ်းၼၼ်ႉသေၵမ်းတီႈၶႃႈ။ၼႃႇပုတ်ႉဢမ်ႇမီးဢသၢၵ်ႈယဝ်ႉ။
၁၆ တၢႆယဝ်ႉ၊ဝႃႈၼင်ႇၼႆဢေႃႈ။ဢႃႇႁပ်ႉၵေႃႈမိူဝ်ႈဢၼ်ငိၼ်းလွင်ႈၼႃႇပုတ်ႉတၢႆယဝ်ႉၼၼ်ႉလႄႈမၼ်းလုၵ်ႉလႄႈလူင်းၸူးၵႃႈတီႈသူၼ်ဢူးယဵၼ်ႇမၢၵ်ႇၸပိတ်ႉၼႃႇပုတ်ႉၵူၼ်းဝဵင်းယေႇၸရေႇလၼၼ်ႉလႄႈႁႂ်ႈလႆႈသိမ်းဢဝ်ဢေႃႈ။
၁၇ မိူဝ်ႈၼၼ်ႉၼုၵ်ႉၵပၢတ်ႈထႃႇဝရႃႉၽြႃးႁွတ်ႈမႃးတီႈဢေးလိယၵူၼ်းဝဵင်းတိသၽိၼၼ်ႉလႄႈဝႃႈ၊-မႂ်းလုၵ်ႉလႄႈလူင်းၵႂႃႇႁႂ်ႈလႆႈႁူပ်ႉထူပ်းဢႃႇႁပ်ႉၶုၼ်ႁေႃၶမ်းဢိသရေႇလဢၼ်ယူႇၵႃႈၼႂ်းဝဵင်းသမႃႇရိၼၼ်ႉတႃႉ။
၁၈ မၼ်းၼၼ်ႉမီးယူႇၵႃႈၼႂ်းသူၼ်ဢူးယဵၼ်ႇမၢၵ်ႇၸပိတ်ႉၼႃႇပုတ်ႉတီႈဢၼ်မၼ်းလူင်းၸူးႁႂ်ႈလႆႈသိမ်းဢဝ်ၼၼ်ႉဢေႃႈ။
၁၉ သင်ႇလၢတ်ႈတီႈမၼ်းလႄႈဝႃႈ၊-ထႃႇဝရႃႉၽြႃးမီးဢမိင်ႉလႄႈဝႃႈၸမ်း၊-မႂ်းၼႆႉဢဝ်ဢသၢၵ်ႈၵူၼ်းတၢႆသေလႄႈသိမ်းဢဝ်ဢုၵ်ႉၸႃႇမၼ်းယဝ်ႉႁိုဝ်၊ဝႃႈၼင်ႇၼႆတႃႉ။မၼ်းၸဝ်ႈသမ်ႉမီးဢမိင်ႉလႄႈဝႃႈၸမ်း၊-ၵႃႈတီႈဢၼ်မႃတင်းလၢႆၵိၼ်လိူတ်ႈဢႃႇပုတ်ႉၼၼ်ႉမႃတင်းလၢႆတၵ်းလႆႈၵိၼ်လိူတ်ႈမႂ်းဢေႃႈ၊ဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။
၂၀ ၼင်ႇၼၼ်လႄႈဢႃႇႁပ်ႉလၢတ်ႈတီႈဢေးလိယလႄႈဝႃႈ၊-ရၢၼ်ႇသူႇၵဝ်ဢိူၺ်း။မႂ်းႁူပ်ႉထူပ်းၵၼ်တင်းၵဝ်ယဝ်ႉႁိုဝ်၊ဝႃႈၼင်ႇၼႆလႄႈမၼ်းၵေႃႈၶိုၼ်းလၢတ်ႈလႄႈဝႃႈ၊-ၵွပ်ႈပိူဝ်ႈဢၼ်ၸဝ်ႈႁဝ်းၶၢႆတူဝ်ၸဝ်ႈႁဝ်းႁႂ်ႈလႆႈႁဵတ်းတူႉၸရိူၵ်ႈၵႃႈတီႈၽၢႆႇၼႃႈထႃႇဝရႃႉၽြႃးၼၼ်ႉလႄႈၶႃႈၸဝ်ႈလႆႈႁူပ်ႉထူပ်းၵၼ်တင်းၸဝ်ႈႁဝ်းယဝ်ႉ။
၂၁ ထႃႇဝရႃႉၽြႃးမီးဢမိင်ႉလႄႈဝႃႈၸမ်း၊-ၵဝ်တၵ်းႁႂ်ႈၽေးဢူးပၢတ်ႈႁွတ်ႈထိုင်ၵႃႈၼိူဝ်မႂ်းလႄႈပဵၼ်ၵေႃႉဢၼ်ၶျုၵ်ႈဝႆႉသေဢမ်ႇၵႃး၊ပဵၼ်ၵေႃႉဢၼ်လွတ်ႈမီးယူႇၵႃႈၼႂ်းမိူင်းဢိသရေႇလၼၼ်ႉသေဢမ်ႇဝႃႈ၊ၵဝ်တၵ်းပႄႇၽဵဝ်ႈပ်တ်ႈၵႃႈပဵၼ်ၵူၼ်းၸၢႆးမဵဝ်းၸိူဝ်ႉၶိူဝ်းဢႃႇႁပ်ႉၼၼ်ႉဢေႃႈ။
၂၂ ၵဝ်တၵ်းႁႂ်ႈမဵဝ်းၸိူဝ်ႉၶိူဝ်းမႂ်းပဵၼ်ၸိူဝ်ႉၼင်ႇမဵဝ်းၸိူဝ်ႉၶိူဝ်းယေႇရူဝ်းပုမ်ႇလုၵ်ႈၸၢႆးၼေႇပတ်ႉဢိၵ်ႇတင်းမဵဝ်းၸိူဝ်ႉၶိူဝ်းပႃႇသႃႇလုၵ်ႈၸၢႆးဢႁိယၼၼ်ႉၵွပ်ႈပိူဝ်ႈဢပျႅတ်ႈဢၼ်မႂ်းတိုၵ်းယူင်းတၢင်းၸႂ်မႆႈၶႆႈၸႃႉၵဝ်လႄႈႁႂ်ႈမဵဝ်းဢိသရေႇလၽိတ်းပိူင်ႈၼၼ်ႉယဝ်ႉ။ထႃႇဝရႃႉၽြႃးသမ်ႉမီးဢမိင်ႉလူၺ်ႈလွင်ႈယေႇၸပေႇလလႄႈဝႃႈၸမ်း၊-
၂၃ မႃတင်းလၢႆတၵ်းဢွၼ်ၵၼ်ၵိၼ်ယေႇၸပေႇၵႃႈတီႈႁိမ်းဝဵင်းယေႇၸရေႇလၼၼ်ႉဢေႃႈ။ၵူၼ်းမဵဝ်းၸိူဝ်ႉၶိူဝ်းဢႃႇႁပ်ႉဢၼ်တၢႆၵႃႈၼႂ်းဝဵင်းၼၼ်ႉၸိုင်မႃတၵ်းၵိၼ်ဢေႃႈ။
၂၄ ၵေႃႉဢၼ်တၢႆၵႃႈတီႈၼွၵ်ႈတီႈပၢင်ႇၸိုင်ၼူၵ်ႉၵၢင်ႁၢဝ်တၵ်းၵိၼ်ဢေႃႈ၊ဝႃႈၼင်ႇၼႆဝႆႉယဝ်ႉ၊ဝႃႈၼင်ႇၼႆဢေႃႈ။
၂၅ ၵေႃႉဢၼ်မိူၼ်ၵၼ်တင်းဢႃႇႁပ်ႉဢၼ်ၶၢႆတူဝ်ၸဝ်ႈၵဝ်ႇႁႂ်ႈလႆႈႁဵတ်းတူႉၸရိူၵ်ႈၵႃႈတီႈၽၢႆႇၼႃႈထႃႇဝရႃႉၽြႃးဢၼ်မေးမၼ်းယေႇၸပေႇလတိုၵ်းယူင်းၼၼ်ႉဢမ်ႇမီးသေၵေႃႉသေၵူၼ်း။
၂၆ မၼ်းၼၼ်ႉဢိင်ပိုင်ႈရုၵ်ႉထူႉသၢင်းထူႉသေလႄႈႁဵတ်းၸွမ်းလွင်ႈတၢင်းဢၼ်လီႁင်ႈဢဵတ်ႇသဵတ်ႇၵႃႈဢၼ်ၵူၼ်းမဵဝ်းဢႃႇမေႃႇရိဢၼ်ထႃႇဝရႃႉၽြႃးႁေႃႈဢွၵ်ႇပႅတ်ႈသေၵႃတီႈၽၢႆႇၼႃႈၵူၼ်းမဵဝ်းဢိသရေႇလတင်းလၢႆၸိူဝ်းၼၼ်ႉႁဵတ်းၸိူဝ်းၼၼ်ႉဢေႃႈ။
၂၇ ၵူၺ်းၵႃႈဢႃႇႁပ်ႉၼၼ်ႉငိၼ်းၵႂၢမ်းၼၼ်ႉသေယဝ်ႉ၊သိၵ်ႇၶူဝ်းၼုင်ႈမၼ်းပႅတ်ႈလႄႈဢဝ်ၶူဝ်းၼုင်ႈၼင်ပေႃၼုင်ႈသေယဝ်ႉၵမ်တၢင်းၵိၼ်ယူႇ၊ၼွၼ်းၵႃႈၼႂ်းၶူဝ်းၼုင်ႈၼင်ပေႃၼၼ်ႉယူႇသေလႄႈၵႂႆတိၼ်ၵႂႃႇၵႂႆတိၼ်ပႆယူႇဢေႃႈ။
၂၈ ၼုၵ်ႉၵပၢတ်ႈထႃႇဝရႃႉၽြႃးႁွတ်ႈမႃးတီႈဢေးလိယၵူၼ်းဝဵင်းတိသၽိလႄႈဝႃႈၸမ်း၊-မႂ်းႁၼ်ႈလွင်ႈဢၼ်ဢႃႇႁပ်ႉၶျုးတူဝ်ၸဝ်ႈၵဝ်ႇတူၵ်းတီႈတႅမ်ႇယူႇၵႃႈတီႈၽၢႆႇၼႃႈၵဝ်ၼၼ်ႉယဝ်ႉႁိုဝ်။
၂၉ ၵွပ်ႈပိူဝ်ႈဢၼ်မၼ်းၶျႃးတူဝ်ၸဝ်ႈၵဝ်ႇတူၵ်းတီႈတႅမ်ႇၵႃႈတီႈၽၢႆႇၼႃႈၵဝ်ၸိူဝ်ႉၼင်ႇၼၼ်လႄႈၵဝ်တၵ်းဢမ်ႇႁႂ်ႈၽေးဢူးပၢတ်ႈၼၼ်ႉႁွတ်ႈထိုင်ၼႂ်းၸူဝ်ႈပၢၼ်မၼ်းၼႆႉ။ၵဝ်တၵ်းႁႂ်ႈႁွတ်ႈထိုင်ၵႃႈၼိူဝ်မဵဝ်းၸိူဝ်ႉၶိူဝ်းမၼ်းၼႂ်းၸူဝ်ႈပၢၼ်လုၵ်ႈၸၢႆးမၼ်းၼၼ်ႉဢေႃႈ၊ဝႃႈၼင်ႇၼႆဢေႃႈ။