Chapter
၁၂
၁ မိူဝ်ႈၼၼ်ႉရူဝ်ႇပုမ်ႇၵႂႃႇၵႃႈတီႈဝဵင်းသေႇၶိမ်ႇဢေႃႈ။လွင်ႈမၼ်းၸမ်းၵူၼ်းမဵဝ်းဢိသရေႇလတင်းသဵင်ႈတင်းလူင်ဢွၼ်ၵၼ်ၵႂႃႇၵႃႈတီႈဝဵင်းသေႇၶိမ်ႇႁႂ်ႈလႆႈယုၵ်ႉယွင်ႈမၼ်းဝႆႉၵႃႈၼႂ်းဢရႃႇၶုၼ်ႁေႃၶမ်းဢေႃႈ။
၂ မိူဝ်ႈဢၼ်ယေႇရူဝ်းပုမ်ႇ၊လုၵ်ႈၸၢႆးၼေႇပတ်ႉ၊ဢၼ်မၼ်းဢွၵ်ႇပၢႆသေၵႃႈတီႈၶုၼ်လူင်သေႃးလမုၼ်ႇလႄႈၵႂႃႇယူႇၵႃႈတီႈမိူင်းဢေႇၵႅပ်ႉတုၼၼ်ႉၶိုၼ်းမႃးၼၼ်ႉၸိုင်ၵူၼ်းဢိသရေႇလတင်းလၢႆဢွၼ်ၵၼ်ၵႂႃႇႁွင်ႉဢဝ်မၼ်းမႃးလႄႈၶဝ်ဢွၼ်ၵၼ်ၵႂႃႇၸူးၶုၼ်ႁူဝ်ႇပုမ်ႇသေလႄႈလဝ်ႈလၢတ်ႈလႄႈဝႃႈ၊-
၃ ၸဝ်ႈပေႃႈၸဝ်ႈႁဝ်းၼၼ်ႉဢဝ်ၵၢၼ်းဢၼ်ၼၵ်းၼႃတၢင်ႇသႂ်ႇၵႃႈၼိူဝ်ၶႃႈၸဝ်ႈႁဝ်းၶဝ်ၶႃႈယဝ်ႉ။ၸဝ်ႈႁဝ်းၶႅၼ်းတေႃႈႁႂ်ႈဢမူႉတၢင်းဢၼ်လႆႈၵိုတ်ႈႁၢပ်ႇယၢပ်ႇၸႂ်ၼႃႇလူင်လၢင်ဢိၵ်ႇတင်းၵၢၼ်းႁၢပ်ႇၼၵ်းဢၼ်မၼ်းတၢင်ႇသႂ်ႇၼၼ်ႉႁႂ်ႈမဝ်မႃးသေၵမ်းတီႈၶႃႈ။
၄ ပေႃးႁဵတ်းၸိူဝ်ႉၼင်ႇၼၼ်ၸိုင်ၶႃႈၸဝ်ႈႁဝ်းၶဝ်တင်းလၢႆတၵ်းဢွၼ်ၵၼ်ၵိုတ်ႈႁၢပ်ႇဢမူႉၸဝ်ႈႁဝ်းတီႈၶႃႈဢေႃႈ၊ဝႃႈၼင်ႇၼႆဢေႃႈ။
၅ မၼ်းၵေႃႈမီးဢမိင်ႉလႄႈဝႃႈ၊-သူဢွၼ်ၵၼ်ၵႂႃႇလူးၵွၼ်ႇတႃႉ။ပူၼ်ႉသၢမ်ဝၼ်းယဝ်ႉၸင်ႇၶိုၼ်းမႃးၸူးၵဝ်လူးၵွၼ်ႇတႃႉ၊ဝႃႈၼင်ႇၼႆသေယဝ်ႉ၊ၵူၼ်းတင်းလၢႆၵေႃႈဢွၼ်ၵၼ်ဢွၵ်ႇၵႂႃႇသေဢေႃႈ။
၆ ဝၢႆးသေၼၼ်ႉၶုၼ်လူင်ရူဝ်ႇပုမ်ႇတိူင်ႇပၢင်ႇၵၼ်တင်းၶဝ်ၸိူဝ်းဢၼ်ဢသၢၵ်ႈယႂ်ႇဢၼ်ယၢမ်ႈၶႃးၸႃးၵႃႈတီႈၸဝ်ႈပေႃႈမၼ်းသေႃးလမုၼ်ႇၼႂ်းမိူဝ်ႈဢၼ်မၼ်းယင်းဢသၢၵ်ႈလိပ်းယူႇၼၼ်ႉလႄႈထၢမ်ဝႃႈ၊-သူတၵ်းပၼ်တၢင်းၵျၢမ်ႇတၢင်းပွင်တီႈၵဝ်ၸိူဝ်ႉၼင်ႇႁိုဝ်၊ႁႂ်ႈၵဝ်လႆႈၶိုၼ်းလၢတ်ႈတီႈၵူၼ်းတင်းလၢႆၸိူဝ်းၼၼ်ႉ၊
၇ ဝႃႈၼင်ႇၼႆလႄႈၶဝ်ၵေႃႈဢွၼ်ၵၼ်လဝ်ႈလၢတ်ႈလႄႈဝႃႈ၊-ပေႃးၸဝ်ႈႁဝ်းၶၢမ်ႇႁဵတ်းၶႃႈၵူၼ်းတင်းလၢႆၸိူဝ်းၼႆႉဝၼ်းမိူဝ်ႈၼႆႉလႄႈယူႇပႂ်ႉဢမူႉၶဝ်ယူႇသေယဝ်ႉၶိုၼ်းလၢတ်ႈၵႂၢမ်းဢၼ်လီဢၼ်ငၢမ်းတေႃႇၶဝ်ၸိုင်၊ၶဝ်တၵ်းဢွၼ်ၵၼ်ၶၢမ်ႇႁဵတ်းၶႃႈၸဝ်ႈႁဝ်းယူႇသေႇသေႇတီႈၶႃႈဢေႃႈ၊ဝႃႈၼင်ႇၼႆဢေႃႈ။
၈ ၵူၺ်းၵႃႈမၼ်းဢမ်ႇႁပ်ႉဢမ်ႇဢဝ်တၢင်းၵျၢမ်ႇတၢင်းပွင်ဢၼ်ၶဝ်ၸိူဝ်းဢၼ်ဢသၢၵ်ႈယႂ်ႇပၼ်ၼၼ်ႉလႄႈမၼ်းသမ်ႉတိူင်ႇပၢင်ႇတွင်ႉထၢမ်ၵၼ်တင်းၵူၼ်းၼုမ်ႇၵူၼ်းၵမ်ဢၼ်ပဵၼ်ၵေႃႉသေႈမၼ်းလႄႈၶႃးၸႃးယူႇၵႃႈတီႈၽၢႆႇၼႃႈမၼ်းသေႇသေႇၸိူဝ်းၼၼ်ႉလႄႈဝႃႈ၊-
၉ သူတၵ်းပၼ်တၢင်းၵျၢမ်ႇတၢင်းပွင်ၵဝ်ၸိူဝ်ႉၼင်ႇႁိုဝ်၊ႁႂ်ႈၵဝ်ၶိုၼ်းလႆႈလၢတ်ႈတီႈၵူၼ်းတင်းလၢႆဢၼ်လဝ်ႈလၢတ်ႈတီႈၵဝ်ဝႃႈ၊-ၶႅၼ်းတေႃႈႁႂ်ႈၵၢၼ်းႁၢပ်ႇဢၼ်ၸဝ်ႈပေႃႈၸဝ်ႈႁဝ်းတၢင်ႇသႂ်ႇဝႆႉၵႃႈၼိူဝ်ႁဝ်းၶႃႈၼၼ်ႉမဝ်မႃးသေၵမ်းတီႈၶႃႈ၊ဝႃႈၼင်ႇၼႆၼၼ်ႉမိူဝ်ႈဢၼ်ဝႃႈၼင်ႇၼႆၸိုင်
၁၀ ၵူၼ်းၼုမ်ႇၵူၼ်းၵမ်ဢၼ်ပဵၼ်ၵေႃႉသေႈမၼ်းၸိူဝ်းၼၼ်ႉၵေႃႈဢွၼ်ၵၼ်ၶိုၼ်းလဝ်ႈလၢတ်ႈလႄႈဝႃႈ၊-ၸဝ်ႈႁဝ်းၶႅၼ်းတေႃႈၶိုၼ်းလၢတ်ႈတီႈၵူၼ်းတင်းလၢႆလႄႈဝႃႈ၊-ၼဵဝ်ႉမိုဝ်းၵွႆၵဝ်ၼႆႉယိင်ႈၶႅၼ်းတၵ်းယႂ်ႇၼႃႇသေဢႅဝ်ၸဝ်ႈပေႃႈၵဝ်ဢေႃႈ။
၁၁ ၸဝ်ႈပေႃႈၵဝ်ၼၼ်ႉဢဝ်ၵၢၼ်းႁၢပ်ႇဢၼ်ၼၵ်းၼႃတၢင်ႇသႂ်ႇၵႃႈၼိူဝ်သူယဝ်ႉ။ၵဝ်ၵေႃႈတၵ်းထၢပ်ႈလႄႈတၢင်ႇသႂ်ႇထႅင်ႈဢေႃႈ။ၸဝ်ႈပေႃႈၵဝ်ၼၼ်ႉဢဝ်တင်းၶွၼ်ႉဝၢႆပေႃႉယႅၼ်ႉသူယဝ်ႉ။ၵဝ်ၵေႃႈတၵ်းဢဝ်တင်းမႅင်းၵူၼ်ႈငေႃးပေႃႉယႅၼ်ႉသူထႅင်ႈဢေႃႈ၊ဝႃႈၼင်ႇၼႆတႃႉ၊ဝႃႈၼင်ႇၼႆပၼ်ဢၵျၢမ်ႇဢေႃႈ။
ဢိသရေႇလလုၵ်ႉၽိုၼ်ႉရူဝ်ႇပုမ်ႇ
၁၂ ဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉယေႇရူဝ်းပုမ်ႇဢိၵ်ႇတင်းၵူၼ်းတင်းသဵင်ႈတင်းလူင်ဢွၼ်ၵၼ်ႁွတ်ႈမႃးတီႈရူဝ်ႇပုမ်ႇၸွမ်းၵႃႈၼင်ႇဢၼ်ၶုၼ်ႁေႃၶမ်းမၵ်းၶိၼ်းဝႆႉၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉသူသမ်ႉဢွၼ်ၵၼ်ၶိုၼ်းမႃးထႅင်ႈလူးၵွၼ်ႇတႃႉ၊ဝႃႈၼင်ႇၼႆၼၼ်ႉဢေႃႈ။
၁၃ မိူဝ်ႈၼၼ်ႉၶုၼ်ႁေႃၶမ်းၶိုၼ်းပႄႇပႅတ်ႈတၢင်းၵျၢမ်ႇတၢင်းပွင်ဢၼ်ၶဝ်ၸိူဝ်းဢၼ်ဢသၢၵ်ႈယႂ်ႇပၼ်ၼၼ်ႉသေလႄႈ
၁၄ ဢဝ်တၢင်းၵျၢမ်ႇတၢင်းပွင်ဢၼ်ၵူၼ်းၼုမ်ႇၵူၼ်းၵမ်ၸိူဝ်းၼၼ်ႉပၼ်ၼၼ်ႉလႄႈၶိုၼ်းလၢတ်ႈႁဝ်ႉၵႅမ်းၼႃႇလူင်လၢင်လႄႈဝႃႈ၊-ၸဝ်ႈပေႃႈၵဝ်ၼၼ်ႉဢဝ်ၵၢၼ်းႁၢပ်ႇဢၼ်ၼၵ်းၼႃႇတၢင်ႇသႂ်ႇၵႃႈၼိူဝ်သူယဝ်ႉ။
၁၅ ၵဝ်ၵေႃႈတၵ်းထၢပ်ႈလႄႈတၢင်ႇသႂ်ႇထႅင်ႈဢေႃႈ။ၸဝ်ႈပေႃႈၵဝ်ၼၼ်ႉဢဝ်တင်းၶွၼ်ႉဝၢႆပေႃႉယႅၼ်ႉသူယဝ်ႉ။ၵဝ်ၵေႃႈတၵ်းဢဝ်တင်းမႅင်းၵူၼ်ႈငေႃးပေႃႉယႅၼ်ႉသူဢေႃႈ၊ဝႃႈၼင်ႇၼႆဢေႃႈ။လွင်ႈဢၼ်ၶုၼ်ႁေႃၶမ်းဢမ်ႇထွမ်ႇဢဝ်ၵႂၢမ်းၵူၼ်းဝၢၼ်ႈၵူၼ်းမိူင်းတင်းလၢႆၼၼ်ႉၸမ်းပဵၼ်တၢင်းဢၼ်ဢွၵ်ႇသေၵႃႈတီႈထႃႇဝရႃႉၽြႃးမႃးလွင်ႈၼင်ႇႁိုဝ်တၵ်းႁႂ်ႈၵႂၢမ်းဢၼ်မၼ်းၸဝ်ႈဢဝ်ဢႁိယၵူၼ်းဝဵင်းသိလေႃႇၼၼ်ႉမီးဢမိင်ႉဝႆႉတီႈယေႇရူဝ်းပုမ်ႇ။
၁၆ လုၵ်ႈၸၢႆးၼေႇပတ်ႉ။ၼၼ်ႉလႆႈတဵမ်ထူၼ်ႈဢေႃႈ။ၵူၼ်းမဵဝ်းဢိသရေႇလတင်းသဵင်ႈတင်းလူင်ႁူႉႁၼ်လွင်ႈဢၼ်ၶုၼ်ႁေႃၶမ်းဢမ်ႇထွမ်ႇဢမ်ႇဢဝ်ၵႂၢမ်းၶဝ်ၼၼ်ႉသေယဝ်ႉ၊ၵူၼ်းတင်းလၢႆဢွၼ်ၵၼ်ၶိုၼ်းလၢတ်ႈတီႈၶုၼ်ႁေႃၶမ်းလႄႈဝႃႈ၊-ႁဝ်းၼႆႉၸၢပ်ႈသႅင်ႇၵၼ်တင်းတႃႇဝိတ်ႉၸိူဝ်ႉၼင်ႇႁိုဝ်။ႁဝ်းဢမ်ႇၶၢမ်ႇဢမူၺ်ႇလူၺ်ႈၵၼ်တင်းလုၵ်ႈၸၢႆးယေႇသေႇၵူၺ်း။မဵဝ်းဢိသရေႇလဢိူၺ်း။ဢွၼ်ၵၼ်ၵႂႃႇၸူးၵႃႈတီႈသုမ်ႉထဵင်တီႈယူႇသူသေတႃႉ။
၁၇ တႃႇဝိတ်ႉဢိူၺ်း။လူတူၺ်းႁိူၼ်းမႂ်းတႃႉ၊ဝႃႈၼင်ႇၼႆသေလႄႈၵူၼ်းမဵဝ်းဢိသရေႇလတင်းသဵင်ႈတင်းလူင်ဢွၼ်ၵၼ်ၶိုၼ်းမိူဝ်းၵႂႃႇၸူးၵႃႈတီႈသုမ်ႉထဵင်ၶဝ်သေဢေႃႈ။ၵူၺ်းၵႃႈၵူၼ်းမဵဝ်းဢိသရေႇလဢၼ်ယူႇၵႃႈတီႈဝၢၼ်ႈဝဵင်းယုတၸိူဝ်းၼၼ်ႉၸိုင်ရူဝ်ႇပုမ်ႇယင်းလႆႈဢုပ်ႉပိူင်ႇယူႇဢေႃႈ။
၁၈ မိူဝ်ႈၼၼ်ႉၶုၼ်လူင်ရူဝ်ႇပုမ်ႇပွႆႇၸႂ်ႉဢတေႃႇရမ်ႇဢၼ်ပဵၼ်ဝုၼ်ႇၵဵပ်းၶွၼ်ႇၼၼ်ႉၵႂႃႇဢေႃႈ။ၵူၼ်းမဵဝ်းဢိသရေႇလတင်းလၢႆဢွၼ်ၵၼ်ဢဝ်မၢၵ်ႇႁိၼ်ထိမ်ႈမၼ်းတၢႆဢေႃႈ။ၶုၼ်လူင်ရူဝ်ႇပုမ်ႇၼၼ်ႉႁိပ်ႈၼႅတ်ႈၶိုၼ်ႈၶီႇလေႃႉရထႃးၸဝ်ႈသေလႄႈပႆၸူးၵႃႈတီႈဝဵင်းယေႇရုသလႅမ်ႇဢေႃႈ။
၁၉ ၼင်ႇၼၼ်လႄႈမဵဝ်းဢိသရေႇလလုၵ်ႉၽိုၼ်ႉမဵဝ်းၸိူဝ်ႉၶိူဝ်းၶုၼ်တႃႇဝိတ်ႉတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။
၂၀ မိူဝ်ႈဢၼ်ၵူၼ်းမဵဝ်းဢိသရေႇလတင်းသဵင်ႈတင်းလူင်ငိၼ်းလွင်ႈဢၼ်ယေႇရူဝ်းပုမ်ႇၶိုၼ်းမႃးၼၼ်ႉၸိုင်၊ၶဝ်ဢွၼ်ၵၼ်ပွႆႇၸႂ်ႉၵႂႃႇလႄႈႁွင်ႉဢဝ်မၼ်းမႃးၵႃႈတီႈပရိၵ်ႈသၢတ်ႈဢၼ်ၸူႉဢၼ်တုမ်ၼၼ်ႉသေယဝ်ႉ၊ဢဝ်မၼ်းႁဵတ်းၶုၼ်ႁေႃၶမ်းၵႃႈၼိူဝ်မဵဝ်းဢိသရေႇလတင်းသဵင်ႈတင်းလူင်ဢေႃႈ။လိူဝ်သမေဵဝ်းယုတၼၼ်ႉၵူၺ်းမဵဝ်းဢၼ်ၸွမ်းလင်ၸိူဝ်ႉၶိူဝ်းတႃႇဝိတ်ႉၼၼ်ႉဢမ်ႇမီးသမေဵဝ်း။
၂၁ ရူဝ်ႇပုမ်ႇႁွတ်ႈထိုင်ၵႃႈတီႈဝဵင်းယေႇရုသလႅမ်ႇသေယဝ်ႉ၊ႁႂ်ႈၵူၼ်းမဵဝ်းယုတတင်းၵူၼ်းမဵဝ်းပိၼ်ႇယႃႇမိၼ်ႇသႅၼ်ပၢႆပႅတ်ႇမိုၼ်ႇဢၼ်လိူၵ်ႈၵဵပ်းဢဝ်လႄႈပဵၼ်ႁူဝ်ႁၢၼ်ၵူၼ်းသိုၵ်းၸိူဝ်းၼၼ်ႉၸူႉၵၼ်တုမ်ၵၼ်ႁႂ်ႈလႆႈတိုၵ်းတေႃးမဵဝ်းဢိသရေႇလလႄႈႁႂ်ႈသိုင်ႇၸိုင်ႈဝၢၼ်ႈမိူင်းၶိုၼ်းႁွတ်ႈၵႃႈၼႂ်းမိုဝ်းရူဝ်ႇပုမ်ႇလုၵ်ႈၸၢႆးသေႃးလမုၼ်ႇၼၼ်ႉဢေႃႈ။
၂၂ ၵူၺ်းၵႃႈၼုၵ်ႉၵပၢတ်ႈထႃႇဝရႃႉၽြႃးႁွတ်ႈမႃးတီႈသေႇမႃႇယ၊ၵူၼ်းၽြႃးပဵၼ်ၸဝ်ႈၼၼ်ႉလႄႈဝႃႈ၊-မႂ်းမွၵ်ႇလၢတ်ႈတီႈရူဝ်ႇပုမ်ႇလုၵ်ႈၸၢႆးသေႃးလမုၼ်ႇၶုၼ်ႁေႃၶမ်းယုတဢိၵ်ႇတင်းမဵဝ်းယုတမဵဝ်းပိၼ်ႇယႃႇမိၼ်ႇတင်းသဵင်ႈတင်းလူင်တင်းၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇၵႃႈမီးၼၼ်ႉလႄႈဝႃႈ၊-
၂၃ ထႃႇဝရႃႉၽြႃးမီးဢမိင်ႉလႄႈဝႃႈၸမ်း၊-ယႃႇပေဢွၼ်ၵၼ်ၶီႇသိုၵ်းၶိုၼ်ႈၸူးလႄႈတိုၵ်းတေႃးပီႈၼွင်ႉသူၵူၼ်းမဵဝ်းဢိသရေႇလၸိူဝ်းၼၼ်ႉ။
၂၄ ဢွၼ်ၵၼ်ၶိုၼ်းမိူဝ်းၵႂႃႇၸူးၵႃႈတီႈႁိူၼ်းတီႈယူႇသူႁင်းၽႂ်ႁင်းမၼ်းသေတႃႉ။ဢမူႉၼႆႉၸိုင်ၵဝ်ၸီႇယၢင်ႇယဝ်ႉ၊ဝႃႈၼင်ႇၼႆတႃႉ၊ဝႃႈၼင်ႇၼႆလႄႈၶဝ်ၵေႃႈဢွၼ်ၵၼ်ထွမ်ႇဢဝ်ၵႂၢမ်းဢၼ်ထႃႇဝရႃႉၽြႃးမီးဢမိင်ႉၼၼ်ႉလႄႈယင်းဢမ်ႇၶီႇသိုၵ်းၶိုၼ်ႈၸူးယေႇရူဝ်းပုမ်ႇလႄႈဢွၼ်ၵၼ်ၶိုၼ်းမိူဝ်းၵႂႃႇသေဢေႃႈ။
ဝူဝ်းၶမ်းတီႈဝဵင်းပေႇသလတင်းဝဵင်းတၼ်ႇ
၂၅ လိုၼ်းၼၼ်ႉယေႇရူဝ်းပုမ်ႇတႄႇႁဵတ်းဝဵင်းသေႇၶိမ်ႇၵႃႈၼိူဝ်ႁၢၼ်ႉလွႆဢေႇၽရိမ်ႇလႄႈၶျႃးတီႈယူႇတီႈသဝ်းၵႃႈၼႂ်းမၼ်းဢေႃႈ။မၼ်းလုၵ်ႉသေၵႃႈတီႈဝဵင်းၼၼ်ႉၵႂႃႇလႄႈတႄႇႁဵတ်းဝဵင်းပေႇၼုၺ်ႇလဢေႃႈ။
၂၆ မိူဝ်ႈၼၼ်ႉယေႇရူဝ်းပုမ်ႇၶႆႈၸႂ်ဝူၼ်ႉၸႂ်လႄႈဝႃႈ၊-သိုင်ႇၸိုင်ႈဝၢၼ်ႈမိူင်းၼႆႉၸၢင်ႊၶေးတၵ်းၶိုၼ်းႁွတ်ႈထိုင်ၵႃႈၼႂ်းမိုဝ်းၸိူဝ်ႉၶိူဝ်းတႃႇဝိတ်ႉဢေႃႈ။
၂၇ ပေႃးၵူၼ်းဝၢၼ်ႈၵူၼ်းမိူင်းတင်းလၢႆၼႆႉၶိုၼ်ႈၸူးႁႂ်ႈလႆႈပုၵ်ႉၸေႃႇယိၸ်ႉၵႃႈၼႂ်းႁိူၼ်းထႃႇဝရႃႉၽြႃးၵႃႈတီႈဝဵင်းယေႇရုသလႅမ်ႇၸိုင်၊ႁူဝ်ၸႂ်ၵူၼ်းဝၢၼ်ႈၵူၼ်းမိူင်းတင်းလၢႆၼႆႉတၵ်းၶၢႆႉပုတ်ႈၵႂႃႇၸူးတီႈၽၢႆႇၸဝ်ႈၶဝ်ရူဝ်ႇပုမ်ႇၶုၼ်ႁေႃၶမ်းယုတၼၼ်ႉလႄႈၶဝ်တၵ်းဢဝ်ၵဝ်တၢႆလႄႈၶိုၼ်းၶဝ်ႈယူႇၽၢႆႇရူဝ်ႇပုမ်ႇၶုၼ်ႁေႃၶမ်းယုတၼၼ်ႉဢေႃႈ၊ဝႃႈၼင်ႇၼႆသေယဝ်ႉ
၂၈ မၼ်းတိူင်ႇပၢင်ႇၵၼ်တင်းပိူၼ်ႈသေလႄႈႁဵတ်းဝူဝ်းၶမ်းဢွၼ်သွင်တူဝ်သေယဝ်ႉလၢတ်ႈဝႃႈ၊-လွင်ႈတၢင်းဢၼ်သူတၵ်းလႆႈၶိုၼ်ႈၸူးၵႃႈတီႈဝဵင်းယေႇရုသလႅမ်ႇၼၼ်ႉၸိုင်ပေႃးတႃႉ။
၂၉ မဵဝ်းဢိသရေႇလဢိူၺ်း။လူတူၺ်းၽြႃးမႂ်းဢၼ်ၼုၵ်ႉဢဝ်မႂ်းဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၸိူဝ်းၼၼ်ႉတႃႉ၊ဝႃႈၼင်ႇၼႆသေလႄႈဢဝ်တူဝ်ၼိုင်ႈဝႆႉၵႃႈတီႈဝဵင်းပေႇသလလႄႈဢဝ်တူဝ်ႈၼိုင်ႈဝႆႉၵႃႈတီႈဝဵင်းတၼ်ႇဢေႃႈ။
၃၀ လွင်ႈတၢင်းၼၼ်ႉပဵၼ်လွင်ႈတၢင်းဢၼ်ၽိတ်းပိူင်ႈၵွပ်ႈပိူဝ်ႈဢၼ်ၵူၼ်းဝၢၼ်ႈၵူၼ်းမိူင်းတင်းလၢႆၸင်ႇဢွၼ်ၵၼ်ၵႂႃႇႁႂ်ႈလႆႈၵူဝ်းၵႂၢႆႇဝူဝ်းဢွၼ်ႇတူဝ်ႈၼိုင်ႈၼၼ်ႉၵူႈတီႈၵူႈလႅၼ်တေႃႇထိုင်ႁွတ်ႈဝဵင်းတၼ်ႇဢေႃႈ။
၃၁ မၼ်းႁဵတ်းႁိူၼ်းၸဝ်ႈၵႃႈၼိူဝ်ထႃႇၼႃႉတီႈသုင်တင်းလၢႆလႄႈဢဝ်ၵူၼ်းၵႃႈၼႂ်းၵူၼ်းတင်းလၢႆဢၼ်ဢမ်ႇၸႂ်ႈၵူၼ်းမဵဝ်းလေႇဝိၸိူဝ်းၼၼ်ႉၶၢၼ်းဝႆႉၵႃႈၼႂ်းဢရႃႇယိတ်ႉပရေႃးႁိၵ်ႈဢေႃႈ။
၃၂ ယေႇရူဝ်းပုမ်ႇၼၼ်ႉၸီႇယၢင်ႇႁဵတ်းပွႆးၼႂ်းလိူၼ်ဢထမသိပ်းႁႃႈဝၼ်းမိူၼ်ၸိူဝ်ႉၼင်ႇပွႆးဢၼ်ၶၢမ်ႇၵႃႈၼႂ်းမိူင်းယုတၼၼ်ႉလႄႈပုၵ်ႉၸေႃႇၵႃႈၼိူဝ်ယိတ်ႉပလၢင်ႇဢေႃႈ။ၼင်ႇၼၼ်လႄႈမၼ်းႁဵတ်းၵႃႈၼႂ်းဝဵင်းပေႇသလလႄႈပုၵ်ႉၸေႃႇယိၸ်ႉတီႈဝူဝ်းဢွၼ်ႇဢၼ်မၼ်းႁဵတ်းၸိူဝ်းၼၼ်ႉဢေႃႈ။ယိတ်ႉပရေႃးႁိၵ်ႈဢၼ်မၼ်းၶၢၼ်းဝႆႉၵႃႈတီႈထႃႇၼႃႉတီႈသုင်တင်းလၢႆၸိူဝ်းၼၼ်ႉၵေႃႈမၼ်းၶျႃးတီႈယူႇၶဝ်ပၼ်တီႈဝဵင်းပေႇသလဢေႃႈ။
၃၃ ၼင်ႇၼၼ်လႄႈမၼ်းပုၵ်ႉၸေႃႇၵႃႈၼိူဝ်ယိတ်ႉပလၢင်ႇဢၼ်မၼ်းႁဵတ်းၵႃႈတီႈဝဵင်းပေႇသလၼၼ်ႉၼႂ်းလိူၼ်ဢထမသိပ်းႁႃႈဝၼ်းဢၼ်မၼ်းၸွမ်းဢလူဝ်ႇမၼ်းသေလႄႈမၵ်းၶဵၼ်းဝႆႉၼၼ်ႉဢေႃႈ။မၼ်းၸီႇယၢင်ႇပွႆးတီႈၵူၼ်းမဵဝ်းဢိသရေႇလတင်းလၢႆလႄႈဢဝ်ယိၸ်ႉပုၵ်ႉၸေႃႇၵႃႈၼိူဝ်ယိတ်ႉပလၢင်ႇလႄႈဢဝ်ၼၢမ်ႇသႃႇတုတ်ႇၽႆးဢေႃႈ။