Chapter
၂၀
ပိၼ်ႇႁႃႇတတ်ႉတိုၵ်းတေႃးသမႃႇရိ
၁ ပိၼ်ႇႁႃႇတတ်ႉၶုၼ်ႁေႃၶမ်းသုရိၼၼ်ႉႁႂ်ႈႁူဝ်သိုၵ်းမၼ်းတင်းသဵင်ႈတင်းလူင်ၸူႉၵၼ်တုမ်ၵၼ်လႄႈပႃးဢဝ်တင်းၶုၼ်လူင်သိပ်းသွင်ပႃး၊ႁူဝ်ႁၢၼ်ၵူၼ်းသိုၵ်းၶီႇမႃႉႁူဝ်ႁၢၼ်ၵူၼ်းသိုၵ်းၶီႇလေႃႉရထႃးတင်းလၢႆသေလႄႈၶီႇသိုၵ်းၶိုၼ်ႈၸူးသေယဝ်ႉလွမ်ႉႁွပ်ႈဝဵင်းသမႃႇရိလႄႈတိုၵ်းတေႃးဢေႃႈ။
၂ မၼ်းပွႆႇၸႂ်ႉၽူႈတၢင်တူဝ်တင်းလၢႆၶဝ်ႈၵႃႈၼႂ်းဝဵင်းၸူးၵႃႈတီႈဢႃႇႁပ်ႉၶုၼ်ႁေႃၶမ်းဢိသရေႇလလႄႈလႄႈဝႃႈ၊-ငိုၼ်းမႂ်းၶမ်းမႂ်းၸိူဝ်းၼၼ်ႉပဵၼ်ၶွင်ၵဝ်ဢေႃႈ။
၃ လုၵ်ႈမႂ်းမေးမႂ်းဢၼ်လီၼႃႇသေပိူၼ်ႈၸိူဝ်းၼၼ်ႉၵေႃႈပဵၼ်ၶွင်ၵဝ်ဢေႃႈ၊ဝႃႈၼင်ႇၼႆဢေႃႈ။ၶုၼ်ႁေႃၶမ်းဢိသရေႇလၶိုၼ်းလၢတ်ႈလႄႈဝႃႈ၊-ၸဝ်ႈၵဝ်ၶႃႈၸဝ်ႈၶုၼ်လူင်ဢိူၺ်း။
၄ ၸွမ်းၵႃႈၼင်ႇဢၼ်ဢမိင်ႉၸဝ်ႈႁဝ်းမီးၼၼ်ႉၵဝ်ၶႃႈတင်းဢုၵ်ႉၸႃႇၵဝ်ၶႃႈၵႃႈမီးၼႆႉပဵၼ်ဢုၵ်ႉၸႃႇၸဝ်ႈႁဝ်းၶႃႈယဝ်ႉ၊ဝႃႈၼင်ႇၼႆဢေႃႈ။
၅ ၽူႈတၢင်တူဝ်ၸိူဝ်းၼၼ်ႉသမ်ႉၶိုၼ်းၵႂႃႇထႅင်ႈလႄႈဝႃႈ၊-ဢမိင်ႉၸဝ်ႈပိၼ်ႇႁႃႇတတ်ႉမီးဝႆႉလႄႈဝႃႈၸမ်း၊ပိၵ်ႉသမ်ႉၵဝ်သင်ႇလၢတ်ႈၵႂႃႇလႄႈဝႃႈမႂ်းတၵ်းလႆႈဢဝ်ငိုၼ်းမႂ်းၶမ်းမႂ်း၊
၆ လုၵ်ႈမေးမႂ်းၸိူဝ်းၼၼ်ႉဢၢပ်ႈပၼ်တီႈၵဝ်ဢေႃႈ၊ဝႃႈၼင်ႇၼႆသေၵေႃႈ၊ဝၼ်းမိူဝ်ႈၽုၵ်ႈမိူဝ်ႈဢၼ်ႁွတ်ႈထိုင်ၶိင်ႇၼႆႉၼၼ်ႉၵဝ်တၵ်းပွႆႇၸႂ်ႉၶႃႈၵဝ်တင်းလၢႆၵႂႃႇတီႈမႂ်းလႄႈၶဝ်တၵ်းလႆႈသွၵ်ႈလႆႈႁႃၵႃႈၼႂ်းႁိူၼ်းမႂ်းဢိၵ်ႇတင်းႁိူၼ်းၶႃႈမႂ်းၸိူဝ်းၼၼ်ႉသေယဝ်ႉဢဝ်မိုဝ်းယိပ်းၵမ်ဢဝ်ၵႃႈဢၼ်ထုၵ်ႇတႃႇၶဝ်ၼၼ်ႉသေလႄႈဢဝ်ၵႂႃႇဢေႃႈ၊ဝႃႈၼင်ႇၼႆဢေႃႈ။
၇ မိူဝ်ႈၼၼ်ႉၶုၼ်ႁေႃၶမ်းဢိသရေႇလႁွင်ႉဢဝ်ၵူၼ်းဝၢၼ်ႈၵူၼ်းမိူင်းဢၼ်ဢသၢၵ်ႈထဝ်ႈၵေႇတင်းသဵင်ႈတင်းလူင်မႃးသေလႄႈမွၵ်ႇလၢတ်ႈလႄႈဝႃႈ၊-သူဝႆႉၸႂ်လႄႈလူတူၺ်းလွင်ႈဢၼ်ၵေႃႉၼႆႉၶႂ်ႈႁႃတၢင်းၽိတ်းသႂ်ႇထၢၼ်ႇၼႆႉၼၼ်ႉသေၵမ်း။မိူဝ်ႈဢၼ်သင်ႇလၢတ်ႈမႃးလႄႈယွၼ်းဢဝ်လုၵ်ႈမေးၵဝ်ငိုၼ်းၶမ်းၵဝ်ၼၼ်ႉၸိုင်ၵဝ်ယင်းဢမ်ႇတွပ်ႇဢမ်ႇထဵင်မၼ်း၊ဝႃႈၼင်ႇၼႆဢေႃႈ။
၈ ၵူၼ်းဢၼ်ဢသၢၵ်ႈထဝ်ႈၵေႇတင်းသဵင်ႈတင်းလူင်ဢိၵ်ႇတင်းၶုၼ်တင်းသဵင်ႈတင်းလူင်ဢွၼ်ၵၼ်ၶိုၼ်းလဝ်ႈလၢတ်ႈလႄႈဝႃႈ၊-ၸဝ်ႈႁဝ်းယႃႇပထွမေ်ႇဢဝ်ၵႂၢမ်းၼၼ်ႉသေၵမ်းတီႈၶႃႈ။ယႃႇပေႁပ်ႉတုင်းဢဝ်သေၵမ်းတီႈၶႃႈ၊ဝႃႈၼင်ႇၼႆဢေႃႈ။
၉ ပိူဝ်ႈၼႆလႄႈမၼ်းလၢတ်ႈတီႈၽူႈတၢင်တူဝ်ပိၼ်ႇႁႃႇတတ်ႉၸိူဝ်းၼၼ်ႉလႄႈဝႃႈ၊-သူၶိုၼ်းၵႂႃႇလဝ်ႈလၢတ်ႈတီႈၸဝ်ႈၶုၼ်လူင်လႄႈဝႃႈ၊-ၶႃႈၸဝ်ႈႁဝ်းတၵ်းႁဵတ်းၸွမ်းၵႃႈဢၼ်ၸဝ်ႈႁဝ်းမီးဢမိင်ႉတီႈၶႃႈၸဝ်ႈၵမ်းဢွၼ်တၢင်းၼၼ်ႉၶႃႈဢေႃႈ။ၵူၺ်းၵႃႈပွၵ်ႈၼႆႉၸိုင်ၶႃႈၸဝ်ႈဢမ်ႇႁဵတ်းၸွမ်းလႆႈတီႈၶႃႈ၊ဝႃႈၼင်ႇၼႆတႃႉ၊ဝႃႈၼင်ႇၼႆသေယဝ်ႉ၊ၽူႈတၢင်တူဝ်ၸိူဝ်းၼၼ်ႉၵေႃႈဢွၵ်ႇမိူဝ်းလႄႈဢဝ်ၵႂၢမ်းၼၼ်ႉၶိုၼ်းလဝ်ႈလၢတ်ႈဢေႃႈ။
၁၀ လၢႆးသမ်ႉပိၼ်ႇႁႃႇတပ်ႉပွႆႇၸႂ်ႉထႅင်ႈလႄႈသင်ႇလၢတ်ႈဝႃႈ၊-ပေႃးမုၼ်ႈလိၼ်ဝဵင်းသမႃႇရိၼၼ်ႉယင်းၵိုတ်းယူႇႁႂ်ႈပေႃးၵုမ်ႇၶဝ်ၸိူဝ်းဢၼ်ၸွမ်းလင်ၵဝ်ၸိူဝ်းၼႆႉယေႈၵေႃႉယေႈၵမ်မိူဝ်းၸိုင်ႁႂ်ႈၽြႃးတင်းလၢႆႁဵတ်းတီႈၵဝ်လိူဝ်တွၼ်းၼႃႇသေၼၼ်ႉသေၵမ်းလူၺ်ႈ၊ဝႃႈၼင်ႇၼႆဢေႃႈ။
၁၁ ၶုၼ်ႁေႃၶမ်းဢိသရေႇလၶိုၼ်းလၢတ်ႈလႄႈဝႃႈ၊-လဝ်ႈလၢတ်ႈတီႈမၼ်းလႄႈဝႃႈ၊-ယႃႇပေႁႂ်ႈၵေႃႉဢၼ်ၼုင်ႈမႆႊလၢၵ်ႈၼၢၵ်ႈၸုမ်ႇၼၼ်ႉဢုပ်ႇဢၢတ်ႇမိူၼ်ၼင်ႇၵေႃႉဢၼ်ထွတ်ႇပႅတ်ႈၶူဝ်းၼုင်ႈလၢၵ်ႈၼၢၵ်ႈၼၼ်ႉသေၵမ်း၊ဝႃႈၼင်ႇၼႆဢေႃႈ။
၁၂ ပိၼ်ႇႁႃႇတတ်ႉငိၼ်းၵႂၢမ်းၼၼ်ႉၼႂ်းမိူဝ်ႈဢၼ်မၼ်းယင်းတိုၵ်ႉၵိၼ်ယူႇသူတ်ႉယူႇၵႃႈၼႂ်းသုမ်ႉထဵင်ၸဝ်ႈဢိၵ်ႇလူၺ်ႈၵၼ်တင်းၶုၼ်လူင်ၸိူဝ်းၼၼ်ႉယူႇၼၼ်ႉလႄႈမီးဢမိင်ႉတီႈၶႃႈမၼ်းၵူၼ်းမၼ်းတင်းလၢႆလႄႈဝႃႈ၊-ဢွၼ်ၵၼ်ႁၢင်ႈသိုၵ်းၶၢင်းသိုၵ်းတႃႉ၊ဝႃႈၼင်ႇၼႆလႄႈၶဝ်ၼၼ်ႉဢွၼ်ၵၼ်ႁၢင်ႈသိုၵ်းၶၢင်းသိုၵ်းၶဝ်ယူႇၽၢႆႇၼိုင်ႈတင်းဝဵင်းဢေႃႈ။
ဢႃႇႁပ်ႉပႄႉၼႅင်ႇပိၼ်ႇႁႃႇတတ်ႉ
၁၃ မိူဝ်ႈၼၼ်ႉပရေႃးၽႅတ်ႈပႃးၼိုင်ႈသုတ်ႉၸပ်းသုတ်ႉၸူးၵႃႈတီႈဢႃႇႁပ်ႉၶုၼ်ႁေႃၶမ်းဢိသရေႇလလႄႈလၢတ်ႈဝႃႈ၊-ထႃႇဝရႃႉၽြႃးမီးဢမိင်ႉလႄႈဝႃႈၸမ်းမႂ်းႁၼ်ၽုင်ၵူၼ်းသိုၵ်းဢၼ်ယႂ်ႇၼႃႇတင်းသဵင်ႈတင်းလူင်ၸိူဝ်းၼၼ်ႉႁိုဝ်။ဝၼ်းမိူဝ်ႈၼႆႉၵဝ်တၵ်းဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းမႂ်းဢေႃႈ။မႂ်းတၵ်းလႆႈႁူႉလွင်ႈဢၼ်ၵဝ်ပဵၼ်ထႃႇဝရႃႉၽြႃးဢေႃႈ၊ဝႃႈၼင်ႇၼႆယဝ်ႉ၊ဝႃႈၼင်ႇၼႆဢေႃႈ။
၁၄ ဢႃႇႁပ်ႉၵေႃႈထၢမ်လႄႈဝႃႈ၊-ၽူႈလႂ်တၵ်းႁဵတ်းလွင်ႈတၢင်းၼႆႉဝႃႈၼင်ႇၼႆလႄႈမၼ်းၼၼ်ႉၶိုၼ်းလၢတ်ႈလႄႈဝႃႈ၊-ၵူၼ်းဢွၼ်ႇမဵဝ်းၶုၼ်တင်းလၢႆတၵ်းႁဵတ်းဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်၊မၼ်းထၢမ်ထႅင်ႈလႄႈဝႃႈ၊-ၽူႈလႂ်တၵ်းလႆႈၸီႇယၢင်ႇဢမူႉသိုၵ်း၊ဝႃႈၼင်ႇၼႆလႄႈမၼ်းၼၼ်ႉၶိုၼ်းလၢတ်ႈလႄႈဝႃႈ၊-တူဝ်ၶုၼ်လူင်တၵ်းလႆႈၸီႇယၢင်ႇဢေႃႈ၊ဝႃႈၼင်ႇၼႆဢေႃႈ။
၁၅ မိူဝ်ႈၼၼ်ႉမၼ်းဢၢၼ်ၵူၼ်းဢွၼ်ႇမဵဝ်းၶုၼ်ႇၸိူဝ်းၼၼ်ႉလႄႈမီးသွင်ပၢၵ်ႇသၢမ်သိပ်းပၢႆသွင်ၵေႃႉဢေႃႈ။မၼ်းသမ်ႉၼပ်ႉဢၢၼ်ႇၵူၼ်းတင်းသဵင်ႈတင်းလူင်ဢၼ်ဝႃႈၵူၼ်းမဵဝ်းဢိသရေႇလတင်းသဵင်ႈတင်းလူင်ၸိူဝ်းၼၼ်ႉမီးၸဵတ်းႁဵင်ဢေႃႈ။
၁၆ ၶဝ်ၼၼ်ႉဢွၼ်ၵၼ်ဢွၵ်ႇၶိင်ႇၵၢင်ဝၼ်းတဵင်ႈဢေႃႈ။ပိၼ်ႇႁႃႇတတ်ႉၸမ်းၵိၼ်လဝ်ႈၵႃႈတီႈသုမ်ႉၸဝ်ႈလူၺ်ႈၵၼ်တင်းၶုၼ်လူင်ဢၼ်ၸွႆႈထႅမ်မၼ်းသၢမ်သိပ်းပၢႆသွင်ပႃးၸိူဝ်းၼၼ်ႉႁႂ်ႈထၼ်ႈပေႃးမဝ်းလဝ်ႈမဝ်းၵမ်ယူႇဢေႃႈ။
၁၇ ၵူၼ်းဢွၼ်ႇမဵဝ်းၶုၼ်ၸိူဝ်းၼၼ်ႉဢွၼ်ၵၼ်ဢွၵ်ႇၵႂႃႇဢွၼ်တၢင်းဢေႃႈ။ၶုၼ်ပိၼ်ႇႁႃႇတတ်ႉပွႆႇၸႂ်ႉၵူၼ်းဢွၵ်ႇတူၺ်းလႄႈၶဝ်ၼၼ်ႉၶိုၼ်းမႃးလဝ်ႈလၢတ်ႈတီႈမၼ်းလႄႈဝႃႈ၊-
၁၈ ၵူၼ်းဢွၵ်ႇၵႃႈၼႂ်းဝဵင်းသမႃႇရိမႃးၶႃႈယဝ်ႉဝႃႈၼင်ႇၼႆလႄႈမၼ်းၼၼ်ႉမီးဢမိင်ႉလႄႈဝႃႈ၊-ပေႃးၶဝ်ဢွၵ်ႇမႃးႁႂ်ႈသိုၵ်းထၢတ်ႇယဵၼ်ၸိုင်တိၺွပ်းဢဝ်တူဝ်လိပ်းၶဝ်တႃႉ။ပေႃးၶဝ်ဢွၵ်ႇမႃးႁႂ်ႈလႆႈတိုၵ်းၸိုင်တိၺွပ်းဢဝ်တူဝ်လိပ်းၶဝ်တႃႉ၊ဝႃႈၼင်ႇၼႆဢေႃႈ။
၁၉ ၼင်ႇၼၼ်လႄႈၵူၼ်းဢွၼ်ႇမဵဝ်းၶုၼ်ၸိူဝ်းၼၼ်ႉဢိၵ်ႇတင်းႁူဝ်သိုၵ်းဢၼ်ၸွမ်းၶဝ်ၸိူဝ်းၼၼ်ႉဢွၼ်ၵၼ်ဢွၵ်ႇသေၵႃႈၼႂ်းဝဵင်းလႄႈဢဝ်ၵူၼ်းတၢႆၵေႃႉတေႃႇၵေႃႉၵူႈၵေႃႉဢေႃႈ။
၂၀ ၵူၼ်းသုရိၸိူဝ်းၼၼ်ႉဢွၼ်ၵၼ်ဢွၵ်ႇပၢႆႇလႄႈၵူၼ်းမဵဝ်းဢိသရေႇလတင်းလၢႆဢွၼ်ၵၼ်လိုပ်ႈၸွမ်းဢေႃႈ။ပိၼ်ႇႁႃႇတတ်ႉၶုၼ်ႁေႃၶမ်းသုရိၵေႃႈၶီႇမႃႉသေလႄႈပၢႆလူၺ်ႈၵၼ်တင်းႁူဝ်ႁၢၼ်ၵူၼ်းသိုၵ်းၶီႇမႃႉတင်းလၢႆလႄႈလွတ်ႈၵႂႃႇဢေႃႈ။
၂၁ ၶုၼ်ႁေႃၶမ်းဢိသရေႇလၵေႃႈဢွၵ်ႇလႄႈယႃႉတပ်ႉမႃႉ၊တပ်ႉလေႃႉရထႃးပႅတ်ႈလႄႈႁဵတ်းတၢင်းဢၼ်ၶႃႈၽၼ်းဢဝ်တၢႆဢၼ်ယႂ်ႇၼႃႇဢဝ်ၵူၼ်းသုရိၸိူဝ်းၼၼ်ႉတၢႆဢေႃႈ။
၂၂ လၢႆးသမ်ႉပရေႃးၽႅတ်ႈၼၼ်ႉသုတ်ႉၸပ်းသုတ်ႉၸူးၵႃႈတီႈၶုၼ်ႁေႃၶမ်းဢိသရေႇလသေလႄႈလဝ်ႈလၢတ်ႈလႄႈဝႃႈ၊-ၵႂႃႇလႄႈႁဵတ်းႁႂ်ႈတူဝ်ၸဝ်ႈၵဝ်ႇမၼ်ႈၶိူင်ႇသေၵမ်းၶႃႈ။ႁဵတ်းသတိလႄႈၶႆႈၸႂ်ဝူၼ်ႉၸႂ်လူၺ်ႈလွင်ႈဢၼ်ၸဝ်ႈႁဝ်းတၵ်းလႆႈႁဵတ်းၸိူဝ်ႉၼင်ႇႁိုဝ်ၼၼ်ႉသေၵမ်းတီႈၶႃႈ။မိူဝ်ႈဢၼ်ၶွပ်ႈၶူပ်ႇယဝ်ႉၼၼ်ႉၸိုင်ၶုၼ်ႁေႃၶမ်းသုရိၼၼ်ႉတၵ်းၶီႇသိုၵ်းမႃးထႅင်ႈလူးၵွၼ်ႇတီႈၶႃႈဢေႃႈ၊ဝႃႈၼင်ႇၼႆဢေႃႈ။
၂၃ ၶႃႈၵူၼ်းၶုၼ်ႁေႃၶမ်းသုရိၸိူဝ်းၼၼ်ႉၵေႃႈဢွၼ်ၵၼ်လဝ်ႈလၢတ်ႈလႄႈဝႃႈ၊-ၽြႃးၶဝ်ၸိူဝ်းၼၼ်ႉပဵၼ်ၽြႃးဢၼ်လႆႈဢုပ်ႉပိူင်ႇၵႃႈတီႈလွႆၶႃႈဢေႃႈ။ၵွပ်ႈပိူဝ်ႈၼင်ႇၼၼ်လႄႈၶဝ်ႁႅင်းယႂ်ႇၼႃႇသေၶႃႈၸဝ်ႈႁဝ်းၶဝ်ၶႃႈဢေႃႈ။ပေႃးႁဝ်းၶႃႈၵႂႃႇတိုၵ်းတေႃးၶဝ်ၵႃႈတီႈပၢင်ႇပဵင်းၸိုင်ႁဝ်းၶႃႈတေႁႅင်းယႂ်ႇၼႃႇသေၶဝ်ၶႃႈဢေႃႈ။
၂၄ ႁဵတ်းၸိူဝ်ႉၼင်ႇၼႆသေၵမ်းၶႃႈ။ၼုၵ်ႉဢဝ်ၶုၼ်လူင်တင်းသဵင်ႈတင်းလူင်ဢွၵ်ႇသေၵႃႈၼႂ်းဢရႃႇၶဝ်သေလႄႈၶၢၼ်းႁူဝ်သိုၵ်းဝႆႉတၢင်တူဝ်ၶဝ်ၼၼ်ႉသေၵမ်းတီႈၶႃႈ။
၂၅ ႁၢင်ႈပွင်တပ်ႉဢၼ်ၼမ်ၼႃႇပဵင်းတၢၼ်ႇတပ်ႉဢၼ်သုမ်းၸွမ်းၵႂႃႇၼၼ်ႉမႃႉပုၼ်ႈမႃႉလေႃႉရထႃးပုၼ်ႈလေႃႉရထႃးသေၵမ်းတီႈၶႃႈ။ၶႃႈၸဝ်ႈႁဝ်းၶဝ်တၵ်းတိုၵ်းတေႃးၶဝ်ၵႃႈတီႈပၢင်ႇတီႈပဵင်းလႄႈႁႅင်းယႂ်ႇၼႃသေၶဝ်ဢမၢၼ်ႇၶၢၼ်ပဵၼ်တီႈၶႃႈဢေႃႈ၊ဝႃႈၼင်ႇၼႆလႄႈမၼ်းၵေႃႈထွမ်ႇဢၼ်ၵႂၢမ်းဢၼ်ၶဝ်လဝ်ႈလၢတ်ႈၼၼ်ႉသေယဝ်ႉၸီႇယၢင်ႇႁဵတ်းဢေႃႈ။
၂၆ မိူဝ်ႈဢၼ်ၶွပ်ႈၶူပ်ႇယဝ်ႉၼၼ်ႉၸိုင်ပိၼ်ႇႁႃႇတတ်ႉႁၢင်ႈပွင်ၵူၼ်းသုရိတင်းလၢႆသေလႄႈၶီႇသိုၵ်းၶိုၼ်ႈၸူးၵႃႈတီႈဝဵင်းဢႃႇၽိၵ်ႉႁႂ်ႈလႆႈတိုၵ်းတေႃးၵူၼ်းမဵဝ်းဢိသရေႇလတင်းလၢႆဢေႃႈ။
၂၇ ၵူၼ်းမဵဝ်းဢိသရေႇလတင်းလၢႆလႆႈၶၢမ်ႇတၢင်းဢၼ်ႁၢင်ႈပွင်ႁဵတ်းတပ်ႉသေလႄႈမႄးႁႅၼ်းၸရိပ်ႈတၢင်းၵိၼ်သေယဝ်ႉၶီႇသိုၵ်းၵႂႃႇဢေႃႈ။ပိၵ်ႉသမ်ႉၵူၼ်းသုရိၸိူဝ်းၼၼ်ႉမီးၸွတ်ႇတူဝ်ႈဝႆႉတင်းဝၢၼ်ႈတင်းမိူင်းယူႇသေၵေႃႈၵူၼ်းမဵဝ်းဢိသရေႇလၸိူဝ်းၼၼ်ႉပဵၼ်ၸိူဝ်ႉၼင်ႇၽုင်ပႄႉဢၼ်လဵၵ်ႉဢၼ်ဢွၼ်ႇသွင်ၽုင်သေလႄႈၶျႃးတပ်ႉၶဝ်ၵႃႈတီႈၽၢႆႇၼႃႈၶဝ်ၼၼ်ႉဢေႃႈ။
၂၈ ၵူၼ်းၽြႃးပဵၼ်ၸဝ်ႈၵေႃႉၼိုင်ႈသုတ်ႉၸပ်းသုတ်ႉၸူးလႄႈသင်ႇလၢတ်ႈတီႈၶုၼ်ႁေႃၶမ်းဢိသရေႇလလႄႈဝႃႈ၊-ထႃႇဝရႃႉၽြႃးမီးဢမိင်ႉလႄႈဝႃႈၸမ်း၊-ၵွပ်ႈပိူဝ်ႈဢၼ်ၵူၼ်းသုရိၸိူဝ်းၼၼ်ႉလၢတ်ႈဝႃႈ၊-ထႃႇဝရႃႉၽြႃးပဵၼ်ၽြႃးဢၼ်ဢုပ်ႉပိူင်ႇလွႆၵူၺ်းဢေႃႈ။ပဵၼ်ၽြႃးဢၼ်ဢုပ်ႉပိူင်ႇၵႃႈတီႈပၢင်ႇတီႈပဵင်းဢမ်ႇၸႂ်ႈ၊ဝႃႈၼင်ၼႆၼၼ်ႉလႄႈၵဝ်တၵ်းဢဝ်မူႇၽုင်မုၵ်ႉၸိူဝ်းဢၼ်ယႂ်ႇၼႃႇတင်းသဵင်ႈတင်းလူင်ၼႆႉဢၢပ်ႈပၼ်ၵႃႈၼႂ်းမိုဝ်းမႂ်းဢေႃႈ။သူတၵ်းႁူႉလွင်ႈဢၼ်ၵဝ်ပဵၼ်ထႃႇဝရႃႉၽြႃးၼၼ်ႉဢေႃႈ၊ဝႃႈၼင်ႇၼႆဢေႃႈ။
၂၉ ၶဝ်ၼၼ်ႉၶျႃးတပ်ႉတေႃႇၵၼ်ယူႇၸဵတ်းဝၼ်းတဵမ်တဵမ်သေယဝ်ႉဝၼ်းသတ်ႉတမၼၼ်ႉၶဵင်ႇသိုၵ်းၵၼ်လႄႈၵူၼ်းမဵဝ်းဢိသရေႇလတင်းလၢႆဢဝ်ၵူၼ်းသိုၵ်းပႆတိၼ်သုရိၸိူဝ်းၼၼ်ႉတၢႆသႅၼ်ၼိုင်ႈၼႂ်းဝၼ်းလဵဝ်ၵူၺ်းဢေႃႈ။
၃၀ ၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇၼၼ်ႉဢွၵ်ႇပၢႆႈၵႂႃႇၸူးၵႃႈတီႈဝဵင်းဢႃႇၽိၵ်ႉလႄႈၶဝ်ႈၵႃႈၼႂ်းဝဵင်းသေယဝ်ႉလၢမ်ႇဝဵင်းၼၼ်ႉလူမ်ႉတူၵ်းတဵင်သႂ်ႇၵူၼ်းသွင်မိုၼ်ႇပၢႆၸဵတ်းႁဵင်ဢၼ်ၵိုတ်းဢၼ်ၵျၢၼ်ႇၼၼ်ႉဢေႃႈ။ပိၼ်ႇႁႃႇတတ်ႉၼၼ်ႉဢွၵ်ႇပၢႆႈလႄႈၶဝ်ႈၵႂႃႈၼႂ်းဝဵင်းသေယဝ်ႉတဵတ်ႇမႅပ်းယူႇၵႃႈၼႂ်းလုၵ်းတၢင်းၼႂ်းဢေႃႈ။
၃၁ ၶႃႈမၼ်းၵူၼ်းမၼ်းၸိူဝ်းၼၼ်ႉလဝ်ႈလၢတ်ႈလႄႈဝႃႈ၊-တူၺ်းတီႈၶႃႈလူး။ၶႃႈၸဝ်ႈႁဝ်းၶဝ်လႆႈငိၼ်းလွင်ႈဢၼ်ၶုၼ်ႁေႃၶမ်းမဵဝ်းဢိသရေႇလၸိူဝ်းၼၼ်ႉပဵၼ်ၶုၼ်ဢၼ်ၸၢင်ႈဢိတ်းလူၼၼ်ႉတီႈၶႃႈယဝ်ႉ။ပၼ်ဢၶႂၢင်ႉဢၼ်ၶႃႈၸဝ်ႈႁဝ်းၶဝ်လႆႈဢဝ်ၶူဝ်းၼုင်ႈၼင်ပေႃၼုင်ႈႁတ်ႉဢႅဝ်လႄႈဢဝ်ၸိူၵ်ႈတဵင်သႂ်ႇၵႃႈၼိူဝ်ႁူဝ်သေလႄႈဢွၵ်ႇၵႂႃႇၸူးၵႃႈတီႈၶုၼ်ႁေႃၶမ်းဢိသရေႇလသေၵမ်းၶႃႈ။
၃၂ မၼ်းၸၢင်ႈၶေးတၵ်းပၼ်ဢသၢၵ်ႈၸဝ်ႈႁဝ်းၵတ်းယဵၼ်ၶျၢမ်းသႃႇတီႈၶႃႈဢေႃႈ၊ဝႃႈၼင်ႇၼႆသေယဝ်ႉၶဝ်ဢွၼ်ၵၼ်ဢဝ်ၶူဝ်းၼုင်ႈၼင်ပေႃၼုင်ႈႁတ်ႉဢႅဝ်လႄႈဢဝ်ၸိူၵ်ႈတဵင်သႂ်ႇၵႃႈၼိူဝ်ႁူဝ်ၶဝ်သေယဝ်ႉၵႂႃႇႁွတ်ႈထိုင်ၵႃႈတီႈၶုၼ်ႁေႃၶမ်းဢိသရေႇလလႄႈလဝ်ႈလၢတ်ႈလႄႈဝႃႈ၊-ၶႃႈၸဝ်ႈႁဝ်းပိၼ်ႇႁႃႇတတ်ႉၼၼ်ႉတွင်းပၢၼ်ႇဝႃႈ၊-ၶႅၼ်းတေႃႈပၼ်ဢသၢၵ်ႈၶႃႈၸဝ်ႈႁဝ်းၵတ်းယဵၼ်ၶျၢမ်းသႃႇသေၵမ်းၶႃႈ၊ဝႃႈၼင်ႇၼႆတီႈၶႃႈဢေႃႈ။မိူဝ်ႈဢၼ်ဝႃႈၼင်ႇၼႆၸိုင်မၼ်းထၢမ်လႄႈဝႃႈ၊-မၼ်းၼၼ်ႉဢသၢၵ်ႈယင်းလိပ်းယူႇႁိုဝ်။မၼ်းပဵၼ်ပီႈဢၢႆႈၵဝ်ဢေႃႈ၊ဝႃႈၼင်ႇၼႆဢေႃႈ။
၃၃ ၶဝ်ၼၼ်ႉထွမ်ႇၵႂၢမ်းမၼ်းၸေးၸေးၸွတ်ႇၸွတ်ႇလႄႈႁိပ်ႈၼႅတ်ႈတီႉယိပ်းၵမ်ဢဝ်သၢႆငၢႆၵႂၢမ်းၼၼ်ႉၵမ်းလဵဝ်သေလႄႈလဝ်ႈလၢတ်ႈလႄႈဝႃႈ၊-ပိၼ်ႇႁႃႇတတ်ႉပီႈၸၢႆးၸဝ်ႈႁဝ်းၼၼ်ႉၶႃႈဢေႃႈ၊ဝႃႈၼင်ႇၼႆဢေႃႈ။မၼ်းၵေႃႈမီးဢမိင်ႉလႄႈဝႃႈ၊-ဢွၼ်ၵၼ်ၵႂႃႇႁွင်ႉဢဝ်မၼ်းမႃးတႃႉ။ဝႃႈၼင်ႇၼႆဢေႃႈ။ပိၼ်ႇႁႃႇတတ်ႉဢွၵ်ႇမႃးၸူးၵႃႈတီႈမၼ်းလႄႈမၼ်းႁႂ်ႈပိၼ်ႇႁႃႇတတ်ႉၶိုၼ်ႈၵႃႈၼိူဝ်လေႃႉရထႃးၸဝ်ႈဢေႃႈ။
၃၄ ပိၼ်ႇႁႃႇတတ်ႉၵေႃႈလၢတ်ႈလႄႈဝႃႈ၊-ၵဝ်ၶႃႈတၵ်းဢဝ်ဝဵင်းဢၼ်ၸဝ်ႈပေႃႈၵဝ်ၶႃႈႁိမ်ဢဝ်သေၵႃႈၼႂ်းမိုဝ်းၸဝ်ႈႁဝ်းၸိူဝ်းၼၼ်ႉၶိုၼ်းပၼ်ၶႃႈဢေႃႈ။ၸဝ်ႈႁဝ်းတၵ်းလႆႈတႄႇႁဵတ်းထႅဝ်ႁဵတ်းတၢၼ်းပုၼ်ႈၸဝ်ႈႁဝ်းၵႃႈၼႂ်းဝဵင်းသမႃႇရိၼၼ်ႉဢေႃႈ၊ဝႃႈၼင်ႇၼႆသေယဝ်ႉဢႃႇႁပ်ႉလၢတ်ႈလႄႈဝႃႈ၊-ၵဝ်တၵ်းႁဵတ်းမိၵ်ႈသႁႃႇယႃႉၸိူဝ်ႉၼင်ႇၼၼ်ယူႇသေလႄႈပွႆႇမႂ်းဢေႃႈ၊ဝႃႈၼင်ႇၼႆလႄႈႁဵတ်းမိၵ်ႈသႁႃႇယႃႉသေလႄႈပွႆႇမၼ်းသေဢေႃႈ။
၃၅ လုၵ်ႈၸၢႆးပရေႃးၽႅတ်ႈၵေႃႉၼိုင်ႈၸွမ်းလူၺ်ႈၼုၵ်ႉၵပၢတ်ႈထႃႇဝရႃႉၽြႃးသေလႄႈလၢတ်ႈတီႈၵေႃႉသေႈမၼ်းလႄႈဝႃႈ၊-ပေႃႉယႅၼ်ႉၵဝ်သေၵမ်းဝႃႈၼင်ႇၼႆဢေႃႈ။ၵေႃႉၼၼ်ႉၵေႃႈထဵင်ပႅတ်ႈလႄႈဝႃႈ၊-ၵဝ်ဢမ်ႇပေႃႉဢမ်ႇယႅၼ်ႉမႂ်းလႆႈ၊ဝႃႈၼင်ႇၼႆဢေႃႈ။
၃၆ ၵေႃႉၼၼ်ႉလၢတ်ႈတီႈမၼ်းၼၼ်ႉလႄႈဝႃႈ၊-ၵွပ်ႈပိူဝ်ႈဢၼ်မႂ်းဢမ်ႇထွမ်ႇဢဝ်ၼုၵ်ႉၵပၢတ်ႈထႃႇဝရႃႉၽြႃးလႄႈပေႃႉယႅၼ်ႉၵဝ်ၼၼ်ႉၼႂ်းမိူဝ်ႈဢၼ်မႂ်းလုၵ်ႉလႄႈယင်းတိူၵ်ႈၵႂႃႇယူႇၼၼ်ႉၸိုင်သၢင်ႇသီႈတၵ်းဢဝ်မႂ်းတၢႆဢေႃႈ၊ဝႃႈၼင်ႇၼႆဢေႃႈ။ၼႂ်းမိူဝ်ႈဢၼ်မၼ်းယင်းတိုၵ်ႉဢွၵ်ႇၵႂႃႇယူႇၼၼ်ႉသၢင်ႇသီႈထူပ်းႁၼ်မၼ်းလႄႈဢဝ်မၼ်းတၢႆဢေႃႈ။
၃၇ ၵေႃႉၼၼ်ႉသမ်ႉထူပ်းႁၼ်တၢင်ႇၵေႃႉလႄႈလၢတ်ႈထႅင်ႈလႄႈဝႃႈ၊-ပေႃႉယႅၼ်ႉၵဝ်သေၵမ်းတႃႉ၊ဝႃႈၼင်ႇၼႆလႄႈၵေႃႉၼၼ်ႉၵေႃႈပေႃႉယႅၼ်ႉမၼ်းၸဵပ်းၼႃႇလူင်လၢင်ဢေႃႈ။
၃၈ ၵေႃႉၼၼ်ႉၵေႃႈဢဝ်ၽႃႈၸဵတ်ႉႁူမ်ႇသုမ်ႇၼႃႈမၼ်းလႄႈဢွၵ်ႇၵႂႃႇပႂ်ႉထႃႈၶုၼ်ႁေႃၶမ်းယူႇၵႃႈတီႈႁိမ်းတၢင်းဢေႃႈ။
၃၉ မိူဝ်ႈဢၼ်ၶုၼ်ႁေႃၶမ်းပႆတၢင်းၵၢႆမႃးႁိမ်းမၼ်းမႃးယူႇၼၼ်ႉၵေႃႉၼၼ်ႉလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊-ၵဝ်ၶႃႈၼႆႉဢွၵ်ႇၵႂႃႇၸူးၵႃႈၼႂ်းၵၢင်ပွႆးတိုၵ်းသိုၵ်းၶႃႈဢေႃႈ။ၵူၼ်းၵေႃႉၼိုင်ႈဢွၵ်ႇသေၵႃႈၼႂ်းပွႆးတိုၵ်းသိုၵ်းၼၼ်ႉမႃးလႄႈဢဝ်ၵူၼ်းၵေႃႉၼိုင်ႈဢၢပ်ႈပၼ်တီႈၶႃႈၸဝ်ႈသေယဝ်ႉသင်ႇလၢတ်ႈဝႃႈ၊-
၄၀ ပႂ်ႉၵူၼ်းၵေႃႉၼႆႉလီလီတႃႉ။ပေႃးမၼ်းႁၢႆၵႂႃႇၵွပ်ႈပိူဝ်ႈသေၸိူဝ်ႉသေပိူင်ၸိုင်ဢသၢၵ်ႈမႂ်းတၵ်းလႆႈပဵၼ်ပုၼ်ႈဢသၢၵ်ႈမၼ်းဢေႃႈ။ဢမ်ႇၼၼ်ၵေႃႈမႂ်းတၵ်းလႆႈယေႃႇပၼ်ငိုၼ်းတလၢၼ်ႇတၢၼ်ႇၼိုင်ႈဢေႃႈ၊ဝႃႈၼင်ႇၼႆၶႃႈဢေႃႈ။
၄၁ မိူဝ်ႈဢၼ်ၵဝ်ၶႃႈမၢင်ႉၼႃႇၵွပ်ႈပိူဝ်ႈဢမူႉၵူႈတီႈၵူႈလႅၼ်ၼမ်ၼႃႇၼၼ်ႉၸိုင်ၵေႃႉၼၼ်ႉႁၢႆၵႂႃႇၶႃႈဢေႃႈ၊ဝႃႈၼင်ႇၼႆလႄႈၶုၼ်ႁေႃၶမ်းဢိသရေႇလၵေႃႈမီးဢမိင်ႉတီႈမၼ်းလႄႈဝႃႈ၊-
၄၂ မႂ်းတၵ်းလႆႈၶၢမ်ႇတၢင်းဢၼ်ၸီႇယၢင်ႇဢေႃႈ။တူဝ်မႂ်းၸီႇယၢင်ႇတူဝ်မႂ်းယဝ်ႉ၊ဝႃႈၼင်ႇၼႆဢေႃႈ။မိူဝ်ႈၼၼ်ႉၵေႃႉၼၼ်ႉႁိပ်ႈၼႅတ်ႈဢဝ်ၽႃႈၸဵတ်ႈဢၼ်ႁူမ်ႇသုမ်ႇၼႃႈမၼ်းၼၼ်ႉပႅတ်ႈၵမ်းလဵဝ်လႄႈၶုၼ်ႁေႃၶမ်းဢိသရေႇလလႆႈႁၼ်လႆႈႁူႉလွင်ႈဢၼ်ဝႃႈၵေႃႉၼၼ်ႉပဵၼ်ပရေႃးၽႅတ်ႈၼၼ်ႉဢေႃႈ။ၵေႃႉၼၼ်ႉလၢတ်ႈလႄႈဝႃႈ၊-ထႃႇဝရႃႉၽြႃးမီးဢမိင်ႉလႄႈဝႃႈၸမ်း၊-ၵွပ်ႈပိူဝ်ႈဢၼ်မႂ်းပွႆႇလွတ်ႈၵေႃႉဢၼ်ၵဝ်ၵိၼ်ႇဝႃႈတၵ်းလႆႈတၢႆၼၼ်ႉလႄႈဢသၢၵ်ႈမႂ်းတၵ်းလႆႈပဵၼ်ပုၼ်ႈဢသၢၵ်ႈမၼ်းဢေႃႈ။ၵူၼ်းမႂ်းတင်းလၢႆတၵ်းလႆႈပဵၼ်ပုၼ်ႈၵူၼ်းမၼ်းတင်းလၢႆဢေႃႈ၊ဝႃႈၼင်ႇၼႆဢေႃႈ။
၄၃ ၶုၼ်ႁေႃၶမ်းဢိသရေႇလၵေႃႈမီးတၢင်းၸႂ်ဢၼ်တမ်ႇၼွႆႉမွင်ၸႂ်လႄႈႁဵဝ်ႇၸွပ်ႈယူႇသေလႄႈၵႂႃႇၸူးၵႃႈတီႈႁေႃၸဝ်ႈလႄႈႁွတ်ႈထိုင်ၵႃႈတီႈဝဵင်းသမႃႇရိဢေႃႈ။