Chapter
၂၂
မိၵ်ႉၶႃႇႁဵတ်းပရေႃးၽႅတ်ႈလွင်ႈဢႃႇႁပ်ႉ
၁ မိူင်းသုရိတင်းမိူင်းဢိသရေႇလၼၼ်ႉယင်းဢမ်ႇပဵၼ်သိုၵ်းပဵၼ်သိူဝ်ၵၼ်လႄႈယူႇသၢမ်ႇပီႊသေယဝ်ႉ
၂ ၼႂ်းပီႊတတိယၼၼ်ႉယေႃႇသၽတ်ႉၶုၼ်ႁေႃၶမ်းယုတလူင်းၸူးၵႃႈတီႈၶုၼ်ႁေႃၶမ်းဢိသရေႇလဢေႃႈ။
၃ ၶုၼ်ႁေႃၶမ်းဢိသရေႇလၵေႃႈလၢတ်ႈတီႈၶႃႈမၼ်းၵူၼ်းမၼ်းလႄႈဝႃႈ၊-ၸွင်ႇသူဢမ်ႇႁူႉလွင်ႈဢၼ်ဝႃႈဝဵင်းရႃႇမုတ်ႉမိူင်းၵိလတ်ႉၼၼ်ႉပဵၼ်မိူင်းႁဝ်းလႄႈႁဝ်းယင်းဢမ်ႇၼုၵ်ႈဢမ်ႇဢဝ်သေၵႃႈၼႂ်းမိုဝ်းၶုၼ်ႁေႃၶမ်းသုရိလႄႈယူႇၼိမ်ၼိမ်ယူႇၼၼ်ႉႁိုဝ်၊ဝႃႈၼင်ႇၼႆဢေႃႈ။
၄ မၼ်းထၢမ်တီႈယုဝ်ႇသၽတ်ႉလႄႈဝႃႈ၊-ၸွင်ႇၸဝ်ႈတၵ်းၶီႇသိုၵ်းလူၺ်ႈၵၼ်တင်းၵဝ်ၶႃႈၵႂႃႇၵႃႈတီႈဝဵင်းရႃႇမုတ်ႉမိူင်းၵိလတ်ႉပုၼ်ႉႁိုဝ်၊ဝႃႈၼင်ႇၼႆလႄႈယုဝ်ႇသၽတ်ႉၶိုၼ်းလၢတ်ႈတီႈၶုၼ်ႁေႃၶမ်းဢိသရေႇလလႄႈဝႃႈ၊-ၵဝ်ၶႃႈၼႆႉမိူၼ်ၸိူဝ်ႉၼင်ႇၸဝ်ႈယဝ်ႉ။ၵူၼ်းၵဝ်ၶႃႈၸိူဝ်းၼႆႉၵေႃႈမိူၼ်ၸိူဝ်ႉၼင်ႇၵူၼ်းၸဝ်ႈႁဝ်းၶႃႈယဝ်ႉ။မႃႉၵဝ်ၶႃႈတင်းလၢႆၵေႃႈမိူၼ်ၸိူဝ်ႉၼင်ႇမႃႉၸဝ်ႈႁဝ်းၶႃႈယဝ်ႉဝႃႈၼင်ႇၼႆဢေႃႈ။
၅ လၢႆးသမ်ႉယုဝ်ႇသၽတ်ႉလၢတ်ႈတီႈၶုၼ်ႁေႃၶမ်းဢိသရေႇလလႄႈဝႃႈ၊-တွင်ႉထၢမ်ၼုၵ်ႉၵပၢတ်ႈထႃႇဝရႃႉၽြႃးဝၼ်းမိူဝ်ႈၼႆႉသေၵမ်းမိူဝ်ႈဢၼ်ဝႃႈၼင်ႇၼႆၸိုင်
၆ ၶုၼ်ႁေႃၶမ်းဢိသရေႇလၼၼ်ႉႁႂ်ႈပရေႃးၽႅတ်ႈသီႇပၢၵ်ႇၸမ်ၸမ်ၸူႉၵၼ်တုမ်ၵၼ်သေယဝ်ႉ၊ထၢမ်လႄႈဝႃႈ၊-ၵဝ်ထုၵ်ႇလီၶီႇသိုၵ်းၵႂႃႇၵႃႈတီႈဝဵင်းရႃႇမုတ်ႉမိူင်းၵိလတ်ႉၼၼ်ႉႁိုဝ်။ဢမ်ႇၼၼ်ၵဝ်တၵ်းဢမ်ႇလႆႈၶီႇသိုၵ်းလႄႈထုၵ်ႇလီယူႇၸိူဝ်ႉၼႆႁိုဝ်မိူဝ်ႈဢၼ်ဝႃႈၼင်ႇၼႆၸိုင်ၶဝ်ဢွၼ်ၵၼ်လဝ်ႈလၢတ်ႈလႄႈဝႃႈ၊-ၶီႇသိုၵ်းၵႂႃႇသေၵမ်းတီႈၶႃႈ။ထႃႇဝရႃႉၽြႃးတၵ်းဢဝ်ဢၢပ်ႈပၼ်ၵႃႈၼႂ်းမိုဝ်းၸဝ်ႈၶုၼ်လူင်တီႈၶႃႈဢေႃႈ၊ဝႃႈၼင်ႇၼႆဢေႃႈ။
၇ ယုဝ်ႇသၽတ်ႉသမ်ႉထၢမ်လႄႈဝႃႈ၊-ပုၼ်ႈဢၼ်ႁဝ်းတၵ်းလႆႈတွင်ႉထၢမ်ၸိုင်ၵႃႈတီႈၼႆႉဢမ်ႇမီးပရေႃးၽႅတ်ႈထႃႇဝရႃႉၽြႃးသေၸဝ်ႈသပေႃးၶႃႈႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်ၶုၼ်ႁေႃၶမ်းဢိသရေႇလၶိုၼ်းလၢတ်ႈတီႈယုဝ်ႇသၽတ်ႉလႄႈဝႃႈ၊-
၈ ၵေႃႉဢၼ်တွင်ႉထၢမ်တီႈထႃႇဝရႃႉၽြႃးလႆႈဢၼ်ဝႃႈမိၵ်ႉၶႃႇလုၵ်ႈၸၢႆးဢိမလၼၼ်ႉယင်းမီးၵေႃႉၼိုင်ႈဢေႃႈ။ၼႂ်းဝႃႈၼၼ်သေၵေႃႈၵဝ်ၶႃႈၸင်းမၼ်းဢေႃႈ။မၼ်းဢမ်ႇႁေႃးလၢတ်ႈၵႂၢမ်းမၢင်ႇၵလႃႇလူၺ်ႈလွင်ႈၵဝ်ၶႃႈလႄႈမၼ်းႁေႃးလၢတ်ႈၵႂၢမ်းဢႃႉမၢင်ႇၵလႃႇလူၺ်ႈလွင်ႈၵဝ်ၶႃႈၵူၺ်းဢေႃႈ၊ဝႃႈၼင်ႇၼႆသေယဝ်ႉ၊ယုဝ်ႇသၽတ်ႉၶိုၼ်းလၢတ်ႈလႄႈဝႃႈ၊-ၶုၼ်လူင်ယႃႇပေလၢတ်ႈၸိူဝ်ႉၼင်ၼၼ်သေၵမ်း၊ဝႃႈၼင်ႇၼႆဢေႃႈ။
၉ မိူဝ်ႈၼၼ်ႉၶုၼ်ႁေႃၶမ်းဢိသရေႇလၼၼ်ႉႁွင်ႉဢဝ်ၵေႃႉဢၼ်မီးဢရႃႇၵေႃႉၼိုင်ႈလႄႈမီးဢမိင်ႉလႄႈဝႃႈ၊-ႁွင်ႉဢဝ်မိၵ်ႉၶႃႇလုၵ်ႈၸၢႆးဢိမလၼၼ်ႉမႃးၶၼ်ၶၼ်ၽႂ်းၽႂ်းတႃႉ၊ဝႃႈၼင်ႇၼႆဢေႃႈ။
၁၀ မိူဝ်ႈၶိင်ႇၼၼ်ႉၶုၼ်ႁေႃၶမ်းဢိသရေႇလဢိၵ်ႇတင်းယုဝ်ႇသၽတ်ႉၶုၼ်ႁေႃၶမ်းယုတၼၼ်ႉၼုင်ႈမႆႊႁၢင်ႈၶိူင်ႈၶူဝ်းၼုင်ႈၶူဝ်းမႆၶူၼ်ယူႇသေလႄႈၼင်ႈယူႇၵႃႈၼိူဝ်ရႃႇၸႃႉပလၢင်ႇႁင်းၽႂ်ႁင်းမၼ်းၼႂ်းတီႈဢၼ်ပၢင်ႇလီပဵင်းလီၵႃႈတီႈၽၢႆႇၼႃႈႁူးၽၵ်းတူဝဵင်းသမႃႇရိၼၼ်ႉယူႇလႄႈပရေႃးၽႅတ်ႈၵႃႈမီးၸိူဝ်းၼၼ်ႉဢွၼ်ၵၼ်ႁေႃးလၢတ်ႈၵႃႈတီႈၽၢႆႇၼႃႈၸဝ်ႈယူႇဢေႃႈ။
၁၁ ၸေႇတၵိလုၵ်ႈၸၢႆးၶေႇၼႃႇၼႃႇၼၼ်ႉႁဵတ်းၶဝ်လႅမ်လဵၵ်းသေလႄႈသင်ႇလၢတ်ႈလႄႈဝႃႈ၊-ထႃႇဝရႃႉၽြႃးမီးဢမိင်ႉလႄႈဝႃႈၸမ်း၊-ၸဝ်ႈႁဝ်းတၵ်းလႆႈဢဝ်ၶဝ်လႅမ်ၸိူဝ်းၼႆႉတႅင်းၵူၼ်းမိူင်းသုရိတေႃႇထိုင်ႁွတ်ႈၶဝ်ထၼ်ႈပေႃးလူႉပေႃးလႅဝ်ဢေႃႈ၊ဝႃႈၼင်ႇၼႆတီႈၶႃႈယဝ်ႉ၊ဝႃႈၼင်ႇၼႆဢေႃႈ။
၁၂ ပရေႃးၽႅတ်ႈၵႃႈမီးၸိူဝ်းၼၼ်ႉၵေႃႈဢွၼ်ၵၼ်ႁဵတ်းပရေႃးၽႅတ်ႈသေလႄႈႁေႃးလၢတ်ႈလႄႈဝႃႈ၊-ၸဝ်ႈႁဝ်းၶီႇသိုၵ်းၶိုၼ်ႈၸူးၵႃႈတီႈဝဵင်းရႃႇမုတ်ႉမိူင်းၵိလတ်ႉလႄႈႁႂ်ႈပေႉၼႅင်ႇသေၵမ်းတီႈၶႃႈ။
၁၃ ထႃႇဝရႃႉၽြႃးတၵ်းဢဝ်ဢၢပ်ႈပၼ်ၵႃႈၼႂ်းမိုဝ်းၸဝ်ႈၶုၼ်လူင်တီႈၶႃႈဢေႃႈ၊ဝႃႈၼင်ႇၼႆဢေႃႈ။တမၢၼ်ႇၵူၼ်းၸႂ်ႉဢၼ်ၵႂႃႇႁႂ်ႈလႆႈႁွင်ႉမိၵ်ႉၶႃႇမႃးၼၼ်ႉလၢတ်ႈလႄႈဝႃႈ၊-ပရေႃးၽႅတ်ႈၸိူဝ်းၼၼ်ႉၽွမ်ႉၵၼ်ႁေႃးလၢတ်ႈၵႂၢမ်းမၢင်ႇၵလႃႇၵူၺ်းတီႈၶုၼ်ႁေႃၶမ်းၶႃႈဢေႃႈ။
၁၄ ၸဝ်ႈႁဝ်းၵေႃႈၶႅၼ်းတေႃႈႁႂ်ႈၵႂၢမ်းၸဝ်ႈႁဝ်းပဵၼ်ၸိူဝ်ႉၼင်ႇၵႂၢမ်းၶဝ်ၼၼ်ႉလႄႈႁေႃးလၢတ်ႈၵႂၢမ်းမၢင်ႇၵလႃႇသေၵမ်းၶႃႈ၊ဝႃႈၼင်ႇၼႆသေယဝ်ႉမိၵ်ႉၶႃႇၶိုၼ်းလၢတ်ႈလႄႈဝႃႈ၊-ၵႃႈၼင်ႇဢၼ်ထႃႇဝရႃႉၽြႃးဢသၢၵ်ႈလိပ်းယူႇၼၼ်ႉၵဝ်တၵ်းလႆႈၶိုၼ်းလၢတ်ႈၵႂၢမ်းဢၼ်ထႃႇဝရႃႉၽြႃးမီးဢမိင်ႉၼၼ်ႉၵူၺ်းဢေႃႈ၊ဝႃႈၼင်ႇၼႆဢေႃႈ။
၁၅ မိူဝ်ႈဢၼ်မၼ်းႁွတ်ႈထိုင်ၵႂႃႇၵႃႈတီႈၶုၼ်ႁေႃၶမ်းၼၼ်ႉၸိုင်ၶုၼ်ႁေႃၶမ်းထၢမ်တီႈမၼ်းလႄႈဝႃႈ၊-မိၵ်ႉၶႃႇဢိူၺ်း။ၸွင်ႇႁဝ်းထုၵ်ႇလီၶီႇသိုၵ်းၵႂႃႇၵႃႈတီႈဝဵင်းရႃႇမုတ်ႉမိူင်းၵိလတ်ႉၼၼ်ႉႁိုဝ်။ဢမ်ႇၼၼ်ႁဝ်းယင်းဢမ်ႇၶီႇသိုၵ်းလႄႈထုၵ်ႇလီယူႇၸိူဝ်ႉၼႆၵူၺ်းႁိုဝ်၊ဝႃႈၼင်ႇၼႆလႄႈမိၵ်ႉၶႃႇလဝ်ႈလၢတ်ႈလႄႈဝႃႈ၊-ၶီႇသိုၵ်းၶိုၼ်ႈၸူးလႄႈႁႂ်ႈလႆႈပႄႉၼႅင်ႇသေၵမ်းတီႈၶႃႈ။ထႃႇဝရႃႉၽြႃးတၵ်းဢဝ်ဢၢပ်ႈပၼ်ၵႃႈၼႂ်းမိုဝ်းၶုၼ်လူင်တီႈၶႃႈဢေႃႈ၊ဝႃႈၼင်ႇၼႆဢေႃႈ။
၁၆ ၶုၼ်ႁေႃၶမ်းၵေႃႈထၢမ်လႄႈဝႃႈ၊-ၼင်ႇႁိုဝ်မႂ်းတၵ်းလၢတ်ႈၵႂၢမ်းဢၼ်မၢၼ်ႇဢၼ်မႅၼ်ႈၼၼ်ႉၵူၺ်းၸိုင်ၵဝ်တၵ်းလႆႈၵိၼ်ႇဝႃႈတီႈမႂ်းလၢႆပွၵ်ႈ၊ဝႃႈၼင်ႇၼႆလႄႈမၼ်းၵေႃႈသမ်ႉလဝ်ႈလၢတ်ႈလႄႈဝႃႈ၊-
၁၇ ၶႃႈၸဝ်ႈလႆႈႁၼ်ၵူၼ်းမဵဝဢိသရေႇလတင်းသဵင်ႈတင်းလူင်မီးတၢင်းဢၼ်ၽၢတ်ႇၽႄၵၼ်ယူႇၵႃႈၼိူဝ်လွႆၼိူဝ်ၵုင်းတင်းလၢႆမိူၼ်ၸိူဝ်ႉၼင်ႇသူဝ်းဢၼ်ဢမ်ႇမီးၵေႃႉဢၼ်လဵင်ႉဢၼ်ထိင်းၼၼ်ႉတီႈၶႃႈယဝ်ႉ။ထႃႇဝရႃႉၽြႃးမီးဢမိင်ႉလႄႈဝႃႈၸမ်း၊-ၵွပ်ႈပိူဝ်ႈဢၼ်ၶဝ်ၸိူဝ်းၼႆႉဢမ်ႇမီးၸဝ်ႈမီးၸွမ်လႄႈႁႂ်ႈၶဝ်ၶိုၼ်းမိူဝ်းယူႇၵႃႈတီႈႁိူၼ်းတီႈဢၼ်ၶဝ်ယူႇၼၼ်ႉႁင်းၽႂ်ႁင်းမၼ်းသေတႃႉ၊ဝႃႈၼင်ႇၼႆတီႈၶႃႈဢေႃႈ၊ဝႃႈၼင်ႇၼႆဢေႃႈ။
၁၈ ၶုၼ်ႁေႃၶမ်းဢိသရေႇလလၢတ်ႈတီႈယုဝ်ႇသၽတ်ႉလႄႈဝႃႈ၊-ၵဝ်လၢတ်ႈတီႈမႂ်းယဝ်ႉဢမ်ႇၸႂ်ႈႁိုဝ်။မၼ်းၼႆႉဢမ်ႇတွၼ်ႉႁေႃးလၢတ်ႈၵႂၢမ်းမၢင်ႇၵလႃႇလူၺ်ႈလွင်ႈၵဝ်။မၼ်းႁေႃးလၢတ်ႈၵႂၢမ်းမၢင်ႇၵလႃႇၵူၺ်းဢေႃႈ၊ဝႃႈၼင်ႇၼႆဢေႃႈ။
၁၉ မိၵ်ႉၶႃႇၵေႃႈသိုပ်ႇႁေႃးလႄႈဝႃႈ၊-ပိူဝ်ႈဢၼ်ပဵၼ်ၼင်ႇၼႆလႄႈၶႅၼ်းတေႃႈထွမ်ႇငိၼ်းဢမိင်ႉထႃႇဝရႃႉၽြႃးသေၵမ်းတီႈၶႃႈ။ၶႃႈၸဝ်ႈႁၼ်ထႃႇဝရႃႉၽြႃးၼင်ႈယူႇၵႃႈၼိူဝ်ပလၢင်ႇၸဝ်ႈလႄႈပူဝ်ႇပႃႇၵၢင်ႁၢဝ်တင်းသဵင်ႈတင်းလူင်ဢွၼ်ၵၼ်ၸုၵ်းယူႇၵႃႈတီႈၽၢႆႇၶႂႃၸဝ်ႈၵႃႈတီႈၽၢႆႇသၢႆႉၸဝ်ႈၼၼ်ႉတီႈၶႃႈယဝ်ႉ။
၂၀ ထႃႇဝရႃႉၽြႃးၵေႃႈထၢမ်လႄႈဝႃႈ၊-ၽူႈလႂ်တၵ်းတိုၵ်းယူင်းၸူဝ်းဢဝ်ဢႃႇႁပ်ႉႁႂ်ႈမၼ်းၶီႇသိုၵ်းၶိုၼ်ႈၸူးၵႃႈတီႈဝဵင်းရႃႇမုတ်ႉမိူင်းၵိလတ်ႉလႄႈသုမ်းၸွမ်း၊ဝႃႈၼင်ႇသေယဝ်ႉၶဝ်ၼၼ်ႉဢွၼ်ၵၼ်ၶိုၼ်းလဝ်ႈလၢတ်ႈယေႈၵေႃႉယေႈမဵဝ်း၊ယေႈၵေႃႉယေႈၼႄးဢေႃႈ။
၂၁ လၢႆးသမ်ႉဝိၺိၺ်ႇပႃးၼိုင်ႈမႃးလႄႈၸုၵ်းယူႇၵႃႈတီႈၽၢႆႇၼႃႈထႃႇဝရႃႉၽြႃးယူႇသေလႄႈလဝ်ႈလၢတ်ႈလႄႈဝႃႈ၊-ၶႃႈၸဝ်ႈတၵ်းတိုၵ်းယူင်းၸူဝ်းဢဝ်တီႈၶႃႈဢေႃႈ၊ဝႃႈၼင်ၼႆသေယဝ်ႉထႃႇဝရႃႉၽြႃးထၢမ်လႄႈဝႃႈ၊-တၵ်းႁဵတ်းၸိူဝ်ႉၼင်ႇႁိုဝ်သေလႄႈတိုၵ်းယူင်းၸူဝ်းဢဝ်မိူဝ်ႈဢၼ်ဝႃႈၼင်ႇၼႆၸိုင်
၂၂ မၼ်းၵေႃႈၶိုၼ်းလဝ်ႈလၢတ်ႈလႄႈဝႃႈ၊-ၶႃႈၸဝ်ႈတၵ်းၵႂႃႇလႄႈႁႂ်ႈလႆႈပဵၼ်ဝိၺိၺ်ႇဢၼ်ၸၢင်ႊလၢတ်ႈၵႂၢမ်းမူႉသႃႇၵႃႈၼႂ်းသူပ်းပရေႃးၽႅတ်ႈၶုၼ်လူင်ၵႃႈမီးၸိူဝ်းၼၼ်ႉၶႃႈဢေႃႈ၊ဝႃႈၼင်ႇၼႆသေယဝ်ႉ၊မၼ်းၸဝ်ႈမီးဢမိင်ႉလႄႈဝႃႈ၊-မႂ်းတၵ်းတိုၵ်းယူင်းၸူဝ်းဢဝ်မၼ်းလႄႈပေႉၼႅင်ႇဢေႃႈ။ၵႂႃႇလႄႈႁဵတ်းၸိူဝ်ႉၼင်ႇၼၼ်တႃႉ၊ဝႃႈၼင်ႇၼႆဢေႃႈ။
၂၃ ပိူဝ်ႈဢၼ်ပဵၼ်ၼင်ႇၼႆလႄႈထႃႇဝရႃႉၽြႃးဢဝ်ဝိၺိၺ်ႇဢၼ်ၸၢင်ႈလၢတ်ႈၵႂၢမ်းမူႉသႃႇၼၼ်ႉသႂၢင်းသႂ်ႇပၼ်ၵႃႈၼႂ်းသူပ်းပရေႃးၽႅတ်ႈၶုၼ်လူင်ၸိူဝ်းၼၼ်ႉယဝ်ႉ။ထႃႇဝရႃႉၽြႃးလၢတ်ႈၵႂၢမ်းဢႃႉမၢင်ႇၵလႃႇလူၺ်ႈလွင်ႈၶုၼ်လူင်တီႈၶႃႈယဝ်ႉ၊ဝႃႈၼင်ႇၼႆဢေႃႈ။
၂၄ မိူဝ်ႈၼၼ်ႉၸေႇတၵိလုၵ်ႈၸၢႆးၶေႇၼႃႇၼႃႇၼၼ်ႉသုတ်ႉၸပ်းသုတ်ႉၸူးလႄႈတူပ်းသႂ်ႇၵႅမ်ႈမိၵ်ႉၶႃႇသေလႄႈဝႃႈ၊-ဝိၺိၺ်ႇထႃႇဝရႃႉၽြႃးဢွၵ်ႇသေၵႃႈတီႈၵဝ်ၵႂႃႇသဵၼ်ႈတၢင်းသဵၼ်ႈလႂ်လႄႈႁႂ်ႈလႆႈလၢတ်ႈတေႃႇမႂ်း၊ဝႃႈၼင်ႇၼႆဢေႃႈ။
၂၅ မိၵ်ႉၶႃႇၵေႃႈလၢတ်ႈလႄႈဝႃႈ၊-မႂ်းတၵ်းလႆႈႁၼ်မိူဝ်ႉဝၼ်းဢၼ်မႂ်းၶဝ်ႈၵႃႈၼႂ်းလုၵ်းတင်းၼႂ်းႁႂ်ႈလႆႈတဵတ်ႇမႅပ်းယူႇၼၼ်ႉဢေႃႈ၊ဝႃႈၼင်ႇၼႆဢေႃႈ၊၊မိူဝ်ႈၼၼ်ႉၶုၼ်ႁေႃၶမ်းဢိသရေႇလၸီႇယၢင်ႇလႄႈဝႃႈ၊-
၂၆ ဢဝ်မိၵ်ႉၶႃႇၶိုၼ်းမိူဝ်းၵႂႃႇၸူးၵႃႈတီႈဢႃႇမုၼ်ႇၶုၼ်ဢုပ်ႉဝဵင်းၼၼ်ႉတင်းယေႃႇသလုၵ်ႈၸၢႆးၸဝ်ႈၼၼ်ႉသေယဝ်ႉသင်ႇလၢတ်ႈတီႈၶဝ်ဝႃႈ၊-ၶုၼ်ႁေႃၶမ်းမီးဢမိင်ႉၸမ်း၊-
၂၇ ဢွၼ်ၵၼ်ဢဝ်ၵေႃႉၼႆႉၶင်ဝႆႉၵႃႈၼႂ်းထွင်ႇလႄႈႁႂ်ႈမၼ်းၵိၼ်ၶဝ်ႈမုၼ်းတင်းၼမ်ႉလၢႆလၢႆတေႃႇထိုင်ႁွတ်ႈၵဝ်ၶိုၼ်းႁွတ်ႈမႃးၼိမ်ၼိမ်လီလီၼၼ်ႉတႃႉ၊ဝႃႈၼင်ႇၼႆဢေႃႈ။မိၵ်ႉၶႃႇၵေႃႈၶိုၼ်းလၢတ်ႈလႄႈဝႃႈ၊-
၂၈ လွင်ႈဢၼ်ၸဝ်ႈၶုၼ်လူင်တၵ်းလႆႈၶိုၼ်းႁွတ်ႈမႃးၼိမ်ၼိမ်လီလီၼၼ်ႉထႃႇဝရႃႉၽြႃးဢမ်ႇမီးဢမိင်ႉဝႆႉတီႈၵဝ်ၶႃႈ။ၵူၼ်းၵႃႈမီးတင်းသဵင်ႈတင်းလူင်ၶဝ်ဢိူၺ်း။ဢွၼ်ၵၼ်မၢတ်ႈတွင်းဝႆႉတႃႉ၊ဝႃႈၼင်ႇၼႆဢေႃႈ။
ဢႃႇႁပ်ႉတၢႆတီႈဝဵင်းရႃႇမုတ်ႉ
၂၉ ၼင်ႇၼၼ်လႄႈၶုၼ်ႁေႃၶမ်းဢိသရေႇလတင်းယုဝ်ႇသၽတ်ႉၶုၼ်ႁေႃၶမ်းယုတၼၼ်ႉဢွၼ်ၵၼ်ၶီႇသိုၵ်းၶိုၼ်ႈၸူးၵႃႈတီႈဝဵင်းရႃႇမုတ်ႉမိူင်းၵိလတ်ႉဢေႃႈ။
၃၀ ၶုၼ်ႁေႃၶမ်းဢိသရေႇလလၢတ်ႈတီႈယုဝ်ႇသၽတ်ႉလႄႈဝႃႈ၊-ၵဝ်တၵ်းယႃႉႁၢင်ႊၽၢင်ၵဝ်သေလႄႈၶဝ်ႈၼႂ်းပွႆးသိုၵ်းဢေႃႈ။မႂ်းသမ်ႉၼုင်ႈမႆႊႁၢင်ႈၶိူင်ႈၶူဝ်းၼုင်ႈၶူဝ်းမႆႊၶုၼ်သေၵမ်း၊ဝႃႈၼင်ႇၼႆသေယဝ်ႉ၊ၶုၼ်ႁေႃၶမ်းဢိသရေႇလၼၼ်ႉယႃႉႁၢင်ႊၽၢင်မၼ်းသေလႄႈၶဝ်ႈၵႃႈၼႂ်းပွႆးသိုၵ်းဢေႃႈ။
၃၁ ၵွပ်ႈပိူဝ်ႈဢၼ်ၶုၼ်ႁေႃၶမ်းသုရိသင်ႇလၢတ်ႈဝႆႉတီႈႁူဝ်သိုၵ်းသၢမ်သိပ်းပၢႆသွင်ၵေႃႉဢၼ်ဢုပ်ႉၵႃႈၼိူဝ်ႁူဝ်ႁၢၼ်ၵူၼ်းသိုၵ်းၶီႇလေႃႉရထႃးၸိူဝ်းၼၼ်ႉဝႆႉလႄႈဝႃႈၼွၵ်ႈသေၶုၼ်ႁေႃၶမ်းဢိသရေႇလၼၼ်ႉယႃႇပေတိုၵ်းတေႃးၵူၼ်းလူင်ၵူၼ်းဢွၼ်ႇသေၵေႃႉသေၵူၼ်း၊ဝႃႈၼင်ႇၼႆၼၼ်ႉလႄႈမိူဝ်ႈဢၼ်ႁူဝ်သိုၵ်းဢၼ်ဢုပ်ႉၵႃႈၼိူဝ်ႁူဝ်ႁၢၼ်ၵူၼ်းသိုၵ်းၶီႇလေႃႉရထႃးၸိူဝ်းၼၼ်ႉႁၼ်ယုဝ်ႇသၽတ်ႉၼၼ်ႉၸိုင်ၶဝ်လၢတ်ႈလႄႈဝႃႈ၊-
၃၂ ၵေႃႉၼၼ်ႉတၵ်းပဵၼ်ၶုၼ်ႁေႃၶမ်းဢိသရေႇလဢမၢၼ်ႇၶၢၼ်ပဵၼ်ဢေႃႈ၊ဝႃႈၼင်ႇၼႆသေလႄႈဢွၼ်ၵၼ်ဢုမ်ႇမႃးႁႂ်ႈလႆႈတိုၵ်းတေႃးမၼ်းလႄႈယုဝ်ႇသၽတ်ႉၵေႃႈႁွင်ႉသႅၼ်ႇဢေႃႈ။
၃၃ မိူဝ်ႈဢၼ်ႁူဝ်သိုၵ်းဢၼ်ဢုပ်ႉၵႃႈၼိူဝ်ႁူဝ်ႁၢၼ်ၵူၼ်းသိုၵ်းၶီႇလေႃႉရထႃးၸိူဝ်းၼၼ်ႉႁူႉႁၼ်လွင်ႈဢၼ်ဝႃႈဢမ်ႇၸႂ်ႈၶုၼ်ႁေႃၶမ်းဢိသရေႇလၼၼ်ႉၸိုင်ၶဝ်ယင်းဢမ်ႇဢုမ်ႇၸွမ်းမၼ်းလႄႈဢွၼ်ၵၼ်ဝႄႈပိူင်ႈမၼ်းသေဢေႃႈ။
၃၄ ၵူၼ်းၵေႃႉၼိုင်ႈယင်းဢမ်ႇယိူင်းၸူးလႄႈဢဝ်ၵၢင်ႇမၼ်းယိုဝ်းလႄႈတိူဝ်ႉထုၵ်ႇမႅၼ်ႈသႂ်ႇၵႃႈတီႈၵႄႈပွင်ႇသိူဝ်ႈၶႅပ်းလဵၵ်းၶုၼ်ႁေႃၶမ်းဢိသရေႇလၼၼ်ႉသေဢေႃႈ။မၼ်းလၢတ်ႈတီႈၵေႃႉဢၼ်ထိင်းလေႃႉရထႃးမၼ်းၼၼ်ႉလႄႈဝႃႈ၊-ဢဝ်ၵဝ်ဝၢႆႇၶိုၼ်းလႄႈဢွၵ်ႇသေၵႃႈၼႂ်းပွႆးတိုၵ်းသိုၵ်းၼႆႉတႃႉ။ၵဝ်လႆႈၶၢမ်ႇတၢင်းဢၼ်တိူဝ်ႉမၢတ်ႇၸဵပ်းၼႃႇလူင်လၢင်ယဝ်ႉ၊ဝႃႈၼင်ႇၼႆဢေႃႈ။
၃၅ ၼႂ်းဝၼ်းၼၼ်ႉတၢင်းဢၼ်တိုၵ်းတေႃးၵၼ်ၼၼ်ႉယိင်ႈၶႅၼ်းယႂ်ႇမႃးတူဝ်းမႃးယူႇဢေႃႈ။ၶုၼ်ႁေႃၶမ်းၼၼ်ႉဢိင်ၵူၼ်းယူႇၵႃႈၼႂ်းလေႃႉရထႃးၸဝ်ႈသေလႄႈၼင်ႈယူႇၽၢႆႇၼိုင်ႈတင်းၵူၼ်းသုရိၸိူဝ်းၼၼ်ႉလႄႈမိူဝ်ႈၶိင်ႇႁူဝ်ၶမ်ႈဢသၢၵ်ႈၸဝ်ႈသဵင်ႈသေဢေႃႈ။လိူတ်ႈၵႃႈတီႈႁွႆးဢၼ်တိူဝ်ႉမၢတ်ႇၼၼ်ႉယွတ်ႇႁူဝ်ႈတူၵ်းသႂ်ႇၵႃႈတီႈပိုၼ်ႉလေႃႉရထႃးၸဝ်ႈဢေႃႈ။
၃၆ မိူဝ်ႈဢၼ်ၵၢင်ဝၼ်းတူၵ်းၼၼ်ႉၸိုင်ၶဝ်ႁွင်ႉပၢဝ်ႇႁွင်ႉသေႃႇတင်းတပ်ႉလႄႈဝႃႈ၊-ၵူၼ်းၵူႈၵေႃႉၶဝ်ဢိူၺ်း။ဢွၼ်ၵၼ်ၶိုၼ်းမိူဝ်းၵႂႃႇၵႃႈတီႈဝဵင်းၽႂ်ဝဵင်းမၼ်းတႃႉ။
၃၇ ဢွၼ်ၵၼ်ၶိုၼ်းမိူဝ်းၵႃႈတီႈမိူင်းၽႂ်မိူင်းမၼ်းတႃႉ၊ဝႃႈၼင်ႇၼႆဢေႃႈ။ၼင်ႇၼၼ်လႄႈၶုၼ်ႁေႃၶမ်းတၢႆလႄႈဢဝ်မၼ်းမႃးၵႃႈတီႈဝဵင်းသမႃႇရိသေယဝ်ႉ၊ဢဝ်ၶုၼ်ႁေႃၶမ်းသၢင်းၵျူဝ်ႇၵႃႈၼႂ်းဝဵင်းသမႃႇရိဢေႃႈ။
၃၈ ၶဝ်ဢဝ်လေႃႉရထႃးၸဝ်ႈသုၵ်ႈလၢင်ႉၵႃႈတီႈၼမ်ႉၼွင်ဝဵင်းသမႃႇရိၼၼ်ႉလႄႈမႃတင်းလၢႆဢွၼ်ၵၼ်လေးၵိၼ်လိူတ်ႈမၼ်းၼၼ်ႉမႅၼ်ႈၸွမ်းၵႃႈၼင်ႇၵႂၢမ်းဢၼ်ထႃႇဝရႃႉၽြႃးမီးဢမိင်ႉဝႆႉၼၼ်ႉဢေႃႈ။မေႈမွၵ်ႇယႃႈတင်းလၢႆၵေႃႈဢၢပ်ႇၼမ်ႉၵႃႈတီႈၼၼ်ႉဢေႃႈ။
၃၉ လွင်ႈတၢင်းဢႃႇႁပ်ႉဢၼ်ယင်းၵိုတ်းယင်းၵျၢၼ်ႇဢိၵ်ႇတင်းလွင်ႈႁေႃငႃးၸၢင်ႉဢၼ်မၼ်းတႄႇႁဵတ်းတင်းဝဵင်းဢၼ်မၼ်းမႄးၵုမ်းမႄးႁဵတ်းၸိူဝ်းၼၼ်ႉၸိုင်တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇဢိသရေႇလဢေႃႈ။
၄၀ ဢႃႇႁပ်ႉၼၼ်ႉၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈဢႃႇၶၸိလုၵ်ႈၸၢႆးၸဝ်ႈၼၼ်ႉၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။
ယုဝ်ႇသၽတ်ႉၶုၼ်ႁေႃၶမ်းယုတ
၄၁ ၼႂ်းပီႊဢၼ်ၶုၼ်ႁေႃၶမ်းဢိသရေႇလၸၢမ်ႇႁၢင်ႈၸၢမ်ႇႁေႃသီႇပီႊၼၼ်ႉယုဝ်ႇသၽတ်ႉလုၵ်ႈၸၢႆးၸဝ်ႈဢႃႇသၸႃႉၼင်ႈႁၢင်ႈၼင်ႈႁေႃဢေႃႈ။
၄၂ ယုဝ်ႇသၽတ်ႉၼၼ်ႉမိူဝ်ႈဢၼ်ဢသၢၵ်ႈမၼ်းလႆႈသၢမ်သိပ်းပၢႆႁႃႈပီႊၼၼ်ႉမၼ်းၸႃႉၼင်ႈႁၢင်ႈၼင်ႈႁေႃလႄႈဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်းယေႇရုသလႅမ်ႇသၢဝ်းႁႃႈပီႊဢေႃႈ။ၸိုဝ်ႈသဵင်မေးၸဝ်ႈၸမ်းပဵၼ်ဢၸုၽလုၵ်ႈယိင်းသိလႁိဢေႃႈ။
၄၃ မၼ်းၼၼ်ႉဢမ်ႇဝႄႈပိူင်ႈသသေဵၼ်ႈတၢင်းဢၼ်ဢႃႇသၸဝ်ႈပေႃႈမၼ်းၸွမ်းၼၼ်ႉ။မၼ်းၸွမ်းတင်းသဵင်ႈတင်းမူတ်းယူႇသေလႄႈႁဵတ်းဢၼ်လီဢၼ်ငၢမ်းသိုဝ်ႈၼႃႈတႂ်ႈတႃထႃႇဝရႃႉၽြႃးဢေႃႈ။ၼႂ်းဝႃႈၼၼ်သေၵေႃႈမၼ်းဢမ်ႇပႄႇၽဵဝ်ႈထႃႇၼႃႉတီႈသုင်တင်းလၢႆပႅတ်ႈ။ၵူၼ်းတင်းလၢႆဢွၼ်ၵၼ်ပုၵ်ႉၸေႃႇယိၸ်ႉလႄႈဢဝ်ၽႆးတုတ်ႇၼၢမ်ႇသႃႇတီႈထႃႇၼႃႉတီႈသုင်ၸိူဝ်းၼၼ်ႉယူႇဢေႃႈ။
၄၄ ယုဝ်ႇသၽတ်ႉၼၼ်ႉႁႂ်ႈသိုၵ်းထၢတ်ႇသိုၵ်းယဵၼ်သေလႄႈႁဵတ်းမိၵ်ႈသႁႃႇယႃႉလူၺ်ႈၵၼ်တင်းၶုၼ်ႁေႃၶမ်းဢိသရေႇလဢေႃႈ။
၄၅ လွင်ႈတၢင်းယုဝ်ႇသၽတ်ႉဢၼ်ယင်းၵိုတ်းယင်းၵျၢၼ်ႇလွင်ႈတၢင်းဢၼ်မၼ်းႁဵတ်းပဵၼ်မႃးလွင်ႈတၢင်းဢၼ်မၼ်းတိုၵ်းသိုၵ်းလႂ်ၸိူဝ်းၼၼ်ႉၸိုင်တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇယုတဢေႃႈ။
၄၆ ၵူၼ်းၸၢႆးၼင်ႇၵၼ်ဢၼ်ၸၢင်ႊႁဵတ်းၵႅင်ႈတေႃႇၵၼ်ဢၼ်ယင်းၵိုတ်းယင်းၵျၢၼ်ႇဝႆႉၼႂ်းၸူဝ်ႈပၢၼ်ဢႃႇသၸဝ်ႈပေႃႈမၼ်းၸိူဝ်းၼၼ်ႉၵေႃႈမၼ်းဢဝ်ပႄႇၽဵဝ်ႈပႅတ်ႈသေၵႃႈၼႂ်းမိူင်းၸဝ်ႈဢေႃႈ။
၄၇ ၶိင်ႇမိူဝ်ႈၼၼ်ႉဢမ်ႇမီးၶုၼ်ႁေႃၶမ်းၵႃႈၼႂ်းမိူင်းဢေႇတုင်ႇ။မီးၶုၼ်ဢၼ်တၢင်တူဝ်မၼ်းၵူၺ်းဢေႃႈ။ယုဝ်ႇသၽတ်ႉၼၼ်ႉႁဵတ်းႁိူဝ်းသၢင်းၽေႃးတႃႇသုတင်းလၢႆႁႂ်ႈလႆႈၵႂႃႇၵႃႈတီႈမိူင်းဢေႃႇၽိရလႄႈဢဝ်ၶမ်းမႃးဢေႃႈ။
၄၈ ၵူၺ်းၵႃႈၵွပ်ႈပိူဝ်ႈဢၼ်ႁိူဝ်းလူႉၵႃႈတီႈဢေႇၸယုၼ်ႇၵႃႇပႃႇၼၼ်ႉလႄႈဢမ်ႇလႆႈၵႂႃႇ။
၄၉ မိူဝ်ႈၼၼ်ႉဢႃႇၶၸိလုၵ်ႈၸၢႆးၸဝ်ႈဢႃႇႁပ်ႉၼၼ်ႉယွၼ်းဢၶႂၢင်ႉတီႈယုဝ်ႇသၽတ်ႉလႄႈဝႃႈ၊-ႁႂ်ႈၶႃႈၵူၼ်းၵဝ်ၶႃႈတင်းလၢႆလႆႈၶီႇႁိူဝ်းသၢင်းၽေႃးလူၺ်ႈၵၼ်တင်းၶႃႈၵူၼ်းလူင်သေၵမ်း၊ဝႃႈၼင်ႇၼႆသေၵေႃႈယုဝ်ႇသၽတ်ႉဢမ်ႇပၼ်ဢၶႂၢင်ႉ။
၅၀ ယုဝ်ႇသၽတ်ႉၼၼ်ႉၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈၶၢမ်ႇတၢင်းဢၼ်သၢင်းၵျူဝ်ႇလူၺ်ႈၵၼ်တင်းပူႇမွၼ်ႇမၼ်းၸိူဝ်းၼၼ်ႉၵႃႈၼႂ်းဝဵင်းၸဝ်ႈပေႃႈမၼ်းတႃႇဝိတ်ႉၼၼ်ႉဢေႃႈ။ယႁေႃႇရမ်ႇလုၵ်ႈၸၢႆးၸဝ်ႈၼၼ်ႉၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။
ဢႃႇၶၸိၶုၼ်ႁေႃၶမ်းဢိသရေႇလ
၅၁ ၼႂ်းပီႊဢၼ်ယုဝ်ႇသၽတ်ႉၶုၼ်ႁေႃၶမ်းယုတၸၢမ်ႇႁၢင်ႈၸၢမ်ႇႁေႃသိပ်းၸဵတ်းပီႊၼၼ်ႉဢႃႇၶၸိလုၵ်ႈၸၢႆးၸဝ်ႈဢႃႇႁပ်ႉၸႃႉၼင်ႈႁၢင်ႈၼင်ႈႁေႃမိူင်းဢိသရေႇလၵႃႈၼႂ်းဝဵင်းသမႃႇရိလႄႈဢုပ်ႉပိူင်ႇၸၢမ်ႇၸႃးမိူင်းဢိသရေႇလသွင်ပီႊဢေႃႈ။
၅၂ မၼ်းၼၼ်ႉႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးလႄႈၸွမ်းသဵၼ်ႈတၢင်းၸဝ်ႈပေႃႈမၼ်းဢိၵ်ႇတင်းသဵၼ်ႈတၢင်းမေႈမၼ်း၊တင်းသဵၼ်ႈတၢင်းဢၼ်ယေႇရူဝ်းပုမ်ႇလုၵ်ႈၸၢႆးၼေႇပတ်ႉဢၼ်ႁႂ်ႈမဵဝ်းဢိသရေႇလၽိတ်းပိူင်ႈၸွမ်းၼၼ်ႉဢေႃႈ။
၅၃ မၼ်းႁဵတ်းဝၢတ်ႈၵူဝ်းၵႂၢႆႇၽြႃးပႃႇလလႄႈတိုၵ်းယူင်းတၢင်းၸႂ်မႆႈၶႆႈၸႃႉထႃႇဝရႃႉၽြႃးပဵၼ်ၸဝ်ႈမဵဝ်းဢိသရေႇလၸွမ်းၵႃႈၼင်ႇဢၼ်ၸဝ်ႈပေႃႈမၼ်းၵမ်ၵျၢင်ႉၼၼ်ႉဢေႃႈ။