Chapter
၁၈
ဢေးလိယတင်းဢေႃႇပတိ
၁ မိူဝ်ႈဝၼ်းပူၼ်ႉၵႂႃႇၼမ်ၼႃႇသေယဝ်ႉၼုၵ်ႉၵပၢတ်ႈထႃႇဝရႃႉၽြႃးႁွတ်ႈမႃးတီႈဢေးလိယၼႂ်းပီႊဢၼ်ထူၼ်ႈထိုင်သၢမ်ပီႊၼၼ်ႉလႄႈဝႃႈ၊-မႂ်းၵႂႃႇလႄႈၼႄပျႃႉတူဝ်မႂ်းတီႈဢႃႇႁပ်ႉတႃႉ။
၂ ၵဝ်တၵ်းႁႂ်ႈၽူၼ်တူၵ်းၵႃႈၼိူဝ်လိၼ်မိူင်းဢေႃႈ၊ဝႃႈၼင်ႇၼႆလႄႈ၊ဢေးလိယၵႂႃႇႁႂ်ႈလႆႈၼႄပျႃႉတူဝ်မၼ်းတီႈဢႃႇႁပ်ႉဢေႃႈ။
၃ ၵွပ်ႈပိူဝ်ႈဢၼ်မီးၽေးတၢင်းဢၼ်ၶဝ်ႈၵႃႈမၢၵ်ႇပႅင်းဢိုပ်းယၢၵ်ႈတၢင်းၵိၼ်တၢင်းၶူပ်းၼႃႇလူင်လၢင်ၵႃႈတီႈဝဵင်းသမႃႇရိၼၼ်ႉလႄႈဢႃႇႁပ်ႉၼၼ်ႉႁွင်ႉဢဝ်ဢေႃႇပတိၵေႃႉဢၼ်ဢုပ်ႉၵႃႈၼိူဝ်ႁေႃၸဝ်ႈၼၼ်ႉၵႂႃႇၵႃႈတီႈမၼ်းဢေႃႈ။ဢေႃႇပတိၼၼ်ႉပဵၼ်ၵေႃႉဢၼ်ရူဝ်ႇသေႇၵူဝ်ယမ်ထႃႇဝရႃႉၽြႃးၼႃႇလူင်လၢင်ဢေႃႈ။
၄ လွင်ႈမၼ်းၸမ်းမိူဝ်ႈဢၼ်ယေႇၸပေႇလပႄႇၽဵဝ်ႈပရေႃးၽႅတ်ႈထႃႇဝရႃႉၽြႃးတင်းလၢႆပႅတ်ႈၼၼ်ႉဢေႃႇပတိၼၼ်ႉဢဝ်ပရေႃးၽႅတ်ႈပၢၵ်ႇၼိုင်ႈသိူင်ႇဝႆႉၵႃႈၼႂ်းႁူးထမ်ႈယေႈႁူးႁႃႈသိပ်းသေယဝ်ႉဢဝ်ၶဝ်ႈမုၼ်းတင်းၼမ်ႉပၼ်လႄႈလဵင်ႉလူၶဝ်ဢေႃႈ။
၅ ဢႃႇႁပ်ႉၵေႃႈလၢတ်ႈတီႈဢေႃႇပတိၼၼ်ႉလႄႈဝႃႈ၊-လႄႇလဵပ်ႈၵႃႈၼႂ်းတင်းမိူင်းလႄႈၵႂႃႇၵႃႈတီႈဢၼ်မီးၼမ်ႉႁူးၵႃႈမီးဢိၵ်ႇတင်းၼမ်ႉႁွင်ႊၵႃႈမီးၼၼ်ႉတႃႉ။ၸၢင်ႊၶေးတၵ်းထူပ်းတူၼ်ႈယိူဝ်ႈတူၼ်ႈယႃႈလႄႈဢသၢၵ်ႈမႃႉလႂ်တင်းမႃႉလီႈလႂ်တၵ်းၶျၢမ်းသႃႇလႄႈႁဝ်းဢမ်ႇလႆႈသုမ်းတရိၵ်ႈသၢၼ်ႇၵႃႈမီးၼၼ်ႉဢေႃႈ၊ဝႃႈၼင်ႇၼႆဢေႃႈ။
၆ ၶဝ်ၵေႃႈၽႄမႅင်ႇပၼ်ၵၼ်ၼႃႈလိၼ်ၼႂ်းမိူင်းၸဝ်ႈၼၼ်ႉႁႂ်ႈပေႃးၸွတ်ႇတူဝ်ႈၵႂႃႇတင်းမိူင်းလႄႈဢႃႇႁပ်ႉၸွမ်းသဵၼ်ႈတၢင်းသဵၼ်ႈၼိုင်ႈဢေႃႇပတိၸွမ်းသဵၼ်ႈတၢင်းသဵၼ်ႈၼိုင်ႈလႄႈၵႂႃႇႁႃႁင်းၽႂ်ႁင်းမၼ်းဢေႃႈ။
၇ ၼႂ်းမိူဝ်ႈဢၼ်ဢေႃႇပတိယင်းတိုၵ်ႉၸွမ်းတၢင်းယူႇၼၼ်ႉၸိုင်ဢေးလိယႁူပ်ႉထူပ်းမၼ်းဢေႃႈ။ဢေႃႇပတိႁူႉၸၵ်းမၼ်းလႄႈၶုပ်ႉမူပ်ႇဝၢင်းႁူဝ်တီႈမၼ်းသေလႄႈထၢမ်လႄႈဝႃႈ၊-
၈ ၸဝ်ႈႁဝ်းပဵၼ်ၸဝ်ႈၵဝ်ၶႃႈဢေးလိယၼၼ်ႉတႄႉႁိုဝ်၊ဝႃႈၼင်ႇၼႆလႄႈဢေးလိယၵေႃႈၶိုၼ်းလၢတ်ႈတီႈမၼ်းလႄႈဝႃႈ၊-ပဵၼ်ၵဝ်ၼႆႉယဝ်ႉ။မႂ်းၵႂႃႇလဝ်ႈလၢတ်ႈလွင်ႈဢၼ်ဢေးလိယႁွတ်ႈမႃးမီးၵႃႈတီႈၼႆႉၼၼ်ႉတီႈၸဝ်ႈမႂ်းတႃႉ၊မိူဝ်ႈဢၼ်ဝႃႈၼင်ႇၼႆၸိုင်မၼ်းၵေႃႈလၢတ်ႈလႄႈဝႃႈ၊-
၉ ၶႃႈၸဝ်ႈႁဝ်းၼႆႉမီးတၢင်းၽိတ်းၸိူဝ်ႉၼင်ႇႁိုဝ်လႄႈတၵ်းဢဝ်ၶႃႈၸဝ်ႈႁဝ်းဢၢပ်ႈပၼ်ၵႃႈၼႂ်းမိုဝ်းဢႃႇႁပ်ႉႁႂ်ႈၶႃႈၸဝ်ႈလႆႈတၢႆၶႃႈ။
၁၀ ၵႃႈၼင်ႇဢၼ်ထႃႇဝရႃႉၽြႃးၽြႃးပဵၼ်ၸဝ်ႈၸဝ်ႈႁဝ်းဢသၢၵ်ႈလိပ်းယူႇၼၼ်ႉသိုင်ႇၸိုင်ႈဝၢၼ်ႈမိူင်းဢဝ်ၸဝ်ႈၵဝ်ၶႃႈဢမ်ႇပွႆႇၸႂ်ႉၵႂႃႇႁႂ်ႈလႆႈႁႃၸဝ်ႈႁဝ်းၼၼ်ႉဢမ်ႇမီးသသေိုင်ႇသမေိူင်းၶႃႈ။မိူဝ်ႈဢၼ်ၶဝ်လဝ်ႈလၢတ်ႈလႄႈဝႃႈ၊-ဢေးလိယဢမ်ႇမီးၵႃႈတီႈၼႆႉၶႃႈ၊ဝႃႈၼင်ႇၼႆၸိုင်၊မၼ်းၵိၼ်ႇဝႃႈတီႈဝၢၼ်ႈမိူင်းၸိူဝ်းၼၼ်ႉလူၺ်ႈလွင်ႈဢၼ်ၶဝ်ဢမ်ႇထူပ်းဢမ်ႇႁၼ်ၸဝ်ႈႁဝ်းၼၼ်ႉၶႃႈဢေႃႈ။
၁၁ မိူဝ်ႈလဵဝ်ၼႆႉၸမ်းၸဝ်ႈႁဝ်းမီးဢမိင်ႉႁႂ်ႈၵဝ်ၶႃႈၵႂႃႇလဝ်ႈလၢတ်ႈတီႈၸဝ်ႈၵဝ်ၶႃႈလႄႈဝႃႈ၊-ဢေးလိယမီးယူႇၵႃႈတီႈၼႆႉၶႃႈဢေႃႈ၊ဝႃႈၼင်ႇၼႆလူင်ပေႇ။
၁၂ မိူဝ်ႈဢၼ်ၵဝ်ၶႃႈဢွၵ်ႇသေၵႃႈတီႈၸဝ်ႈႁဝ်းၵႂႃႇၼၼ်ႉဝိၺိၺ်ႇထႃႇဝရႃႉၽြႃးတၵ်းဢဝ်ၸဝ်ႈႁဝ်းၵႂႃႇၵႃႈတီႈဢၼ်ၵဝ်ၶႃႈဢမ်ႇႁူႉၼၼ်ႉလႄႈမိူဝ်ႈဢၼ်ၶုၼ်ဢႃႇႁပ်ႉႁွတ်ႈထိုင်မႃးလႄႈမၼ်းဢမ်ႇထူပ်းဢမ်ႇႁၼ်ၸဝ်ႈႁဝ်းၼၼ်ႉၸိုင်မၼ်းတၵ်းဢဝ်ၵဝ်ၶႃႈတၢႆၶႃႈဢေႃႈ။ၸဝ်ႈႁဝ်းႁူႉယူႇၵဝ်ၶႃႈရူဝ်ႇသေႇၵူဝ်ယမ်ထႃႇဝရႃႉၽြႃးၸဵမ်မိူဝ်ႈဢၼ်ဢသၢၵ်ႈယင်းလဵၵ်ႉယင်းဢွၼ်ႇၼၼ်ႉယူႇၶႃႈဢေႃႈ။
၁၃ ပိူၼ်ဢမ်ႇမွၵ်ႇလၢတ်ႈတီႈၸဝ်ႈႁဝ်းလွင်ႈတၢင်းထႃႇဝရႃႉၽြႃးဢၼ်ၵဝ်ၶႃႈႁဵတ်းၼႂ်းမိူဝ်ႈဢၼ်ယေႇၸပေႇလဢဝ်ပရေႃးၽႅတ်ႈထႃႇဝရႃႉၽြႃးတင်းလၢႆတၢႆၼၼ်ႉၶႃႈႁိူဝ်။ၵဝ်ၶႃႈဢဝ်ပရေႃးၽႅတ်ႈထႃႇဝရႃႉၽြႃးပၢၵ်ႇၼိုင်ႈသိူင်ႇဝႆႉၼႂ်းႁူးထမ်ႈယေႈႁူးႁႃႈသိပ်းသေလႄႈဢဝ်ၶဝ်ႈမုၼ်းတင်းၼမ်ႉလဵင်ႉလူၶဝ်ၼၼ်ႉၶႃႈဢေႃႈ။
၁၄ မိူဝ်ႈလဵဝ်ၼႆႉၸမ်းၸဝ်ႈႁဝ်းမီးဢမိင်ႉႁႂ်ႈၵဝ်ၶႃႈၵႂႃႇလဝ်ႈလၢတ်ႈတီႈၸဝ်ႈၵဝ်ၶႃႈဝႃႈ၊ဢေးလိယမီးယူႇၵႃႈတီႈၼႆႉတီႈၶႃႈဢေႃႈ၊ဝႃႈၼင်ႇၼႆလူင်ပေႇ။
၁၅ မၼ်းတၵ်းဢဝ်ၵဝ်ၶႃႈတၢႆၶႃႈဢေႃႈ၊ဝႃႈၼင်ႇၼႆဢေႃႈ။ဢေးလိယၵေႃႈၶိုၼ်းလၢတ်ႈလႄႈဝႃႈ၊-ၵႃႈၼင်ႇဢၼ်ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးဢၼ်ၵဝ်ၵူဝ်းၵႂၢႆႇယူႇၼၼ်ႉဢသၢၵ်ႈယင်းလိပ်းယူႇၼၼ်ႉ
၁၆ ၵဝ်တၵ်းၼႄပျႃႉတူဝ်ၵဝ်တီႈမၼ်းဝၼ်းမိူဝ်ႈၼႆႉဢမၢၼ်ႇၶၢၼ်ပဵၼ်ဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်ဢေႃႇပတိၼၼ်ႉၵႂႃႇထူပ်းဢႃႇႁပ်ႉလႄႈလဝ်ႈလၢတ်ႈဢေႃႈ။ဢႃႇႁပ်ႉၵေႃႈၵႂႃႇႁႂ်ႈလႆထူပ်းဢေးလိယဢေႃႈ။
ဢေးလိယၵႃႈၼိူဝ်လွႆၵရမေႇရ
၁၇ မိူဝ်ႈဢၼ်ဢႃႇႁပ်ႉထူပ်းႁၼ်ဢေးလိယၼၼ်ႉၸိုင်ဢႃႇႁပ်ႉထၢမ်လႄႈဝႃႈ၊-ပဵၼ်မႂ်းၼႆႉႁိုဝ်ၵေႃႉဢၼ်ယႃႉယူၵ်ႉမဵဝ်းဢိသရေႇလၼၼ်ႉ၊ဝႃႈၼင်ႇၼႆဢေႃႈ။
၁၈ မၼ်းၶိုၼ်းလၢတ်ႈလႄႈဝႃႈ၊-ၶႃႈၸဝ်ႈဢမ်ႇယႃႉယူၵ်ႉမဵဝ်းဢိသရေႇလတီႈၶႃႈ။ၸဝ်ႈႁဝ်းတင်းမဵဝ်းၸိူဝ်ႉၶိူဝ်းၸဝ်ႈႁဝ်းၸုၼ်ႉပႅတ်ႈပိင်းၺၢပ်ႈထႃႇဝရႃႉၽြႃးသေလႄႈၸွမ်းလင်ၽြႃးပႃႇလလႄႈယႃႉယူၵ်ႉမဵဝ်းဢိသရေႇလတီႈၶႃႈယဝ်ႉ။
၁၉ ပိူဝ်ႈၼႆလႄႈမိူဝ်ႈလဵဝ်ၼႆႉႁႂ်ႈၵူၼ်းမဵဝ်းဢိသရေႇလတင်းသဵင်ႈတင်းလူင်ဢိၵ်ႇတင်းပရေႃးၽႅတ်ႈပႃႇလသီႇပၢၵ်ႇပၢႆႁႃႈသိပ်းတင်းပရေႃးၽႅတ်ႈဢႃႇသရသီႇပၢၵ်ႇဢၼ်ၵိၼ်ၵႃႈတီႈၶူင်ႇတီႈၵိၼ်ယေႇၸပေႇလၸိူဝ်းၼၼ်ႉမႃးၸူႉၵၼ်တုမ်ၵၼ်ၵႃႈတီႈၶႃႈၸဝ်ႈၵႃႈၼိူဝ်လွႆၵရမေႇလၼၼ်ႉသေၵမ်းၶႃႈ၊
၂၀ ဝႃႈၼင်ႇၼႆလႄႈဢႃႇႁပ်ႉပွႆႇၸႂ်ႉၵူၼ်းမဵဝ်းဢိသရေႇလတင်းသဵင်ႈတင်းလူင်ဢိၵ်ႇတင်းပရေႃးၽႅတ်ႈၸိုဝ်းၼၼ်ႉၸူႉၵၼ်တုမ်ၵၼ်ၵႃႈၼိူဝ်လွႆၵရမေႇလဢေႃႈ။
၂၁ ဢေးလိယၼၼ်ႉမႃးၸူးတီႈဢၼ်ၵူၼ်းတင်းသဵင်ႈတင်းလူင်မီးၼၼ်ႉသေယဝ်ႉလၢတ်ႈလႄႈဝႃႈ၊-သူတၵ်းမီးၸႂ်ဢၼ်ယုမ်ႇၶိုင်ႈၼိုင်ႈဢမ်ႇယုမ်ႇၶိုင်ႈၼိုင်ႈသေလႄႈယူႇၵႃႈၼႂ်းၵႄႈဝူင်ႈၵၢင်ၽႃႇသႃႇသွင်ပႃးၼႆႉၶိင်ႇၵႃႇလႃႉႁိုင်ၵႃႈႁိုဝ်။ပေႃးထႃႇဝရႃႉၽြႃးၸႂ်ႈၽြႃးပဵၼ်ၸဝ်ႈတႄႉၸိုင်ဢွၼ်ၵၼ်ပိုင်ႈဢိင်ၵူဝ်းၵႂၢႆႇမၼ်းၸဝ်ႈတႃႉ။ပေႃးၽြႃးပႃႇလၸႂ်ႈၽြႃးပဵၼ်ၸဝ်ႈတႄႉၸိုင်ဢွၼ်ၵၼ်ဢိင်ပိုင်ႈၵူဝ်းၵႂၢႆႇၽြႃးၼၼ်ႉတႃႉ၊ဝႃႈၼင်ႇၼႆဢေႃႈ။
၂၂ ၵူၼ်းၸိူဝ်းၼၼ်ႉယင်းဢမ်ႇၶိုၼ်းလၢတ်ႈၵႂၢမ်းသေၶေႃႈသေၵမ်းလႄႈယူႇဢေႃႈ။မိူဝ်ႈၼၼ်ႉဢေးလိယလၢတ်ႈတီႈၵူၼ်းၸိူဝ်းၼၼ်ႉထႅင်ႈလႄႈဝႃႈ၊-ပရေႃးၽႅတ်ႈထႃႇဝရႃႉၽြႃးၸမ်းၵိုတ်းၵျၢၼ်ႇဝႆႉၵဝ်ၵေႃႉလဵဝ်ၵူၺ်းဢေႃႈ။
၂၃ ပရေႃးၽႅတ်ႈပႃႇလၸမ်းမီးသီႇပၢၵ်ႇပၢႆႁႃႈသိပ်းဢေႃႈ။ဢွၼ်ၵၼ်ပၼ်ဝူဝ်းသွင်တူဝ်တီႈႁဝ်းတႃႉ။ႁႂ်ႈၶဝ်လိူၵ်ႈၵဵပ်းဢဝ်ဝူဝ်းတူဝ်ၼိုင်ႈပုၼ်ႈၶဝ်လႄႈတႅပ်းႁဵတ်းပွတ်းႁဵတ်းတွၼ်ႈသေယဝ်ႉဢဝ်တၢင်ႇသႂ်ႇၵႃႈၼိူဝ်ၽိုၼ်းတႃႉ။ယႃႇပေဢဝ်ၽႆးသႂ်ႇၽႆးၸပ်း။
၂၄ ၵဝ်ၵေႃႈတၵ်းဢဝ်ဝူဝ်းတူဝ်ၼိုင်ႈမႄးႁႅၼ်းလႄႈဢဝ်တၢင်ႇၵႃႈၼိူဝ်ၽိုၼ်းဢေႃႈ။ဢမ်ႇဢဝ်ၽႆးသႂ်ႇၽႆးၸပ်း။သူဢွၼ်ၵၼ်သႅၼ်ႇႁွင်ႉႁႃၼႃႇမႃႉၸိုဝ်သဵင်ၽြႃးသူၸိူဝ်းၼၼ်ႉတႃႉ။ၵဝ်ၵေႃႈတၵ်းသႅၼ်ႇႁွင်ႉႁႃၼႃႇမႃႉၸိုဝ်သဵင်ထႃႇဝရႃႉၽြႃးဢေႃႈ။ႁႂ်ႈၽြႃးဢၼ်ဢဝ်ၽႆးဢိူဝ်ႉၼၼ်ႉၸႂ်ႈၽြႃးပဵၼ်ၸဝ်ႈဢၼ်ၸႅတ်ႈသေၵမ်းလူၺ်ႈ၊မိူဝ်ႈဢၼ်ဝႃႈၼင်ႇၼႆၸိုင်ၵူၼ်းတင်းသဵင်ႈတင်းလူင်ၼၼ်ႉဢွၼ်ၵၼ်လၢတ်ႈလႄႈဝႃႈ၊-ၵႂၢမ်းၼႆႉသေႇၶျႃႇလီငၢမ်းဢေႃႈ၊ဝႃႈၼင်ႇၼႆဢေႃႈ။
၂၅ လၢႆးသမ်ႉဢေးလိယလၢတ်ႈတီႈပရေႃးၽႅတ်ႈပႃႇလၸိူဝ်းၼၼ်ႉလႄႈဝႃႈ၊-ၵွပ်ႈပိူဝ်ႈဢၼ်သူၼမ်လႄႈလိူၵ်ႈၵဵပ်းဢဝ်ဝူဝ်းတူဝ်ၼိုင်ႈပုၼ်ႈသူလႄႈမႄးႁႅၼ်းဢွၼ်တၢင်းတႃႉ။ယင်းဢမ်ႇဢဝ်ၽႆးသႂ်ႇၽႆးၸပ်းလႄႈသႅၼ်ႇႁွင်ႉႁႃၽြႃးသူၸိူဝ်းၼၼ်ႉတႃႉ၊ဝႃႈၼင်ႇၼႆလႄႈ
၂၆ ၶဝ်ၼၼ်ႉၵေႃႈဢွၼ်ၵၼ်ဢဝ်ဝူဝ်းဢၼ််ပိူၼ်ႈပၼ်ၼၼ်ႉသေလႄႈမႄးႁႅၼ်းသေယဝ်ႉ၊သႅၼ်ႇႁွင်ႉႁႃၼႃႇမႃႉၸိုဝ်သဵင်ၽြႃးပႃႇလၸႃႉၸဵမ်ၶိင်ႇၵႃႈၼႂ်တေႃႇထိုင်ႁွတ်ႈၶိင်ႇၵၢင်ဝၼ်းတဵင်ႈလႄႈဝႃႈ၊-ၽြႃးပႃႇလတီႈၶႃႈဢိူၺ်း။ဢိူဝ်ႉၶႃႈၸဝ်ႈႁဝ်းၶဝ်သေၵမ်းၶႃႈ၊ဝႃႈၼင်ႇၼႆယူႇဢေႃႈ။ၵူၺ်းၵႃႈဢမ်ႇမီးသဵင်ပျႃႇတိၵ်ႈ၊ဢမ်ႇမီးၵေႃႉဢၼ်ဢိူဝ်ႉ။ၶဝ်ၼၼ်ႉဢွၼ်ၵၼ်ၵႃႈဝႅၼ်ၵႃႈတီႈႁိမ်းယိတ်ႉပလၢင်ႇဢၼ်ၶဝ်တႄႇႁဵတ်းၼၼ်ႉဢေႃႈ။
၂၇ မိူဝ်ႈၶိင်ႇၵၢင်ဝၼ်းတဵင်ႈၼၼ်ႉဢေးလိယႁဵတ်းပျၢၵ်ႈႁဵတ်းၶူဝ်ၶဝ်လႄႈဝႃႈ၊-ဢွၼ်ႈၵၼ်ႁဵတ်းသဵင်ႁႅင်းႁႅင်ႈလႄႈသႅၼ်ႇႁွင်ႉတႃႉ။မၼ်းၸဝ်ႈပဵၼ်ၽြႃးဢေႃႈ။မၼ်းၸဝ်ႈၶႆႈၸႂ်ဝူၼ်ႉၸႂ်ယူႇႁိုဝ်။ဢမ်ႇၼၼ်ၵေႃႈမၼ်းၸဝ်ႈၸွမ်းႁႃသေၸိူဝ်ႉသေပိူင်ယူႇႁိုဝ်။ဢမ်ႇၼၼ်ၵေႃႈမၼ်းၸဝ်ႈၵႂႃႇတၢင်းပႆတၢင်းယူႇႁိုဝ်။ဢမ်ႇၼၼ်ၵေႃႈမၼ်းၸဝ်ႈၼွၼ်းလပ်းယူႇလႄႈလူဝ်ႇသေၵေႃႉသေၵူၼ်းတၵ်းလႆႈပူၵ်းမၼ်းလုၵ်ႉႁိုဝ်၊ဝႃႈၼင်ႇၼႆဢေႃႈ။
၂၈ ၶဝ်ၼၼ်ႉၵေႃႈဢွၼ်ၵၼ်ႁဵတ်းသဵင်ဢၼ်ႁႅင်းၼႃႇသႅၼ်ႇႁွင်ႉလႄႈဢဝ်မိတ်ႈလႂ်လဵၵ်းလႅမ်လႂ်တိူဝ်ႉမၢတ်ႇသႂ်ႇတူဝ်ၶဝ်ၸွမ်းၵႃႈၼင်ႇဢၼ်ထုင်းၸၢမ်ႇၶဝ်မီးၼၼ်ႉထၼ်ႈပေႃးႁႂ်ႈလိူတ်ႈၶဝ်ယွႆႉယွတ်ႇသႂ်ႇၵႃႈၼိူဝ်တူဝ်ၶဝ်ဢေႃႈ။
၂၉ ၵၢင်ဝၼ်းတဵင်ႈသေယဝ်ႉၶဝ်သမ်ႉဢွၼ်ၵၼ်ႁဵတ်းပရေႃးၽႅတ်ႈတေႃႇထိုင်ႁွတ်ႈၶိင်ႇဢၼ်ပုၵ်ႉၸေႃႇယိၸ်ႉမိူဝ်ႈႁူဝ်ၶမ်ႈသေၵေႃႈဢမ်ႇမီးပျႃႇတိၵ်ႈသင်။
၃၀ ဢမ်ႇမီးၵေႃႉဢၼ်ဢိူဝ်ႉ။ဢမ်ႇမီးၵေႃႉဢၼ်ဝႆႉဢမူႉတီႈၶဝ်။မိူဝ်ႈၼၼ်ႉဢေးလိယလၢတ်ႈတီႈၵူၼ်းတင်းသဵင်ႈတင်းလူင်လႄႈဝႃႈ၊-ဢွၼ်ၵၼ်မႃးၵႃႈတီႈႁိမ်းၵဝ်ၼႆႉၸမ်ၸမ်တႃႉ၊ဝႃႈၼင်ႇၼႆလႄႈၵူၼ်းတင်းသဵင်ႈတင်းလူင်မႃးၸူးၵႃႈတီႈႁိမ်းမၼ်းၸမ်ၸမ်ဢေႃႈ။
၃၁ မိူဝ်ႈၼၼ်ႉမၼ်းမႄးၵုမ်းမႄးႁႅၼ်းယိတ်ႉပလၢင်ႇထႃႇဝရႃႉၽြႃးဢၼ်ၵိူၼ်ႇလူႉၼၼ်ႉလႄႈဢေးလိယဢဝ်မၢၵ်ႇႁိၼ်သိပ်းသွင်လုၵ်ႈၸွမ်းၵႃႈၼင်ႇဢၼ်ၼပ်ႉဢၢၼ်ႇမဵဝ်းၸိူဝ်ႉၶိူဝ်းယႃႇၵုပ်ႉဢၼ်လႆႈၶၢမ်ႇဢဝ်ပျႃႇတိၵ်ႈၸဝ်ႈလႄႈဝႃႈ၊-ၸိုဝ်သဵင်မႂ်းၸမ်းတၵ်းလႆႈပဵၼ်ဢိသရေႇလဢေႃႈ၊
၃၂ ဝႃႈၼင်ႇၼႆလႄႈဢဝ်မၢၵ်ႇႁိၼ်ၸိူဝ်းၼၼ်ႉတႄႇႁဵတ်းယိတ်ႉပလၢင်ႇပုၼ်ႈၼႃႇမႃႉၸိုဝ်သဵင်ထႃႇဝရႃႉၽြႃးသေယဝ်ႉၶူတ်ႉၶူးဢၼ်ယၼ်ႇဢၼ်ၶဝ်ႈလႆႈၸိူဝ်ႉၽၼ်းသွင်တၢင်ၼၼ်ႉလဵပ်ႈႁွပ်ႈယိတ်ႉပလၢင်ႇၼၼ်ႉဢေႃႈ။
၃၃ မၼ်းဢဝ်ၽိုၼ်းၶပ်ႉလႄႈဢဝ်ဝူဝ်းတႅပ်းႁဵတ်းပွတ်းႁဵတ်းတွၼ်ႈသေယဝ်ႉတၢင်ႇသႂ်ႇၵႃႈၼိူဝ်ၽိုၼ်းၼၼ်ႉလႄႈလၢတ်ႈဝႃႈ၊-ဢွၼ်ၵၼ်ဢဝ်မေႃႈသီႇလုၵ်ႈသႂ်ႇၼမ်ႉႁႂ်ႈတဵမ်သေလႄႈဢဝ်ထွၵ်ႇၵႃႈၼိူဝ်ယိၸ်ႉဢိၵ်ႇတင်းၵႃႈၼိူဝ်ၽိုၼ်းတႃႉ၊ဝႃႈၼင်ႇၼႆလႄႈသမ်ႉလၢတ်ႈထႅင်ႈလႄႈဝႃႈ၊-
၃၄ ဢွၼ်ၵၼ်ဢဝ်ထွၵ်ႇသႂ်ႇထႅင်ႈပွၵ်ႈတုတိယလူးၵွၼ်ႇတႃႉ၊ဝႃႈၼင်ႇၼႆလႄႈၶဝ်ၵေႃႈဢွၼ်ၵၼ်ဢဝ်ထွၵ်ႇသႂ်ႇပွၵ်ႈတုတိယသေယဝ်ႉမၼ်းသမ်ႉလၢတ်ႈထႅင်ႈလႄႈဝႃႈ၊-ဢွၼ်ၵၼ်ဢဝ်ထွၵ်ႇသႂ်ႇပွၵ်ႈတတိယထႅင်ႈလူးၵွၼ်ႇတႃႉ၊ဝႃႈၼင်ႇၼႆလႄႈၶဝ်ၵေႃႈဢွၼ်ၵၼ်ဢဝ်ထွၵ်ႇသႂ်ႇထႅင်ႈပွၵ်ႈတတိယဢေႃႈ။
၃၅ ၼမ်ႉလႆယူႇၵႃႈတီႈလဵပ်ႈႁွပ်ႈယိတ်ႉပလၢင်ႇလႄႈမၼ်းႁႂ်ႈၶူးၼၼ်ႉတဵမ်ဝႆႉတင်းၼမ်ႉဢေႃႈ။မိူဝ်ႈဢၼ်ႁွတ်ႈထိုင်ၶိင်ႇဢၼ်ပုၵ်ႉၸေႃႇယိၸ်ႉမိူဝ်ႈႁူဝ်ၶမ်ႈၼၼ်ႉၸိုင်ပရေႃးၽႅတ်ႈဢေးလိယသုတ်ႉၸပ်းသုတ်ႉၸူးလႄႈသူးတွင်းလႄႈဝႃႈ၊-ထႃႇဝရႃႉၽြႃးၽြႃးပဵၼ်ၸဝ်ႈဢႃႇပႁမ်ႇ၊ဢိၸၢၵ်ႉ၊ဢိသရေႇလတီႈၶႃႈ။
၃၆ ႁႂ်ႈၶဝ်လႆႈႁူႉလွင်ႈဢၼ်ၸဝ်ႈႁဝ်းပဵၼ်ၽြႃးပဵၼ်ၸဝ်ႈမဵဝ်းဢိသရေႇလဢိၵ်ႇတင်းလွင်ႈဢၼ်ၶႃႈၸဝ်ႈႁဝ်းၼႆႉပဵၼ်ၶႃႈၸဝ်ႈႁဝ်းလႄႈဢဝ်ဢမိင်ႉၸဝ်ႈႁဝ်းႁဵတ်းလွင်ႈတၢင်းၼႆႉၵူႈၸိူဝ်ႉၵူႈပိူင်ၼၼ်ႉဝၼ်းမိူဝ်ႈၼႆႉသေၵမ်းတီႈၶႃႈ။ထႃႇဝရႃႉၽြႃးတီႈၶႃႈ။
၃၇ ၶႅၼ်းတေႃႈထွမ်ႇဢဝ်ၵႂၢမ်းၶႃႈၸဝ်ႈသေၵမ်းတီႈၶႃႈ။ထွမ်ႇဢဝ်ၵႂၢမ်းၶႃႈၸဝ်ႈလႄႈႁႂ်ႈၵူၼ်းၸိူဝ်းၼႆႉလႆႈႁူႉလွင်ႈဢၼ်ၸဝ်ႈႁဝ်းပဵၼ်ၸဝ်ႈထႃႇဝရႃႉၽြႃးပဵၼ်ၸဝ်ႈလႄႈႁႂ်ႈၸႂ်သၽေႃးၶဝ်ၶၢႆႉပုတ်ႈသေၵမ်းတီႈၶႃႈ၊ဝႃႈၼင်ႇၼႆဢေႃႈ။
၃၈ မိူဝ်ႈၼၼ်ႉၽႆးထႃႇဝရႃႉၽြႃးတုတ်ႇမႃးလႄႈမႆႈယိၸ်ႉဢၼ်တုတ်ႇၽႆးၽိုၼ်းမၢၵ်ႇႁိၼ်မုၼ်ႈလိၼ်ၸိူဝ်းၼၼ်ႉလႄႈႁုပ်ႇမႆႈၼမ်ႉဢၼ်မီးၵႃႈၼႂ်းၶူးၼၼ်ႉယူတ်းႁႅင်ႈၵႂႃႇဢေႃႈ။
၃၉ ၵူၼ်းတင်းသဵင်ႈတင်းလူင်ႁၼ်သေယဝ်ႉဢွၼ်ၵၼ်ၶုပ်ႉမူပ်ႇဝၢင်းႁူဝ်ယူႇသေလႄႈလၢတ်ႈဝႃႈ၊-ထႃႇဝရႃႉၽြႃးပဵၼ်ၽြႃးပဵၼ်ၸဝ်ႈဢေႃႈ၊ထႃႇဝရႃႉၽြႃးပဵၼ်ၽြႃးပဵၼ်ၸဝ်ႈဢေႃႈ၊ဝႃႈၼင်ႇၼႆဢေႃႈ။
၄၀ ဢေးလိယၵေႃႈလၢတ်ႈတီႈၶဝ်လႄႈဝႃႈ၊-ဢွၼ်ၵၼ်တီႉၵမ်ဢဝ်ပရေႃးၽႅတ်ႈပႃႇသၸိူဝ်းၼၼ်ႉတႃႉ။ယႃႇပေႁႂ်ႈလွတ်ႈသေၵေႃႉသေၵူၼ်း၊ဝႃႈၼင်ႇၼႆလႄႈၶဝ်ဢွၼ်ၵၼ်တီႉၵမ်ဢဝ်ပရေႃးၽႅတ်ႈၸိူဝ်းၼၼ်ႉလႄႈဢေးလိယဢဝ်ၶဝ်လူင်းၸူးၵႃႈတီႈၼမ်ႉႁွင်ႊၵိသုၼ်ႇသေယဝ်ႉဢဝ်ၶဝ်တၢႆပႅတ်ႈၵႃႈတီႈၼၼ်ႉဢေႃႈ။
၄၁ လိုၼ်းၼၼ်ႉဢေႇလိယလၢတ်ႈတီႈၶုၼ်ဢႃႇႁပ်ႉလႄႈဝႃႈ၊-ၶုၼ်လူင်ၶိုၼ်းၵႂႃႇႁႂ်ႈလႆႈၵိၼ်လႆႈၶူပ်းတႃႉ။မီးသဵင်ဢၼ်ၽူၼ်တၵ်းတူၵ်းၼမ်ၼႃႇဢေႃႈ၊ဝႃႈၼင်ႇၼႆလႄႈဢႃႇႁၢပ်ႇၶိုၼ်းၵႂႃႇႁႂ်ႈလႆႈၵိၼ်လႆႈၶူပ်းဢေႃႈ။
၄၂ ဢေးလိယၵေႃႈၶိုၼ်ႈၵႃႈၼိူဝ်လွႆၵရမေႇလသေလႄႈၶုပ်ႉမူပ်ႇဝၢင်းႁူဝ်ၵႃႈၼိူဝ်လိၼ်ယူႇဢဝ်ၼႃႈမၼ်းဝႆႉၵႃႈတီႈၵႄႈႁူဝ်ၶဝ်ႇမၼ်းယူႇသေလႄႈလၢတ်ႈတီႈၵူၼ်းဢွၼ်ႇမၼ်းလႄႈဝႃႈ၊-
၄၃ မႂ်းၶိုၼ်ႈၵႂႃႇလူတူၺ်းၸူးၵႃႈတီႈပၢင်ႇလၢႆႇပုၼ်ႉလူး၊ဝႃႈၼင်ႇၼႆလႄႈမၼ်းၵေႃႈၶိုၼ်ႈလႄႈလူတူၺ်းသေယဝ်ႉလၢတ်ႈလႄႈဝႃႈ၊-ဢမ်ႇမီးၵႃႈသင်သေၸိူဝ်ႉသေပိူင်ၶႃႈ၊ဝႃႈၼင်ႇၼႆဢေႃႈ။မၼ်းသမ်ႉလၢတ်ႈထႅင်ႈလႄႈဝႃႈ၊-ၵႂႃႇတူၺ်းႁႂ်ႈတေႃႇထိုင်ႁွတ်ႈၸဵတ်းပွၵ်ႈလူးၵွၼ်ႇတႃႉ၊ဝႃႈၼင်ႇၼႆဢေႃႈ။
၄၄ မိူဝ်ႈဢၼ်ထူၼ်ႈထိုင်ၸဵတ်းပွၵ်ႈၼၼ်ႉၸိုင်မၼ်းလၢတ်ႈလႄႈဝႃႈ၊-တူၺ်းၶႃႈလူး။ၽႃႇၽူၼ်ဢွၼ်ႇဢၼ်လဵၵ်ႉပဵင်းထၢၼ်ႇၽႃႇမိုဝ်းၵူၼ်းၼၼ်ႉဢၼ်ၼိုင်ႈၶိုၼ်ႈမႃးသေၵႃႈၼႂ်းပၢင်ႇလၢႆႇၶႃႈဢေႃႈ၊ဝႃႈၼင်ႇၼႆသေယဝ်ႉ၊မၼ်းသင်ႇလၢတ်ႈလႄႈဝႃႈ၊-မႂ်းၶိုၼ်ႈၸူးလႄႈလဝ်ႈလၢတ်ႈတီႈဢႃႇႁပ်ႉႁႂ်ႈမၼ်းၸဝ်ႈမႄးႁႅၼ်းလေႃႉရထႃးသေလႄႈလူင်းမိူဝ်းၵႂႃႇမိူဝ်ႈၽူၼ်ဢမ်ႇပႆႇတၼ်းလႆႈတူၵ်းလႄႈႁၢမ်ႈတပ်ႉႁႄႉၶႅၼ်ၶုၼ်လူင်ၼၼ်ႉသေၵမ်း၊ဝႃႈၼင်ႇၼႆဢေႃႈ။
၄၅ ၼင်ႇၼၼ်လႄႈၵမ်းဢွၼ်ႇၼိုင်ႈၵူၺႃ်းႉၵၢင်ႁၢဝ်လမ်ဝႆႉတင်းၽႃႇၽူၼ်ဢိၵ်ႇတင်းလူမ်းလူင်လႄႈၽူၼ်တူၵ်းႁႅင်းယႂ်ႇၼႃႇလူင်လၢင်ဢေႃႈ။
၄၆ ဢႃႇႁပ်ႉၶီႇလေႃႉရထႃးလႄႈၵႂႃႇၸူးၵႃႈတီႈဝဵင်းယေႇၸရေႇလဢေႃႈ။ၶႅၼ်မိုဝ်းထႃႇဝရႃႉၽြႃးမီးၵႃႈၼိူဝ်ဢေးလိယလႄႈမၼ်းႁတ်ႉသၢႆဢႅဝ်မၼ်းသေယဝ်ႉၶုၼ်ႇလႅၼ်ႈၵႂႃႇဢွၼ်တၢင်းဢႃႇႁပ်ႉၵႂႃႇၸူးၵႃႈတီႈႁူးၽၵ်းတူဝဵင်းယေႇၸရေႇလဢေႃႈ။