Chapter
၁၆
၁ ၼုၵ်ႉၵပၢတ်ႈထႃႇဝရႃႉၽြႃးႁွတ်ႈမႃးတီႈယေႇႁုလုၵ်ႈၸၢႆးႁႃႇၼႃၼိ၊ၸၢပ်ႈသႅင်ႇလူၺ်ႈပႃႇသႃႇၼၼ်ႉလႄႈဝႃႈၸမ်း၊-
၂ ၵဝ်ဢဝ်မႂ်းသေၵႃႈၼႂ်းမုၼ်ႈလိၼ်လႄႈယုၵ်ႈယွင်ႈမႂ်းဝႆႉႁႂ်ႈမႂ်းလႆႈပဵၼ်ၵေႃႉဢၼ်ဢုပ်ႉၵႃႈၼိူဝ်ၵူၼ်းၵဝ်မဵဝ်းဢိသရေႇလသေၵေႃႈၵွပ်ႈပိူဝ်ႈဢၼ်မႂ်းၸွမ်းသဵၼ်ႈတၢင်းယေႇရူဝ်းပုမ်ႇၼၼ်ႉသေလႄႈႁဵတ်းႁႂ်ႈၵူၼ်းၵဝ်မဵဝ်းဢိသရေႇလလႆႈၽိတ်းပိူင်ႈလႄႈတိုၵ်းယူင်းတၢင်းၸႂ်မႆႈၶႆႈၸႃႉၵဝ်ၵွပ်ႈပိူဝ်ႈဢပျႅတ်ႈၶဝ်ၼၼ်ႉယဝ်ႉ။
၃ ၵဝ်တၵ်းပႄႇၽဵဝ်ႈပႃႇသႃႇဢိၵ်ႇတင်းမဵဝ်းၸိူဝ်ႉၶိူဝ်းမၼ်းပႅတ်ႈလႄႈတၵ်းႁႂ်ႈမဵဝ်းၸိူဝ်ႉၶိူဝ်းမႂ်းပဵၼ်ၸိူဝ်ႉၼင်ႇမဵဝ်းၸိူဝ်ႉၶိူဝ်းယေႇရူဝ်းပုမ်ႇလုၵ်ႈၸၢႆးၼေႇပတ်ႉၼၼ်ႉဢေႃႈ။
၄ ၵူၼ်းမဵဝ်းၸိူဝ်ႉၶိူဝ်းပႃႇသႃႇၼၼ်ႉပေႃးတၢႆၵႃႈၼႂ်းဝဵင်းၸိုင်၊မႃတၵ်းၵိၼ်ဢေႃႈ။ပေႃးတၢႆၵႃႈၼွၵ်ႈၵႃႈပၢင်ႇၸိုင်၊ၼူၵ်ႉၵၢင်ႁၢဝ်တၵ်းၵိၼ်ဢေႃႈ၊ဝႃႈၼင်ႇၼႆဢေႃႈ။
၅ လွင်ႈတၢင်းဢၼ်ပႃႇသႃႇႁဵတ်းလွင်ႈတၼ်းၶူဝ်းမၼ်းယႂ်ႇဢၼ်ယင်းၵိုတ်းယင်းၵျၢၼ်ႇၸိူဝ်းၼၼ်ႉတဵမ်ဝႆႉမီးယူႇၵႃႈၼႂ်းရႃႇၸဝၢင်ႇဢိသရေႇလဢေႃႈ။
၆ ပႃႇသႃႇၼၼ်ႉၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈၶၢမ်ႇတၢင်းဢၼ်သၢင်းၵျူဝ်ႇၵႃႈၼႂ်းဝဵင်းတိရၸဢေႃႈ။ဢေႇလႃႇလုၵ်ႈၸၢႆးၸဝ်ႈၼၼ်ႉၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။
၇ ပဵၼ်မႅၼ်ႈၸွမ်းၵႃႈၼင်ႇၼုၵ်ႉၵပၢတ်ႈထႃႇဝရႃႉၽြႃးဢၼ်ဢဝ်လွင်ႈပႃႇသႃႇဢိၵ်ႇတင်းမဵဝ်းၸိူဝ်ႉၶိူဝ်းမၼ်းသေလႄႈႁွတ်ႈမႃးတီႈယေႇႁုလုၵ်ႈၸၢႆးႁႃႇၼၼိၵွပ်ႈပိူဝ်ႈဢပျႅတ်ႈၵႃႈဢၼ်မၼ်းၽိတ်းပိူင်ႈသိုဝ်ႈၼႃႈတႂ်ႈတႃႇထႃႇဝရႃႉၽြႃးလႄႈဢဝ်လွင်ႈတၢင်းဢၼ်မၼ်းႁဵတ်းၸိူဝ်းၼၼ်ႉတိုၵ်းယူင်းတၢင်ၸႂ်မႆႈၶႆႈၸႃႉၸဝ်ႈဢၼ်ဝႃႈဢပျႅတ်ႈဢၼ်မၼ်းႁဵတ်းမိူၼ််ၵၼ်တင်းမဵဝ်းၸိူဝ်ႉၶိူဝ်းယေႇရူဝ်းပုမ်ႇဢိၵ်ႇတင်းၵွပ်ႈပိူဝ်ႈဢပျႅတ်ႈဢၼ်မၼ်းယႃႉၽဵဝ်ႈမဵဝ်းၸိူဝ်ႉၶိူဝ်းၸဝ်ႈၼၼ်ႉဢေႃႈ။
ဢေႇလၶုၼ်ႁေႃၶမ်းဢိသရေႇလ
၈ ၼႂ်းပီႊဢၼ်ဢႃႇသၶုၼ်ႁေႃၶမ်းယုတၸၢမ်ႇႁၢင်ႈၸၢမ်ႇႁေႃသၢဝ်းပၢႆႁူၵ်းပီႊၼၼ်ႉဢေႇလႃႇလုၵ်ႈၸၢႆးပႃႇသႃႇၼၼ်ႉယူႇၵႃႈတီႈဝဵင်းတိရၸလႄႈလႆႈဢုပ်ႉပိူင်ႇၸၢမ်ႇၸႃးမိူင်းဢိသရေႇလသၢမ်ပီႊဢေႃႈ။
၉ ၶႃႈမၼ်းၸိမရၵေႃႉဢၼ်ဢုပ်ႉၵႃႈၼိူဝ်ႁူဝ်ႁၢၼ်ၵူၼ်းသိုၵ်းၶီႇလေႃႉရထႃးမၼ်းၶိုင်ႈၼိုင်ႈၼၼ်ႉလွမ်ႁဵတ်းမုၵ်ႉႁဵတ်းၸိူဝ်းယူႇၽၢႆႇၼိုင်ႈတင်းမၼ်းဢေႃႈ။
၁၀ ၼႂ်းမိူဝ်ႈဢၼ်မၼ်းယင်းတိုၵ်ႉၵိၼ်လဝ်ႈထၼ်ႈပေႃးမဝ်းလဝ်ႈမဝ်းၵမ်ယူႇၵႃႈၼႂ်းႁိူၼ်းဢႃႇၸၵေႃႉဢၼ်ပဵၼ်ၵူၼ်းဢုပ်ႉႁေႃၸဝ်ႈၼႂ်းဝဵင်းတိရၸၼၼ်ႉၸိုင်ၸိမရၶဝ်ႈမႃးလႄႈဢၼ်မၼ်းတၢႆပႅတ်ႈသေယဝ်ႉၼင်ႇႁၢင်ႈၼင်ႈႁေႃၼႂ်းပီႊဢၼ်ဢႃႇသႃႉပဵၼ်ၶုၼ်ႁေႃၶမ်းယုတလႄႈၸၢမ်ႇႁၢင်ႈၸၢမ်ႇႁေႃသၢဝ်းပၢႆၸဵတ်းပီႊၼၼ်ႉဢေႃႈ။
၁၁ မိူဝ်ႈဢၼ်မၼ်းၸႃႉၸၢမ်ႇႁၢင်ႈၸၢမ်ႇႁေႃလႄႈၼင်ႈၵႃႈၼိူဝ်ရႃႇၸႃႉပလၢင်ႇၼၼ်ႉၸိုင်မၼ်းဢဝ်မဵဝ်းၸိူဝ်ႉၶိူဝ်းပႃႇသႃႇၵႃႈမီးတင်းသဵင်ႈတင်းလူင်တၢႆဢေႃႈ။မၼ်းဢမ်ႇဝႆႉၵိုတ်းဝႆႉၵျၢၼ်ႇၵူၼ်းၸၢႆးဢၼ်ပဵၼ်ပီႈပဵၼ်ၼွင်ႉၵၼ်တင်းပႃႇသႃႇၵူၼ်းၸၢႆးဢၼႁဵတ်းၵေႃႉႁဵတ်းသေႈလူၺ်ႈၵၼ်တင်းမၼ်းၼၼ်ႉသေၵေႃႉသေၵူၼ်း။
၁၂ ၼင်ႇၼႆလႄႈၸိမရယႃႉၽဵဝ်ႈပႅတ်ႈမဵဝ်းၸိူဝ်ႉၶိူဝ်းပႃႇသႃႇၵႃႈမီးတင်းသဵင်ႈတင်းလူင်မႅၼ်ႈၸွမ်းၵႃႈၼင်ႇၵႂၢမ်းဢၼ်ထႃႇဝရႃႉၽြႃးဢဝ်လွင်ႈပႃႇသႃႇသေလႄႈဢဝ်ပရေႃးၽႅတ်ႈယေႇႁုမီးဢမိင်ႉၸဝ်ႈဝႆႉၼၼ်ႉဢေႃႈ။
၁၃ ၵွပ်ႈပိူဝ်ႈဢပျႅတ်ႈပႃႇသႃႇၵႃႈမီးဢိၵ်ႇတင်းဢပျႅတ်ႈလုၵ်ႈၸၢႆးမၼ်းဢေႇလႃႇဢၼ်ၶဝ်ၽိတ်းပိူင်ႈသေလႄႈႁႂ်ႈမဵဝ်းဢိသရေႇလၽိတ်းပိူင်ႈႁႂ်ႈလႆႈတိုၵ်းယူင်းတၢင်းၸႂ်မႆႈၶႆႈၸႃႉထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလလူၺ်ႈလွင်ႈမိၵ်ႉသႃႇတိၵ်ႉထီႉၶဝ်ၼၼ်ႉဢေႃႈ။
၁၄ လွင်ႈတၢင်းဢၼ်ဢေႇလႃႇႁဵတ်းဢၼ်ယင်းၵိုတ်းယင်းၵျၢၼ်ႇၵႃႈမီးၸိူဝ်းၼၼ်ႉၸမ်းတႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇဢိသရေႇလဢေႃႈ။
ၸိမရိၶုၼ်ႁေႃၶမ်းဢိသရေႇလ
၁၅ ၼႂ်းပီႊဢၼ်ဢႃႇသၶုၼ်ႁေႃၶမ်းယုတၼင်ႈႁၢင်ႈၼင်ႈႁေႃသၢဝ်းပၢႆၸဵတ်းပီႊၼၼ်ႉၸိမရဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်းတိရၸၸဵတ်းဝၼ်းဢေႃႈ။ၼႂ်းၶိင်ႇမိူဝ်ႈၼၼ်ႉၵူၼ်းတင်းလၢႆလႆႈၶျႃးတပ်ႉၶဝ်ယူႇၽၢႆႇၼိုင်ႈတင်းဝဵင်းပေႇသုၼ်ႇဢၼ်ၵူၼ်းၽိလိတ်ႉတိပိူင်ႇၼၼ်ႉဢေႃႈ။
၁၆ ၶဝ်ၸိူဝ်းဢၼ်ၶျႃးတပ်ႉၶဝ်ယူႇၸိူဝ်းၼၼ်ႉငိၼ်းလွင်ႈဢၼ်ၸိမရႁဵတ်းမုၵ်ႉႁဵတ်းၸိူဝ်းသေလႄႈဢဝ်ၶုၼ်ႁေႃၶမ်းတၢႆၸိူဝ်ႉၼင်ႇၼၼ်ၼၼ်ႉသေယဝ်ႉၼႂ်းဝၼ်းၼၼ်ႉၵမ်းလဵဝ်ၵူၼ်းမဵဝ်းဢိသရေႇလတင်းသဵင်ႈတင်းလူင်ဢွၼ်ၵၼ်ဢဝ်ၶုၼ်ႁူဝ်သိုၵ်းဢေႃႇမရိႁဵတ်းၶုၼ်ႁေႃၶမ်းၵႃႈၼိူဝ်မဵဝ်းဢိသရေႇလၵႃႈၼႂ်းတပ်ႉၼၼ်ႉဢေႃႈ။
၁၇ ဢေႃႇမရတင်းၵူၼ်းမဵဝ်းဢိသရေႇလၵႃႈဢၼ်မီးၵႃႈတီႈမၼ်းၸိူဝ်းၼၼ်ႉဢွၼ်ၵၼ်လုၵ်ႉသေၵႃႈတီႈဝဵင်းၵိပေႇသုၼ်ႇလႄႈၶိုၼ်ႈၸူးလွမ်ႉဝဵင်းတိရၸဝႆႉဢေႃႈ။
၁၈ မိူဝ်ႈဢၼ်ၸိမရလႆႈႁၼ်လွင်ႈဢၼ်ၶဝ်တိုၵ်းဢဝ်လႆႈဝဵင်းၼၼ်ႉယဝ်ႉၸိုင်မၼ်းၶဝ်ႈၵႂႃႇၵႃႈၼႂ်းတပ်ႉဢၼ်မီးၵႃႈၼႂ်းႁေႃၸဝ်ႈလႄႈဢဝ်ၽႆးတုတ်ႇႁေႃၸဝ်ႈၼၼ်ႉၵႃႈၼိူဝ်တူဝ်မၼ်းလႄႈတူဝ်မၼ်းၵေႃႈတၢႆၵႃႈတီႈၼၼ်ႉဢေႃႈ။
၁၉ ၵွပ်ႈပိူဝ်ႈဢပျႅတ်ႈဢၼ်မၼ်းၽိတ်းပိူင်ႈၼႂ်းလွင်ႈဢၼ်မၼ်းႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးလႄႈၸွမ်းသဵၼ်ႈတၢင်းဢၼ်ယေႇရူဝ်းပုမ်ႇၸွမ်းၼၼ်ႉလႄႈႁဵတ်းဢပျႅတ်ႈဢၼ်မၼ်းႁဵတ်းၼၼ်ႉလႄႈႁႂ်ႈမဵဝ်းဢိသရေႇလၽိတ်းပိူင်ႈၽြႃးပဵၼ်ၸဝ်ႈၼၼ်ႉဢေႃႈ။
၂၀ လွင်ႈတၢင်းၸိမရဢၼ်ယင်းၵိုတ်းယင်းၵျၢၼ်ႇဢိၵ်ႇတင်းလွင်ႈတၢင်းဢၼ်မၼ်းပုင်ႇၵၢၼ်ႇၼၼ်ႉၸိုင်တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇဢိသရေႇလဢေႃႈ။
ဢေႃႇမရိၶုၼ်ႁေႃၶမ်းဢိသရေႇလ
၂၁ မိူဝ်ႈၼၼ်ႉၵူၼ်းမိူင်းဢိသရေႇလတင်းလၢႆပဵၼ်သွင်ၽၢၵ်ႇသွင်လူင်းၵႂႃႇလႄႈၶိုင်ႈၼိုင်ႈၸွမ်းလူင်တိပၼိလုၵ်ႈၸၢႆးၵိၼတ်ႉႁႂ်ႈလႆႈဢဝ်မၼ်းႁဵတ်းၶုၼ်ႁေႃၶမ်းဢေႃႈ။
၂၂ ၶိုင်ႈၼိုင်ႈသမ်ႉၸွမ်းလင်ဢေႃႇမရိဢေႃႈ။ၶဝ်ၸိူဝ်းဢၼ်ၸွမ်းလင်ဢေႃႇမရိၼၼ်ႉပေႉၼႅင်ႇၶဝ်ၸိူဝ်းဢၼ်ၸွမ်းလင်တိပၼိလုၵ်ႈၸၢႆးၵိၼတ်ႉၼၼ်ႉသေယဝ်ႉတိပၼိတၢႆလႄႈဢေႃႇမရိၼၼ်ႉၼင်ႈႁၢင်ႈၼင်ႈႁေႃဢေႃႈ။
၂၃ ၼႂ်းပီႊဢၼ်ဢႃႇသၶုၼ်ႁေႃၶမ်းယုတၸၢမ်ႇႁၢင်ႈၸၢမ်ႇႁေႃသၢမ်သိပ်းပၢႆဢဵတ်းပီႊၼၼ်ႉဢေႃႇမရိၼင်ႈႁင်ႈၼင်ႈႁေႃမိူင်းဢိသရေႇလလႄႈဢုပ်ႉပိူင်ႇၸၢမ်ႇၸႃးသိပ်းပၢႆသွင်ပီႊဢေႃႈ။
၂၄ မၼ်းဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်းတိရၸႁူၵ်းပီႊသေယဝ်ႉဢဝ်ငိုၼ်းသွင်တလၢၼ်ႇတၢၼ်ႇသိုဝ်ႉဢဝ်လွႆသမႃႇရိၼႂ်းမိူင်းသမေႇရလႄႈတႄႇႁဵတ်းဝဵင်းၵႃႈၼိူဝ်လွႆၼၼ်ႉသေလႄႈႁွင်ႉႁိၵ်ႈၸိုဝ်ႈဝဵင်းၼၼ်ႉသမႃႇရၸွမ်းလူၺ်ႈၸိုဝ်သဵင်သမေႇရဢၼ်ပဵၼ်ၸဝ်ႈလွႆၼၼ်ႉဢေႃႈ။
၂၅ ဢေႃႇမရိၼၼ်ႉႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃႇထႃႇဝရႃႉၽြႃးလႄႈယိင်ႈၶႅၼ်းႁဵတ်းႁၢႆႉႁဵတ်းမိူၵ်ႈၼႃႇသေၶဝ်ၸိူဝ်းဢၼ်ပဵၼ်မိူဝ်ႈဢွၼ်တၢင်းမၼ်းၸိူဝ်းၼၼ်ႉဢေႃႈ။
၂၆ မၼ်းၸွမ်းသဵၼ်ႈတၢင်းဢၼ်ယေႇရူဝ်းပုမ်ႇလုၵ်ႈၸၢႆးၼေႇပတ်ႉလႄႈႁဵတ်းႁႂ်ႈမဵဝ်းဢိသရေႇလၽိတ်းပိူင်ႈလႄႈတိုၵ်းယူင်းတၢင်းၸႂ်မႆႈၶႆႈၸႃႉထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလလူၺ်ႈလွင်ႈမိၵ်ႉသႃႇတိၵ်ႉထိၶဝ်ၼၼ်ႉဢေႃႈ။
၂၇ လွင်ႈတၢင်းဢၼ်ဢေႃႇမရိႁဵတ်းဢၼ်ယင်းၵိုတ်းယင်းၵျၢၼ်ႇဢိၵ်ႇတင်းလွင်ႈတၢင်းဢၼ်တၼ်းဢၼ်မၼ်းပဵၼ်မႃးၸိူဝ်းၼၼ်ႉၸိုင်တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇဢိသရေႇလဢေႃႈ။
၂၈ ဢေႃႇမရိၼၼ်ႉၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈၶၢမ်ႇတၢင်းဢၼ်သၢင်းၵျူဝ်ႇၵႃႈၼႂ်းဝဵင်းသမႃႇရိဢေႃႈ။ဢႃႇႁပ်ႉလုၵ်ႈၸၢႆးၸဝ်ႈၼၼ်ႉၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။
ႁိဢေႇလၶုၼ်ႁေႃၶမ်းဢိသရေႇလ
၂၉ ၼႂ်းပီႊဢၼ်ဢႃႇသၶုၼ်ႁေႃၶမ်းယုတၼင်ႈႁၢင်ႈၼင်ႈႁေႃသၢမ်သိပ်းပၢႆပႅတ်ႈပီႊၼၼ်ႉဢႃႇႁပ်ႉလုၵ်ႈၸၢႆးၸဝ်ႈဢေႃႇမရိၼၼ်ႉၸႃႉၼင်ႈႁၢင်ႈၼင်ႈႁေႃမိူင်းဢိသရေႇလလႄႈဢႃႇႁပ်ႉလုၵ်ႈၸၢႆးဢေႃႇမရိၼၼ်ႉဢုပ်ႉပိူင်ႇၸၢမ်ႇၸႃးမိူင်းဢိသရေႇလၵႃႈၼႂ်းဝဵင်းသမႃႇရိသၢဝ်းပၢႆသွင်ပီႊဢေႃႈ။
၃၀ ဢႃႇႁပ်ႉလုၵ်ႈၸၢႆးၸဝ်ႈဢေႃႇမရိၼၼ်ႉယိင်ႈၶႅၼ်းႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးလိူဝ်တွၼ်းၼႃႇသေၶဝ်ၸိူဝ်းဢၼ်ပဵၼ်မိူဝ်ႈဢွၼ်တၢင်းမၼ်းၸိူဝ်းၼၼ်ႉဢေႃႈ။
၃၁ မၼ်းမၢတ်ႈတၢင်းဢၼ်ၸွမ်းသဵၼ်ႈတၢင်ႈဢပျႅတ်ႈတူႉၸရိူၵ်ႈဢၼ်ယေႇရူဝ်းပုမ်ႇလုၵ်ႈၸၢႆးၼေႇပတ်ႉႁဵတ်းၼၼ်ႉပဵၼ်လွင်ႈတၢင်းဢၼ်မဝ်မၢင်ဢမ်ႇပွင်ႇလွင်ႈၵႃႈသင်ၼၼ်ႉၵူၺ်းဢမ်ႇၵႃးမၼ်းသမ်ႉပဵၼ်ၵူပ်းပဵၼ်ၵူႈလူၺ်ႈၵၼ်တင်းယေႇၸပေႇလလုၵ်ႈယိင်းဢေႇသပေႇလၶုၼ်လူင်ၸိတုၼ်ႇၼၼ်ႉသေလႄႈၵႂႃႇႁဵတ်းဝတ်ႈတီႈၽြႃးပႃႇလလႄႈၵူဝ်းၵႂၢႆႇမၼ်းဢေႃႈ။
၃၂ မၼ်းတႄႇႁဵတ်းယိတ်ႉပလၢင်ႇပုၼ်ႈၽြႃးပႃႇလၵႃႈၼႂ်းပိၵ်ႉမၢၼ်ႇၽြႃးပႃႇလဢၼ်မၼ်းႁဵတ်းၵႃႈၼႂ်းဝဵင်းသမႃႇရိၼၼ်ႉဢေႃႈ။
၃၃ ဢႃႇႁပ်ႉၼၼ်ႉႁဵတ်းသဝ်ဢႃႇသရသေလႄႈယိင်ႈၶႅၼ်းႁဵတ်းႁႂ်ႈလႆႈတိုၵ်းယူင်းတၢင်းၸႂ်မႆႈၶႆႈၸႃႉထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလလိူဝ်တွၼ်းၼႃႇသေၶုၼ်ႁေႃၶမ်းဢိသရေႇလၵႃႈဢၼ်ပဵၼ်မိူဝ်ႈဢွၼ်တၢင်းမၼ်းၸိူဝ်းၼၼ်ႉဢေႃႈ။
၃၄ ၼႂ်းၸူဝ်ႈပၢၼ်မၼ်းၼၼ်ႉႁိဢေႇလၵူၼ်းဝဵင်းပေႇသလတႄႇႁဵတ်းဝဵင်းယေႇရိၶုဝ်းဢေႃႈ။မၼ်းလႆႈသုမ်းဢသၢၵ်ႈလုၵ်ႈၸၢႆးတူၼ်ႈမၼ်းဢၽိရမ်ႇၼႂ်းမိူဝ်ႈဢၼ်တႄႇႁဵတ်းငဝ်ႈႁၢၵ်ႈလမ်းဝဵင်းၼၼ်ႉလႄႈလႆႈသုမ်းဢသၢၵ်ႈလုၵ်ႈၸၢႆးဢွၼ်ႇမၼ်းၸေႇၵုပ်ႉၼႂ်းတၢင်းဢၼ်ပူၵ်းတင်ႈၽၵ်းတူဝဵင်းမႅၼ်ႈၸွမ်းၵႃႈၼင်ႇဢၼ်ထႃႇဝရႃႉၽြႃးဢဝ်ယေႃးသုလုၵ်ႈၸၢႆးၼုၼ်ႇလႄႈမီးဢမိင်ႉၸဝ်ႈဝႆႉၼၼ်ႉဢေႃႈ။