Chapter
၁၁
မေးသေႃးလမုၼ်ႇ
၁ ၼွၵ်ႈသေလုၵ်ႈယိင်းၶုၼ်ႁေႃၶမ်းၽႃႇရေႃးၼၼ်ႉၶုၼ်လူင်သေႃးလမုၼ်ႇၸင်ႊႁၵ်ႉပႅင်းမေႈယိင်းၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ဝႃႈၵူၼ်းမဵဝ်းမေႃႇၽ၊မဵဝ်းဢမ်ႇမုၼ်ႇ၊မဵဝ်းဢေႇတုင်ႇ၊မဵဝ်းၸိတုၼ်ႇ၊မဵဝ်းႁိတ်ႉတိၸိူဝ်းၼၼ်ႉၼမ်ၼႃႇဢေႃႈ။
၂ ပိၵ်ႉသမ်ႉထႃႇဝရႃႉၽြႃးမီးဢမိင်ႉလူၺ်ႈလွင်ႈၵူၼ်းမဵဝ်းၸိူဝ်းၼၼ်ႉဝႆႉတီႈၵူၼ်းမဵဝ်းဢိသရေႇလတင်းလၢႆလႄႈဝႃႈ၊-သူဢမ်ႇလႆႈၶဝ်ႈၼႂ်းၶဝ်ၼၼ်ႉ။ၶဝ်ၵေႃႈဢမ်ႇလႆႈၶဝ်ႈၼႂ်းသူ။ၶဝ်ၼၼ်ႉတၵ်းႁႂ်ႈႁူဝ်ၸႂ်သူပိူင်ႈၵႂႃႇၸွမ်းလင်ၽြႃးၶဝ်ဢမၢၼ်ႇၶၢၼ်ပဵၼ်ဢေႃႈ၊ဝႃႈၼင်ႇၼႆသေၵေႃႈသေႃးလမုၼ်ႇမီးၸႂ်ဢၼ်ၸပ်းၸွႆးမေႈယိင်းမဵဝ်းၸိူဝ်းၼၼ်ႉဢေႃႈ။
၃ မၼ်းမီးမေးဢၼ်ပဵၼ်လုၵ်ႈယိင်းၶုၼ်ၸဵတ်းပၢၵ်ႇၸိူင်ႉၼၢင်းသၢမ်ပၢၵ်ႇလႄႈမေးမၼ်းၸိူဝ်းၼၼ်ႉႁႂ်ႈႁူဝ်ၸႂ်မၼ်းပိူင်ႈၵႂႃႇဢေႃႈ။
၄ မိူဝ်ႈဢၼ်သေႃးလမုၼ်ႇဢသၢၵ်ႈၵေႇမႃးၼၼ်ႉၸိုင်မေႈယိင်းၸိူဝ်းၼၼ်ႉႁႂ်ႈႁူဝ်ၸႂ်မၼ်းပိူင်ႈၵႂႃႇၸွမ်းလင်ၽြႃးတၢင်ႇသူႇတၢင်ႇပႃးသေလႄႈႁူဝ်ၸႂ်မၼ်းဢမ်ႇမီးတၢင်းဢၼ်ၸေးၸုမ်ႇၵႃႈတီႈၽၢႆႇၼႃႈထႃႇဝရႃႉၽြႃးၽြႃးပဵၼ်ၸဝ်ႈမၼ်းမိူၼ်ၸိူဝ်ႉၼင်ႇၸဝ်ႈပေႃႈမၼ်းတႃႇဝိတ်ႉၼၼ်ႉယဝ်ႉ။
၅ သေႃးလမုၼ်ႇၸွမ်းလင်ဢႃႇသတရိၵ်ႉဢၼ်ပဵၼ်ၼၢင်းၽီၸိတုၼ်ႇတင်းမိလၵုမ်ႇ၊ဢၼ်ပဵၼ်ၽြႃးဢမ်ႇမုၼ်ႇဢၼ်လီႁင်ႈဢဵတ်ႇသဵတ်ႇၼၼ်ႉလႄႈသေႃးလမုၼ်ႇႁဵတ်းတူႉၸရိူၵ်ႈၵႃႈတီႈၽၢႆႇၼႃႈထႃႇဝရႃႉၽြႃးလႄႈဢမ်ႇၸွမ်းလင်ထႃႇဝရႃႉၽြႃးလုမ်းလုမ်းမိူၼ်ၸိူဝ်ႉၼင်ႇၸဝ်ႈပေႃႈမၼ်းတႃႇဝိတ်ႉၼၼ်ႉယဝ်ႉ။
၆ မိူဝ်ႈၼၼ်ႉသေႃးလမုၼ်ႇတႄႇႁဵတ်းထႃႇၼႃႉတီႈသုင်ၵႃႈၼိူဝ်လွႆဢၼ်မီးၵႃႈတီႈၽၢႆႇၼႃႈဝဵင်းယေႇရုသလႅမ်ႇၼၼ်ႉပုၼ်ႈၶေႇမုသဢၼ်ပဵၼ်ၽြႃးမေႃႇၽတီႈဢၼ်လီႁင်ႈဢဵတ်ႇသဵတ်ႇၼၼ်ႉ
၇ ဢိၵ်ႇတင်းပုၼ်ႈမူႇလွၵ်ႉဢၼ်ပဵၼ်ၽြႃးဢမ်ႇမုၼ်ႇတီႈဢၼ်လီႁင်ႈဢဵတ်ႇသဵတ်ႇၼၼ်ႉဢေႃႈ။
၈ ၼင်ႇၼၼ်လႄႈမၼ်းတႄႇႁဵတ်းပုၼ်ႈမေးမၼ်းဢၼ်ပဵၼ်ၵူၼ်းတၢင်ႇၸိူဝ်ႉတၢင်ႇမဵဝ်းဢၼ်ဢဝ်ၼၢမ်ႇသႃႇတုတ်ႇၽႆးဢၼ်ဢဝ်ယိတ်ႉပုၵ်ႉၸေႃႇတီႈၽြႃးၶဝ်တင်းသဵင်ႈတင်းလူင်ၼၼ်ႉဢေႃႈ။
၉ ထႃႇဝရႃႉၽြႃးၸႂ်မႆႈၶႆႈၸႃႉတီႈသေႃးလမုၼ်ႇၵွပ်ႈပိူဝ်ႈဢၼ်ႁူဝ်ၸႂ်မၼ်းပိူင်ႈသေၵႃႈတီႈထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလဢၼ်ပေႃႇမႃးၵႃႈတီႈမၼ်းသွင်ပွၵ်ႈလႄႈ
၁၀ ပၼ်ပိင်းၺၢပ်ႈဝႆႉလူၺ်ႈလွင်ႈဢၼ်မၼ်းတၵ်းဢမ်ႇလႆႈၸွမ်းလင်ၽြႃးတၢင်ႇသူႇတၢင်ႇပႃးၼၼ်ႉသေၵေႃႈမၼ်းဢမ်ႇထွမ်ႇဢမ်ႇဢဝ်ၵႂၢမ်းဢၼ်ထႃႇဝရႃႉၽြႃးသင်ႇလၢတ်ႈဝႆႉၼၼ်ႉလႄႈထႃႇဝရႃႉၽြႃးမီးဢမိင်ႉလႄႈဝႃႈ၊-
၁၁ ၵွပ်ႈပိူဝ်ႈဢၼ်မႂ်းႁဵတ်းၸိူဝ်ႉၼင်ႇၼႆလႄႈဢမ်ႇပႂ်ႉၸွမ်းပတိၺိၼ်ႇၵဝ်ဢိၵ်ႇတင်းထုင်းၽိင်ႈတြႃးဢၼ်ၵဝ်သင်ႇလၢတ်ႈဝႆႉတီႈမႂ်းၼၼ်ႉလႄႈၵဝ်တၵ်းၼုၵ်ႈဢဝ်သိုင်ႇၸိုင်ႈဝၢၼ်ႈမိူင်းၸဝ်ႈသေၵႃႈတီႈမႂ်းလႄႈပၼ်တီႈၶႃႈမႂ်းဢမၢၼ်ႇၶၢၼ်ပဵၼ်ဢေႃႈ။
၁၂ ၵူၺ်းၵႃႈၵဝ်ထွၵ်ႈလူၺ်ႈပေႃႈမႂ်းတႃႇဝိတ်ႉၼၼ်ႉလႄႈတၵ်းဢမ်ႇႁဵတ်းၼႂ်းၸူဝ်ႈပၢၼ်မႂ်းၼႆႉ။
၁၃ ၵဝ်တၵ်းၼုၵ်ႈဢဝ်သေၵႃႈၼႂ်းမိုဝ်းလုၵ်ႈၸၢႆးမႂ်းဢေႃႈ။ၼႂ်းဝႃႈၼၼ်သေၵေႃႈၵဝ်တၵ်းဢမ်ႇၼုၵ်ႈဢဝ်သိုင်ႇၸိုင်ႈဝၢၼ်ႈမိူင်းတင်းသဵင်ႈတင်းမူတ်း။ၵဝ်တၵ်းထွၵ်ႈလူၺ်ႈၶႃႈၵဝ်တႃႇဝိတ်ႉတင်းဝဵင်းယေႇရုသလႅမ်ႇဢၼ်ၵဝ်လိူၵ်ႈၵဵပ်းဢဝ်ၼၼ်ႉလႄႈတၵ်းဢဝ်ၵူၼ်းၸၢဝ်းၶိူဝ်းမဵဝ်းၼိုင်ႈပၼ်တီႈလုၵ်ႈၸၢႆးမႂ်းဢေႃႈ၊ဝႃႈၼင်ႇၼႆဢေႃႈ။
ရၢၼ်ႇသူႇသေႃးလမုၼ်ႇ
၁၄ လိုၼ်းၼၼ်ႉထႃႇဝရႃႉၽြႃးတိုၵ်းယူင်းႁႃႇတတ်ႉၵူၼ်းမဵဝ်းဢေႇတုင်ႇ၊ၵေႃႉဢၼ်ဝႆႉတၢင်းၽိတ်းတီႈသေႃးလမုၼ်ႇၼၼ်ႉဢေႃႈ။မၼ်းၼၼ်ႉပဵၼ်မဵဝ်းၸိူဝ်ႉၶိူဝ်းၶုၼ်ႁေႃၶမ်းဢေႇတုင်ႇဢေႃႈ။
၁၅ မိူဝ်ႈဢွၼ်တၢင်းၼၼ်ႉမိူဝ်ႈဢၼ်တႃႇဝိတ်ႉမီးယူႇၵႃႈတီႈမိူင်းဢေႇတုင်ႇလႄႈႁူဝ်သိုၵ်းယႂႃႇၽတိုၵ်းတေႃးယႃႉပႅတ်ႈၵူၼ်းၸၢႆးမဵဝ်းဢေႇတုင်ႇတင်းသဵင်ႈတင်းမူတ်းၵွပ်ႈပိူဝ်ႈဢၼ်ယႂႃႇၽ
၁၆ ဢိၵ်ႇတင်းၵူၼ်းမဵဝ်းဢိသရေႇလတင်းသဵင်ႈတင်းလူင်ယူႇၵႃႈတီႈမိူင်းၼၼ်ႉႁူၵ်းလိူၼ်တေႃႇထိုင်ႁွတ်ႈမၼ်းယႃႉၽဵဝ်ႈၵူၼ်းၸၢႆးမဵဝ်းဢေႇတုင်ႇတင်းသဵင်ႈတင်းလူင်ၼၼ်ႉသေယဝ်ႉ
၁၇ ယႂႃႇၽၵႂႃႇႁႂ်ႈလႆႈၽင်တူဝ်တၢႆတင်းလၢႆၼၼ်ႉၸိုင်ႁႃႇတတ်ႉၼၼ်ႉယင်းပဵၼ်လုၵ်ႈဢွၼ်ႇယူႇသေလႄႈဢွၵ်ႇပၢႆႈလူၺ်ႈၵၼ်တင်းၵူၼ်းမဵဝ်းဢေႇတုင်ႇၵမ်ႈၽွင်ႈဢၼ်ပဵၼ်ၶႃႈပေႃႈမၼ်းၸိူဝ်းၼၼ်ႉၵႂႃႇႁႂ်ႈလႆႈႁွတ်ႈထိုင်ၵႃႈၼႂ်းမိူင်းဢေႇၵႅပ်ႉတုၼၼ်ႉဢေႃႈ။
၁၈ ၶဝ်လုၵ်ႉသေၵႃႈတီႈမိူင်းမိတျၢၼ်ႇၵႂႃႇလႄႈႁွတ်ႈထိုင်ၵႃႈတီႈမိူင်းပႃႇရၼ်ႇဢေႃႈ။လၢႆးသမ်ႉၶဝ်ႁွင်ႉဢဝ်ၵူၼ်းမိူင်းပႃႇရၼ်ႇၵမ်ႈၽွင်ႈၵႂႃႇလႄႈႁွတ်ႈထိုင်ၵႃႈတီႈၽႃႇရေႃးၶုၼ်ႁေႃၶမ်းမိူင်းဢေႇၵႅပ်ႉတုသေယဝ်ႉၶုၼ်ၼၼ်ႉပၼ်ႁိူၼ်းတီႈယူႇတီႈသဝ်းလႄႈၸီႇယၢင်ႇဝႆႉလွင်ႈဢၼ်လဵင်ႉဢၼ်လူဢိၵ်ႇတင်းၵႂၢၵ်ႉၼမ်ႉၵႂၢၵ်ႉလိၼ်တီႈမၼ်းဢေႃႈ။
၁၉ ႁႃႇတတ်ႉလႆႈထူပ်းၵျေးၸူးသိုဝ်ႈၼႃႈတႂ်ႈတႃၶုၼ်လူင်ၽႃႇရေႃးယႂ်ႇၼႃႇလူင်လၢင်ထၼ်ႈပေႃးမၼ်းၼၼ်ႉဢဝ်ၼွင်ႉယိင်းၼၢင်းႁေႃၶမ်းတႃႇပၼိတ်ႉႁႂ်ႈပဵၼ်မေးမၼ်းဢေႃႈ။
၂၀ ၼွင်ႉယိင်းတႃႇပၼိတ်ႉၼၼ်ႉၵိူတ်ႇလဵင်ႉလုၵ်ႈၸၢႆးၵေႇၼုပတ်ႉမႃးလႄႈတႃႇပၼိတ်ႉၼၼ်ႉဢဝ်ၽၢတ်ႇၼူမ်းၵႃႈၼႂ်းႁေႃၸဝ်ႈၽႃႇရေႃးလႄႈၵေႇၼုပတ်ႉၼၼ်ႉယူႇလူၺ်ႈၵၼ်တင်းလုၵ်ႈၸၢႆးၽႃႇရေႃးတင်းလၢႆၵႃႈၼႂ်းႁေႃၸဝ်ႈၽႃႇရေႃးၼၼ်ႉဢေႃႈ။
၂၁ ႁႃႇတတ်ႉၼၼ်ႉယူႇၵႃႈၼႂ်းမိူင်းဢေႇၵႅပ်ႉတုသေလႄႈလႆႈငိၼ်းလွင်ႈဢၼ်တႃႇဝိတ်ႉၼွၼ်းလပ်းလူၺ်ႈၵၼ်တင်းပူႇမၼ်းမွၼ်ႇမၼ်းဢိၵ်ႇတင်းလွင်ႈဢၼ်ႁူဝ်သိုၵ်းယႂႃႇၽတၢႆယဝ်ႉၼၼ်ႉသေယဝ်ႉႁႃႇတတ်ႉတွင်းပၢၼ်တီႈၶုၼ်ႁေႃၶမ်းၽႃႇရေႃးလႄႈဝႃႈ၊-ပၼ်ဢၶႂၢင်ႉႁႂ်ႈၶႃႈၸဝ်ႈလႆႈဢွၵ်ႇလႄႈၶိုၼ်းမိူဝ်းၵႂႃႇၵႃႈတီႈမိူင်းတူဝ်ၸဝ်ႈၵဝ်ႇပုၼ်ႉသေၵမ်းတီႈၶႃႈ၊ဝႃႈၼင်ႇၼႆဢေႃႈ။ၽႃႇရေႃးၵေႃႈထၢမ်လႄႈဝႃႈ၊-တီႈၵဝ်ၼႆႉမႂ်းယင်းလူဝ်ထႅင်ႈၵႃႈသင်လူးၵွၼ်ႇလႄႈမႂ်းၶႂ်ႈၶိုၼ်းမိူဝ်းၵႂႃႇၵႃႈတီႈမိူင်းတူဝ်ၸဝ်ႈၵဝ်ႇပုၼ်ႉ၊
၂၂ ဝႃႈၼင်ႇၼႆလႄႈမၼ်းၶိုၼ်းလဝ်ႈလၢတ်ႈလႄႈဝႃႈ၊-ဢမ်ႇလူဝ်ႇထႅင်ႈၵႃႈသင်သေၸိူဝ်ႉသေပိူင်ၶႃႈ။ၼႂ်းဝႃႈၼၼ်သေၵေႃႈၶႅၼ်းတေႃႈပၼ်ဢၶႂၢင်ႉႁႂ်ႈလႆႈၵႂႃႇသေၵမ်းတီႈၶႃႈ၊ဝႃႈၼင်ႇၼႆဢေႃႈ။
၂၃ ၽြႃးပဵၼ်ၸဝ်ႈတိုၵ်းယူင်းတၢင်ႇၵေႃႉဢၼ်ႁဵတ်းရၢၼ်ႇသူႇတီႈသေႃးလမုၼ်ႇဢၼ်ဝႃႈရေႇၸုၼ်ႇ၊ဢၼ်ပဵၼ်လုၵ်ႈၸၢႆးဢေႇလျႃႇတဢၼ်ဢွၵ်ႇပၢႆႈသေၵႃႈတီႈၸဝ်ႈမၼ်းႁႃႇတတ်ႉတေႇၸႃႇဢၼ်ပဵၼ်ၶုၼ်လူင်ၸေႃႇၽၼၼ်ႉဢေႃႈ။
၂၄ မၼ်းၼၼ်ႉႁႂ်ႈၵူၼ်းၸူႉၵၼ်တုမ်ၵၼ်တီႈမၼ်းသေလႄႈႁဵတ်းႁူဝ်သိုၵ်းၵႃႈၼိူဝ်မုၵ်ႉၼိုင်ႈၸိူဝ်းၼိုင်ႈမိူဝ်ႈဢၼ်တႃႇဝိတ်ႉတိုၵ်းတေႃးယႃႉပႅတ်ႈၵူၼ်းၸေႃႇၽၸိူဝ်းၼၼ်ႉဢေႃႈ။လၢႆးသမ်ႉမၼ်းၵႂႃႇၵႃႈတီႈဝဵင်းထမ်ႇမသိတ်ႉလႄႈယူႇၵႃႈတီႈၼၼ်ႉသေယဝ်ႉႁဵတ်းၶုၼ်လူင်ၵႃႈတီႈဝဵင်းထမ်ႇမသိတ်ႉၼၼ်ႉဢေႃႈ။
၂၅ ၼွၵ်ႈသေဢမူႉဢၼ်ႁႃႇတတ်ႉယႃႉယူၵ်ႉႁဵတ်းရၢၼ်ႇသူႇတီႈမဵဝ်းဢိသရေႇလၼႂ်းၸူဝ်ႈပၢၼ်သေႃးလမုၼ်ႇၼၼ်ႉရေႇၸုၼ်ႇၵေႃႈႁဵတ်းရၢၼ်ႇသူႇတေႃႇသေႃးလမုၼ်ႇဢေႃႈ။မၼ်းလီႁင်ႈဢဵတ်ႇသဵတ်ႇမဵဝ်းဢိသရေႇလယူႇသေလႄႈဢုပ်ႉပိူင်ႇၸၢမ်ႇၸႃးမိူင်းသုရိယူႇဢေႃႈ။
ယေႇရူဝ်းပုင်ႇလုၵ်ႉၽိုၼ်ႉသေႃးလမုၼ်ႇ
၂၆ ၼွၵ်ႈသေၼၼ်ႉယေႇရူဝ်းပုင်ႇလုၵ်ႈၸၢႆးၼေႇပတ်ႉၵူၼ်းမဵဝ်းဢေႇၽရိမ်ႇ၊ၵူၼ်းဝၢၼ်ႈၸေႇရတ၊ၶႃႈသေႃးလမုၼ်ႇဢၼ်မေႈမၼ်းမီးၸိုဝ်ဝႃႈၸေႇရွႃႇလႄႈပဵၼ်မေႈမုၵ်ႉမေႈမၢႆႈၼၼ်ႉၵေႃႈလုၵ်ႉၽိုၼ်ႉၶုၼ်ႁေႃၶမ်းဢေႃႈ။
၂၇ လွင်ႈဢၼ်မၼ်းလုၵ်ႉၽိုၼ်ႉတေႃႇၶုၼ်ႁေႃၶမ်းၼၼ်ႉၸမ်းမိူဝ်ႈဢၼ်သေႃးလမုၼ်ႇပွင်ႁဵတ်းပွင်းမႄးတီႈမိလေႃႇလႄႈမႄးၵုမ်းမႄးႁဵတ်းလမ်းဝဵင်းဢၼ်ၸဝ်ႈပေႃႈမၼ်းတႃႇဝိတ်ႉတႄႇႁဵတ်းလႄႈလူႉၼၼ်ႉယူႇၼၼ်ႉၸိုင်ယေႇရူဝ်းပုမ်ႇၼၼ်ႉပဵၼ်ႁူဝ်ႁၢၼ်ၵူၼ်းသိုၵ်းဢၼ်ႁႅင်းယႂ်ႇၼႃႇဢေႃႈ။
၂၈ သေႃးလမုၼ်ႇႁၼ်လွင်ႈဢၼ်မၼ်းပဵၼ်ၵူၼ်းဢွၼ်ႇဢၼ်ဢဝ်ႁႅင်းၶတ်းၸႂ်ႁဵတ်းၼၼ်ႉလႄႈၶၢၼ်းမၼ်းဝႆႉႁႂ်ႈမၼ်းလႆႈဢုပ်ႉၵႃႈၼိူဝ်ဢမူႉၵႃႈဢၼ်မဵဝ်းယုဝ်းသႅပ်ႉလႆႈပွင်လႆႈႁဵတ်းၼၼ်ႉဢေႃႈ။
၂၉ မီးၽဝ်ႇၼိုင်ႈယေႇရူဝ်းပုမ်ႇၼၼ်ႉဢွၵ်ႇသေၵႃႈၼႂ်းဝဵင်းယေႇရုသလႅမ်ႇၵႂႃႇသေယဝ်ႉဢႁိယၵူၼ်းဝဵင်းသိလေႃႇၼၼ်ႉႁႄႉႁပ်ႉႁူဝ်တၢင်းမၼ်းဢေႃႈ။ဢႁိယၼၼ်ႉဢဝ်သိူဝ်ႈယၢဝ်းဢၼ်မႂ်ႇႁူမ်ႇသုမ်ႇတူဝ်မၼ်းယူႇသေလႄႈၼႂ်းမိူဝ်ႈဢၼ်သွင်ၶႃယင်းတိုၵ်ႉမီးယူႇၵႃႈၼႂ်းတူင်ႈၼႃးယူႇၼၼ်ႉ
၃၀ ဢႁိယၼၼ်ႉယိပ်းၵမ်သိူဝ်ႈယၢဝ်းဢၼ်မၼ်းၼုင်ႈၼၼ်ႉသေလႄႈသိၵ်ႇၶၢတ်ႇႁဵတ်းသိပ်းသွင်ပွတ်းသေယဝ်ႉလၢတ်ႈတီႈယေႇရူဝ်းပုမ်ႇလႄႈဝႃႈ၊-ဢဝ်သိပ်းပွတ်းတႃႉ။
၃၁ ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလမီးဢမိင်ႉလႄႈဝႃႈၸမ်း၊-ၵဝ်တၵ်းၼုၵ်ႈဢဝ်သိုင်ႇၸိုင်ႈဝၢၼ်ႈမိူင်းၸဝ်ႈသေၵႃႈတီႈၼႂ်းမိုဝ်းသေႃးလမုၼ်ႇလႄႈဢဝ်မဵဝ်းသိပ်းမဵဝ်းပၼ်တီႈမႂ်းဢေႃႈ။
၃၂ ၵွပ်ႈပိူဝ်ႈဢၼ်ၵဝ်ထွၵ်ႈလူၺ်ႈၶႃႈၵဝ်တႃႇဝိတ်ႉဢိၵ်ႇတင်းၵွပ်ႈပိူဝ်ႈဢၼ်ထွၵ်ႈလူၺ်ႈဝဵင်းယေႇရုသလႅမ်ႇဢၼ်ၵဝ်လိူၵ်ႈၵဵပ်းဢဝ်ၵႃႈၼႂ်းမဵဝ်းဢိသရေႇလတင်းသဵင်ႈတင်းလူင်ၼၼ်ႉလႄႈမၼ်းတၵ်းလႆႈမဵဝ်းၼိုင်ႈဢေႃႈ။
၃၃ လွင်ႈဢၼ်ၼုၵ်ႈဢဝ်သိပ်းမဵဝ်းၼၼ်ႉၸမ်းၶဝ်ၼၼ်ႉၸုၼ်ႉပႅတ်ႈၵဝ်သေလႄႈၵူဝ်းၵႂၢႆႇဢႃႇသတရိၵ်ႈၼၢင်းၽိၸိတုၼ်ႇၶေႇမုသၽြႃးမေႃႇၽ၊မိလၵုမ်ႇၽြႃးဢမ်ႇမုၼ်ႇၸိူဝ်းၼၼ်ႉလႄႈဢမ်ႇၵႂႃႇမႃးၼႂ်းသဵၼ်ႈတၢင်းၵဝ်တင်းလၢႆႁႂ်ႈလႆႈႁဵတ်းဢၼ်ၸိုဝ်ႈၸႂ်ႈလီငၢမ်းသိုဝ်ႈၼႃႈတႂ်ႈတႃႇၵဝ်လႄႈပႂ်ႉၵမ်ပႂ်ႉၸွမ်းထုင်းၽိင်ႈတြႃးၵဝ်ဢိၵ်ႇတင်းလွင်ႈတၢင်းဢၼ်ၵဝ်ၸီႇယၢင်ႇဝႆႉၸိူဝ်းၼၼ်ႉမိူၼ်ၸိူဝ်ႉၼင်ႇပေႃႈမၼ်းတႃႇဝိတ်ႉၼၼ်ႉဢေႃႈ။
၃၄ ၵူၺ်းၵႃႈၵဝ်တၵ်းဢမ်ႇပႆႇၼုၵ်ႈဢဝ်သိုင်ႇၸိုင်ႈဝၢၼ်ႈမိူင်းၸဝ်ႈသေၵႃႈၼႂ်းမိုဝ်းမၼ်း။ၵွပ်ႈပိူဝ်ႈဢၼ်ၵဝ်ထွၵ်ႈလူၺ်ႈၶႃႈၵဝ်တႃႇဝိတ်ႉဢၼ်ၵဝ်လိူၵ်ႈၵဵပ်းဢဝ်ၵွပ်ႈပိူဝ်ႈဢၼ်မၼ်းပႂ်ႉၸွမ်းပိင်းၺၢပ်ႈၵဝ်ဢိၵ်ႇတင်းထုင်းၽိင်ႈတြႃးၵဝ်ၼၼ်ႉလႄႈၵဝ်တၵ်းပၼ်ဢၶႂၢင်ႉႁႂ်ႈမၼ်းလႆႈပဵၼ်ၶုၼ်လူင်ယူႇၸူဝ်ႈဢသၢၵ်ႈမၼ်းဢႃႈ။
၃၅ ၵဝ်တၵ်းၼုၵ်ႈဢဝ်သိုင်ႇၸိုင်ႈဝၢၼ်ႈမိူင်းၸဝ်ႈသေၵႃႈၼႂ်းမိုဝ်းလုၵ်ႈၸၢႆးမၼ်းလႄႈဢဝ်သိပ်းမဵဝ်းပၼ်တီႈမႂ်းဢေႃႈ။
၃၆ လွင်ႈၼင်ႇႁိုဝ်ၶႃႈၵဝ်တႃႇဝိတ်ႉၼၼ်ႉတၵ်းမီးဝၢၼ်ႇၽႆးတဵၼ်းဢၼ်ႁိူဝ်ႈလႅင်းယူႇၵႃႈတီႈၽၢႆႇၼႃႈၵဝ်တႃႇသေႇၵႃႈၼႂ်းဝဵင်းယေႇရုသလႅမ်ႇဢၼ်ၵဝ်လိူၵ်ႈၵဵပ်းဢဝ်ပုၼ်ႈၼႃႇမႃႉၸိုဝ်သဵင်ၵဝ်တၵ်းတႄႇယူႇၼၼ်ႉၸိုင်၊ၵဝ်တၵ်းဢဝ်မဵဝ်းၼိုင်ႈပၼ်တီႈလုၵ်ႈၸၢႆးမၼ်းဢေႃႈ။
၃၇ ၵဝ်လိူၵ်ႈၵဵပ်းဢဝ်မႂ်းလႄႈမႂ်းတၵ်းလႆႈဢုပ်ႉပိူင်ႇၸၢမ်ႇၸႃးၸွမ်းၵႃႈၼင်ႇဢၼ်ဢလူဝ်ႇသၼ်ႇတႃႉမႂ်းမီးၼၼ်ႉယူႇသေလႄႈႁဵတ်းၶုၼ်ၵႃႈၼိူဝ်ၵူၼ်းမဵဝ်းဢိသရေႇလဢေႃႈ။
၃၈ ပေႃးမႂ်းထွမ်ႇဢဝ်ၵႃႈဢၼ်ၵဝ်သင်ႇလၢတ်ႈဝႆႉတီႈမႂ်းၼၼ်ႉလႄႈၸွမ်းသဵၼ်ႈတၢင်းၵဝ်တင်းလၢႆယူႇ၊ႁဵတ်းဢၼ်ၸိုဝ်ႈၸႂ်ႈလီငၢမ်းသိုဝ်ႈၼႃႈတႂ်ႈတႃႇၵဝ်ယူႇသေလႄႈပႂ်ႉၵမ်ပႂ်ႉၵျၢင်ႉထုင်းၽိင်ႈတြႃးၵဝ်ဢိၵ်ႇတင်းပိင်းၺၢပ်ႈၵဝ်တင်းလၢႆယူႇမိူၼ်ၸိူဝ်ႉၼင်ႇဢၼ်ၶႃႈၵဝ်တႃႇဝိတ်ႉႁဵတ်းၼၼ်ႉၸိုင်ၵဝ်တၵ်းမီးယူႇလူၺ်ႈၵၼ်တင်းမႂ်းလႄႈႁဵတ်းႁိူၼ်းဢၼ်မၼ်ႈၶိူင်ႇပုၼ်ႈမႂ်းမိူၼ်ၸိူဝ်ႉၼင်ႇဢၼ်ၵဝ်ႁဵတ်းပုၼ်ႈတႃႇဝိတ်ႉၼၼ်ႉလႄႈတၵ်းဢဝ်မိူင်းဢိသရေႇလပၼ်တီႈမႂ်းဢေႃႈ။ၵွပ်ႈပိူဝ်ႈလွင်ႈၼႆႉလႄႈၵဝ်တၵ်းယႃႉယူၵ်ႉၸိူဝ်ႉၶိူဝ်းၶုၼ်တႃႇဝိတ်ႉဢေႃႈ။
၃၉ ၼႂ်းၼၼ်ႉတၵ်းယႃႉယူၵ်ႉယူႇတႃႇသေႇဢမ်ႇၸႂ်ႈ၊ဝႃႈၼင်ႇၼႆဝႆႉယဝ်ႉ၊ဝႃႈၼင်ႇၼႆဢေႃႈ။
၄၀ ပိူဝ်ႈၼႆလႄႈသေႃးလမုၼ်ႇႁႃႁႂ်ႈလႆႈဢဝ်ယေႇရူဝ်းပုမ်ႇတၢႆလႄႈယေႇရူဝ်းပုမ်ႇၼၼ်ႉဢွၵ်ႇပၢႆႈၵႂႃႇၵႃႈတီႈမိူင်းဢေႇၵႅပ်ႉတုၸူးၵႃႈတီႈသိသၵ်ႉၶုၼ်ႁေႃၶမ်းဢေႇၵႅပ်ႉတုၼၼ်ႉသေယဝ်ႉ၊ယူႇၵႃႈၼႂ်းမိူင်းဢေႇၵႅပ်ႉတုၼၼ်ႉတေႃႇထိုင်ႁွတ်ႈသေႃးလမုၼ်ႇပေႃးတၢႆဢေႃႈ။
သေႃးလမုၼ်ႇတၢႆ
၄၁ လွင်ႈတၢင်းသေႃးလမုၼ်ႇဢၼ်ယင်းၵိုတ်းယင်းၵျၢၼ်ႇတင်းလၢႆဢိၵ်ႇတင်းၵႃႈဢၼ်မၼ်းႁဵတ်းတင်းၵႂၢမ်းၺၢၼ်ႇပိင်ႇၺႃႇမၼ်းၸိူဝ်းၼၼ်ႉၸိုင်တႅမ်ႈဝႆႉမီးယူႇၵႃႈၼႂ်းဝုတ်ႉထုသေႃးလမုၼ်ႇၼၼ်ႉယူႇဢေႃႈ။
၄၂ သေႃးလမုၼ်ႇၼၼ်ႉယူႇၵႃႈၼႂ်းဝဵင်းယေႇရုသလႅမ်ႇလႄႈဢုပ်ႉပိူင်ႇၸၢမ်ႇၸႃးမိူင်းဢိသရေႇလတင်းသဵင်ႈတင်းမူတ်းသီႇသိပ်းပီႊတဵမ်တဵမ်သေယဝ်ႉ၊သေႃးလမုၼ်ႇၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈၶၢမ်ႇတၢင်းဢၼ်သၢင်းၵျူဝ်ႇၵႃႈၼႂ်းဝဵင်းတႃႇဝိတ်ႉၸဝ်ႈပေႃႈမၼ်းၼၼ်ႉဢေႃႈ။ရူဝ်ႇပုမ်ႇလုၵ်ႈၸၢႆးမၼ်းသိုပ်ႇၼင်ႈႁၢင်ႈၼင်ႈႁေႃမၼ်းဢေႃႈ။