Chapter
၉
ၽြႃးပဵၼ်ၸဝ်ႈပေႃႇမႃးတီႈသေႃးလမုၼ်ႇ
၁ မိူဝ်ႈဢၼ်သေႃးလမုၼ်ႇႁဵတ်းႁိူၼ်းထႃႇဝရႃႉၽြႃးဢိၵ်ႇတင်းႁေႃၸဝ်ႈယဝ်ႉတူဝ်ႈလႄႈၵႃႈဢၼ်ၵၢင်ၸႂ်သေႃးလမုၼ်ႇၵႃႈမီးတဵမ်ထူၼ်ႈယဝ်ႉၼၼ်ႉၸိုင်ထႃႇဝရႃႉၽြႃးသမ်ႉၶိုၼ်းပေႃႇမႃးတီႈသေႃးလမုၼ်ႇ
၂ ၵမ်းတုတိယမိူၼ်ၸိူဝ်ႉၼင်ႇဢၼ်မၼ်းၸဝ်ႈပေႃႇမႃးတီႈမၼ်းၵႃႈတီႈဝဵင်းၵိပွင်ႇၼၼ်ႉလႄႈထႃႇဝရႃႉၽြႃးမီးဢမိင်ႉလႄႈဝႃႈ၊-
၃ ၵဝ်ငိၼ်းၵႂၢမ်းဢၼ်မႂ်းသူးတွင်းလဝ်ႈယွၼ်းၵႃႈတီႈၽၢႆႇၼႃႈၵဝ်ၼၼ်ႉယဝ်ႉ။ၵဝ်ႁႂ်ႈႁိူၼ်းဢၼ်မႂ်းတႄႇႁဵတ်းၼႆႉမူတ်းၸၢင်ႇလႄႈႁႂ်ႈၼႃႇမႃႉၸိုဝ်သဵင်ၵဝ်တႄႇယူႇၵႃႈတီႈၼၼ်ႉတႃႇသေႇယဝ်ႉ။မၢၵ်ႇတႃၵဝ်ဢိၵ်ႇတင်းႁူဝ်ၸႂ်ၵဝ်တၵ်းမီးယူႇၵႃႈတီႈၼၼ်ႉသေႇသေႇဢေႃႈ။
၄ ပေႃးမႂ်းမီးတၢင်းဢၼ်ႁူဝ်ၸႂ်သိုဝ်ႈတေႃႇ၊တၢင်းဢၼ်ႁူဝ်ၸႂ်ၸေးၸုမ်ႇသေလႄႈၵႂႃႇမႃးၵႃႈတီႈၽၢႆႇၼႃႈၵဝ်မိူၼ်ႈၸိူဝ်ႉၼင်ႇဢၼ်ပေႃႈမႂ်းတႃႇဝိတ်ႉၵႂႃႇမႃးၼၼ်ႉလႄႈႁဵတ်းၸွမ်းၵႃႈၼင်ႇဢၼ်ၵဝ်သင်ႇလၢတ်ႈဝႆႉတီႈမႂ်းၼၼ်ႉလႄႈပႂ်ႉၵမ်ပႂ်ႉၵျၢင်ႉထုင်းၽိင်ႈတြႃးၵဝ်လွင်ႈတၢင်းဢၼ်ၵဝ်ၸီႇယၢင်ႇဝႆႉၸိူဝ်းၼၼ်ႉၸိုင်ၵဝ်တၵ်းႁႂ်ႈရႃႇၸႃႉပလၢင်ႇသိုင်ႇၸိုင်ႈဝၢၼ်ႈမိူင်းမႂ်းမိူင်းဢိသရေႇလ
၅ တႄႇယူႇတႃႇသေဢမ်ႇထၢတ်ႇၸွမ်းၵႃႈၼင်ႇဢၼ်ၵဝ်မီးၵတိဝႆႉတီႈပေႃႈမႂ်းတႃႇဝိတ်ႉဝႆႉဝႃႈ၊-ၸိူဝ်ႉၶိူဝ်းမႂ်းတၵ်းလႆႈၼင်ႈၵႃႈၼိူဝ်ရႃႇၸႃႉပလၢင်ႇမိူင်းဢိသရေႇလဢမ်ႇလႆႈထၢတ်ႈ၊ဝႃႈၼင်ႇၼႆဢေႃႈ။
၆ ပေႃးဢမ်ၼၼ်ပေႃးသူဢိၵ်ႇတင်းလုၵ်ႈသူလၢၼ်သူယင်းဢမ်ႇၸွမ်းလင်ၵဝ်လႄႈငိၵ်းဢွၵ်ႇတၢင်းၵႂႃႇသေလႄႈဢမ်ႇပႂ်ႉၵမ်ပႂ်ႉၸွမ်းပိင်းၺၢပ်ႈတြႃးၵဝ်ဢိၵ်ႇတင်းထုင်းၽိင်ႈတြႃးၵဝ်ဢၼ်ၵဝ်ဢဝ်ဝႆႉၵႃႈတီႈၽၢႆႇၼႃႈသူၼၼ်ႉလႄႈၵႂႃႇႁဵတ်းဝတ်ႈၵူဝ်းၵႂၢႆႇတီႈၽြႃးတၢင်ႇသူႇတၢင်ႇပႃးၸိုင်ၵဝ်တၵ်းပႄႇၽဵဝ်ႈမဵဝ်းဢိသရေႇလရပႅတ်ႈသေၵႃႈၼႂ်းမိူင်းဢၼ်ၵဝ်ပၼ်တီႈၶဝ်ၼႆႉဢေႃႈ။
၇ ႁိူၼ်းၸဝ်ႈဢၼ်ၵဝ်ႁႂ်ႈမူတ်းၸၢင်ႇပုၼ်ႈၼႃႇမႃႉၸိုဝ်သဵင်ၵဝ်ၼႆႉၵေႃႈၵဝ်တၵ်းပႄႇပႅတ်ႈသေၵႃႈတီႈသိုဝ်ႈၼႃႈတႂ်ႈတႃၵဝ်လႄႈမဵဝ်းဢိသရေႇလတၵ်းလႆႈပဵၼ်တီႈဢၼ်ႁဵတ်းပုင်ႇတႅၵ်ႈတီႈဢၼ်သေႉသွမ်းၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းဢေႃႈ။
၈ ပိၵ်ႉသမ်ႉႁိူၼ်းၸဝ်ႈၼႆႉပဵၼ်ဢၼ်သုင်လီသေၵေႃႈၶဝ်ၸိူဝ်းဢၼ်ပႆတၢင်းၸွမ်းတၢင်းၼၼ်ႉတၵ်းဢၢမ်းလႄႈႁဵတ်းသဵင်ဢၼ်သေႉသွမ်းသီႉသီႉသေႃႉသေႃႉယူႇသေလႄႈဝႃႈ၊-ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈထႃႇဝရႃႉၽြႃးႁဵတ်းၸိူဝ်ႉၼင်ႇၼႆတီႈမိူင်းၼႆႉတင်းႁိူၼ်းၸဝ်ႈၼႆႉဝႃႈၼင်ႇၼႆၸိုင်ပိူၼ်ႈတၵ်းဢွၼ်ၵၼ်ၶိုၼ်းလၢတ်ႈလႄႈဝႃႈ၊-
၉ ထႃႇဝရႃႉၽြႃးႁႂ်ႈၵႃႈဢၼ်ႁူၵ်းဢၼ်ႁၢႆႉၼႆႉႁွတ်ႈထိုင်ၵႃႈၼိူဝ်ၶဝ်ၵွပ်ႈပိူဝ်ႈဢၼ်ၶဝ်ၸုၼ်ႉပႅတ်ႈထႃႇဝရႃႉၽြႃးၽြႃးပဵၼ်ၸဝ်ႈၶဝ်ဢၼ်ၼုၵ်ႈဢဝ်ပူႇမွၼ်ႇၶဝ်ဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၼၼ်ႉသေလႄႈၶဝ်ၵႂႃႇပိုင်ႈဢိင်ၽြႃးတၢင်ႇသူႇတၢင်ႇပႃးလႄႈႁဵတ်းဝတ်ႈၵူဝ်းၵႂၢႆႇၼၼ်ႉယဝ်ႉ၊ဝႃႈၼင်ႇၼႆဢေႃႈ။
တၢင်ႁဵတ်းတၢင်းသၢင်ႈသေႃးလမုၼ်ႇတၢင်ႇၸိူဝ်ႉတၢင်မဵဝ်း
၁၀ မိူဝ်ႈဢၼ်ႁွတ်ႈတီႈသုတ်းသၢဝ်းပီႊဢၼ်သေႃးလမုၼ်ႇလႆႈတႄႇႁဵတ်းႁိူၼ်းၸဝ်ႈသွင်လင်ဢၼ်ဝႃႈႁိူၼ်းထႃႇဝရႃႉၽြႃး
၁၁ တင်းႁေႃၸဝ်ႈၼၼ်ႉၸိုင်ပိူဝ်ႈဢၼ်ႁိရမ်ႇၶုၼ်လူင်တုရု၊ပၼ်မႆႉဢႃႇရိတ်ႉ၊မႆႉပႅၵ်ႇဢိၵ်ႇတင်းၶမ်းၸွမ်းၵႃႈၼင်ႇဢၼ်ဢလူဝ်ႇမၼ်းမီးၼၼ်ႉလႄႈၶုၼ်လူင်သေႃးလမုၼ်ႇဢဝ်ဝဵင်းၵႃႈတီႈမိူင်းၵႃႇလိလႄးသၢဝ်းၼိုင်ႈပၼ်တီႈၶုၼ်လူင်ႁိရမ်ႇဢေႃႈ။
၁၂ ႁိရမ်ႇလုၵ်ႉသေၵႃႈတီႈဝဵင်းတုရုမႃးလႄႈလူႈတူၺ်းဝဵင်းဢၼ်သေႃးလမုၼ်ႇပၼ်တီႈမၼ်းၸိူဝ်းၼၼ်ႉသေယဝ်ႉဢမ်ႇၶိုတ်းၸႂ်ပဵင်းၸႂ်လႄႈလၢတ်ႈဝႃႈ၊-
၁၃ ၸဝ်ႈၼွင်ႉၵဝ်ဢိူၺ်း။ဝဵင်းဢၼ်ၸဝ်ႈပၼ်တီႈၵဝ်ၸိူဝ်းၼႆႉပဵၼ်ဝဵင်းၸိူဝ်ႉၼင်ႇႁိုဝ်ဝႃႈၼင်ႇၼႆသေလႄႈႁွင်ႉႁိၵ်ႈၸိုဝ်ၵႃႈတီႈၼၼ်ႉဝႃႈၵႃႇပုလတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။
၁၄ ႁိရမ်ႇၼၼ်ႉပၼ်ၶမ်းပၢၵ်ႇပၢႆသၢဝ်းတလၢၼ်ႇတၢၼ်ႇတီႈၶုၼ်ႁေႃၶမ်းဢေႃႈ။
၁၅ ၶုၼ်လူင်သေႃးလမုၼ်ႇၵဵပ်းဢဝ်ၵူၼ်းပုၼ်ႈဢၼ်တၵ်းလႆႈတႄႇႁဵတ်းႁိူၼ်းထႃႇဝရႃႉၽြႃး၊ႁေႃၸဝ်ႈ၊တိမိလေႃႇ၊လမ်းဝဵင်းယေႇရုသလႅမ်ႇ၊ဝဵင်းႁႃႇၸေႃႇ၊ဝဵင်းမေႇၵိတ်ႉတေႃႇ၊ဝဵင်းၵေႇၸႃႇၸိူဝ်းၼၼ်ႉဢေႃႈ။
၁၆ ဝဵင်းၵေႇၸႃႇၸမ်း၊ၽႃႇရေႃး၊ၶုၼ်ႁေႃၶမ်းမိူင်းဢေႇၵႅပ်ႉတုတိုၵ်းဢဝ်ဝဵင်းၼၼ်ႉသေယဝ်ႉဢဝ်ၽႆးတုတ်ႇပႅတ်ႈ၊ၽၼ်းတၢႆၵူၼ်းၶႃႇၼၼိဢၼ်ယူႇၵႃႈၼႂ်းဝဵင်းၼၼ်ႉၸိူဝ်းၼၼ်ႉသေလႄႈဢဝ်ဝဵင်းၼၼ်ႉႁဵတ်းလၢၵ်ႈသွင်ႇပၼ်တီႈလုၵ်ႈယိင်းမၼ်းမေးသေႃးလမုၼ်ႇၼၼ်ႉဢေႃႈ။
၁၇ ပိူဝ်ႈဢၼ်ပဵၼ်ၼင်ႇၼႆလႄႈသေႃးလမုၼ်ႇၶိုၼ်းလႆႈတႄႇႁဵတ်းဝဵင်းၵေႇၸႃႇ၊
၁၈ ဝဵင်းပိတ်ႉႁေႃႇရုၼ်ႇ၊ဝဵင်းပႃႇလတ်ႉၽၢႆႇတႂ်ႈ၊ဝဵင်းတႃႇတမေႃႇ၊ဢၼ်မီးၵႃႈၼႂ်းထိူၼ်ႇ၊
၁၉ ၵႃႈဢၼ်ပဵၼ်ဝဵင်းဢၼ်သိမ်းဝႆႉဢၼ်သေႃးလမုၼ်ႇပိူင်ႇၼၼ်ႉ၊ဢိၵ်ႇတင်းဝဵင်းတင်းလၢႆဢၼ်လႆႈလူထိင်းလေႃႉရထႃးၸဝ်ႈဝဵင်းတၢင်းလၢႆဢၼ်လႆႈလဵင်ႉမႃႉၸဝ်ႈဢိၵ်ႇတင်းၵႃႈဢၼ်သေႃးလမုၼ်ႇၶႂ်ႈတႄႇႁဵတ်းၵႃႈၼႂ်းဝဵင်းယေႇရုလႅမ်ႇ၊ၵႃႈၼိူဝ်လွႆလေႇပၼုၼ်ႇ၊ၵႃႈၼႂ်းသိုင်ႇၸိုင်ႈဝၢၼ်ႈမိူင်းၸဝ်ႈ
၂၀ ၵူႈတီႈၵူႈလႅၼ်ၸိူဝ်းၼၼ်ႉဢေႃႈ။ၵႃႈဢၼ်ပဵၼ်ၵူၼ်းမဵဝ်းဢႃႇမေႃးရိၵူၼ်းမဵဝ်းႁိတ်ႉတိ၊ၵူၼ်းမဵဝ်းၽေႇရၸိ၊ၵူၼ်းမဵဝ်းႁိဝိ၊ၵူၼ်းမဵဝ်းယေႇပုသိဢၼ်ပဵၼ်ၵူၼ်းမဵဝ်းဢိသရေႇလဢၼ်ၵိုတ်းဢၼ်ၵျၢၼ်ႇတီႈမိူင်းၸဝ်ႈဢၼ်ဝႃႈလုၵ်ႈၶဝ်လၢၼ်ၶဝ်ဢၼ်ၵိုတ်းဢၼ်ၵျၢၼ်ႇလိုၼ်းၶဝ်
၂၁ ၵႃႈတီႈမိူင်းၸဝ်ႈၵွပ်ႈပိူဝ်ႈဢၼ်ၵူၼ်းမဵဝ်းဢိသရေႇလတင်းလၢႆဢမ်ႇယႃႉၽဵဝ်ႈၶဝ်ပႅတ်ႈမူတ်းမူတ်းသဵင်ႈသဵင်ႈလႆႈၼၼ်ႉၸိုင်၊သေႃးလမုၼ်ႇၵဵပ်းဢဝ်ၵူၼ်းႁႂ်ႈၶၢမ်ႇႁဵတ်းၶႃႈတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။
၂၂ ၵူၼ်းမဵဝ်းဢိသရေႇလတင်းလၢႆၸမ်းသေႃးလမုၼ်ႇဢမ်ႇႁႂ်ႈၶၢမ်ႇႁဵတ်းၶႃႈ။ၶဝ်ၼၼ်ႉလႆႈပဵၼ်ႁူဝ်ႁၢၼ်ၵူၼ်းသိုၵ်းလႂ်၊ၵူၼ်းၸႂ်ႉၵူၼ်းသွႆၸဝ်ႈလႂ်၊မူးမၢတ်ႈၽွင်းမိူင်းလႂ်၊ႁူဝ်သိုၵ်းလႂ်၊ၶဝ်ၸိူဝ်းဢၼ်ဢုပ်ႉၵႃႈၼိူဝ်လေႃႉရထႃးၸဝ်ႈလႂ်၊ၶဝ်ၸိူဝ်းဢၼ်ဢုပ်ႉၵႃႈၼိူဝ်မႃႉၸဝ်ႈလႂ်ၸိူဝ်းၼၼ်ႉဢေႃႈ။
၂၃ မူးမၢတ်ႈလူင်ဢၼ်ဢုပ်ႉၵႃႈၼိူဝ်ၵၢၼ်ငၢၼ်းသေႃးလမုၼ်ႇလႄႈၸီႇယၢင်ႇၵႃႈၼိူဝ်ၵူၼ်းတင်းလၢႆၸိူဝ်းၼၼ်ႉမီးႁႃႈပၢၵ်ႇပၢႆႁႃႈသိပ်းဢေႃႈ။
၂၄ လုၵ်ႈယိင်းၶုၼ်ႁေႃၶမ်းၽႃႇရေႃးၼၼ်ႉဢွၵ်ႇသေၵႃႈၼႂ်းဝဵင်းတႃႇဝိတ်ႉလႄႈၶၢႆႉၸူးၵႃႈတီႈႁေႃၸဝ်ႈဢၼ်သေႃးလမုၼ်ႇတႄႇႁဵတ်းပုၼ်ႈမၼ်းၼၼ်ႉဢေႃႈ။သေႃးလမုၼ်ႇပွင်ႁဵတ်းပွင်မႄးတိမိလေႃႇဢေႃႈ။
၂၅ သေႃးလမုၼ်ႇဢဝ်ယိၸ်ႉဢၼ်တုတ်ႇၽႆးလႂ်၊ယိတ်ႉမိၵ်ႉသႁႃႇယႃႉလႂ်ပုၵ်ႉၸေႃႇၵႃႈၼိူဝ်ယိတ်ႉပလၢင်ႇဢၼ်မၼ်းတႄႇႁဵတ်းပုၼ်ႈထႃႇဝရႃႉၽြႃးၼၼ်ႉယေႈပီႊသၢမ်ပွၵ်ႈလႄႈဢဝ်ၼၢမ်ႇသႃႇတုတ်ႇၽႆးၵႃႈၼိူဝ်ယိတ်ႉပလၢင်ႇဢၼ်မီးၵႃႈတီႈၽၢႆႇၼႃႈထႃႇဝရႃႉၽြႃးၼၼ်ႉဢေႃႈ။ၼင်ႇၼၼ်လႄႈမၼ်းႁဵတ်းႁိူၼ်းၸဝ်ႈယဝ်ႉတူဝ်ႈသေဢေႃႈ။
၂၆ လၢႆးသမ်ႉၶုၼ်လူင်သေႃးလမုၼ်ႇတႄႇႁဵတ်းႁိူဝ်းသၢင်းၽေႃးတင်းလၢႆၵႃႈတီႈဝဵင်းဢေႇၸယုၼ်ႇၵႃႇပႃႇဢၼ်မီးၸပ်းၵၼ်ၸမ်ၵၼ်တင်းဝဵင်းဢေႇလုတ်ႉၵႃႈတီႈၽၢင်ႇပၢင်ႇလၢႆႇဢေႇတူင်ႇမိူင်းဢေႇတုင်ႇၼၼ်ႉဢေႃႈ။
၂၇ ၶုၼ်ႁိရမ်ႇၵေႃႈႁႂ်ႈၶႃႈမၼ်းၵူၼ်းမၼ်းဢၼ်ပဵၼ်ၵူၼ်းႁိူဝ်းသၢင်းၽေႃးဢၼ်ႁူႉလွင်ႈတၢင်းဢၼ်ၶၢမ်ႈပၢင်ႇလၢႆႇၸိူဝ်းၼၼ်ႉၶီႇလူၺ်ႈၵၼ်တင်းၶႃႈၵူၼ်းသေႃးလမုၼ်ႇၵႃႈၼိူဝ်ႁိူဝ်းသၢင်းၽေႃးၸိူဝ်းၼၼ်ႉဢေႃႈ။
၂၈ ၶဝ်ၼၼ်ႉၵႂႃႇၵႃႈတီႈမိူင်းဢေႃႇၽိ၇ လႄႈဢဝ်ၶမ်းသီႇပၢၵ်ႇပၢႆသၢဝ်းတလၢၼ်ႇတၢၼ်ႇၶိုၼ်းမႃးၸူးၵႃႈတီႈၶုၼ်လူင်သေႃးလမုၼ်ႇဢေႃႈ။