Chapter
၅
ၶိုင်ပွင်မႄးႁႅၼ်းတႄႇတင်ႈပိၵ်ႉမၢၼ်ႇၽြႃး
၁ ႁိရမ်ႇၶုၼ်လူင်တုရုလႆႈငိၼ်းလွင်ႈဢၼ်ၶဝ်ဢွၼ်ၵၼ်ပၼ်ၽိၵ်ႈသိၵ်ႈတီႈသေႃးလမုၼ်ႇႁႂ်ႈပဵၼ်ၶုၼ်ႁေႃၶမ်းတၢင်တူဝ်ပေႃႈမၼ်းယဝ်ႉၼၼ်ႉလႄႈမၼ်းပွႆႇၸႂ်ႉၶႃႈမၼ်းၵူၼ်းမၼ်းမႃးတီႈသေႃးလမုၼ်ႇဢေႃႈ။ႁိရမ်ႇၼၼ်ႉပဵၼ်ၵေႃႉပဵၼ်သေႈတႃႇဝိတ်ႉဢေႃႈ။
၂ လၢႆးသမ်ႉသေႃးလမုၼ်ႇၵေႃႈပွႆႇၸႂ်ႉၵူၼ်းၵႂႃႇၵႃႈတီႈႁိရမ်ႇသေလႄႈဝႃႈ၊-ၶုၼ်လူင်ႁူႉလွင်ႈဢၼ်ၸဝ်ႈပေႃႈၵဝ်တႃႇဝိတ်ႉၼၼ်ႉဢမ်ႇလႆႈတႄႇလႆႈႁဵတ်းႁိူၼ်းၸဝ်ႈပုၼ်ႈၼႃႇမႃႉၸိုဝ်သဵင်ထႃႇဝရႃႉၽြႃးၽြႃးပဵၼ်ၸဝ်ႈမၼ်း
၃ ၵွပ်ႈပိူဝ်ႈဢၼ်မၼ်းလႆႈႁဵတ်းသိုၵ်းႁဵတ်းသိူဝ်ၵူႈတီႈၵူႈလႅၼ်တေႃႇထိုင်ႁွတ်ႈထႃႇဝရႃႉၽြႃးဢဝ်ရၢၼ်ႇသူႇမၼ်းတင်းလၢႆၶျႃးတူၵ်းၵႃႈတီႈတႂ်ႈတိၼ်မၼ်းၼၼ်ႉယူႇဢေႃႈ။
၄ မိူဝ်ႈလဵဝ်ၼႆႉၸမ်းထႃႇဝရႃႉၽြႃးၽြႃးပဵၼ်ၸဝ်ႈၵဝ်ၸီႇယၢင်ႇႁႂ်ႈသိုၵ်းထၢတ်ႇသိုၵ်းယဵၼ်သတေီႈၵဝ်ဢေႃႈ။
ဢမ်ႇမီးၵေႃႉဢၼ်ႁဵတ်းရၢၼ်ႇသူႇၽၢႆႇၼိုင်ႈတင်းၵဝ်ဢိၵ်ႇတင်းလွင်ႈတၢင်းဢၼ်ဢမ်ႇလီဢမ်ႇငၢမ်းဢမ်ႇႁႄႉဢမ်ႇၶႅၼ်ၵဝ်။
၅ မိူဝ်ႈလဵဝ်ၼႆႉၸိုင်ၵဝ်မီးတၢင်းၵျၢမ်ႇတၢင်းပွင်တၵ်းတႄႇႁဵတ်းႁိူၼ်းၸဝ်ႈပုၼ်ႈၼႃႇမႃႉၸိုဝ်သဵင်ထႃႇဝရႃႉၽြႃးၽြႃးပဵၼ်ၸဝ်ႈၵဝ်မႅၼ်ႈၸွမ်းၵႃႈၼင်ႇဢၼ်ထႃႇဝရႃႉၽြႃးလၢတ်ႈတီႈၸဝ်ႈပေႃႈၵဝ်တႃႇဝိတ်ႉဝႆႉဝႃႈ၊-လုၵ်ႈၸၢႆးမႂ်းဢၼ်ၵဝ်တၵ်းဢဝ်တၢင်ႇၵႃႈၼိူဝ်ရႃႇၸႃႉပလၢင်ႇမႂ်းတၢင်တူဝ်မႂ်းၼၼ်ႉတၵ်းလႆႈတႄႇႁဵတ်းႁိူၼ်းၸဝ်ႈပုၼ်ႈၼႃႇမႃႉၸိုဝ်ႈသဵင်ၵဝ်ဢေႃႈ၊ဝႃႈၼင်ႇၼႆဝႆႉၼၼ်ႉဢေႃႈ။
၆ မိူဝ်ႈလဵဝ်ၼႆႉၸီႇယၢင်ႇႁႂ်ႈၶဝ်တီႇပွမ်ႈတႅပ်းၽၼ်းတူၼ်ႈဢႃႇရိတ်ႉတင်းလၢႆၵႃႈၼိူဝ်လွႆလေႇပၼုၼ်ႇသေၵမ်း။ၶႃႈၵဝ်ၵူၼ်းၵဝ်တၵ်းဢွၼ်ၵၼ်ၸွႆႈထႅမ်ၶႃႈၵူၼ်းၶုၼ်လူင်ဢေႃႈ။ၵဝ်တၵ်းပၼ်ၵႃႈမၼ်းၶၼ်မၼ်းတီႈၶႃႈၵူၼ်း
ၶုၼ်လူင်ၸွမ်းၵႃႈၼင်ႇဢၼ်ၶုၼ်လူင်ၸီႇယၢင်ႇၼၼ်ႉဢေႃႈ။ၶုၼ်လူင်ႁူႉလွင်ႈဢၼ်ၵႃႈၼႂ်းႁဝ်းၼႆႉဢမ်ႇမီးၵေႃႉဢၼ်မေႃပွမ်ႈမေႃၽၼ်းသေၵေႃႉသေၵူၼ်းမိူၼ်ၸိူဝ်ႉၼင်ႇၵူၼ်းမဵဝ်းၸိတုင်ႇတင်းလၢႆမေႃပွမ်ႈမေႃၽၼ်းၼၼ်ႉ၊ဝႃႈၼင်ႇၼႆဢေႃႈ။
၇ ၶုၼ်ႁိရမ်ႇငိၼ်းၵႂၢမ်းသေႃးလမုၼ်ႇၼၼ်ႉသေယဝ်ႉၸူမ်းသိူဝ်းၼႃႇလူင်လၢင်လႄႈဝႃႈ၊-ႁႂ်ႈထႃႇဝရႃႉၽြႃးဢၼ်ပၼ်လုၵ်ႈၸၢႆး
ဢၼ်မီးၺၢၼ်ႇလႄႈလႆႈဢုပ်ႉပိူင်ႇၵူၼ်းမဵဝ်းလူင်ၼႆႉတီႈတႃႇဝိတ်ႉၼၼ်ႉမီးမၢင်ႇၵလႃႇဝၼ်းမိူဝ်ႈၼႆႉသေၵမ်းလူၺ်ႈ၊ဝႃႈၼင်ႇၼႆသေလႄႈႁိရမ်ႇပွႆႇၸႂ်ႉၵူၼ်းမႃးတီႈသေႃးလမုၼ်ႇလႄႈၶိုၼ်းလၢတ်ႈလႄႈဝႃႈ၊-ၵဝ်ၶႆႈၸႂ်ဝူၼ်ႉၸႂ်လူၺ်ႈလွင်ႈတၢင်းဢၼ်ၶုၼ်လူင်သင်ႇလၢတ်ႈမႃးတီႈၵဝ်ၼၼ်ႉယဝ်ႉ။
၈ ၵဝ်တၵ်းႁဵတ်းၸွမ်းၵႃႈၼင်ႇဢၼ်ၶုၼ်လူင်မီးဢလူဝ်ႇၶႂ်ႈလႆႈမႆႉဢႃႇရိတ်ႉဢိၵ်ႇတင်းမႆႉပႅၵ်ႇၼၼ်ႉဢေႃႈ။
၉ ၶႃႈၵူၼ်းၵဝ်တၵ်းဢဝ်ၵႃႈတီႈၼိူဝ်လွႆလေႇပၼုၼ်ႇလူင်းၸူးၵႃႈတီႈပၢင်ႇလၢႆႇသေလႄႈၶၢတ်ႈႁဵတ်းပေးလႄႈဢဝ်ၸွမ်းသဵၼ်ႈတၢင်းပၢင်ႇလၢႆႇမႃးၸူးၵႃႈတီႈဢၼ်ၶုၼ်လူင်ၸီႇယၢင်ႇဝႆႉၼၼ်ႉသေလႄႈၵႄႈလိတ်ႈၵႃတီႈၼၼ်ႉသေယဝ်ႉၶုၼ်လူင်တၵ်းလႆႈႁပ်ႉဢဝ်ဢေႃႈ။ၶုၼ်လူင်တၵ်းလႆႈပၼ်ၸရိပ်ႈတၢင်းၵိၼ်ပုၼ်ႈၵူၼ်းႁၢင်ႈၵူၼ်းႁေႃတင်းလၢႆလႄႈႁႂ်ႈဢလူဝ်ႇၵဝ်လႆႈတဵမ်ထူၼ်ႈဢေႃႈ၊ဝႃႈၼင်ႇၼႆဢေႃႈ။
၁၀ ၼင်ႇၼၼ်လႄႈႁိရမ်ႇၼၼ်ႉပၼ်မႆႉဢႃႇရတ်ႉတင်းမႆႉပႅၵ်ႇတီႈသေႃးလမုၼ်ႇၸွမ်းၵႃႈၼင်ႇဢၼ်မၼ်းမီးဢလူဝ်ႇၶႂ်ႈလႆႈၼၼ်ႉဢေႃႈ။
၁၁ သေႃးလမုၼ်ႇၵေႃႈဢဝ်ၶဝ်ႈသၢၼ်ၶဝ်ႈၵျုင်ႇသွင်မိုၼ်ႇၵေႃႇရႃႉၼမ်ႉမၼ်းဢၼ်ၸႅတ်ႈယဝ်ႉထွင်ယဝ်ႉသၢဝ်းၵေႃႇရႃႉပၼ်တီႈႁိရမ်ႇဢေႃႈ။ၼင်ႇၼၼ်လႄႈသေႃႇလမုၼ်ႇပၼ်တီႈႁိရမ်ႇပုၼ်ႈယေႈပီႊယဝ်ႉယေႈပီႊဢေႃႈ။
၁၂ ထႃႇဝရႃႉၽြႃးၵေႃႈပၼ်ၺၢၼ်ႇတီႈသေႃးလမုၼ်ႇၸွမ်းၵႃႈၼင်ႇဢၼ်ၵတိၸဝ်ႈမီးၼၼ်ႉဢေႃႈ။ႁိရမ်ႇတင်းသေႃးလမုၼ်ႇသွင်ပႃးၼၼ်ႉဢမ်ႇပဵၼ်သိုၵ်းပဵၼ်သိူဝ်တေႃႇၵၼ်လႄႈႁိတ်းမိၵ်ႈသႁႃႇယႃႉၵၼ်ယူႇဢေႃႈ။
၁၃ ၶုၼ်သေႃးလမုၼ်ႇၵေႃႈၽႃႇၵဵပ်းဢဝ်ၵူၼ်းၵႃႈၼႂ်းၵူၼ်းဢိသရေႇလတင်းသဵင်ႈတင်းလူင်လႄႈၵူၼ်းဢၼ်ၽႃႇၵဵပ်းဢဝ်ၸိူဝ်းၼၼ်ႉမီးသၢမ်မိုၼ်ႇဢေႃႈ။
၁၄ မၼ်းပွႆႇၸႂ်ႉၶဝ်ၵႂႃႇၵႃႈတီႈလွႆလေႇပၼုၼ်ႇပဵၼ်လႄႉပဵၼ်ၵမ်းယေႈၸူမ်းယေႈပွၵ်ႈယေႈမိုၼ်ႈလႄႈၶဝ်ၼၼ်ႉလႆႈယူႇၵႃႈတီႈၼိူဝ်လွႆလေႇပၼၼ်ႇယေႈလိူၼ်လႆႈယူႇၵႃႈတီႈႁိူၼ်းသွင်လိူၼ်ဢေႃႈ။ဢတေႃႇၼိရမ်ႇလႆႈဢုပ်ႉၵႃႈၼိူဝ်ၶဝ်ၸိူဝ်းဢၼ်ၽႃႇၵဵပ်းၸိူဝ်းၼၼ်ႉဢေႃႈ။
၁၅ သေႃးလမုၼ်ႇၸႂ်ႉသွႆၶဝ်ၸိူဝ်းဢၼ်လႆႈႁၢပ်ႇလႆႈႁၢမ်ၼၼ်ႉၸဵတ်းမိုၼ်ႇဢိၵ်ႇတင်းၶဝ်ၸိူဝ်းဢၼ်လႆႈပွမ်ႈမႆႉၽၼ်းမႆႉၵႃႈၼိူဝ်သၼ်လွႆၼၼ်ႉပႅတ်ႈမိုၼ်ႇလႄႈၶဝ်ၸိူဝ်းဢၼ်ဢုပ်ႉလႄႈ
၁၆ လႆႈၸီႇယၢင်ႇၵႃႈၼိူဝ်ၵူၼ်းဢၼ်ႁဵတ်းၵၢၼ်ၸိူဝ်းၼၼ်ႉမီးသၢမ်ႁဵင်ပၢႆသၢမ်ႇပၢၵ်ႇဢေႃႈ။
၁၇ ၶဝ်ဢွၼ်ၵၼ်ဢဝ်မၢၵ်ႇႁိၼ်ဢၼ်ယႂ်ႇမၢၵ်ႇႁိၼ်ဢၼ်ထိူၵ်ႈၵႃႈထိူၵ်ႈၶၼ်ထၢၵ်ႇသပ်းႁႂ်ႈလႆႈဢဝ်မၢၵ်ႇႁိၼ်ဢၼ်ထၢၵ်ႇဢၼ်သပ်းတႄႇႁဵတ်းငဝ်ႈႁၢၵ်ႈတိူၵ်ႈႁိူၼ်းၸဝ်ႈၸွမ်းၵႃႈၼင်ႇဢၼ်ဢမိင်ႉၸဝ်ႈၶုၼ်လူင်မီးၼၼ်ႉဢေႃႈ။
၁၈ ၼင်ႇၼၼ်လႄႈလၢၵ်ႈသမႃးသေႃးလမုၼ်ႇဢိၵ်ႇတင်းလၢၵ်ႈသမႃးၶုၼ်ႁိရမ်ႇၸိူဝ်းၼၼ်ႉဢိၵ်ႇလူၺ်ႈၵၼ်တင်းၵူၼ်းၵေႇပႃႇတင်းလၢႆဢွၼ်ၵၼ်ပွင်ႁဵတ်းပွင်ႁႅၼ်းမႆႉၸိင်ႇတင်းမၢၵ်ႇႁိၼ်ဢၼ်တၵ်းတႄႇႁဵတ်းႁိူၼ်းၸဝ်ႈၼၼ်ႉဢေႃႈ။