Chapter
၄
မူးမၢတ်ႈၽွင်းမိူင်းသေႃးလမုၼ်ႇ
၁ ၶုၼ်လူင်သေႃးလမုၼ်ႇၼၼ်ႉဢုပ်ႉပိူင်ႇၸၢမ်ႇၸႃးမိူင်းဢိသရေႇလတင်းသဵင်ႈတင်းမူတ်းဢေႃႈ။
၂ မူးမၢတ်ႈၽွင်းမိူင်းၸဝ်ႈတင်းလၢႆၸမ်းပဵၼ်ဢႃႇၸရိလုၵ်ႈၸၢႆးယိတ်ႉပရေႃးႁိၵ်ႈၸႃႇတုၵ်ႉဢေႃႈ။
၃ ဢေႇလိႁေႃႇရိပ်ႉတင်းဢႁိယလုၵ်ႈၸၢႆးသိသၸိူဝ်းၼၼ်ႉပဵၼ်ၸရေးလူင်ၸဝ်ႈဢေႃႈ။
၄ ယေႃႇသၽတ်ႉလုၵ်ႈၸၢႆးဢႁိလုတ်ႉၼၼ်ႉပဵၼ်ဢတႂၢင်းဝုၼ်ႇဢေႃႈ။ပေႇၼႃႇယလုၵ်ႈၸၢႆးယေႃႇယတၼၼ်ႉပဵၼ်ႁူဝ်သိုၵ်းလူင်ဢေႃႈ။ၸႃႇတုၵ်ႉတင်းဢႃႇပျႃႇထႃႇပဵၼ်ယိတ်ႉပရေႃးႁိၵ်ႈဢေႃႈ။
၅ ဢႃႇၸရိလုၵ်ႈၸၢႆးၼႃႇသၼ်ႇၼၼ်ႉပဵၼ်ၵေႃႉဢၼ်ဢုပ်ႉၵႃႈၼိူဝ်ဝုၼ်ႇတင်းလၢႆဢေႃႈ။ၸႃႇပုတ်ႉလုၵ်ႈၸၢႆးၼႃႇသၼ်ႇၼၼ်ႉပဵၼ်ဝုၼ်ႇလူင်ဢိၵ်ႇတင်းၵေႃႉသေႈၶုၼ်ႁေႃၶမ်းဢေႃႈ။
၆ ဢႁိသႃႇၼၼ်ႉပဵၼ်ၵေႃႉဢၼ်ဢုပ်ႉၵႃႈၼိူဝ်ႁေႃၸဝ်ႈဢေႃႈ။ဢတေႃႇၼိရမ်ႇလုၵ်ႈၸၢႆးဢႃႇပတၼၼ်ႉပဵၼ်ဝုၼ်ႇၵဵပ်းၶွၼ်ႇၸဝ်ႈဢေႃႈ။
၇ သေႃးလမုၼ်ၶၢၼ်းၸရေးလူင်သိပ်းပၢႆသွင်ၵေႃႉဢၼ်လႆႈလႄႉၵၼ်ပွင်ႁႅၼ်းတၢင်းၵိၼ်တၢင်းၶူပ်းပုၼ်ႈၶုၼ်ႁေႃၶမ်းဢိၵ်ႇတင်းၵူၼ်းႁၢင်ႈၵူၼ်းႁေႃၸဝ်ႈၸိူဝ်းၼၼ်ႉဝႆႉၵႃႈၼိူဝ်မိူင်းဢိသရေႇလတင်းသဵင်ႈတင်းမူတ်းလႄႈၼႂ်းယေႈ၈ ပီႊယေႈၵေႃႉတၵ်းလႆႈပွင်ႁႅၼ်းတၢင်းၵိၼ်တၢင်းၶူပ်းယေႈလိူၼ်ဢေႃႈ။
၈ ၸိုဝ်ႈသဵင်ၶဝ်ၸမ်းပဵၼ်ပိၼ်ႇႁုရၵႃႈတီႈႁၢၼ်ႉလွႆဢေႇၽရိမ်ႇ။
၉ တေႇၵႃႇၵႃႈတီႈဝဵင်းမႃႇၵတ်ႉ၊ဝဵင်းသႃႇလပိၼ်ႇ၊ဝဵင်းပိတ်ႉသမေိတ်ႉ၊ဝဵင်းႁေႇလုၼ်ႇပိတ်ႉႁႃႇၼၢၼ်ႇ၊
၁၀ ႁေႇသိတ်ႉၵႃႈတီႈဝဵင်းဢႃႇရုပုတ်ႉဢိၵ်ႇတင်းဝဵင်းၸေႃႇၶေႃႇ၊မိူင်းႁေႇၽႃႇတင်းမိူင်း၊ဢၽိၼတပ်ႉၵႃႈတီႈမိူင်းတေႃႇရတီႇဢၼ်သုင်တင်းမိူင်းဢၼ်ပဵၼ်ၵူပ်းပဵၼ်ၵူႈႁူမ်ႈၵၼ်တင်းတႃႇၽတ်ႉလုၵ်ႈယိင်းၸဝ်ႈသေႃးလမုၼ်ႇ
၁၁ ၼၼ်ႉပႃႇၼႃႇလုၵ်ႈၸၢႆးဢႁိလုတ်ႉၵႃႈတီႈဝဵင်းတႃႇၼၵ်ႉဝဵင်းမေႇၵိတ်ႉတေႃႇဢိၵ်ႇတင်းလိၼ်ပဵင်းပိတ်ႉသၼ်ႇတင်းသဵင်ႈတင်းမူတ်း
၁၂ ဢၼ်မီးၵႃႈတီႈႁိမ်းဝဵင်းၸႃႇတၼၽၢႆႇတႂ်ႈဝဵင်းယေႇၸရေႇလဢၼ်ဢဝ်ၵႃႈတီႈဝဵင်းပိတ်ႉသၼ်ႇတေႃႇထိုင်ႁွတ်ႈ
၁၃ ဝဵင်းဢႃႇပေႇလမႁေႃႇလၼၼ်ႉလႄႈပူၼ်ႉသယွေၵ်ႇမမ်ႇၼၼ်ႉၵႂႃပဵၼ်ၵေႇပႃႇၵႃႈတီႈဝဵင်းရႃႇမုတ်ႉမိူင်းၵိလတ်ႉ၊ၵေႃႉဢၼ်ဢုပ်ႉၵႃႈၼိူဝ်ဝဵင်းတင်းလၢႆဢၼ်ယႃႇဢိရၵူၼ်းမၼႃႇသေႇပိူင်ႇ
၁၄ ၵႃႈတီႈမိူင်းၵိလတ်ႉဢိၵ်ႇတင်းလိၼ်ဢၵေႃႇၽမိူင်းပႃႇသၼ်ႇဢၼ်ဝႃႈဝဵင်းလူင်ႁူၵ်းသိပ်းဝဵင်းဢၼ်မီးလမ်းဝဵင်းလႂ်တင်းၵိူၼ်ႇတွင်းလိူင်ႇလႂ်ၸိူဝ်းၼၼ်ႉ။
၁၅ ဢႁိၼတပ်ႉလုၵ်ႈၸၢႆးဢိတ်ႉတေႃႇၵႃတီႈဝဵင်းမႁႃႇၼိမ်ႇၼၼ်ႉဢႁိမတ်ႉၵႃႈတီႈဢိူင်ႇၼပ်ႉထလဢၼ်ပဵၼ်ၵူပ်းပဵၼ်ၵူႈႁူမ်ႈၵၼ်တင်းပႃႇသမတ်ႉလုၵ်ႈယိင်းၸဝ်ႈသေႃးလမုၼ်ႇ
၁၆ ၼၼ်ႉပႃႇၼႃႉလုၵ်ႈၸၢႆးႁူႉသေႇၵႃႈတီႈဢိူင်ႇဢႃႇသႃႇတင်းဝဵင်းဢႃႇလုတ်ႉၼၼ်ႉယေႃႇသၽတ်ႉလုၵ်ႈၸၢႆးပႃႇရွႃႇၵႃႈတီႈဢိူင်ႇဢိသၶႃႇၼၼ်ႉ
၁၇ သိမိလုၵ်ႈလုၵ်ႈၸၢႆးဢေႇလႃႇၵႃႈတီႈဢိူင်ႇပိၼ်ႇယႃႇမိၼ်ႇၼၼ်ႉၵေႇပလုၵ်ႈၸၢႆးဢုရိၵႃႈတီႈမိူင်းၵိလတ်ႉ
၁၈ ဢၼ်ဝႃႈလိၼ်သိႁုၼ်ႇၶုၼ်ႁေႃၶမ်းဢႃႇမေႃးရိဢိၵ်ႇတင်းလိၼ်ဢေႃႇၶၶုၼ်ႁေႃၶမ်းပႃႇသၼ်ႇ
၁၉ ဢၼ်မၼ်းၵေႃႉလဵဝ်ၵူၺ်းလႆႈၸီႇယၢင်ႇၵႃႈၼႂ်းမိူင်းၼၼ်ႉ၊ၼၼ်ႉဢေႃႈ။
ၸရိပ်ႉတၢင်းၵိၼ်ပုၼ်ႈသေႃးလမုၼ်ႇ
၂၀ မိူဝ်ႈၼၼ်ႉၵူၼ်းမဵဝ်းယုတတင်းၵူၼ်းမဵဝ်းဢိသရေႇလတင်းလၢႆၼမ်ၼႃႇလႄႈၼပ်ႉဢၢၼ်ႇပဵၼ်မိူၼ်ၸိူဝ်ႉၼင်ႇသၢႆးၼမ်ႉသမ်ႇမုၵ်ႉတြႃႇၼၼ်ႉလႄႈဢွၼ်ၵၼ်ၵိၼ်ၶူပ်းမူၼ်ႈပျေႃႇယူႇဢေႃႈ။
၂၁ သေႃးလမုၼ်ႇလႆႈဢုပ်ႉပိူင်ႇၸၢမ်ႇၸႃးသိုင်ႇၸိုင်ႈဝၢၼ်ႈမိူင်းၵႃႈမီးဢဝ်ၵႃႈတီႈၸႃႉၸဵမ်ၼမ်ႉႁွင်ႊလူင်တေႃႇထိုင်ႁွတ်ႈမိူင်းၽိလိတ်ႉတိဢိၵ်ႇတင်းၶွပ်ႇၼမ်ႉလႅၼ်လိၼ်မိူင်းဢေႇၵႅပ်ႉတုသေလႄႈဢွၼ်ၵၼ်သၢၵ်ႈလၢၵ်ႈသွင်ႇပၼ်ႇၼႃႇလႄႈၵိုတ်းႁပ်ႉဢမူႉသေႃးလမုၼ်ႇၼႂ်းၸူဝ်ႈပၢၼ်မၼ်းၼၼ်ႉတဵမ်တဵမ်ဢေႃႈ။
၂၂ ၸရိပ်ႈတၢင်းၵိၼ်ဢၼ်ၸၢပ်ႈသႅင်ႇၵၼ်တင်းသေႃးလမုၼ်ႇပုၼ်ႈယေႈဝၼ်းယေႈဝၼ်းၸမ်းၽွင်ၶဝ်ႈမုၼ်းၵျုင်ႇသၢမ်သိပ်းၵေႃႇလႃႉၽွင်ၶဝ်ႈမုၼ်းမူႉယေႃးႁူၵ်းသိပ်းၵေႃႇလႃႉ၊ဝူဝ်းဢၼ်ၵိၼ်ၽိူင်းသိပ်းၼိုင်ႈဝူဝ်းဢၼ်ၵိၼ်ယိူဝ်ႈသၢဝ်းၼိုင်ႈသူဝ်းပၢၵ်ႇၼိုင်ႈဢိၵ်ႇတင်းယိူင်းၵႂၢင်ၸၢတ်ႇၶၢႆးလႂ်ၼူၵ်ႉဢၼ်ပီးလီမၼ်းလီလႂ်ၼၼ်ႉဢေႃႈ။
၂၃ မၼ်းၼၼ်ႉဢုပ်ႉပိူင်ႇလိၼ်ၵႃႈမီးၽၢႆႇပႃႈဝၼ်းတူၵ်းၼမ်ႉႁွင်ႊလူင်ဢဝ်ၵႃႈတီႈဝဵင်းတိၽသတေႃႇထိုင်ႁွတ်ႈဝဵင်းၵႃႇၸဢၼ်ဝႃႈၵႃႈၼိူဝ်ၶုၼ်ႁေႃၶမ်းတင်းသဵင်ႈတင်းလူင်ၽၢႆႇဝၼ်းတူၵ်းၼမ်ႉႁွင်ႊလူင်ၼၼ်ႉလႄႈ
၂၄ ၵႃႈတီႈႁိမ်းႁွမ်းလဵပ်ႈႁွပ်ႈမၼ်းၸိူဝ်းၼၼ်ႉပဵၼ်တၢင်းဢၼ်ထၢတ်ႇသိုၵ်းယဵၼ်သိုၵ်းဢေႃႈ။
၂၅ ၵူၼ်းမဵဝ်းယုတဢိၵ်ႇတင်းၵူၼ်းမဵဝ်းဢိသရေႇလတင်းလၢႆၸႃႉၸဵမ်ဝဵင်းတၼ်ႇတေႃႇထိုင်ႁွတ်ႈဝဵင်းပေႇရသေႇၽၸိူဝ်းၼၼ်ႉလႆႈယူႇၼိမ်ၼိမ်လီလီၵႃႈတႂ်ႈတူၼ်ႈၶိူဝ်းမၢၵ်ႇၸပိတ်ႉၶဝ်တင်းတူၼ်ႈမၢၵ်ႇလိူဝ်သၢင်းၽေႃးၶဝ်ႁင်းၽႂ်ႁင်းမၼ်းယူႇၼႂ်းၸူဝ်ႈပၢၼ်သေႃးလမုၼ်ႇၼၼ်ႉတဵမ်တဵမ်ဢေႃႈ။
၂၆ သေႃးလမုၼ်ႇၵေႃႈမီးလေႃႉမႃႉရထႃးသီႇမိုၼ်ႇဢိၵ်ႇတင်းႁူဝ်ႁၢၼ်ၵူၼ်းသိုၵ်းၶီႇမႃႉမိုၼ်ႇပၢႆသွင်ႁဵင်ဢေႃႈ။
၂၇ ၸရေးလူင်ၸိူဝ်းၼၼ်ႉၵေႃႈလႆႈပွင်ႁႅၼ်းတၢင်းၵိၼ်တၢင်းၶူပ်းပုၼ်ႈၶုၼ်လူင်သေႃးလမုၼ်ႇဢိၵ်ႇတင်းၶဝ်ၸိူဝ်းဢၼ်ၶဝ်ႈပႃးၵႃႈတီႈၶူင်ႇတီႈၵိၼ်ၶုၼ်လူင်သေႃးလမုၼ်ႇၼၼ်ႉယေႈၵေႃႉယေႈလိူၼ်လႄႈဢမ်ႇႁႂ်ႈလႆႈလုတ်ႈလႆႈႁၢမ်းသေၸိူဝ်ႉသေပိူင်ဢေႃႈ။
၂၈ ၶဝ်ႈမူႉယေႃးဢိၵ်ႇတင်းယိူဝ်ႈႁႅင်ႈပုၼ်ႈမႃႉၸဝ်ႈတင်းၵလႃႈဢူၵ်ႉတင်းလၢႆၵေႃႈၶဝ်လႆႈဢွၼ်ၵၼ်ဢဝ်မႃးၸူးၵႃႈတီႈၸဝ်ႈၸွမ်းၵႃႈၼင်ႇဢၼ်ထုၵ်ႇလႄႉထုၵ်ႇၵမ်းႁင်းၽႂ်ႁင်းမၼ်းၼၼ်ႉဢေႃႈ။
ၺၢၼ်ႇသေႃးလမုၼ်ႇ
၂၉ ၽြႃးပဵၼ်ၸဝ်ႈပၼ်ၺၢၼ်ပိင်ႇၺႃႇၼမ်ၼႃႇဢိၵ်ႇတင်းႁူဝ်ၸႂ်ဢၼ်ယႂ်ႇၼႃႇၵႂၢင်ႈၼႃႇမိူၼ်ၸိူဝ်ႉၼင်ႇသၢႆးၼမ်ႉသမ်ႇမုၵ်ႉတြႃႇၼၼ်ႉလႄႈ
၃၀ ပိင်ႇၺႃႇသေႃးလမုၼ်ႇၼၼ်ႉပူၼ်ႉလိူဝ်တွၼ်းသေပိင်ႇၺႃႇၵူၼ်းမိူင်းဝၼ်းဢွၵ်ႇတင်းသဵင်ႈတင်းလူင်ဢိၵ်ႇတင်းပိင်ႇၺႃႇၵူၼ်းမိူင်းဢေႇၵႅပ်ႉတုတင်းသဵင်ႈတင်းလူင်ဢေႃႈ။
၃၁ မၼ်းၼၼ်ႉယိင်ႈၶႅၼ်းမီးပိင်ႇၺႃႇလိူဝ်တၼ်းၼႃႇသေၵူၼ်းတင်းသဵင်ႈတင်းလူင်ဢိၵ်ႇတင်းဢေႇသၼ်ႇမဵဝ်းဢေႇၸရႁိတ်ႉတင်းႁေႇမၼ်ႇတင်းၶႃႇလၵေႃႇလတင်းတႃႇရတဢၼ်ပဵၼ်လုၵ်ႈၸၢႆးမႁေႃႇလဝ်းၼၼ်ႉလႄႈပဵၼ်ဢၼ်ႁူင်ႁၢင်းၸွတ်ႇတူဝ်ႈၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းဢၼ်မီးၵႃႈတီႈဢၼ်လဵပ်ႈႁွပ်ႈမၼ်းၼၼ်ႉဢေႃႈ။
၃၂ ၵႂၢမ်းသုၵ်ႉတၢမ်ႇဢၼ်မၼ်းလၢတ်ႈဝႆႉၼၼ်ႉမီးသၢမ်ႁဵင်ဢေႃႈ။ၵႂၢမ်းႁဵတ်းၵႂၢမ်းမၼ်းမီးႁဵင်ပၢႆဢေႃႈ။
၃၃ မၼ်းဢဝ်လွင်ႈၸႃႉၸဵမ်တူၼ်ႈဢႃႇရိတ်ႉဢၼ်မီးၵႃႈၼိူဝ်လွႆလေႇပၼုၼ်ႇတေႃႇထိုင်ႁွတ်ႈတူၼ်ႈႁုတ်ႉသပ်ႉဢၼ်ၸၢင်ႈဢွၵ်ႇၵႃႈတီႈႁိမ်းလၢမ်ႇဢုတ်ႇၼၼ်ႉဢွၵ်ႇသူပ်းဝႃႈလႄႈဢဝ်လွင်ႈမဵဝ်းတူဝ်၊မဵဝ်းၼူၵ်ႉ၊မဵဝ်းမူင်ႈ၊မဵဝ်းမႅင်း၊မဵဝ်းပႃ၊တင်းလၢႆဢွၵ်ႇသူပ်းဝႃႈဢေႃႈ။
၃၄ ၶုၼ်ႁေႃၶမ်းၵႃႈဢၼ်မီးၵႃႈၼိူဝ်လိၼ်မိူင်းဢၼ်လႆႈငိၼ်းသတၢင်းသဵင်ၶၢဝ်ၺၢၼ်ႇပိင်ႇၺႃသေႃးလမုၼ်ႇၼၼ်ႉၵေႃႈဢွၼ်ၵၼ်ပွႆႇၸႂ်ႉၵူၼ်းမႃးႁႂ်ႈလႆႈထွမ်ႇလႆႈငိၼ်းၵႂၢမ်းၺၢၼ်ႇပိင်ႇၺႃႇမၼ်းဢေႃႈ။