၉
တၢမ်ႇဢၼ်ဢိသရေလ လႆႈၶၢမ်ႇ
၁ မဵဝ်းဢိသရေႇလဢိူၺ်း။ယႃႇပေမီးၸႂ်ဢၼ်ၸူမ်းသိူဝ်းသႂၢင်ႇၸႂ်သေလႄႈ ၵႃႈဝႅၼ်မိူၼ်ၸိူဝ်ႉၼင်ႇၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၼၼ်ႉ။မႂ်းမီးၸႂ်ဢၼ်ၽၢတ်ႇယၢၼ်ၵၼ်တင်းၽြႃးပဵၼ်ၸဝ်ႈမႂ်းသေလႄႈ ၸပ်းၸွႆးမေႇထုင်ႇဢၼ်ဢမ်ႇတြႃးယူႇဢေႃႈ။မႂ်းၸၢင်ႊထုၵ်ႇၸႂ်ၵျိူၵ်ႈၸႂ် ၵႃႈၶၼ်ဢၼ်ၽိတ်းပိူင်ႈ ၵႃႈတီႈတလၢင်း ယဵပ်ႇၶဝ်ႈၵႃႈမီးၼၼ်ႉဢေႃႈ။
၂ တလၢင်းယဵပ်ႇၶဝ်ႈဢိၵ်ႇတင်းၶိူင်ႈဢၼ်ၼူတ်ႈမၢၵ်ႇၸပိတ်ႈ ဢမ်ႇလႆႈလဵင်ႉၸႂ်ၶဝ်။ ၼမ်ႉၸပိတ်ႈဢၼ်မႂ်ႇၵေႃႈတၵ်းထၢတ်ႇသေၵႃႈ တီႈၶဝ်ဢေႃႈ။
၃ ၶဝ်ၼၼ်ႉတၵ်းဢမ်ႇလႆႈယူႇၵႃႈတီႈမိူင်းထႃႇဝရႃႉၽြႃး၊မဵဝ်းဢေႇၽရိမ်ႇ ၼၼ်ႉတၵ်းလႆႈၶိုၼ်းမိူဝ်းၵႂႃႇၸူးၵႃႈတီႈမိူင်းဢေႇၵႅပ်ႉတုလႄႈ ၶဝ်တၵ်းလႆႈၵိၼ်တၢင်းၵိၼ် ဢၼ်ဢမ်ႇမူတ်းသႂ်ၵႃႈၼႂ်းမိူင်းဢႃႇသုရိၼၼ်ႉဢေႃႈ။ၶဝ်ဢမ်ႇလႆႈႁဵတ်းၶိူင်ႈပုၵ်ႉၸေႃႇဢၼ်သွၼ်းလေႃႇ ၼမ်ႉၸပိတ်ႈၼၼ်ႉတီႈထႃႇဝရႃႉၽြႃး။
၄ ၸိူဝ်းၼၼ်ႉ ပဵၼ်ဢၼ်ဢမ်ႇထုၵ်ႇၸႂ်ႈၵျိူၵ်ႈၸႂ်တီႈမၼ်းၸဝ်ႈ။ၼိူဝ်ႉယိၸ်ႉၶဝ်ၼၼ်ႉတၵ်းပဵၼ်ၸိူဝ်ႉၼင်ႇတၢင်းၵိၼ်တၢင်းၶူပ်း ၶဝ်ၸိူဝ်းဢၼ်ၸွမ်းမသႃႇလႄႈႁႆႈႁွင်ႉပွင်ႉၶၢၼ်းၼၼ်ႉလႄႈ ၶဝ်ၵႃႈဢၼ်ၵိၼ်ၶူပ်းမၼ်းၼၼ်ႉတၵ်းလႆႈႁွတ်ႈထိုင်တၢင်းဢၼ်ၵူဝ်ႈၵိူၵ်ႇဢေႃႈ။တၢင်းၵိၼ်တၢင်းၶူပ်းၶဝ်ၼၼ်ႉ တၵ်းပဵၼ်ပုၼ်ႈၶဝ်ၵူၺ်းလႄႈဢမ်ႇလႆႈဢဝ်သႂၢင်းၶဝ်ႈ ၵႃႈၼႂ်းႁိူၼ်းထႃႇဝရႃႉၽြႃး။
၅ ၼႂ်းမိူဝ်ႉဝၼ်းပွႆးထမ်ႇမႃႉ၊ ဝၼ်းပွႆးဢၼ်ႁဵတ်းပုၼ်ႈထႃႇဝရႃႉၽြႃးၼၼ်ႉသူတၵ်းႁဵတ်းၸိူဝ်ႉၼင်ႇႁိုဝ်။တူၺ်းလူ။
၆ ၶဝ်ဢွၵ်ႇသေ ၵႃႈၼႂ်း တၢင်းဢၼ်လူႉဢၼ်လႅဝ်ၵႂႃႇယဝ်ႉ။ၵူၺ်းၵႃႈမိူင်းဢေႇၵႅပ်ႉတုတၵ်းဢဝ်ၶဝ်ႁႂ်ႈၸူႉၵၼ်ၵွင်ၵၼ်ဝႆႉလႄႈ ဝဵင်းမိၼ်ႇၽိတၵ်းဢဝ်ၶဝ်သၢင်းၵျူဝ်ႇဢေႃႈ။တူၼ်ႈၼၢမ်တင်းလၢႆတၵ်းမုင်းႁူမ်ႇတီႈဢၼ်ၶဝ်ၸူႉသိမ်းဝႆႉငိုၼ်း ဢၼ်ၶဝ်ၸႂ်ၸပ်းၸႂ်ၸွႆးယူႇၸိူဝ်းၼၼ်ႉလႄႈ တူၼ်ႈၼၢမ်လိၼ်တင်းလၢႆတၵ်းလႆႈမီး ၵႃႈၼႂ်းသုမ်ႉထဵင်ၶဝ်ၸိူဝ်းၼၼ်ႉဢေႃႈ။
၇ မိူဝ်ႉဝၼ်းဢၼ်လႆႈပၼ်တၢမ်ႇၼၼ်ႉႁွတ်ႈႁွတ်ႈထိုင်ယဝ်ႉ။ မိူဝ်ႉဝၼ်းဢၼ်လႆႈတႅတ်းပၼ်ဢပျႅတ်ႈၼၼ်ႉႁွတ်ႈထိုင်ယဝ်ႉ။မဵဝ်းဢိသရေႇလတၵ်းလႆႈႁူႉဢေႃႈ။ပရေႃးၽႅတ်ႈၼၼ်ႉပဵၼ် ဢၼ်မိူၵ်ႈလႄႈ ၵေႃႉဢၼ်လႆႈၶၢမ်ႇသူႉၵျေးၸူးဝိၺိၺ်ႇၼၼ်ႉပဵၼ်ၵူၼ်းယွင်ႇဢေႃႈ။လွင်ႈမၼ်းၸမ်းဢပျႅတ်ႈမႂ်းၼမ်ၼႃႇလႄႈ တၢင်းဢၼ်ၸႂ်မႂ်းႁဵတ်း ဢမ်ႇထုၵ်ႇၶတ်းၵၼ်ၼၼ်ႉၼမ်ၼႃႇဢေႃႈ။
၈ ဢေႇၽရိမ်ႇပဵၼ်ၵေႃႉဢၼ် ပႂ်ႉတႃႈပႂ်ႉၵင်ႈယူႇၽၢႆႇၽြႃးပဵၼ်ၸဝ်ႈၵဝ်ဢေႃႈ။ပရေႃးၽႅတ်ႈၼၼ်ႉပဵၼ်တူင်ႇႁဵဝ်ႉမူးသိူဝ်းၵႃႈၼႂ်းၵႃႈဢၼ်မၼ်းႁဵတ်းၼၼ်ႉလႄႈ ပဵၼ်ၵေႃႉဢၼ်ၸႂ်ႁဵတ်းဢမ်ႇထုၵ်ႇၶတ်းၵၼ်ၵႃႈၼႂ်းႁိူၼ်းၽြႃးမၼ်း ဢေႃႈ။
၉ ၶဝ်ဢွၼ်ၵၼ်ႁႂ်ႈတူဝ်ၸဝ်ႈၵဝ်ႇၵူဝ်ႈၵိူၵ်ႇၼႃႇလူင်လၢင်မိူၼ်ၸိူဝ်ႉၼင်ႇ ၼႂ်းၸူဝ်ႈပၢၼ်ၼႂ်းပၢၼ်ဝဵင်းၵိပႃႇၼၼ်ႉယဝ်ႉ။မၼ်းၸဝ်ႈတၵ်းၶုၵ်းၸႂ်လႆႈၶႆႈၸႂ်ထူပ်းဢပျႅတ်ႈၶဝ်လႄႈ ပၼ်တၢမ်ႇတူႉၸရိူၵ်ႈၶဝ်တင်းလၢႆၼၼ်ႉ ဢေႃႈ။
၁၀ ၵဝ်ထူပ်းႁၼ်မဵဝ်းဢိသရေႇလပဵၼ်ၸိူဝ်ႉၼင်ႇမၢၵ်ႇၸပိတ်ႈၵႃႈၼႂ်းထိူၼ်ႇၼၼ်ႉလႄႈ ၵဝ်ႁၼ်ပူႇသူမွၼ်ႇသူပဵၼ်ၸိူဝ်ႉၼင်ႇ မၢၵ်ႇလိူဝ်ႇသၢင်းၽေႃးဢၼ်သုၵ်းဢွၼ်တၢင်းပိူၼ်ႈ ၵႃႈတီႈတူၼ်ႈမၢၵ်ႇလိူဝ်ႇသၢင်းၽေႃးဢၼ်ၸၢင်ႊၸႃႉမၢၵ်ႇၼၼ်ႉဢေႃႈ။ၵူၺ်းၵႃႈၶဝ်ၼၼ်ႉၵႂႃႇၸူးၵႃႈ တီႈၽြႃးပႃႇလပေႇၵုရ လႄႈဢဝ်တူဝ်ၸဝ်ႈၵဝ်ႇဢၢပ်ႈပၼ် ၵႃႈတီႈလွင်ႈတၢင်းဢၼ်လီဢူၵ်းဢီဢၢႆၼၼ်ႉသေယဝ်ႉ ပဵၼ်ဢၼ်လီႁင်ႈဢဵတ်ႇသဵတ်ႇၸွမ်းၵႃႈၼင်ႇဢၼ် ၶဝ်ၸႂ်ၸပ်းၸႂ်ၸွႆးၼၼ်ႉ ဢေႃႈ။
၁၁ မုၵ်ႉၽုင်ဢေႇၽရိမ်ႇၼၼ်ႉတၵ်းမိၼ်ၵႂႃႇမိူၼ်ၸိူဝ်ႉၼင်ႇၼူၵ်ႉၼၼ်ႉလႄႈဢမ်ႇလႆႈမီးတၢင်းဢၼ်ၵိူတ်ႇလဵင်ႉလုၵ်ႈလဵင်ႉလၢင်း၊ တၢင်းဢၼ်ပႃးတွင်ႉ၊တၢင်း ဢၼ်ၸပ်းပတိၵ်ႉသၼ်ႇထေႇ။
၁၂ ပိၵ်ႉသမ်ႉၶဝ်လဵင်ႉလူလုၵ်ႈလၢင်းၶဝ်ၼႃႇလူင်လၢင်ထၼ်ႈပေႃး ဢမ်ႇႁႂ်ႈလႆႈၵိုတ်းလႆႈၵျၢၼ်ႇသေၵေႃႉသေၵူၼ်းသေၵေႃႈ ၵဝ်တၵ်းႁိမ်ဢဝ်ႁူင်ႇဢဝ်ဢေႃႈ။မိူဝ်ႈဢၼ်ၵဝ်ၸုၼ်ႉပႅတ်ႈၶဝ်ၼၼ်ႉၶဝ်တၵ်းမီးဢႃႉမင်ႇၵလႃႇဢမၢၼ်ႇၶၢၼ်ပဵၼ်ဢေႃႈ။
၁၃ ပိၵ်ႉသမ်ႉၵဝ်ႁၼ်ဢေႇၽရိမ်ႇ တႄႇယူႇၵႃႈၼႂ်းတီႈဢၼ်သႃႇယႃႇလီငၢမ်းၼၼ်ႉမိူၼ်ၸိူဝ်ႉၼင်ႇဝဵင်းတုရု ၼၼ်ႉသေၵေႃႈဢေႇၽရိမ်ႇ တၵ်းလႆႈဢဝ်လုၵ်ႈမၼ်းလၢင်းမၼ်း ဢၢပ်ႈပၼ်ၵႃႈၼႂ်းမိုဝ်းၵေႃႉဢၼ်ဢဝ်တၢႆၼၼ်ႉဢေႃႈ။
၁၄ ထႃႇဝရႃႉၽြႃးတီႈၶႃႈ။ၶႅၼ်းတေႃႈဢိတ်းလူပၼ်တီႈၶဝ်ၼၼ်ႉသေၵမ်းတီႈၶႃႈ။ၸဝ်ႈႁဝ်းတၵ်းလႆႈပၼ်ၸိူဝ်ႉၼင်ႇႁိုဝ်တီႈၶႃႈ။ၶႅၼ်းတေႃႈပၼ်တွင်ႉဢၼ်ဢမ်ႇပႃးပတိၵ်ႉသၼ်ႇထေႇ၊ ၼူမ်းဢၼ်ၼမ်ႉၼူမ်းဢမ်ႇဢွၵ်ႇ ၼၼ်ႉသေၵမ်းတီႈၶႃႈ။
၁၅ တူႉၸရိူၵ်ႈၵႃႈဢၼ်ၶဝ်ႁဵတ်းၼၼ်ႉမီးၵႃႈတီႈဝဵင်းၵိလၵႃႇလ လႄႈၵဝ်ၸင်ႇၶဝ်ၵႃႈတီႈၼၼ်ႉဢေႃႈ။ ၵွပ်ႈပိူဝ်ႈတူႉၸရိူၵ်ႈပျႅတ်ႈဢၼ်ၶဝ်ႁဵတ်းၼၼ်ႉလႄႈ ၵဝ်တၵ်းႁေႃႈၶဝ်ဢွၵ်ႇသေၵႃႈၼႂ်းႁိူၼ်းၵဝ်ဢေႃႈ။ၵမ်းလိုၼ်းၵဝ်တၵ်းဢမ်ႇႁၵ်ႉၶဝ်။ၶုၼ်ၶဝ်ၵႃႈမီးၼၼ်ႉ ပဵၼ်ၵေႃႉဢၼ်ၸၢင်ႊပုင်ႇၵၢၼ်ႇဢေႃႈ။
၁၆ ဢေႇၽရိမ်ႇ ၼၼ်ႉလႆႈၶၢမ်ႇတၢင်းဢၼ်တိူဝ်ႉဢၼ်ထုၵ်ႇလႄႈ မီးတၢင်းဢၼ်ႁၢၵ်ႈမၼ်းယူတ်းႁႅင်ႈယူႇသေလႄႈဢမ်ႇမၢၵ်ႇမၢၵ်ႇလႆႈ။ ပိၵ်ႉသမ်ႉၶဝ်ၵိူတ်ႇလဵင်ႉလုၵ်ႈလဵင်ႉလၢင်းမႃးသေၵေႃႈ ၵဝ်တၵ်းဢဝ်မၢၵ်ႇတွင်ႉၶဝ်ဢၼ်ၶဝ်ႁၵ်ႉၼႃႇၸိူဝ်းၼၼ်ႉတၢႆပႅတ်ႈဢေႃႈ။
၁၇ ၽြႃးပဵၼ်ၸဝ်ႈၵဝ် တၵ်းၸုၼ်ႉပႅတ်ႈၶဝ်ၵွပ်ႈပိူဝ်ႈဢၼ်ၶဝ်ဢမ်ႇထွမ်ႇဢဝ် ၵႂၢမ်းမၼ်းၸဝ်ႈၼၼ်ႉလႄႈ ၶဝ်ၼၼ်ႉ တၵ်းလႆႈပဵၼ်ၵေႃႉဢၼ်လႄႇၵႂႃႇလႄႇမႃးယူႇၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆဢေႃႈ။