၆
ဢိသရေလဢမ်ႇလႆႈၼွင်ႇတႃႉ
၁ မႃးမႃးဢိူၺ်း။ဢွၼ်ၵၼ်ၶိုၼ်းမိူဝ်းၸူးတီႈထႃႇဝရႃႉၽြႃးတႃႉႁဝ်း။ပိၵ်ႉသမ်ႉမၼ်းၸဝ်ႈၶူပ်းၶၢတ်ႇသေၵေႃႈမၼ်းၸဝ်ႈ တၵ်းႁႂ်ႈၶိုၼ်းပဵၼ်ၸိူဝ်ႉၼင်ႇပၵ်းၵဝ်ႇပိူင်ၵဝ်ႇၼၼ်ႉယူႇဢေႃႈ။ ပိၵ်ႉသမ်ႉမၼ်းၸဝ်ႈပၼ်တၢမ်ႇသေၵေႃႈမၼ်းၸဝ်ႈ တၵ်းမတ်ႉၵွပ်ႈမတ်ႉၶဵၼ်းပၼ်တၢင်း ၸဵပ်းတၢင်းသႅပ်ႇႁဝ်းယူႇဢေႃႈ။
၂ ပူၼ်ႉသွင်ဝၼ်းသေယဝ်ႉမၼ်းၸဝ်ႈတၵ်းႁႂ်ႈႁဝ်းဢသၢၵ်ႈလိပ်းယူႇလႄႈ ႁႂ်ႈႁဝ်းလုၵ်ႉၶိုၼ်း ၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉသေလႄႈ ႁဝ်းတၵ်းလႆႈဢသၢၵ်ႈလိပ်းယူႇၵႃႈတီႈၽၢႆႇၼႃႈမၼ်းၸဝ်ႈဢေႃႈ။ ႁဝ်းတၵ်းႁူႉတၵ်းၸႅင်ႈလႄႈ ၸွမ်းႁႃႁႂ်ႈလႆႈႁူႉၸႅင်ႈထႃႇဝရႃႉၽြႃးဢေႃႈ။
၃ ၶိင်ႇမိူဝ်ႈဢၼ်မၼ်းၸဝ်ႈဢွၵ်ႇၼၼ်ႉ တၵ်းပဵၼ်ၸိူဝ်ႉၼင်ႇဢႃႇရူင်ႇဢၼ်ၶိုၼ်ႈမႃးၶိင်ႇၵၢင်ၼႂ်ၼၼ်ႉ ဢမၢၼ်ႇၶၢၼ်ပဵၼ်ဢေႃႈ။မၼ်းၸဝ်ႈတၵ်းတူၵ်းသႂ်ႇၵႃႈၼိူဝ်ႁဝ်းမိူၼ်ၸိူဝ်ႉၼင်ႇဢၼ်ၽူၼ်တူၵ်း၊ ၸိူဝ်ႉၼင်ႇဢၼ်ၽူၼ်ႁၢင်ပီႊတူၵ်းယမ်းသႂ်ႇၵႃႈၼိူဝ်ၼႃႈလိၼ်ၼၼ်ႉဢေႃႈ။
၄ ဢေႇၽရိမ်ႇဢိူၺ်း။ၵဝ်တၵ်းလႆႈႁဵတ်းၸိူဝ်ႉၼင်ႇႁိုဝ်တီႈမႂ်း။ယုတဢိူၺ်း။ၵဝ်တၵ်းလႆႈႁဵတ်းၸိူဝ်ႉၼင်ႇႁိုဝ်တီႈမႂ်း။ၸႂ်ၸေႇတၼႃႇသူၼၼ်ႉ ပဵၼ်ၸိူဝ်ႉၼင်ႇမွၵ်ႇၵုမ်ႈၶိင်ႇၵၢင်ၼႂ်ဢိၵ်ႇတင်းၼမ်ႉၼၢႆး ဢၼ်ၸၢင်ႊႁၢႆၵႂႃႇၸဝ်ႉ ၸဝ်ႉၼၼ်ႉဢေႃႈ။
၅ ပိူဝ်ႈၼႆလႄႈ ၵဝ်လႆႈဢဝ်ပရေႃးၽႅတ်ႈတင်းလၢႆ ၽၼ်းၶဝ်ၼၼ်ႉၶၢတ်ႇပဵၼ်ပွတ်းပဵၼ်တွၼ်ႈပႅတ်ႈယဝ်ႉ။ၵဝ်လႆႈဢဝ်ၵႂၢမ်းဢၼ်ဢွၵ်ႇသူပ်းၵဝ်ၼၼ်ႉဢဝ်ၶဝ်တၢႆပႅတ်ႈယဝ်ႉ။လွင်ႈတၢင်းဢၼ်ၵဝ်ၸီႇယၢင်ႇမႂ်းၸိူဝ်းၼၼ်ႉ ပဵၼ်ၸိူဝ်ႉၼငႃ်ႇႉမႅပ်ႈႁိူဝ်ႈဢွၵ်ႇ လႅင်းဢွၵ်ႇၼၼ်ႉဢေႃႈ။
၆ ၵဝ်ၵျိူၵ်ႈတၢင်းႁၵ်ႉၵရူႉၼႃႇလိူဝ်တွၼ်းၼႃႇသေတၢင်းဢၼ်ပုၵ်ႉၸေႃႇယိၸ်ႉလႄႈတၢင်းဢၼ် မိုတ်ႈၵိုဝ်းႁူႉၸၵ်းၽြႃးပဵၼ်ၸဝ်ႈ လိူဝ်တွၼ်းၼႃႇသေတၢင်းဢၼ်ပုၵ်ႉၸေႃႇယိၸ်ႉဢၼ် တုတ်ႇၽႆးၼၼ်ႉဢေႃႈ။
၇ ၶဝ်ၼၼ်ႉပူၼ်ႉလိူဝ်ပတိၺိၼ်ႇမိူၼ်ၸိူဝ်ႉၼင်ႇဢႃႇတၢမ်ႇၼၼ်ႉယဝ်ႉ။ၶဝ်ႁဵတ်းပရီ့ယေႇသေလႄႈ ယႃႉသႅတ်ႉၸႃႇၵဝ် ပႅတ်ႈၵႃႈၼႂ်းတီႈၼၼ်ႉ ယဝ်ႉ။
၈ ဝဵင်းၵိလတ်ႉၼၼ်ႉပဵၼ်တီႈဢၼ်ၶဝ်ၸိူဝ်းဢၼ်ႁဵတ်းဢႃႉထမ်ႇမႃႉၼၼ်ႉယူႇလႄႈ မီးႁွႆးတိၼ်ဢၼ်ၵူဝ်ႈ လိူတ်ႈၵူၼ်းၼၼ်ႉၼမ်ၼႃႇဢေႃႈ။
၉ ၸိူဝ်ႉၼင်ႇဢၼ်မုၵ်ႉၸူၼ်ၸိူဝ်းၸူၼ်လွမ်တူၺ်းၵူၼ်းယူႇၼၼ်ႉ ၶဝ်ၸိူဝ်းဢၼ်ၶဝ်ႈပႃးၼႂ်းမုၵ်ႉၼႂ်းၸိူဝ်းယိတ်ႉပရေႃးႁိၵ်ႈတင်းလၢႆၼၼ်ႉ ၸၢင်ႊဢဝ်ဢသၢၵ်ႈၵူၼ်းတၢႆၵႃႈတီႈသဵၼ်ႈတၢင်းဢၼ်ၵႂႃႇၸူးၵႃႈတီႈဝဵင်းသေႇၶိမ်ႇ ၼၼ်ႉဢေႃႈ။ၶဝ်ၸၢင်ႊႁဵတ်း ဢမူႉဢႃႉထမ်ႇမႃႉဢမၢၼ်ႇၶၢၼ်ပဵၼ် ဢေႃႈ။
၁၀ ၵဝ်လႆႈႁၼ်လွင်ႈတၢင်းဢၼ်လီၵူဝ်လီႁႄၼၼ်ႉၵႃႈၼႂ်းမဵဝ်းဢိသရေႇလယဝ်ႉ။ၵႃႈတီႈမဵဝ်းၼၼ်ႉဢေႇၽရိမ်ႇ ၸၢင်ႊႁဵတ်းမေႇထုင်ႇဢၼ်ဢမ်ႇတြႃးဢေႃႈ။
၁၁ ဢိသရေႇလၼၼ်ႉမီးတၢင်းဢၼ်ၵူဝ်ႈၵိူၵ်ႇဢေႃႈ။ၼွၵ်ႈသေၼၼ်ႉမဵဝ်းယုတဢိူၺ်း။မိူဝ်ႈဢၼ်ၵဝ်ဢဝ်ၵူၼ်းၵဝ်ဢၼလႆႈၶၢမ်ႇ တၢင်းဢၼ်သိမ်းၵႂႃႇၸိူဝ်းၼၼ်ႉၶိုၼ်းမႃးၼၼ်ႉၸိုင် ၶိင်ႇဢၼ်ပၢတ်ႇၶဝ်ႈလႆႈၶၢၼ်းဝႆႉပုၼ်ႈမႂ်းၼၼ်ႉယူႇဢေႃႈ။