၇
၁ မိူဝ်ႈဢၼ် ၵဝ်ႁဵတ်းႁႂ်ႈတၢင်းၸဵပ်းတၢင်းသႅပ်ႇဢိသရေႇလ ႁၢႆၼၼ်ႉၸိုင်ဢပျႅတ်ႈဢေႇၽရိမ်ႇဢိၵ်ႇတင်းလွင်ႈတၢင်း ဢၼ်ႁၢႆႉမိူၵ်ႈဢၼ်သမႃႇရိႁဵတ်းၼၼ်ႉထၢင်ႇသႃးပေႃႇမႃးဢေႃႈ။ၶဝ်ၼၼ်ႉႁဵတ်းတၢင်းဢၼ်ပႅတ်ႉလႅၼ်ယဝ်ႉ။ၽူႈလၵ်ႉၸၢင်ႊၶဝ်ႈၽၢႆႇတၢင်းၼႂ်းလႄႈမုၵ်ႉၸူၼ်ၸိူဝ်းၸူၼ်ၼၼ်ႉ ၸၢင်ႊတိုၵ်းတေႃးၽၢႆႇတၢင်း ၼွၵ်ႈဢေႃႈ။
၂ ၶဝ်ဢမ်ႇၶုၵ်းၸႂ်လႆႈၶၢႆႈၸႂ်ထူပ်းၵႃႈၼႂ်းႁူဝ်ၸႂ်ၶဝ်လူၺ်ႈ လွင်ႈဢၼ်ၵဝ်မၢတ်ႈတွင်းလွင်ႈတၢင်းဢၼ်ႁၢႆႉမိူၵ်ႈၵႃႈဢၼ်ၶဝ်ႁဵတ်းၼၼ်ႉဝႆႉယူႇၼၼ်ႉ။တေႃႈၵႃႈမိူဝ်ႈလဵဝ်ၼႆႉ တၢင်းၵမ်တၢင်းၵျၢင်ႉၶဝ်ၼၼ်ႉလွမ်ႉလဵပ်ႈႁွပ်ႈၶဝ်ဝႆႉယူႇသေလႄႈမီးယူႇသိုဝ်ႈၼႃႈတႂ်ႈတႃၵဝ် ဢေႃႈ။
၃ ၶဝ်ဢဝ်လွင်ႈတၢင်းဢၼ်ႁၢႆႉမိူၵ်ႈၶဝ်ၼၼ်ႉႁႂ်ႈၶုၼ်ႁေႃၶမ်းၸူမ်းသိူဝ်းလႄႈ ဢဝ်ၵႂၢမ်းမူႉသႃႇႁႂ်ႈၶုၼ်တင်းလၢႆၸူမ်းသိူဝ်းဢေႃႈ။ ၶဝ်တင်းသဵင်ႈတင်းလူင်ၼၼ်ႉပဵၼ်ၵေႃႉဢၼ်ၽိတ်းပိူင်ႈလူၺ်ႈ မေႇထုင်ႇဢၼ်ဢမ်ႇတြႃးလႄႈ ပဵၼ်မိူၼ်ၸိူဝ်ႉၼင်ႇမုၵ်ႈၽႆးၽီးၽႆး ဢၼ်ၸဝ်ႈၶဝ်ႈမုၼ်းသႂ်ႇၽႆးၼၼ်ႉဢေႃႈ။
၄ မၼ်းယင်းဢမ်ႇသူၼ်းၽႆးလႄႈ ယူႇၼိမ်ၼိမ်လီလီယူႇဢဝ်ၸႃႉၸဵမ်မိူဝ်ႈဢၼ် မၼ်းၼူတ်ႈၶဝ်ႈမုၼ်းလဵပ်းယဝ်ႉတေႃႇထိုင်ႁွတ်ႈမၼ်းထၼ်ႈပေႃး ပွင်းၶိုၼ်ႈၼၼ်ႉဢေႃႈ။
၅ ၼႂ်းဝၼ်းပွႆးဢၸႅၼ်ႇၶုၼ်ႁေႃၶမ်းႁဝ်းၼၼ်ႉ ၶုၼ်တင်းလၢႆမိင်းမဝ်းလူၺ်ႈဢၢႆႁႅင်းၼမ်ႉၸပိတ်ႈလႄႈ မၼ်းၸၢင်ႊယဵတ်ႇမိုဝ်းမၼ်းလူၺ်ႈၵၼ်တင်း ၶဝ်ၸိူဝ်းဢၼ် ႁဵတ်းဢမ်ႇပေႃးၼင်ႇႁိုဝ်တီႈပိူၼ်ႈၼၼ်ႉဢေႃႈ။
၆ ၼႂ်းမိူဝ်ႈဢၼ်ၶဝ်ယင်းတိုၵ်ႉ လွမ်တူၺ်းယူႇၼၼ်ႉၸိုင်ၶဝ်ႁႂ်ႈႁူဝ်ၸႂ်ၶဝ်သုတ်ႉၸပ်းသုတ်ႉၸူး မိူၼ်ၸိူဝ်ႉၼင်ႇမုၵ်ႉၽီးၽႆးၼၼ်ႉယဝ်ႉ။ပိၵ်ႉသမ်ႉၸဝ်ႈၶဝ်ႈမုၼ်းၶဝ်ၼၼ်ႉၼွၼ်းယူႇတင်းၶိုၼ်းသေၵေႃႈၶိင်ႇၵၢင်ၼႂ်ၽႆးၼၼ်ႉမီးတၢင်းဢၼ်မႆႈယူႇ မိူၼ်ၸိူဝ်ႉၼင်ႇၽႆးဢၼ်လုၵ်ႉၶိုၼ်ႈယူႇ ၼၼ်ႉဢေႃႈ။
၇ ၶဝ်တင်းသဵင်ႈတင်းလူင်ၼၼ်ႉမီးတၢင်းမႆႈမိူၼ်ၸိူဝ်ႉၼင်ႇမုၵ်ႈၽႆး တီႈၽီးၽႆးလႄႈၶဝ်ဢဝ်ၽႆးၶဝ် မႆႈၵူၼ်းဢၼ်ၸီႇယၢင်ႇတြႃးၶဝ်တင်းလၢႆပႅတ်ႈယဝ်ႉ။ ၶုၼ်ႁေႃၶမ်းၶဝ်တင်းသဵင်တင်းလူင်ၼၼ်ႉလူမ်ႉတူၵ်းယဝ်ႉ။ၼႂ်းၶဝ်ၼၼ်ႉဢမ်ႇမီးၵေႃႉဢၼ်သႅၼ်ႇႁွင်ႉႁႃ ၵဝ်သေၵေႃႉသေၵူၼ်း။
၈ ဢေႇၽရိမ်ႇႁူမ်ႈပွင်းလေႃးလေးလူၺ်ႈၵၼ်တင်း ၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆယူႇဢေႃႈ။ဢေႇၽရိမ်ႇပဵၼ်ၶႅပ်းၶဝ်ႈမုၼ်းဢၼ်ၽဝ်ၽၢၵ်ႇၼိုင်ႈၵူၺ်းလႄႈဢမ်ႇၽိုၼ်ႉဢမ်ႇဝၢႆႇၼၼ်ႉ ဢေႃႈ။
၉ မၼ်းယင်းဢမ်ႇႁူႉလႄႈၵူၼ်းတၢင်ႇသိုင်ႇတၢင်ႇမိူင်းတင်းလၢႆဢွၼ်ၵၼ်ၵိၼ်ႁႅင်းမၼ်းယဝ်ႉယဝ်ႉ။မၼ်းယင်းဢမ်ႇႁူႉလႄႈ ၶူၼ်ႁူဝ်ဢၼ်ႁွၵ်ႇဢၼ်ၶၢဝ်ၸွတ်ႇ တူဝ်ႈဝႆႉၵႃႈၼိူဝ်ႁူဝ်မၼ်းယဝ်ႉယဝ်ႉ။
၁၀ ပိၵ်ႉသမ်ႉမႃႇၼႃႉၸႂ်သုင်မဵဝ်းဢိသရေႇလ ၶၢမ်ႇသၢၵ်ႈသေႇယူႇသိုဝ်ႈၼႃႈတႂ်ႈတႃတူဝ်ၸဝ်ႈၵဝ်ႇသေၵေႃႈ မဵဝ်းဢၼ်ဢမ်ႇၶိုၼ်းမႃးၸူးတီႈထႃႇဝရႃႉၽြႃးၽြႃးပဵၼ်ၸဝ်ႈၶဝ်။ ဢမ်ႇထွၵ်ႈလူၺ်ႈ လွင်ႈတၢင်းၵႃႈမီးၸိူဝ်းၼၼ်ႉသေလႄႈ ႁႃဢဝ်မၼ်းၸဝ်ႈ။
၁၁ ဢေႇၽရိမ်ႇၼၼ်ႉပဵၼ်မိူၼ်ၸိူဝ်ႉၼင်ႇၼူၵ်ႉတူႈဢၼ်မိူၵ်ႈၼၼ်ႉလႄႈ ဢမ်ႇမီးၺၢၼ်ႇလႃးလႃး။ၶဝ်ၸၢင်ႊသႅၼ်ႇႁွင်ႉႁႃမိူင်းဢေႇၵႅပ်ႉတုလႄႈ ၸၢင်ႊၵႂႃႇပိုင်ႈၵႂႃႇဢိင်မိူင်းဢႃႇသုရိဢေႃႈ။
၁၂ ၼႂ်းမိူဝ်ႈဢၼ်ၶဝ်ယင်းတိုၵ်ႉၵႂႃႇယူႇၼၼ်ႉ ၵဝ်တၵ်းဢဝ်တူင်ႇႁဵဝ်ႉတူင်ႇၶိုမ်းၵဝ်လႄႈသုမ်ႇႁူမ်ႇၶဝ်ဢေႃႈ။ၵဝ်တၵ်းဢဝ်ၶဝ်ၶျႃးတူၵ်းတီႈတႅမ်ႇ မိူၼ်ၸိူဝ်ႉၼင်ႇၼူၵ်ႉၼိူဝ်ၾႃႉၵၢင်ႁၢဝ်ၼၼ်ႉဢေႃႈ။ၵဝ်တၵ်းသင်ႇသွၼ်သုင်းမႃႉၶဝ်ၸွမ်းၵႃႈၼင်ႇဢၼ်ပရိၵ်ႈသၢတ်ႈၶဝ် လႆႈငိၼ်းယဝ်ႉၼၼ်ႉ ဢေႃႈ။
၁၃ ၶဝ်ၼၼ်ႉမီးဢႃႉမၢင်ႇၵလႃႇၵွပ်ႈပိူဝ်ႈဢၼ်ၶဝ်ဢွၵ်ႇၵႂႃႇသေၵႃႈတီႈၵဝ်ၼၼ်ႉဢေႃႈ။ၶဝ်ပဵၼ်တီႈပုၼ်ႈဢၼ်တၵ်းယႃႉၽဵဝ်ႈပႅတ်ႈ ၵွပ်ႈပိူဝ်ႈဢၼ်ၶဝ်ပုင်ႇၵၢၼ်ႇၵဝ်လႄႈ ပိၵ်ႉသမ်ႉၵဝ်ထုတ်ႇဢဝ်ၶဝ်သေၵေႃႈၶဝ်လၢတ်ႈၵႂၢမ်းမူႉသႃႇယူႇၽၢႆႇၼိုင်ႈတင်းၵဝ်ဢေႃႈ။
၁၄ ၶဝ်ဢမ်ႇပႃးၸႂ်ၸေႇတၼႃႇသေလႄႈႁွင်ႉႁႃၵဝ်။ၶဝ်ဢွၼ်ၵၼ်ပွင်ႉၶၢင်းပွင်ႉမိုၼ်ယူႇၵႃႈၼိူဝ်ၵူႇတီႈၼွၼ်းၶဝ်ဢေႃႈ။ၶဝ်ၸူႉၵၼ်တုမ်ၵၼ် ႁႂ်ႈလႆႈၶဝ်ႈသၢၼ်ၶဝ်ႈပိူၵ်ႇၼမ်ႉၸပိတ်ႈ လႄႈဢွၼ်ၵၼ်ပုင်ႇၵၢၼ်ႇၵဝ်ဢေႃႈ။
၁၅ ပိၵ်ႉသမ်ႉၵဝ်သင်ႇသွၼ်သုင်းမႃႉၶဝ် ႁႂ်ႈၶႅၼ်မိုဝ်းၶဝ်ၵႅၼ်ႇၶႅင်သေၵေႃႈၶဝ်ၵျၢမ်ႇပွင်တၢင်းၵျၢမ်ႇတၢင်းပွင် ဢၼ်ဢမ်ႇလီယူႇၽၢႆႇ ၼိုင်ႈတင်းၵဝ်ဢေႃႈ။
၁၆ ပိၵ်ႉႉသမ်ႉၶဝ်ၶိုၼ်းမႃးသေၵေႃႈၶဝ်ဢမ်ႇၶိုၼ်းမႃးၸူးတီႈၸဝ်ႈ ဢၼ်သုင်မျၢတ်ႈၼႃႇသေပိူၼ်ႈၼၼ်ႉ။ၶဝ်ပဵၼ်ၸိူဝ်ႉၼင်ႇၵၢင်ႇဢၼ်ၸၢင်ႊလိင်ႇၸၢင်ႊလႅၼ်ၼၼ်ႉဢေႃႈ။ ၶုၼ်ၵဝ်ၸိူဝ်းၼၼ်ႉတၵ်းလူမ်ႉတၢႆလူၺ်ႈလၢပ်ႇလူၺ်ႈလႅဝ်း ၵွပ်ႈပိူဝ်ႈတၢင်းဢၼ်ၶဝ်သူပ်းၸႃးငႃးၽၢႆၼၼ်ႉဢေႃႈ။လွင်ႈတၢင်းၼႆႉတၵ်းလႆႈပဵၼ်တၢင်းဢၼ်သေႉသွမ်း ဢၼ်ၶဝ်တၵ်းလႆႈၶၢမ်ႇၵႃႈတီႈမိူင်းဢေႇၵႅပ်ႉတုၼၼ်ႉဢေႃႈ။