၅
ဢိသရေလလႆႈၶၢမ်ႇတၢင်းၸီႇယၢင်ႇ
၁ ယိတ်ႉပရေႃးႁိၵ်ႈၶဝ်ဢိူၺ်း။ဢွၼ်ၵၼ်ထွမ်ႇငိၼ်းတႃႉ။ၵူၼ်းမဵဝ်းဢိသရေႇလၶဝ်ဢိူၺ်း။ဢွၼ်ၵၼ်ထွမ်ႇငိၼ်းတႃႉ။ၵူၼ်းၼႂ်းႁေႃၶမ်းၶဝ်ဢိူၺ်း။ဢွၼ်ၵၼ်ႁႄႈႁူသူၸူးတႃႉ။သူတၵ်းလႆႈၶၢမ်ႇတၢင်းဢၼ်ၸႅတ်ႈထၢမ်ၸီႇယၢင်ႇဢေႃႈ။လွင်ႈမၼ်းၸမ်းသူပဵၼ်တူင်ႇႁဵဝ်ႉၵႃႈၼိူဝ်လွႆမိၸပႃႇ၊တူင်ႇၶိုမ်းဢၼ်ၵၢင်ဝႆႉၵႃႈၼိူဝ်လွႆ တႃႇပေႃႇ ယဝ်ႉ။
၂ ၶဝ်ၸိူဝ်းဢၼ်ၽွၵ်ႈပျၢၼ်ႇၶိုၼ်းၼၼ်ႉဢဝ်တူဝ်ယိၸ်ႉတၢႆၼမ်ၼႃႇလူင်လၢင်ဢေႃႈ။ပိူဝ်ႈၼႆလႄႈၵဝ်တၵ်းပၼ်တၢမ်ႇဢပျႅတ်ႈ တီႈၶဝ်တင်းသဵင်ႈတင်းလူင် ဢေႃႈ။
၃ ၵဝ်ႁူႉဢေႇၽရိမ်ႇယူႇဢေႃႈ။ဢိသရေႇလၵေႃႈဢမ်ႇမီးတၢင်းဢၼ်တဵတ်ႇမႅပ်းသေ ၵႃႈတီႈၽၢႆႇၼႃႈၵဝ်လႆႈ။တေႃႈလဵဝ်ၼႆႉဢေႇၽရိမ်ႇဢိူၺ်း။မႂ်းႁဵတ်းမေႇထုင်ႇဢၼ်ဢမ်ႇတြႃးလႄႈ ႁႂ်ႈဢိသရေႇလၼၼ်ႉမီး တၢင်းဢၼ်ၵူဝ်ႈၵိူၵ်ႇဢေႃႈ။
၄ ၶဝ်ဢမ်ႇမႄးၸီႇယၢင်ႇလွင်ႈတၢင်းဢၼ် ၶဝ်ႁဵတ်းဝႆႉၸိူဝ်းၼၼ်ႉ ႁႂ်ႈၶဝ်လႆႈၶိုၼ်းမႃးၵႃႈတီႈၽြႃးပဵၼ်ၸဝ်ႈၶဝ်။ၶဝ်ၸပ်းၸွႆးလူၺ်ႈၸႂ်သၽေႃးဢၼ်ႁဵတ်းမေႇထုင်ႇဢၼ်ဢမ်ႇတြႃးၼၼ်ႉယူႇလႄႈဢမ်ႇႁူႉၸၵ်းထႃႇဝရႃႉၽြႃး။
၅ မႃႇၼႃႉၸႂ်သုင်မဵဝ်းဢိသရေႇလ ၶၢမ်ႇသၢၵ်ႈသေႇသိုဝ်ႈၼႃႈတႂ်ႈတႃမၼ်းဢေႃႈ။ ပိူဝ်ႈၼႆလႄႈဢိသရေႇလဢိၵ်ႇတင်းဢေႇၽရိမ်ႇ တၵ်းလူမ်ႉတူၵ်းၵႃႈၼႂ်းဢပျႅတ်ႈၶဝ်လႄႈ မဵဝ်းယုတၵေႃႈတၵ်းလူမ်ႉတူၵ်းလူၺ်ႈ ၵၼ်တင်းၶဝ်ၼၼ်ႉဢေႃႈ။
၆ ပိၵ်ႉသမ်ႉၶဝ်ပႃးဢဝ်ၽုင်သူဝ်းၽုင်ဝူဝ်းၶဝ်သေလႄႈ ၵႂႃႇႁႂ်ႈလႆႈႁႃဢဝ်ထႃႇဝရႃႉၽြႃးသေၵေႃႈဢမ်ႇလႆႈထူပ်းလႆႈႁၼ်မၼ်းၸဝ်ႈ။မၼ်းၸဝ်ႈ ၽၢတ်ႇၵၼ်ပႅတ်ႈၵၼ်တင်းၶဝ်ယဝ်ႉ။
၇ ၶဝ်ယႃႉသႅတ်ႉၸႃႇဢၼ်ၶၢမ်ႇဢဝ်တီႈ ထႃႇဝရႃႉၽြႃးၼၼ်ႉပႅတ်ႈယဝ်ႉ။လွင်ႈမၼ်းၸမ်း ၶဝ်ၵိူတ်ႇလဵင်ႉၵူၼ်းတၢင်ႇၸိူဝ်ႉတၢင်ႇၶိူဝ်းမႃးယဝ်ႉ။ဢဝ်မိူဝ်ႈလဵဝ်ၼႆႉၵႂႃႇလိူၼ်ၼိုင်ႈတၵ်းၵိၼ်ၶဝ်ႈဢိၵ်ႇတင်းဢုၵ်ႉၸႃႇၶဝ် ပႅတ်ႈဢေႃႈ။
၈ ဢွၼ်ၵၼ်ပဝ်ႇၼႄး ၵႃႈၼႂ်းဝဵင်းၵိပႃႇဢိၵ်ႇတင်းၶရႃႇၵႃႈၼႂ်းဝဵင်းရႃႇမလႄႈဢွၼ်ၵၼ်သႅၼ်ႇႁွင်ႉၵႃႈၼႂ်းဝဵင်းပေႇသဝႅၼ်ႇတႃႉ။မဵဝ်းပိၼ်ႇယႃႇမိၼ်ႇဢိူၺ်း။
၉ တူၺ်းၶိုၼ်ႈၽၢႆႇတၢင်းလင်မႂ်းတႃႉ။ၼႂ်းၶိင်ႇမိူဝ်ႉဝၼ်းဢၼ်သင်ႇသွၼ်သုင်းမႃႉပၼ်သတိၼၼ်ႉ ဢေႇၽရိမ်ႇတၵ်းလႆႈလူႉလႅဝ်ဢေႃႈ။ၵဝ်ဢဝ်လွင်ႈတၢင်းဢၼ်တၵ်းပဵၼ်မႃးဢမၢၼ်ႇၶၢၼ်ပဵၼ်ၼၼ်ႉ ၽုၺ်ႇဢွၵ်ႇၼႄပျႃႉ ၵႃႈၼႂ်းမဵဝ်းဢိသရေႇလတင်းလၢႆဢေႃႈ။
၁၀ ၶုၼ်ယုတတင်းလၢႆပဵၼ်ၸိူဝ်ႉၼင်ႇၵေႃႉဢၼ် ၶၢႆႉသဝ်ၶၢႆႉလၵ်းဢၼ်မၢတ်ႈမၢႆလိၼ်ဝႆႉၼၼ်ႉဢေႃႈ။ၵဝ်တၵ်းဢဝ်တၢင်းၸႂ်မႆႈၶႆႈၸႃႉၵဝ်သွၼ်းလေႃႇ ၵႃႈၼိူဝ်ၶဝ်မိူၼ်ၸိူဝ်ႉၼင်ႇ ၼမ်ႉၼၼ်ႉဢေႃႈ။
၁၁ ဢေႇၽရိမ်ႇၼၼ်ႉလႆႈၶၢမ်ႇတၢင်းဢၼ် ၼိၵ်ႈၸၢၵ်ႈငႅၼ်းသေးလႄႈ လႆႈထူပ်းတၢင်းဢၼ်ၸီႇယၢင်ႇတြႃးသေလႄႈသုမ်းၸွမ်းဢေႃႈ။ လွင်ႈမၼ်းၸမ်းမၼ်းမီးဢလူဝ်ႇ ၶႂ်ႈၵမ်ၵျၢင်ႉၸွမ်းၵႃႈ ၼင်ႇဢၼ်ဢမိင်ႉမီးၼၼ်ႉယဝ်ႉ။
၁၂ ပိူဝ်ႈၼႆလႄႈၵဝ်တၵ်းပဵၼ်ၸိူဝ်ႉၼင်ႇတူဝ်မူင်ႈဢၼ်ၸၢင်ႊၶူပ်းၼၼ်ႉတီႈဢေႇၽရိမ်ႇ ဢိၵ်ႇတင်း ၸိူဝ်ႉၼင်ႇတၢင်းဢၼ်တူႇ ဢၼ်ၼဝ်ႈၼၼ်ႉတီႈမဵဝ်းယုတဢေႃႈ။
၁၃ မိူဝ်ႈဢၼ်ဢေႇၽရိမ်ႇႁၼ်တၢင်းၶႆႈတၢင်းပဵၼ်မၼ်း၊ မိူဝ်ႈဢၼ်ယုတႁၼ်တၢင်းၸဵပ်းတၢင်းသႅပ်ႇမၼ်းၼၼ်ႉၸိုင် ပိၵ်ႉသမ်ႉဢေႇၽရိမ်ႇၵႂႃႇၵႃႈတီႈၶုၼ်ဢႃႇသုရိလႄႈ ပွႆႇၸႂ်ႉၵႂႃႇၵႃႈတီႈၶုၼ်ႁေႃၶမ်းဢၼ်ၸၢင်ႊတွပ်ႇၸၢင်ႊထဵင်ၼၼ်ႉသေၵေႃႈ ၶုၼ်ၼၼ်ႉဢမ်ႇႁႂ်ႈတၢင်းၶႆႈတၢင်းပဵၼ် သူၶႅၼ်းမႃးလႆႈ။
၁၄ တၢင်းၸဵပ်းတၢင်းသႅပ်ႇသူၵေႃႈဢမ်ႇႁႂ်ႈႁၢႆလႆႈ။လွင်ႈမၼ်းၸမ်းၵဝ်တၵ်းပဵၼ်ၸိူဝ်ႉၼင်ႇသၢင်ႇသီႈၼၼ်ႉတီႈဢေႇၽရိမ်ႇ ဢိၵ်ႇတင်းၸိူဝ်ႉၼင်ႇသၢင်ႇသီႈၼုမ်ၼၼ်ႉတီႈမဵဝ်းယုတဢေႃႈ။ၵဝ်ၼႆႉယဝ်ႉ၊ၵဝ်ၼႆႉယဝ်ႉ၊တၵ်းၶူပ်းၶၢတ်ႇသေလႄႈဢွၵ်ႇၵႂႃႇဢေႃႈ။ ၵဝ်တၵ်းၵၢပ်ႈဢဝ်ၵႂႃႇလႄႈ ၽူႈ လႂ်ဢမ်ႇၼုၵ်ႈဢမ်ႇထွၼ် ဢဝ်လႆႈ။
၁၅ ၵဝ်တၵ်းၵႂႃႇလႄႈၶိုၼ်းမိူဝ်းၸူးၵႃႈတီႈဢၼ်ၵဝ်ယူႇၼၼ်ႉ တေႃႇထိုင်ႁွတ်ႈၶဝ်လႆႈၶၢမ်ႇတၢမ်ႇဢပျႅတ်ႈၶဝ်သေလႄႈႁႃဢဝ်ၼႃႈၵဝ်ၼၼ်ႉဢေႃႈ။ မိူဝ်ႈဢၼ်ၶဝ်ထူပ်းၽေးၼၼ်ႉၸိုင် ၶဝ်တၵ်းႁိပ်ႇၼႅတ်ႈႁႃဢဝ်ၵဝ်ဢေႃႈ။