၁၀
၁ မဵဝ်းဢိသရေႇလ ပဵၼ်တူၼ်ႈၶိူဝ်းမၢၵ်ႇၸပိတ်ႈဢၼ်ၽိူဝ်ၼႃၽိူဝ်ပူင်းလႄႈမၢၵ်ႇမၢၵ်ႇၼမ်ၼႃႇဢေႃႈ။ၸွမ်းၵႃႈၼင်ႇဢၼ် မၢၵ်ႇမၼ်းယႂ်ႇၽႄႈၼမ်ၵိုၼ်းၼၼ်ႉသေလႄႈ မၼ်းႁႂ်ႈယိတ်ႉပလၢင်ႇမၼ်းယႂ်ႇၽႄႈၼမ်ၵိုၼ်းၼႃႇဢေႃႈ။ ၸွမ်းၵႃႈၼင်ႇဢၼ်မိူင်းမၼ်းလီၼၼ်ႉသေလႄႈ ၶဝ်ႁဵတ်းသဝ်တီႈၵူဝ်းၵႂၢႆႇ ဢၼ်လီ ဢၼ်ငၢမ်းၼၼ်ႉယဝ်ႉလူင်ပေႇ။
၂ ၶဝ်မီးၸႂ်သွင်ငၢမ်ႈဢေႃႈ။ၶဝ်တၵ်းလႆႈၶၢမ်ႇဢပျႅတ်ႈၵမ်းလဵဝ်ဢေႃႈ။မၼ်းၸဝ်ႈတၵ်းၵိူၼ်ႇယိတ်ႉပလၢင်ႇၶဝ်တူၵ်းပႅတ်ႈလႄႈ ယႃႉရုၵ်ႉထူႉ သၢင်းထူႉၶဝ်ပႅတ်ႈဢေႃႈ။
၃ တေႃႈလဵဝ်ၼႆႉၶဝ်တၵ်းလႆႈလၢတ်ႈလႄႈဝႃႈ၊-ၵွပ်ႈပိူဝ်ႈဢၼ်ႁဝ်းဢမ်ႇၵူဝ်ႁႄထႃႇဝရႃႉၽြႃးလႄႈ ႁဝ်းဢမ်ႇမီးၶုၼ်ႁေႃၶမ်း သေၵေႃႈမၼ်းတၵ်းႁဵတ်းၸိူဝ်ႉၼင်ႇႁိုဝ်ပုၼ်ႈႁဝ်းလႆႈ၊ ဝႃႈၼင်ႇ ၼႆဢေႃႈ။
၄ ၶဝ်ၸင်ႇဢွၼ်ၵၼ်ၵိၼ်ႇဝႃႈၵႂၢမ်းဢၼ်လၢႆလၢႆဢမ်ႇပွင်ႇၵႃႈသင်ယူႇ၊ ႁဵတ်းမိၵ်ႉသႁႃႇယႃႉတၢင်းဢၼ်ထုၵ်ႇၵၼ်ယူႇသေလႄႈ လၢတ်ႈၵႂၢမ်းမူႉသႃႇၵူၺ်းဢေႃႈ။ပိူဝ်ႈၼႆလႄႈတၢင်းဢၼ်ၸီႇယၢင်ႇတြႃးၼၼ်ႉတၵ်းလႆႈဢွၵ်ႇမႃး မိူၼ်ၸိူဝ်ႉၼင်ႇတူၼ်ႈယႃႈၶူၼ်တီႈ တိူၵ်ႇၼႃးၼၼ်ႉဢေႃႈ။
၅ ၵူၼ်းဝဵင်းသမႃႇရိၸိူဝ်းၼၼ်ႉတၵ်းဢွၼ်ၵၼ်ၵူဝ်ႁႄ ပုၼ်ႈဝူဝ်းဢွၼ်ႇပေႇသဝႅၼ်ႇၸိူဝ်းၼၼ်ႉဢေႃႈ။ တၵႃႇမၼ်းတင်းလၢႆတၵ်းႁႆႈႁွင်ႉပွင်ႉၶၢင်းလႄႈ ယိတ်ႉပရေႃးႁိၵ်ႈမၼ်းတင်းလၢႆတၵ်းဢွၼ်ၵၼ်သၼ်ႇသၼ်ႇဝႆဝႆ ပုၼ်ႈမုၼ်ၽုင်းမၼ်းၼၼ်ႉဢေႃႈ။လွင်ႈမၼ်းၸမ်းမုၼ်ၽုင်းမၼ်းၼၼ်ႉႁၢႆလၢႆၵႂႃႇယဝ်ႉ။
၆ မၼ်းတၵ်းလႆႈၶၢမ်ႇတၢင်းဢၼ်ဢဝ်ၵႂႃႇၵႃႈတီႈမိူင်းဢႃႇသုရိလႄႈ သၢၵ်ႈၵၢပ်ႈတီႈၶုၼ်ႁေႃၶမ်းဢၼ်ၸၢင်ႊတွပ်ႇၸၢင်ႊထဵင်ၼၼ်ႉဢေႃႈ။ဢေႇၽရိမ်ႇၼၼ်ႉသရေႇတၵ်းလူႉလႄႈဢိသရေႇလ ၼၼ်ႉတၵ်းလႆႈဢူၵ်းလႆႈဢၢႆ ၵွပ်ႈပိူဝ်ႈတၢင်းၵျၢမ်ႇတၢင်းပွင်တူဝ်ၸဝ်ႈၵဝ်ၼၼ်ႉဢေႃႈ။
၇ သမႃႇရိၸမ်းၶုၼ်ႁေႃၶမ်းမၼ်းလႆႈလူႉၵႂႃႇလႄႈ ပဵၼ်ၸိူဝ်ႉၼင်ႇပူၵ်ႇၼမ်ႉၵႃႈၼိူဝ်ၼႃႈၼမ်ႉ ၼၼ်ႉဢေႃႈ။
၈ ထႃႇၼႃႉတီႈသုင်ဝဵင်းဢႃႇဝႅၼ်ႇတီႈဢၼ်ဢိသရေႇလ ၽိတ်းပိူင်ႈၸိူဝ်းၼၼ်ႉ တၵ်းလႆႈၶၢမ်ႇတၢင်းဢၼ်ၵိူၼ်ႇတူၵ်းပႅတ်ႈလႄႈ တူၼ်ႈၼၢမ်ၵူႈၸိူဝ်ႉၵူႈပိူင်ႁူမ်ႇသုမ်ႇယိတ်ႉပလၢင်ႇၶဝ်ၸိူဝ်းၼၼ်ႉဢေႃႈ။ၶဝ်ၼၼ်ႉ တၵ်းလႆႈဢွၼ်ႁွင်ႉၸူးတီႈလွႆတင်းလၢႆလႄႈဝႃႈဢွၼ်ၵၼ်ႁူမ်ႇသုမ်ႇႁဝ်းသေၵမ်း၊ တီႈတူင်ႈတင်းလၢႆလႄႈဝႃႈ ဢွၼ်ၵၼ်တူၵ်းသႂ်ႇၵႃႈၼိူဝ်ႁဝ်းသေၵမ်း၊ဝႃႈၼင်ႇၼႆဢေႃႈ။
၉ ဢိသရေႇလဢိူၺ်း။မႂ်းမီးဢပျႅတ်ႈၸဵမ်မိူဝ်ႈၸူဝ်ႈပၢၼ်ဝဵင်းၵိပႃႇၼၼ်ႉယဝ်ႉ။ၶဝ်ဢွၼ်ၵၼ်ၸုၵ်းၵိုတ်းယူႇၵႃႈ တီႈဝဵင်းၼၼ်ႉဢေႃႈ။
၁၀ ၵူၺ်းၵႃႈတၢင်းဢၼ်တိုၵ်းၵၼ်တင်းၶဝ်ၸိူဝ်းဢၼ် ႁဵတ်းႁၢႆႉႁဵတ်းမိူၵ်ႈၼၼ်ႉၵႃႈတီႈဝဵင်းၵိပႃႇၼၼ်ႉတၵ်းၶိုတ်းထိုင်ၶဝ်ဢမ်ႇၸႂ်ႈႁိုဝ်။ၵဝ်တၵ်းၸွမ်းၼင်ႇဢလူဝ်ႇၵဝ်သေလႄႈ သင်ႇသွၼ်သုင်းမႃႉၶဝ် ဢေႃႈ။
၁၁ မိူဝ်ႈဢၼ်ၶဝ်မီးတၢင်းဢၼ်မတ်ႉၽုၵ်ႈဝႆႉယူႇၵွပ်ႈပိူဝ်ႈဢပျႅတ်ႈၶဝ်သွင်ပႃးၼၼ်ႉၸိုင် မဵဝ်းၵူၼ်းတင်းလၢႆတၵ်းလႆႈၸူႉၵၼ်တုမ်ၵၼ် ယူႇၽၢႆႇၼိုင်ႈတင်းၶဝ်ဢေႃႈ။ဢေႇၽရိမ်ႇၼၼ်ႉပဵၼ်ဝူဝ်းမေႈသိုဝ်ႇဢၼ်ပိုၵ်ႉယဝ်ႉသွၼ်ယဝ်ႉလႄႈမီးဢလူဝ်ႇၶႂ်ႈယဵပ်ႇၶဝ်သေၵေႃႈ ၵဝ်တၵ်းလုပ်ႈၸွမ်းၽႃၸွမ်းႁိမ်းၶေႃးမၼ်း ဢၼ်ႁၢင်ႊလီၼၼ်ႉလႄႈဢဝ်ၵေႃႉဢၼ်ၶီႇတၢင်ႇသႂ်ႇၵႃႈၼိူဝ် ဢေႇၽရိမ်ႇဢေႃႈ။ယုတၼၼ်ႉတၵ်းလႆႈထႆယူႇလႄႈ ယႃႇ ၵုပ်ႉ ၵေႃႈတၵ်းလႆႈၽႃႇၵွၼ်ႈလိၼ်ယူႇဢေႃႈ။
၁၂ ဢွၼ်ၵၼ်ဝၢၼ်ႇပိုၼ်ၸိူဝ်ႉၽၼ်း ဢၼ်သိုဝ်ႈတေႃႇပုၼ်ႈတူဝ်ၸဝ်ႈၵဝ်လႄႈ ပၢတ်ႇဢဝ်မၢၵ်ႇဢဝ်ႁူင်းၵရူႉၼႃႇတႃႉ။ဢွၼ်ၵၼ်ထႆၼႃး တီႈဢၼ်ဢမ်ႇပႆႇတွၼ်ႉႁဵတ်းၼၼ်ႉတႃႉ။ၶိင်ႇဢၼ်တၵ်းလႆႈႁႃဢဝ်ထႃႇဝရႃႉၽြႃးတေႃႇထိုင်ႁွတ်ႈမၼ်းၸဝ်ႈမႃးလႄႈ ႁႂ်ႈၽူၼ်တၢင်းဢၼ်သိုဝ်ႈတေႃႇတူၵ်းသႂ်ႇၵႃႈၼိူဝ်သူႇၼၼ်ႉ ႁွတ်ႈထိုင်ယဝ်ႉ။
၁၃ သူလႆႈထႆၼႃးတူႉၸရိူၵ်ႈယဝ်ႉ။သူလႆႈပၢတ်ႇဢဝ်ၶဝ်ႈဢပျႅတ်ႈယဝ်ႉ။ သူလႆႈၵိၼ်မၢၵ်ႇၵိၼ်ႁူင်းမူႉသႃႇယဝ်ႉ။လွင်ႈမၼ်းၸမ်း မႂ်းၸၢင်ႊဢိင်ပိုင်ႈတၢင်းဢၼ်မႂ်းၵမ်ၵျၢင်ႉသၢင်ႈႁဵတ်းဢိၵ်ႇတင်း ၵူၼ်းသိုၵ်းမႂ်းဢၼ်ၼမ် ၼႃႇၼၼ်ႉယဝ်ႉ။
၁၄ ပိူဝ်ႈၼႆလႄႈၵူၼ်းမႂ်းၸိူဝ်းဢွၼ်ၵၼ်တူင်ႉတိုၼ်ဢူၼ်ဢဵၼ်မေႃးမေးလႄႈ တိူၵ်ႈတီႈတိုၵ်းသိုၵ်းမႂ်းၵႃႈမီးၼၼ်ႉ တၵ်းလူႉလႅဝ်မိူၼ်ၸိူဝ်ႉၼင်ႇဢၼ်ၶုၼ်သႃႇလမၼ်ႇ ယႃႉၽဵဝ်ႈပႅတ်ႈဝဵင်း ပေႇသပေႇလၼႂ်းမိူဝ်ႈဢၼ်တိုၵ်းသိုၵ်းၼၼ်ႉဢေႃႈ။မေႈဢိၵ်ႇလူၺ်ႈၵၼ်တင်း လုၵ်ႈမၼ်းလၢင်းမၼ်းၸိူဝ်းၼၼ်ႉလႆႈၶၢမ်ႇတၢင်းဢၼ်ဢဝ်သွင်ႉသႂ်ႇၽတ်ႉသႂ်ႇ ၵႃႈၼိူဝ်လိၼ်ဢေႃႈ။
၁၅ ၼင်ႇၼၼ်လႄႈ တၵ်းလႆႈႁဵတ်းတီႈသူ ၵႃႈတီႈဝဵင်းပေႇသလ ၵွပ်ႈပိူဝ်ႈဢပျႅတ်ႈတူႉၸရိူၵ်ႈဢၼ်ယႂ်ႇၼႃႇလူင်လၢင်ၼၼ်ႉဢေႃႈ။ၶိင်ႇၵၢင်ၼႂ်ၶုၼ်ႁေႃၶမ်းဢိသရေႇလ တၵ်းလႆႈၶၢမ်ႇတၢင်းဢၼ်ယႃႉၽဵဝ်ႈပႅတ်ႈမူတ်းမူတ်းသဵင်ႈသဵင်ႈဢေႃႈ။