Chapter
၄၄
ၵွၵ်းငိုၼ်းၼႂ်းထူင်
၁ မၼ်းသင်ႇလၢတ်ႈတီႈ ၵူၼ်းဢုပ်ႉၵူၼ်းထိင်းႁိူၼ်းမၼ်းၼၼ်ႉလႄႈဝႃႈ၊-ဢဝ်တၢင်းၵိၼ်ၵႃႈဢၼ် ၶဝ် ပႃးလႆႈၼၼ်ႉသႂ်ႇပၼ်ၵႃႈၼႂ်းထူင်ၶဝ်တဵမ်တဵမ်တႃႉ။ဢဝ်ငိုၼ်းဢၼ်ၸၢပ်ႈသႅင်ႇၵၼ်တင်းၶဝ် ႁင်း ၽႂ်ႁင်းမၼ်းၼၼ်ႉ သႂ်ႇဝႆႉၵႃႈၼႂ်းမၢၵ်ႇထူင်ၶဝ်တႃႉ။
၂ ဢဝ်ၵွၵ်းငိုၼ်းၵဝ်ဢိၵ်ႇတင်းငိုၼ်းၵႃႊၶဝ်ႈၵျုင်ႇမၼ်းၼၼ်ႉသႂ်ဝႆႉၵႃႈၼႂ်းပၢၵ်ႇထူင်ၵေႃႉဢၼ်ဢသၢၵ်ႈလဵၵ်ႉသေပိူၼ်ႈၼၼ်ႉတႃႉ၊ ဝႃႈၼင်ႇၼႆလႄႈ၊ ၵေႃႉၼၼ်ႉ ႁဵတ်းၸွမ်းၵႃႈၼင်ႇဢၼ် ယုဝ်းသႅပ်ႉ ဝႃႈၼၼ်ႉဢေႃႈ။
၃ ၶိင်ႇၵၢင်ၼႂ်မိူဝ်ႈဢၼ်မိူင်းလႅင်းမႃးၼၼ်ႉၸိုင်၊ ၶဝ်လႆႈၶၢမ်ႇတၢင်းဢၼ်ပွႆႇမိူဝ်းၵွႃႇဢိၵ်ႇလူၺ်ႈၵၼ်တင်းမႃႉလီႈၶဝ်တင်းလၢႆဢေႃႈ။
၄ မိူဝ်ႈဢၼ်ၶဝ်ႁွတ်ႈထိုင်ၵႃႈၼွၵ်ႈဝဵင်း ၸူဝ်ႈဢၼ်ဢမ်ႇပႆႇၵႆၼၼ်ႉၸိုင် ယုဝ်းသႅပ်ႉ သင်ႇလၢတ်ႈတီႈၵူၼ်းဢုပ်ႉၵူၼ်းထိင်းႁိူၼ်းမၼ်းလႄႈဝႃႈ၊-လုၵ်ႉလႄႈလိုပ်ႈၸွမ်းၶဝ်ၼၼ်ႉၵွႃႇတႃႉ။ပေႃးၶိုတ်း ၶဝ် ၸိုင်၊လၢတ်ႈတီႈၶဝ်ဝႃႈ၊-ႁဵတ်းသင်လႄႈသူဢဝ်လွင်ႈတၢင်းဢၼ်ဢမ်ႇလီဢမ်ႇငၢမ်းလႄႈ တွပ်ႇတႅၼ်းလွင်ႈတၢင်းဢၼ်လီဢၼ် ငၢမ်း။
၅ ၼႆႉပဵၼ်ၵွၵ်းဢၼ်ၸဝ်ႈၵဝ်ၵိၼ်ၼၼ်ႉဢမ်ႇၸႂ်ႈႁိုဝ်။ပဵၼ်ၵွၵ်းဢၼ်မၼ်းၸၢင်ႊႁဵတ်းဢတၢတ်ႈ ဢၼ်လၢၵ်ႇလၢၵ်ႇလၢႆးလၢႆးၵႃႈၼႂ်းမၼ်းၼၼ်ႉ ဢမ်ႇၸႂ်ႈႁိုဝ်။သူႁဵတ်းဢမ်ႇလီဢမ်ႇငၢမ်း ၼႂ်းလွင်ႈတၢင်းဢၼ်သူႁဵတ်းၸိူဝ်ႉၼင်ႇၼႆၼၼ်ႉယဝ်ႉလူင်ပေႇ၊ ဝႃႈၼင်ႇၼႆတႃႉ၊ ဝႃႈၼင်ႇၼႆလႄႈ
၆ ၵေႃႉၼၼ်ႉၵေႃႈလိုပ်ႈၸွမ်းၶိုတ်ႈၶဝ်လႄႈ လၢတ်ႈၵႃႈၼင်ႇဢၼ်သင်ႇလၢတ်ႈဝႆႉၼၼ်ႉဢေႃႈ ၶဝ် ၼၼ်ႉၵေႃႈၶိုၼ်းလၢတ်ႈလႄႈဝႃႈ၊-
၇ ႁဵတ်းသင်လႄႈၸဝ်ႈႁဝ်းလၢတ်ႈၵႂၢမ်းၸိူဝ်ႉၼင်ႇၼႆၶႃႈ။ႁႂ်ႈဢမူႉၸိူဝ်ႉၼင်ၼၼ်ၼၼ်ႉ ၵႆၵၼ်တင်း ၶႃႈၸဝ်ႈႁဝ်းၸိူဝ်းၼႆႉသေ ၵမ်းလူၺ်ႈ။
၈ တူၺ်းၶႃႈလူႊ၊တေႃႈၵႃႈငိုၼ်းဢၼ်ၶႃႈၸဝ်ႈႁဝ်းၶဝ် လႆႈထူပ်းႁၼ်ၵႃႈၼႂ်းပၢၵ်ႇထူင်ၸိူဝ်း ၼၼ်ႉၶႃႈၸဝ်ႈႁဝ်းၶဝ်သမ်ႉယင်း ၶိုၼ်းဢဝ်မႃးၵႃႈတီႈၸဝ်ႈႁဝ်းၸဵမ်ၵႃႈတီႈမိူင်းၶႃႇၼၼ်ႇပုၼ်ႉၶႃႈယဝ်ႉ။ပေႃးပဵၼ်ၸိူဝ်ႉၼင်ႇၼႆၸိုင်ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၶႃႈၸဝ်ႈႁဝ်းၸိူဝ်းၼႆႉ တၵ်းလႆႈလၵ်ႉဢဝ်ငိုၼ်းၶမ်းၵႃႈၼႂ်းႁိူၼ်း ၸဝ်ႈႁဝ်းၼၼ်ႉၶႃႈ။
၉ ၵႃႈၼႂ်းၶႃႈၸဝ်ႈႁဝ်းၶဝ်ၸိူဝ်းၼႆႉပေႃးထူပ်းႁၼ်တီႈၽူႈလႂ်ၵေႃႈ ႁႂ်ႈၵေႃႉၼၼ်ႉတၢႆသေၵမ်းလူၺ်ႈ။ၶႃႈၸဝ်ႈႁဝ်းၸိူဝ်းၼႆႉၵေႃႈတၵ်းဢွၼ်ၵၼ်ၶၢမ်ႇႁဵတ်းၶႃႈၵႃႈတီႈၸဝ်ႈႁဝ်ႈၶႃႈဢေႃႈ၊ ဝႃႈၼင်ႇၼႆ ဢေႃႈ။
၁၀ ၵေႃႉၼၼ်ႉၵေႃႈၶိုၼ်းလၢတ်ႈလႄႈဝႃႈ၊- ႁႂ်ႈပဵၼ်ၵႃႈၼင်ႇၵႂၢမ်းသူၼႆႉတႃႉ။ၵူၺ်းၵႃႈထူပ်းႁၼ်တီႈၽူႈလႂ်သေဢမ်ႇဝႃႈၵေႃႉၼၼ်ႉတၵ်းလႆႈပဵၼ်ၶႃႈၵဝ်ဢေႃႈ။သူၸမ်း၊တၵ်းလႆႈၵၢင်းလွတ်ႈ ဢပျႅတ်ႈ ဢေႃႈ၊ ဝႃႈၼင်ႇၼႆသေယဝ်ႉ၊
၁၁ ၶဝ်ၼၼ်ႉဢွၼ်ၵၼ်ႁိပ်ႈၼႅတ်ႈၶျႃးထူင်ႇၶဝ်ႁင်းၽႂ်ႁင်းမၼ်း လူင်းၵႃႈၼိူဝ်လိၼ်သေလႄႈၽုၺ်ႇ ဢေႃႈ။
၁၂ ၵေႃႉၼၼ်ႉၵေႃႈသွၵ်ႈႁႃၸႃႉၸဵမ်ၵေႃႉယႂ်ႇတေႃႇထိုင်ႁွတ်ႈၵေႃႉလဵၵ်ႉလႄႈထူပ်း ႁၼ်ၵွၵ်းၼၼ်ႉၵႃႈၼႂ်း ထူင် ပိၼ်ႇယႃႇမိၼ်ႇ ဢေႃႈ။
၁၃ မိူဝ်ႈၼၼ်ႉၶဝ်ဢွၼ်ၵၼ်တိုတ်ႉသိၵ်ႇၶူဝ်းၼုင်ႈၶဝ်ပႅတ်ႈသေယဝ်ႉ ၵူႈၵေႃႉၵူႈၵူၼ်းသမ်ႉၶိုၼ်းဢဝ် ၶူဝ်းၶဝ်တၢင်ႇသႂ်ႇၵႃႈၼိူဝ်မႃႉလီႈတင်း လၢႆသေလႄႈၶိုၼ်းမိူဝ်းၵွႃႇၸူးၵႃႈတီႈဝဵင်းဢေႃႈ။
၁၄ ယုတဢိၵ်ႇတင်းပီႈၼွင်ႉမၼ်းၸိူဝ်းၼၼ်ႉ ၶိုၼ်းႁွတ်ႈထိုင်ၵႃႈတီႈႁိူၼ်း ယုဝ်းသႅပ်ႉ သေယဝ်ႉ ဢွၼ်ၵၼ်ၶုပ်ႉမူပ်ႇၵႃႈ ၼိူဝ်လိၼ်ၵႃႈတီႈၽၢႆႇၼႃႈ ယုဝ်းသႅပ်ႉဢေႃႈ။
၁၅ ယုဝ်းသႅပ်ႉၵေႃႈလၢတ်ႈတီႈၶဝ်လႄႈဝႃႈ၊- လွင်ႈတၢင်းဢၼ်သူႁဵတ်းၼႆႉပဵၼ်ၸိူဝ်ႉၼင်ႇႁိုဝ်။သူဢမ်ႇ ႁူႉလွင်ႈဢၼ်ၵူၼ်းၸၢႆးၸိူဝ်ႉၼင်ႇၵဝ်ၼႆႉၸၢင်ႊႁဵတ်းဢတၢတ်ႈဢၼ် လၢၵ်ႇလၢႆးၼၼ်ႉႁိုဝ်၊ဝႃႈၼင်ႇၼႆဢေႃႈ။
၁၆ ယုတ ၵေႃႈလဝ်ႈလၢတ်ႈလႄႈဝႃႈ၊-ၶႃႈၸဝ်ႈႁဝ်းၶဝ်ၸိူဝ်းၼႆႉတၵ်းၶိုၼ်းလၢတ်ႈတီႈၸဝ်ႈႁဝ်းလႆႈၸိူဝ်ႉၼင်ႇႁိုဝ်ၶႃႈ။တၵ်းဝႃႈလႆႈၸိူဝ်ႉၼင်ႇႁိုဝ်ၶႃႈ။တၵ်းႁႂ်ႈတူဝ်ၸဝ်ႈၵဝ်ႇလွတ်ႈတင်းဢမူႉၼႆႉလႆႈၸိူဝ်ႉၼင်ႇႁိုဝ်ၶႃႈ။ၽြႃးပဵၼ်ၸဝ်ႈထူပ်းႁၼ်ဢပျႅတ်ႈၶႃႈၸဝ်ႈႁဝ်းၸိူဝ်းၼႆႉယဝ်ႉ တီႈၶႃႈယဝ်ႉ။ၶႃႈၸဝ်ႈႁဝ်းၶဝ်တင်းလၢႆ ၸႃႉၸဵမ်ၵေႃႉဢၼ်လႆႈၶၢမ်ႇတၢင်းဢၼ်ထူပ်းႁၼ်ၵွၵ်း ၵႃႈၼႂ်းမိုဝ်းမၼ်းၼၼ်ႉပဵၼ် ၶႃႈၸဝ်ႈတီႈၶႃႈယဝ်ႈ၊မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၶိုၼ်းလၢတ်ႈလႄႈဝႃႈ၊-
၁၇ ႁႂ်ႈလွင်ႈတၢင်းဢၼ်တၵ်းႁဵတ်းၸိူဝ်ႉၼင်ႇၼႆၼၼ်ႉၵႆၵၼ်တင်းၵဝ်သေၵမ်း။ၵေႃႉဢၼ်လႆႈၶၢမ်ႇတၢင်းဢၼ်ထူပ်းႁၼ်ၵွၵ်း ၵႃႈၼႂ်းမိုဝ်းမၼ်းၼၼ်ႉတၵ်းလႆႈပဵၼ်ၶႃႈၵဝ်ဢေႃႈ။သူၸမ်းဢွၼ်ၵၼ်ၶိုၼ်းမိူဝ်းၵွႃႇၸူးၵႃႈတီႈပေႃႈသူပုၼ်ႉ ၼိမ်ၼိမ်လီလီ တႃႉ၊ဝႃႈၼင်ႇၼႆဢေႃႈ။
၁၈ မိူဝ်ႈၼၼ်ႉ ယုတ သုတ်ႉၸပ်းသုတ်ႉၸူးၵႃႈတီႈႁိမ်းမၼ်းလႄႈလဝ်ႈလၢတ်ႈဝႃႈ၊-ၸဝ်ႈႁဝ်း။ႁႂ်ႈၶႃႈၸဝ်ႈလႆႈဢဝ်တင်းၵႂၢမ်းၵမ်းၼိုင်ႈလဝ်ႈလၢတ်ႈထိုင်ႁူၸဝ်ႈႁဝ်းသေၵမ်းၶႃႈ။ယႃႇပေၸႂ်မႆႈၶႂ်ႈၸႃႉတီႈၶႃႈၸဝ်ႈႁဝ်းၼႆႉသေၵမ်းတီႈၶႃႈ။ၸဝ်ႈႁဝ်းပဵၼ်မိူၼ်ၼင်ႇၶုၼ်ႁေႃၶမ်းၽႃႇရေႃးတီႈၶႃႈဢေႃႈ။
၁၉ မိူဝ်ႈဢၼ်ၸဝ်ႈႁဝ်း ထၢမ်တီႈၶႃႈၸဝ်ႈႁဝ်းၶဝ်လႄႈဝႃႈ၊-သူမီးပေႃႈႁိုဝ်။မီးၼွင်ႉၸၢႆးႁိုဝ်၊ဝႃႈ ၼင်ႇ ၼႆၼၼ်ႉၶႃႈၸဝ်ႈႁဝ်းၶဝ်ၸိူဝ်းၼႆႉၵေႃႈ ၶိုၼ်းလဝ်ႈလၢတ်ႈတီႈ ၸဝ်ႈႁဝ်းလႄႈဝႃႈ၊-
၂၀ ၶႃႈၸဝ်ႈႁဝ်းၸိူဝ်းၼႆႉမီးပေႃႈဢၼ်ဢသၢၵ်ႈယႂ်ႇၼႃႇဢိၵ်ႇတင်း လုၵ်ႈၸၢႆးၵေႃႉလဵၵ်ႉၵေႃႉၼိုင်ႈ ဢၼ်မၼ်းလႆႈ မိူဝ်ႈဢၼ်ဢသၢၵ်ႈမၼ်းပေႃးထူၼ်ႈၵႄႇၼၼ်ႉၶႃႈဢေႃႈ။ပီႈဢၢႆႈမၼ်းတၢႆယဝ်ႉတီႈၶႃႈ။ၼႂ်းလုၵ်ႈၸၢႆးဢၼ်မေးမၼ်းၵိူတ်ႇလဵင်ႉမႃးၸိူဝ်းၼၼ်ႉၵိုတ်းၵျၢၼ်ႇဝႆႉမၼ်းၵေႃႉလဵဝ်ၵူၺ်းလႄႈ ပေႃႈမၼ်း ႁၵ်ႉမၼ်းၼႃႇၶႃႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်၊
၂၁ ၸဝ်ႈႁဝ်းၵေႃႈ လၢတ်ႈတီႈၶႃႈၸဝ်ႈႁဝ်းၸိူဝ်းၼႆႉလႄႈဝႃႈ၊-ဢွၼ်ၵၼ်ဢဝ်မၼ်းလူင်းမႃးၵႃႈတီႈ ၵဝ် ႁႂ်ႈတႃၵဝ်လႆႈႁၼ်မၼ်းတႃႉ၊ ဝႃႈၼင်ႇၼႆလႄႈၶႃႈၸဝ်ႈႁဝ်း ၸိူဝ်းၼႆႉၵေႃႈလဝ်ႈလၢတ်ႈတီႈ ၸဝ်ႈႁဝ်ႈလႄႈဝႃႈ၊-
၂၂ ၵေႃႉလဵၵ်ႉၼၼ်ႉ ဢမ်ႇၽၢတ်ႇဢမ်ႇယၢၼ်ၵၼ်တင်းပေႃႈမၼ်းလႆႈၶႃႈ။ပေႃးမၼ်းၽၢတ်ႇယၢၼ်ၵၼ်တင်းပေႃႈမၼ်းၸိုင်၊ပေႃႈမၼ်းတၵ်းတၢႆတီႈၶႃႈယဝ်ႉ၊ ဝႃႈၼင်ႇၼႆ သေၵေႃႈယႃႇ ၸဝ်ႈႁဝ်း လၢတ်ႈတီႈၶႃႈၸဝ်ႈႁဝ်းၶဝ်ၸိူဝ်းၼႆႉလႄႈဝႃႈ၊-
၂၃ ပေႃးၼွင်ႉၸၢႆးသူၵေႃႉလဵၵ်ႉသေပိူၼ်ႈၼၼ်ႉဢမ်ႇပႃးလူၺ်ႈၵၼ်တင်းသူလူင်းမႃးၸိုင်၊ ၵမ်း လိုၼ်း သူတၵ်းဢမ်ႇလႆႈႁၼ်ၼႃႈၵဝ်ထႅင်ႈၵူၺ်း၊ ဝႃႈ ၼင်ႇၼႆလႄႈ
၂၄ ၶႃႈၸဝ်ႈႁဝ်းၸိူဝ်းၼႆႉမိူဝ်ႈဢၼ်ၶိုၼ်းမိူဝ်းႁွတ်ႈထိုင်ၵွႃႇၵႃႈတီႈပေႃႈၶႃႈၸဝ်ႈႁဝ်းၶဝ်ၼၼ်ႉ ႁဝ်း ၶႃႈ ဢွၼ်ၵၼ်ဢဝ်ၵႂၢမ်းၸဝ်ႈႁဝ်းၶိုၼ်းလၢတ်ႈပၼ်တီႈ ပေႃႈၶႃႈၸဝ်ႈႁဝ်းၶဝ်ၼၼ်ႉၶႃႈဢေႃႈ။
၂၅ ပေႃႈၶႃႈၸဝ်ႈႁဝ်းၶဝ်ၼၼ်ႉၵေႃႈလၢတ်ႈဝႃႈ၊-သမ်ႉၵွႃႇလႄႈသိုဝ်ႉဢဝ်ထႅင်ႈဢိတ်းၼိုင်ႈ ပုၼ်ႈဢၼ်ႁဝ်းတၵ်းၵိၼ်ၼၼ်ႉတႃႉ၊ဝႃႈၼင်ႇၼႆလႄႈၶႃႈၸဝ်ႈႁဝ်းၸိူဝ်းၼႆႉၵေႃႈၶိုၼ်း လၢတ်ႈလႄႈဝႃႈ၊-
၂၆ ႁဝ်းၶႃႈဢမ်ႇလူင်းၵွႃႇလႆႈၶႃႈ။ပေႃးႁဝ်းၶႃႈ လႆႈပႃးဢဝ်ၼွင်ႉၸၢႆးၵေႃႉလဵၵ်ႉၵွႃႇၸိုင်တၵ်းၵွႃႇၶႃႈဢေႃႈ။ပေႃးဢမ်ႇလႆႈပႃးၼွင်ႉၸၢႆးၵေႃႉလဵၵ်ႉၵွႃႇၸိုင်ဢမ်ႇလႆႈႁၼ်ၼႃႈၸဝ်ႈ ၼၼ်ႉၶႃႈၵူၺ်း၊ဝႃႈၼင်ႇၼႆလႄႈ ပေႃႈၶႃႈၸဝ်ႈႁဝ်းၶဝ်ၼၼ်ႉၵေႃႈၶိုၼ်းလၢတ်ႈတီႈ ၶႃႈၸဝ်ႈႁဝ်းၶဝ်လႄႈဝႃႈ၊-
၂၇ ၵႃႈၼင်ႇဢၼ်သူႁူႉယူႇၼၼ်ႉ မေးၵဝ်ၵိူတ်ႇလဵင်ႉလုၵ်ႈၸၢႆးမႃးသွင်ၵေႃႉတီႈၵဝ် ဢေႃႈ။ၵေႃႉ ၼိုင်ႈ ၸမ်းဢွၵ်ႇသေၵႃႈတီႈၵဝ်ၵွႃႇယဝ်ႉ။
၂၈ ၵဝ်လႆႈဝႃႈ မၼ်းလၢႆႈၶၢမ်ႇတၢင်းဢၼ်ၶူပ်းယွၵ်းၶူပ်းယွႆပႅတ်ႈယဝ်ႉ။ၸႃႉၸဵမ်ၶိင်ႇၵႃႇလႃႉၼၼ်ႉ ၵဝ် ဢမ်ႇလႆႈႁၼ်မၼ်း။
၂၉ ၵေႃႉလဵၵ်ႉၼႆႉၵေႃႈပေႃးသူဢဝ်ၽၢတ်ႇသေၵႃႈတီႈၵဝ်ၵွႃႇလႄႈ ပေႃးၽေးႁွတ်ႈထိုင်တီႈမၼ်းၸိုင်သူတၵ်းဢဝ်တင်း တၢင်းဢၼ်ငိၼ်းၽၢၼ်ထိုင်ၸႂ်ၼၼ်ႉႁဵတ်းႁႂ်ႈၶူၼ်ႁူဝ်ႁွၵ်ႇၵဝ်ၼႆႉလူင်းႁွတ်ႈၵႃႈတီႈ မိူင်းမရႃႇ ၼႃႉပုၼ်ႉၵူၺ်းယဝ်ႉ၊ဝႃႈၼင်ႇၼႆၶႃႈဢေႃႈ။
၃၀ ပိူဝ်ႈၼႆလႄႈပေႃးၶႃႈၸဝ်ႈႁဝ်းၶဝ်ၸိူဝ်းၼႆႉ ယင်းဢမ်ၶိုၼ်းပႃးဢဝ်ၵေႃႉလဵၵ်ႉၼၼ်ႉလႄႈ ၶိုၼ်း မိူဝ်း ၵွႃႇတီႈပေႃႈၶႃႈၸဝ်ႈႁဝ်းၶဝ်ၼၼ်ႉၸိုင် ၵွပ်ႈပိူဝ်ႈဢသၢၵ်ႈမၼ်းၵူၺ်းဢိင်ဢသၢၵ်ႈၵေႃႉလဵၵ်ႉၼႆႉၼၼ်ႉယူႇလႄႈ ပေႃးမၼ်းႁၼ်လွင်ႈဢၼ်ႁဝ်းၶႃႈဢမ်ႇပႃးၵေႃႉလဵၵ်ႉၼၼ်ႉၸိုင် မၼ်းတၵ်း တၢႆၶႃႈဢေႃႈ။
၃၁ တၵ်းပဵၼ်တၢင်းဢၼ်ၶႃႈၸဝ်ႈႁဝ်းၶဝ်ဢဝ်တင်းတၢင်းဢၼ်ငိၼ်းၽၢၼ်ထိုင်ၸႂ်ၼၼ်ႉ ႁဵတ်း ႁႂ်ႈၶူၼ်ႁူဝ်ႁွၵ်ႇပေႃႈၶႃႈၸဝ်ႈႁဝ်းၶဝ်ၼၼ်ႉ လူင်းႁွတ်ႈ ထိုင်ၵႃႈတီႈမိူင်းမရႃႇၼႃႉပုၼ်ႉၶႃႈယဝ်ႉ။
၃၂ ၶႃႈၸဝ်ႈႁဝ်းပဵၼ်ၵေႃႉဢၼ်လႆႈႁပ်ႉတုင်းဢဝ်ၵေႃႉလဵၵ်ႉၼႆႉ ၵႃႈတီႈပေႃႈၶႃႈၸဝ်ႈႁဝ်းလႄႈဝႃႈ၊- ပေႃးၵဝ်ၶႃႈဢမ်ႇဢဝ်မၼ်းၶိုၼ်းမႃးၸူးၵႃႈတီႈပေႃႈႁဝ်းၸိုင် ႁႂ်ႈၵဝ်ၶႃႈလႃႈလႆႈၶၢမ်ႇဢပျႅတ်ႈတီႈပေႃႈႁဝ်းၶႃႈယူႇ တႃႇသေႇဢမ်ႇ ထၢတ်ႇသေၵမ်း၊ဝႃႈၼင်ႇၼႆဝႆႉတီႈၶႃႈဢေႃႈ။
၃၃ ပိူဝ်ႈၼႆလႄႈ ႁႂ်ႈၶႃႈၸဝ်ႈလႆႈပဵၼ်တၢင်တူဝ်ၵေႃႉလဵၵ်ႉၼႆႉသေလႄႈ ၵိုတ်းသဝ်းယူႇသေယဝ်ႉႁႂ်ႈပဵၼ်ၵေႃႉဢၼ်ၶၢမ်ႇႁဵတ်းၶႃႈတီႈၸဝ်ႈႁဝ်းသေၵမ်းၶႃႈ။ၵေႃႉလဵၵ်ႉၼႆႉၸမ်း၊ႁႂ်ႈမၼ်းလႆႈၵွႃႇလူၺ်ႈၵၼ်တင်း ပီႈဢၢႆႈမၼ်းတင်းလၢႆၼၼ်ႉသေၵမ်းတီႈၶႃႈ။
၃၄ ပေႃးၶႃႈၸဝ်ႈ ဢမ်ႇပႃးၵေႃႉလဵၵ်ႉၼႆႉၵွႃႇၸိုင် တၵ်းၶိုၼ်းမိူဝ်းၵွႃႇၸူးၵႃႈတီႈပေႃႈၶႃႈၸဝ်ႈၼၼ်ႉလႆႈၸိူဝ်ႉၼင်ႇႁိုဝ်တီႈၶႃႈ။ၶႃႈၸဝ်ႈတၵ်းလႆႈႁၼ်ၽေးဢၼ်တၵ်းႁွတ်ႈထိုင်ၵႃႈတီႈပေႃႈၶႃႈၸဝ်ႈႁဝ်း ၶဝ်ၼၼ်ႉၶႃႈယဝ်ႉ၊ဝႃႈၼင်ႇၼႆဢေႃႈ။