Chapter
၁၃
ဢႃႇပြမ်ႇတင်းလေႃးတၽၢတ်ႇၵၼ်
၁ ဢႃႇပြမ်ႇ ဢဝ်မေးမၼ်းဢိၵ်ႇတင်း လေႃးတ တင်းဢုၵ်ႉၸႃႇၶူဝ်းလဵင်းၵႃႈဢၼ်မီးတီႈမၼ်းၼၼ်ႉ ဢွၵ်ႇသေၵႃႈၼႂ်းမိူင်း ဢေႇၵႅပ်ႉတု လႄႈၶိုၼ်းမႃးၸူးၵႃႈ တီႈပွတ်းတၢင်းၸၢၼ်းၼၼ်ႉဢေႃႈ။
၂ မိူဝ်ႈၼၼ်ႉ ဢႃႇပြမ်ႇမၢၵ်ႈမီးၸႃႉၸဵမ်သူဝ်းလႂ် ဝူဝ်းလႂ်ငိုၼ်းၶမ်းလႂ်ဢေႃႈ။
၃ ၵမ်းၼၼ်ႉ မၼ်းသမ်ႉလုၵ်ႉသေၵႃႈတီႈပွတ်းတၢင်းၸၢၼ်းၶၢႆႉၵွႃႇလႄႈ သမ်ႉၶိုၼ်းႁွတ်ႈထိုင်ၵႃႈတီႈဢၼ်မၼ်းမုင်းသုမ်ႉထဵင်မိူဝ်ႈၼၼ်ႉ ၵႃႈၼႂ်းၵႄႈဝူင်ႈၵၢင်ဝဵင်း ပေႇသလ တင်းဝဵင်း ဢႃႇဢိ လႄႈ
၄ လႆႈႁဵတ်းယိၸ်ႉပလၢင်ႇၵႃႈတီႈၼၼ်ႉသေယဝ်ႉ ႁဵတ်းပထၼႃႇတီႈၼႃႇမႃႉၸိုဝ်ႈသဵင်ထႃႇဝရႃႉၽြႃးဢေႃႈ။
၅ လေႃးတ၊ ဢၼ်ၸွမ်း ဢႃႇပြမ်ႇ မႃးၼၼ်ႉၵေႃႈမီးသူဝ်းလႂ်ဝူဝ်းလႂ်ဢိၵ်ႇတင်းသုမ်ႉထဵင်လႂ်ဢေႃႈ။ဢမ်ႇမီးလိၼ်ဢၼ်ပေႃးၵုမ်ႇ ပုၼ်ႈသွင်ၶႃတၵ်းယူႇလူၺ်ႈၵၼ် ၵႃႈတီႈၼၼ်ႉ။
၆ လွင်ႈမၼ်းၸမ်း ဢုၵ်ႉၸႃႇသွင်ၶႃၼမ်ၼႃႇလူၼ်ႉလိူဝ်ၵွႃႇလႄႈ သွင်ၶႃဢမ်ႇယူႇတီႈလဵဝ်ၵၼ်လႆႈ။
၇ ၵူၼ်းလဵင်ႉဝူဝ်း ဢႃႇပြမ်ႇ တင်းၵူၼ်းလဵင်ႉဝူဝ်းလေႃးတၽိတ်းၵၼ်ဢေႃႈ။မိူဝ်ႈၼၼ်ႉၵူၼ်း ၶႃႇၼၼ်ႇလႂ်၊ၵူၼ်း ၽေႇရၸိ လႂ်မီးယူႇၵႃႈၼႂ်းမိူင်းၼၼ်ႉယူႇ ဢေႃႈ။
၈ ဢႃႇပြမ်ႇ လၢတ်ႈတီႈ လေႃးတ ဝႃႈ၊-ယႃႇႁႂ်ႈတၢင်းဢၼ်ၽိတ်းၵၼ်မီးတီႈၵဝ်တင်းမႂ်း၊ တီႈၵူၼ်း လဵင်ႉဝူဝ်းၵဝ်တင်းတီႈၵူၼ်းလဵင်ႉဝူဝ်းမႂ်း။လွင်ႈမၼ်းၸမ်း၊ႁႃးၼႆႉပဵၼ်ပီႈၼွင်ႉၵၼ်ဢေႃႈ။
၉ ၼႃႈလိၼ်တင်းသဵင်ႈတင်းလူင် မီးယူႇၵႃႈတီႈၽၢႆႇၼႃႈမႂ်း ဢမ်ႇၸႂ်ႈႁိုဝ်။ႁႃးၽၢတ်ႇယၢၼ်ၵၼ်တႃႉ။ပေႃးမႂ်းၵွႃႇၽၢႆႇသၢႆႉၸိုင်ၵဝ်တၵ်းၵွႃႇၽၢႆႇၶႂႃဢေႃႈ။ပေႃးမႂ်းၵွႃႇၽၢႆႇၶႂႃၸိုင် ၵဝ်တၵ်းၵွႃႇၽၢႆႇသၢႆႉဢေႃႈ၊ဝႃႈၼင်ႇၼႆဢေႃႈ။
၁၀ မိူဝ်ႈၼၼ်ႉ၊ၸူဝ်ႈဢၼ်ထႃႇဝရႃႉၽြႃး ဢမ်ႇပႆႇယႃႉပႅတ်ႈဝဵင်းသေႃတုင်ႇ တင်းဝဵင်း ၵေႃးမေႃးရ ၼၼ်ႉ၊ လေႃးတမုင်ႈတူၺ်းလႄႈ လႆႈႁၼ်ပၢင်ႇပဵင်းႁိမ်းႁွမ်းၼမ်ႉႁွင်ႊယေႃးတၢၼ်ႇ ၵူႈတီႈၵူႈလႅၼ်ၼၼ်ႉမီးၼမ်ႉလိူင်ႇၼႃႇလႄႈပဵၼ်ၸိူဝ်ႉၼင်ႇ သူၼ်ဢူးယိၼ်ႇထႃႇဝရႃႉၽြႃးဢိၵ်ႇတင်းၸိူဝ်ႉ ၼင်ႇမိူင်း ဢေႇၵႅပ်ႉတု သဵၼ်တၢင်း ဢၼ်ၵွႃႇၸူးၵႃႈတီႈဝဵင်းၸေႃႇရၼၼ်ႉယဝ်ႉ။
၁၁ မၼ်းၸင်ႇလိူၵ်ႈၵဵပ်းဢဝ်ပၢင်ႇပဵင်းၼမ်ႉႁွင်ႊ ယေႃးတၢၼ်ႇ တင်းသဵင်ႈတင်းလူင်ၼၼ်ႉသေလႄႈ ၶၢႆႉၵွႃႇယူႇၵႃႈတီႈၽၢႆႇၼႃႈဝၼ်းဢွၵ်ႇသေယဝ်ႉ၊ သွင်ၶႃၵေႃႉၼိုင်ႈလႄႈၵေႃႉၼိုင်ႈၽၢတ်ႇၽႄၵၼ်သေဢေႃႈ။
၁၂ ဢႃႇပြမ်ႇ ယူႇၵႃႈၼႂ်းမိူင်းၶႃႇၼၼ်ႇၼၼ်ႉဢေႃႈ။လေႃးတ ၸမ်း၊ ယူႇၵႃႈၼႂ်းဝဵင်းဢၼ်မီးၵႃႈၼႂ်း ပၢင်ႇ ပဵင်းၸိူဝ်းၼၼ်ႉလႄႈ မုင်းသုမ်ႉထဵင်မၼ်းၶၢႆႉၸူးၵႃႈတီႈ ႁိမ်းဝဵင်း သေႃးတုင်ႇ ဢေႃႈ။
၁၃ ၵူၼ်းဝဵင်း သေႃးတုင်ႇၸိူဝ်းၼၼ်ႉ ပဵၼ်ၵူၼ်းဢၼ်ႁၢႆႉမိူၵ်ႈ၊ ၵူၼ်းဢၼ်မီးဢပျႅတ်ႈၼမ်ၼႃႇလူင်လၢင် ၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။
၁၄ လိုၼ်းသေ လေႃးတ ၽၢတ်ႇၵၼ်တင်း ဢႃႇပြမ်ႇသေလႄႈၵွႃႇယဝ်ႉၼၼ်ႉ ထႃႇဝရႃႉၽြႃး လၢတ်ႈတီႈ ဢႃႇပြမ်ႇ ဝႃႈ၊- ယူႇၵႃႈတီႈဢၼ်မႂ်းမီးယူႇၼႆႉသေလႄႈမုင်ႈတူၺ်းၽၢႆႇတၢင်းတူၵ်းၽၢႆႇတၢင်းဢွၵ်ႇ ၽၢႆႇတၢင်း ႁွင်ႇၽၢႆႇတၢင်းၸၢၼ်းတႃႉ။
၁၅ လိၼ်ဢၼ်မႂ်းႁၼ်တင်းသဵင်ႈတင်းလူင်ၼၼ်ႉၵဝ်တၵ်းပၼ်တီႈမႂ်း ဢိၵ်ႇတင်း တီႈၸိူဝ်ႉၶိူဝ်းမႂ်းသေႇသေႇဢေႃႈ။
၁၆ ၸိူဝ်ႉၶိူဝ်းမႂ်းၵေႃႈၵဝ်တၵ်းႁႂ်ႈယႂ်ႇၽႄႈၼမ်ၵိုၼ်းမႃး မိူၼ်ၸိူဝ်ႉၼင်ႇမုၼ်ႈလိၼ်ဢေႃႈ။ပိူဝ်ႈၼႆလႄႈပေႃးၵူၼ်းၼပ်ႉဢၢၼ်ႇမုၼ်ႈလိၼ်လႆႈၸိုင် တၵ်းၼပ်ႉဢၢၼ်ႇၸိူဝ်ႉၶိူဝ်းမႂ်းလႆႈဢေႃႈ။
၁၇ မႂ်းလုၵ်ႉသေလႄႈ လႄႇၵွႃႇလဵပ်ႈၵွႃႇၸွမ်းၼႃႈယၢဝ်းဢိၵ်ႇတင်းၼႃႈပွတ်းလိၼ်ၼႆႉတႃႉ။ၵဝ်တၵ်းပၼ်တီႈမႂ်းဢေႃႈ၊ဝႃႈၼင်ႇၼႆဢေႃႈ။ၵမ်းၼၼ်ႉ ဢႃႇပြမ်ႇ ၶၢႆႉသုမ်ႉထဵင်မၼ်းလႄႈႁွတ်ႈထိုင်ၵႃႈ တီႈပႃႇတူၼ်ႈမႆႉ ၼိမ်မမ်ႇရေႇ ဢၼ်မီးၵႃႈတီႈဝဵင်း ႁေႇပၼ်ႇ ၼၼ်ႉသေယဝ်ႉၶျႃးတီႈယူႇလႄႈ ႁဵတ်းယိၸ်ႉပလၢင်ႇပုၼ်ႈထႃႇဝရႃႉၽြႃးၵႃႈတီႈၼၼ်ႉဢေႃႈ။