Chapter
၂၉
ယႃႇၵုပ်ႉႁွတ်ႈၽႅဝ်ဝဵင်းၶႃႇရၢၼ်ႇ
၁ ၵမ်းၼၼ်ႉ ယႃႇၵုပ်ႉ သမ်ႉၸွမ်းတၢင်းၵွႃႇလႄႈႁွတ်ႈထိုင်ၵႃႈတီႈဢၼ် ၵူၼ်းမိူင်းတၢင်းဢွၵ်ႇယူႇၼၼ်ႉသေ ယဝ်ႉ မုင်ႈတူၺ်းလႄႈႁၼ်ၼမ်ႉမေႃႇဢၼ်ၼိုင်ႈၵႃႈတီႈထိူၼ်ႇၼၼ်ႉဢေႃႈ။
၂ ပိူဝ်ႈဢၼ်ယၢမ်ႈဢဝ်ၼမ်ႉၵႃႈတီႈၼမ်ႉမေႃႇၼၼ်ႉတိုၵ်းပၼ်ၽုင်သူဝ်းတင်းလၢႆလႄႈ ၽုင်သူဝ်း သၢမ် ၽုင် ၼွၼ်းယူႇၵႃႈတီႈႁိမ်းၼမ်ႉမေႃႇၼၼ်ႉဢေႃႈ။မၢၵ်ႇႁိၼ်ဢၼ်ယႂ်ႇၼႃႇမီးၵႃႈၼိူဝ်ပၢၵ်ႇၼမ်ႉ မေႃႇၼၼ်ႉဢေႃႈ။
၃ မိူဝ်ႈဢၼ်ၽုင်သူဝ်းတင်းလၢႆၸူႉၵၼ်တုမ်ၵၼ်ၵႃႈတီႈၼၼ်ႉၸိုင် ၶဝ်ယၢမ်ႈဢဝ်မၢၵ်ႇႁိၼ်ၼၼ်ႉ ၵိင်ႈ ပႅတ်ႈသေၵႃႈၼိူဝ်ပၢၵ်ႇၼမ်ႉမေႃႇၼၼ်ႉ သေလႄႈတိုၵ်းပၼ်ၼမ်ႉတီႈသူဝ်းယဝ်ႉၸင်ႇ သမ်ႉဢဝ်မၢၵ်ႇႁိၼ်ၼၼ်ႉ ၶိုၼ်းႁူမ်ႇဝႆႉၵႃႈၼိူဝ်ပၢၵ်ႇၼမ်ႉမေႃႇတီႈၵဝ်ႇ မၼ်းၼၼ်ႉဢေႃႈ။
၄ ယႃႇၵုပ်ႉ ၵေႃႈထၢမ်တီႈၶဝ်လႄႈဝႃႈ၊-ပီႈၼွင်ႉၵဝ်တင်းလၢႆၶဝ်ဢိူၺ်း၊သူၸဝ်ႈလုၵ်ႉသေၵႃႈတီႈလႂ်မႃး၊မိူဝ်ႈဢၼ်ဝႃႈၼင်ႇၼႆၸိုင်၊ ၶဝ်ၵေႃႈၶိုၼ်းလၢတ်ႈလႄႈဝႃႈ၊-ႁဝ်းလုၵ်ႉသေၵႃႈတီႈဝဵင်း ၶႃႇရၢၼ်ႇ ပုၼ်ႉမႃးဢေႃႈ၊ဝႃႈၼင်ႇၼႆဢေႃႈ။
၅ မၼ်းသမ်ႉထၢမ်တီႈၶဝ်ထႅင်ႈလႄႈဝႃႈ၊-သူႁူႉၸၵ်း လႃႇပၢၼ်ႇ လုၵ်ႈၸၢႆးၼႃႇၶေႃႇ ၼၼ်ႉႁိုဝ်၊ မိူဝ်ႈ ဢၼ်ဝႃႈၼင်ႇၼႆၸိုင်၊ၶဝ်သမ်ႉၶိုၼ်းလၢတ်ႈလႄႈဝႃႈ၊-
၆ ႁူႉဢိူဝ်ႈ၊ဝႃႈၼင်ၼႆႇသေယဝ်ႉ၊မၼ်းသမ်ႉထၢမ်တီႈၶဝ်ထႅင်ႈလႄႈဝႃႈ၊ မၼ်းယူႇလီယူႇၶႃႈႁိုဝ်၊ မိူဝ်ႈ ဢၼ်ဝႃႈၼင်ႇၼႆၸိုင်၊ ၶဝ်သမ်ႉလၢတ်ႈလႄႈဝႃႈ၊-ယူႇလီယူႇၶႃႈဢေႃႈ။တူၺ်းလူႊ၊လုၵ်ႈယိင်းမၼ်း ရႃႇၶေႇလ ယင်းမႃးယူႇလူၺ်ႈၵၼ်တင်းၽုင် သူဝ်းၵႃႈတီႈပုၼ်ႉဢေႃႈ၊ဝႃႈၼင်ႇၼႆဢေႃႈ။
၇ မၼ်းၵေႃႈလၢတ်ႈလႄႈဝႃႈ၊-ၶိင်ႇၵၢင်ဝၼ်းယင်းမီးယူႇၼမ်ၼႃႇဢေႃႈ။ၶိင်ႇဢၼ်တၵ်းလႆႈႁႂ်ႈၽုင် သူဝ်း တင်းလၢႆၸူႉၵၼ်တုမ်ၵၼ်ၼၼ်ႉဢမ်ႇပႆႇၸႂ်ႈ။တိုၵ်းၼမ်ႉပၼ်သေယဝ်ႉ ဢဝ်ၵွႃႇလဵင်ႉထိင်းလူးၵွၼ်ႇတႃႉ၊ဝႃႈၼင်ႇၼႆဢေႃႈ။
၈ ၶဝ်ၵေႃႈလၢတ်ႈလႄႈဝႃႈ၊-ၸူဝ်ႈဢၼ်ဢမ်ႇပႆႇႁႂ်ႈၽုင်သူဝ်းတင်းသဵင်ႈတင်းလူင်ၸူႉၵၼ်တုမ်ၵၼ်သေလႄႈ ဢဝ်မၢၵ်ႇႁိၼ် ဢၼ်မီးၵႃႈၼိူဝ်ပၢၵ်ႇၼမ်ႉမေႃႇၵိင်ႈပႅတ်ႈၼၼ်ႉဢမ်ႇလႆႈတိုၵ်းပၼ်ၵူၺ်း၊ဝႃႈၼင်ႇၼႆဢေႃႈ။
၉ ၼႂ်းမိူဝ်ႈဢၼ် မၼ်းယင်းတိုၵ်ႉလၢတ်ႈၵႂၢမ်းတေႃႇၵၼ်တင်းၶဝ်ယူႇၼၼ်ႉၸိုင် ရႃႇၶေႇလ ၼၼ်ႉ ပိူဝ်ႈ ဢၼ်လႆႈလဵင်ႉလႆႈထိင်းသူဝ်းပေႃႈမၼ်းတင်းလၢႆလႄႈပႃးဢဝ် တင်းသူဝ်းတင်းလၢႆလႄႈႁွတ်ႈမႃးဢေႃႈ။
၁၀ မိူဝ်ႈဢၼ်ယႃႇၵုပ်ႉ ႁၼ် ရႃႇၶေႇလ လုၵ်ႈယိင်း လႃႇပၢၼ်ႇပီႈၸၢႆးမေႈမၼ်းဢိၵ်ႇတင်းသူဝ်း လႃႇပၢၼ်ႇ ၼၼ်ႉၸိုင်မၼ်းသုတ်ႉၸမ်လႄႈ ၵိင်ႈမၢၵ်ႇႁိၼ်ပႅတ်ႈသေၵႃႈၼိူဝ်ပၢၵ်ႇၼမ်ႉမေႃႇၼၼ်ႉသေ ယဝ်ႉ တိုၵ်းပၼ်ၼမ်ႉတီႈ သူဝ်း လႃႇပၢၼ်ႇ ဢေႃႈ။
၁၁ ၵမ်းၼၼ်ႉ ယႃႇၵုပ်ႉ ၼူမ်ႈရႃႇၶေႇလ လႄႈႁဵတ်းတင်းသဵင်ဢၼ်ယႂ်ႇၼႃႈႁွင်ႉႁႆႈ ဢေႃႈ။
၁၂ ယႃႇၵုပ်ႉမွၵ်ႇလၢတ်ႈလွင်ႈဢၼ်မၼ်းပဵၼ်လၢၼ်ပေႃႈရႃႇၶေႇလ ဢိၵ်ႇတင်းလွင်ႈဢၼ်မၼ်းပဵၼ်လုၵ်ႈၸၢႆး ရေႇပိၵ်ႉၵ ၼၼ်ႉသေယဝ်ႉ ရႃႇၶေႇလ ၵေႃႈလႅၼ်ႈ မိူဝ်းၵွႃႇလႄႈမွၵ်ႇလၢတ်ႈတီႈပေႃႈမၼ်းဢေႃႈ။
၁၃ မိူဝ်ႈဢၼ် လႃႇပၢၼ်ႇ လႆႈငိၼ်းၵႂၢမ်းသတၢင်းသဵင်ၶၢဝ်ႇလွင်ႈလၢၼ်ၸၢႆးမၼ်း ယႃႇၵုပ်ႉ ၼၼ်ႉ ၸိုင် မၼ်းၼႅတ်ႈၵွႃႇၶၼ်ၶၼ်ၽႂ်းၽႂ်းႁႂ်ႈလႆႈႁပ်ႉႁူဝ်တၢင်းသေယဝ်ႉ ၵွတ်ႇဢုမ်ႈၸုပ်ႇၼူမ်ႈလႄႈ ပႃးမိူဝ်းၵွႃႇၵႃႈတီႈႁိူၼ်းမၼ်းဢေႃႈ။
၁၄ ယႃႇၵုပ်ႉ မွၵ်ႇလၢတ်ႈလွင်ႈတၢင်းတူဝ်ၸဝ်ႈၵဝ်ႇၵႃႈမီးတင်းသဵင်ႈတင်းလူင်တီႈ လႃႇပၢၼ်ႇသေ ယဝ်ႉ လႃႇပၢၼ်ႇၵေႃႈလၢတ်ႈတီႈမၼ်းလႄႈဝႃႈ၊-မႂ်းၼႆႉပဵၼ်ၼိူဝ်ႉၵဝ်လုပ်ႇၵဝ်ဢမၢၼ်ႇၶၼ်ပဵၼ်ဢေႃႈ၊ ဝႃႈၼင်ႇၼႆဢေႃႈ။ယႃႇၵုပ်ႉ ယူႇလူၺ်ႈၵၼ်တင်းမၼ်း လိူၼ်ၼိုင်ႈၸမ်ၸမ်ဢေႃႈ။
ယႃႇၵုပ်ႉဢဝ်မေး လေႇဢႃႇတင်းရႃႇၶေႇလ
၁၅ ၵမ်းၼၼ်ႉ လႃႇပၢၼ်ႇ လၢတ်ႈတီႈ ယႃႇၵုပ်ႉ လႄႈဝႃႈ၊-ပိူဝ်ႈဢၼ်မႂ်းပဵၼ်လၢၼ်ၸၢႆးၵဝ်လႄႈယင်း ဢမ်ႇမီးဢၵျူဝ်းၵႃႈသင်လႄႈ တၵ်းလႆႈၶၢမ်ႇတၢင်းၸႂ်ႉတၢင်းသွႆၵဝ်ႁိုဝ်။လၢတ်ႈၵႃႊမၼ်းၶၼ်မၼ်းၵႃႈၼင်ႇဢၼ်မႂ်းၶႂ်ႈလႆႈၼၼ်ႉတီႈၵဝ်တႃႉ၊ဝႃႈၼင်ႇၼႆဢေႃႈ။
၁၆ တီႈ လႃႇပၢၼ်ႇ ၼၼ်ႉမီးလုၵ်ႈယိင်းသွင်ၵေႃႉဢေႃႈ။ၵေႃႉယႂ်ႇၸမ်းလႆႈၸိုဝ်ဝႃႈ၊ လေႇဢႃႇ ဢေႃႈ။ၵေႃႉလဵၵ်ႉၸမ်းလႆႈၸိုဝ်ဝႃႈ ရႃႇၶေႇလ ဢေႃႈ။
၁၇ လေႇဢႃႇ ၸမ်း မီးသၢႆတႃဢူၼ်ႈဢေႃႈ။ရႃႇၶေႇလၸမ်းႁၢင်ႊၽၢင်ယိၼ်ႇလႄႈ ၼိူဝ်ႉၼင်ၵေႃႈ ႁၢင်ႊလီဢေႃႈ။
၁၈ ပိူဝ်ႈဢၼ် ယႃႇၵုပ်ႉ ယိၼ်းႁၵ်ႉယိၼ်းပႅင်းရႃႇၶေႇလ လႄႈမၼ်းလၢတ်ႈလႄႈဝႃႈ၊-ၵဝ်ၶႃႈတၵ်း ၶၢမ်ႇတၢင်းၸႂ်ႉတၢင်းသွႆၸဵတ်းပီႊ ႁႂ်ႈလႆႈ ရႃႇၶေႇလလုၵ်ႈယိင်းလုင်းႁဝ်းၵေႃႉလဵၵ်ႉၶႃႈဢေႃႈ၊ ဝႃႈ ၼင်ႇ ၼႆ သေလႄႈ လႃႇပၢၼ်ႇ ၵေႃႈလၢတ်ႈဝႃႈ၊-
၁၉ ၽိူဝ်ႇပၼ်တီႈပိူၼ်ႈတၢင်ႇၵေႃႉၼၼ်ႉပၼ်တီႈမႂ်းယိင်ႈၶႅၼ်းတၵ်းလီဢေႃႈ။ယူႇလူၺ်ႈၵၼ်တင်း ၵဝ် တႃႉ၊ဝႃႈၼင်ႇၼႆဢေႃႈ။
၂၀ ယႃႇၵုပ်ႉ ၵေႃႈၶၢမ်ႇတၢင်းၸႂ်ႉတၢင်းသွႆၸဵတ်းပီႊႁႂ်ႈလႆႈရႃႇၶေႇလ ဢေႃႈ။ပိူဝ်ႈဢၼ်မၼ်းယိၼ်းႁၵ်ႉယိၼ်းပႅင်းရႃႇၶေႇလ လႄႈမၼ်းထၢင်ႇၸဵတ်းပီႊၼၼ်ႉပဵၼ်ၸိူဝ်ႉၼင်ႇမိူဝ်ႈဝၼ်းဢၼ်ၵေႇၼႃႇဢေႃႈ။
၂၁ ယႃႇၵုပ်ႉ ၵေႃႈလၢတ်ႈတီႈလႃႇပၢၼ်ႇလႄႈဝႃႈ၊-ၶိင်ႇဝၼ်းဢၼ်မၵ်းၶၢၼ်းဝႆႉၼၼ်ႉၸေးၶႃႈယဝ်ႉ။ဢဝ်မေးၵဝ်ၶႃႈဢၢပ်ႈပၼ်တီႈၵဝ်ၶႃႈ ႁႂ်ႈၵဝ်ၶႃႈလႆႈၶဝ်ႈၸူးတီႈ မၼ်းသေၵမ်း၊ဝႃႈၼင်ႇၼႆသေယဝ်ႉ၊
၂၂ လႃႇပၢၼ်ႇ ၵေႃႈႁႂ်ႈၵူၼ်းဢၼ်ယူႇၵႃႈတီႈၼၼ်ႉတင်းသဵင်ႈတင်းလူင် ၸူႉ ၵၼ်တုမ်ၵၼ်သေလႄႈ ႁဵတ်း ပွႆးဢေႃႈ။
၂၃ မိူဝ်ႈဢၼ်ထိုင်ႁွတ်ႈၶိင်ႇႁူဝ်ၶမ်ႈၸိုင် မၼ်းပႃးဢဝ်လုၵ်ႈယိင်းမၼ်းလေႇဢႃႇ ၵွႃႇသႂၢင်းၶဝ်ႈပၼ်လႄႈ ယႃႇၵုပ်ႉ ၼွၼ်း လူၺ်ႈၵၼ်တင်းမၼ်းၼၼ်ႉဢေႃႈ။
၂၄ လႃႇပၢၼ်ႇ ဢဝ်မေႈယိင်းၶႃႈ ၸိလပ ဢၢပ်ႈပၼ်တီႈလုၵ်ႈသဝ်မၼ်းလေႇဢႃႇ ႁႂ်ႈပဵၼ်ၶႃႈမၼ်းဢေႃႈ။
၂၅ ထိုင်ႁွတ်ႈၶိင်ႇၵၢင်ၼႂ်မိူဝ်ႈဢၼ် ယႃႇၵုပ်ႉ တူၺ်းၼၼ်ႉႁူႉဝႃႈပဵၼ်လေႇဢႃႇၼၼ်ႉၸိုင်မၼ်း လၢတ်ႈ တီႈ လႃႇပၢၼ်ႇ လႄႈဝႃႈ၊-လွင်ႈတၢင်းဢၼ်လုင်းႁဝ်းႁဵတ်းတီႈၵဝ်ၶႃႈၼႆႉ ပဵၼ်ၸိူဝ်ႉၼင်ႇ ႁိုဝ်။ ၵဝ်ၶႃႈၶၢမ်ႇတၢင်းၸႂ်ႉတၢင်းသွႆႁႂ်ႈလႆႈရႃႇၶေႇလ ဢမ်ႇၸႂ်ႈၶႃႈႁိုဝ်။ႁဵတ်းသင်ပႅတ်ႉလႅၼ်ၵဝ်ၶႃႈ၊ဝႃႈၼင်ႇၼႆသေယဝ်ႉ၊ လႃႇပၢၼ်ႇ ၵေႃႈလၢတ်ႈ လႄႈဝႃႈ၊-
၂၆ ၵႃႈတီႈမိူင်းႁဝ်းၼႆႉၸူဝ်ႈဢၼ်ဢမ်ႇပႆႇလႆႈပၼ်လုၵ်ႈယိင်းၵေႃႉယႂ်ႇယဝ်ႉၼၼ်ႉ ဢမ်ႇလႆႈပၼ်ၵေႃႉလဵၵ်ႉၵူၺ်း။ပႂ်ႉႁႂ်ႈတဵမ်ၸဵတ်းဝၼ်းလူးၵွၼ်ႇတႃႉ။ၵဝ်တၵ်း ဢဝ်ၵေႃႉလဵၵ်ႉဢၢပ်ႈပၼ်မႂ်းထႅင်ႈဢေႃႈ။
၂၇ ၵမ်းလိုၼ်းမႂ်းတၵ်းလႆႈၶၢမ်ႇတၢင်းၸႂ်ႉတၢင်းသွႆတီႈၵဝ်ထႅင်ႈ ၸဵတ်းပီႊဢေႃႈ၊ဝႃႈၼင်ႇၼႆလႄႈ ယႃႇၵုပ်ႉ ႁပ်ႉတုင်းဢဝ်လႄႈ
၂၈ ဝၢႆးသေတဵမ်ၸဵတ်းဝၼ်းယဝ်ႉ လႃႇပၢၼ်ႇ ဢဝ်လုၵ်ႈယိင်းမၼ်း ရႃႇၶေႇလ ၼၼ်ႉဢၢပ်ႈပၼ်ဢေႃႈ။
၂၉ လႃႇပၢၼ်ႇ ဢဝ်မေႈယိင်းၶႃႈမၼ်း ပိလႁႃႇ ဢၢပ်းပၼ်တီႈလုၵ်ႈယိင်းမၼ်း ရႃႇၶေႇလ ႁႂ်ႈပဵၼ်မေႈယိင်း ၶႃႈမၼ်းဢေႃႈ။ယႃႇၵုပ်ႉ ၶဝ်ႈၸူးတီႈ ရႃႇၶေႇလလႄႈယဵင်ႈၶႅၼ်းႁၵ်ႉ ရႃႇၶေႇလ ၼႃႇသေ လေႇဢႃႇဢေႃႈ။မၼ်းၶၢမ်ႇတၢင်းၸႂ်ႉတၢင်းသွႆထႅင်ႈၸဵတ်းပီႊဢေႃႈ။
လုၵ်ႈလၢင်းယႃႇၵုပ်ႉ
၃၁ ထႃႇဝရႃႉၽြႃးႁူႉႁၼ်လွင်ႈဢၼ် လေႇဢႃႇ လႆႈၶၢမ်ႇတၢင်းၸင်းၼၼ်ႉလႄႈ ပၼ်ဢၶႂၢင်ႉတၢင်း ဢၼ်ၵိူတ်ႇလဵင်ႉလုၵ်ႈလဵင်ႉလၢင်းၼၼ်ႉတီႈမၼ်းဢေႃႈ။ရႃႇၶေႇလၸမ်းပဵၼ်မေႈမၼ်လႄႈဢမ်ႇမီးလုၵ်ႈမီးလၢင်း။
၃၂ လေႇဢႃႇ ပႃးပတိၵ်ႉသၼ်ႇထေႇသေယဝ်ႉၵိူတ်ႇလဵင်ႉလုၵ်ႈၸၢႆးမႃးလႄႈႁွင်ႉႁိၵ်ႈၸိုဝ်ႈဝႃႈ ရူႉပိၼ်ႇ ဢေႃႈ။လွင်ႈမၼ်းၸမ်း၊ ထႃႇဝရႃႉၽြႃးတူၺ်းႁၼ်တုၵ်ႉၶႃႉတၢင်းၽၢၼ်ၵဝ်ယဝ်ႉ။ပိူဝ်ႈၼႆလႄႈတေႃႈလဵဝ်ၼႆႉၽူဝ် ၵဝ်တၵ်းႁၵ်ႉယဝ်ႉ၊ဝႃႈၼင်ႇၼႆဢေႃႈ။
၃၃ ၵမ်းၼၼ်ႉမၼ်းသမ်ႉပႃးပတိၵ်ႉသၼ်ႇထေႇထႅင်ႈလႄႈ ၵိူတ်ႇလဵင်ႉလုၵ်ႈၸၢႆးမႃးထႅင်ႈသေယဝ်ႉ သမ်ႉဝႃႈၵွပ်ႈပိူဝ်ႈဢၼ်ထႃႇဝရႃႉၽြႃး ငိၼ်းလွင်ႈဢၼ်ၵဝ်လႆႈၶၢမ်ႇတၢင်းၸင်းၼၼ်ႉလႄႈ မၼ်း ၸဝ်ႈ ဢိတ်းလူပၼ်လုၵ်ႈၸၢႆးၼႆႉတီႈၵဝ်ယဝ်ႉ၊ဝႃႈၼင်ႇၼႆလႄႈ ႁွင်ႉႁိၵ်ႈၸိုဝ်ႈလုၵ်ႈၸၢႆးၼၼ်ႉဝႃႈ သိမုၼ်ႇ ဢေႃႈ။
၃၄ ၵမ်းၼၼ်ႉမၼ်းသမ်ႉပႃးပတိၵ်ႉသၼ်ႇထေႇထႅင်ႈလႄႈ ၵိူတ်ႇလဵင်ႉလုၵ်ႈၸၢႆးမႃးထႅင်ႈသေယဝ်ႉသမ်ႉဝႃႈ ၵွပ်ႈပိူဝ်ႈဢၼ်ၵဝ်လႆႈၵိူတ်ႇလဵင်ႉလုၵ်ႈၸၢႆးသၢမ်ၵေႃႉတီႈၽူဝ်ၵဝ်လႄႈ တေႃႈလဵဝ်ၼႆႉမၼ်းတၵ်းႁူမ်ႈၸႂ်ၵၼ်တင်းၵဝ်ဢေႃႈ၊ ဝႃႈၼင်ႇၼႆလႄႈႁွင်ႉႁိၵ်ႈၸိုဝ်ႈလုၵ်ႈၸၢႆးၼၼ်ႉဝႃႈ လေႇဝိ ဢေႃႈ။
၃၅ ၵမ်းၼၼ်ႉမၼ်းသမ်ႉပႃးပတိၵ်ႉသၼ်ႇထေႇထႅင်ႈလႄႈၵိူတ်ႇလဵင်ႉလုၵ်ႈၸၢႆးမႃးထႅင်ႈသေယဝ်ႉ သမ်ႉ ဝႃႈ၊-တေႃႈလဵဝ်ၼႆႉၵဝ်တၵ်းယွင်ႈယေႃးထႃႇဝရႃႉၽြႃးဢေႃႈ၊ ဝႃႈၼင်ႇၼႆလႄႈႁွင်ႉႁိၵ်ႈၸိုဝ်ႈလုၵ်ႈၸၢႆးၼၼ်ႉဝႃႈ ယုတဢေႃႈ။ဝၢႆးၼၼ်ႉလုၵ်ႈမၼ်းထၢတ်ႇၵွႃႇလႄႈမၼ်းဢမ်ႇၵိူတ်ႇလဵင်ႉလုၵ်ႈ လဵင်ႉလၢင်းထႅင်ႈယဝ်ႉ။