Chapter
၂၁
တၢင်းဢၼ်ဢိၸၵ်ႉၵိူတ်ႇလဵင်ႉမႃး
၁ ထႃႇဝရႃႉၽြႃး ႁဵတ်းၵျေးၸူးၵႃႈၼိူဝ် ၸႃႇရႃႇ ၵႃႈၼင်ႇဢၼ်မၼ်းၸဝ်ႈလၢတ်ႈဝႆႉမိူဝ်ႈၼၼ်ႉလႄႈ ႁဵတ်းတီႈမၼ်း ၸွမ်းၵႃႈၼင်ႇဢၼ်မၼ်းၸဝ်ႈ မီးၵတိဝႆႉ ၼၼ်ႉဢေႃႈ။
၂ ၸႃႇရႃႇ ပႃးပတိၵ်ႉသၼ်ႇထေႇ တီႈ
ဢႃႇပြႁမ်ႇ လႄႈၵိူတ်ႇလဵင်ႉလုၵ်ႈၸၢႆးမႃး ၼႂ်းၶိင်ႇဢၼ်ၽြႃးပဵၼ်ၸဝ်ႈ မီးဢမိင်ႉမၵ်းၶၢၼ်းဝႆႉ ၼႂ်း မိူဝ်ႈ ဢၼ် ဢသၢၵ်ႈမၼ်းယႂ်ႇၼႃႇၼၼ်ႉဢေႃႈ။
၃ ဢႃႇပြႁမ်ႇ ႁွင်ႉႁိၵ်ႈၸိုဝ်ႈလုၵ်ႈၸၢႆးမၼ်းဢၼ် ၸႃႇရႃႇ ၵိူတ်ႇလဵင်ႉ မႃးၼၼ်ႉဝႃႈ ဢိၸၵ်ႉ ဝႃႈၼႆဢေႃႈ။
၄ ၵႃႈၼင်ႇဢၼ်ၽြႃးပဵၼ်ၸဝ်ႈသင်ႇလၢတ်ႈဝႆႉၼၼ်ႉ ဢႃႇပြႁမ်ႇ ပၼ်မင်ႇၵလႃႇ တၢင်းဢၼ်ထိူဝ် ႁိမ်း တီႈဢိၸၵ်ႉမိူဝ်ႈဢၼ် မၼ်းလႆႈဢသၢၵ်ႈပႅတ်ႇဝၼ်းၼၼ်ႉဢေႃႈ။
၅ မိူဝ်ႈဢၼ်မီးလုၵ်ႈၸၢႆး ဢိၸၵ်ႉ ၼၼ်ႉဢသၢၵ်ႈဢႃႇပြႁမ်ႇ မီးပၢၵ်ႇပီႊဢေႃႈ။
၆ ၸႃႇရႃႇ ၵေႃႈလၢတ်ႈလႄႈဝႃႈ၊-ၽြႃးပဵၼ်ႈၸဝ်ႈ ပၼ်ဢၶႂၢင်ႉ ႁႂ်ႈၵဝ်လႆႈယုမ်ႉလႆႈၶူဝ်ယဝ်ႉ။ ၶဝ်ၸိူဝ်း ဢၼ် ငိၼ်းသတၢင်းသဵင်ၶၢဝ်ႇၼၼ်ႉၵေႃႈတၵ်းယုမ်ႉၶူဝ် လူၺ်ႈၵၼ်တင်းၵဝ်ဢေႃႈ၊ ဝႃႈ ၼင်ႇ ၼႆဢေႃႈ။
၇ မၼ်းသမ်ႉလၢတ်ႈထႅင်ႈလႄႈဝႃႈ၊-ၽူႈလႂ်ယၢမ်ႈတွၼ်ႉလၢတ်ႈတီႈ ဢႃႇပြႁမ်ႇ ဝႃႈ၊-ၸႃႇရႃႇ တၵ်းပၼ်လုၵ်ႈၵိၼ်ၼူမ်းဢေႃႈ၊ ဝႃႈၼင်ႇၼႆၼၼ်ႉ။ၵဝ်လႆႈၵိူတ်ႇလဵင်ႉလုၵ်ႈၸၢႆးတီႈမၼ်းမိူဝ်ႈဢၼ်ဢသၢၵ်ႈၵဝ်ယႂ်ႇၼၼ်ႉ ဝႃႈၼင်ႇၼႆဢေႃႈ။
ႁႃႇၵရတင်းဢိသမေႇလလႆႈဢွၵ်ႇပၢႆၵွႃႇတီႈၵႆ
၈ လုၵ်ႈဢွၼ်ႇၼၼ်ႉၵေႃႈ ယႂ်ႇမႃးလႄႈ ၽၢတ်ႇၼူမ်းဢေႃႈ။ဝၼ်းဢၼ် လုၵ်ႈဢွၼ်ႇၽၢတ်ႇၼူမ်း ၼၼ်ႉဢႃႇပြႁမ်ႇ ႁဵတ်းပွႆးလူင်ဢေႃႈ။
၉ ၸႃႇရႃႇ ႁၼ်လုၵ်ႈၸၢႆးဢၼ် ဢႃႇပြႁမ်ႇ လႆႈတီႈ ႁႃႇၵရ ဢၼ်ပဵၼ်ၶႃႈၵူၼ်း ဢေႇၵႅပ်ႉတု ၼၼ်ႉ ႁဵတ်း ပျၢၵ်ႈႁဵတ်းၶူဝ်လႄႈမၼ်းၸင်ႇလၢတ်ႈတီႈ ဢႃႇပြႁမ်ႇ လႄႈဝႃႈ၊-ႁေႃႈမေႈယိင်းၶႃႈၼႆႉ ဢိၵ်ႇတင်းလုၵ်ႈၸၢႆးမၼ်းဢွၵ်ႇပႅတ်ႈ သေၵမ်း။
၁၀ လုၵ်ႈၸၢႆးမေႈယိင်းၶႃႈၼႆႉတၵ်းဢမ်ႇလႆႈၶၢမ်ႇဢမူၺ်ႇလူၺ်ႈၵၼ်တင်း လုၵ်ႈၸၢႆးၵဝ်ၶႃႈဢိၸၵ်ႉ ၼႆႉၵူၺ်း၊ ဝႃႈၼင်ႇၼႆဢေႃႈ။ဢႃႇပြႁမ်ႇၵေႃႈ ၵွပ်ႈပိူဝ်ႈပဵၼ်လုၵ်ႈၸၢႆးမၼ်းလႄႈမီးတၢင်းဢၼ် ယၢပ်ႇ ၼႃႇဢေႃႈ။
၁၁ ၵူၺ်းၵႃႈၽြႃးပဵၼ်ၸဝ်ႈလၢတ်ႈတီႈဢႃႇပြႁမ်ႇ လႄႈဝႃႈ၊-ၵွပ်ႈပိူဝ်ႈလုၵ်ႈၸၢႆးဢွၼ်ႇတင်းမႄး ယိင်း ၶႃႈၼၼ်ႉ ယႃႇပထေၢင်ႇလွင်ႈၼႆႉပဵၼ်ဢၼ် ယၢပ်ႇၼႃႇ။
၁၂ ႁဵတ်းၸွမ်းၵႃႈၼင်ႇဢၼ်ၸႃႇရႃႇလၢတ်ႈၵူႈၸိူဝ်ႉၵူႈပိူင်ၼၼ်ႉလႄႈထွမ်ႇဢဝ်ၵႂၢမ်းမၼ်းတႃႉ။လွင်ႈမၼ်းၸမ်းၸိူဝ်ႉၶိူဝ်းမႂ်းတၵ်းတႄႇၼႂ်း ဢိၸၵ်ႉၵူၺ်းဢေႃႈ။
၁၃ ၵွပ်ႈပိူဝ်ႈလုၵ်ႈၸၢႆးမေႈယိင်းၶႃႈၼၼ်ႉပဵၼ်ၸိူဝ်ႉၶိူဝ်းမႂ်းလႄႈ မၼ်းၵေႃႈၵဝ်တၵ်းႁႂ်ႈပဵၼ်ၸိူဝ်ႉၶိူဝ်းမဵဝ်းၵူၼ်းဢေႃႈ၊ ဝႃႈၼင်ႇၼႆဢေႃႈ။
၁၄ ဢႃႇပြႁမ်ႇ လုၵ်ႉၶိင်ႇၵၢင်ၼႂ်ၸဝ်ႉၸဝ်ႉသေယဝ်ႉ ဢဝ်ၶဝ်ႈမုၼ်းတင်းၼမ်ႉတဝ်ႈ တၢင်ႇသႂ်ႇပၼ်ၵႃႈၼိူဝ်ႁူဝ်မႃႇ ႁႃႇၵရ သေလႄႈဢဝ်လုၵ်ႈဢွၼ်ႇၼၼ်ႉဢၢပ်ႈပၼ်လႄႈ ပွႆႇမေႈယိင်း ၶႃႈၼၼ်ႉၵွႃႇသေဢေႃႈ။ႁႃႇၵရၵေႃႈဢွၵ်ႇၵွႃႇသေယဝ်ႉလႄႇၵွႃႇလႄႇမႃး ယူႇၵႃႈၼႂ်း ထိူၼ်ႇ ပေႇရသေႇၽ ၼၼ်ႉဢေႃႈ။
၁၅ မိူဝ်ႈဢၼ်ၼမ်ႉၵိၼ်သဵင်ႈမူတ်းၵွႃႇယဝ်ႉၼၼ်ႉ မၼ်းဢဝ်လုၵ်ႈဢွၼ်ႇမၼ်းတမ်းဝႆႉၵႃႈတႂ်ႈယုမ်းသေယဝ်ႉ၊ မၼ်းၵွႃႇၼင်ႈယူႇႁင်းၵူၺ်းမၼ်း ၵႃႈတီႈႁမ်ႉၵႆၵႆၸူဝ်ႈယိုဝ်းၵၢင်ႇၼိုင်ႈ ၼၼ်ႉဢေႃႈ။
၁၆ လွင်ႈမၼ်းၸမ်းမၼ်းဝႃႈ၊-ၵဝ်ဢမ်ႇၶႂ်ႈႁၼ်လုၵ်ႈဢွၼ်ႇၵဝ်တၢႆ၊ဝႃႈၼင်ႇၼႆဢေႃႈ။မိူဝ်ႈဢၼ်မၼ်းၼင်ႈယူႇႁင်းၵူၺ်းမၼ်းၼၼ်ႉၸိုင်၊ မၼ်းၵိဝ်သဵင် လႄႈႁွင်ႉႁႆႈဢေႃႈ။
၁၇ ၽြႃးပဵၼ်ၸဝ်ႈငိၼ်းသဵင်လုၵ်ႈၸၢႆးဢွၼ်ႇၼၼ်ႉလႄႈ တမၢၼ်ႇၵၢင်ႁၢဝ်ၽြႃးပဵၼ်ၸဝ်ႈယူႇၵႃႈ ၼိူဝ် ၵၢင်ႁၢဝ် မွၵ်ႇလၢတ်ႈတီႈ ႁႃႇၵရ ၼၼ်ႉလႄႈဝႃႈ၊-ႁႃႇၵရ ဢိူၺ်း။မႂ်းပဵၼ်သင်။ယႃႇပေမႆႈၸႂ်။ၽြႃးပဵၼ်ၸဝ်ႈငိၼ်းသဵင်လုၵ်ႈၸၢႆးဢွၼ်ႇမႂ်းၵႃႈ ၼႂ်းတီႈဢၼ်မၼ်းမီးၼၼ်ႉယဝ်ႉ။
၁၈ လုၵ်ႉတႃႉ။ယုၵ်ႉယွင်ႊဢဝ်လုၵ်ႈၸၢႆးဢွၼ်ႇလႄႈ ဢဝ်မိုဝ်းယိပ်းၵမ်ဝႆႉတႃႉ။ၵဝ်တၵ်းႁႂ်ႈမၼ်း ပဵၼ်မဵဝ်းၵူၼ်းဢၼ်ယႂ်ႇၼႃႇဢေႃႈ၊ ဝႃႈၼင်ႇၼႆဢေႃႈ။
၁၉ မိူဝ်ႈၼၼ်ႉၽြႃးပဵၼ်ၸဝ်ႈၽုၺ်ႇမၢၵ်ႇတႃ ႁႃႇၵရ လႄႈမၼ်းလႆႈႁၼ်ၼမ်ႉမေႃႇသေယဝ်ႉ၊ ၵွႃႇ ထႅမ် ႁႂ်ႈၼမ်ႉတဵမ်ၼမ်ႉတဝ်ႈသေယဝ်ႉ ပၼ်လုၵ်ႈၸၢႆး ဢွၼ်မၼ်းၵိၼ်ၼမ်ႉဢေႃႈ။ၽြႃးပဵၼ်ၸဝ်ႈ မီးယူႇၽၢႆႇလုၵ်ႈ ၸၢႆးဢွၼ်ႇၼၼ်ႉဢေႃႈ။
၂၀ မၼ်းၵေႃႈယႂ်ႇမႃးလႄႈ ယူႇၵႃႈၼႂ်းထိူၼ်ႇပဵၼ်မေႃၵၢင်ႇဢေႃႈ။
၂၁ မၼ်းၵွႃႇယူႇၵႃႈၼႂ်းထိူၼ်ႇ ပႃႈရၢၼ်ႇ လႄႈမေႈမၼ်းၵေႃႈဢဝ်မေႈယိင်းမိူင်း ဢေႇၵႅပ်ႉတု ၵေႃႉ ၼိုင်ႈ ႁႂ်ႈလႆႈႁဵတ်းပဵၼ်မေးမၼ်းဢေႃႈ။
တၢင်းဢၼ်လႆႈၸႂ်တီႈပေႇရသေႇၽ
၂၂ မိူဝ်ႈၼၼ်ႉၶုၼ် ဢၽိမလိၵ်ႉ ဢိၵ်ႇတင်းၵႄႇႁူဝ်သိုၵ်းမၼ်း ၽိၵေႃႇလ ၸိူဝ်းၼၼ်ႉလၢတ်ႈတီႈ ဢႃႇပြႁမ်ႇလႄႈဝႃႈ၊-ၽြႃးပဵၼ်ၸဝ်ႈမီးယူႇၽၢႆႇမႂ်းၼႂ်းလွင်ႈ တၢင်းဢၼ်မႂ်းႁဵတ်းၵူႈၸိူဝ်ႉၵူႈပိူင် ၼၼ်ႉဢေႃႈ။
၂၃ ၵွပ်ႈႁွႆးၼႆႉလႄႈ မႂ်းတၵ်းဢမ်ႇပႅတ်ႉဢမ်ႇလႅၼ်ၵဝ်တင်းလုၵ်ႈၸၢႆးၵဝ်လၢၼ်ၸၢႆးၵဝ်လႄႈ တၵ်း ႁဵတ်း ၵျေးၸူးတီႈၵဝ်တင်းမိူင်းၵဝ်ဢၼ်မႂ်းသွၼ်ႈပိုင်ႈယူႇၼႆႉ ၸွမ်းၵႃႈၼင်ႇဢၼ်လႆႈႁဵတ်းၵျေးၸူးတီႈမႂ်းယဝ်ႉၼၼ်ႉ ဝႃႈၼႆမႂ်းတိူင်ႇၽြႃးပဵၼ်ၸဝ်ႈတႃႉ၊ဝႃႈၼင်ႇၼႆဢေႃႈ။
၂၄ ဢႃႇပြႁမ်ႇ ၵေႃႈၶိုၼ်းလၢတ်ႈလႄႈဝႃႈ၊- ၵဝ်တၵ်းတိူင်ႇဝႃႈၸိူဝ်ႉၼင်ႇၼၼ်ဢေႃႈ၊ ဝႃႈၼင်ႇ ၼႆဢေႃႈ။
၂၅ ဢႃႇပြႁမ်ႇ တၢင်ႇဢပျႅတ်ႈၵႃႈၼိူဝ်ၶုၼ် ဢၽိမလိၵ်ႉၵွပ်ႈပိူဝ်ႈလွင်ႈၼမ်ႉမေႃႇ ဢၼ်ၶႃႈၶုၼ် ဢၽိမလိၵ်ႉတင်းလၢႆႁဵတ်းပႄႉႁဵတ်းၼႅင်ႇႁိမ်ဢဝ်ၼၼ်ႉဢေႃႈ။
၂၆ ၶုၼ်ဢၽိမလိၵ်ႉ ၵေႃႈလၢတ်ႈဝႃႈ၊-ၵဝ်ဢမ်ႇႁူႉလွင်ႈဢၼ်ၽူႈလႂ်ႁဵတ်းဢမူႉၼႆႉၼၼ်ႉ။မႂ်းဢမ်ႇမွၵ်ႇဢမ်ႇလၢတ်ႈတီႈၵဝ်။ၵဝ်ၵေႃႈဢမ်ႇလႆႈငိၼ်းတေႃႇထိုင်ႁွတ်ႈဝၼ်း မိူဝ်ႈၼႆႉ၊ဝႃႈၼင်ႇၼႆဢေႃႈ။
၂၇ ဢႃႇပြႁမ်ႇ ဢဝ်သူဝ်းလႂ်ဝူဝ်းလႂ်သေယဝ်ႉပၼ်တီႈၶုၼ် ဢၽိမလိၵ်ႉ လႄႈသွင် ၶႃႁဵတ်းပတိၺိၺ်ႇ လူၺ်ႈၵၼ်ဢေႃႈ။
၂၈ ဢႃႇပြႁမ်ႇၽႄဢဝ်သူဝ်းမေႈဢွၼ်ႇၸဵတ်းတူဝ် ဢွၵ်ႇသေၵႃႈၼႂ်း ၽုင်သူဝ်းဝႆႉၶေႃၶေႃဢေႃႈ။
၂၉ ၶုၼ် ဢၽိမလိၵ်ႉ ၵေႃႈထၢမ်တီႈ ဢႃႇပြႁမ်ႇ လႄႈဝႃႈ၊- သူဝ်းမေႈဢွၼ်ႇၸဵတ်းတူဝ် ဢၼ်ၽႄဢွၵ်ႇဝႆႉၶေႃၶေႃၼႆႉ ပဵၼ်ၸိူဝ်ႉၼင်ႇႁိုဝ်၊မိူဝ်ႈဢၼ်ဝႃႈၼင်ႇၼႆၸိုင် မၼ်းၵေႃႈလၢတ်ႈ လႄႈဝႃႈ၊-
၃၀ ႁပ်ႉၶၢမ်ႇဢဝ်သူဝ်းမေႈဢွၼ်ႇၸဵတ်းတူဝ်ၼႆႉၵႃႈၼႂ်းမိုဝ်းၵဝ်လႄႈ ႁႂ်ႈလႆႈပဵၼ်သၢၵ်ႈသေႇၽၢႆႇၵဝ်လွင်ႈဢၼ်ဝႃႈၵဝ်ၶုတ်းၼမ်ႉမေႃႇၼႆႉၼၼ်ႉယဝ်ႉ၊ ဝႃႈ ၼင်ႇ ၼႆဢေႃႈ။
၃၁ ၵွပ်ႈပိူဝ်ႈသွင်ၶႃတိူင်ႇဝႃႈၵႃႈတီႈၼၼ်ႉလႄႈၵႃႈတီႈၼၼ်ႉလႆႈႁွင်ႉႁိၵ်ႈၸိုဝ်ႈဝႃႈ ပေႇရသေႇၽ ဢေႃႈ။
၃၂ ၼင်ႇၼၼ်လႄႈၶဝ်ႁဵတ်းပတိၺိၺ်ႇၵႃႈတီႈပေႇရသေႇၽ ဢေႃႈ။ၶုၼ် ဢၽိမလိၵ်ႉ ဢိၵ်ႇတင်း ၵႄႇႁူဝ်သိုၵ်းမၼ်း ၽိၵေႃႇလ ၸိူဝ်းၼၼ်ႉၶိုၼ်းမိူဝ်းၵွႃႇၵႃႈတီႈမိူင်း ၽိလိတ်ႉတိ သေဢေႃႈ။
၃၃ ဢႃႇပြႁမ်ႇ ၽုၵ်ႇတူၼ်ႈမၢၵ်ႇၵႅင်းၵႃႈတီႈ ပေႇရသေႇၽ ၼၼ်ႉလႄႈ ႁဵတ်းပထၼႃႇတီႈၼႃႇမႃႉ ၸိုဝ် သဵင်ထႃႇဝရႃႉၽြႃးဢၼ်ဝႃႈၽြႃးပဵၼ်ၸဝ်ႈဢၼ်တႄႇ ယူႇသေႇသေႇၼၼ်ႉ ၵႃႈတီႈၼၼ်ႉဢေႃႈ။
၃၄ ဢႃႇပြႁမ်ႇသွၼ်ႈပိုင်ႈယူႇၵႃႈတီႈၼႂ်းမိူင်း ၽိလိတ်ႉတိ ႁိုင်တၢၼ်ႇတၢၼ်ႇဢေႃႈ။