Chapter
၃၈
ယုတတင်းတႃႇမႃႇ
၁ မိူဝ်ႈၵႃႇလႃႉယၢမ်းၼၼ်ႉ ယုတ လုၵ်ႉသေၵႃႈတီႈတီႈယူႇပီႈၼွင်ႉမၼ်းၸိူဝ်းၼၼ်ႉၵွႃႇလႄႈ ဝႄႉ ၶဝ်ႈ ၵႃႈတီႈၵူၼ်းဢတုလမ်ႇ ၵေႃႉၼိုင်ႈဢၼ်လႆႈၸိုဝ်ႈ ႁိရ ၼၼ်ႉ ဢေႃႈ။
၂ မၼ်းထူပ်းႁၼ်လုၵ်ႈယိင်းၵူၼ်းၶႃႇၼၼ်ႇ ဢၼ်လႆႈၸိုဝ်ႈ သုဢႃႇ ၼၼ်ႉလႄႈမၼ်းဢဝ်မေႈယိင်း ၼၼ်ႉ သေယဝ်ႉႁူမ်ႈပွင်းၵၼ်တင်းမၼ်းဢေႃႈ။
၃ မၼ်းပႃးပတိၵ်ႉသၼ်ႇထေႇလႄႈ ၵိူတ်ႇလဵင်ႉလုၵ်ႈၸၢႆးမႃးလႄႈ ႁွင်ႉ ႁိၵ်ႈၸိုဝ်ဝႃႈ ဢေႇရ ဢေႃႈ။
၄ မၼ်းသမ်ႉပႃးပတိၵ်ႉသၼ်ႇထေႇ ထႅင်ႈလႄႈၵိူတ်ႇလဵင်ႉလုၵ်ႈၸၢႆးမႃးဢေႃႈ။မၼ်းႁွင်ႉႁိၵ်ႈၸိုဝ်လုၵ်ႈၸၢႆးၼၼ်ႉဝႃႈ ဢေႃႇၼၼ်ႇ ဢေႃႈ။
၅ မၼ်းသမ်ႉပႃးပတိၵ်ႉသၼ်ႇထေႇထႅင်ႈလႄႈ ၵိူတ်ႇလဵင်ႉလုၵ်ႈၸၢႆးမႃးလႄႈႁွင်ႉႁိၵ်ႈၸိုဝ်ဝႃႈ သေႇလ ဢေႃႈ။မိူဝ်ႈဢၼ်ၵိူတ်ႇလဵင်ႉမၼ်းမႃးၼၼ်ႉ ပေႃႈမၼ်းမီးယူႇၵႃႈတီႈဝဵင်းၶေႇသိပ်ႇ ဢေႃႈ။
၆ လိုၼ်းၼၼ်ႉ ယုတ ဢဝ်မေႈယိင်း ဢၼ်လႆႈၸိုဝ်တႃႇမႃႇ ၼၼ်ႉပၼ်တီႈလုၵ်ႈၸၢႆးတူၼ်ႈမၼ်း ဢေႇရ ၼၼ်ႉဢေႃႈ။
၇ ဢေႇရ လုၵ်ႈၸၢႆးတူၼ်ႈယုတ ၼၼ်ႉပဵၼ်ၵေႃႉဢၼ်ႁၢႆႉမိူၵ်ႈၵႃႈတီႈၽၢႆႇၼႃႈ ထႃႇဝရႃႉၽြႃးလႄႈ ထႃႇဝရႃႉၽြႃးဢဝ်မၼ်းတၢႆပႅတ်ႈဢေႃႈ။
၈ မိူဝ်ႈၼၼ်ႉယုတ လၢတ်ႈတီႈ ဢေႃႇၼၼ်ႇ လႄႈဝႃႈ၊-ၶဝ်ႈၸူးၵႃႈတီႈပီႈလူဝ်းမႂ်းလႄႈ ပဵၼ်ႁိူၼ်းပဵၼ်ယေးလူၺ်ႈၵၼ်တင်းမၼ်းတႃႉ။သိုပ်ႇၸိူဝ်ႉသိုပ်ႇၶိူဝ်းပီႈဢၢႆႈမႂ်းတႃႉ၊ဝႃႈ ၼင်ႇၼႆဢေႃႈ။
၉ ဢေႃႇၼၼ်ႇ ႁူႉလွင်ႈဢၼ်ပေႃးလႆႈၸိူဝ်ႉလႆႈၶိူဝ်းၸိုင်၊ တေဢမ်ႇလႆႈမၢတ်ႈပဵၼ်ၸိူဝ်ႉပဵၼ်ၶိူဝ်း တူဝ် ၸဝ်ႈၵဝ်ၼၼ်ႉလႄႈ မိူဝ်ႈဢၼ်မၼ်းၶဝ်ႈၸူးတီႈပီႈလူဝ်းမၼ်းၼၼ်ႉ မၼ်းႁႂ်ႈၼမ်ႉသုၵ်ႈမၼ်းတူၵ်းပႅတ်ႈသေၵႃႈၼိူဝ်လိၼ် ၵွပ်ႈပိူဝ်ႈဢၼ်မၼ်းၵူဝ်တၵ်းလႆႈပၼ်ၸိူဝ်ႉပၼ်ၶိူဝ်းတီႈပီႈဢၢႆႈမၼ်းၼၼ်ႉဢေႃႈ။
၁၀ ပိူဝ်ႈဢၼ်ဢမူႉဢၼ်မၼ်းႁဵတ်းၼၼ်ႉ ပဵၼ်ဢၼ်ႁၢႆႉမိူၵ်ႈၵႃႈတီႈၽၢႆႇၼႃႈထႃႇဝရႃႉၽြႃးလႄႈ မၼ်းၼၼ်ႉၵေႃႈၽြႃးပဵၼ်ၸဝ်ႈဢဝ်တၢႆပႅတ်ႈသေဢေႃႈ။
၁၁ မိူဝ်ႈၼၼ်ႉယုတ လၢတ်ႈတီႈလုၵ်ႈပႂ်ႉမၼ်းတႃႇမႃႇ ၼၼ်ႉလႄႈဝႃႈ၊-ၸူဝ်ႈဢၼ်လုၵ်ႈၸၢႆးၵဝ်သေႇလဢမ်ႇပႆႇယႂ်ႇမႃးၼၼ်ႉၸိုင်မႂ်းႁဵတ်းမေႈမုၵ်ႉမေႈမၢႆႈလႄႈ ယူႇၵႃႈတီႈႁိူၼ်းပေႃႈမႂ်းလူးၵွၼ်ႇတႃႉ၊ဝႃႈၼင်ႇၼႆဢေႃႈ။လွင်ႈမၼ်းၸမ်း မၼ်းၵူဝ်မၼ်းတၵ်းတၢႆမိူၼ်ၸိူဝ်ႉၼင်ႇပီႈဢၢႆႈမၼ်းၸိူဝ်း ၼၼ်ႉဢေႃႈ၊ ဝႃႈၼင်ႇၼႆဢေႃႈ။ၵမ်းၼၼ်ႉတႃႇမႃႇမိူဝ်းၵွႃႇလႄႈ ယူႇၵႃႈတီႈႁိူၼ်းပေႃႈမၼ်းဢေႃႈ။
၁၂ မိူဝ်ႈဢၼ်ၶိင်ႇၵႃႇလႃႉႁိုင်ၼႃႇယဝ်ႉၼၼ်ႉၸိုင် မေးယုတဢၼ်ပဵၼ်လုၵ်ႈယိင်းသုဢႃႇ ၼၼ်ႉတၢႆၵွႃႇဢေႃႈ။ယုတ ပျေႇၸႂ်သေယဝ်ႉ၊ၸွမ်းလူၺ်ႈၵၼ်တင်းၵေႃႉသေႈမၼ်း ႁိရ ၵူၼ်း ဢတုလမ်ႇ ၼၼ်ႉၵွႃႇၸူးၵႃႈတီႈဝဵင်းတိမ်ႇၼႃႇ ၵႃႈတီႈၵူၼ်းၵႅတ်းႁႆးၶူၼ်သူဝ်းတင်းလၢႆ မီးၼၼ်ႉဢေႃႈ။
၁၃ မိူဝ်ႈဢၼ်ပိူၼ်ႈမွၵ်ႇလၢတ်ႈတီႈတႃႇမႃႇလႄႈဝႃႈ၊-ပေႃႈၸဝ်ႈမႂ်းၵွႃႇၵႃႈတီႈဝဵင်းတိမ်ႇၼႃႇ ႁႂ်ႈလႆႈ ၵႅတ်း ႁႆးၶူၼ်သူဝ်းဢေႃႈ၊ ဝႃႈၼင်ႇၼႆၼၼ်ႉၸိုင်၊
၁၄ မၼ်းထွတ်ႇၶူဝ်းၼုင်ႈမေႈမုၵ်ႉမေႈမၢႆႈၼၼ်ႉ သေယဝ်ႉဢဝ်တင်ႈၽႃႈဢၼ်ႁူမ်ႇၼႃႈၼၼ်ႉ ႁူမ်ႇ ၼႃႈမၼ်းသေယဝ်ႉ၊သုမ်ႇမႆတူဝ်ၸဝ်ႈၵဝ်ႇလႄႈ ၼင်ႈယူႇၵႃႈတီႈၽၵ်းတူဝဵင်းဢေႇၼိမ်ႇ ဢၼ်မီးၵႃႈတီႈသဵၼ်ႈတၢင်းဢၼ်ၵွႃႇၸူးၵႃႈတီႈဝဵင်းတိမ်ႇၼႃႇၼၼ်ႉဢေႃႈ။လွင်ႈမၼ်းၸမ်း၊ပိူဝ်ႈဢၼ်မၼ်းႁူႉႁၼ်လွင်ႈဢၼ် သေႇလ ယႂ်ႇမႃးယဝ်ႉသေၵေႃႈ ဢမ်ႇလႆႈပဵၼ်ႁိူၼ်းပဵၼ်ယေးလူၺ်ႈၵၼ်တင်း မၼ်းၼၼ်ႉလႄႈမၼ်းၸင်ႇႁဵတ်းဢေႃႈ။
၁၅ ယုတ ၼၼ်ႉမိူဝ်ႈဢၼ်ႁၼ်မၼ်းၼၼ်ႉၸိုင်ၵွပ်ႈပိူဝ်ႈမၼ်းႁူမ်ႇၼႃႈမၼ်းယူႇလႄႈ ထၢင်ႇမၼ်းပဵၼ်မေႈမွၵ်ႇယႃႈဢေႃႈ။မၼ်းဝႄႈဢွၵ်ႇတၢင်းၵွႃႇၸူးတီႈမၼ်းၼၼ်ႉသေယဝ်ႉပိူဝ်ႈဢၼ်ဢမ်ႇႁူႉ လွင်ႈ ဢၼ်မၼ်းပဵၼ်လုၵ်ႈပႂ်ႉ တူဝ်ၸဝ်ႈၵဝ်ႇၼၼ်ႉၸိုင်မၼ်းလၢတ်ႈဝႃႈ၊-
၁၆ ပၼ်ဢၶႂၢင်ႉႁႂ်ႈၵဝ်လႆႈၶဝ်ႈၸူးတီႈမႂ်းသေၵမ်း၊ မိူဝ်ႈဢၼ်ဝႃႈၼင်ႇၼႆၸိုင်၊မၼ်းၼၼ်ႉၵေႃႈထၢမ်လႄႈဝႃႈ၊-မႂ်းၸဝ်ႈတၵ်းပၼ်သူးၵႃႈသင်ႁႂ်ႈလႆႈၶဝ်ႈၸူးၵႃႈတီႈၵဝ်ၶႃႈ၊ ဝႃႈၼင်ႇၼႆလႄႈ ယုတ ၵေႃႈလၢတ်ႈဝႃႈ၊-ၵဝ်တၵ်းဢဝ်ပေႉဢွၼ်ႇတူဝ်ၼိုင်ႈၵႃႈၼႂ်းၽုင်ႉပေႉၼၼ်ႉလႄႈ ပၼ်မႂ်း ဢေႃႈ၊ဝႃႈၼင်ႇ ၼႆဢေႃႈ။
၁၇ မၼ်းၼၼ်ႉၵေႃႈထၢမ်လႄႈဝႃႈ၊-ၸူဝ်ႈဢၼ်ဢမ်ႇပႆႇပၼ်ပေႉၼၼ်ႉၸိုင်တၵ်းဢဝ်သေၸိူဝ်ႉသေပိူင်ပွင်ႇငၢမ်ႇဝႆႉႁိုဝ်၊ မိူဝ်ႈဢၼ်ဝႃႈၼင်ႇၼႆၸိုင်မၼ်းၵေႃႈၶိုၼ်းထၢမ်လႄႈဝႃႈ၊-
၁၈ တၵ်းလႆႈဢဝ်ၵႃႈသင်ပွင်ႇငၢမ်ႇဝႆႉ၊ဝႃႈၼင်ႇၼႆလႄႈ မၼ်းၵေႃႈၶိုၼ်းလၢတ်ႈဝႃႈ၊-တၵ်းလႆဢဝ်တၼ်းသိၵ်ႈ၊သၢႆၸရွႆႇတင်းၶွၼ်ႉတဝ်ႉဢၼ်မီးၼႂ်းမိုဝ်းမႂ်းၸဝ်ႈၼၼ်ႉ ပွင်ႇငၢမ်ႇဝႆႉဢေႃႈ၊ဝႃႈၼင်ႇၼႆလႄႈ မၼ်းၵေႃႈဢဝ်ဢုၵ်ႉၸႃႇၼၼ်ႉဢၢပ်ႈပၼ်သေယဝ်ႉၶဝ်ႈၸူးၵႃႈတီႈမၼ်းဢေႃႈ။မၼ်း ၵေႃႈ ၸပ်း ပတိၵ်ႉသၼ်ႇထေႇဢေႃႈ။
၁၉ လိုၼ်းၼၼ်ႉမၼ်းလုၵ်ႉမိူဝ်းၵွႃႇလႄႈ ထွတ်ႇၽႃႈ ဢၼ်ႁူမ်ႇၼႃႈၼၼ်ႉပႅတ်ႈသေယဝ်ႉ သမ်ႉ ၶိုၼ်းၼုင်ႈၶူဝ်းၼုင်ႈမေႈမုၵ်ႉမေႈမၢႆႈ သေဢေႃႈ။
၂၀ ယုတ ဢဝ်ပေႉဢွၼ်ႇဢၢပ်ႈပၼ်ၵႃႈၼႂ်းမိုဝ်းၵေႃႉသေႈမၼ်းၵူၼ်းဢတုလမ်ႇ ၼၼ်ႉႁႂ်ႈလႆႈၵွႃႇ ထုတ်ႇ ဢဝ်ဢုၵ်ႉၸႃႇဢၼ်မၼ်းပွင်ႇဢၼ်ငၢမ်ႇဝႆႉတီႈမေႈယိင်းၵေႃႉၼၼ်ႉသေၵေႃႈၵူၼ်း ဢတုလမ် ၼၼ်ႉဢမ်ႇထူပ်းဢမ်ႇႁၼ်မေႈမွၵ်ႇယႃႈၼၼ်ႉလႄႈ မၼ်း ထၢမ်ၵူၼ်းၵႃႈတီႈၼၼ်ႉလႄႈဝႃႈ၊-
၂၁ မေႈမွၵ်ႇယႃႈဢၼ်ယၢမ်ႈၼင်ႈၵႃႈတီႈႁိမ်းတၢင်းဝဵင်းဢေႇၼိမ်ႇ ၼၼ်ႉမီးၵႃႈလႂ်၊မိူဝ်ႈဢၼ်ဝႃႈၼင်ႇ ၼႆၸိုင် ၶဝ်ၵေႃႈၶိုၼ်းလၢတ်ႈ ဝႃႈ၊-
၂၂ ၵႃႈတီႈၼႆႉဢမ်ႇမီးမေႈမွၵ်ႇယႃႈၵူၺ်း၊ဝႃႈၼင်ႇၼႆလႄႈမၼ်းၵေႃႈ ၶိုၼ်းမိူဝ်းၵွႃႇၵႃႈတီႈ ယုတ သေလႄႈလၢတ်ႈဝႃႈ၊-ၵဝ်ၶႃႈႁႃမၼ်းၵေႃႈဢမ်ႇထူပ်းဢမ်ႇႁၼ်။ၵူၼ်းၵႃႈတီႈၼၼ်ႉဝႃႈ၊-ၵႃႈတီႈၼႆႉဢမ်ႇမီးမေႈမွၵ်ႇယႃႈ၊ဝႃႈၼင်ႇၼႆယဝ်ႉ၊ဝႃႈၼင်ႇၼႆဢေႃႈ။
၂၃ ယုတ ၵေႃႈလၢတ်ႈလႄႈဝႃႈ၊-ၼင်ႇႁိုဝ်ႁဝ်းတၵ်းဢမ်ႇလႆႈမီးတၢင်းဢၼ်ဢူၵ်းဢၼ်ဢၢႆၸိုင်၊ယႃႇမၼ်းတႃႉ။ႁႂ်ႈမၼ်းဢဝ်တႃႉ။ၵဝ်ဢဝ်ပေႉဢွၼ်ႇၼႆႉ ပၼ်ၵွႃႇၵေႃႈ မႂ်းႁႃဢမ်ႇထူပ်းဢမ်ႇႁၼ်မၼ်းၼၼ်ႉလူင်ပေႇ၊ဝႃႈၼင်ႇၼႆဢေႃႈ။
၂၄ဝၢႆးၼၼ်ႉ မိူဝ်ႈဢၼ်ပူၼ်ႉသၢမ်လိူၼ်ယဝ်ႉၼၼ်ႉၸိုင်၊
ပိူၼ်ႈမွၵ်ႇလၢတ်ႈတီႈ ယုတ လႄႈဝႃႈ၊- လုၵ်ႈပႂ်ႉမႂ်းတႃႇမႃႇ ၼၼ်ႉလႆႈႁဵတ်းမေႈမွၵ်ႇယႃႈလႄႈပႃးပတိၵ်ႉသၼ်ႇထေႇ ၵွပ်ႈပိူဝ်ႈဢၼ်မၼ်းႁဵတ်းမေႇထုင်ႇဢၼ်ဢမ်ႇတြႃးၼၼ်ႉယဝ်ႉ၊ဝႃႈၼင်ႇၼႆလႄႈ ယုတ ၵေႃႈၸီႇယၢင်ႇလႄႈဝႃႈ၊-ဢဝ်မၼ်းဢွၵ်ႇလႄႈတုတ်ႇၽႆးပႅတ်ႈတႃႉ၊ဝႃႈၼင်ႇၼႆဢေႃႈ။
၂၅ မိူဝ်ႈဢၼ်ဢဝ်မၼ်းဢွၵ်ႇၵွႃႇၼၼ်ႉ မၼ်းဢဝ်ဢုၵ်ႉၸႃႇဢၼ်မီးတီႈမၼ်းၼၼ်ႉ ပၼ်ၵွႃႇၵႃႈတီႈပေႃႈၸဝ်ႈမၼ်းလႄႈႁႂ်ႈလၢတ်ႈဝႃႈ၊-ၵဝ်ၶႃႈပႃးပတိၵ်ႉသၼ်ႇထေႇၵွပ်ႈပိူဝ်ႈၵေႃႉဢၼ်ပိူင်ႇ ဢုၵ်ႉၸႃႇၸိူဝ်းၼႆႉၶႃႈယဝ်ႉ။ၶႅၼ်းတေႃႈတူၺ်းဢုၵ်ႉၸႃႇၸိူဝ်းၼႆႉ ပဵၼ်ဢုၵ်ႉၸႃႇၽူႈလႂ် ဢၼ်ဝႃႈၼၼ်ႉသေၵမ်း၊ဝႃႈၼင်ႇၼႆဢေႃႈ။
၂၆ ယုတ ႁၼ်ဢုၵ်ႉၸႃႇၸိူဝ်းၼၼ်ႉသေလႄႈလၢတ်ႈဝႃႈ၊-မၼ်းပဵၼ်ၵေႃႉဢၼ်သိုဝ်ႈတေႃႇၼႃႇသေၵဝ်ဢေႃႈ။လွင်ႈမၼ်းၸမ်း ၵဝ်ယင်းဢမ်ႇဢဝ်လုၵ်ႈၸၢႆးၵဝ် သေႇလ ၼၼ်ႉပၼ်တီႈမၼ်းလႄႈ လႆႈၽိတ်းမႅၼ်ႈမႃးယဝ်ႉ၊ဝႃႈၼင်ႇၼႆဢေႃႈ။လိုၼ်းၼၼ်ႉမၼ်းယင်းဢမ်ႇၶဝ်ႈၸူးတီႈမၼ်းလႄႈယူႇဢေႃႈ။
၂၇ ဝၢႆးၼၼ်ႉ မိူဝ်ႈဢၼ်ႁွတ်ႈထိုင်ၶိင်ႇဢၼ်ၵိူတ်ႇလဵင်ႉလုၵ်ႈၼၼ်ႉၸိုင်၊ ၵႃႈၼႂ်းတွင်ႉမၼ်းၼၼ်ႉမီးလုၵ်ႈၽႃၽေဢေႃႈ။ၼႂ်းမိူဝ်ႈဢၼ်ယင်းတိုၵ်ႉၵိူတ်ႇလဵင်ႉလုၵ်ႈယူႇၼၼ်ႉၸိုင်၊ၵေႃႉၼိုင်ႈဢဝ်မိုဝ်း ယိုၼ်း ဢွၵ်ႇလႄႈ
၂၈ မေႈၵဵပ်းၵေႃႈ ယိပ်းၵမ်မိုဝ်းမၼ်းသေယဝ်ႉ ဢဝ်မႆလႅင်ႊမတ်ႉလႄႈဝႃႈ၊ၵေႃႉၼႆႉတၵ်းၵိူတ်ႇလဵင်ႉ ဢွၼ်တၢင်းဢေႃႈ၊ ဝႃႈၼင်ႇၼႆ ဢေႃႈ။
၂၉ ၵူၺ်းၵႃႈၵေႃႉၼၼ်ႉ သမ်ႉၶိုၼ်းႁူတ်ႈဢဝ်မိုဝ်းမၼ်းလႄႈပီႈဢၢႆႈမၼ်းၵိူတ်ႇလဵင်ႉမႃးဢွၼ်တၢင်း ဢေႃႈ။မေႈၵဵပ်းလၢတ်ႈလႄႈဝႃႈ၊-ႁဵတ်းသင်လႄႈမႂ်းမူၼ်ႉဢွၵ်ႇတိုဝ်ဢွၵ်ႇမႃး။ႁႂ်ႈလွင်ႈတၢင်းဢၼ်မူၼ်ႉဢွၵ်ႇတိုဝ်ဢွၵ်ႇၼႆႉၸပ်းတီႈမႂ်းတႃႉ၊ဝႃႈၼင်ႇၼႆလႄႈ ႁွင်ႉႁိၵ်ႈ ၸိုဝ်ႈမၼ်းဝႃႈ ၽေႇရိတ်ႉ ဢေႃႈ။
၃၀ လိုၼ်းၼၼ်ႉၼွင်ႉၸၢႆးမၼ်း ဢၼ်ဢဝ်မႆလႅင်ႊမတ်ႉၵႃႈတီႈမိုဝ်းဝႆႉၼၼ်ႉၵိူတ်ႇလဵင်ႉမႃးလႄႈၶဝ် ႁွင်ႉ ႁိၵ်ႈၸိုဝ်မၼ်းဝႃႈ ၸႃႇရႃႇ ဢေႃႈ။