Chapter
၆
မေႃးတၵေႇလႆႈၶၢမ်ႇတၢင်းဢၼ်ယုၵ်ႉယွင်ႈ
၁ ၼႂ်းၶိုၼ်းၼၼ်ႉၶုၼ်ႁေႃၶမ်းၼွၼ်းဢမ်ႇလပ်းလႆႈလႄႈမီးဢမိင်ႉႁႂ်ႈဢဝ်လိၵ်ႈရႃႇၸဝၢင်ႇဢၼ်မၢတ်ႈမၢႆတႅမ်ႈဝႆႉၸွမ်းၵူႈဝၼ်းၼၼ်ႉမႃးလႄႈၶဝ်ဢွၼ်ၵၼ်ဢဝ်ၽတ်းၵႃႈတီႈၽၢႆႇၼႃႈၶုၼ်ႁေႃၶမ်းဢေႃႈ။
၂ မိူဝ်ႈဢၼ်ထူပ်းႁၼ်ဢၼ်တႅမ်ႈဝႆႉလွင်ႈဢၼ်မေႃးတၵေႇၽုၺ်ႇဢွၵ်ႇၼႄပျႃးလွင်ႈပိၵသၼ်ႇတင်းတေႇရိတ်ႉဢၼ်ပဵၼ်ၵူၼ်းထိင်းၼၢင်းၵႃႈၼႂ်းႁေႃၸဝ်ႈလႄႈပဵၼ်ၵေႃႉဢၼ်ပႂ်ႉၽၵ်းတူသွင်ၵေႃႉၼၼ်ႉၵျၢမ်ႇပွင်ႁႂ်ႈလႆႈဢဝ်ၶုၼ်ႁေႃၶမ်းဢႃႇသူၺ်ႇရုတၢႆၼၼ်ႉၸိုင်ၶုၼ်ႁေႃၶမ်းထၢမ်လႄႈဝႃႈၵွပ်ႈပိူဝ်ႈလွင်ႈၼႆႉလႄႈလႆႈပၼ်သူးလၢပ်ႈၵႃႈသင်။
၃ လႆႈပၼ်ဢရႃႇၵႃႈသင်တီႈမေႃးတၵေႇၼၼ်ႉယဝ်ႉ၊ဝႃႈၼင်ႇၼႆလႄႈၶႃႈၵူၼ်းၶုၼ်ႁေႃၶမ်းဢၼ်ၶႃးၸႃးယူႇၸိူဝ်းၼၼ်ႉဢွၼ်ၵၼ်ၶိုၼ်းလဝ်ႈလၢတ်ႈလႄႈဝႃႈ၊-ဢမ်ႇပႆႇလႆႈပၼ်သူးလၢပ်ႈၵႃႈသင်တီႈမၼ်းလႃးလႃးတီႈၶႃႈ၊ဝႃႈၼင်ၼႆဢေႃႈ။
၄ ၶုၼ်ႁေႃၶမ်းၵေႃႈထၢမ်လႄႈဝႃႈ၊-ၽူႈလႂ်မီးၵႃႈၼႂ်းတမ်ႇတိူင်းၼႆႉ၊ဝႃႈၼင်ႇၼႆဢေႃႈ။မိူဝ်ႈၼၼ်ႉႁႃႇမၼ်ႇၶဝ်ႈမႃးၵႃႈၼႂ်းတမ်ႇတိူင်းၵႃႈၼွၵ်ႈႁႂ်ႈလႆႈလဝ်ႈယွၼ်းဢၶႂၢင်ႉတီႈၶုၼ်ႁေႃၶမ်းႁႂ်ႈလႆႈဢဝ်မေႃးတၵေႇမတ်ႉႁွႆႈၵႅၼ်ႈၶေႃးတူၵ်းတၢႆၵႃႈတီႈသဝ်ဢၼ်မၼ်းႁဵတ်းဝႆႉႁႅၼ်းဝႆႉထႃႈၼၼ်ႉဢေႃႈ။
၅ ၶႃႈၵူၼ်းၶုၼ်ႁေႃၶမ်းၸိူဝ်းၼၼ်ႉဢွၼ်ၵၼ်ၶိုၼ်းလဝ်ႈလၢတ်ႈလႄႈဝႃႈ၊-ႁႃႇမၼ်ႇၸုၵ်းယူႇၵႃႈၼႂ်းတမ်ႇတိူင်းၸဝ်ႈတီႈၶႃႈဢေႃႈ။မိူဝ်ႈဢၼ်ဝႃႈၼင်ႇၼႆၸိုင်ၶုၼ်ႁေႃၶမ်းမီးဢမိင်ႉလႄႈဝႃႈ၊-ႁႂ်ႈမၼ်းၶဝ်ႈမႃးၵႃႈၼႂ်းသေ၊ဝႃႈၼင်ႇၼႆဢေႃႈ။
၆ ႁႃႇမၼ်ႇၶဝ်ႈၵႃႈၼႂ်းသေယဝ်ႉၶုၼ်ႁေႃၶမ်းထၢမ်တီႈမၼ်းလႄႈဝႃႈ၊-ထုၵ်ႇလီႁဵတ်းၸိူဝ်ႉၼင်ႇႁိုဝ်တီႈၵေႃႉဢၼ်ၶုၼ်ႁေႃၶမ်းမီးဢလူဝ်ႇၶႂ်ႈယုၵ်ႉယွင်ႈၼၼ်ႉ၊ဝႃႈၼင်ႇၼႆလႄႈႁႃႇမၼ်ႇၶႆႈၸႂ်ဝူၼ်ႉၸႂ်ၼႂ်းၸႂ်ဝႃႈ၊-လိူဝ်သေၵဝ်ၼႆႉၶုၼ်ႁေႃၶမ်းယင်းမီးဢလူဝ်ႇၶႂ်ႈယုၵ်ႉယွင်ႈၽူႈလႂ်လူးၵွၼ်ႇ၊ဝႃႈၼင်ႇၼႆသေလႄႈ၊
၇ မၼ်းၶိုၼ်းလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊-ပုၼ်ႈၵေႃႉဢၼ်ၶုၼ်ႁေႃၶမ်းမီးဢလူဝ်ႇၶႂ်ႈယုၵ်ႉယွင်ႈၼၼ်ႉၸိုင်လီဢဝ်ၶူဝ်းၼုင်ႈတၢင်းမႆႊဢၼ်ၶုၼ်ႁေႃၶမ်းယၢမ်ႈၼုင်ႈမႆႊယူႇ၊မႃႉဢၼ်ၶုၼ်ႁေႃၶမ်းယၢမ်ႈၶီႇယူႇ၊ရႃႇၸႃႉသရၽူႇဢၼ်ၶုၼ်ႁေႃၶမ်းတိုဝ်းယူႇၼၼ်ႉ၊
၈ ဢဝ်ၶိူင်ႈၼုင်ႈတၢင်းမႆႊၸဝ်ႈဢိၵ်ႇတင်းမႃႉၸဝ်ႈၼၼ်ႉဢၢပ်ႈပၼ်ၵႃႈၼႂ်းမိုဝ်းမူးမၢတ်ႈၽွင်းမိူင်းၸဝ်ႈၵေႃႉဢၼ်မုၼ်ၽုင်းယႂ်ႇပႃးၼိုင်ႈၼၼ်ႉသေလႄႈႁႂ်ႈမၼ်းဢဝ်ၼုင်ႈပၼ်ၵေႃႉဢၼ်ၶုၼ်ႁေႃၶမ်းမီးဢလူဝ်ႇၶႂ်ႈယုၵ်ႉယွင်ႈၼၼ်ႉလႄႈ
၉ ႁႂ်ႈမၼ်းၶီႇမႃႉၸဝ်ႈၸွမ်းသဵၼ်ႈတၢင်းလူင်ဝဵင်းၸဝ်ႈၼၼ်ႉသေလႄႈႁႂ်ႈႁွင်ႉပၢဝ်ႇႁွင်ႉလၢတ်ႈၽၢႆႇၼႃႈမၼ်းလႄႈဝႃႈ၊-လႆႈပဵၼ်တၢင်းဢၼ်ႁဵတ်းပၼ်တီႈၵေႃႉဢၼ်ၶုၼ်ႁေႃၶမ်းမီးဢလူဝ်ႇၶႂ်ႈယုၵ်ႉယွင်ႈၼၼ်ႉဢေႃႈ၊ဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။
၁၀ မိူဝ်ႈၼၼ်ႉၶုၼ်ႁေႃၶမ်းမီးဢမိင်ႉတီႈႁႃႇမၼ်ႇလႄႈဝႃႈ၊-မႂ်းၵႂႃႇၶၼ်ၶၼ်ၽႂ်းၽႂ်းလႄႈဢဝ်ၶိူင်ႈၼုင်ႈတၢင်းမႆႊၸဝ်ႈဢိၵ်ႇတင်းမႃႉၸဝ်ႈၸွမ်းၵႃႈၼင်ႇဢၼ်မႂ်းလဝ်ႈလၢတ်ႈၼၼ်ႉလႄႈႁဵတ်းပၼ်တီႈမေႃးတၵေႇၵူၼ်းယုတဢၼ်ၼင်ႈယူႇၵႃႈတီႈၽၵ်းတူႁေႃၸဝ်ႈၼၼ်ႉတႃႉ။ယႃႇပေႁႂ်ႈၵႃႈဢၼ်မႂ်းလဝ်ႈလၢတ်ႈၼၼ်ႉလႆႈလုတ်ႈလႆႈယွမ်းသေၸိူဝ်ႉသေပိူင်၊ဝႃႈၼင်ႇၼႆဢေႃႈ။
၁၁ မိူဝ်ႈၼၼ်ႉႁႃႇမၼ်ႇဢဝ်ၶိူင်ႈၼုင်ႈတၢင်းမႆႊၸဝ်ႈဢိၵ်ႇတင်းမႃႉၸဝ်ႈလႄႈၼုင်ႈပၼ်မေႃးတၵေႇသေယဝ်ႉႁႂ်ႈမၼ်းၶီႇမႃႉၸဝ်ႈၸွမ်းသဵၼ်ႈတၢင်းလူင်ဝဵင်းၸဝ်ႈသေလႄႈၶဝ်ႁွင်ႉပၢဝ်ႇႁွင်ႉလၢတ်ႈၽၢႆႇၼႃႈဢွၼ်တၢင်းမၼ်းလႄႈဝႃႈ၊-လႆႈႁဵတ်းၸိူဝ်ႉၼင်ႇၼႆတီႈၵေႃႉဢၼ်ၶုၼ်ႁေႃၶမ်းမီးဢလူဝ်ႇၶႂ်ႈယုၵ်ႉယွင်ႈၼၼ်ႉဢေႃႈဝႃႈၼင်ႇၼႆဢေႃႈ။
၁၂ ႁဵတ်းၸိူဝ်ႉၼင်ႇၼၼ်သေယဝ်ႉမေႃးတၵေႇၶိုၼ်းမႃးၸူးတီႈၽၵ်းတူႁေႃၸဝ်ႈသေဢေႃႈ။ႁႃႇမၼ်ႇၸမ်းၶၢင်းၶီၶၢင်းၽၢၼ်ယူႇ၊ႁူမ်ႇသုမ်ႇႁူဝ်မၼ်းယူႇသေလႄႈၶိုၼ်းမိူဝ်းၵႂႃႇၸူးၵႃႈတီႈႁိူၼ်းမၼ်းၶၼ်ၶၼ်ၽႂ်းၽႂ်းသေယဝ်ႉ၊ၶိုၼ်းမွၵ်ႇလၢတ်ႈလွင်ႈတၢင်းၵႃႈဢၼ်ပဵၼ်တီႈမၼ်းၸိူဝ်းၼၼ်ႉတီႈမေးမၼ်းၸေႇရိတ်ႉဢိၵ်ႇတင်းၵေႃႉသေႈမၼ်းၸိူဝ်းၼၼ်ႉဢေႃႈ။
၁၃ မိူဝ်ႈၼၼ်ႉပိင်ႇၺႃႇသိမၼ်းတင်းလၢႆဢိၵ်ႇတင်းမေးမၼ်းၸေႇရိတ်ႉၸိူဝ်းၼၼ်ႉၶဝ်ဢွၼ်ၵၼ်ၶိုၼ်းလၢတ်ႈလႄႈဝႃႈ၊-ၵွပ်ႈပိူဝ်ႈမေႃးတၵေႇပဵၼ်ၵူၼ်းယုတလႄႈၸဝ်ႈႁဝ်းလႆႈတေႇၸႃႉတူၵ်းသုမ်းၵႃႈတီႈၽၢႆႇၼႃႈမၼ်းယဝ်ႉလႄႈၸဝ်ႈႁဝ်းတၵ်းဢမ်ႇပႄႉၼႅင်ႇမၼ်းလႆႈ။တၵ်းတူၵ်းသုမ်းၵႃႈတီႈၽၢႆႇၼႃႈမၼ်းဢမၢၼ်ႇၶၢၼ်ပဵၼ်ဢေႃႈ၊ဝႃႈၼင်ႇၼႆဢေႃႈ။
၁၄ ၼႂ်းမိူဝ်ႈဢၼ်ၶဝ်ယင်းတိုၵ်ႉလၢတ်ႈတေႃႇမၼ်းၸိူဝ်ႉၼင်ႇၼၼ်ယူႇၼၼ်ႉၸိုင်ၵူၼ််းထိင်းၼၢင်းၵႃႈတီႈႁေႃၸဝ်ႈၸိူဝ်းၼၼ်ႉဢွၼ်ၵၼ်မႃးလႄႈႁွင်ႉဢဝ်ႁႃႇမၼ်ႇၵႂႃႇၶၼ်ၶၼ်ၽႂ်းၽႂ်းၵႃႈတီႈပွႆးဢၼ်ဢေးသတႃႇပွင်ႁဵတ်းပွင်ႁႅၼ်းဝႆႉၼၼ်ႉဢေႃႈ။