Chapter
၃
ႁႃႇမၼ်ႇၵျၢမ်ႇႁႃယႃႉၽဵဝ်ႈၵူၼ်းယုတ
၁ လိုၼ်းၼၼ်ႉၶုၼ်ႁေႃၶမ်းဢႃႇသူၺ်ႇရုယုၵ်ႉယွင်ႈႁႃႇမၼ်ႇလုၵ်ႈၸၢႆးႁမ်ႇမေႇတႃႇသမဵဝ်းဢႃႇၵတ်ႉၼၼ်ႉလႄႈႁႂ်ႈမၼ်းပဵၼ်ဢၼ်ယႂ်ႇဢၼ်သုင်သေလႄႈပၼ်တီႈယူႇတီႈၼင်ႈဢၼ်မျၢတ်ႈသုင်လိူဝ်တွၼ်းၼႃႇသေမူးမၢတ်ႈၽွင်းမိူင်းဢၼ်မီးတီႈမၼ်းတင်းသဵင်ႈတင်းလူင်ၼၼ်ႉဢေႃႈ။
၂ ၶႃႈၵူၼ်းၶုၼ်ႁေႃၶမ်းၵႃႈဢၼ်ႁွတ်ႈထိုင်ၵႃႈတီႈၽၵ်းတူႁေႃၸဝ်ႈၼၼ်ႉဢွၼ်ၵၼ်ၵူမ်ႈႁူဝ်ၵွမ်းႁူဝ်ဝႆႈသႃႁႃႇမၼ်ႇၸွမ်းၵႃႈၼင်ႇဢၼ်ၶုၼ်ႁေႃၶမ်းမီးဢမိင်ႉလူၺ်ႈလွင်ႈမၼ်းဝႆႉၼၼ်ႉဢေႃႈ။မေႃးတၵေႇၸမ်းဢမ်ႇၵူမ်ႈႁူဝ်ၵွမ်းႁူဝ်ဢမ်ႇဝႆႈဢမ်ႇသႃ။
၃ မိူဝ်ႈၼၼ်ႉၶႃႈၵူၼ်းၶုၼ်ႁေႃၶမ်းဢၼ်ႁွတ်ႈထိုင်ၵႃႈတီႈၽၵ်းတူႁေႃၸဝ်ႈၸိူဝ်းၼၼ်ႉတွင်ႈထၢမ်ပၼ်သတိမေႃးတၵေႇလႄႈဝႃႈ၊-ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းတွပ်ႇထဵင်ပူၼ်ႉလိူဝ်ဢမိင်ႉၶုၼ်ႁေႃၶမ်း၊ဝႃႈၼင်ႇၼႆဢေႃႈ။
၄ ပိၵ်ႉသမ်ႉၶဝ်ဢွၼ်ၵၼ်လၢတ်ႈၸိူဝ်ႉၼင်ႇၼႆတီႈမၼ်းၵူႈဝၼ်းသေၵေႃႈမၼ်းဢမ်ႇထွမ်ႇဢမ်ႇဢဝ်ၵႂၢမ်းၶဝ်ၼၼ်ႉလႄႈၶဝ်ဢွၼ်ၵၼ်ၶိုၼ်းလၢတ်ႈတီႈႁႃႇမၼ်ႇႁႂ်ႈလႆႈႁူႉလွင်ႈဢၼ်ဝႃႈတၵ်းလႆႈယိုၼ်ႉၶၢမ်ႇမေႃးတၵေႇႁိုဝ်ၼၼ်ႉဢေႃႈ။
၅ လွင်ႈမၼ်းၸမ်းမေႃးတၵေႇလႆႈလၢတ်ႈၼႄၶဝ်လွင်ႈဢၼ်ဝႃႈမၼ်းပဵၼ်ၵူၼ်းမဵဝ်းယုတၼၼ်ႉဢေႃႈ။မိူဝ်ႈဢၼ်ႁႃႇမၼ်ႇႁူႉႁၼ်လွင်ႈဢၼ်မေႃးတၵေႇယင်းဢမ်ႇၵူမ်ႈႁူဝ်ၵွမ်းႁူဝ်လႄႈဝႆႈသႃၼၼ်ႉၸိုင်မၼ်းၸႂ်မႆႈၶႆႈၸႃႉၼႃႇလူင်လၢင်လႄႈမၢတ်ႈတၢင်းဢၼ်ဢဝ်မေႃးတၵေႇတၢႆၵေႃႉလဵဝ်ၵူၺ်းၼၼ်ႉပဵၼ်ဢၼ်ၶိုတ်းၸႂ်ပဵင်းၸႂ်မၼ်းၵွပ်ႈပိူဝ်ႈဢၼ်ၶဝ်လႆႈၽုၺ်ႇဢွၵ်ႇၼႄပျႃႉမဵဝ်းမေႃးတၵေႇတီႈမၼ်းၼၼ်ႉဢေႃႈ။
၆ ပိူဝ်ႈၼႆလႄႈႁႃႇမၼ်ႇၵျၢမ်ႇႁႃႁႂ်ႈလႆႈယႃႉၽဵဝ်ႈၵူၼ်းယုတၵႃႈဢၼ်မီးၵႃႈတီႈၼႂ်းသိုင်ႇၸိုင်ႈဝၢၼ်ႈမိူင်းဢႃႇသူၺ်ႇရုၵူႈတီႈၵူႈလႅၼ်ဢၼ်ဝႃႈၵူၼ်းမဵဝ်းမေႃးတၵေႇၸိူဝ်းၼၼ်ႉပႅတ်ႈဢေႃႈ။
၇ ပိူဝ်ႈၼႆလႄႈၼႂ်းပီႊဢၼ်ဢႃႇသူၺ်ႇရုၸၢမ်ႇႁၢင်ႈၸၢမ်ႇႁေႃသိပ်းသွင်ပီႊလိူၼ်ပထမဢၼ်လႆႈၸိုဝ်ၼိသၼ်ႇၼၼ်ႉလႆႈဢွၼ်ၵၼ်တူၵ်းၸႃႇၵွၵ်ႈပုရၵႃႈတီႈၽၢႆႇၼႃႈႁႃႇမၼ်ႇဝၼ်းၼိုင်ႈယဝ်ႉဝၼ်းၼိုင်ႈလိူၼ်ၼိုင်ႈယဝ်ႉလိူၼ်ၼိုင်ႈၵႃႈၼင်ႇဢၼ်ၸႅၼ်ႇတၢမ်းၵၼ်တေႃႇထိုင်ႁွတ်ႈလိူၼ်တႂႃႇတသမဢၼ်လႆႈၸိုဝ်ဢႃႇတႃႇၼၼ်ႉဢေႃႈ။
၈ မိူဝ်ႈၼၼ်ႉႁႃႇမၼ်ႇလဝ်ႈလၢတ်ႈတီႈၶုၼ်ႁေႃၶမ်းဢႃႇသူၺ်ႇရုလႄႈဝႃႈ၊-မီးမဵဝ်းၵူၼ်းဢၼ်ၽၢတ်ႇၽႄၵၼ်ယူႇၵူႈတီႈၵူႈလႅၼ်လႄႈႁွတ်ႈထိုင်ၵႃႈၼႂ်းၵူၼ်းဝၢၼ်ႈၵူၼ်းမိူင်းၵူႈၸိူဝ်ႉၵူႈမဵဝ်းၵႃႈၼႂ်းသိုင်ႇၸိုင်ႈဝၢၼ်ႈမိူင်းၸဝ်ႈႁဝ်းၵူႈသိုင်ႇၵူႈမိူင်းၵူႈဢိူင်ႇၵူႈၵျၢၵ်ႈလႄႈဢၼ်ထုင်းၸၢမ်ႇတၢင်းဢၼ်ၶဝ်ႈၵမ်ၶဝ်ႈၵျၢင်ႉၼၼ်ႉဢမ်ႇမိူၼ်ၵၼ်တင်းထုင်းၸၢမ်ႇၵူၼ်းတၢင်ႇၸိူဝ်ႉတၢင်ႇမဵဝ်းၵႃႈမီးဢၼ်ယင်းဢမ်ႇထွမ်ႇဢမ်ႇဢဝ်ဢူႉပတေႇဢၼ်ၸဝ်ႈၶုၼ်လူင်ၸီႇယၢင်ႇဝႆႉၼၼ်ႉမီးမဵဝ်းၼိုင်ႈတီႈၶႃႈဢေႃႈ။ပိူဝ်ႈၼႆလႄႈလွင်ႈဢၼ်ၸဝ်ႈၶုၼ်လူင်ပၼ်ဢၶႂၢင်ႉတီႈမဵဝ်းၼၼ်ႉဢမ်ႇမီးၵျေးၸူးၵႃႈသင်လႃးလႃးတီႈၶႃႈ။
၉ ပေႃးၸဝ်ႈၶုၼ်လူင်မီးဢလူဝ်ႇၸိုင်ႇၶႅၼ်းတေႃႈႁႂ်ႈတႅမ်ႈလိၵ်ႈဢမိင်ႉႁႂ်ႈယႃႉၽဵဝ်ႈမဵဝ်းၼၼ်ႉပႅတ်ႈသေၵမ်းတီႈၶႃႈ။ၶႃႈၸဝ်ႈတၵ်းဢဝ်ငိုၼ်းမိုၼ်ႇတလၢၼ်ႇတၢၼ်ႇဢၢပ်ႈပၼ်ၵႃႈၼႂ်းမိုဝ်းၶဝ်ၸိူဝ်းဢၼ်ၵိုတ်ႈႁၢပ်ႇဢမူႉၸဝ်ႈၶုၼ်လူင်ၼၼ်ႉႁႂ်ႈၶဝ်လႆႈဢဝ်သႂၢင်းၶဝ်ႈၵႃႈၼႂ်းတိူၵ်ႈၽၼ်ႇတႃႇၸဝ်ႈၶုၼ်လူင်တီႈၶႃႈဢေႃႈ၊ဝႃႈၼင်ႇၼႆဢေႃႈ။
၁၀ ၶုၼ်ႁေႃၶမ်းၵေႃႈထွတ်ႇဢဝ်လၢၵ်ႈၸွပ်ႇၸဝ်ႈသေလႄႈပၼ်တီႈႁႃႇမၼ်ႇလုၵ်ႈၸၢႆးႁမ်ႇမေႇတႃႇသမဵဝ်းဢႃႇၶတ်ႉဢၼ်ပဵၼ်ရၢၼ်ႇသူႇမဵဝ်းယုတၼၼ်ႉဢေႃႈ။
၁၁ ၶုၼ်ႁေႃၶမ်းမီးဢမိင်ႉတီႈႁႃႇမၼ်ႇလႄႈဝႃႈ၊-ငိုၼ်းၼၼ်ႉၸိုင်ၵဝ်ပၼ်တီႈမႂ်းဢေႃႈ။ၵူၼ်းမဵဝ်းၼၼ်ႉၵေႃႈၵဝ်ဢၢပ်ႈပၼ်တီႈမႂ်းႁႂ်ႈလႆႈႁဵတ်းၵႃႈၼင်ႇဢၼ်မႂ်းၶႆႈႁဵတ်းၼၼ်ႉဢေႃႈ၊ဝႃႈၼင်ႇၼႆဢေႃႈ။
၁၂ မိူဝ်ႈၼၼ်ႉၼႂ်းလိူၼ်ပထမသိပ်းသၢမ်ဝၼ်းၼၼ်ႉၶဝ်ႁွင်ႉႉဢဝ်ၸရေးလူင်တင်းလၢႆလႄႈတႅမ်ႈၸွမ်းၵႃႈၼင်ႇဢၼ်ႁႃႇမၼ်ႇသင်ႇလၢတ်ႈဝႆႉတီႈၸဝ်ႈၾႃႉလႂ်၊တီႈမဵဝ်ႉဝုၼ်ႇဢၼ်ဢုပ်ႉၵႃႈၼိူဝ်ၵူႈသိုင်ႇၵူႈမိူင်းၵူႈဢိုင်ႇၵူႈၵျၢၵ်ႈလႂ်၊ၶုၼ်ဢၼ်ၸီႇယၢင်ႇၵႃႈၼိူဝ်ၵူၼ်းၵူႈၸိူဝ်ႉၵူႈမဵဝ်းလႂ်၊ၵႃႈတီႈၵူႈသိုင်ႇၵူႈမိူင်းၵူႈဢိူင်ႇၵူႈၵျၢၵ်ႈၸွမ်းလူၺ်ႈလိၵ်ႈၽႃႇသႃႇမိူင်းၽႂ်မိူင်းမၼ်းဢိၵ်ႇတင်းတီႈၵူၼ်းၵူႈၸိူဝ်ႉၵူႈမဵဝ်းၸွမ်းလူၺ်ႈၽႃႇသႃႇၽႂ်ၽႃႇသႃႇမၼ်းၼၼ်ႉသေလႄႈဢဝ်ၸိုဝ်ဢဝ်သဵင်ၶုၼ်ႁေႃၶမ်းဢႃႇသူၺ်ႇရုသႂ်ႇလႄႈဢဝ်လၢၵ်ႈၸွပ်ႇၶုၼ်ႁေႃၶမ်းတွၵ်ႇတၼ်းသိၵ်ႈဢေႃႈ။
၁၃ ၶဝ်ဢဝ်ၵူၼ်းဢွၼ်ႇဢၼ်သူင်ႇလိၵ်ႈတင်းလၢႆဢဝ်လိၵ်ႈဢမိင်ႉၸဝ်ႈၼၼ်ႉပၼ်ၵႂႃႇသိုင်ႇၸိုင်ႈဝၢၼ်ႈမိူင်းၸဝ်ႈၵူႈသိုင်ႇၵူႈမိူင်းၵူႈဢိူင်ႇၵူႈၵျၢၵ်ႈႁႂ်ႈဢွၼ်ၵၼ်ၶႃႈၽၼ်းဢဝ်တၢႆပႄႇၽဵဝ်ႈပႅတ်ႈၵူၼ်းယုတၸဵမ်ၼုမ်ႇၸဵမ်ထဝ်ႈလုၵ်ႈဢွၼ်ႇမေႈယိင်းၵႃႈမီးလႄႈၼႂ်းလိူၼ်တႂႃႇတသမဢၼ်လႆႈၸိုဝ်ဢႃႇတႃႇၼၼ်ႉသိပ်းသၢမ်ဝၼ်းၼၼ်ႉၵမ်းလဵဝ်သေလႄႈႁိမ်ဢဝ်ႁူင်ႇဢဝ်ဢုၵ်ႉၸႃႇၶဝ်ဢေႃႈ။
၁၄ လိၵ်ႈဢမိင်ႉၸဝ်ႈဢၼ်လႆႈမွၵ်ႇလၢတ်ႈၵႃႈၼႂ်းသိုင်ႇၸိုင်ႈဝၢၼ်ႈမိူင်းၸဝ်ႈၵူႈသိုင်ႇၵူႈမိူင်းၵူူႈဢိူင်ႇၵူႈၵျၢၵ်ႈၼၼ်ႉလႆႈၵျေႃႇၺႃႇတီႈၵူၼ်းၵူႈၸိူဝ်ႉၵူႈမဵဝ်းႁႂ်ႈၶဝ်မႄးႁႅၼ်းမီးဝႆႉထႃႈပုၼ်ႈဝၼ်းၼၼ်ႉဢေႃႈ။
၁၅ ၵူၼ်းဢွၼ်ႇဢၼ်သူင်ႇလိၵ်ႈၸိူဝ်းၼၼ်ႉၸွမ်းၵႃႈၼင်ႇဢၼ်ၶုၼ်ႁေႃၶမ်းၸီႇယၢင်ႇဝႆႉၼၼ်ႉႁိပ်ႈၼႅတ်ႈၵႂႃႇၶၼ်ၶၼ်ၽႂ်းၽႂ်းလႄႈဢမိင်ႉၸဝ်ႈၼၼ်ႉသႃႈၸွတ်ႇၵႂႃႇၵႃႈၼႂ်းႁေႃၶမ်းသုသၼ်ႇၼၼ်ႉဢေႃႈ။ၶုၼ်ႁေႃၶမ်းဢိၵ်ႇတင်းႁႃႇမၼ်ႇၸမ်းၼင်ႈၵႃႈတီႈပွႆးသူတ်ႉၵိၼ်ၼမ်ႉၸပိတ်ႉယူႇလႄႈဝဵင်းသုသၼ်ႇၼၼ်ႉႁွတ်ႈထိုင်တၢင်းဢၼ်ယၢပ်ႇၸႂ်ယုင်ႈၸႂ်ဢေႃႈ။