Chapter
၂
ဢေးသတႃႇလႆႈဢရႃႇၼၢင်းႁေႃၶမ်း
၁ ဝၢႆးသေတေႃးသႃႉၶုၼ်ႁေႃၶမ်းဢႃႇသူၺ်ႇရုမူတ်းယဝ်ႉၼၼ်ႉမၼ်းၶုၵ်းၸႂ်လႆႈၶႆႈၸႂ်ထူပ်းဝႃႇသတိဢိၵ်ႇတင်းလွင်ႈတၢင်းဢၼ်မၼ်းႁဵတ်းတီႈမၼ်းၼၼ်ႉဢေႃႈ။
၂ ၶႃႈၶုၼ်ႁေႃၶမ်းဢၼ်ၶႃးၸႃးယူႇၸိူဝ်းၼၼ်ႉၵေႃႈဢွၼ်ၵၼ်လဝ်ႈလၢတ်ႈလႄႈဝႃႈ၊-ၶႅၼ်းတေႃႈပၼ်ဢၶႂၢင်ႉႁႂ်ႈလႆႈႁႃဢဝ်သၢဝ်ၵၼ်ႇၺႃႇဢၼ်ႁၢင်ႈလီၼႃႇၼၼ်ႉပုၼ်ႈၸဝ်ႈၶုၼ်လူင်သေၵမ်းတီႈၶႃႈ။
၃ ၶႅၼ်းတေႃႈၶၢၼ်းၶုၼ်ဢရႃႇသိၵႃႈၼႂ်းသိုင်ႇၸိုုင်ႈဝၢၼ်ႈမိူင်းၸဝ်ႈၵူႈသိုင်ႇၵူႈမိူင်းၵူႈဢိူင်ႇၵူႈၵျၢၵ်ႈႁႂ်ႈၶဝ်ႁႃသၢဝ်ၵၼ်ႇၺႃႇဢၼ်ႁၢင်ႊလီၼႃႇတင်းသဵင်ႈတင်းလူင်ၸူႉၵၼ်တုမ်ၵၼ်ၵႃႈၼႂ်းတီႈယူႇၸိူင်ႉၼၢင်းၵႃႈတီႈႁေႃၶမ်းသုသၼ်ႇသေလႄႈၶၢၼ်းဝႆႉႁေႇၵေႇႁႂ်ႈထိင်းၵႃႈၼိူဝ်ၸိူင်ႉၼၢင်းၼၼ်ႉသေၵမ်းတီႈၶႃႈ။
၄ ၶႅၼ်းတေႃႈဢဝ်ယႃႈမဵဝ်းဢၼ်ႁႂ်ႈႁၢင်ႊလီၼၼ်ႉတႃးႁႂ်ႈၶဝ်ႁၢင်ႊလီသေၵမ်းတီႈၶႃႈ။ၶႅၼ်းတေႃႈဢဝ်သၢဝ်ၵၼ်ႇၺႃႇဢၼ်ထုၵ်ႇၸႂ်ၵျိူၵ်ႈၸႂ်ၸဝ်ႈၶုၼ်လူင်ၼၼ်ႉႁဵတ်းႁႂ်ႈပဵၼ်ၼၢင်းႁေႃၶမ်းတၢင်တူဝ်ဝႃႇသတိသေၵမ်းၶႃႈ၊ဝႃႈၼင်ႇၼႆလႄႈၶုၼ်လူင်ၵေႃႈထုၵ်ႇၸႂ်ၵျိူၵ်ႈၸႂ်လႄႈၸီႇယၢင်ႇၸိူဝ်ႉၼင်ႇၼၼ်ဢေႃႈ။
၅ မိူဝ်ႈၼၼ်ႉမီးၵူၼ်းယုတၵေႃႉၼိုင်ႈၵႃႈၼႂ်းႁေႃၶမ်းသုသၼ်ႇဢၼ်လႆႈၸိုဝ်မေႃးတၵေႇဢၼ်ပဵၼ်လုၵ်ႈၸၢႆးယႃႇဢိရ၊လုၵ်ႈၸၢႆးသိမိ၊လုၵ်ႈၸၢႆးၵိသမဵဝ်းပိၼ်ႇယႃႇမိၼ်ႇၼၼ်ႉဢေႃႈ။
၆ မၼ်းၼၼ်ႉပဵၼ်ၵေႃႉဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇသေၵႃႈတီႈဝဵင်းယေႇရုသလႅမ်ႇလႄႈၶဝ်ပႃးၵႃႈၼႂ်းမုၵ်ႉၸိူဝ်းဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇလူၺ်ႈၵၼ်တင်းယေႇၶေႃႇၼိၶုၼ်ႁေႃၶမ်းယုတဢၼ်ၼေႇပုၶတ်ႉၼေႇၸႃႇၶုၼ်ႁေႃၶမ်းပႃႇပုလုၼ်ႇသိမ်းဢဝ်ၵႂႃႇၼၼ်ႉဢေႃႈ။
၇ မၼ်းၼၼ်ႉၵဵပ်းလဵင်ႉၵဵပ်းလူဝႆႉႁတတ်ႉသဢၼ်ဝႃႈဢေးသတႃႇလုၵ်ႈယိင်းပေႃႈၼႃႉမၼ်းၼၼ်ႉဢေႃႈ။လုၵ်ႈယိင်းၼၼ်ႉဢမ်ႇမီးပေႃႈမီးမေႈပဵၼ်ၵေႃႉဢၼ်ႁၢင်ႈၽၢင်တူဝ်ၶိင်းယိၼ်ႇလႄႈၼိူဝ်ႉၼင်ၵေႃႈႁၢင်ႊလီဢေႃႈ။မိူဝ်ႈဢၼ်ပေႃႈမေႈမၼ်းတၢႆၼၼ်ႉမေႃးတၵေႇဢဝ်မၼ်းႁဵတ်းလုၵ်ႈႁဵတ်းလၢင်းဝႆႉပဵၼ်ၸိူဝ်ႉၼင်ႇလုၵ်ႈယိင်းဢွၵ်ႇတူဝ်ၸဝ်ႈၵဝ်ႇဢေႃႈ။
၈ မိူဝ်ႈဢၼ်ဢဝ်ဢမိင်ႉၶုၼ်ႁေႃၶမ်းဢွၵ်ႇလႄႈပၢဝ်ႇသေႃႇၼၼ်ႉၶဝ်ႁႂ်ႈၵၼ်ႇၺႃႇလုၵ်ႈယိင်းသၢဝ်ၼမ်ၼႃႇၸူႉၵၼ်တုမ်ၵၼ်ၵႃႈတီႈၶုၼ်ႁေႃၶမ်းသုသၼ်ႇသေလႄႈဢၢပ်ႈတီႈႁေႇၵေႇၼၼ်ႉၸိုင်ၶဝ်ဢဝ်ဢေးသတႃႇၼၼ်ႉသႂၢင်းၶဝ်ႈၵႃႈၼႂ်းႁေႃၸဝ်ႈလႄႈဢၢပ်ႈပၼ်တီႈႁေႇၵေႇၵေႃႉဢၼ်ထိင်းၼၢင်းၼၼ်ႉဢေႃႈ။
၉ မေႈယိင်းၼၼ်ႉထုၵ်ႇၸႂ်ၵျိူၵ်ႈၸႂ်မၼ်းလႄႈလႆႈၼႃႈလႆႈတႃတီႈမၼ်းၼၼ်ႉသေလႄႈမၼ်းဢဝ်မဵဝ်းယႃႈမဵဝ်းယႃပုၼ်ႈဢၼ်တၵ်းႁႂ်ႈမူတ်းသ်ႂႁၢင်ႊလီဢိၵ်ႇတင်းၶိူင်ႈၼုင်ႈတၢင်းမႆႊဢၼ်တၵ်းလႆႈၼုင်ႈတင်းၶႃႈမေႈယိင်းဢၼ်လိူၵ်ႈၵဵပ်းဢဝ်ၵႃႈၼႂ်းႁေႃၸဝ်ႈၸဵတ်းၵေႃႉဢၢပ်ႈပၼ်တီႈမၼ်းၶၼ်ၶၼ်ၽႂ်းၽႂ်းလႄႈယုၵ်ႉယွင်ႈဢဝ်မၼ်းဢိၵ်ႇတင်းၶႃႈမေႈယိင်းမၼ်းၸိူဝ်းၼၼ်ႉၵႃႈတီႈဢၼ်မျၢတ်ႈၼႃႇသပေိူၼ်ႈၵႃႈၼႂ်းႁေႃမေႈယိင်းၼၼ်ႉဢေႃႈ။
၁၀ ဢေးသတႃႇယင်းဢမ်ႇၽုၺ်ႇဢွၵ်ႇၼႄပျႃႉမဵဝ်းမၼ်းဢိၵ်ႇတင်းပီႈၼွင်ႉၸိူဝ်ႉၶိူဝ်းမၼ်းၵွပ်ႈပိူဝ်ႈဢၼ်မေႃးတၵေႇပၼ်သတိလွင်ႈဢၼ်မၼ်းတၵ်းဢမ်ႇလႆႈၽုၺ်ႇဢွၵ်ႇၼႄပျႃးၼၼ်ႉဢေႃႈ။
၁၁ မေႃးတၵေႇၵေႃႈၵႂႃႇမႃးၵႃႈတီႈၽၢႆႇၼႃႈဝၢင်းႁေႃမေႈယိင်းၸိူဝ်းၼၼ်ႉယူႇၵူႈဝၼ်းႁႂ်ႈလႆႈႁူႉလွင်ႈဢၼ်ဢေးသတႃႇယူႇလီယူႇၸႃႉၸိူဝ်ႉၼင်ႇႁိုဝ်ဢိၵ်ႇတင်းလွင်ႈဢၼ်ၶဝ်တၵ်းႁဵတ်းတီႈမၼ်းၸိူဝ်ႉၼင်ႇႁိုဝ်ၼၼ်ႉဢေႃႈ။
၁၂ လုၵ်ႈယိင်းသၢဝ်ၵေႃႉလႂ်သေဢမ်ႇဝႃႈပေႃးတလေႆႈၶၢမ်ႇတၢင်းဢၼ်သွင်းၶဝ်ႈၵႃႈတီႈၶုၼ်ႁေႃၶမ်းၸိုင်တၵ်းလႆႈႁဵတ်းတၢင်းဢၼ်ႁၢင်ႈၶိုင်ႈဢၼ်ႁၢင်ႊလီသိပ်းသွင်လိူၼ်တဵမ်တဵမ်ဢေႃႈ။လႆႈသုင်းသွင်ႇယၢင်မုရၼ်ႇႁူၵ်းလိူၼ်တဵမ်တဵမ်၊မဵဝ်းၼၢမ်ႇသႃႇတင်းမဵဝ်းယႃႈမဵဝ်းယႃပုၼ်ႈဢၼ်တၵ်းႁႂ်ႈမူတ်းသ်ႂႁၢင်ႊလီၼၼ်ႉႁူၵ်းလိူၼ်တဵမ်တဵမ်ဢေႃႈ။
၁၃ လိုၼ်းၼၼ်ႉမိူဝ်ႈဢၼ်ထိုင်ႁွတ်ႈၶိင်ႇဢၼ်ၵၢၼ်ႇၺႃႇလုၵ်ႈယိင်းသၢဝ်တၵ်းလႆႈၶဝ်ႈၸူးၵႃႈတီႈၶုၼ်ႁေႃၶမ်းၼၼ်ႉၸိုင်ၵႃႈဢၼ်မၼ်းမီးဢလူဝ်ႇလႄႈယွၼ်းဢဝ်ႁႂ်ႈလႆႈဢဝ်ၵႂႃႇၼၼ်ႉၶဝ်လႆႈပၼ်လႄႈမၼ်းလႆႈဢဝ်ဢွၵ်ႇသေၵႃႈၼႂ်းႁေႃမေႈယိင်းၼၼ်ႉၵႂႃႇၸူးၵႃႈတီႈၶုၼ်ႁေႃၶမ်းဢေႃႈ။
၁၄ မၼ်းလႆႈၶဝ်ႈၸူးၶုၼ်ႁေႃၶမ်းၶိင်ႇႁူဝ်ၶမ်ႈလႄႈၶိင်ႇၵၢင်ၼႂ်လႆႈၶိုၼ်းမိူဝ်းၸူးတီႈႁေႃမေႈယိင်းၵႃႈတီႈသႃႇၵလၵူၼ်းထိင်းၼၢင်းႁေႃၸဝ်ႈၼၼ်ႉဢေႃႈ။ပေႃးၶုၼ်ႁေႃၶမ်းဢမ်ႇထုၵ်ႇၸႂ်ၵျိူၵ်ႈၸႂ်လႄႈဢမ်ႇဢဝ်ၸိုဝ်ဢဝ်သဵင်မၼ်းႁွင်ႉၸိုင်ၵမ်းလိုၼ်းမၼ်းတၵ်းဢမ်ႇလႆႈၶဝ်ႈၸူးၵႃႈတီႈၶုၼ်ႁေႃၶမ်းထႅင်ႈ။
၁၅ မိူဝ်ႈဢၼ်ဢေးသတႃႇ၊လုၵ်ႈယိင်းဢၽိႁေႇလ၊ဢၼ်ပေႃႈၼႃႉမေႃးတၵေႇၵဵပ်းလဵင်ႉၵဵပ်းလူဝႆႉမိူၼ်ၸိူဝ်ႉၼင်ႇလုၵ်ႈယိင်းဢွၵ်ႇတူဝ်ၸဝ်ႈၵဝ်ႇၼၼ်ႉ၊ထုၵ်ႇလႄႉထုၵ်ႇၵမ်းလႄႈလႆႈၶဝ်ၸူးၵႃႈတီႈၶုၼ်ႁေႃၶမ်းၼၼ်ႉၸိုင်ၼွၵ်ႈသေလွင်ႈတၢင်းဢၼ်ႁေႇၵေႇ၊ၵူၼ်းထိင်းၼၢင်းႁေႃၸဝ်ႈဢၼ်လႆႈဢုပ်ႉထိင်းၵႃႈၼိူဝ်ၸိူင်ႉၼၢင်းၸီႇယၢင်ႇဝႆႉၸိူဝ်းၼၼ်ႉမၼ်းဢမ်ႇယွၼ်းဢဝ်လွင်ႈတၢင်းဢၼ်လႂ်သေၸိူဝ်ႉသေပိူင်။ဢေးသတႃႇၼၼ်ႉလႆႈၼႃႈလႆႈတႃၵႃႈတီႈၽၢႆႇၼႃႈၶဝ်ၵႃႈဢၼ်ထူပ်းႁၼ်မၼ်းၸိူဝ်းၼၼ်ႉဢေႃႈ။
၁၆ ၼင်ႇၼၼ်လႄႈဢေးသတႃႇလႆႈၶၢမ်ႇတၢင်းဢၼ်ဢဝ်သႂၢင်းၶဝ်ႈၵႃႈၼႂ်းႁေႃၶုၼ်ႁေႃၶမ်းဢႃႇသူၺ်ႇရုၼႂ်းပီႊဢၼ်ၸၢမ်ႇႁၢင်ႈၸၢမ်ႇႁေႃၸဵတ်းပီႊလိူၼ်တသမဢၼ်လႆႈၸိုဝ်တေႇပိတ်ႉၼၼ်ႉလႄႈၶုၼ်ႁေႃၶမ်းယိင်ႈၶႅၼ်းႁၵ်ႉဢေးသတႃႇလိူဝ်တွၼ်းၼႃႇသေမေႈယိင်းၵႃႈမီးၸိူဝ်းၼၼ်ႉလႄႈ
၁၇ ဢေးသတႃႇလႆႈၼႃႈလႆႈတႃလႄႈထူပ်းႁၼ်ၵျေးၸူးသိုဝ်ႈၼႃႈတႂ်ႈတႃၸဝ်ႈလိူဝ်တွၼ်းၼႃႇသေၵၢၼ်ႇၺႃႇလုၵ်ႈယိင်းသၢဝ်ၵႃႈမီးၸိူဝ်းၼၼ်ႉႁႂ်ႈမၼ်းထၢၼ်ႈပေႃးလႆႈဢဝ်ရႃႇၸႃႉသရၽူႇတၢင်ႇသႂ်ႇၵႃႈၼိူဝ်ႁူဝ်မၼ်းလႄႈႁႂ်ႈမၼ်းလႆႈပဵၼ်ၼၢင်းႁေႃၶမ်းတၢင်တူဝ်ဝႃႇသတိဢေႃႈ။
၁၈ မိူဝ်ႈၼၼ်ႉၶုၼ်ႁေႃၶမ်းၶၢမ်ႇပွႆးဢၼ်ယႂ်ႇၼႃႇဢၼ်ႁွင်ႉဝႃႈပွႆးဢေးသတႃႇၼၼ်ႉႉပုၼ်ႈမူးမၢတ်ႈၽွင်းမိူင်းမၼ်း၊ၶႃႈၵူၼ်းမၼ်းတင်းသဵင်ႈတင်းလူင်လႄႈႁႂ်ႈပဵၼ်ဝၼ်းလိူဝ်ႈသဝ်းၶုၼ်ၵႃႈၼႂ်းၵူႈသိုင်ႇၵူႈမိူင်းၵူႈဢိူင်ႇၵူႈၵျၢၵ်ႈသေလႄႈၶျႃးသူးမႅင်ႇၸွမ်းၵႃႈၼင်ႇၸေးၸိမ်ႇၶုၼ်ႁေႃၶမ်းမီးၼၼ်ႉဢေႃႈ။
မေႃးတၵေႇႁူႉလွင်ႈတၢင်းဢၼ်ၵျၢမ်ႇပွင်
၁၉ မိူဝ်ႈဢၼ်ၵၼ်ႇၺႃႇလုၵ်ႈယိင်းသၢဝ်ၸိူဝ်းၼၼ်ႉၸူႉၵၼ်တုမ်ၵၼ်ၵမ်းတုတိယၼၼ်ႉၸိုင်မေႃးတၵေႇၼၼ်ႉလႆႈၼင်ႈယူႇၵႃႈတီႈၽၵ်းတူႁေႃၸဝ်ႈဢေႃႈ။
၂၀ ဢေးသတႃႇၼၼ်ႉယင်းဢမ်ႇပႆႇတွၼ်ႉၽုၺ်ႇဢွၵ်ႇၼႄပျႃးမဵဝ်းမၼ်းပီႈၼွင်ႉၸိူဝ်ႉၶိူဝ်းမၼ်းၸွမ်းၵႃႈၼင်ႇဢၼ်မေႃးတၵေႇပၼ်သတိဝႆႉၼၼ်ႉၵွပ်ႈပိူဝ်ႈဢၼ်
ဢေးသတႃႇထွမ်ႇဢဝ်ၵႂၢမ်းမေႃးတၵေႇယူႇမိူၼ်ၸိူဝ်ႉၼင်ႇမိူဝ်ႈဢၼ်မၼ်းလႆႈၶၢမ်ႇတၢင်းဢၼ်ၵဵပ်းလဵင်ႉၵဵပ်းလူဝႆႉၼၼ်ႉယူႇဢေႃႈ။
၂၁ မိူဝ်ႈၼၼ်ႉၼႂ်းမိူဝ်ႈဢၼ်မေႃးတၵေႇယင်းတိုၵ်ႉၼင်ႈယူႇၵႃႈတီႈၽၵ်းတူႁေႃၸဝ်ႈယူႇၼၼ်ႉၸိုင်ပိၵသၼ်ႇတင်းတေႇရိတ်ႉဢၼ်ပဵၼ်ၵူၼ်းထိင်းၼၢင်းၵႃႈၼႂ်းႁေႃၸဝ်ႈလႄႈၶဝ်ႈပႃးၼႂ်းၶဝ်ၸိူဝ်းဢၼ်ပႂ်ႉၽၵ်းတူၼၼ်ႉသွင်ၵေႃႉၼၼ်ႉမီးၸႂ်တေႃးသႃႉလႄႈဢွၼ်ၵၼ်ၶတ်းၸႂ်ႁႂ်ႈလႆႈဢဝ်ၶုၼ်ႁေႃၶမ်းဢႃႇသူၺ်ႇရုတၢႆဢေႃႈ။
၂၂ မေႃးတၵေႇႁူႉလွင်ႈဢမူႉၼၼ်ႉလႄႈၽုၺ်ႇဢွၵ်ႇၼႄပျႃးလွင်ႈမၼ်းတီႈၼၢင်းႁေႃၶမ်းဢေးသတႃႇဢေႃႈ။ဢေးသတႃႇၵေႃႈဢဝ်ၸိုဝ်ဢဝ်သဵင်မေႃးတၵေႇသေလႄႈလဝ်ႈလၢတ်ႈလွင်ႈဢမူႉၼၼ်ႉတီႈၶုၼ်ႁေႃၶမ်းဢေႃႈ။
၂၃ မိူဝ်ႈဢၼ်ၸႅတ်ႈထၢမ်ၸႅတ်ႈတူၺ်းလွင်ႈဢမူႉၼၼ်ႉလႄႈႁူႉလွင်ႈဢၼ်မၢၼ်ႇမႅၼ်ႈၸိုဝ်ႈၸႂ်ႈယဝ်ႉၼၼ်ႉၸိုင်သွင်ၶႃလႆႈၶၢမ်ႇတၢင်းဢၼ်ၶႅၼ်ၶေႃးႁွႆႈတူၵ်းၵႃႈၼိူဝ်တူၼ်ႈမႆႉသေလႄႈဢဝ်လွင်ႈမၼ်းမၢတ်ႈမၢႆတႅမ်ႈသႂ်ႇဝႆႉၵႃႈၼႂ်းလိၵ်ႈရႃႇၸဝၢင်ႇဢၼ်မၢတ်ႈမၢႆတႅမ်ႈဝႆႉၸွမ်းၵူႈဝၼ်းၼၼ်ႉၵႃႈတီႈၽၢႆႇၼႃႈၶုၼ်ႁေႃၶမ်းဢေႃႈ။