Chapter
၄
မေႃးတၵေႇယွၼ်းႁႂ်ႈဢေးသတႃႇၸွႆႈထႅမ်
၁ မိူဝ်ႈဢၼ်မေႃးတၵေႇႁူႉလွင်ႈဢၼ်ၶဝ်ႁဵတ်းၵႃႈမီးၼၼ်ႉၸိုင်မၼ်းၸၵ်ႉသိၵ်ႇၶူဝ်းၼုင်ႈမၼ်းလႄႈၼုင်ႈမႆႊၼင်ပေႃယူႇဢဝ်တဝ်ႊတႃးတူဝ်ယူႇသေလႄႈဢွၵ်ႇၵႂႃႇၸူးၵႃႈၼႂ်းဝဵင်းလႄႈႁဵတ်းသဵင်ဢၼ်ယႂ်ႇၼႃႇၶီၸႂ်ၶူမ်ၸႂ်ၼႃႇလူင်လၢင်လႄႈႁွင်ႉႁႆႈဢေႃႈ။
၂ မၼ်းႁွတ်ႈၵႃႈတီႈၽၢႆႇၼႃႈၽၵ်းတူႁေႃၸဝ်ႈလႄႈၵိုတ်းသဝ်းၵႃႈတီႈၼၼ်ႉၵွပ်ႈပိူဝ်ႈဝႃႈၽႂ်သေၵေႃႉသေၵူၼ်းပေႃးၼုင်ႈမႆႊၼင်ပေႃၸိုင်တၵ်းဢမ်ႇလႆႈၶဝ်ႈၵႃႈၼႂ်းၽၵ်းတူႁေႃၸဝ်ႈၼၼ်ႉဢေႃႈ။
၃ ၵႃႈၼႂ်းၵူႈသိုင်ႇၵူႈမိူင်းၵူႈဢိူင်ႇၵူႈၵျၢၵ်ႈမိူဝ်ႈဢၼ်ဢမိင်ႉၸဝ်ႈၶုၼ်ႁေႃၶမ်းပူင်ၼၼ်ႉႁွတ်ႈထိုင်မႃးၼၼ်ႉၸိုင်ၵူၼ်းယုတတင်းလၢႆမီးတၢင်းဢၼ်ၶၢင်းၶီၶၢင်းၽၢၼ်ဢၼ်ယႂ်ႇၼႃႇလူင်လၢင်၊တၢင်းဢၼ်ၵမ်တၢင်းၵိၼ်၊တၢင်းဢၼ်ႁႆႈဢၼ်ႁွင်ႉ၊တၢင်းဢၼ်ပွင်ႉၶၢင်းပွင်ႉမိူၼ်ႇလႄႈၵူၼ်းၼမ်ၼႃႇဢွၼ်ၵၼ်ၼွၼ်းယူႇၵႃႈၼႂ်းၶူဝ်းၼုင်ႈၼင်ပေႃတင်းတဝ်ႊဢေႃႈ။
၄ မိူဝ်ႈဢၼ်ၶႃႈမေႈယိင်းဢေးသတႃႇဢိၵ်ႇတင်းၵူၼ်းၼၢင်းတင်းလၢႆမႃးလႄႈလဝ်ႈလၢတ်ႈလွင်ႈမၼ်းၼၼ်ႉၸိုင်ၼၢင်းႁေႃၶမ်းမႆႈၸႂ်ယၢပ်ႇၸႂ်ၼႃႇလူင်လၢင်သေလႄႈဢဝ်ၶူဝ်းၼုင်ႈတၢင်းမႆႊပၼ်ၵႂႃႇႁႂ်ႈမေႃးတၵေႇပႄႇပႅတ်ႈၶူဝ်းၼုင်ႈၼင်ပေႃသေၵေႃႈမၼ်းယင်းဢမ်ႇႁပ်ႉဢမ်ႇဢဝ်လႄႈယူႇဢေႃႈ။
၅ လၢႆးသမ်ႉဢေးသတႃႇႁွင်ႉဢဝ်ႁႃႇတိၵ်ႉဢၼ်ပဵၼ်ၵူၼ်းထိင်းၼၢင်းဢၼ်ၶုၼ်ႁေႃၶမ်းမီးဢမိင်ႉႁႂ်ႈၶႃးၸႃးယူႇတီႈမၼ်းၼၼ်ႉႁႂ်ႈၵႂႃႇၵႃႈတီႈမေႃးတၵေႇႁႂ်ႈလႆႈတွင်ႉထၢမ်လွင်ႈဢၼ်ပဵၼ်ၵႃႈသင်ဢိၵ်ႇတင်းပဵၼ်ၵွပ်ႈပိူဝ်ႈၸိူဝ်ႉၼင်ႇႁိုဝ်ၼၼ်ႉဢေႃႈ။
၆ ႁႃႇတိၵ်ႉၵႃႇၸူးၵႃႈတီႈမေႃးတၵေႇၵႃႈၼႂ်းတီႈပၢၵ်ႇၵၢင်ဝဵင်းဢၼ်မီးၽၢႆႇၼႃႈၽၵ်းတူႁေႃၸဝ်ႈၼၼ်ႉလႄႈမေႃးတၵေႇမွၵ်ႇလၢတ်ႈလွင်ႈတၢင်းၵႃႈဢၼ်ႁွတ်ႈထိုင်တီႈမၼ်း
၇ ဢိၵ်ႇတင်းလွင်ႈငိုၼ်းၵႃႈႁိုဝ်ဢၼ်ႁႃႇမၼ်ႇဝႆႉၵတိတၵ်းဢဝ်သႂၢင်းၶဝ်ႈၵႃႈၼႂ်းတိူၵ်ႈၽၼ်ႇတႃႇၶုၼ်ႁေႃၶမ်းပုၼ်ႉဢၼ်တၵ်းလႆႈဢၶႂၢင်ႉႁႂ်ႈလႆႈယႃႉၵူၼ်းယုတတင်းလၢႆပႅတ်ႈၼၼ်ႉဢေႃႈ။
၈ မၼ်းဢဝ်လိၵ်ႈလၢၵ်ႈၶၢမ်ႇဢမိင်ႉၸဝ်ႈဢၼ်ထုတ်ႈဢွၵ်ႇၵႃႈတီႈႁေႃသုသၼ်ႇဢၼ်ႁႂ်ႈလႆႈယႃႉၶဝ်ပႅတ်ႈၼၼ်ႉပၼ်ၵႂႃႇႁႂ်ႈလႆႈၼႄပျႃႉတီႈဢေးသတႃႇႁႂ်ႈမၼ်းလႆႈႁူႉလႆႈငိၼ်းလႄႈ
၉ မၼ်းသင်ႇလၢတ်ႈၵႂႃႇႁႂ်ႈမၼ်းၶဝ်ႈၸူးတီႈၶုၼ်ႁေႃၶမ်းလႄႈလဝ်ယွၼ်းပုၼ်ႈမဵဝ်းတူဝ်ၸဝ်ႈၵဝ်ႇၵႃႈတီႈၽၢႆႇၼႃႈၸဝ်ႈၼၼ်ႉဢေႃႈ။ႁႃႇတိၵ်ႉၵေႃႈၶိုၼ်းမႃးလႄႈဢဝ်ၵႂၢမ်းမေႃးတၵေႇၶိုၼ်းလဝ်ႈလၢတ်ႈတီႈဢေးသတႃႇဢေႃႈ။
၁၀ မိူဝ်ႈၼၼ်ႉဢေးသတႃႇမီးဢမိင်ႉတီႈႁႃႇတိၵ်ႉလႄႈသင်ႇလၢတ်ႈၵႂႃႇတီႈမေႃးတၵေႇလႄႈဝႃႈၸမ်း၊-ၶႃႈၵူၼ်းၶုၼ်ႁေႃၶမ်းတင်းသဵင်ႈတင်းလူင်ဢိၵ်ႇတင်းၶႃႈဝၢၼ်ႈၵူၼ်းမိူင်းၵႃႈၼႂ်းသိုင်ႇၸိုင်ႈဝၢၼ်ႈမိူင်းၸဝ်ႈၵူႈသိုင်ႇၵူႈမိူင်းၵူႈဢိူင်ႇၵူႈၵျၢၵ်ႈၸိူဝ်းၼၼ်ႉႁူႉယူႇလွင်ႈဢၼ်ဝႃႈပဵၼ်ၵူၼ်းၸၢႆးသေဢမ်ႇဝႃႈ၊ပဵၼ်မေႈယိင်းသေဢမ်ႇဝႃႈပေႃးၶုၼ်ႁေႃၶမ်းယင်းဢမ်ႇႁွင်ႉမၼ်းလႄႈမၼ်းၶဝ်ႈၵႃႈၼႂ်းတမ်ႇတိူင်းတီႈၸဝ်ႈၸိုင်မီးတြႃးပႃးလဵဝ်ၵူၺ်းဢၼ်ဝႃႈမၼ်းတၵ်းလႆႈတၢႆဢမၢၼ်ႇၶၢၼ်ပဵၼ်ၼၼ်ႉယူႇဢေႃႈ။
၁၁ ၼႂ်းဝႃႈၼၼ်သေၵေႃႈပေႃးၸဝ်ႈၶုၼ်လူင်ယိုၼ်ပၼ်ၵၼ်းႁွၵ်ႇရႃႇၸႃႉၶမ်းၸိုင်မၼ်းတၵ်းလႆႈၵတ်းယဵၼ်ၶျၢမ်းသႃႇဢေႃႈ။ၵဝ်ၶႃႈၼႆႉၶုၼ်ႁေႃၶမ်းယင်းဢမ်ႇႁွင်ႉလႄႈလႆႈယူႇသၢမ်သိပ်းဝၼ်းတဵမ်တဵမ်ယဝ်ႉ၊ဝႃႈၼင်ႇၼႆဢေႃႈ။
၁၂ ၶဝ်ဢဝ်ၵႂၢမ်းဢေးသတႃႇၼၼ်ႉၶိုၼ်းလၢတ်ႈတီႈမေႃးတၵေႇဢေႃႈ။
၁၃ မေႃးတၵေႇသမ်ႉၶိုၼ်းသင်ႇလၢတ်ႈၵႂႃႇတီႈဢေးသတႃႇလႄႈဝႃႈ၊-ပေႃးဢသၢၵ်ႈၵူၼ်းယုတတင်းသဵင်ႈတင်းလူင်ယင်းဢမ်ႇလွတ်ႈၸိုင်ပိၵ်ႉသမ်ႉမႂ်းယူႇၵႃႈၼႂ်းႁေႃၸဝ်ႈသေၵေႃႈယႃႇပထေၢင်ႇဢသၢၵ်ႈမႂ်းတၵ်းလွတ်ႈ။
၁၄ ပေႃးမႂ်းယူႇတဵတ်ႇတဵတ်ႇယဵၼ်ယဵၼ်ယူႇမိူဝ်ႈလဵဝ်ၼႆႉၸိုင်တၢင်းဢၼ်ဢသၢၵ်ႈလိပ်းတၢင်းဢၼ်ၵႄႇသႄႇၶျွတ်ႈဢဝ်ၼၼ်ႉတၵ်းလုၵ်ႉတၢင်ႇတီႈတၢင်ႇလႅၼ်ပေႃႇမႃးတီႈၵူၼ်းယုတတင်းလၢႆလႄႈမႂ်းဢိၵ်ႇတင်းမဵဝ်းၸိူဝ်ႉၶိူဝ်းပေႃႈမႂ်းတၵ်းလူႉတၵ်းလႅဝ်ဢေႃႈ။ၽူႈလႂ်တၵ်းႁူႉလွင်ႈဢၼ်မႂ်းလႆႈဢရႃႇၼႂ်းသိုင်ႇၸိုင်ႈဝၢၼ်ႈမိူင်းၸဝ်ႈၼႆႉတၵ်းပဵၼ်ပုၼ်ႈၶိင်ႇမိူဝ်ႈလဵဝ်ၼႆႉၼၼ်ႉႁိုဝ်၊ဢမ်ႇပဵၼ်ႁိုဝ်ၼၼ်ႉ၊ဝႃႈၼင်ႇၼႆဢေႃႈ။
၁၅ ဢေးသတႃႇၵေႃႈသင်ႇလၢတ်ႈတီႈၶဝ်ႁႂ်ႈလႆႈၶိုၼ်းမွၵ်ႇလၢတ်ႈတီႈမေႃးတၵေႇလႄႈဝႃႈ၊-
၁၆ ၵႂႃႇလႄႈႁႂ်ႈၵူၼ်းယုတၵႃႈဢၼ်မီးၵႃႈၼႂ်းဝဵင်းသုသၼ်ႇၸိူဝ်းၼၼ်ႉၸူႉၵၼ်တုမ်ၵၼ်သေလႄႈယင်းဢမ်ႇၵိၼ်ဢမ်ႇၶူပ်းဝၼ်းဝၼ်းၶိုၼ်းၶိုၼ်းဢမ်ႇထၢတ်ႇသၢမ်ဝၼ်းတဵမ်တဵမ်လႄႈဢွၼ်ၵၼ်ၵမ်တၢင်းၵိၼ်ပုၼ်ႈၵဝ်ၶႃႈသေၵမ်း။ၵဝ်ၶႃႈၵေႃႈဢိၵ်ႇလူၺ်ႈၵၼ်တင်းၶႃႈမေႈယိင်းၵဝ်ၶႃႈတင်းလၢႆတၵ်းဢွၼ်ၵၼ်ၵမ်တၢင်းၵိၼ်မိူၼ်ၸိူဝ်ႉၼင်ႇၼၼ်ဢေႃႈ။လိုၼ်းၼၼ်ႉပိၵ်ႉသမ်ႇလႆႈပူၼ်ႉလိူဝ်ၼႄးဢူႉပတေႇၸဝ်ႈသေၵေႃႈၵဝ်ၶႃႈတၵ်းၶဝ်ႈၸူးတီႈၶုၼ်ႁေႃၶမ်းဢေႃႈ။
၁၇ ပေႃးလႆႈႁွတ်ႈထိုင်တၢင်းလူႉတၢင်းလႅဝ်ၵေႃႈတၵ်းလႆႈႁွတ်ႈထိုင်တၢင်းလူႉတၢင်းလႅဝ်ဢေႃႈ၊ဝႃႈၼင်ႇၼႆလႄႈမေႃးတၵေႇၵႂႃႇလႄႈႁဵတ်းၸွမ်းၵႃႈၼင်ႇဢၼ်ဢေးသတႃႇသင်ႇလၢတ်ႈဝႆႉၼၼ်ႉဢေႃႈ။