Chapter
၅
ဢေးသတႃႇလဝ်ႈယွၼ်းတီႈၶုၼ်ႁေႃၶမ်း
၁ ၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉဢေးသတႃႇၼုင်ႈမႆႊႁၢင်ႈၶိူင်ႈၶူဝ်းၼုင်ႈတၢင်းမႆႊၼၢင်းႁေႃၶမ်းသေလႄႈၶဝ်ႈၸုၵ်းယူႇၵႃႈၼႂ်းတမ်ႇတိူင်းႁေႃၸဝ်ႈဢၼ်မီးသိုဝ်ႈၵၼ်တင်းႁေႃလူင်ၼၼ်ႉဢေႃႈ။ၶုၼ်ႁေႃၶမ်းၵေႃႈၼင်ႈယူႇၵႃႈၼိူဝ်ႈရႃႇၸႃႉပလၢင်ႇၵႃႈၼႂ်းႁေႃၸဝ်ႈဢၼ်မီးသိုဝ်ႈၽၵ်းတူႁေႃၸဝ်ႈၼၼ်ႉဢေႃႈ။
၂ မိူဝ်ႈဢၼ်ၶုၼ်ႁေႃၶမ်းႁၼ်ၼၢင်းႁေႃၶမ်းဢေးသတႃႇၸုၵ်းယူႇၵႃႈၼႂ်းတမ်ႇတိူင်းၸဝ်ႈၼၼ်ႉၸိုင်မၼ်းလႆႈၼႃႈလႆႈတႃတီႈၶုၼ်ႁေႃၶမ်းလႄႈၶုၼ်ႁေႃၶမ်းဢဝ်ၵၼ်းႁွၵ်ႇရႃႇၸႃႉၶမ်းဢၼ်မီးၵႃႈၼႂ်းမိုဝ်းၸဝ်ႈၼၼ်ႉယိုၼ်ႈၸူးပၼ်တီႈဢေးသတႃႇလႄႈဢေးသတႃႇသုတ်ႉၸပ်းသုတ်ႉၸူးသေလႄႈတိူဝ်ႉသႂ်ႇပၢႆလႅမ်ၵၼ်းႁွၵ်ႇရႃႇၸႃႉၼၼ်ႉဢေႃႈ။
၃ ၶုၼ်ႁေႃၶမ်းၵေႃႈမီးဢမိင်ႉလႄႈဝႃႈ၊-ၼၢင်းႁေႃၶမ်းဢေးသတႃႇဢိူၺ်း။မႂ်းမီးဢလူဝ်ႇၶႂ်ႈလႆႈၵႃႈသင်။မႂ်းၶႂ်ႈယွၼ်းဢဝ်သူးလၢပ်ႈၵႃႈသင်။ၵဝ်တၵ်းပၼ်ၵႃႈဢၼ်မႂ်းၶႂ်ႈယွၼ်းဢဝ်ၼၼ်ႉတေႃႇထိုင်ႁွတ်ႈသိုင်ႇၸိုင်ႈဝၢၼ်ႈမိူင်းၸဝ်ႈၽၢၵ်ႇၼိုင်ႈဢေႃႈ၊ဝႃႈၼင်ႇၼႆဢေႃႈ။
၄ ဢေးသတႃႇလဝ်ႈလၢတ်ႈလႄႈဝႃႈ၊-ပေႃးၸဝ်ႈၶုၼ်လူင်မီးဢလူဝ်ႇၸိုင်ဝၼ်းမိူဝ်ႈၼႆႉၸဝ်ႈၶုၼ်လူင်ဢိၵ်ႇတင်းႁႃႇမၼ်ႇၶႅၼ်းတေႃႈမႃးတီႈပွႆးဢၼ်ၵဝ်ၶႃႈပွင်ႁဵတ်းပွင်ႁႅၼ်းဝႆႉပုၼ်ႈၸဝ်ႈၶုၼ်လူင်ၼၼ်ႉသေၵမ်းတီႈၶႃႈ၊မိူဝ်ႈဢၼ်ဝႃႈၼင်ႇၼႆလႄႈၶုၼ်ႁေႃၶမ်းမီးဢမိင်ႉလႄႈဝႃႈ၊-
၅ ႁႂ်ႈႁႃႇမၼ်ႇမႃးၶၼ်ၶၼ်ဝႆးဝႆးႁႂ်ႈလႆႈႁဵတ်းၸွမ်းၵႃႈၼင်ႇဢၼ်ဢေးသတႃႇလဝ်ႈလၢတ်ႈၼၼ်ႉသေၵမ်း၊ဝႃႈၼင်ႇၼႆသေယဝ်ႉၶုၼ်ႁေႃၶမ်းဢိၵ်ႇတင်းႁႃႇမၼ်ႇမႃးၵႃႈတီႈပွႆးဢၼ်ဢေးသတႃႇပွင်ႁဵတ်းပွင်ႁႅၼ်းဝႆႉၼၼ်ႉဢေႃႈ။
၆ ၶုၼ်ႁေႃၶမ်းမီးဢမိင်ႉတီႈဢေးသတႃႇၵႃႈၼႂ်းပွႆးၼမ်ႉၸပိတ်ႉၼၼ်ႉလႄႈဝႃႈ၊-မႂ်းမီးဢလူဝ်ႇၶႂ်ႈလႆႈၵႃႈသင်။ၵဝ်တၵ်းပၼ်ၸွမ်းၵႃႈဢၼ်မႂ်းမီးဢလူဝ်ႇၶႂ်ႈလႆႈၼၼ်ႉဢေႃႈ။မႂ်းၶႂ်ႈယွၼ်းဢဝ်သူးလၢပ်ႈၵႃႈသင်။ၵဝ်တၵ်းပၼ်ၵႃႈဢၼ်မႂ်းယွၼ်းဢဝ်ၼၼ်ႉတေႃႇထိုင်ႁွတ်ႈသိုင်ႇၸိုင်ႈဝၢၼ်ႈမိူင်းၸဝ်ႈၽၢၵ်ႇၼိုင်ႈဢေႃႈ၊ဝႃႈၼင်ႇၼႆလႄႈဢေးသတႃႇလဝ်ႈလၢတ်ႈလႄႈဝႃႈ၊-
၇ သူးလၢပ်ႈဢၼ်ၵဝ်ၶႃႈမီးဢလူဝ်ႇၶႂ်ႈလႆႈၼၼ်ႉၸမ်းပေႃးထုၵ်ႇၸႂ်မႅၼ်ႈၸႂ်ၸဝ်ႈၶုၼ်လူင်လႄႈမီးဢလူဝ်ႇၶႂ်ႈဢိတ်းလူပၼ်သူးလၢပ်ႈၸိုင်
၈ ၶႅၼ်းတေႃႈႁဵတ်းၸွမ်းၵႃႈၼင်ႇဢၼ်ၶႃႈၸဝ်ႈလဝ်ယွၼ်းၼၼ်ႉသေၵမ်းၶႃႈ။
၉ ၸဝ်ႈၶုၼ်လူင်ဢိၵ်ႇတင်းႁႃႇမၼ်ႇၶႅၼ်းတေႃႈမႃးၵႃႈတီႈပွႆးဢၼ်ၶႃႈၸဝ်ႈတၵ်းႁဵတ်းဝၼ်ႈမိူဝ်ႈၽုၵ်ႈၼၼ်ႉသေၵမ်းၶႃႈ။မိူဝ်ႈၼၼ်ႉၶႃႈၸဝ်ႈတၵ်းၶိုၼ်းတွပ်ႇၵႂၢမ်းၸဝ်ႈၶႃႈဢေႃ၊ဝႃႈၼင်ႇၼႆဢေႃႈ။ႁႃႇမၼ်ႇၼၼ်ႉပိၵ်ႉသမ်ႉမီးၸႂ်ဢၼ်ၸူမ်းသိူဝ်းသႂၢင်ႇၵီႈသေလႄႈဢွၵ်ႇမိူဝ်းၵႂႃႇသေၵေႃႈမိူဝ်ႈဢၼ်မၼ်းႁၼ်မေႃးတၵေႇယင်းဢမ်ႇလုၵ်ႉၸုၵ်းဢမ်ႇတူင်ႉဢမ်ႇၼိုင်ဢမ်ႇပၼ်တၢင်းဢၼ်ရူဝ်ႇသေႇမၼ်းၵႃႈတီႈႁူးၽၵ်းတူႁေႃၸဝ်ႈၼၼ်ႉၸိုင်မၼ်းၸႂ်မႆႈၶႆႈၸႃႉၼႃႇလူင်လၢင်တီႈမေႃးတၵေႇဢေႃႈ။
၁၀ ၼႂ်းဝႃႈၼၼ်သေၵေႃႈႁႃႇမၼ်ႇၶျုၵ်ႈၵၼ်ႈၸႂ်မၼ်းယူႇသေလႄႈမိူဝ်းၵႂႃႇႁွတ်ႈထိုင်ၵႃႈတီႈႁိူၼ်းမၼ်းသေယဝ်ႉႁွင်ႉဢဝ်မေးမၼ်းၸေႇရိတ်ႉဢိၵ်ႇတင်းၵေႃႉသေႈမၼ်းတင်းလၢႆမႃးလႄႈမၼ်းၽုၺ်ႇဢွၵ်ႇၼႄပျႃႉ
၁၁ လွင်ႈမုၼ်ၽုင်းၸေးၸိမ်ႇမၼ်းဢၼ်ယႂ်ႇၼႃႇလွင်ႈဢၼ်လုၵ်ႈလၢင်းမၼ်းၼမ်ၼႃႇလွင်ႈၶုၼ်ႁေႃၶမ်းယုၵ်ႉယွင်ႈမၼ်းၼႃႇလူင်လၢင်လႄႈၶၢၼ်းမၼ်းဝႆႉၵႃႈၼႂ်းဢရႃႇဢၼ်မျၢတ်ႈလိူဝ်တွၼ်းၼႃႇသမေူးမၢတ်ႈၽွင်းမိူင်းၸဝ်ႈတင်းလၢႆဢိၵ်ႇတင်းၶႃႈၵူၼ်းၸဝ်ႈတင်းလၢႆၼၼ်ႉဢေႃႈ။
၁၂ လိူဝ်သေၼၼ်ႉႁႃႇမၼ်ႇလၢတ်ႈလႄႈဝႃႈ၊-ၼွၵ်ႈသေၵဝ်ၼၼ်ႉၼၢင်းႁေႃၶမ်းဢေးသတႃႇဢမ်ႇၽိတ်ႈပၢင်းၽူႈလႂ်သေၵေႃႉသေၵူၼ်းႁႂ်ႈလႆႈၶဝ်ႈပွႆးဢၼ်မၼ်းၼၢင်းမႄးႁႅၼ်းဝႆႉၸွမ်းလူၺ်ၵၼ်တင်းၶုၼ်ႁေႃၶမ်းၼၼ်ႉ။မၼ်းၵူၺ်းလႆႈၶၢမ်ႇတၢင်းဢၼ်ၽိတ်ႈပၢင်းလူၺ်ႈၵၼ်တင်းၶုၼ်ႁေႃၶမ်းဢေႃႈ။
၁၃ ၵူၺ်းၵႃႈၵႃႈဢၼ်ၵဝ်လၢတ်ႈၸိူဝ်းၼႆႉပဵၼ်တၢင်းဢၼ်ဢမ်ႇပွင်ႇလွင်ႈတီႈၵဝ်ဢီသင်မိူဝ်ႈဢၼ်ၵဝ်ပႆႇလႆႈႁၼ်မေႃးတၵေႇၵူၼ်းယုတၼၼ်ႉၼင်ႈယူႇၵႃႈတီႈႁူးၽၵ်းတူႁေႃၸဝ်ႈၼၼ်ႉ၊ဝႃႈၼင်ႇၼႆဢေႃႈ။
၁၄ မိူဝ်ႈၼၼ်ႉမေးမၼ်းၸေႇရိတ်ႉဢိၵ်ႇတင်းၵေႃႉသေႈမၼ်းၵႃႈမီးၼၼ်ႉဢွၼ်ၵၼ်လၢတ်ႈလႄႈဝႃႈ၊-ပုၵ်းသဝ်ဢၼ်မတ်ႉႁွႆႈၵႅၼ်ႈၶေႃးတူၵ်းဢၼ်သုင်ႁႃႈသိပ်းသွၵ်ႇၼၼ်ႉသေၵမ်း။ဝၼ်းမိူဝ်ႈၽုၵ်ႈလဝ်ႈလၢတ်ႈတီႈၶုၼ်ႁေႃၶမ်းႁႂ်ႈမၼ်းၸဝ်ႈဢဝ်မေႃးတၵေႇမတ်ႉႁွႆႈၵႅၼ်ႈၶေႃးတၢႆတီႈသဝ်ၼၼ်ႉသေၵမ်း။လိုၼ်းၼၼ်ႉၸင်ႇမီးၸႂ်ဢၼ်သႂၢင်ႇသိူဝ်းသေလႄႈၵႂႃႇၶဝ်ႈပွႆးလူၺ်ႈၵၼ်တင်းၶုၼ်ႁေႃၶမ်းသေၵမ်း၊ဝႃႈၼင်ႇၼႆလႄႈၵႂၢမ်းဢၼ်လၢတ်ႈၼၼ်ႉထုၵ်ႇၸႂ်ႁႃႇမၼ်ႇလႄႈမၼ်းႁႂ်ႈႁဵတ်းသဝ်ဢၼ်မတ်ႉႁွႆႈၵႅၼ်ႈၶေႃးတူၵ်းၼၼ်ႉဢေႃႈ။