Chapter
၁
ၼၢင်းႁေႃၶမ်းဝႃႇသတိတူၵ်းလူင်း
၁ ၼႂ်းၸူဝ်ႈပၢၼ်ဢႃႇသူၺ်ႇရုဢၼ်လႆႈဢုပ်ႉပိူင်ႇၸႃႉၸဵမ်မိူင်းဢိၼ်ႇတျႃႉတေႃႇထိုင်ႁွတ်ႈမိူင်းၵုသ၊မိူင်းပၢၵ်ႇသၢဝ်းပၢႆၸဵတ်းမိူင်းၼၼ်ႉ၊
၂ ၶုၼ်ႁေႃၶမ်းဢႃႇသူၺ်ႇရုၼင်ႈၵႃႈၼိူဝ်ရႃႇၸႃႉပလၢင်ႇသိုင်ႇၸိုင်ႈဝၢၼ်ႈမိူင်းယူႇၵႃႈၼႂ်းႁေႃၶမ်းသုသၼ်ႇလႄႈၸၢမ်ႇႁၢင်ႈၸၢမ်ႇႁေႃလႆႈသၢမ်ပီႊၼၼ်ႉၸိုင်
၃ မၼ်းၶၢမ်ႇပွႆးပုၼ်ႈမူးမၢတ်ႈၽွင်းမိူင်းၸဝ်ႈၶႃႈၵူၼ်းၸဝ်ႈတင်းသဵင်ႈတင်းလူင်လႄႈၶုၼ်ပူဝ်ႇပေႇရသိလႂ်၊ၶုၼ်ပူဝ်ႇမေႇတိလႂ်မူးမၢတ်ႈၽွင်းမိူင်းဢိၵ်ႇတင်းၶုၼ်ၵူႈသိုင်ႇၵူႈမိူင်းလႂ်ဢွၼ်ၵၼ်မီးယူႇၵႃႈတီႈၽၢႆႇၼႃႈမၼ်းဢေႃႈ။
၄ မိူဝ်ႈၼၼ်ႉမၼ်းၼႄပျႃႉၸေးၸိမ်ႇသိုင်ႇၸိုင်ႈဝၢၼ်ႈမိူင်းမၼ်းဢၼ်ၶိူၵ်ႉၶမ်ႇၼႃႇဢိၵ်ႇတင်းၽုင်းဢႃႇၼူႉၽေႃႇမၼ်းဢၼ်သုင်ၼႃႇၼၼ်ႉပၢၵ်ႇပၢႆပႅတ်ႇသိပ်းဝၼ်းတဵမ်တဵမ်ဢေႃႈ။
၅ မိူဝ်ႈဢၼ်ၶိင်ႇဝၼ်းၸိူဝ်းၼၼ်ႉၸေးယဝ်ႉၼၼ်ႉၸိုင်ၶုၼ်ႁေႃၶမ်းၶၢမ်ႇပွႆးၵႃႈၼႂ်းဝၢင်းသူၼ်ဢူးယဵၼ်ႇၵႃႈႁိမ်းႁေႃၶမ်းပုၼ်ႈၵူၼ်းတင်းသဵင်ႈတင်းလူင်ၸဵမ်လဵၵ်ႉၸဵမ်ယႂ်ႇဢၼ်ၸူႉၵၼ်တုမ်ၵၼ်ၵႃႈတီႈႁေႃၶမ်းသုသၼ်ႇၼၼ်ႉၸဵတ်းဝၼ်းတဵမ်တဵမ်ဢေႃႈ။
၆ ၵႃႈတီႈၼၼ်ႉတဵမ်ဝႆႉတင်းၽႃႈၵင်ႈပိၵ်ႈၶျေႃးဢၼ်ၽိူၵ်ႇဢၼ်ၶဵဝ်ဢၼ်သွမ်ႇဢၼ်ဢဝ်ၸိူၵ်ႈပိၵ်ႈၶျေႃးဢၼ်လႅင်ႊၵမ်ႇမတ်ႉႁွႆႈဝႆႉၵႃႈတီႈၶူၺ်ႇငိုၼ်းၵႃႈတီႈသဝ်မၢၵ်ႇႁိၼ်ၽိူၵ်ႇတင်းလၢႆဢိၵ်ႇတင်းငူင်းငိုၼ်းငူင်းၶမ်းဢၼ်တၢင်ႇဝႆႉၵႃႈၼိူဝ်ၶႅပ်းမၢၵ်ႇႁိၼ်ဢၼ်သိူဝ်ႇၼၼ်ႉလႄႈပဵၼ်ဢၼ်လႅင်ႊဢၼ်သွမ်ႇဢၼ်ၽိူၵ်ႇဢၼ်လမ်ဝႆႉဢေႃႈ။
၇ ၶဝ်ဢွၼ်ၵၼ်ဢဝ်ၵွၵ်းၶမ်းဢၼ်လၢၵ်ႇပိူင်ႈၵၼ်ၼၼ်ႉပၼ်သူတ်ႉပၼ်ၵိၼ်ၼမ်ႉၸပိတ်ႈဢၼ်ၼမ်ၼႃႇလူင်ႇလၢင်မႅၼ်ႈၸွမ်းၸေးၸိမ်ႇၶုၼ်ႁေႃၶမ်းၼၼ်ႉဢေႃႈ။တၢင်းဢၼ်သူတ်ႉၵိၼ်ၼမ်ႉၸပိတ်ႉၼၼ်ႉပဵၼ်ၸွမ်းၼင်ႇတြႃးဢေႃႈ။
၈ ၽူႈလႂ်ဢမ်ႇႁဵတ်းပေႉႁဵတ်းၼႅင်ႇႁႂ်ႈၽူႈလႂ်လႆႈသူတ်ႉလႆႈၵိၼ်။
၉ ၶုၼ်ႁေႃၶမ်းမီးဢမိင်ႉဝႆႉတီႈၶဝ်ၵႃႈဢၼ်မီးဢရႃႇၵႃႈၼႂ်းႁေႃၶမ်းၼၼ်ႉႁႂ်ႈၵူႈၵေႃႉၵူႈၵူၼ်းလႆႈႁဵတ်းၸွမ်းၼင်ႇဢလူဝ်ႇတူဝ်ၸဝ်ႈၵဝ်ႇဢေႃႈ။ၼၢင်းႁေႃၶမ်းဝႃႇသတိၵေႃႈၶၢမ်ႇပွႆးပုၼ်ႈမေႈယိင်းဢၼ်မီးၵႃႈၼႂ်းႁေႃၶမ်းလူင်ဢႃႇသူၺ်ႇရုၼၼ်ႉဢေႃႈ။
၁၀ ၼႂ်းဝၼ်းဢၼ်ထူၼ်ႈထိုင်ၸဵတ်းဝၼ်းၼၼ်ႉမိူဝ်ႈဢၼ်ၶုၼ်ႁေႃၶမ်းသူတ်ႉၵိၼ်ၼမ်ႉၸပိတ်ႉလႄႈမီးၸႂ်ဢၼ်သႂၢင်ႇသိူဝ်းယူႇၼၼ်ႉၸိုင်မၼ်းမီးဢမိင်ႉတီႈမရုမၼ်ႇ၊ပိၸသ၊ႁႃႇပေႃႇၼ၊ပိၵသႉ၊ဢပႃႇၵသ၊ၸေႇသႃႇ၊ၵႃႇၵတ်ႉဢၼ်ပဵၼ်ၵူၼ်းတွၼ်ၸဵတ်းၵေႃႉဢၼ်ၶႃးၸႃးယူႇၵႃႈတီႈၽၢႆႇၼႃႈၶုၼ်လူင်ဢႃႇသူၺ်ႇရုၼၼ်ႉ
၁၁ ႁႂ်ႈၶဝ်ဢဝ်မွၵ်ႇႁူဝ်ရႃႇၸႃႉသရၽူႇတိုဝ်းပၼ်ၼၢင်းႁေႃၶမ်းဝႃႇသတိသေလႄႈပၢင်းမႃးၵႃႈတီႈမၼ်းႁႂ်ႈလႆႈၼႄပျႃႉတၢင်းဢၼ်ၼၢင်းႁေႃၶမ်းႁၢင်ႈလီၵႃႈႁိူဝ်ၼၼ်ႉၵႃႈတီႈၶုၼ်တင်းလၢႆဢိၵ်ႇတင်းၵူၼ်းတင်းလၢႆၸိူဝ်းၼၼ်ႉၵွပ်ႈပိူဝ်ႈဝႃႈမၼ်းၼၢင်းႁၢင်ႊလီၼႃႇလူင်လၢင်ၼၼ်ႉဢေႃႈ။
၁၂ ၵူၺ်းၵႃႈၼၢင်းႁေႃၶမ်းဝႃႇသတိၼၼ်ႉတွပ်ႇထဵင်ဢမိင်ႉၶုၼ်ႁေႃၶမ်းလႄႈဢမ်ႇၸွမ်းၵူၼ်းတွၼ်ၸိူဝ်းၼၼ်ႉလႄႈယူႇဢေႃႈ။ၵွပ်ႈပိူဝ်ႈၼင်ႇၼၼ်လႄႈၶုၼ်ႁေႃၶမ်းၸႂ်မႆႈၶႆႈၸႃႉၼႃႇလူင်လၢင်လႄႈမီးတၢင်းဢၼႆ်းတေႃးသႃႉမႆႈယူႇဢေႃႈ။
၁၃ လိုၼ်းၼၼ်ႉၶုၼ်ႁေႃၶမ်းႁွင်ႉဢဝ်ပိင်ႇၺႃႇသိဢၼ်ႁူႉလွင်ႈတြႃးဢုပတေႇထုင်းၸၢမ်ႇဢၼ်ၶုၼ်ႁေႃၶမ်းတၵ်းလႆႈတိူင်ႇပၢင်ႇၸဵတ်းပႃး၊ဢၼ်ပဵၼ်ၵႃႇသေႇၼ၊
၁၄ သေႇသႃႇ၊ဢႃႇတမႃႇသ၊တႃႇရိသ၊မေႇရိတ်ႉ၊မႃႇသေႇၼ၊မမုၵၼ်ဢၼ်ဝႃႈၶုၼ်ဢတႂၢင်းဝုၼ်ႇပေႇရသိ၊မေႇတိဢၼ်လႆႈထူပ်းႁၼ်ၶႃႈၶုၼ်ႁေႃၶမ်းလႄႈပဵၼ်ၵေႃႉဢၼ်မျၢတ်ႈလီၼႃႇသပေိူၼ်ႈၵႃႈၼႂ်းမိူင်းၸဝ်ႈၼၼ်ႉၼင်ႈယူႇၵႃႈတီႈႁိမ်းမၼ်းလႄႈ
၁၅ မၼ်းမီးဢမိင်ႉတွင်ႈထၢမ်တၵ်းလႆႈၸီႇယၢင်ႇတီႈၼၢင်းႁေႃၶမ်းဝႃႇသတိၸိူဝ်ႉၼင်ႇႁိုဝ်ၵွပ်ႈပိူဝ်ႈဢၼ်မၼ်းဢမ်ႇထွမ်ႇဢဝ်ဢမိင်ႉၶုၼ်ႁေႃၶမ်းၼၼ်ႉဢေႃႈ။
၁၆ မမုၵၼ်ႇလဝ်ႈလၢတ်ႈၵႃႈတီႈၽၢႆႇၼႃႈၶုၼ်ႁေႃၶမ်းဢိၵ်ႇတင်းမူးမၢတ်ႈၽွင်းမိူင်းတင်းလၢႆလႄႈဝႃႈ၊-ၼၢင်းႁေႃၶမ်းဝႃႇသတိၼၼ်ႉၽိတ်းပိူင်ႈၶုၼ်လူင်ၵူၺ်းဢမ်ႇၸႂ်ႈတီႈၶႃႈ။ၽိတ်းပိူင်ႈၶုၼ်တင်းသဵင်ႈတင်းလူင်ဢိၵ်ႇတင်းၶႃႈဝၢၼ်ႈၵူၼ်းမိူင်းၵူႈသိုင်ႇၵူႈမိူင်းၵူႈဢိူင်ႇၵူႈၵျၢၵ်ႈဢၼ်ၸဝ်ႈၶုၼ်လူင်ဢႃႇသူၺ်ႇရုဢုပ်ႉပိူင်ႇၼၼ်ႉတီႈၶႃႈယဝ်ႉ။
၁၇ လွင်ႈတၢင်းဢၼ်ၼၢင်းႁေႃၶမ်းႁဵတ်းၼႆႉတၵ်းငိၼ်းႁွတ်ႈၸွတ်ႇၵႂႃႇၵႃတီႈမေႈယိင်းတင်းသဵင်ႈတင်းလူင်လႄႈႁႂ်ၽူဝ်ၶဝ်ပဵၼ်ဢၼ်တႅမ်ႇယေႃႈမဝ်မၢင်သိုဝ်ႈၼႃႈတႂ်ႈတႃၶဝ်ၼႂ်းမိူဝ်ႈဢၼ်ပိူၼ်ႈလဝ်ႈလၢတ်ႈဝႃႈၶုၼ်ႁေႃၶမ်းဢႃႇသူၺ်ႇရုမီးဢမိင်ႉႁႂ်ႈဢဝ်ၼၢင်းႁေႃၶမ်းဝႃႇသတိမႃးၵႃႈတီႈၽၢႆႇၼႃႈမၼ်းၼၼ်ႉမၼ်းယင်းဢမ်ႇမႃး၊ဝႃႈၼင်ႇၼႆတီႈၶႃႈဢေႃႈ။
၁၈ မေႈယိင်းပေႇရသိတင်းမေႈယိင်းမေႇတိၸိူဝ်းၼၼ်ႉၵေႃႈတၵ်းဢွၼ်ၵၼ်ငိၼ်းလွင်ႈၼၢင်းႁေႃၶမ်းႁဵတ်းၼၼ်ႉလႄႈၶဝ်ၵေႃႈတၵ်းၶိုၼ်းတွပ်ႇၶိုၼ်းလၢတ်ႈတီႈမူးမၢတ်ႈၽွင်းမိူင်းၸဝ်ႈၶုၼ်လူင်ၶဝ်မိူၼ်ၸိူဝ်ႉၼင်ႇၼၼ်ၶႃႇဢေႃႈ။ၶဝ်တၵ်းမီးၸႂ်ဢၼ်ဢမ်ႇၸၢင်ႊဢႃးၼႃႇ၊ၸႂ်တေႃးသႃႉၽႄႈၵႂၢင်ႈၼမ်ၼႃႇတီႈၶႃႈဢေႃႈ။
၁၉ ပေႃးၸဝ်ႈၶုၼ်လူင်မီးဢလူဝ်ႇၸိုင်ၸဝ်ႈၶုၼ်လူင်ပူင်ဢမိင်ႉလႄႈဢဝ်သႂၢင်းသႂ်ႇတႅမ်ႈဝႆႉၵႃႈၼႂ်းထမ်ႇမသတ်ႉပေႇရသိ၊မေႇတိ၊ဢၼ်ဢမ်ႇၶၢႆႉဢမ်ႇပုတ်ႈလႆႈၼၼ်ႉသေၵမ်း။ၵမ်းလိုၼ်းယႃႇပေႁႂ်ႈဝႃႇသတိလႆႈဢၶႂင်ႉဢၼ်တၵ်းဢမ်ႇလႆႈၶဝ်ႈၸူးၵႃႈတီႈၸဝ်ႈၶုၼ်လူင်ဢႃႇသူၺ်ႇရုၼၼ်ႉသေၵမ်းၶႃႈ။ၸဝ်ႈၶုၼ်လူင်ဢဝ်ဢရႃႇမၼ်းၼၢင်းပၼ်တီႈမေႈယိင်းဢၼ်လီၼႃႇသေမၼ်းၼၢင်းၼၼ်ႉသေၵမ်းၶႃႈ။
၂၀ ပေႃးႁဵတ်းၸိူဝ်ႉၼင်ႇၼၼ်ၸိုင်မိူဝ်ႈဢၼ်ဢမိင်ႉၸဝ်ႈဢၼ်ၸဝ်ႈၶုၼ်လူင်ပူင်ၼၼ်ႉသႃႈၸွတ်ႇၵႂႃႇၵႃႈၼႂ်းသိုင်ႇၸိုင်ႈဝၢၼ်ႈမိူင်းၸဝ်ႈဢၼ်ယႂ်ႇၵႂၢင်ႈၼႃႇၵူႈတီႈၵူႈလႅၼ်ၼၼ်ႉၸိုင်မေႈယိင်းတင်းသဵင်ႈတင်းလူင်တၵ်းဢွၼ်ၵၼ်ရူဝ်ႇသေႇၵူဝ်ယမ်ႇၽူဝ်ၶဝ်ဢၼ်ယုတ်ႈဢၼ်မျၢတ်ႈၼၼ်ႉတီႈၶႃႈဢေႃႈ၊ဝႃႈၼင်ႇၼႆဢေႃႈ။
၂၁ ၵႂၢမ်းၼၼ်ႉပဵၼ်ဢၼ်ထုၵ်ႇၸႂ်ၵျိူၵ်ႈၸႂ်ၶုၼ်ႁေႃၶမ်းဢိၵ်ႇတင်းမူးမၢတ်ႈၽွင်းမိူင်းၸဝ်ႈတင်းလၢႆလႄႈၶုၼ်ႁေႃၶမ်းႁဵတ်းၸွမ်းၵႃႈၼင်ႇဢၼ်မမုၵၼ်ႇလဝ်ႈလၢတ်ႈၼၼ်ႉလႄႈပၼ်လိၵ်ႈဢမိင်ႉၸဝ်ႈၵႂႃႇၵႃႈၼႂ်းသိုင်ႇၸိုင်ႈဝၢၼ်ႈမိူင်းၵူႈတီႈၵူႈလႅၼ်၊ၵႃႈတီႈၵူႈသိုင်ႇၵူႈမိူင်းၸွမ်းလူၺ်ႈၵႂၢမ်းၽႃႇသႃႇမိူင်းၽႂ်မိူင်းမၼ်းၵႃႈတီႈၵူႈၸိူဝ်ႉၵူႈမဵဝ်းၸွမ်းလူၺ်ႈၵႂၢမ်းၽႃႇသႃႁင်းၽႂ်ႁင်းမၼ်း၊ႁႂ်ႈၵူၼ်းၸၢႆးလႆႈဢုပ်ႉပိူင်ႇၵႃႈၼိူဝ်ႁိူၼ်းတူဝ်ၸဝ်ႈၵဝ်ႇၼၼ်ႉဢေႃႈ။