၈
ထွမ်ႇဢမိင်ႉၶုၼ်ႁေႃၶမ်း
၁ ၽူႈလႂ်ပဵၼ်ၸိူဝ်ႉၼင်ႇၵေႃႉဢၼ်မီးၺၢၼ်ႇၼၼ်ႉ။ၽူႈလႂ်ႁူႉၸႅင်ႈဢၼၢၵ်ႈဢၼ်လိုၵ်ႉဢၼ်လမ်ႇၼၼ်ႉ။ၵူၼ်းၸမ်းၺၢၼ်ႇမၼ်းၸၢင်ႊႁႂ်ႈၼႃႈမၼ်းႁိူဝ်ႈႁိူင်းလႄႈတၢင်းဢၼ်မႃႇၼႃႉၸႂ်သုင်မၼ်းၼၼ်ႉယႃႉႁၢင်ႊယႃႉၽၢင်ၼႃႈမၼ်းဢေႃႈ။
၂ ၵဝ်တၵ်းပၼ်တၢင်းၵျၢမ်ႇတၢင်းပွင်လႄႈဝႃႈ၊-ထွၵ်ႈလူၺ်ႈသႅတ်ႉၸႃႇဢၼ်ႁဵတ်းတီႈၽြႃးပဵၼ်ၸဝ်ႈၼၼ်ႉသေလႄႈပႂ်ႉၸွမ်းဢမိင်ႉၶုၼ်ႁေႃၶမ်းယူႇတႃႉ၊ဝႃႈၼင်ႇၼႆဢေႃႈ။
၃ ယႃႇပလေိုမ်းႁဵတ်းသတိလႄႈဢွင်ႇသေၵႃႈတီႈၶုၼ်ႁေႃၶမ်းၵႂႃႇ။ယႃႇပေယိပ်းၵမ်လွင်ႈတၢင်းဢၼ်ဢမ်ႇလီဢမ်ႇငၢမ်း။ၶုၼ်ႁေႃၶမ်းတၵ်းၸီႇယၢင်ႇၸွမ်းၵႃႈၼင်ႇဢၼ်ဢလူဝ်မၼ်းၸဝ်ႈမီးၼၼ်ႉဢေႃႈ။
၄ ဢမိင်ႉၶုၼ်ႁေႃၶမ်းၼၼ်ႉပႃးတၼ်းၶူဝ်းဢေႃႈ။ၽူႈလႂ်တၵ်းလဝ်ႈထၢမ်တီႈမၼ်းၸဝ်ႈလႄႈဝႃႈ၊-ၸဝ်ႈႁဝ်းႁဵတ်းၵႃႈသင်၊ဝႃႈၼင်ႇၼႆ၅ၼၼ်ႉလႆႈ။
၅ ၵေႃႉဢၼ်ပႂ်ႉၸွမ်းဢမိင်ႉၸဝ်ႈယူႇၼၼ်ႉတၵ်းၵၢင်းလွတ်ႈတင်းရႃႇၸဝူတ်ႈလႄႈႁူဝ်ၸႂ်ၵေႃႉဢၼ်မီးၺၢၼ်ႇၼၼ်ႉၵေႃႈၸၢင်ႊႁူႉႁၼ်ၶိင်ႇမၼ်းၶႃႇမၼ်းဢိၵ်ႇတင်းဢၶႂၢင်ႉဢၼ်လႆႈၸီႇယၢင်ႇၼၼ်ႉယူႇဢေႃႈ။
၆ ပုၼ်ႈၵႃႈဢၼ်ၵူၼ်းၵျၢမ်ႇပွင်ၼၼ်ႉၸိုင်မီးၶိင်ႇမၼ်းၶႃႈမၼ်းဢိၵ်ႇတင်းဢၶႂၢင်ႉဢၼ်လႆႈၸီႇယၢင်ႇၼၼ်ႉဢေႃႈ။လွင်ႈမၼ်းၸမ်းတၢင်းဢၼ်ၵူၼ်းလႆႈၶၢမ်ႇတုၵ်ႉၶႃႉတၢင်းၽၢၼ်ၼၼ်ႉယႂ်ႇၼႃႇလူင်လၢင်တီႈၵူၼ်းဢေႃႈ။
၇ ၽူႈလႂ်ဢမ်ႇႁူႉလွင်ႈဢၼ်တၵ်းပဵၼ်မႃးမိူဝ်ႈၵမ်းလိုၼ်းၼၼ်ႉ။ၽူႈလႂ်တၵ်းလၢတ်ႈလွင်ႈဢၼ်ပဵၼ်မႃးၸိူဝ်ႉၼင်ႇႁိုဝ်ၼၼ်ႉလႆႈ။
၈ ၵေႃႉဢၼ်ဢုပ်ႉပိူင်ႇၸႂ်ဝိၺိၺ်ႇလႄႈၶျုၵ်ႈဝႆႉလႆႈၼၼ်ႉဢမ်ႇမီးသေၵေႃႉသေၵူၼ်း။ၽူႈလႂ်ၵေႃႈဢမ်ႇမီးတၼ်းၶူဝ်းဢၼ်ဢုပ်ႉထိင်းဝၼ်းတၢႆမၼ်းၼၼ်ႉ။ဢမ်ႇမီးဢၶႂၢင်ႉဢၼ်လႆႈဢွၵ်ႇသေၵႃႈၼႂ်းဢမူႉသိုၵ်းႁင်းၵူၺ်းမၼ်းၼၼ်ႉ။တူႉၸရိူၵ်ႈၵေႃႈဢမ်ႇပွႆႇၵေႃႉဢၼ်ၸၢပ်ႈသႅင်ႇၵၼ်တင်းမၼ်းၼၼ်ႉဢွၵ်ႇ။
၉ ၵဝ်ထူပ်းႁၼ်လွင်ႈတၢင်းၵူႈၸိူဝ်ႉၵူႈပိူင်ၼႆႉလႄႈၶႆႈၸႂ်ဝူၼ်ႉၸႂ်လူၺ်ႈၵႃႈဢၼ်ႁဵတ်းၵႃႈတီႈတႂ်ႈၵၢင်ဝၼ်းၼႆႉၸိူဝ်းၼၼ်ႉယဝ်ႉ။မီးၶိင်ႇဢၼ်ၵေႃႉၼိုင်ႈဢုပ်ႉပိူင်ႇၵႃႈၼိူဝ်ၵေႃႉၼိုင်ႈႁႂ်ႈဢၵျူဝ်းတူဝ်ၸဝ်ႈၵဝ်ႇလူႉၼၼ်ႉယူႇဢေႃႈ။
၁၀ ၼွၵ်ႈသေၼၼ်ႉၵဝ်ႁၼ်လွင်ႈဢၼ်ၶဝ်ၸိူဝ်းဢၼ်ႁၢႆႉဢၼ်ယုတ်ႈဢၼ်ဢွၼ်ၵၼ်မႃးလႄႈလုၵ်ႉသေၵႃႈၼႂ်းထႃႇၼႃႉတီႈဢၼ်မူတ်းၸၢင်ႇဢွၵ်ႇၵႂႃႇၼၼ်ႉလႆႈၶၢမ်ႇတၢင်းဢၼ်သၢင်းၵျူဝ်ႇဢိၵ်ႇတင်းလွင်ႈဢၼ်ၽူႈလႂ်သေၵေႃႉသေၵူၼ်းဢမ်ႇၶုၵ်းၸႂ်လႆႈၶႆႈၸႂ်ထူပ်းၶဝ်ၼၼ်ႉၵႃႈၼႂ်းဝဵင်းဢၼ်ၶဝ်ႁဵတ်းဢၼ်ႁၢႆႉဢၼ်ယုတ်ႈၼၼ်ႉယဝ်ႉ။
၁၁ လွင်ႈတၢင်းၼၼ်ႉၵေႃႈပဵၼ်ဢႃႉၼတ်ႉတႃႉဢေႃႈ။ၵွပ်ႈပိူဝ်ႈဢၼ်ယင်းဢမ်ႇၸႅတ်ႈထၢမ်ၸႅတ်ႈတူၺ်းဢမူႉတၢင်းဢၼ်ႁၢႆႉဢၼ်မိူၵ်ႈၶၼ်ၶၼ်ၽႂ်းၽႂ်းသေလႄႈပၼ်တၢမ်ႇဢပျႅတ်ႈၼၼ်ႉလႄႈလုၵ်ႈၵူၼ်းတင်းလၢႆဢွၼ်ၵၼ်ဝႆႉသၽေႃးၵႅၼ်ႇၶႅင်ၼႃႇလူင်လၢင်ႁႂ်ႈလႆႈႁဵတ်းဢမူႉတၢင်းဢၼ်ႁၢႆႉဢၼ်မိူၵ်ႈဢေႃႈ။
၁၂ ပိၵ်ႉသမ်ႉၵေႃႉဢၼ်ပူၼ်ႉလိူဝ်ၼၼ်ႉႁဵတ်းဢမူႉတၢင်းဢၼ်ႁၢႆႉဢၼ်မိူၵ်ႈတေႃႇထိုင်ႁွတ်ႈပၢၵ်ႇပွၵ်ႈလႄႈၸူဝ်ႈဢသၢၵ်ႈမၼ်းယၢဝ်းယိုၼ်းသေၵေႃႈၵဝ်ႁူႉလွင်ႈဢၼ်ၶဝ်ၸိူဝ်းဢၼ်ၵူဝ်ႁႄၽြႃးပဵၼ်ၸဝ်ႈၼၼ်ႉတၵ်းလႆႈၶၢမ်ႇဢၵျူဝ်းဢၼ်လီၵွပ်ႈပိူဝ်ႈဢၼ်ၵူဝ်ႁႄၵႃႈတီႈၽၢႆႇၼႃႈမၼ်းၸဝ်ႈၼၼ်ႉယူႇဢမၢၼ်ႇၶၢၼ်ပဵၼ်ဢေႃႈ။
၁၃ ၵေႃႉဢၼ်ႁၢႆႉဢၼ်မိူၵ်ႈၼၼ်ႉဢမ်ႇလႆႈၶၢမ်ႇဢၵျူဝ်းဢၼ်လီ။ဢသၢၵ်ႈမၼ်းၵေႃႈဢမ်ႇလႆႈယိုၼ်းလႆႈယၢဝ်းလႄႈတၵ်းမိူၼ်ၸိူဝ်ႉၼင်ႇႁူမ်ႈၵွင်ႉငဝ်းၼၼ်ႉၵွပ်ႈပိူဝ်ႈဢၼ်မၼ်းဢမ်ႇၵူဝ်ဢမ်ႇႁႄၵႃႈတီႈၽၢႆႇၼႃႈၽြႃးပဵၼ်ၸဝ်ႈၼၼ်ႉဢေႃႈ။
၁၄ လွင်ႈတၢင်းဢႃႉၼတ်ႉတႃႉဢၼ်ၸၢင်ႊပဵၼ်ၵႃႈၼိူဝ်လိၼ်မိူင်းၼႆႉပႃးၼိုင်ႈၸမ်းၶဝ်ၸိူဝ်းဢၼ်သိုဝ်ႈတေႃႇၵမ်ႈၽွင်ႈလႆႈဢွၼ်ၵၼ်ၶၢမ်ႇမိူၼ်ၸိူဝ်ႉၼင်ႇဢၼ်ၵေႃႉဢၼ်ႁၢႆႉဢၼ်မိူၵ်ႈထိူၵ်ႈၶၢမ်ႇၵွပ်ႈပိူဝ်ႈဢမူႉဢၼ်မၼ်းႁဵတ်းၼၼ်ႉဢေႃႈ။မိူၼ်ၸိူဝ်ႉၼင်ႇၼၼ်ၶဝ်ၸိူဝ်းဢၼ်ႁၢႆႉဢၼ်မိူၵ်ႈၼၼ်ႉၵမ်ႈၽွင်ႈလႆႈဢွၼ်ၵၼ်ၶၢမ်ႇဢဝ်မိူၼ်ၸိူဝ်ႉၼင်ႇၵေႃႉဢၼ်သိုဝ်ႈတေႃႇထိူၵ်ႈၶၢမ်ႇၵွပ်ႈပိူဝ်ႈဢမူႉဢၼ်မၼ်းႁဵတ်းၼၼ်ႉဢေႃႈ။ၵဝ်လႆႈဝႃႈလွင်ႈတၢင်းၼၼ်ႉၵေႃႈပဵၼ်ဢႃႉၼတ်ႉတႃႉဢေႃႈ၊ဝႃႈၼင်ႇၼႆဢေႃႈ။
၁၅ မိူဝ်ႈၼၼ်ႉၵဝ်ယွင်ႈယေႃးတၢင်းဢၼ်မူၼ်ႈဢၼ်ပျေႃႇဢေႃႈ။လွင်ႈမၼ်းၸမ်းတၢင်းဢၼ်ယိင်ႈၶႅၼ်းလီၼႃႇသေတၢင်းဢၼ်ၵိၼ်ဢၼ်ၶူပ်း၊တၢင်းဢၼ်မူၼ်ႈဢၼ်ပျေႃႇၼၼ်ႉဢမ်ႇမီးတီႈၵူၼ်းႁဝ်းၵႃႈတီႈတႂ်ႈၵၢင်ဝၼ်းၼႆႉ။ၼႂ်းဢၵျူဝ်းဢၼ်မၼ်းၶတ်းၸႂ်ဢဝ်ႁႅင်းဢွၵ်ႇႁဵတ်းလႄႈလႆႈၼႂ်းၸူဝ်ႈဢသၢၵ်ႈမၼ်းဢၼ်ၽြႃးပဵၼ်ၸဝ်ႈဢိတ်းလူပၼ်ၵႃႈတီႈတႂ်ႈၵၢင်ဝၼ်းၸိူဝ်းၼၼ်ႉမၼ်းလႆႈၶၢမ်ႇဢဝ်ဢၵျူဝ်းၼၼ်ႉၵူၺ်းဢေႃႈ။
၁၆ မိူဝ်ႈဢၼ်ၵဝ်တိုၵ်းယူင်းႁူဝ်ၸႂ်ၵဝ်ႁႂ်ႈလႆႈႁူႉပိင်ႇၺႃႇတြႃးဢိၵ်ႇတင်းႁႂ်ႈလႆႈႁၼ်လွင်ႈတၢင်းဢၼ်ႁဵတ်းၵႃႈၼိူဝ်လိၼ်မိူင်းၼႆႉမိူဝ်ႈဢၼ်ၵဝ်ႁၼ်လွင်ႈဢၼ်ၵူၼ်းၵမ်ႈၽွင်ႈယင်းဢမ်ႇၼွၼ်းတင်းဝၼ်းတင်းၶိုၼ်းလႄႈယူႇၼၼ်ႉၸိုင်၊
၁၇ ၵဝ်လူတူၺ်းလွင်ႈတၢင်းဢၼ်ၽြႃးပဵၼ်ၸဝ်ႈႁဵတ်းၵူႈၸိူဝ်ႉၵူႈပိူင်ၼၼ်ႉလႄႈႁၼ်လွင်ႈဢၼ်ၵူၼ်းႁဝ်းၸႅတ်ႈတူၺ်းလွင်ႈတၢင်းဢၼ်ႁဵတ်းဝႆႉၵႃႈတီႈတႂ်ႈၵၢင်ဝၼ်းလႄႈဢမ်ႇသဵင်ႈလႆႈၼၼ်ႉဢေႃႈ။ပိၵ်ႉသမ်ႉမၼ်းၶတ်းၸႂ်လႄႈၸႅတ်ႈတူၺ်းသေၵေႃႈမၼ်းဢမ်ႇႁူႉတင်းသဵင်ႈတင်းမူတ်းလႆႈ။လိူဝ်သေၼၼ်ႉဢမ်ႇၵႃးပိၵ်ႉသမ်ႉၵေႃႉဢၼ်မီးၺၢၼ်ႇၼၼ်ႉထၢင်ႇတၵ်းႁူႉလႆႈသေၵေႃႈတၢင်းၵျၢမ်ႇတၢင်းပွင်မၼ်းဢမ်ႇပဵၼ်လႆႈ။